- By CNI
- Category: နိုင်ငံရေး
- Hits: 305
CNI News
၂၀၂၄ ခုနှစ်၊ ဖေဖော်ဝါရီ ၁၀
၂၀၁၀ ခုနှစ်၊ ဖေဖော်ဝါရီ ၁၀ ရက်နေ့က ဗိုလ်ချုပ်မှူးကြီး သန်းရွှေ (ငြိမ်း) ပြဋ္ဌာန်းထားခဲ့သော ပြည်သူ့စစ်မှုထမ်းဥပဒေကို ၂၀၂၄ ခုနှစ်၊ ဖေဖော်ဝါရီ ၁၀ ရက်နေ့မှစတင်၍ အာဏာတည်စေရမည်ဟု ဗိုလ်ချုပ်မှူးကြီးမင်းအောင်လှိုင်က သတ်မှတ်ကြေညာခဲ့သည်။
အဆိုပါ ပြည်သူ့စစ်မှုထမ်းဥပဒေကိုလည်း ထုတ်ပြန်သွားခဲ့သည်။
- By CNI
- Category: နိုင်ငံရေး
- Hits: 164
CNI News
၂၀၂၄ ခုနှစ်၊ ဖေဖော်ဝါရီ ၉
ချင်းပြည်ကောင်စီမှ ချင်းပြည်အစိုးရဖွဲ့ခြင်းကို အခြားသော ချင်းအဖွဲ့အစည်းများက လက်မခံကြောင်း အသီးသီး ထုတ်ပြန်ကြေညာခဲ့သည်။
ချင်းပြည်အစိုးရဖွဲ့စည်းပုံအခြေခံဥပဒေအရ ရွေးချယ်တင်မြှောက်ရေးကော်မတီမှ အဆိုပြုတင်သွင်းသော ချင်းပြည်အစိုးရအဖွဲ့ ဝန်ကြီးချုပ်နှင့် ဝန်ကြီးများ၊ ရှေ့နေချုပ်၊ စာရင်းစစ်ချုပ်၊ ချင်းပြည်တရားလွှတ်တော်ချုပ် တရားသူကြီးချုပ်နှင့် တရားသူကြီးများ၏ အမည်စာရင်းများကို အတည်ပြုပြီး ချင်းပြည်လွှတ်တော် အပါအဝင် မဏ္ဍိုင်ကြီး (၃) ရပ်ကို ဖွဲ့စည်းအတည်ပြုနိုင်ခဲ့ကြောင်း ဖေဖော်ဝါရီ ၁ ရက်နေ့က ထုတ်ပြန်ခဲ့သည်။
ချင်းပြည်အတွင်း ချင်းအမျိုးသားညီညွတ်ရေးကို တည်ဆောက်နေသော ကာလအတွင်း အလျင်စလို အစိုးရဖွဲ့ခြင်း မျိုး မလုပ်ရန် ပြည်တွင်း/ပြည်ပရှိ ချင်းပြည်သူများနှင့် ချင်းတော်လှန်ရေးအဖွဲ့များက အကြိမ်ကြိမ် သတိပေးခဲ့ သော်လည်း ချင်းပြည်အစိုးရကို ဖွဲ့စည်းခဲ့ကြောင်း၊ အဆိုပါ ကိစ္စမှာ ချင်းအမျိုးသား စည်းလုံးညီညွတ်ရေးကို အဟန့်အတား ဖြစ်စေကြောင်း ကြားကာလချင်းအမျိုးသား အတိုင်ပင်ခံကောင်စီက ဖေဖော်ဝါရီ ၃ ရက်နေ့မှာ ထုတ်ပြန်ကန့်ကွက်ခဲ့သည်။
ZRA တပ်ဖွဲ့ကို တွေ့ရစဉ်
လက်ရှိကာလမျိုးတွင် အစိုးရဖွဲ့စည်းခြင်းက စည်းလုံးညီညွတ်မှုကို ထိခိုက်စေကြောင်း မြန်မာ့နိုင်ငံရေးလေ့လာ သုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။
၎င်းက “အဲဒီလုပ်ရပ်မျိုး မလုပ်သင့်ဘူးပေါ့၊ အစိုးရအဖွဲ့ ဖွဲ့တယ်ဆိုပြီးတော့ တစ်ပြည်လုံးလဲ မလွမ်းခြုံနိုင် နောက်ပြီးတော့ အစိုးရတပ်ဖွဲ့တွေလည်း မရှင်းလင်းနိုင်သေးတဲ့ ကာလမှာ ဒီလိုမျိုးတွေ လုပ်တာဟာ ညီညွတ်ရေး ပျက်ပြားပြီးတော့ တော်လှန်ရေး လုပ်ရှားမှုတွေကို ထိခိုက်နစ်နာစေနိုင်တယ်လို့ ကျနော်တော့ သုံးသပ်ပါတယ်” ဟု ပြောသည်။
ထို့အတူ ချင်းပြည်ကောင်စီ၏ ချင်းပြည်အစိုးရဖွဲ့စည်းခြင်းမှာ ဇိုမီးတိုင်းရင်းသားဒေသများတွင် အကျိုး သက်ရောက်မှာ မဟုတ်ကြောင်း၊ ဇိုမီးလူမျိုးများ၏ ကိုယ်စားပြုအစိုးရ မဟုတ်ကြောင်း ဇိုမီးနိုင်ငံရေးဆိုင်ရာ ပူးပေါင်းဆောင်ရွက်ရေး ကော်မတီ (ZPCC) ယနေ့ (ဖေဖော်ဝါရီ ၉ ရက်)မှာ ထုတ်ပြန်ခဲ့သည်။
ချင်းပြည်အစိုးရဖွဲ့စည်းသော်လည်း ပြည်မ၏ အကူအညီမပါဘဲ ရပ်တည်ရန် ခက်ခဲနိုင်ကြောင်း၊ ချင်းမျိုးနွယ်စု အတွင်းတွင်လည်း သဘောထား ကွဲလွဲနိုင်ကြောင်း နိုင်ငံရေးသမားတစ်ဦးက သုံးသပ်သည်။
ချင်းပြည်ကောင်စီကို တွေ့ရစဉ်
