- By CNI
- Category: နိုင်ငံရေး
- Hits: 301
CNI News
၂၀၂၄ ခုနှစ်၊ ဧပြီ ၁၂
စစ်ကိုင်းတိုင်းဒေသကြီး၊ ခန္တီးမြို့နယ်၊ နန်စီပွန်ဒေသတွင် ကချင်လွတ်လပ်ရေးတပ်မတော်(KIA)က နာဂလူငယ် များနှင့် ရေမဆေးကျောက်ရှာသူများကို ဖမ်းဆီး ခေါ်ဆောင်သွားပြီး စစ်သားစုဆောင်းလျက်ရှိနေကြောင်း ဒေသခံ များက ပြောသည်။
ဧပြီ ၈ ရက်နေ့က နန်စီပွန်ကျေးရွာအနီးက ကျောက်စိမ်းမှော်တွင် ရေမဆေးကျောက်ရှာဖွေသူ အရပ်သား ၅၀ ကျော်အား KIS က ဖမ်းဆီး ခေါ်ဆောင်သွားခဲ့သည်။
ထို့နောက် ဧပြီ ၉ ရက်နေ့တွင် နန်စီပွန်ဒေသ အထက်ဆိပ်ရွာသို့ KIA အဖွဲ့များ ရောက်ရှိလာပြီး နာဂလူငယ် ၁၆ ဦးကို ဖမ်းဆီးခေါ်ဆောင်သွားကြောင်း ဒေသခံများက ပြောသည်။
KIA နဲ့ နန်စီပွန်ကျောက်မှော်ကို တွေ့ရစဉ်
ဖမ်းဆီး ခေါ်ဆောင်သွားခံရသူများမှာ မောင်အိုက်ထုတ် (၂၁ နှစ်)၊ အောင်ကျော်သူ(၂၀ နှစ်)၊ မောင်ရင် (၂၅ နှစ်) ၊ မောင်အနိုင်(၂၁ နှစ်)၊ မောင်သော်သော် (၁၉ နှစ်၊ မောင်ပါခေါင် (၁၈ နှစ်)၊ မောင်မောင် (၃၅ နှစ်)၊ မောင်ပါ ကြောင် (၂၀ နှစ်)၊ မောင်ဇာနည်ထက် (၁၉ နှစ်)၊ မောင်အောင်ကာဆန် (၂၅ နှစ်)၊ မောင်အောင်ကာ (၂၁ နှစ်)၊ မောင်ရဲဝင်း (၂၀ နှစ်)၊ မောင်ဂျွန်ဆန်းဒေး (၃၀ နှစ်)၊ မောင်ရန်နိုင်ထွန်း (၁၇ နှစ်)၊ မောင်ဖန်လိုင် (၂၇ နှစ်)၊ မောင်အောင်မြတ် မင်း (၁၈ နှစ်)တို့ဖြစ်ကြောင်း သိရသည်။
ခန္တီးမြို့နယ်နှင့် နာဂကိုယ်ပိုင်အုပ်ချုပ်ခွင့်ရဒေသတွင် နာဂလက်နက်ကိုင်အဖွဲ့များဖြစ်သည့် နာဂအမျိုးသားဆို ရှယ်လစ်ကောင်စီ-ကပ္ပလန်/ယုံးအောင်(NSCN-K/YA)၊ နာဂအမျိုးသားဆို ရှယ်လစ်ကောင်စီ-ကပ္ပလန်/အန်းမိုင် (NSCN-K/AM)၊ အရှေ့နာဂများကာကွယ်ရေးတပ်မတော်(ENDA/ENNO)၊ KIA၊ SNCN-IM၊ ရှမ်းနီအမျိုးသားများ တပ်မတော်(SNA)တို့ စစ်ရေးလှုပ်ရှားလျက်ရှိသည်။
ENDA/ENNO သည် NSCN ကနေ ထုတ်ပယ်ခံလိုက်ရသူများက KIA ၏ အကူအညီဖြင့် ဖွဲ့စည်းခဲ့ခြင်းဖြစ်ပြီး ဗဟိုဌာနချုပ်ကို KIA ၏ လိုင်ဇာမြို့မှာ တည်ဆောက်ထားသည်။
- By CNI
