CNI News

၂၀၂၆ ခုနှစ်၊ ဇွန်လ ၂၂

၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေးနှင့် ပတ်သက်ပြီး သဘောတူညီထားသည့် ၄၃ ချက်အား လွှတ်တော်၌ တင်ပြမဆွေးနွေးခင်တွင် အများပြည်သူသိအောင် ကြေညာပေးသင့်သည်ဟုမြင်ကြောင်း ငြိမ်းချမ်းရေးလုပ်ငန်းစဉ်တွင် ပါဝင်လုပ်ဆောင်နေသူ ဦးခွန်းဆိုင်က CNI သတင်းဌာနသို့ ပြောသည်။

၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေးအား အမျိုးသားစည်းလုံးညီညွတ်ရေးနှင့် ငြိမ်းချမ်းရေး  ဖော်ဆောင်မှု ညှိနှိုင်းရေးကော်မတီ(NSPNC)သည် NCA လက်မှတ်ထိုးထားသည့် တိုင်းရင်းသား လက်နက်ကိုင်အဖွဲ့များနှင့် သဘောတူထားသည်များ ရှိသကဲ့သို့ နိုင်ငံရေးပါတီများ အစုအဖွဲ့တို့နှင့်လည်း သဘောတူထားသည်များရှိသည်။

ထို ၄၃ ချက်တွင် အချို့ပုဒ်မများသည် ပြည်သူ့ဆန္ဒ ကောက်ယူပွဲ လိုအပ်သဖြင့် လူသိရှင်ကြား ကြေညာ သင့်ကြောင်း ငြိမ်းချမ်းရေးလုပ်ငန်းစဉ်တွင် ပါဝင်လုပ်ဆောင်နေသူ ဦးခွန်းဆိုင်က CNI သတင်းဌာနသို့ ပြောသည်။

NSPNC အစည်းအဝေးကျင်းပနေစဉ်

၎င်းက “ကျနော် ပြောနိုင်တာကတော့ ၇ ဖွဲ့နဲ့ သဘောတူညီချက်ရတာ မဟုတ်ဘူး။ ၅ ဖွဲ့နဲ့ သဘောတူညီ ချက်ရတာ ဖြစ်တယ်။ ဒါဟာ ၂၀၂၃ မှာဖြစ်ခဲ့တယ်။ အခုပြောနေတာကတော့ ၄၃ ချက်လို့ပြောပေမယ့် ဒီ ၅ ဖွဲ့နဲ့ သဘောတူညီချက် ရယူခဲ့တာကတော့ ၂၁ ချက်ပဲဖြစ်တယ်။ ကျန်တဲ့ ၂၂ ချက်ကတော့ ပါတီတွေ၊ သည်ဖြင့် အဖွဲ့အစည်းတွေနဲ့ ယူထားတယ်လို့ ကျနော်တို့ ကြားသိရပါတယ်။ အဲဒီတော့ အခုဒီဥစ္စာတွေ ကို ကျနော်တို့က ဆွေးနွေးမယ်ဆိုရင် အနှေးနဲ့အမြန်ကတော့ အခုလောလောဆယ်မှာ ဘယ်သူ့ကိုမှ လူသိရှင်ကြား ကြေညာထားတာ မရှိပေမယ့် မကြာခင် ဆိုလို့ရှိရင် လွှတ်တော်မှာ တင်ပြဖို့ရှိတယ်ဆိုတဲ့ အခါကြတော့ ဒါဟာ ပြည်သူတစ်ရပ်လုံးနဲ့ သက်ဆိုင်တဲ့ ဥပဒေဖြစ်တယ်။ ပြည်သူတစ်ရပ်လုံးနဲ့ သက်ဆိုင် တဲ့ ဥပဒေဖြစ်တဲ့ အတွက်ကြောင့်မို့လို့ သူတို့က တချို့အချက်တွေမှာ၊ တချို့ ပုဒ်မတွေမှာ ပြည်သူ့ဆန္ဒ ကောက်ယူပွဲတောင် လိုလိမ့်မယ်။ ဒါတင်မကသေးဘူး သူတို့ရဲ့ ကိုယ်စားလှယ်တွေ ကနေတဆင့် လွှတ် တော်ထဲမှာ ဆန္ဒပေးမှုတွေလည်း ရှိနိုင်တယ်။ အဲဒါကြောင့်မို့လို့ ဒီ ၄၃ ချက်ကို ဖြစ်နိုင်ရင်တော့ လွှတ် တော် မတိုင်မီမှာ ဒါတွေကို လူထု အများသိကြားအောင်လို့ ဒါကို ကြေညာပေးသင့်တယ်လို့ ကျနော် မြင်တယ်” ဟု ပြောသည်။

လက်ရှိ နိုင်ငံတော်သမ္မတ ဦးမင်းအောင်လှိုင်သည် တပ်မတော်ကာကွယ်ရေးဦးစီးချုပ်အဖြစ်မှ အနား မယူခင်က တိုင်းရင်းသားလက်နက်ကိုင် (EAO)များ၏ တောင်းဆိုချက်များ၊ ဖွဲ့စည်းပုံအခြေခံဥပဒေ ပြင်ဆင်ရေးဆိုင်ရာ ကိစ္စရပ်များ၊ ဒေသနှင့်တိုင်းပြည်အတွက် လိုအပ်သည့် သ‌ဘောတူညီချက်များ၊ ဆွေးနွေးချက်များကို မကြာခင် ပေါ်ပေါက်လာမည့် လွှတ်တော်ထဲတွင် ပြန်လည် ဆွေးနွေးသွားမည် ဖြစ်ကြောင်း ၂၀၂၆ ခုနှစ်၊ မတ်လ ၁၀ ရက်နေ့က ပြောဆိုခဲ့သည်။

နိုင်ငံတော်သမ္မတအဖြစ် ရွေးချယ် တင်မြောက်ခံရချိန်၌ NSPNC နှင့် နိုင်ငံရေးပါတီများ အစုအဖွဲ့၏ အလုပ်အဖွဲ့တို့ကြား သဘောတူညီမှု ရယူထားသည့် ဖွဲ့စည်းပုံအခြေခံဥပဒေ ပြင်ဆင်ရန် ၄၃ ချက်ကို ပြည်ထောင်စုလွှတ်တော်မှာ တင်သွင်းဆွေးနွေးမည်ဟု ဧပြီလ ၁၀ ရက်နေ့က ပြောကြားထားသည်။

နိုင်ငံရေးပါတီများနှင့် ဆွေးနွေးထားသည်များအား လွှတ်တော်၌ တင်သွင်းသည့်အခါတွင် သက်ဆိုင်ရာ နိုင်ငံရေးပါတီများမှ လွှတ်တော်ကိုယ်စားလှယ်များက လက်ခံ၊ ငြင်းခုန်၊ အတည်ပြုခြင်းများ ဆောင်ရွက် နိုင်သည်။

သို့သော် NCA လက်မှတ် ရေးထိုးထားသည့် တိုင်းရင်းသားလက်နက်ကိုင်(၇)ဖွဲ့နှင့် သဘောတူထားသည့် အချက်များကိုမူ လွှတ်တော်တွင် တင်သွင်း ဆွေးနွေးမည်ဆိုပါက EAO များဘက်မှ လူပုဂ္ဂိုလ်များသည် လွှတ်တော်မှာ ရှိမနေကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

 ၂၀၀၈ ဖွဲ့စည်းပုံအခြေခံဥပဒေကို တွေ့ရစဉ်

၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေး သဘောတူထားသည့် ၄၃ ချက်၌ အစိုးရဘက်မှ လည်း ကောင်း၊ တိုင်းရင်းသားလက်နက်ကိုင် အင်အားစုများဘက်မှလည်းကောင်း ကြိုမသိစေချင်သည့် အချက်များ ပါနိုင်ကြောင်း မြန်မာ့ပုံရိပ်ဖော်ညွှန်းရေးအဖွဲ့မှအကြံပေး ဦးညိုအုန်းမြင့်က CNI သတင်းဌာန သို့ ပြောသည်။

၎င်းက “ကျနော့်အနေနဲ့ ဒါတွေက နည်းနည်းတော့ ကျနော်တို့က တောင်းဆိုမှုတွေပေါ့နော်။ တချို့ကိစ္စ တွေမှာကြတော့ အစိုးရကို တောင်းဆိုသလိုပဲ ကျန်တဲ့ တိုင်းရင်းသားလက်နက်ကိုင် အင်အားစုတွေက လည်း ကြိုမသိစေချင်တဲ့ဟာတွေလည်း ပါနိုင်ပါတယ်။ နိုင်ငံရေးပါတီတွေ ဆွေးနွေးပြီးတော့ လွှတ်တော် မှာ ဆွေးနွေးတဲ့ အခါကြရင် ၄၃ ချက်က တွေ့မှာဖြစ်ပါတယ်။ နောက်တစ်ခုက ကျနော်တို့ အခု ကျနော် တို့ တိုင်းပြည်မှာက သွားလိုက်၊ ရပ်လိုက် နိုင်ငံရေးဆိုလည်း ဒီမိုကရေစီက သွားလိုက် ၅ နှစ်၊ ၅ နှစ်ကနေ ၁၀ နှစ်။ ၁၀ နှစ်မှာ တစ်ခါ ရပ်သွားလိုက်၊ ၅ နှစ် ရပ်နေလိုက် ပြီးရင် ပြန်စလိုက် အဲဒီလိုပေါ့နော်။ ၁၉၄၈ ခု ကျနော်တို့ တိုင်းပြည် လွတ်လပ်‌ရေး ရကတည်းက ရှေ့တိုးလိုက်၊ နောက်ဆုတ်လိုက်၊ ဘေးထွက်လိုက် အဲဒီလို သွားတယ်ဆိုတော့ ဒီလိုလွှတ်တော်မှာ တင်တယ်၊ ဆွေးနွေးတဲ့ကိစ္စတွေက ကျနော့်အနေနဲ့ ကတော့ အပြုသဘော ဆောင်တယ်လို့ ထင်တယ်။ နောက် ကျနော်တို့က baby step လို့ ခေါ်မှာပေါ့နော် ကလေးလမ်းလျှောက်သလိုပေါ့။ ချက်ချင်းတော့ မီတာ ၁၀၀ ကို ကမ္ဘာ့စံချိန်တော့ ချိုးနိုင်မယ် မထင်ဘူး။ ကျန်တဲ့နိုင်ငံတွေလိုတော့ ဖြစ်ချင်မှတော့ ဖြစ်မယ်။ ဒါပေမယ့် ကျ‌နော်တို့က တဖြေးဖြေးပဲ သွားပြီးတော့ တရွေ့ရွေ့နဲ့ ကျနော်တို့ ဆက်သွားရမယ်လို့ ထင်ပါတယ်” ဟု ပြောသည်။