၎င်းက “ဘယ်လိုမှ အလုပ်မဖြစ်ဘူး။ အစကတည်းက ကိုယ်ဟာကိုယ် မရပ်တည်နိုင်ဘူး။ အခက်အခဲရှိတယ်၊ လေယာဉ်ပျံကွင်းတောင် ဆောက်လို့မရတဲ့ နေရာ၊ ပြည်မရဲ့ အထောက်အကူ မရှိဘဲနဲ့ ဘယ်လိုမှ မရပ်တည် နိုင်ဘူး။ ဟိုဖက်က အိန္ဒိယ မီဇိုရမ်နဲ့ ပေါင်းမလား။ သွားပေါင်းလေ မီဇိုရမ်အုပ်ချုပ်တာ ခံရမှာပဲ။ လူမျိုးရေးအရ လည်း မီဇိုနဲ့ကြတော့ ဟိုကလူရှိုင်းချင်းပေါ့၊ နည်းနည်းလေးက ကွဲပြန်တယ်၊ ဒီဖက်မှာ လူရှိုင်းက နည်းနည်းပါးပါးရှိ တယ်။ လူရှိုင်းတွေကလည်း ပညာတတ်တွေပေါ့၊ အဲဒီလိုမျိုး အပိုင်းအစတွေက ကွဲနေတဲ့ သမိုင်းတွေက ဘယ်လိုမှ ကိုယ်ဟာကိုယ် ရပ်တည်ဖို့က မဖြစ်နိုင်ဘူး။ ပင်လုံစာချုပ်ပြီးတဲ့အချိန်မှာ သူတို့ ဆွေးနွေးကြတဲ့အခါမှာ ကိုယ့်ဟာ ကိုယ် ရပ်တည်နိုင်လောက်တယ်လို့ ယူဆတဲ့ မြန်မာနိုင်ငံမှာ ပြည်နယ်က ရှမ်းတစ်ခုပဲ ရှိတယ်၊ ဒါတောင်မှ ပြည်ထောင်စုဖက်ကနေ အခွန်ထောက်ပံ့တာ မကင်းနိုင်ဘူး။ အဲဒီတော့ ဒီချင်းဆိုတာတော့ ဝေလာဝေးပေါ့” ဟု CNI သတင်းဌာနသို့ ပြောသည်။
လက်ရှိ ချင်းပြည်နယ်တွင် ချင်းအမျိုးသားတပ်ဦး (CNF)၊ ဇိုမီးတော်လှန်ရေးတပ်မတော် (ZRA)၊ ချင်းအမျိုးသား ကာကွယ်ရေးတပ်ဖွဲ့ (CNDF) အပါအဝင် ဒေသအခြေပြု ပြည်သူ့ကာကွယ်ရေးတပ် (LPDF) များ လှုပ်ရှားလျက် ရှိနေပြီး ချင်းလူမျိုးစုအားဖြင့်လည်း ၅၀ ကျော်ရှိနေကြောင်း သိရသည်။
- By CNI
- Category: နိုင်ငံရေး
- Hits: 173
CNI News
၂၀၂၄ ခုနှစ်၊ ဖေဖော်ဝါရီ ၉
နွေဦးတော်လှန်ရေးတွင် ပါဝင်၍ မြန်မာ့တပ်မတော်ကို တိုက်ခိုက်နေသော ချင်းအမျိုးသားတပ်ဦး(CNF)သည် မြန်မာ့တပ်မတော်နှင့် လျှို့ဝှက်ဆက်သွယ်၍ တွေ့ဆုံဆွေးနွေးရန် ကြိုးပမ်းနေသည်ကို တွေ့ရသည်ဟု ဇိုမီးနိုင်ငံ ရေးဆိုင်ရာ ပူးပေါင်းဆောင်ရွက်ရေးကော်မတီ(ZPCC)/ ဇိုမီးတော်လှန်ရေးတပ်မတော်(အရှေ့ပိုင်းတိုင်း-ZRA) က ၂၀၂၄ ခုနှစ်၊ ဖေဖော်ဝါရီ ၉ ရက်နေ့တွင် သတင်းထုတ်ပြန်ခဲ့သည်။
ZRA သည် ဖက်ဒရယ်ပြည်ထောင်စု တည်ဆောက်ရေးအတွက် ညီနောင်တိုင်းရင်းသား လက်နက်ကိုင် အဖွဲ့များ နှင့် အတူတကွ လက်တွဲချိတ်ဆက်ရန် ကြိုးပမ်းခဲ့ရာတွင် USDP အစိုးရလက်ထက်၌ ချင်းအမျိုးသားတပ်ဦး(CN F)က မိမိတို့ ZRA ကို ညီညွတ်သောတိုင်းရင်းသားလူမျိုးများ ဖက်ဒရယ်ကောင်စီ(UNFC)တွင် အဖွဲ့ဝင်ဖြစ်ရေးမှ ဟန့်တားခဲ့သလို NLD အစိုးရလက်ထက်တွင်လည်း ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ(UP DJC)အဖွဲ့ဝင်ဖြစ်ရေးမှ ဟန့်တားခဲ့ကြောင်း ထုတ်ပြန်ချက်တွင် ဖော်ပြထားသည်။
အလားတူ နွေဦးတော်လှန်ရေးကာလတွင် အမျိုးသားညီညွတ်ရေးအတိုင်ပင်ခံကောင်စီ(NUCC)အဖွဲ့ဝင် ဖြစ်ရေး မှ ဟန့်တားခဲ့ခြင်းနှင့် ဇိုမီးလူမျိုးတို့၏ ကိုယ်ပိုင်ပြဋ္ဌာန်းခွင့်နှင့် ကိုယ်ပိုင်အုပ်ချုပ်ခွင့် အပြည့်အဝ ရရှိရေးကို နည်း လမ်းမျိုးစုံဖြင့် ခေတ်အဆက်ဆက်တွင် ဟန့်တားပိတ်ပင်ခဲ့ကြသည်ဟု ZPCC/ZRA က ထုတ်ပြန်ခဲ့သည်။
ချင်းအမျိုးသားတပ်ဦး(CNF)ကို တွေ့ရစဉ်
ZPCC/ZRA က “ပြည်သူလူထုက ဇိုမီးတော်လှန်ရေးတပ်မတော်(အရှေ့ပိုင်းတိုင်း)-ZRA (Eastern Command) ကို အမြင်မှားစေရန်အတွက်၊ မြန်မာစစ်တပ်ကို အားပေးကူညီသည်ဟု စွပ်စွဲကာ၊ မုသားဝါဒ အသုံးချပြီး သတင်း အမှား ဖြန့်ဝေခြင်းမှအစ နည်းမျိုးစုံဖြင့် တိုက်ခိုက်ခြင်းများ ပြုလုပ်ခဲ့သည်။ သို့ရာတွင် ချင်းအမျိုးသားတပ်ဦး(CN F) အဖွဲ့အနေဖြင့် ယခင်က မြန်မာစစ်တပ်နှင့် ဆက်သွယ် လက်တွဲခဲ့သည့်အတိုင်း ယနေ့ကာလတွင် လျှို့ဝှက် ဆက်သွယ်၍ တွေ့ဆုံ ဆွေးနွေးရန် ကြိုးပမ်းနေသည်ကို တွေ့ရသည်”ဟု ပြောသည်။
CNF သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) လက်မှတ်ထိုးထားသည့် ချင်း လက်နက်ကိုင်အဖွဲ့ဖြစ်ပြီး ၂၀၂၁ ခုနှစ်၊ဖေဖော်ဝါရီ ၁ ရက်နေ့မှ စတင်ပေါ်ပေါက်လာသည့် နွေဦးတော်လှန်ရေး တွင် ပါဝင်၍ မြန်မာ့တပ်မတော်ကို တိုက်ခိုက်လျက်ရှိနေသည်။
ထို့နောက် အမျိုးသားညီညွတ်ရေးအစိုးရအဖွဲ့(NUG)တွင် CNF ၏ ဒုဥက္ကဋ္ဌဖြစ်သူ ဒေါက်တာလျန်မှုန်းဆာခေါင်း က ဝန်ကြီးအဖြစ် တာဝန်ယူထားသလို PDF များကိုလည်း CNF က စစ်သင်တန်းပေးလျက်ရှိပြီး ပူးပေါင်း၍ မြန်မာ့တပ်မတော်ကို တိုက်ခိုက်ကာ နစက၏ ငြိမ်းချမ်းရေး ဆွေးနွေးရန် ဖိတ်ခေါ်ချက်ကို ငြင်းဆန်ထားသည်။