- Category: နိုင်ငံရေး
- Hits: 228
CNI News
၂၀၂၄ ခုနှစ်၊ ဧပြီ ၁၂
မြန်မာ့နိုင်ငံအတွင်း ဖြစ်ပွားနေသော လက်နက်ကိုင်ပဋိပက္ခ ချုပ်ငြိမ်းအောင် မည်သို့လုပ်ဆောင်သင့်သလဲ ဆိုသည့်အပေါ် ပြည်တွင်း/ပြည်ပ နိုင်ငံရေးအသိုင်းအဝိုင်းကြား ဆွေးနွေးမှုများ ရှိနေသည်။
မြန်မာနိုင်ငံသည် ၁၉၄၈ ခုနှစ်၊ လွတ်လပ်ရေးနှင့်အတူ ပြည်တွင်းလက်နက်ကိုင်ပဋိပက္ခ စတင်ဖြစ်ပွားခဲ့သည်။
ထို့နောက် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က ဖြစ်ပေါ်ခဲ့သော နိုင်ငံရေး အကျပ်အတည်းများကြောင့် လက်နက်ကိုင်ပဋိပက္ခသည် ပိုမိုကျယ်ပြန့်လာပြီး နိုင်ငံတစ်ဝှမ်း တိုက်ပွဲများ ကျယ်ကျယ်ပြန့်ပြန့် ဖြစ်ပေါ်လာခဲ့ သည်။
ဗမာပြည်နယ် အပါအဝင် လူမျိုးကို အခြေခံသည့် ဖက်ဒရယ်စနစ်ဖြင့် သွားရမှာဖြစ်ကြောင်း၊ တိုင်းရင်းသား အခွင့်အရေး၊ ကိုယ်ပိုင်ပြဋ္ဌာန်းပိုင်ခွင့်ရရှိပါက လက်ရှိပဋိပက္ခများ ချုပ်ငြိမ်းသွားမည်ဟု ယူဆကြောင်း စည်းလုံးညီညွတ်သော တိုင်းရင်းသား လူမျိုးများ မဟာမိတ် (UNA) ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။
မြန်မာ့တပ်မတော်ကို တိုက်ခိုက်နေသည့် BPLA ရဲဘော်တွေကိုတွေ့ရစဉ်
၎င်းက “ကျနော်တို့က နဂိုကတည်းကလည်း ဒီပါတီထောင်ကတည်းကလည်း ပြောခဲ့တယ်၊ ကျနော်တို့ ပြည်ထောင်စုကိုကတော့ ဖက်ဒရယ်စနစ်နဲ့ သွားရမယ်၊ အဲဒီမှာကလည်း ကျနော်တို့က လူမျိုးကို အခြေခံတဲ့ ပြည်နယ်တွေပေါ့ဗျာ၊ ဟိုတုန်းကတော့ ၈ ပြည်နယ်၊ အခုကတော့ ၈ အပေါင်းပြည်နယ်ပေါ့၊ တနည်းအားဖြင့် ဗမာလည်း ဖက်ဒရယ်ယူနစ်တစ်ခုယူ တစ်ယူနစ်ယူပေါ့၊ သူလည်း လူမျိုးတစ်မျိုး ဖြစ်တဲ့အတွက် တိုင်းရင်းသား တွေရဲ့ လုပ်ပိုင်ခွင့် အပြည့်အဝ ရှိလာမယ်ဆိုရင် အခုလိုပဲ ဗဟိုက အရာရာကို ကြီးကြပ်ထားတာ မဟုတ်ဘူး။ အုပ်ချုပ်ရေးလည်း သူတို့၊ ကာကွယ်ရေးလည်း သူတို့၊ အစစအရာရာကို အဲဒီလိုမျိုး လုပ်ထားတဲ့ဟာ မဟုတ်ဘဲနဲ့ သူတို့ဟာသူတို့ ဗဟိုက ဗဟိုအဆင့်မှာပဲနေ၊ အရာရာကို ဝင်မစွက်ဖက်တဲ့ အနေအထားမျိုးပေါ့၊ တိုင်းရင်းသားတွေ ကိုယ်၌ကိုယ်က သူ့လူမျိုး၊ သူ့ဒေသမှာ လုပ်ပိုင်ခွင့် အပြည့်အဝရှိတယ်၊ ကိုယ်ပိုင်ပြဋ္ဌာန်းပိုင်ခွင့်ရရင် ဒီကိစ္စဟာ ငြိမ်းအေးသွားလိမ့်မယ်လို့ ထင်တယ်၊ ဒါပေမဲ့ အဲဒီဟာကို အကောင်အထည်ဖော်ဖို့တော့ အချိန်ကာလတစ်ခုတော့ ပေးရပါလိမ့်မယ်” ဟု ပြောသည်။
လက်ရှိတွင် နစကနှင့် NUG တို့က အနာဂတ်တွင် ဖက်ဒရယ်ပြည်ထောင်စု တည်ဆောက်မည်ဟု အသီးသီး ပြောဆိုလျက်ရှိနေသည်။ သို့သော်လည်း မည်ကဲ့သို့သော ဖက်ဒရယ်ပြည်ထောင်စုမျိုးကို တည်ဆောက်မည်ကို တော့ အတိအကျ ပြောဆိုခြင်းမျိုး မရှိသေးပေ။
စစ်အာဏာရှင်စနစ် ရှိနေသေးသမျှ တိုက်ပွဲများ ဆက်ရှိနေမှာဖြစ်ကြောင်း၊ ထို့အတူ လူမျိုးကြီးဝါဒမျိုး ရှိနေသရွေ့ အပြန်အလှန် တွန်းလှန်မှုတွေ ရှိနေမှာဖြစ်ကြောင်း တအာင်းအမျိုးသမီးအဖွဲ့အစည်း (TWO)မှ ပြောရေးဆိုခွင့်ရှိသူ လွေးချီဆငါးက CNI သတင်းဌာနသို့ ပြောသည်။
၎င်းက “ဒီအာဏာရှင်စနစ် ရှိနေသေးသရွေ့ ကျမတို့ မြန်မာနိုင်ငံက ထပ်ပြီးတော့မှ တိုက်ပွဲ ဆက်ဝင်နေရဦးမှာပေါ့ နော်၊ လူဘယ်လောက်ပဲ ပြောင်းပြောင်း မူမပြောင်းဘူး ဒီစနစ်က မပြောင်းလဲနေသေးသရွေ့ကတော့ ဒီလိုမျိုး ဆက်ဖြစ်နေဦးမှာ အဲဒါကြောင့်မို့လို့ ကျမတို့က တိုက်ခိုက်တဲ့နေရာမှာ အဓိက မူတွေကို ဖျက်ဆီးနိုင်ဖို့အတွက် ကျမတို့ ကျင့်သုံးနေတဲ့ အာဏာရှင်စနစ်ကို ကျမတို့က တွန်းလှန်နိုင်ဖို့အတွက် ဒီဟာတွေကို ဖျက်သိမ်းနိုင်မှသာ ကျမတို့နိုင်ငံက ကျမတို့ လိုလားတဲ့ တည်ငြိမ်အေးချမ်းမှုတွေ၊ ဖက်ဒရယ်ဒီမိုကရေစီစနစ်အထိ သွားနိုင်မှာပေါ့နော်၊ တစ်ဖက်ကလည်း ကျမတို့ဆီမှာက တောက်လျှောက်ကျင့်သုံးလာနေတဲ့ လူမျိုးကြီးဝါဒ ပုံစံမျိုးတွေ မမျှတမှုတွေ စသဖြင့် အဲဒီလိုမျိုး ရှိနေသေးသရွေ့ကတော့ အပြန်အလှန် တွန်းလှန်မှုတွေ တိုက်ခိုက်မှုတွေ ဆက်ရှိနေမှာပေါ့ နော်” ဟု ပြောသည်။
နိုင်ငံရေးပါတီ ခေါင်းဆောင်များကို တွေ့ရစဉ်