မြန်မာနိုင်ငံရှိ ၂၀၀၈ ဖွဲ့စည်းပုံအခြေခံဥပဒေကို ယနေ့ခေတ် အချိန်အခါနှင့် ကိုက်ညီသည့် ပြင်ဆင်မှုများ ဆောင်ရွက်နိုင်ရန် ဆွေးနွေးနေကြောင်း၊ သို့သော် တိုင်းပြည်အတွက် ထိခိုက်မည့် ကိစ္စရပ်များကိုလည်း ကာကွယ် ဆောင်ရွက်သွားရမည်ဖြစ်ကြောင်း နိုင်ငံတော်သမ္မတ ဦးမင်းအောင်လှိုင်က ပြောထားသည်။

CNI News

၂၀၂၆ ခုနှစ်၊ ဇွန်လ ၂၂

စစ်ကိုင်းတိုင်းဒေသကြီး၊ ကလေးဝမြို့တွင် ငွေကျပ် ၃ ဘီလီယံကျော် တန်ဖိုးရှိ ဘိန်းဖြူ ၁၀ ကီလိုခန့် အပါအဝင် စိတ်ကြွဆေးပြား ၁၀ သိန်းကျော်နှင့် လက်နက်ခဲယမ်းများ ဖမ်းဆီးရမိခဲ့သည်ဟု နေပြည်တော်ဘက်က ၂၀၂၆ ခုနှစ်၊ ဇွန်လ ၂၁ ရက်၌ သတင်းထုတ်ပြန်ခဲ့သည်။

၂၀၂၆ ခုနှစ်၊ ဇွန်လ ၇ ရက်က ကလေးဝမြို့၊ ချင်းတွင်းတံတားတွင် ဂိုးရှင်းမန်(ခ)ရှင်းမန် မောင်းနှင်လာသော PRADO ယာဉ်ပေါ်မှ ဘိန်းဖြူ ၅ ဒသမ ၅ ကီလို၊ ဂင့်ကပ်ခိုင် (ခ) ခိုင်ခိုင် မောင်းနှင်လာသော PRADO ယာဉ်ပေါ်မှ ဘိန်းဖြူ ၄ ဒသမ ၄ ကီလို၊ မုန်ဂင့်ဆန်(ခ)ဆန်းသယ် မောင်းနှင်လာသော PRADO ယာဉ်ပေါ်မှ စိတ်ကြွဆေးပြား ၁၀ ဒသမ ၅ သိန်းနှင့် ပစ္စတိုသေနတ် ၂ လက်၊ ၎င်းကျည် ၂၀၀ တောင့်တို့အား ဖမ်းဆီးရမိခဲ့သည်။

ထို့ကြောင့် မော်တော်ယာဉ် ၃ စီးပေါ်မှ စုစုပေါင်း တန်ဖိုးငွေကျပ် ၃ ဒသမ ၀၂၁ ဘီလီယံတန်ဖိုးရှိ ဘိန်းဖြူ ၉ ဒသမ ၉ ကီလို၊ စိတ်ကြွဆေးပြား ၁၀ ဒသမ ၅ သိန်းနှင့် လက်နက်ခဲယမ်းများ သိမ်းဆည်း ရမိခဲ့သည်ဟု နေပြည်တော် ဘက်က သတင်းထုတ်ပြန်ခဲ့သည်။

အဆိုပါ ဖမ်းဆီးရမိ မူးယစ်ဆေးဝါးများနှင့် လက်နက်ခဲယမ်းများအား မန္တလေးမှ တီးတိန်သို့ အဓိက သယ်ဆောင် ခိုင်းသူမှာ တီးတိန်မြို့နေ ထွန်းဂင့်မုန်(ခ)ပါးမုန် (ဖမ်းဆီးရန်ကျန်)နှင့် ထန်ဆောမ်းဟောက်(ခ) ဆောမ်းဟောက် (ဖမ်းဆီးရန်ကျန်)တို့ဖြစ်ကြောင်း သိရသည်။

ထို့နောက် ၎င်းတို့အား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ လည်းကောင်း၊ ငွေကြေးခဝါချမှု တိုက်ဖျက်ရေးဥပဒေဖြင့်လည်းကောင်း အရေးယူသွားရန် ဆောင်ရွက်လျက်ရှိသည်ဟု မြန်မာနိုင်ငံရဲတပ်ဖွဲ့မှ ပြောသည်။

CNI News

၂၀၂၆ ခုနှစ်၊ ဇွန်လ ၂၂

နာဂအမျိုးသားဆိုရှယ်လစ်ကောင်စီ-ကပ္ပလန်/အန်းမိုင်(NSCN-K/AM)နှင့် နာဂဒေသ ငြိမ်းချမ်းရေးနှင့်တည်ငြိမ်ရေး ညှိနှိုင်းဆွေးနွေးရေးကော်မတီ(NPSNC)တို့ ဇွန်လ ၁၄ ရက်နှင့် ၁၅ ရက်များက တွေ့ဆုံ ဆွေးနွေးခဲ့ကြသည်။

NSCN-K/AM အဖွဲ့ဘက်က ဥက္ကဋ္ဌ ဦးအန်းမိုင်၊ အထွေထွေအတွင်းရေးမှူးတို့ တက်ရောက်ခဲ့ပြီး NPSNC ဘက်က တော့ ဦးချစ်ယောင်း ဦးဆောင် တက်ရောက်ခဲ့သည်။

NSCN-K/AM အဖွဲ့နဲ့ NPSNC တွေ့ဆုံ ဆွေးနွေးကြစဉ်

ထိုသို့ တွေ့ဆုံမှုတွင် NSCN-K/AM အဖွဲ့က  မြန်မာနိုင်ငံရှိ နာဂလူမျိုးများ၏ အကျိုးစီးပွားများနှင့် မျှော်မှန်းချက် များကို ကာကွယ်စောင့်ရှောက်ခြင်းနှင့်အတူ ငြိမ်းချမ်းရေးနှင့် တည်ငြိမ်ရေးကို မြှင့်တင်ဆောင်ရွက်ရေးသည် မိမိတို့၏ အမြင့်ဆုံး ဦးစားပေးလုပ်ငန်းစဉ်အဖြစ် ဆက်လက် တည်ရှိနေမည်ဟု အာမခံကြောင်း ပြောကြားခဲ့သည်။

နာဂဒေသ ငြိမ်းချမ်းရေးနှင့်တည်ငြိမ်ရေး ညှိနှိုင်းဆွေးနွေးရေးကော်မတီ(NPSNC)သည် ကိုယ်စားလှယ် ၆ ဖွဲ့ကို ဖွဲ့စည်းခဲ့ပြီး NSCN-K/AM၊ NSCN-K/YA၊ NSCN-IM၊ NNC၊ ENDA အပါအဝင် နာဂလက်နက်ကိုင် ၆ ဖွဲ့အား တွေ့ဆုံ ဆွေးနွေးရန် ကြိုးပမ်းလျက်ရှိသည်။

CNI News
၂၀၂၆ ခုနှစ်၊ ဇွန်လ ၂၀

စစ်ကိုင်းတိုင်းဒေသကြီး၊ တမူးခရိုင်အတွင်းရှိ အိန္ဒိယ-မြန်မာ ကုန်သွယ်ရေးလမ်းပေါ်မှာ အဓိကကျသည့် ခမ်းပတ်မြို့ကို မြန်မာ့တပ်မတော်က ၂၀၂၆ ခုနှစ်၊ ဇွန်လ ၂၀ ရက်တွင် အပြည့်အဝ ပြန်လည် ထိန်းချုပ်လိုက် ကြောင်း သိရသည်။

ဇွန်လ ၂၀ ရက်နေ့တွင် အိန္ဒိယ- မြန်မာ နှစ်နိုင်ငံဆက်သွယ်ရေး လမ်းကြောင်းတစ်ခုဖြစ်သည့် ကလေး-တမူး လမ်းကြောင်းပေါ်ရှိ ခမ်းပတ်မြိုအား တပ်မတော်မှ အပြည့်အဝ ပြန်လည်ထိန်းချုပ်နိုင်ခဲ့သည်ဟု မြန်မာ့တပ်မ တော်နှင့်နီးစပ်သူများက ပြောသည်။