သို့သော် ZPCC/ZRA ကတော့ CNF သည် မြန်မာ့တပ်မတော်နှင့် လျှို့ဝှက်ဆက်သွယ်၍ တွေ့ဆုံဆွေးနွေးရန် ကြိုးပမ်းနေသည်ဟု စွပ်စွဲကာ ထုတ်ပြန်ခဲ့သည်။
ထို့နောက် ချင်းအမျိုးသားတပ်ဦး(CNF)မှ ဦးဆောင်ဖွဲ့စည်းခဲ့သည့် ချင်းပြည်ကောင်စီ(Chinland Council)၊ ချင်းပြည်အစိုးရအဖွဲ့၊ ချင်းအမျိုးသားအတိုင်ပင်ခံကောင်စီ(ICNCC)တို့ကို ဇိုမီးတော်လှန်ရေးတပ်မတော်(ZRA) နှင့် ဇိုမီးနိုင်ငံရေးဆိုင်ရာ ပူးပေါင်းဆောင်ရွက်ရေးကော်မတီ(ZPCC)တို့က အသိအမှတ်မပြုကြောင်းနှင့် ချင်းပြည် နယ် လွှတ်တော်ကိုယ်စားပြုကော်မတီ(CRCH)ကိုလည်း အသိအမှတ်မပြုကြောင်း ထုတ်ပြန်ခဲ့သည်။
ZPCC/ZRA ၏ ထုတ်ပြန်ချက်ကို တွေ့ရစဉ်
အလားတူ CNF က ရေးဆွဲပြဋ္ဌာန်းခဲ့သော် ချင်းပြည်ဖွဲ့စည်းပုံအခြေခံဥပဒေ(Chinland Constitution)ကိုလည်း အသိအမှတ်မပြုကြောင်း ZPCC/ZRA က ပြောသည်။
ZPCC/ZRA က “ မြန်မာ့နွေဦးတော်လှန်ရေး ကာလတွင်၊ ဇိုဂမ် (ခေါ်) ဇိုမီးပြည်အတွက် ဇိုမီးလူမျိုးတို့၏ နိုင်ငံ ရေး ဦးတည်ချက်နှင့် လမ်းစဉ်အဖြစ် ဇိုဂမ်ပဋိညာဉ်ကို ဇိုမီးတိုင်းရင်းသားများကိုယ်စား ဇိုမီးနိုင်ငံရေးဆိုင်ရာ ပူး ပေါင်းဆောင်ရွက်ရေး ကော်မတီ(ZPCC)မှ ၂၀၂၁ ခုနှစ်၊ စက်တင်ဘာ ၁၈ ရက်နေ့တွင် ပြဋ္ဌာန်းအတည်ပြု ကြေညာခဲ့ပြီးဖြစ်သည်။ အသစ်ထွက်ပေါ်လာသည့် ချင်းပြည်ကောင်စီ၏ နိုင်ငံရေးပါတီ အစုအဖွဲ့တွင် ဇိုမီး ဒီမိုကရေစီအဖွဲ့ချုပ်(ZCD)ပါတီနှင့် ZCD ပါတီမှ ရွေးကောက်ခံ လွှတ်တော်ကိုယ်စားလှယ်များ ပါဝင်ခြင်း မရှိ သည့်အပြင် တိုင်းရင်းသား လက်နက်ကိုင် အစုအဖွဲ့ထဲတွင်လည်း ဇိုမီးတို့၏ အမျိုးသားတပ်မတော်ဖြစ်သည့် ဇိုမီး တော်လှန်ရေးတပ်မတော်(အရှေ့ပိုင်းတိုင်း) အဖွဲ့ မပါဝင်ခဲ့ပေ။ သို့ဖြစ်၍ ချင်းအမျိုးသားတပ်ဦး(CNF) အဖွဲ့ က ဦးဆောင်ရေးဆွဲသည့် ချင်းပြည်ဖွဲ့စည်းပုံအခြေခံဥပဒေသည် ဇိုဂမ်ပဋိညာဉ် ပြဋ္ဌာန်းချက်ပါအတိုင်း ဇိုဂမ် (ခေါ်) ဇိုမီးပြည်နှင့် ဇိုမီးလူမျိုးတို့အပေါ် လုံးဝ သက်ရောက်ခြင်း မရှိကြောင်း ကြေညာအပ်သည်”ဟု ထုတ်ပြန် ခဲ့သည်။
ZPCC/ZRA ၏ စွပ်စွဲချက်နှင့် ပတ်သက်ပြီး ချင်းအမျိုးသားတပ်ဦး(CNF)မှ တာဝန်ရှိသူများထံ ဆက်သွယ် မေးမြန်းသော်လည်း ဖုန်းအဆက်အသွယ် မရသေးပေ။
- By CNI
- Category: နိုင်ငံရေး
- Hits: 254
CNI News
၂၀၂၄ ခုနှစ်၊ ဖေဖော်ဝါရီ ၈
ရှမ်းပြည်နယ်မြောက်ပိုင်း၊ ကွတ်ခိုင်မြို့တွင် ကချင်အမျိုးသားတော်လှန်ရေးနေ့ ကျင်းပရန် ပြင်ဆင်နေချိန် ပလောင်ပြည်လွတ်မြောက်ရေးတပ်ဦး (PSLF/TNLA)မှ တားဆီးနှောင့်ယှက်ခြင်းကို ကန့်ကွက်ကြောင်း ကွတ်ခိုင်ကချင်တမန်အဖွဲ့က ဖေဖော်ဝါရီ ၆ ရက်စွဲဖြင့် ထုတ်ပြန်ခဲ့သည်။
ဖေဖော်ဝါရီ ၅ ရက်နေ့တွင် ကျရောက်သော ၆၃ နှစ်မြောက် ကချင်အမျိုးသားတော်လှန်ရေးနေ့ အထိမ်းအမှတ် အဖြစ် ကွတ်ခိုင်မြို့နေ ကချင်များက မိမိတို့၏ နေအိမ်ခြံဝင်းအတွင်း ကချင်အမျိုးသားအလံ လွှင့်ထူထားစဉ် အထက်အမိန့်အရဟုဆိုကာ TNLA တပ်ဖွဲ့မှ ပိတ်ပင်ခြင်း၊ တားဆီးခြင်း၊ အလံတိုင်ကို ချိုးဖျက်၊ ဆွဲဆုတ်၊ ဖြုတ်ချ၊ ယူဆောင်သွားခြင်းနှင့် အလံတိုင်အား ခြေဖြင့်ကန်ခြင်းများ ပြုလုပ်ကြောင်း ထုတ်ပြန်ချက်တွင် ဖော်ပြထားသည်။
ကွတ်ခိုင်မြို့ကို TNLA က တိုက်ယူထားခြင်းဟု ပြောဆိုကာ အာဏာရှင်ဆန်ဆန် အမိန့်ပေးဆက်ဆံခဲ့ကြောင်း၊ လက်နက်မဲ့ ပြည်သူများကို သေနတ်မောင်းတင် ချိန်ရွယ်ခြိမ်းခြောက်ခြင်းများ ပြုလုပ်ခဲ့ကြောင်း ဖော်ပြထားသည်။