တစ်ဖက်နှင့်တစ်ဖက် သွေးစွန်းမည့် လက်နက်ကိုင် တိုက်ပွဲများထက် နိုင်ငံရေးအရ တွေ့ဆုံဆွေးနွေးပြီး ခိုင်မာ သည့် ငြိမ်းချမ်းရေး တည်ဆောက်နိုင်မှသာလျှင် လက်ရှိပဋိပက္ခများကို ချုပ်ငြိမ်းနိုင်မှာဖြစ်ကြောင်း ရခိုင်အမျိုးသား ပါတီ (ANP)မှ မူဝါဒရေးရာဦးဆောင်ကော်မတီဝင် ဦးထွန်းအောင်ကျော်က CNI သတင်းဌာနသို့ ပြောသည်။
၎င်းက “ကျနော်ကတော့ ကိုယ်ယုံကြည်ချက်အတိုင်း နိုင်ငံရေးအရပဲ ကျနော့်ဘဝမှာ ကျနော် ဆောင်ရွက်လာ တယ်၊ ကျနော် နိုင်ငံရေးလမ်းစဉ်ကိုပဲ ကျနော်ယုံကြည်တယ်၊ ကျနော်တို့ကတော့ တစ်ဖက်နဲ့တစ်ဖက် သွေးစွန်း မယ့် လက်နက်ကိုင်တိုက်ပွဲတွေကို ကျနော်တို့ကတော့ ငြိမ်းချမ်းတဲ့နည်းနဲ့ပဲ ဖြေရှင်းစေချင်တယ်၊ ငြိမ်းချမ်းရေး နှစ်ဖက် တွေ့ဆုံဆွေးနွေးပြီးတော့ စားပွဲခုံပေါ်မှာ ငြိမ်းချမ်းရေးအရ စကားပြောပြီးတော့ ခိုင်မာတည်မြဲတဲ့ ငြိမ်းချမ်းရေးကို တည်ဆောက်နိုင်ကြမှသာလျှင် ဒီအခက်အခဲတွေရဲ့ ပဋိပက္ခတွေကို ချုပ်ငြိမ်းစေနိုင်မယ်လို့ ကျနော် အလေးအနက် ယုံကြည်ထားပါတယ်ခင်ဗျ” ဟု ပြောသည်။
မြန်မာနိုင်ငံမှာ ဒီမိုကရေစီရရှိရုံမျှ တိုင်းရင်းသားအရေး ပြေလည်မှာ မဟုတ်ကြောင်း၊ ထို့ကြောင့် တိုင်းရင်းသား အရေးကို ပြေလည်ရန် လုပ်ဆောင်ရန် လိုအပ်ကြောင်း နိုင်ငံရေးသမားတစ်ဦးက ထောက်ပြသည်။
လက်ရှိ လက်နက်ကိုင်ပဋိပက္ခကို ဖြေရှင်းနိုင်ရေး တိုင်းရင်းသား လက်နက်ကိုင် အဖွဲ့အစည်းအချို့၊ နိုင်ငံရေးပါတီ အချို့နှင့် အာဆီယံတို့က ကြိုးပမ်းလျက်ရှိနေသည်။
မြန်မာနိုင်ငံအတွင်း ဖြစ်ပွားနေသော လက်နက်ကိုင်ပဋိပက္ခသည် နှစ်ပေါင်း ၇၀ ကျော်လာပြီးဖြစ်ရာ ဖြေရှင်းနိုင် မည့် နည်းလမ်းရှာမတွေ့သေးပါက ရာစုနှစ် ၁၀ စုကျော်ထိ ဖြစ်ပွားသွားနိုင်ကြောင်း စစ်ရေးအကဲခတ်များက ထောက်ပြကြသည်။
- By CNI
- Category: နိုင်ငံရေး
- Hits: 128
CNI News
၂၀၂၄ ခုနှစ်၊ ဧပြီ ၁၁
ရှမ်းပြည်နယ်မြောက်ပိုင်းတွင် မြန်မာ့တပ်မတော်ထံကနေ တိုက်ခိုက်သိမ်းပိုက်ထားသည့် နယ်မြေများ၌ ပလောင်ပြည်လွတ်မြောက်ရေးတပ်ဦး (PSLF/TNLA)က အုပ်ချုပ်ရေးယန္တရားများ စတင်လည်ပတ်နိုင်ရေး ဆောင်ရွက်နေပြီဖြစ်ကြောင်း သိရသည်။