ခမ်းပတ်မြို့ကို ၂၀၂၃ ခုနှစ်၊ နိုဝင်ဘာလတွင် PDF အဖွဲ့များက ထိန်းချုပ်ထားပြီးနောက် မြန်မာ့တပ်မတော်က ၂၀၂၆ ခုနှစ်၊ ဇွန်လ ၂၀ ရက်မှာ ပြန်လည် ထိန်းချုပ်ခဲ့ခြင်းဖြစ်သည်။

မြန်မာ့တပ်မတော်သည် တမူး-ကလေး လမ်းကြောင်းကိုလည်း အပြည့်အဝ ထိန်းချုပ်နိုင်ရေး ထိုးစစ်ဆင်လျက်ရှိ နေသည်။

အိန္ဒိယ-မြန်မာ-ထိုင်း ကုန်သွယ်ရေး လမ်းကြောင်း စီမံကိန်း ဖော်ဆောင်ရန်အတွက် ကုန်သွယ်ရေး လမ်းကြောင်း ပေါ်ရှိ နယ်မြေများကို ပြန်လည် ထိန်းချုပ်နိုင်ရေး ထိုးစစ်ဆင် တိုက်ခိုက်လျက်ရှိသည်။

CNI news

၂၀၂၆ ခုနှစ်၊ ဇွန်လ ၁၉

လက်နက်ကိုင် ပဋိပက္ခများ ပြင်းထန်နေသည့် မြန်မာနိုင်ငံရှိ စစ်ကိုင်းတိုင်းဒေသကြီး မတည်ငြိမ်ပါက အိန္ဒိယ တင်မက တရုတ်ပါ အခက်တွေ့နိုင်ကြောင်း တရုတ်-မြန်မာအရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

စစ်ကိုင်းတိုင်းဒေသကြီး မတည်ငြိမ်ပါက အိန္ဒိယနိုင်ငံ၏ အရှေ့မြောက်ဒေသ လုံခြုံရေး၊ ကုန်သွယ်ရေးနှင့် အိန္ဒိယ ကို  ဆန့်ကျင်နေသော လက်နက်ကိုင်အဖွဲ့များ ခိုအောင်းနိုင်ခြေတို့ကြောင့် အိန္ဒိယအတွက် ကြီးမားသော အခက် အခဲများနှင့် စိန်ခေါ်မှုများ ပေါ်ပေါက်လာနိုင်ကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြသည်။

အလားတူ စစ်ကိုင်းတိုင်းဒေသကြီးသည် တရုတ်-မြန်မာ စီးပွားရေးစင်္ကြံ (CMEC) နှင့် ပိုးလမ်းမစီမံကိန်း (BRI) တို့အတွက် အချက်အချာကျသော ဒေသဖြစ်သလို တရုတ်စီမံကိန်းများနှင့် ရင်းနှီးမြှုပ်နှံမှုများ တည်ရှိရာ ဒေသ ဖြစ်သည့်အတွက် စစ်ကိုင်းတိုင်းမတည်ငြိမ်ပါက တရုတ်အတွက်လည်း အခက်အခဲများ ရင်ဆိုင်ရနိုင်ကြောင်း စစ်ရေးနှင့်နိုင်ငံရေးအကဲခတ်များက ‌ထောက်ပြကြသည်။

မြန်မာနိုင်ငံရှိ စစ်ကိုင်းတိုင်းဒေသကြီး တည်ငြိမ်အေးချမ်းရန်အတွက် အပစ်ခတ်ရပ်စဲရေးနှင့် ဆွေးနွေးပွဲများပေါ် လာနိုင်ကြောင်း၊ စစ်ကိုင်းတိုင်း မတည်ငြိမ်ပါက အိန္ဒိယနှင့်တရုတ် အခက်တွေ့နိုင်ကြောင်း တရုတ်-မြန်မာအရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

 မြန်မာသမ္မတ ဦးမင်းအောင်လှိုင်နဲ့ အိန္ဒိယဝန်ကြီးချုပ် မိုဒီကို တွေ့ရစဉ်

၎င်းက “ဟိုစစ်ကိုင်း မငြိမ်လို့ကတော့ တရုတ်အတွက်လည်း အခက်တွေ့မှာပဲလေ။ တရုတ်ကလည်း အဲဒီဟာကို ဖြတ်ပြီးသွားရမှာလေ သူရဲ့ကျောက်ဖြူ ရေနက်ဆိပ်ကမ်းက။ အဲဒီတော့ စစ်ကိုင်း မငြိမ်လို့ကတော့ အိန္ဒိယတင် မကဘူး၊ တရုတ်လည်း အခက်တွေ့မှာပဲဗျ။ အဲဒီတော့ စစ်ကိုင်းကို သူက ငြိမ်အောင်လုပ်ရတော့မှာလေ။  အဲဒီ တော့ ငြိမ်အောင် လုပ်ရေးဆိုတာမှာ ခုနက ကျမပြောတဲ့ အပစ်ခတ်ရပ်စဲရေး ဆွေးနွေးပွဲကြီးတွေကိုခေါ်ရမှာ NUG ကို စကားပြောချင်ချင်၊ မပြောချင်ချင် ဒါသူထည့်သွင်းရတော့မှာ။ ဘာဖြစ်လို့လဲဆိုတော့ မိုဒီကလည်း ပြောလိုက် တယ်လေ၊ ဒီမိုကရေစီလမ်းကို ပြန်သွားဖို့ဆိုရင် အဖွဲ့တွေ အားလုံးပါဝင်တဲ့ ဆွေးနွေးပွဲ ဖြစ်အောင်လုပ်ပါဆိုတဲ့။ တရုတ်ကလည်း ဒါကိုတောက်လျှောက် ဖိအားပေးနေတာ။ အဲဒီတော့ တရုတ်ကိုခေါ်ပြီးတော့ သူတို့ကြိုက်သလို နိုင်ငံတော်ဧည့်သည်အဖြစ် ဖိတ်ပြီးတော့ စနစ်တကျ ခေါ်ပြီးပေးမယ်ဆိုရင် တရုတ်ကို ပြန်ပြီးတော့လည်း (ဦး)မင်း အောင်လှိုင်က ပြန်ပြီးတော့ ပေးရမယ့် အချက်အလက်တွေ ရှိလာနိုင်တယ်လေ။ အဲဒီတော့ အဲဒီအချက်အလက်က ဘာလဲဆိုတော့ သူတို့ပြောပြောနေတဲ့ "Tiger Myanmar Economy Quality" (ဒါမှမဟုတ် အာရှကျားတစ်ကောင် ဖြစ်လာမယ့် မြန်မာ့စီးပွားရေး အရည်အသွေး) ကြီးဖြစ်ဖို့ဆိုရင် အဲဒီတောက်လျှောက်က အေးချမ်းဖို့လိုတာကို။ ဒါ ကြောင့်မို့ အပစ်ခတ်ရပ်စဲရေးတွေ၊ ဆွေးနွေးပွဲတွေ ပေါ်လာမယ်လို့ ကျမပြောတာ”ဟု ပြောသည်။

စစ်ကိုင်းတိုင်းဒေသကြီးတွင် KIA ဦးဆောင်သည့် လက်နက်ကိုင် အင်အားစုများက ကသုံးလုံး(ကန့်ဘလူ-ကောလင်း-ကသာ) စစ်ဆင်ရေးကို ဖော်ဆောင်၍ ကချင်ပြည်နယ်၊ စစ်ကိုင်းတိုင်းဒေသကြီး၊ ချင်းပြည်နယ်၊ ရခိုင် ပြည်နယ်တို့ကို ဆက်စပ်ပြီး မြန်မာနိုင်ငံ၏ အနောက်မြောက်ဒေသ လွတ်မြောက်ရေး ကြိုးပမ်းလျက်ရှိနေသည်။

ထို့ကြောင့် မြန်မာ့တပ်မတော်၊ ရှမ်းနီအမျိုးသားများတပ်မတော်(SNA)၊ ဇိုမီးအမျိုးသားတော်လှန်ရေး တပ်မတော်(ZRA/ZRO)၊ အာရက္ခတပ်တော်(AA)၊ ချင်းအမျိုးသား တပ်ဦး(CNF)၊ KIA၊ PDF တို့ကြား တိုက်ပွဲများ အပြင်းအထန် ဖြစ်ပွားနေကြသည်။

မြန်မာသမ္မတ ဦးမင်းအောင်လှိုင်နဲ့ တရုတ်သမ္မတ ရှီကျင့်ဖျင်ကို တွေ့ရစဉ် 

စစ်ကိုင်းတိုင်းထဲတွင် လက်နက်ကိုင်ပေါင်းစုံ လှုပ်ရှားနေကြသည့်အတွက် အစိုးရအနေနှင့် ငြိမ်းချမ်းရေးစကား ပြောရန် မည်သည့်အဖွဲ့နှင့် ပြောရမလဲဆိုသည့် ကဏ္ဍများရှိကြောင်း တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုး တက်ရေးပါတီ(TNDP)မှ ဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။