TNLA တပ်ဖွဲ့ကို တွေ့ရစဉ်
အဆိုပါ ကိစ္စအား နှစ်ဖက်တာဝန်ရှိ ခေါင်းဆောင်များက အမြန်ဆုံးဖြေရှင်းသင့်ကြောင်း၊ လူမျိုးရေးပဋိပက္ခ မဖြစ် ရန် ညှိနှိုင်းသင့်ကြောင်း ကွတ်ခိုင်မြို့နယ်မှ လွှတ်တော်ကိုယ်စားလှယ်ဟောင်းတစ်ဦးက CNI သတင်းဌာနသို့ ပြောသည်။
၎င်းက “ကျနော်ထင်တယ်ပေါ့ဗျာ၊ အောက်ခြေကနေပြီးတော့ မညှိနှိုင်းဘဲနဲ့ အပေါ်မှာ သူတို့ အထက်လူကြီး အချင်းချင်း မြန်မြန်ညှိနှိုင်းလိုက်ရင်ပေါ့၊ အဆင်ပြေမယ်ထင်တယ်။ အခုကြည့်ရတာတော့ လူမျိုးရေးကိစ္စတွေက ဖြစ်ရမှာတောင် စိုးရိမ်ရတာပေါ့ဗျာ၊ အဲဒီလို ဖြစ်နေတာ၊ အဲဒီလိုဖြစ်နေတာ ရွာသားတွေကလည်း မပြန်ရဲကြဘူး ပေါ့ဗျာ၊ အခုပြန်တာ ၄ ပုံ ၁ ပုံလောက်ပဲ ရှိမယ်ထင်တယ်။ အဲဒီလိုဖြစ်နေတာ၊ ပြောမယ်ဆိုရင် ကျနော်တို့က လူမျိုးရေးတွေ မဖြစ်စေချင်ဘူး။ ကျနော်ကတော့ ဒါတွေလည်း မသိဘူးလေ၊ သူတို့ စစ်ရေးအနေနဲ့တော့ ဘာမှ မဝေဖန်ချင်ဘူး။ သူတို့ TNLA နဲ့ သူတို့ KIA နဲ့ပဲ ညှိနှိုင်းပြီး လုပ်ရင် ပိုကောင်းမယ်လို့ အဓိကက လူမျိုးရေး ပြဿနာ မဖြစ်အောင် အဲဒီလိုပဲ ကျနော်မြင်တယ်” ဟု ပြောသည်။
ယခင်ကလည်း နမ့်ဖက်ကာမှာ ကချင်လွတ်မြောက်ရေးတပ်မတော်(KIA)မှ တအာင်းဘုန်းတော်ကြီးကျောင်း များတွင် အလံစိုက်ထူမှု ဖြစ်ပွားခဲ့ပြီးနောက် လူမျိုးစုနှစ်ခုအကြား တင်းမာမှုများ ဖြစ်ပွားခဲ့ဖူးကြောင်း ၎င်းက ပြောသည်။
နွေဦးတော်လှန်ရေး အမှတ်အသားဖြစ်သော လက်သုံးချောင်းထောင်ခြင်း သင်္ကေတကို မထီမဲ့မြင် ပြုလုပ်ကာ လက်သုံးချောင်းထောင်ခြင်းမှာလည်း TNLA အောက်မှာပဲ နေရမည်ဟု ပြောဆိုခဲ့ကြောင်း၊ အဆိုပါ လုပ်ရပ်များ အား ကွတ်ခိုင်မြို့နေ ကချင်လူထုကိုယ်စား ကန့်ကွတ်ရှုတ်ချကြောင်း ကွတ်ခိုင်ကချင်တမန်အဖွဲ့က ထုတ်ပြန် ချက်တွင် ဖော်ပြထားသည်။
TNLA တပ်ဖွဲ့ကို တွေ့ရစဉ်
လက်နက်ကိုင် အဖွဲ့အစည်းများအနေဖြင့် ပြည်သူလူထုအတွက် စဉ်းစားဆုံးဖြတ်ကာ ထိန်းထိန်းသိမ်းသိမ်း လုပ်ဆောင်စေလိုကြောင်း ကချင်လူမျိုးတစ်ဦးက CNI သတင်းဌာနသို့ ပြောသည်။
၎င်းက “တစ်ယောက်နဲ့ တစ်ယောက် ထိန်းထိန်းသိမ်းသိမ်း နေကြဖို့က အရမ်းအရေးကြီးတယ်လို့ ကျနော်ထင် တယ်၊ အဓိက ဒီလက်နက်ကိုင်တဲ့ အဖွဲ့အစည်းတွေကလည်း သူမှန်တယ်၊ ကိုယ်မှန်တယ် ဆိုတာထက် ကိုယ် တစ်ဦး တစ်ယောက်တည်း မှန်တယ်ဆိုတာထက် ပြည်သူလူထုအတွက် ဘယ်ဟာက အမှန်တရားကို သွားပေးနိုင် မလဲဆိုတာကို ကိုယ်က ကောင်းကောင်း စဉ်းစားဆုံးဖြတ်ပြီးတော့ ဆုံးဖြတ်နိုင်ဖို့ရန်အတွက် အရမ်းအရေးကြီး ပါတယ်ဆိုတဲ့အကြောင်း ကျနော်အဲဒါလေး ပြောကြားလိုပါတယ်” ဟု ပြောသည်။
ရှမ်းပြည်နယ်မြောက်ပိုင်းတွင် KIA နှင့် TNLA အပါအဝင် ရှမ်းပြည်တိုးတက်ရေးပါတီ (SSPP/SSA)၊ မြန်မာ အမျိုးသား ဒီမိုကရက်တစ် မဟာမိတ်တပ်မတော်(MNDAA)၊ ရှမ်းပြည်ပြန်လည်ထူထောင်ရေးကောင်စီ (RCSS/SSA)၊ ပြည်သူ့ကာကွယ်ရေးတပ်ဖွဲ့(PDF) တပ်မတော်၊ ပြည်သူ့စစ် စသဖြင့် လက်နက်ကိုင်ထားသည့် အဖွဲ့အစည်းများ လှုပ်ရှားလျက်ရှိသည်။
- By CNI
- Category: နိုင်ငံရေး
- Hits: 1355
CNI News
၂၀၂၄ ခုနှစ်၊ ဖေဖော်ဝါရီ ၈
ကရင်အမျိုးသားအစည်းအရုံး(KNU)ဥက္ကဋ္ဌဟောင်း စောဘိုမြ၏ဇနီးနှင့်သားဖြစ်သူ စောနယ်ဒါးမြ အပါအဝင် ဇနီးဖြစ်သူများကို ထိုင်းနိုင်ငံက နိုင်ငံသားအဖြစ်မှ မှတ်ပုံတင်ကို ပယ်ဖျက်ကြောင်း မဲဆောက်ခရိုင်(ထိုင်း)အုပ် ချုပ်ရေးမှူးက ထုတ်ပြန်ကြေညာခဲ့သည်။