ပြီးခဲ့သည့် ၂၀၂၃ ခုနှစ်၊ အောက်တိုဘာ ၂၇ ရက်က စတင်ခဲ့သော ညီနောင်မဟာမိတ်သုံးဖွဲ့ (AA-TNLA-MNDAA) ၏ ၁၀၂၇ စစ်ဆင်ရေးအပြီး ရှမ်းမြောက်ရှိ နမ့်ဆန်၊ မန်တုံ၊ နမ့်ခမ်း၊ ကွတ်ခိုင်၊ နမ္မတူ၊ မိုင်းငေါ့နှင့် မိုင်းလုံမြို့တို့ကို TNLA က တိုက်ခိုက်သိမ်းပိုက်ထားသည်။
TNLA သိမ်းပိုက်ထားသော နယ်မြေအတွင်း လူမျိုးစုပေါင်းစုံ ရှိနေသည့်အတွက် ၎င်းတို့ လုပ်ဆောင်ချက်အပေါ် စောင့်ကြည့်မှုများ ရှိနေကြောင်း၊ ယုံကြည်မှုအားဖြင့် ၃ ပုံ ၁ ပုံခန့်သာ ရှိသေးကြောင်း တအာင်းအမျိုးသမီး အဖွဲ့အစည်း (TWO)မှ ပြောရေးဆိုခွင့်ရှိသူ လွေးချီဆငါးက CNI သတင်းဌာနသို့ ပြောသည်။
TNLA ရဲဘော်တစ်ဦးကို တွေ့ရစဉ်
၎င်းက “အခက်အခဲလို့ ပြောတဲ့နေရာမှာကြတော့ အခုလောလောဆယ် ဒီဧရိယာတွေထဲမှာကြတော့ လူမျိုး ပေါင်းစုံတွေပဲ ရှိတဲ့အခါကြတော့ EAO ထိန်းချုပ်တဲ့ နယ်မြေတွေထဲမှာ တချို့ကလည်း စောင့်ကြည့်နေတဲ့ အနေအထားမှာ ရှိနေတယ်၊ တချို့ကလည်း လုပ်ဆောင်မှုက ဘယ်လောက်အထိ အောင်မြင်မလဲဆိုတဲ့ စောင့်ကြည့်မှုတွေလည်း ရှိတယ်၊ တချို့ကလည်း ဒီအပေါ်မှာက ဘယ်ဟာကို အရင်လုပ်သင့်တယ်၊ ဘယ်ဟာက နောက်မှ လုပ်သလဲစသဖြင့် အဲဒီလိုမျိုး ပြောဆိုနေတာတွေလည်း ကြားရတယ်၊ လုပ်သင့်တဲ့ဟာနဲ့ နောက်မှ လုပ်ရ မယ့်ဟာ ပြောတာတွေရှိတယ်၊ တချို့ကလည်း ဒီအပေါ်မှာ အဲဒီလောက်အထိ ပြောရမယ်ဆိုရင်တော့ ရာခိုင်နှုန်း အရ ၃ ပုံ ၁ ပုံလောက်ပဲ ယုံကြည်နေသေးတယ်၊ စသဖြင့် အဲဒီလိုမျိုးတွေတော့ တွေ့နေရတာပေါ့” ဟု ပြောသည်။
ထို့အတူ အုပ်ချုပ်ရေးအပိုင်း ထူထောင်ရာတွင် သက်ဆိုင်ရာဌာနအလိုက် ဝတ်စုံများ ဝတ်ဆင်သင့်ကြောင်း လူထု နှင့်ဆက်ဆံရာမှာ အရေးကြီးကြောင်း ၎င်းက ပြောသည်။
အုပ်ချုပ်ရေးယန္တရား လည်ပတ်နေမှု အခြေအနေများ သိရှိနိုင်ရေး TNLA ၏ ပြန်ကြားရေးတာဝန်ခံ ဗိုလ်မှူးကြီး မိုင်းအိုက်ကျော်ထံ ဖုန်းဆက်သွယ်ခဲ့သော်လည်း ဆက်သွယ်၍ မရသေးပေ။