၎င်းက “ဒီစစ်ကိုင်းတိုင်းဒေသကြီးမှာက တရုတ်ရဲ့ ရင်းနှီးမြုပ်နှံမှုတွေလည်းရှိတယ်။ ဘာဖြစ်လို့လဲဆိုတော့ ကျနော်တို့ မုံရွာတစ်ဖက်ကမ်းက လက်ပံတောင်း ကြေးနီစီမံကိန်းကြီးက တရုတ်ရဲ့ အကြီးစား လုပ်ငန်းတွေဖြစ်နေ တယ်လေ။ နောက်တချက်က ကျနော်တို့ ဒီတရုတ်နဲ့ အိန္ဒိယ ကုန်သွယ်ရေးလမ်းမကြီးဖြစ်တဲ့ ဒီကလေး၊ တမူး၊ မုံရွာ အဲဒီလမ်းမကြီးကလည်း ဖြတ်သန်းထားတဲ့အခါကြတော့ ကုန်စည်စီးဆင်းမှုတွေက ထိခိုက်နိုင်တယ်။ အဲဒီအတွက် ကြောင့်မို့ ကျနော်တို့ ဒီနိုင်ငံကြီးနှစ်နိုင်ငံရဲ့ ဒါကုန်စည်စီးဆင်းမှု လမ်းကြောင်းတွေကို ထိခိုက်တဲ့အတွက်ကြောင့်မို့ တရုတ်ရဲ့ အကျိုးစီးပွားတွေလည်း ထိခိုက်နိုင်ပါတယ်။ တိုင်းပြည် မငြိမ်မသက်ဖြစ်တဲ့ အခါကြတော့ တရုတ်စီမံကိန်း တွေက အနှောင့်အယှက်ဖြစ်လာတာတွေ တွေ့ရှိရတာပေါ့။ အမှန်တကယ်ကတော့ စစ်မတိုက်ရဘဲနဲ့ ငြိမ်းချမ်းရေး ရသွားတာကတော့ အကောင်းဆုံးပေါ့နော်။ အခုက စစ်တိုက်ပြီးမှ ယုံကြည်မှုရမယ်ဆိုရင် လူတွေရဲ့စိတ်ဒဏ်ရာ အနာ တရ ကြီးကြီးမားမားတွေ ရကြကုန်မှာ ဖြစ်ပါတယ်။ အခု စစ်ကိုင်းတိုင်းထဲမှာဆို အဖွဲ့ပေါင်းစုံက လှုပ်ရှားနေကြ တော့ တဖက်ကလည်း ငြိမ်းချမ်းရေး စကားပြောဖို့အတွက်ကို ဘယ်အဖွဲ့နဲ့ပြောရမလဲဆိုတဲ့ ကဏ္ဍတွေရှိတာပေါ့ နော်  အစိုးရဘက်က ပြန်စဥ်းစားတဲ့အခါမှာ”ဟု ပြောသည်။

လက်ရှိတွင် စစ်ကိုင်းတိုင်းဒေသကြီးအတွင်းမှာ ကချင်(KIA)၊ ရှမ်းနီ(SNA)၊ ရခိုင်(AA)၊ ကူကီး(KNA)၊ PDF များ၊ နာဂ လက်နက်ကိုင်များ၊ ကသည်းလက်နက်ကိုင်များ စသည့် လက်နက်ကိုင်များ လှုပ်ရှားလျက်ရှိသည်။

တခြား တစ်ဖက်မှာတော့ မြန်မာနိုင်ငံသမ္မတ ဦးမင်းအောင်လှိုင်သည် ၂၀၂၆ ခုနှစ်၊ မေလ ၃၀ ရက်မှ ဇွန်လ ၃ ရက်ထိ အိန္ဒိယသို့လည်းကောင်း၊ ၂၀၂၆ ခုနှစ်၊ ဇွန်လ ၁၅ ရက်မှ ဇွန်လ ၁၉ ရက်ထိ တရုတ်သို့လည်းကောင်း သွားရောက်ခဲ့ပြီး အိန္ဒိယဝန်ကြီးချုပ် မိုဒီနှင့် တရုတ်သမ္မတ ရှီကျင့်ဖျင်တို့အား တွေ့ဆုံ ဆွေးနွေးခဲ့သည်။

CNI News

၂၀၂၆ ခုနှစ်၊ ဇွန်လ ၁၉

မြန်မာနိုင်ငံရှိ တိုင်းရင်းသားလက်နက်ကိုင်များ အနေဖြင့် “၀” ကဲ့သို့ ရပ်တည်နိုင်ချင်သည့် ရည်မှန်းချက် ထားရှိ ခြင်းသည် မည်သည့်အတွက်ကြောင့်လဲ ဆိုသည့်အပေါ် ပြည်တွင်း/ပြည်ပ နိုင်ငံရေးအသိုင်းအဝန်းကြား မေးခွန်း ထုတ်လျက်ရှိသည်။

မြန်မာနိုင်ငံတွင် ၂၀၀၈ ဖွဲ့စည်းပုံအခြေခံဥပဒေအရ ကိုယ်ပိုင်အုပ်ချုပ်ခွင့်ရတိုင်း ၁ ခုနှင့် ကိုယ်ပိုင်အုပ်ချုပ်ခွင့်ရ ဒေသ ၅ ခု စုစုပေါင်း ၆ ခု သတ်မှတ်ထားကာ “ဝ” သည် ကိုယ်ပိုင်အုပ်ချုပ်ခွင့်ရတိုင်းဖြစ်သည်။ 

“ဝ” အား ကိုယ်ပိုင်အုပ်ချုပ်ခွင့်ပေးခြင်းသည် တရုတ်နယ်စပ်တွင် တည်ရှိနေခြင်း၊ ငွေအင်အား၊ လူအင်အား၊ လက်နက်အင်အားနှင့် ဒေသအား လုံခြုံစွာ ထိန်းထားနိုင်သည့် အချက်အလက်များကြောင့် ဖြစ်ကြောင်း၊ ကျန် တိုင်းနှင့် ပြည်နယ်များတွင် “ဝ” ကဲ့သို့ စုဖွဲ့မှု ကျစ်လျစ်မှုမျိုး မည်သူ့မှာမှ မတွေ့ရကြောင်း စစ်ရေးနှင့် နိုင်ငံ‌ရေး အကဲခတ်များက ထောက်ပြကြသည်။ 

၂၀၀၈ အခြေခံဥပဒေ စတင်ရေးဆွဲသည့် ပုဂ္ဂိုလ်များအနေဖြင့် ခိုင်မာသည့် ရည်ရွယ်ချက် ရှိခဲ့မည်ဆိုလျှင် ယခု ထက် ပိုမိုကောင်းမွန်သည့် အနေအထားမျိုး မြင်တွေ့လာရနိုင်ကြောင်း နိုင်ငံရေးလေ့လာသုံးသပ်သူ တစ်ဦးက CNI သတင်းဌာနသို့ ပြောသည်။

AA ခေါင်းဆောင် ဗိုလ်ချုပ်ထွန်းမြတ်နိုင်နဲ့ UWSA မှ တာဝန်ရှိသူ တစ်ဦးကို တွေ့ရစဉ်

၎င်းက “ “ဝ”အဖွဲ့ကို ကျနော်တို့ ၂၀၀၈ အခြေခံဥပဒေ ညောင်နှစ်ပင်မှာဆွဲတုန်းက အခြေခံဥပဒေရေးဆွဲတဲ့ သူတွေက အ‌ခြေခံဥပဒေ ရေးဆွဲတာရဲ့ ရည်ရွယ်ချက်က ပါတီစုံဒီမိုကရေစီ အခြေခံဥပဒေ တစ်ခုလည်း ဖြစ်ရမယ်၊ ပြည်တွင်း ငြိမ်းချမ်းရေးလည်း ရရမယ်၊ ပြည်တွင်းက လက်နက်ကိုင် အဖွဲ့အစည်းတွေကလည်း တစ်ခုတည်းသော တပ်မတော်အဖြစ် ပြောင်းလဲနိုင်ရမယ်ဆိုတဲ့ ခိုင်မာတဲ့ ရည်ရွယ်ချက် မရှိခဲ့လို့ပေါ့။ အဲဒီလို ရည်ရွယ်ချက် ရှိခဲ့မယ် ဆိုရင် အဲဒီတုန်းက အခြေခံဥပဒေ ရေးဆွဲခဲ့တဲ့ ပုဂ္ဂိုလ်များ အဓိကအားဖြင့်တော့ ဦးသန်းရွှေကို ပြောချင်တာပေါ့။ ဦးသန်းရွှေတို့က အာရုံစိုက်ပြီးတော့ "ဝ"တပ်ဖွဲ့ကဆိုရင် အဲဒီတုန်းက အင်အားအကြီးဆုံး၊ အကြီးဆုံးဖြစ်တဲ့ အတွက်ကြောင့် သူတို့အုပ်‌ချုပ်နေတဲ့ ဒေသကလည်း အုပ်ချုပ်ရေးယန္တ‌ရားတွေ တပ်မတော်ရဲ့ အင်အားတွေနဲ့ သီးခြား ကင်းလွတ်နေတယ်။ ကင်းလွတ်နေတော့ ဒီဒေသကိုတော့ ငါတို့အခြေခံဥပဒေထဲမှာ ပါအောင် ဘာပဲ ဖြစ်ဖြစ် အဓိက ညှိနှိုင်းပြီးတော့ ရေးဆွဲမှဖြစ်မယ်ဆိုတဲ့ ခိုင်မာတဲ့ရည်ရွယ်ချက်၊ အမြော်အမြင်ကြီးတဲ့ ရည်ရွယ်ချက် သာရှိခဲ့ရင် အဲဒီ ၂၀၀၈ အခြေခံဥပဒေကြီးကို ဇွတ်အတင်း ဒီလိုအတည်ပြုမှာ မဟုတ်ဘူး။ တကယ်တမ်း အမျှော် အမြင်ရှိတဲ့ ခေါင်းဆောင်ဆိုရင် သူတို့ရဲ့ဖြစ်တည်မှုက အခြေခံဥပ‌ဒေနဲ့သွားမယ့် တိုင်းပြည်ရဲ့ အနာဂတ်အတွက် အန္တရာယ်ရှိတယ်ဆိုတာ ကြိုပြီးတော့ သိမြင်နေလို့ရှိရင် သူတို့ကို မပါပါအောင်ဆွဲမှာ”ဟု ပြောသည်။