ကရင်နက်ကိုင်အဖွဲ့များနှင့်နီးစပ်သူ တစ်ဦးက “KNU ဥက္ကဋ္ဌဟောင်း စောဘိုမြရဲ့ဇနီး စောနယ်ဒါးမြရဲ့ အမေပေါ့၊ သူရယ်၊ စောနယ်ဒါးမြရယ်။ ပြီးရင် စောနယ်ဒါးမြရဲ့ ဇနီးတို့ကို ထိုင်းနိုင်ငံသားအဖြစ်ကနေ မှတ်ပုံတင်ပယ်ဖျက် ကြောင်း ထိုင်းနိုင်ငံ မဲဆောက်ခရိုင်အုပ်ချုပ်ရေးမှူးကနေပြီးတော့ လက်မှတ်ထိုး အမိန့်စာ ထုတ်ပြန်ခဲ့တာလို့ သိရပါတယ်”ဟု ပြောသည်။
စောနယ်ဒါးမြကို နိုင်ငံသားအဖြစ်က ပယ်ဖျက်ကြောင်း ထိုင်းက ထုတ်ပြန်လာတဲ့စာကိုတွေ့ရစဉ်
စောနယ်ဒါးမြသည် KNU လက်အောက်ခံ ကရင်အမျိုးသားကာကွယ်ရေးတပ်ဖွဲ့(KNDO)မှာ စစ်ဦးစီးချုပ် တာဝန် ထမ်းဆောင်ခဲ့ပြီးမှ အရပ်သားများကို အစုလိုက်အပြုံလိုက် သတ်ဖြတ်မှုဖြင့် ထုတ်ပယ်ခံရပြီးနောက် ကော်သူ လေးတပ်မတော်(KTA)ကို ဖွဲ့စည်းခဲ့သည်။
ထို့နောက် မြန်မာ့တပ်မတော်ကို တိုက်ခိုက်မှုများ ပြုလုပ်ခဲ့သလို KNU တပ်မဟာ(၄)နှင့်လည်း တိုက်ပွဲများ ဖြစ်ပွားခဲ့သည်။
အလားတူ ကော်သူလေးအစိုးရကိုလည်း ဖွဲ့စည်းထားပြီး သမ္မတအဖြစ် တာဝန်ယူလျက်ရှိသည်။
- By CNI
- Category: နိုင်ငံရေး
- Hits: 225
CNI News
၂၀၂၄ ခုနှစ်၊ ဖေဖော်ဝါရီ ၇
ထိုင်းနိုင်ငံနှင့် မြန်မာနိုင်ငံတွင် ဖွင့်လှစ်ထားသော Grand Andaman သူဋ္ဌေကျွန်း ဟိုတယ်ပိုင်ရှင် ဦးကျော်လွင်ကို တရားမဝင် အွန်လိုင်းလောင်းကစားများ လုပ်ဆောင်နေခြင်းကြောင့် နစက-က ၂၀၂၄ ခုနှစ်၊ ဖေဖော်ဝါရီ ၇ ရက်နေ့တွင် ဖမ်းဝရမ်းထုတ်ခဲ့သည်။
ဦးကျော်လွင်သည် တနင်္သာရီတိုင်းဒေသကြီး၊ ကော့သောင်းမြို့၊ အဏ္ဏဝါရပ်ကွက်၊ ပိတောက်လမ်း၊ အမှတ် ၂၅၀ တွင် နေထိုင်ပြီး တရားမဝင် အွန်လိုင်း လောင်းကစားမှုများ ပြုလုပ်ခြင်း၊ ယင်းတရားမဝင် လောင်းကစားမှုများမှ ရရှိသော ငွေကြေးများ၊ ပစ္စည်းများကို အသွင်ပြောင်းလဲခြင်း၊ ဖုံးကွယ်ခြင်းများ ပြုလုပ်သည်ဟု သံသယဖြစ်ဖွယ် ရာ တွေ့ရှိရခြင်းများကြောင့် ကော့သောင်းခရိုင်တရားရုံးက ဖမ်းဝရမ်း ထုတ်ခဲ့သည်။
ဦးကျော်လွင်သည် အွန်လိုင်းငွေကြေး ခဝါချမှုနှင့် ရေနံတင်ပို့မှု အခွန်ရှောင်မှုတို့ဖြင့် ထိုင်းအစိုးရကလည်း ဖမ်းဆီးရ ရှာဖွေလျက်ရှိသည်။
ဦးကျော်လွင် ပိုင်ဆင်မှုတွေကို ထိုင်းက သိမ်းနေစဉ်
ထို့နောက် ထိုင်းရဲတပ်ဖွဲ့က ဖေဖော်ဝါရီ ၁ ရက်နေ့က ထိုင်းနိုင်ငံ၊ ဘန်ကောက်မြို့နှင့် ရနောင်းမြို့များရှိ ဦးကျော်လွင် ပိုင်ဆိုင်သော နေအိမ်များသို့ ဝင်ရောက်စီးနင်းရှာဖွေကာ ပိုင်ဆိုင်မှုများနှင့် ထိုင်းဘတ်ငွေ ၁၀ ဘီလီယံကို သိမ်းဆည်းခဲ့သည်။
ထိုင်း-မြန်မာ နယ်စပ်အနီးရှိ တရားမဝင် အွန်လိုင်းလောင်းကစား လုပ်ငန်းများကို နှိမ်နင်းသွားမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ထိုင်းဘုရင့်တပ်မတော် စစ်ဦးစီးချုပ်တို့ကြား ၂၀၂၃ ခုနှစ်၊ ဒီဇင်ဘာလအတွင်းက ဆွေးနွေးထားကြသည်။
ထို့နောက် ခရိုနီသူဋ္ဌေးကြီးများကို ဖမ်းဆီးနိုင်ရေး လုပ်ဆောင်လာခဲ့သည်။
- By CNI
- Category: နိုင်ငံရေး
- Hits: 185
CNI News
၂၀၂၄ ခုနှစ်၊ ဖေဖော်ဝါရီ ၇
ယခု ၂၀၂၄ ခုနှစ်ကို မြန်မာ့တပ်မတော်အား အပြီးတိုင်ချေမှုန်းမည့် မှတ်တိုင်နှစ်ဖြစ်ကြောင်း အမျိုးသားညီညွတ် ရေးအစိုးရ(NUG)၏ ပြည်ထောင်စုဝန်ကြီး မန်းဝင်းခိုင်သန်းက ပြည်ထောင်စုလွှတ်တော် အစည်းအဝေးတွင် ပြောကြားသွားသည်။
တပ်မတော်အလွန် နိုင်ငံရေး၊ စီးပွားရေး၊ လူမှုရေးများ တည်ငြိမ်စေရေးနှင့် အသွင်ကူးပြောင်းရေးကာလ ချောမွေ့စွာ ရောက်ရှိပြီး ကျူးလွန်သူများအား တရားစီရင်နိုင်ရေးကိုလည်း ဆောင်ရွက်သွားမည်ဖြစ်ကြောင်း ၎င်းက ပြောသည်။