လက်ရှိ TNLA က သိမ်းပိုက်ထားသော မြို့နယ်များအားလုံး အုပ်ချုပ်ရေးယန္တရားများ စတင်လည်ပတ်နေပြီ ဖြစ် ကြောင်း၊ လာမည့် အခြေခံကျောင်းများ ဖွင့်လှစ်သည့်ရာသီတွင် အတန်းကျောင်းများ ဖွင့်လှစ်နိုင်ရေး လုပ်ဆောင် နေကြောင်း ပလောင်နိုင်ငံရေးသမား ဦးအိုက်လူက CNI သတင်းဌာနသို့ ပြောသည်။
TNLA ခေါင်းဆောင်များနဲ့ ဒေသခံလူထုများ တွေ့ဆုံစဉ်
၎င်းက “အခုက တအာင်းတွေ သိမ်းထားတဲ့ လက်ရှိ ဒီမြို့နယ် ၇ မြို့နယ်လုံးကတော့ ကျနော်တို့ကတော့ အများ ကြီးတော့ လည်ပတ်နေပြီပေါ့၊ ဥပမာ ဌာနတွေ၊ ကျန်းမာရေးဌာနတွေ နောက် လျှပ်စစ်မီးတွေ၊ ရေမီးတွေ စည်ပင်သာယာရေးတွေ ပြီးတော့ အခွန်ဌာနတွေ တော်တော်များများတော့ လည်ပတ်နေပြီဗျ၊ လာမယ့် ကျောင်းဖွင့်တဲ့ ရာသီမှာလည်း အတန်းကျောင်းတွေ ပြန်လည်ဖွင့်လှစ်နိုင်အောင်လည်း အခုက ကြိုးစားနေပြီ ပြန်လည်ဖွင့်နိုင်မှာပေါ့၊ ကျနော်တို့ အများအားဖြင့်က CDM သမားတွေကို ဖိတ်ခေါ်ထားတာလည်း ရှိပါတယ်။ ဘာပဲဖြစ်ဖြစ်ပေါ့၊ ကျနော်တို့ ဒေသအတွက်ကတော့ ကျနော်တို့ အကောင်အထည် ဆက်လက်ဖော်ဆောင်သွားမှာ ပဲလေ၊ သူ့ဟာသူ ရှုပ်တာပဲ ဖြစ်ဖြစ်၊ ရှင်းတာပဲဖြစ်ဖြစ် လုပ်စရာရှိတာတော့ ကျနော်တို့ လုပ်သွားနေမှာပဲလေ” ဟု ပြောသည်။
တရုတ်နိုင်ငံ၏ ကြားဝင်စေ့စပ်မှုကြောင့် မြန်မာ့တပ်မတော်နှင့် TNLA တို့သည် အပစ်အခတ်ရပ်စဲခဲ့ကြသည်။
လက်ရှိတွင် TNLA က မြို့နယ် ၇ မြို့ကို ထိန်းချုပ်ထားပြီး အုပ်ချုပ်ရေး၊ ဥပဒေပြုရေး၊ တရားစီရင်ရေး လုပ်ငန်းများ စတင်လည်ပတ်နိုင်ရေး လုပ်ဆောင်နေကြောင်း သိရသည်။
အုပ်ချုပ်ရေး ထူထောင်မှုလုပ်ငန်းသည် အပြောလွယ်သလောက် လက်တွေ့မှာ ခက်ခဲကြောင်း၊ ထူထောင်ရေး လုပ်ငန်း တစ်ခုလုံးကို လည်ပတ်နိုင်ဖို့အတွက် ငွေကြေး အပါအဝင် လူသားအရင်းအမြစ်၊ အခြေခံ အဆောက်အအုံ နှင့် အင်စတီကျူရှင်းများ အားကောင်းမှသာလျှင် အဆင်ပြေမည်ဟု နိုင်ငံရေးသမားများက ထောက်ပြကြသည်။
- By CNI
- Category: နိုင်ငံရေး
- Hits: 152
CNI News
၂၀၂၄ ခုနှစ်၊ ဧပြီ ၁၀