လက်ရှိတွင် “ဝ”သည် ၂၀၀၈ ဖွဲ့စည်းပုံအခြေခံဥပဒေ ပုဒ်မ ၅၆ (စ)အရ ကိုယ်ပိုင်အုပ်ချုပ်ခွင့်ရတိုင်း အဆင့် သတ်မှတ် ပေးထားသော်လည်း “ဝ”ကိုယ်ပိုင်အုပ်ချုပ်ခွင့်ရတိုင်း ဒေသသည် ဗဟိုအစိုးရ၏ ဩဇာအာဏာ သက်ရောက်မှုမရှိဘဲ “ဝ”ပြည်သွေးစည်းညီညွတ်ရေးတပ်မတော်(UWSA)က သီးခြားလွတ်လပ်စွာ စီမံအုပ်ချုပ် လျက်ရှိနေသည်။ 

UWSA သည် “ဝ” ဒေသ တစ်ခုလုံး၏ စစ်ရေး-နိုင်ငံရေး အပါအဝင် တရားရေး၊ ကျန်းမာရေး၊ ပညာရေး၊ စီးပွားရေး၊ အကောက်ခွန်ဌာန၊ လဝက စသည့် လုပ်ငန်းစဉ်များ ကိုယ်ပိုင်စီမံအုပ်ချုပ်လျက်ရှိသည်။

ထို့ကြောင့် တိုင်းရင်းသား လက်နက်ကိုင် အဖွဲ့အစည်းများက “ဝ”တပ်ဖွဲ့(UWSA)ကို စံနမူနာထား၍ “ဝ”ကဲ့သို့ နိုင်ငံရေးအဆင့်အတန်းမျိုး ပေးရန် တောင်းဆိုလျက်ရှိသလို တခြား လက်နက်ကိုင်များကတော့ ကိုယ်တိုင် တည် ဆောက်လျက်ရှိနေသည်။

“ဝ”သည် သီးခြား နယ်မြေဒေသလို ဖြစ်လာသည့်အတွက် ကျန်တိုင်းရင်းသား လက်နက်ကိုင်အဖွဲ့များက အားကျ လာပြီး “ဝ”ကဲ့သို့ အခွင့်အရေးမျိုးကို တောင်းဆိုလာကြခြင်းဖြစ်သည်ဟု နိုင်ငံရေးလေ့လာသုံးသပ်သူ တစ်ဦးက CNI သတင်းဌာနသို့ ပြောသည်။

တိုင်းရင်းသား လက်နက်ကိုင် ခေါင်းဆောင်များကို တွေ့ရစဉ်

၎င်းက “အခုဟာက အဲဒီလိုမပါတဲ့အတွက် သူ့တပ်ကလည်း သူ့ဟာသူ သီးခြားလှုပ်ရှားတယ်။ သူတို့ကလည်း သီးခြားနေတယ် ပြီးတဲ့အခါကျတော့ အခု နောက်ဆက်တွဲ ဖြစ်ပေါ်လာတဲ့ လက်နက်ကိုင်ပဋိပက္ခတွေမှာ တခြား တိုင်းရင်းသား လက်နက်ကိုင် အဖွဲ့အစည်းတွေကိုလည်း လက်နက်ခဲယမ်းမီးခြောက် ထောက်ပံ့တယ်၊ လိုအပ်တဲ့ ငွေရေးကြေးရေး ဘာညာ အကူအညီတွေ ပေးတယ်ဆိုတော့ အကျိုးဆက်‌ကို တွေ့တယ်မလား။ အဲဒီလို ကူညီ နိုင်ရုံတင် မကဘူး၊ သူတို့နေထိုင်နိုင်တဲ့ သူတို့နေခဲ့တဲ့ နိုင်ငံရေးအရ လွတ်လွတ်လပ်လပ် ဗဟိုအစိုးရရဲ့ အခြေခံ ဥပဒေအရကို လွတ်လွတ်လပ်လပ် နေနိုင်တဲ့ဘဝကို ကျန်တဲ့တိုင်းရင်းသားတွေက အားကျတာကို။ အားကျတဲ့ အခါကျတော့ ကျနော်တို့က "ဝ"လိုဖြစ်ချင်တယ်။ ကျနော်တို့က အဲဒီလိုသွားမှာ အဲဒီလို ပြောတာပေါ့နော်” ဟု ပြောသည်။

လက်နက်ကိုင်ပဋိပက္ခများ ချုပ်ငြိမ်း‌ရေးအတွက် ကိုယ်ပိုင်အုပ်ချုပ်ခွင့်ရဒေသ ခွဲပေးရုံဖြင့် မပြီးပြတ်သေးကြောင်း၊ “ဝ” တပ်ဖွဲ့နှင့် ကျန်တိုင်းရင်းသား လက်နက်ကိုင်များသည် မတူညီသည့် ရပ်တည်ချက် များစွာရှိကြောင်း စစ်ရေးနှင့်နိုင်ငံ‌ရေးအကဲခတ်များက ထောက်ပြကြသည်။ 
အခြား တိုင်းရင်းသားလက်နက်ကိုင်များကို “ဝ” ကဲ့သို့ ကိုယ်ပိုင်အုပ်ချုပ်ခွင့်‌ ပေးရမည်ဆိုသည်မှာ ပထဝီ အနေအထားအရ မည်ကဲ့သို့မျှ အဆင်ပြေနိုင်မည် မဟုတ်ကြောင်း နိုင်ငံရေးလေ့လာသုံးသပ်သူ ဒေါက်တာ မျိုးဆက်သွေးက CNI သတင်းဌာနသို့ ပြောသည်။ 

၎င်းက “ “ဝ”ကတော့ လက်နက် တပ်ဆင်ခွင့် တပ်အင်အား တိုးချဲ့ခွင့် အဲဒီဟာအပြင် ခုနကပြောတဲ့ ငွေကြေး စီမံခန့်ခွဲခွင့်၊ ဒီဒေသကြီး တစ်ခုလုံးကို စီမံခန့်ခွဲမှု တစ်ခုလုံးကို ၁၀၀ ရာခိုင်နှုန်း နီးပါးရထားတာလေ။ အဲဒီလိုမျိုး ကတော့ တခြား တိုင်းရင်းသား လက်နက်ကိုင်‌တွေက လိုချင်ကြမှာပေါ့။ ပေးမလား မပေးမလားဆိုတာပဲ စဉ်းစား ရမှာပေါ့နော်။ "ဝ"တုန်းက ဘာဖြစ်လို့ ပေးခဲ့တာလဲ၊ မဖြစ်မနေမို့ ပေးခဲ့ရတာလား၊ ပေးဖို့သင့်လို့လား။ "ဝ"လိုနေရာ မျိုးဆို ပေးလိုက်ခြင်းအားဖြင့် သူ့မှာပင်လယ်မရှိဘူး၊ ပင်လယ်မရှိတဲ့အတွက် သူ့ပါ့ဟာသူ ကြိုက်သလို သဘော အားဖြင့် ဗမာပြည်ရဲ့ နိုင်ငံခြားရေးမူဝါဒကို သူအရမ်းကြီး စွက်ဖက်လို့မရဘူး။ တရုတ်နဲ့ သဘောထားအမျိုးမျိုး ရှိတဲ့သူ။ ဒါပေမယ့် ရခိုင်လိုဟာမျိုးကို ရခိုင်ကမ်းရိုးတန်းကြီး တစ်ခုလုံးကို AA က စိတ်တိုင်းကျ လုပ်လိုက်ရင် ကျနော်တို့ ဘယ်လိုလို့ ပင်လယ်ကုန်သွယ်ရေးမှာ တနင်္သာရီနဲ့ ဧရာဝတီပဲ ကျန်တော့မှာပေါ့ အစသဖြင့်ပေါ့နော်။ အဲဒီတော့ စဉ်းစားချက်တွေက မတူဘူးဗျ။ "ဝ" နဲ့ရခိုင်နဲ့ကို အဲဒီလို အတူတူ စဉ်းစားလို့ မရဘူးပေါ့နော်။ အဲဒီလို KIA ဆိုရင်ရော ပေးမလားဆို ပင်လယ်ထွက်ပေါက်တော့မရှိဘူး။ ဒါပေမယ့် သူ့ဆီမှာက တိုင်းပြည်အတွက် တကယ့် အရေးကြီးတဲ့ သယံ‌ဇာတတွေ သတ္ထုတွေ အများကြီး ထိုင်နေတယ်။ အဲဒါကို သူတို့စိတ်တိုင်းကျ လုပ်ပိုင် ခွင့် ပေးလိုက်မလား ဒီလို အမျိုးမျိုးစဉ်းစားရတယ်” ဟု ပြောသည်။