မန်းဝင်းခိုင်သန်းက “၂၀၂၄ ခုနှစ်၊ စစ်ကောင်စီကို အပြီးတိုင်ချေမှုန်းမယ့်နှစ်မှာ ကျနော်တို့ ရှင်းလင်းပြီး မဟာမိတ်များ ပိုမိုအင်အားကောင်းလာရေး၊ တော်လှန်ရေးအတွက် ရင်ဘတ်ချင်းတူ ရည်ရွယ်ချက်ချင်းတူတဲ့ အင်အားတူအားလုံးနဲ့ ချိတ်ဆက်ဆောင်ရွက်နိုင်ရေး စစ်မှန်တဲ့ ဖက်ဒရယ်ဒီမိုကရေစီအတွက် အခြေခံအုတ်မြစ်များ တည်ဆောက်နိုင်ရေး၊ စစ်ကောင်စီအလွန် နိုင်ငံရေး၊ စီးပွားရေး၊ လူမှုရေးများ တည်ငြိမ်စေရေး၊ အသွင်ကူးပြောင်း ရေးကာလ ချောမွေ့စွာရောက်ရှိပြီး ကျူးလွန်သူများကို တရားမျှတမှုအတွက် လူထုထိခိုက်မှုများ ပြန်လည်ကုစား နိုင်ရေးအတွက် တရားစီရင်နိုင်ရေးတို့ကို ကြိုးစားဆောင်ရွက်သွားမယ် ဆိုတာကိုလည်း ပြည်သူ့ကိုယ်စားလှယ် ကြီးများ ရှေ့မှောက်မှာ ကတိပြု ပြောကြားလိုပါတယ်။ အထက်ပါ တင်ပြခဲ့သလို ၂၀၂၁ ဆန့်ကျင်ရေး၊ ၂၀၂၂ အခိုင်အမာ၊ ၂၀၂၃ စုစည်းအပြီးမှာ ၂၀၂၄ ခုနှစ်မှာတော့ အကြမ်းဖက် စစ်အာဏာရှင်စနစ် အပြီးသတ်ချေမှုန်းမယ့် မှတ်တိုင်နှစ်အဖြစ် မဟာမိတ်များနှင့် အားလုံးအတူတကွ အစွမ်းကုန် ပူးပေါင်းဆောင်ရွက် သွားကြဖို့ရန် ကျနော် တို့ အစိုးရမှ အသင့်ဖြစ်နေပြီဖြစ်ကြောင်းကို အမျိုးသားညီညွတ်ရေးအစိုးရကိုယ်စား လေးလေးနက်နက် ကတိပြု ပြောကြားရင်း နိဂုံးချုပ်ပါတယ်” ဟု ပြောသည်။
NUG အဖွဲ့ကိုတွေ့ရစဉ်
ပြီးခဲ့သည့် ဇန်နဝါရီလ ၃၁ ရက်နေ့က NUG မှ ထုတ်ပြန် ကြေညာခဲ့သော ဘုံသဘောထားရပ်တည်ချက်တွင် စစ်အာဏာရှင်စနစ် ချုပ်ငြိမ်းရေးနှင့် ဖက်ဒရယ်ဒီမိုကရေစီပြည်ထောင်စု တည်ဆောက်ရေးတို့ ပါဝင်သည်။
အဆိုပါ ဘုံသဘောတူညီချက်ကို [K3C] ဟုခေါ်သော ကချင်လွတ်လပ်ရေးအဖွဲ့ (KIO)၊ ကရင်အမျိုးသား အစည်းအရုံး (KNU)၊ ကရင်နီအမျိုးသားတိုးတက်ရေးပါတီ (KNPP) နှင့် ချင်းအမျိုးသားတပ်ဦး (CNF) စသော တိုင်းရင်းသား မဟာမိတ် အစုအဖွဲ့များကြားတွင် သဘောတူညီချက်အားဖြင့် ရရှိထားသည့်အချက်များ ဖြစ် ကြောင်း၊ ဆက်လက်၍ တိုင်းရင်းသား မဟာမိတ်အဖွဲ့အစည်းများ စုရုံးသဘောတူညီစေမှုကို ဆက်လက် ကြိုးပမ်းရမှာဖြစ်ကြောင်း NUG ၏ ယာယီသမ္မတဒူဝါလရှီးလက ပြောသည်။
၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် မြန်မာ့တပ်မတော်မှ အာဏာရယူပြီးနောက် ဆန့်ကျင်ဆန္ဒပြမှုနှင့်အတူ လက်နက်ဆွဲကိုင် တော်လှန်မှုကို ဒီမိုကရေစီအင်အားစုများက ဆင်နွှဲခဲ့ကြသည်။
ပြည်သူလူထု၏ ဆင်းရဲဒုက္ခကို ငှဲ့ညာ၍ အဖြေတစ်ခုကို ရစေလိုကြောင်း၊ ပြည်သူလူထုများမှာ အကျပ်အတည်း အမျိုးမျိုးကို ရင်ဆိုင်နေကြရကြောင်း မြန်မာ့နိုင်ငံရေးလေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။
မြန်မာ့တပ်မတော်ကို တွေ့ရစဉ်
၎င်းက “ကြွေးကြော်သံဆိုတာကတော့ ဒီလိုပဲပေါ့၊ ဒီလိုပဲ ကြွေးကြော်ကြရတာပဲလေ၊ ဒါပေမဲ့လို့ တကယ့် လက်တွေ့နဲ့ကြ အဲဒါက ဖြစ်ချင်လည်း ဖြစ်သွားနိုင်တယ်ပေါ့နော်၊ ဖြစ်သွားနိုင်စရာ အကြောင်းတွေလည်း ရှိတာပေါ့၊ နောက်မဖြစ်နိုင်တဲ့ အကြောင်းလေးတွေကလည်း သူ့ဖက်ကိုယ့်ဖက် ရှိတာပေါ့နော်၊ အဲဒါတော့ ကျနော်တို့တော့ ဘယ်ပါတီဝင်မှ မဟုတ်ဘူးဆိုတော့ ကြားကလူတွေ အမြင်နဲ့ကတော့ အဖြေတစ်ခု ရစေချင်တာ ပေါ့နော်၊ အဖြေတစ်ခုရပြီးတော့ တိုင်းသူပြည်သားတွေ မျက်နှာကို ငှဲ့စေချင်တာပေါ့နော်၊ ငှဲ့စေချင်တယ်။ တိုင်းသူ ပြည်သားတွေ အရမ်းဆင်းရဲ ဒုက္ခရောက်နေတယ်၊ တစ်ဖက်ကလည်း သေဘေးအန္တရာယ်က ပုံသဏ္ဍန်မျိုးစုံနဲ့ သေဘေးနဲ့ ရင်ဆိုင်နေရတယ်၊ အငတ်ဘေးနဲ့ ရင်ဆိုင်နေရပါတယ်။ အဲဒီအခါမှာ စိတ်မကောင်းဘူးပေါ့နော်၊ အဲဒီလိုတော့ ရှိပါတယ်” ဟု ပြောသည်။
လက်ရှိတွင် တိုင်းပြည်တစ်ဝှမ်း မြန်မာ့တပ်မတော်နှင့် တိုင်းရင်းသားလက်နက်ကိုင် အဖွဲ့အစည်းအချို့၊ ပြည်သူ့ ကာကွယ်ရေးတပ် (PDF) ပူးပေါင်းတပ်တို့အကြား တိုက်ပွဲများ ဖြစ်ပွားလျက်ရှိနေသည်။