ကိုယ်ပိုင်အုပ်ချုပ်ခွင့်ရဒေသများအဖြစ် ကိုးကန့်သည် ရှမ်းပြည်နယ်အတွင်းရှိ ကုန်းကြမ်းနှင့် လောက်ကိုင်မြို့နယ်၊ ပလောင်သည် ရှမ်းပြည်နယ်အတွင်းရှိ နမ့်ဆန်နှင့် မန်တုံမြို့နယ်၊ ဓနုသည် ရှမ်းပြည်နယ်အတွင်းရှိ ရွာငံနှင့် ပင်းတယမြို့နယ်၊ ပအိုဝ်းသည် ရှမ်းပြည်နယ်အတွင်းရှိ ဟိုပုန်း၊ ဆီဆိုင်နှင့် ပင်လောင်း မြို့နယ်၊ နာဂသည် စစ်ကိုင်းတိုင်းဒေသကြီးအတွင်းရှိ လဟယ်၊ လေရှီးနှင့် နန်းယွန်းမြို့နယ် တို့ကို ရရှိထားကြသည်။ 

UWSA ကတော့ ရှမ်းပြည်နယ်အတွင်းက ဟိုပန်မြို့နယ်၊ မိုင်းမောမြို့နယ်၊ ပန်ဝိုင်မြို့နယ်၊ နားဖန်းမြို့နယ်၊ မက်မန်းမြို့နယ်၊ ပန်ဆန်း(ပန်းခမ်း)မြို့နယ်တို့ကို ရရှိထားသည်။

ထို့နောက် AA က မိမိတို့သည် အနိမ့်ဆုံး အဆင့်အနေဖြင့် “ဝ”ကဲ့သို့ နိုင်ငံရေးအဆင့်အတန်းကို ရလိုကြောင်းနှင့် ကွန်ဖက်ဒရေးရှင်းအဆင့်ကို သွားလိုကြောင်း ပြောကြားထားသလို KIA ကတော့ တိုင်းရင်းသားလက်နက်ကိုင်များ သည် ၂၀၂၅ ခုနှစ်ကျော်လွန်လာပါက ဖက်ဒရယ်ထက် ကျော်လွန် စဉ်းစား၍ တောင်းဆိုလာကြမည်ဟု ပြောကြား ထားသည်။

CNI News

၂၀၂၆ ခုနှစ်၊ ဇွန်လ ၁၉

မြန်မာနိုင်ငံသည် အင်အားကြီး အိမ်နီးချင်းနိုင်ငံ နှစ်ခုဖြစ်သည့် တရုတ်နှင့် အိန္ဒိယတို့၏ ပထဝီနိုင်ငံရေး၌ အရေးကြီးဆုံး ဆုံချက်ဖြစ်နေသည်ဟု နိုင်ငံရေးလေ့လာသုံးသပ်သူတစ်ဦးက CNI သတင်းဌာနသို့ ပြော သည်။

ထို့ကြောင့် ၎င်းတို့ နှစ်နိုင်ငံအနေဖြင့် မြန်မာနိုင်ငံတွင် မည်သည့်အစိုးရ တက်သည်ဖြစ်စေ အဆင်ပြေ အောင် ပေါင်းမည်ဆိုသည့် သဘောထား ပေါ်လစီမျိုးဖြစ်ကြောင်း၊ မြန်မာနိုင်ငံကို ထိုနှစ်နိုင်ငံမှ ပယ်ထား ၍မရကြောင်း ၎င်းက ပြောသည်။

နိုင်ငံရေးလေ့လာသုံးသပ်သူက “တရုတ်ကလည်း သူ့အကျိုးစီးပွားအတွက်၊ သူ့ရေရှည်အကျိုးစီးပွား အတွက်ပဲ မြန်မာနိုင်ငံကို ဖြတ်ပြီးတော့ အိန္ဒိယ သမုဒ္ဒရာကနေ သူက လမ်းဖောက်ချင်တာ။ အဲဒီ လမ်းဖောက် လိုက်လို့ရှိရင် သူ့ရဲ့ စွမ်းအင် သယ်ယူပို့ဆောင်‌ရေး၊ လုံခြုံရေးအတွက်ရော၊ သူ့ရဲ့ကုန်ပစ္စည်း တွေ မြန်မာပြည်ကနေ ဖြတ်ပြီးတဲ့အခါကြတော့ အာဖရိကတို့၊ အရှေ့အလယ်ပိုင်းတို့ အဲဒီဒေသတွေကို ဖြန့်ဖြူးဖို့ရော၊ ဥရောပကို သွားဖို့ရောက မြန်မာပြေးလမ်းက ပိုပြီးတော့ အများကြီးတိုတောင်းသွားမှာပေါ့ ခရီးက။ ဒါကြောင့် သူ့အကျိုး စီးပွားအတွက်က မြန်မာကို သူက ချန်ထားလို့ကိုမရဘူး။ အိန္ဒိယကလည်း တရုတ်နဲ့သာ သူက မဆက်ဆံချင်တာ၊ တရုတ်နဲ့ ဆက်ဆံလိုက်တိုင်းမှာ သူက ခံရတာချည်းပဲဖြစ်တော့ အိန္ဒိယက သူ့ပြည်ကို တရုတ် ဝင်လာတာတော့ မကြိုက်ဘူး။ သို့သော် မြန်မာနိုင်ငံကို ဖြတ်ပြီးတဲ့ အခါ ကြတော့ အရှေ့တောင် အာရှပေါ့။ ထိုင်းကို အရင်ဆုံးဖောက်မယ်၊ ထိုင်းကနေပြီးမှ မြန်မာ၊ ကမ္ဘောဒီယား၊ ဗီယက်နမ်၊ လာအို စသည့်ဖြင့် အရှေ့တောင်အာရှကို သူရဲ့ဘေးဘက် ဆန့်မယ်ပေါ့နော်။ နောက်တစ်ခါ တခြား အမေရိကန်နဲ့ သူတို့ လုပ်နေတဲ့ တရုတ်ကို ထိန်းချုပ်ရေး အစီအစဉ်မှာ စစ်ရေးတွေ၊ ဘာတွေညာ တွေ ဆက်ဆံမှုတွေလည်း ပါလာနိုင်တာပေါ့။ အဓိက,ကတော့ တရုတ်ကို သူက အပြိုင် counter လုပ်တဲ့ သဘောပါပဲ။ ဆိုတော့ မြန်မာနိုင်ငံက သူ့အတွက်က ပထဝီနိုင်ငံရေးမှာ အရေးကြီးတဲ့ အခြေအနေမှာ ဖြစ်နေတော့ ၂ နိုင်ငံလုံးက မြန်မာပြည်မှာ ဘယ်အစိုးရပဲ တက်တက် သူတို့ အဆင်ပြေအောင် ပေါင်းမယ် ဆိုတဲ့ သဘောထား ပေါ်လစီပေါ့” ဟု ပြောသည်။

တရုတ်-မြန်မာ-အာဆီယံကို ချိတ်ဆက်မှု သရုပ်ပြထားစဉ်

တရုတ်နိုင်ငံ၏ စွမ်းအင်အများစုသည် မလက္ကာရေလက်ကြားကို ဖြတ်သန်းနေရခြင်းဖြစ်ကာ တိုက်ပွဲများ ဖြစ်ပွားခြင်း သို့မဟုတ် ပိတ်ဆို့ခံရပါက တရုတ်အတွက် အသက်သွေးကြော ပြတ်တောက် သွားနိုင်သည့် အနေအထားဖြစ်သည်ဟု ထောက်ပြကြသည်။

ထို့ကြောင့် မြန်မာနိုင်ငံမှတဆင့် သွယ်တန်းထားသည့် ရခိုင်ပြည်နယ် ကျောက်ဖြူမှ တရုတ်နိုင်ငံ ကူမင်း မြို့အထိ ရေနံနှင့် သဘာဝဓာတ်ငွေ့ ပိုက်လိုင်းသည် တရုတ်ကို အိန္ဒိယသမုဒ္ဒရာဆီ တိုက်ရိုက် ထွက် ပေါက် ပေးထားသဖြင့် မလက္ကာရေလက်ကြား စိုးရိမ်ချက်ကို လျှော့ချပေးနိုင်သည်။

ထို့ပြင် CMEC သည်လည်း အရေးကြီးဆုံး အစိတ်အပိုင်းတစ်ခုဖြစ်ပြီး ကျောက်ဖြူ ရေနက်ဆိပ်ကမ်းသည် တရုတ်နိုင်ငံ ကုန်းတွင်းပိတ် ယူနန်ပြည်နယ်ကို အိန္ဒိယသမုဒ္ဒရာနှင့် တိုက်ရိုက် ချိတ်ဆက်ပေးမယ့် ဗျူဟာမြောက် ဆိပ်ကမ်းလည်းဖြစ်ကြောင်း၊ အိန္ဒိယသမုဒ္ဒရာထဲ၌ တရုတ်၏ စစ်ဘက်၊ အရပ်ဘက် ဩဇာလွှမ်းမိုးမှုကို တိုးချဲ့ရန်အတွက် မြန်မာ့ကမ်းရိုးတန်းနှင့် ပင်လယ်ပြင်သည် အချက်အချာကျကြောင်း နိုင်ငံရေးအကဲခတ်များက ထောက်ပြကြသည်။

အိန္ဒိယအတွက်မူ မြန်မာနိုင်ငံသည် တရုတ်၏ ဩဇာလွှမ်းမိုးမှုကို တန်ပြန်ရန်နှင့် ၎င်း၏ စီးပွားရေး တိုးတက်မှုအတွက် မရှိမဖြစ် လိုအပ်သည့် တံခါးပေါက်ဖြစ်ကြောင်း၊ အရှေ့တောင်အာရှ (အာဆီယံ) ဈေးကွက်နှင့် ဒေသတွင်းနိုင်ငံများသို့ ချိတ်ဆက်ရန် ကြိုးပမ်းရာတွင် မြန်မာသည် ကုန်းတွင်းပိုင်းအရ တစ်ခုတည်းသော တံတားကဲ့သို့ဖြစ်ကာ အိန္ဒိယ - မြန်မာ - ထိုင်း သုံးနိုင်ငံ အဝေးပြေးလမ်းမကြီးသည် ထင်ရှားသော သာဓကတစ်ခုဖြစ်ကြောင်း သိရသည်။

အိန္ဒိယ၏ ကာလကတ္တားမှ ရခိုင်ပြည်နယ် စစ်တွေဆိပ်ကမ်း၊ ထိုမှတဆင့် ကုလားတန်မြစ်ကြောင်း အတိုင်း အိန္ဒိယ၏ မီဇိုရမ်ပြည်နယ်သို့ ချိတ်ဆက်မည့် စီမံကိန်းဖြစ်ကာ အိန္ဒိယ၏ မြောက်ဘက်ခြမ်းကို စီးပွားရေးအရသာမက လုံခြုံရေးအရပါ အချိန်တိုတိုဖြင့် ချိတ်ဆက်မည့် ဗျူဟာမြောက်လမ်းဖြစ်သည်။

အိန္ဒိယဝန်ကြီးချုပ် မိုဒီနဲ့ တရုတ်သမ္မတ ရှီကျင့်ဖျင်ကြားက မြန်မာရှိ စီမံကိန်းများကို တွေ့ရစဉ်

တရုတ်က အိန္ဒိယသမုဒ္ဒရာထဲ စိုးမိုးလာမည်ကို အိန္ဒိယက စိုးရိမ်သည့်အပြင် အိန္ဒိယ မြောက်ဖျားဒေသမှ သူပုန်အဖွဲ့များအား ထိန်းချုပ်ရန်အတွက် တပ်မတော်၏ ပူးပေါင်းဆောင်ရွက်မှုကို မရှိမဖြစ် လိုအပ် ကြောင်း သိရသည်။

ထို့ကြောင့် တရုတ်နှင့် အိန္ဒိယတို့သည် မြန်မာနိုင်ငံနှင့်အတူ ဒေသတွင်း နိုင်ငံများအား တစ်ခုနှင့် တစ်ခု အကျိုးတူ ပူးပေါင်းဆောင်ရွက်မှုများ ဖြစ်လာနိုင်သဖြင့် အင်မတန် အရေးကြီးမည်ဟုထင်ကြောင်း မြန်မာ့ပုံရိပ်ဖော်ညွှန်ရေးအဖွဲ့မှ အကြံပေး ဦးညိုအုန်းမြင့်က CNI သတင်းဌာနသို့ ပြောသည်။

၎င်းက “ရေလက်ကြား နောက်တစ်ခုဖြစ်တဲ့ စင်္ကာပူ၊ မလေးရှား၊ အင်ဒိုနီးရှားကြားမှာရှိတဲ့ မလက္ကာ ရေလက်ကြားပေါ့၊ မလက္ကာရေလက်ကြား ဆိုတာကလည်း တော်တော် ကီလို ၉၀၀ ကျော်လောက် ရှိပါတယ်။ အဲဒီရေလက်ကြားကြီးများ ပိတ်သွားခဲ့သော်ဆိုတဲ့ အရှေ့အနောက် ကုန်သွယ်မှုပေါ့။ ဒါကို ခုနက ပြန်ပြီးတော့ ဆက်စပ် ပြောရမယ်ဆိုရင် အိန္ဒိယနိုင်ငံကလည်း အိန္ဒိယ-ထိုင်း-မြန်မာ Trilateral Highway ပေါ့နော်။ အဲဒါ ဘာကြောင့်လဲဆိုတော့ အိန္ဒိယနိုင်ငံနဲ့ အရှေ့တောင်အာရှ အာဆီယံနိုင်ငံတွေရဲ့ ကုန်သွယ်မှုဟာ အမေရိကန်ဒေါ်လာ ဘီလျံ ၂၀၀ ရှိပါတယ်။ ကျနော်တို့ တိုင်းပြည်နဲ့ အိန္ဒိယမြန်မာ ကုန်သွယ်မှုက ၂ ဘီလျံပဲရှိပါတယ်။ ၂ ဘီလျံနဲ့ ဘီလျံ ၂၀၀ ဆိုတော့ တကယ်လို့များ အဲဒီရေလမ်းကြောင်း ကြီး ပိတ်သွားခဲ့သော် အိန္ဒိယကနေပြီးတော့ အရှေ့အာရှနဲ့အာဆီယံကို ဆက်သွယ်တဲ့ ၅၀ ရာခိုင်နှုန်း သော ကုန်သွယ်မှုက ပိတ်ဆို့သွားနိုင်ပါတယ်။ အဲဒီအတွက်ကြောင့် တရုတ်ပြည်သူ့သမ္မတနိုင်ငံကလည်း ဒီလိုပဲတွေးမှာပါပဲ။ တကယ်လို့ အဲဒီရေလမ်း‌ကြောင်းကြီး ပိတ်သွားရင် သူတို့ဘယ်ကသွားမလဲ။ နောက် သူနဲ့ မတည့်တဲ့ ဩစတြေးလျတို့၊ နောက် အနောက်နိုင်ငံတွေနဲ့ ဒီပြဿနာက ဖြေရှင်းရတာ ခက်တဲ့ အတွက် မြန်မာနိုင်ငံက တဆင့်ပေါ့။ ကူမင်းကနေတဆင့် ကျောက်ဖြူအထိ ကုန်သွယ်ရထားလမ်း တစ်ခု သူမဖြစ်မနေ ဖောက်ဖို့ လိုအပ်ပါတယ်။ ဒီရထားလမ်းကလည်း အိန္ဒိယနဲ့ ကျနော်တို့က ဒေသတွင်း နိုင်ငံ တွေ တစ်ခုနဲ့တစ်ခုက အကျိုးတူ ပူးပေါင်းဆောင်ရွက်မှုတွေ ဖြစ်လာနိုင်တဲ့အတွက် ဒီဟာက အင်မတန် အရေးကြီးမယ်လို့ ထင်ပါတယ်” ဟု ပြောသည်။

လတ်တလောတွင် သမ္မတ ဦးမင်းအောင်လှိုင်သည် အိန္ဒိယနိုင်ငံသို့ ၂၀၂၆ ခုနှစ်၊ မေလ ၃၀ ရက်မှ ဇွန်လ ၃ ရက်ထိလည်းကောင်း၊ တရုတ်နိုင်ငံသို့ ၂၀၂၆ ခုနှစ်၊ ဇွန်လ ၁၅ ရက်မှ ၁၉ ရက်ထိ သွားရောက်၍ သမ္မတရှီကျင့်ဖျင်အပြင် အိန္ဒိယဝန်ကြီးချုပ် မိုဒီတို့ဖြင့် တွေ့ဆုံ ဆွေးနွေးထားသည်။

CNI News

၂၀၂၆ ခုနှစ်၊ ဇွန်လ ၁၉

အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC)သည် “ဝ”ပြည်သွေး စည်းညီညွတ်ရေးတပ်မတော်(UWSA)အား ၂၀၂၆ ခုနှစ်၊ ဇွန်လ ၁၈ ရက်က သွားရောက် တွေ့ဆုံ ဆွေးနွေးခဲ့သည်။

အဆိုပါ တွေ့ဆုံ ဆွေးနွေးပွဲကို UWSA ၏ ဗဟိုဌာနချုပ် ပန်ဆန်း(ပန်းခမ်း)မြို့မှာ ကျင်းပခဲ့ခြင်း ဖြစ်သည်။

ထို့နောက် နှစ်ဖက် ကိုယ်စားလှယ်များသည် ငြိမ်းချမ်းရေး၊ စည်းလုံးညီညွတ်ရေးနှင့် ဒေသဖွံ့ဖြိုးရေးတို့ကို အဓိကထား ဆွေးနွေးကြသည်ဟု “ဝ”သတင်းဌာန WSTV က ထုတ်ပြန်ခဲ့သည်။

NSPNC ဘက်က ဥက္ကဋ္ဌ ဒုတိယဗိုလ်ချုပ်ကြီးရာပြည့်၊ အတွင်းရေးမှူး ဒုတိယဗိုလ်ချုပ်ကြီးမင်းနိုင်၊ အဖွဲ့ဝင်များ ဖြစ်သည့် ဒုတိယဗိုလ်ချုပ်ကြီး ခင်ဇော်ဦး(ငြိမ်း)၊ ဒုတိယဗိုလ်ချုပ်ကြီးအေးဝင်း(ငြိမ်း)၊ ဗိုလ်မှူးကြီးမောင်မောင်အုန်း (ငြိမ်း)တို့ တက်ရောက်ခဲ့ကြသည်။