အဆိုပါ တိုက်ပွဲများကြောင့် ပြည်သူလူထုများမှာ စီးပွားရေးအကျပ်အတည်း၊ ခရီးသွားလာမှု အခက်အခဲ၊ မလုံခြုံမှုများ နေ့စဉ်နှင့်အမျှ ခံစားနေကြရသည်။
- By CNI
- Category: နိုင်ငံရေး
- Hits: 165
CNI News
၂၀၂၄ ခုနှစ်၊ ဖေဖော်ဝါရီ ၆
နာဂအမျိုးသားဆိုရှယ်လစ်ကောင်စီ-ကပ္ပလန်/ယုံးအောင်(NSCN-K/YA)အဖွဲ့မှ ဗိုလ်မှူးကြီးဝင်ရမ်းသည် ၂၀၂၄ ခုနှစ်၊ ဖေဖော်ဝါရီ ၅ ရက်နေ့က ကချင်ပြည်နယ်၊ မြစ်ကြီးနားမြို့မှာ ကွယ်လွန်သွားကြောင်း NSCN-K/YA မှ ထုတ်ပြန်ခဲ့သည်။
ဗိုလ်မှူးကြီးဝင်ရမ်းသည် ကချင်ပြည်နယ်၊ မြစ်ကြီးနားမြို့မှာ ကျန်းမာရေး မကောင်းသည့်အတွက် ဆေးကုသမှု ခံယူနေရင် ကွယ်လွန်သွားခဲ့ခြင်း ဖြစ်သည်။
NSCN-K/YA တွင် ဗိုလ်မှူးကြီးဝင်ရမ်းသည် ဒုတိယအတွင်းဝန်ဖြစ်ပြီး ၁၂ နှစ်ကြာ တာဝန်ထမ်းဆောင်ခဲ့သူ ဖြစ်သည်။
ထို့ကြောင့် NSCN-K/YA က အလွန်ဝမ်းနည်းပူဆွေးကြောင်း၊ ဗိုလ်မှူးကြီးဝင်ရမ်းသည် နာဂလူမျိုးများအတွက် နောက်ဆုံးထွက်သက်အထိ ရဲစွမ်းသတ္တိအပြည့်ဖြင့် တာဝန်ထမ်းဆောင်သွားခဲ့ကြောင်း ထုတ်ပြန်ခဲ့သည်။
ဗိုလ်မှူးကြီးဝင်ရမ်း ကွယ်လွန်မှု NSCN-K/YA က ဝမ်းနည်းကြောင်း ထုတ်ပြန်ချက်ကို တွေ့ရစဉ်
နာဂအမျိုးသားဆိုရှယ်လစ်ကောင်စီကို ၁၉၈၀ ခုနှစ်က စတင် ထူထောင်ခဲ့ရာမှ ခေါင်းဆောင်များဖြစ်သည့် ကပ္ပလန်၊ အိုက်ဇက်၊ ဗွီဗားတို့ကြား သဘောထား ကွဲလွဲ၍ ၁၉၈၉ တွင် နာဂအမျိုးသားဆိုရှယ်လစ်ကောင်စီ-ကပ္ပလန်(NSCN-K)နှင့် နာဂအမျိုးသားဆိုရှယ်လစ်ကောင်စီ-အိုက်ဇက်/ဗွီဗား(NSCN-IM)ဆိုပြီး ၂ ဖွဲ့ကွဲသွား သည်။
NSCN-K သည် မြန်မာပြည်မှာ အခြေစိုက်ပြီး NSCN-IM ကတော့ အိန္ဒိယဘက်မှာ အခြေစိုက်၍ နာဂနိုင်ငံရေး ကို ဆောင်ရွက်ကြသည်။
ထို့နောက် NSCN-K ဥက္ကဋ္ဌ ကပ္ပလန်သည် ၂၀၁၇ ခုနှစ်မှာ ကွယ်လွန်သွားခဲ့သည့်အတွက် ဒုဥက္ကဋ္ဌ ဦးခမ်းငေါ် (Khango Konyak)ကို ၂၀၁၈ ခုနှစ်မှာ ဥက္ကဋ္ဌအဖြစ်တင်မြှောက်ပြီး မကြာခင် သြဂုတ် ၁၇ ရက်နေ့တွင် ပြန်လည် ဖြုတ်ချ၍ ဦးယုံးအောင်ကို ဥက္ကဋ္ဌအဖြစ် တင်မြှောက်ခဲ့သည်။
NSCN-K/AM အဖွဲ့ခေါင်းဆောင် အန်းမိုင်ကို တွေ့ရစဉ်
ထို့နောက် ၂၀၂၀ ခုနှစ်၊ ဇူလိုင် ၂၉ ရက်တွင် ဦးယုံးအောင်သည် NSCN-K/YA အဖွဲ့ကနေ ဒုစစ်ဦးစီးချုပ် နီကီဆူမီ၊ ဝန်ကြီး စတားဆမ်၊ စစ်ဦးစီးချုပ် ညမ်လန်တို့ကို ထုတ်ပယ်လိုက်သည့်အတွက် နီကီဆူမီက SNCN-K/ NK ဆိုသော အဖွဲ့အား ထူထောင်၍ အိန္ဒိယအစိုးရနှင့် ၂၀၂၁ ခုနှစ်၊ စက်တင်ဘာ ၈ ရက်မှာ ငြိမ်းချမ်းရေးယူ သွားခဲ့သည်။
အလားတူ ၂၀၂၃ ခုနှစ်အတွင်းမှာလည်း ပြည်ထဲရေးဝန်ကြီး အန်းမိုင်ကို NSCN-K/YA က ထုတ်ပယ်လိုက်သည့် အတွက် NSCN-K/AM ဆိုသော အဖွဲ့ကိုထူထောင်၍ အန်းမိုင်က လှုပ်ရှားလျက်ရှိသည်။
ထို့အပြင် NSCN-K ထဲကနေ ထုတ်ပယ်ခံလိုက်ရသော ဦးအောင်ဆိုင်းနှင့် ဂျင်မီတို့ကလည်း အရှေ့နာဂကာ ကွယ်ရေးတပ်မတော်(ENDA/ENNO)ဆိုသော အဖွဲ့ကို ထူထောင်၍ လှုပ်ရှားလျက်ရှိနေသည်။
- By CNI
- Category: နိုင်ငံရေး
- Hits: 235
CNI News
၂၀၂၄ ခုနှစ်၊ ဖေဖော်ဝါရီ ၆
ယခုနှစ်အတွင်း နစကကို တော်လှန်ရေးအင်အားစုများက ဘယ်လိုပုံစံဖြင့် ဖိအားပေးလာနိုင်သလဲဆိုသည့်အပေါ် နိုင်ငံရေး၊ စစ်ရေးကျွမ်းကျင်သူများက သုံးသပ်ဆွေးနွေးလျက်ရှိနေသည်။
ပြီးခဲ့သည့် ၂၀၂၃ ခုနှစ်၊ နှစ်ကုန်ပိုင်းမှ စတင်ပြီး တိုင်းရင်းသားလက်နက်ကိုင် အဖွဲ့အစည်းများနှင့် တော်လှန်ရေး ပူးပေါင်းတပ်တို့က မြန်မာ့တပ်မတော်၏ စစ်စခန်း၊ စခန်းကုန်းများနှင့် မြို့အချို့ကို သိမ်းယူနိုင်ခဲ့သည်။