UWSA ဘက်ကတော့ ဒုဥက္ကဋ္ဌ ဦးကျောက်ကော်အန်း၊ စစ်ဦးစီးချုပ် ပေါက်အိုက်ခမ်းနှင့် ဒုစစ်ဦးစီးချုပ် အပါအဝင် လားရှိုးဆက်ဆံရေးရုံးတာဝန်ခံ ဦးညီရမ်းတို့ တက်ရောက်ခဲ့ကြသည်။

UWSA သည် မြန်မာနိုင်ငံအတွင်းရှိ တိုင်းရင်းသား လက်နက်ကိုင် အဖွဲ့အစည်းများအနက် အင်အား အကြီးဆုံး အဖွဲ့ဖြစ်ပြီး ကျန်လက်နက်ကိုင် အဖွဲ့များက UWSA ရရှိနေသော နိုင်ငံရေး-စစ်ရေးအဆင့်အတန်းမျိုးကို ရရှိရန် စိတ်ကူးလျက်ရှိသည်။

လက်ရှိတွင် UWSA သည် အမျိုးသားဒီမိုကရေစီမဟာမိတ်တပ်မတော်(NDAA)၊ ရှမ်းပြည်တိုးတက်ရေးပါတီ(SSPP)၊ မြန်မာအမျိုးသား ဒီမိုကရက်တစ်မဟာမိတ် တပ်မတော်(MNDAA)၊ တအာင်း အမျိုးသားလွတ်မြောက်ရေး တပ်မတော် (TNLA)၊ အာရက္ခတပ်တော်(AA)၊ ကချင်လွတ်လပ်ရေးတပ်မတော်(KIA) တို့ ပါဝင်သော ပြည်ထောင်စု နိုင်ငံရေးဆွေးနွေးညှိနှိုင်းရေးကော်မတီ (FPNCC) ဥက္ကဋ္ဌအဖြစ် တာဝန်ယူထားသည်။

CNI News

၂၀၂၆ ခုနှစ်၊ ဇွန်လ ၁၉

အမျိုးသားဒီမိုကရေစီမဟာမိတ်တပ်မတော်(NDAA)သည် ဥက္ကဋ္ဌဟောင်းကြီး ဦးစိုင်းလင်း ချမှတ်ခဲ့သော တိုင်းရင်းသား အဆင့်မြင့် ကိုယ်ပိုင်အုပ်ချုပ်ခွင့်ရရှိရေး ရည်မှန်းချက်ကို ဆက်လက် ဆုပ်ကိုင်ထားသည်ဟု NDAA ဥက္ကဋ္ဌ ဦးထိန်းလင်းက ပြောသည်။

၂၀၂၆ ခုနှစ်၊ ဇွန်လ ၁၇ ရက်က NDAA ဌာနချုပ် တည်ရှိရာ မိုင်းလားမြို့သို့ အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ(NSPNC)ဥက္ကဋ္ဌ ဒုတိယဗိုလ်ချုပ်ကြီးရာပြည့် ဦးဆောင်သည့် ကိုယ်စားလှယ်အဖွဲ့နှင့် NDAA ဥက္ကဋ္ဌ ဦးထိန်လင်း ဦးဆောင်သော ကိုယ်စားလှယ်အဖွဲ့တို့ တွေ့ဆုံ ဆွေးနွေးခဲ့ကြ သည်။

အဆိုပါ တွေ့ဆုံ ဆွေးနွေးပွဲတွင် NDAA ဘက်က အထက်ပါအတိုင်း ပြောကြားခဲ့ခြင်း ဖြစ်သည်။

အထူးဒေသ(၄)သည်လည်း ဥက္ကဋ္ဌဟောင်းကြီး ဦးစိုင်းလင်း ချမှတ်ခဲ့သော တိုင်းရင်းသား အဆင့်မြင့် ကိုယ်ပိုင်အုပ် ချုပ်ခွင့်ရရှိရေး နိုင်ငံရေး ရည်မှန်းချက်ကို စွဲမြဲစွာ ဆုပ်ကိုင်ကာ နိုင်ငံတော်၏ အချုပ်အခြာ အာဏာတည်တံ့ ခိုင်မြဲ ရေး၊ တိုင်းရင်းသား စည်းလုံးညီညွတ်ရေးနှင့် နယ်မြေတည်တံ့ခိုင်မြဲရေးတို့ကို စဉ်ဆက်မပြတ် ကာကွယ်စောင့် ရှောက်သွားမည်ဟု NDAA က ထုတ်ပြန်ခဲ့သည်။

ထို့နောက် တွေ့ဆုံ ဆွေးနွေးပွဲတွင် အစိုးရသစ် အနေဖြင့် ငြိမ်းချမ်းရေးဖြစ်စဉ်ကို အဓိက ဦးစားပေးပြီး၊ အထူး ဒေသ(၄) အပါအဝင် အခြားသော သက်ဆိုင်ရာ အဖွဲ့အစည်းများကိုလည်း တွေ့ဆုံဆွေးနွေးရန် ဖိတ်ခေါ်ထား ကြောင်း၊ အစိုးရအနေဖြင့် အဖွဲ့အစည်းများအကြားရှိ အပြန်အလှန် နားလည်ယုံကြည်မှုကို ပွင့်လင်းသော ဆက်ဆံ ဆွေးနွေးမှုများနှင့် လုပ်ထုံးလုပ်နည်းဆိုင်ရာ ညှိနှိုင်းမှုများမှတဆင့် တဖြည်းဖြည်း မြှင့်တင်သွားမည်ဖြစ်ကြောင်း၊ ဒေသတွင်း တည်ငြိမ်အေးချမ်းရေးနှင့် ‌ရေရှည် ဖွံ့ဖြိုးတိုးတက်ရေးအတွက် အတူတကွ ပူးပေါင်းဆောင်ရွက်သွား မည် ဖြစ်ကြောင်း NSPNC ဥက္ကဋ္ဌ ဒုတိယဗိုလ်ချုပ်ကြီးရာပြည့်က ဆွေးနွေး ပြောကြားခဲ့သည်။

အလားတူ NDAA ဥက္ကဋ္ဌ ဦးထိန်လင်းကလည်း အထူးဒေသ(၄) အနေဖြင့် ငြိမ်းချမ်းရေး၊ အမျိုးသား ပြန်လည် သင့်မြတ်ရေး၊ ဒီမိုကရေစီအရေး၊ ပညာရေးကဏ္ဍ မြှင့်တင်ရေး၊ စီးပွားရေးဖွံ့ဖြိုးတိုးတက်ရေးနှင့် လူမှုဘဝ တည်ငြိမ် အေးချမ်းရေးတို့အပေါ် ထားရှိသည့် နိုင်ငံတော်၏ သဘောထား လမ်းညွှန်ချက်များကို ထောက်ခံလျက်ရှိကြောင်း၊ နိုင်ငံတော်အဆင့် ငြိမ်းချမ်းရေး ဖြစ်စဥ်တိုင်းတွင်လည်း အပြုသဘောဆောင် တက်ကြွစွာ ပါဝင်ပြီး နယ်စပ်ဒေသ ရေရှည် တည်ငြိမ်အေးချမ်းရေးအတွက် တစ်ထောင့်တစ်နေရာမှ ပါဝင်ဆောင်ရွက်သွားမည်ဖြစ်ကြောင်း ပြန်လည် ဆွေးနွေးခဲ့သည်။

NDAA သည် ဗမာပြည်ကွန်မြူနစ်ပါတီ(ဗကပ)ကနေ ခွဲထွက်ပြီး ၁၉၈၉ ခုနှစ်တွင် မြန်မာ့တပ်မတော်နှင့် ငြိမ်းချမ်း ရေး ရယူ၍ မိုင်းလား၊ ဆီလူးနှင့် နမ့်ပန်းဒေသတို့ကို စုစည်း၍ အထူးဒေသ(၄)အဖြစ် ကိုယ်ပိုင်အုပ်ချုပ်လျက်ရှိ သည်။

အဆိုပါ ဒေသများသည် ၂၀၀၈ ဖွဲ့စည်းပုံအခြေခံဥပဒေ ပုဒ်မ ၅၆ အရ ကိုယ်ပိုင်အုပ်ချုပ်ခွင့်ရဒေသများအဖြစ် အသိအမှတ်ပြုထားခြင်း မရှိသည့်အတွက် NDAA က မိုင်းလား၊ ဆီလူးနှင့် နမ့်ပန်းဒေသတို့ကို စုစည်း၍ အာခါ ကိုယ်ပိုင်အုပ်ချုပ်ခွင့်ရဒေသ အဖြစ် သတ်မှတ်ပေးရန် တောင်းဆိုလျက်ရှိသည်။

လက်ရှိတွင် NDAA သည် “ဝ”ပြည်သွေးစည်းညီညွတ်ရေးတပ်မတော်(UWSA)၊ ရှမ်းပြည်တိုးတက်ရေးပါတီ(SSPP)၊ မြန်မာအမျိုးသား ဒီမိုကရက်တစ် မဟာမိတ် တပ်မတော်(MNDAA)၊ တအာင်း အမျိုးသားလွတ်မြောက်ရေး တပ်မတော်(TNLA)၊ အာရက္ခတပ်တော်(AA)၊ ကချင်လွတ်လပ်ရေးတပ်မတော်(KIA) တို့ ပါဝင်သော ပြည်ထောင်စု နိုင်ငံရေးဆွေးနွေးညှိနှိုင်းရေးကော်မတီ (FPNCC) အဖွဲ့ဝင်ဖြစ်သည်။