ယခုနှစ်တွင် တော်လှန်ရေးအင်အားစုများက မြို့လတ်နှင့် မြို့ငယ်များကို သိမ်းယူလာနိုင်ကြောင်း၊ စစ်ကြောင်း အားလုံး နေပြည်တော်သို့ ချီတက်ကြဆိုသည့် ကြွေးကြော်သံလည်း ထုတ်ထားကြောင်း မြန်မာ့နိုင်ငံရေး လေ့လာ သုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။
ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်
၎င်းက “အခုကတော့ အဲဒီအဆင့် ကနေပြီးတော့ မြို့လတ်နဲ့ မြို့ငယ်တွေ သိမ်းတာပေါ့ဗျာ၊ ဒီလာမယ့် နှစ်ထဲမှာ တော့ မြို့လတ်နဲ့ မြို့ကြီးတွေ သိမ်းမယ့် စစ်ဆင်ရေးတွေ ကျနော်တော့ ထင်ပါတယ်ခင်ဗျ၊ အဲဒါတော့ မြို့လတ်တွေ တကယ်လို့ မြို့လတ်တွေ လွယ်လွယ်ကူကူနဲ့ ရရှိပြီးတော့ စစ်ကောင်စီတပ်ရဲ့ ပြိုကွဲမှုက ဒီထက်ပိုမြန်ဆန်လာရင် တော့ အဲဒီအထိ သွားကြမှာပေါ့ဗျာ၊ စစ်ကြောင်းအားလုံး နေပြည်တော် ချီတက်ကြဆိုတာ သူတို့ ကြွေးကြော်သံ ထုတ်ထားတာ အဲဒီလိုပဲ လုပ်ကြမှာပါ” ဟု ပြောသည်။
ပြီးခဲ့သည့် ၂၀၂၃ ခုနှစ်ကို နွေဦးတော်လှန်ရေး၏ အဆုံးအဖြတ်နှစ်ဟု ကြွေးကြော်ခဲ့သော်လည်း တစ်ဖက်နှင့် တစ်ဖက် အပြတ်အသတ် အနိုင်ယူနိုင်ခဲ့ခြင်း မရှိသည်ကို တွေ့ရသည်။
သို့သော်လည်း ညီနောင်မဟာမိတ်သုံးဖွဲ့က အောက်တိုဘာ ၂၇ ရက်က စတင်ခဲ့သော ၁၀၂၇ စစ်ဆင်ရေးပြီးနောက် မြို့ပေါင်း ၃၉ မြို့အား တော်လှန်ရေးအင်အားစုများက ထိန်းချုပ်ထားနိုင်ခဲ့ကြောင်း အသီးသီး သတင်းထုတ်ပြန်လာ ခဲ့ကြသည်။
လက်ရှိတွင် ပြည်သူလူထုများအနေဖြင့် ငွေကြေးဖောင်းပွမှုကြောင့် ကုန်ဈေးနှုန်း မြင့်တက်လာသလို တော်လှန် ရေးအင်အားစုများ၏ လမ်းပိတ်ဆို့မှု၊ ငွေကြေးကောက်ခံမှုများကြောင့် အကျပ်အတည်းများဖြင့် ကြုံတွေ့နေကြ ရကြောင်း လီဆူအမျိုးသားဖွံ့ဖြိုးတိုးတက်ရေးပါတီ (ဒူးလေးပါတီ) မှ ဥက္ကဋ္ဌ ဦးလီပေါ်ရဲ့က CNI သတင်းဌာနသို့ ပြောသည်။
ချင်းတပ်ဖွဲ့ကို တွေ့ရစဉ်
၎င်းက “ကျနော်တို့ မြင်တာကတော့ ဒီလို ဒုက္ခတော့ ပေးနိုင်တာပေါ့ကွာ၊ ဒါပေမဲ့ ဟိုဖက်ကို တအားကြီး ဟိုဖြစ် အောင်တော့ သူတို့လည်း မလုပ်နိုင်ပါဘူး။ မလုပ်နိုင်ဘူးဆိုတာ သူတို့ ရှင်းရှင်းပြောမယ်ဆိုရင်တော့ ဘာပဲလုပ်လုပ် ငွေရေးကြေးရေးက အရေးကြီးတာပဲ၊ ငွေရေးကြေးရေးက အခုတောင်မှ ပြည်သူတွေက တော်တော်လေး ညည်းပြီ လေ၊ သူတို့ကို ထောက်ပို့လုပ်တဲ့ သူကလည်း ညည်းလာပြီ။ ထောက်ပို့ မလုပ်တဲ့သူကလည်း ဒါကို ရှင်းရှင်းပြောရ မယ်ဆိုရင် ကုန်ဈေးနှုန်းတွေ မြင့်လာတဲ့အခါကြတော့ တစ်ဖက်က ငွေကြေးဖောင်းပွမှုကြောင့် မြင့်လာတာ တစ်မျိုး၊ သူတို့တွေ အခွန်ကြေး၊ ဆက်ကြေးကောက်ပြီးမှ မြင့်တာက တစ်မျိုးဆိုတော့ ပြည်သူတွေက ညည်း လာပြီလေ၊ ဒီလို ဆက်သွားနေရင်တော့ ပြည်သူ ပိုပြီးမှ ညည်းမှာပေါ့။ ပြည်သူမပါတဲ့ အလုပ်မျိုးကတော့ အောင်မြင်မှာတော့ မဟုတ်ဘူးလို့ မြင်တာပေါ့လေ” ဟု ပြောသည်။
ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က တပ်မတော်မှ အမျိုးသားဒီမိုကရေစီအဖွဲ့ချုပ် (NLD) အစိုးရကို ၂၀၂၀ အထွေထွေရွေးကောက်ပွဲ မဲစာရင်းအငြင်းပွားမှုကို မဖြေရှင်းပေးဘဲ အစိုးရဖွဲ့စည်းရေး ကြိုးပမ်းသည်ဟု ဆိုကာ ဖြုတ်ချ၍ နိုင်ငံတော်ကို အရေးပေါ် အခြေအနေ ကြေညာကာ တာဝန်ယူလျက်ရှိနေသည်။
ထို့နောက် မြန်မာ့တပ်မတော်နှင့် တိုင်းရင်းသားလက်နက်ကိုင် အဖွဲ့အစည်းအချို့၊ တော်လှန်ရေးအင်အားစု ပူးပေါင်းတပ်တို့အကြား နိုင်ငံတစ်ဝှမ်းတိုက်ပွဲများ ဖြစ်ပွားလာပြီး တိုင်းပြည်၏ နိုင်ငံရေး၊ ငြိမ်းချမ်းရေး၊ စီးပွားရေး၊ ကျန်းမာရေး၊ ပညာရေးများမှာ အကျပ်အတည်းများဖြင့် ရင်ဆိုင်နေရသည်။