လက်ရှိ မြန်မာနိုင်ငံတွင် ဖြစ်ပွားနေသော လက်နက်ကိုင်ပဋိပက္ခများသည် ထိုင်းနိုင်ငံအတွက် မည်ကဲ့သို့သော ထိခိုက်နစ်နာမှုများ ရှိစေသလဲဆိုသည်ကို မေးခွန်းထုတ်လျက်ရှိနေသည်။
မြန်မာနိုင်ငံအတွင်း ငြိမ်းချမ်းရေး ရရှိပြီး တည်ငြိမ်ပါက ထိုင်းနိုင်ငံသည် အကျိုးအမြတ်အများဆုံးရရှိသည့် နိုင်ငံဖြစ်သည်ဟု ထိုင်းဝန်ကြီးချုပ် ဆရီသာက ပြောသည်။
မြန်မာပြည် တည်ငြိမ်အေးချမ်းပါက ရွှေ့ပြောင်းအလုပ်သမား အနေဖြင့်လည်း ထိုင်းနိုင်ငံကို တရားဝင်စနစ်ဖြင့် သွားရောက်နိုင်မှာဖြစ်ကြောင်း၊ ထို့အတူ ထုတ်ကုန်ပစ္စည်းများ နှစ်ဖက်တင်ပို့မှု လုပ်ဆောင်နိုင်မည်ဖြစ်ကြောင်း၊ လက်ရှိမှာလည်း ထုတ်ကုန်ပစ္စည်းများ နှစ်ဖက်တင်ပို့နိုင်ရေး ပြောဆိုနေကြကြောင်း ပညာရေးနှင့်ဖွံ့ဖြိုးတိုးတက် ရေးအဖွဲ့ (FED) မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။
၎င်းက “တိုင်းပြည်က အဆင်ပြေမယ်ဆိုလို့ရှိရင် ရွှေ့ပြောင်းအလုပ်သမားတွေ တရားဝင်စနစ်နဲ့ ဗမာပြည်ကနေ ဒီကိုလာနိုင်မယ်၊ ပြီးတော့ အလုပ်သမားတွေ အခြေခံအခွင့်အရေးတွေ ကောင်းကောင်းမွန်မွန် ပိုပြီးလုပ်နိုင်မယ်၊ သူတို့ရဲ့ စီးပွားရေးနဲ့ ပတ်သက်တဲ့ ဟာတွေကို ပိုပြီးတော့ ပါဝင်ဆောင်ရွက်နိုင်မယ်ပေါ့၊ ဒါလည်းတစ်ကဏ္ဍ နောက် နယ်စပ်ကုန်သွယ်ရေးဗျ၊ နယ်စပ်ကုန်သွယ်ရေးက ထိုင်းနဲ့ ကျနော်တို့ တစ်နှံ့တစ်လျားသည် ကီလို ၂၀၀၀ ကျော် တစ်ကျောမှာဆိုလို့ရှိရင် တောင်ပိုင်းမှာဆိုလို့ရှိရင် လုပ်ငန်းတွေ၊ ရေကြောင်းလမ်းတွေ ရှိတယ်၊ အခုဆိုလည်း သူတို့ သင်္ကြန်တွင်း နှစ်နိုင်ငံချစ်ကြည်ရေး အပြန်အလှန် လည်ပတ်ခွင့်ကိုပေးဖို့ ပြီးတဲ့အခါကြရင် ထုတ်ကုန်ပစ္စည်းတွေ ကို ဟိုဖက်ဒီဖက် တင်သွင်းလက်ခံဖို့ ကိစ္စတွေကို သူတို့ စပြီးတော့ ပြောနေပြီ။ ထိုနည်းလည်းကောင်းပဲ မဲဆောက် ဆိုလို့ရှိရင်လည်း အခု ဒီလိုမျိုးကြီး ဖြစ်နေတဲ့အခါကြတော့ စီးပွားရေးအရ သူတို့မှာ အများကြီး နစ်နာတာတွေ ရှိတယ်၊ ဒါကြောင့်မို့လို့ သူတို့က သူတို့လည်း အဆင်ပြေစေချင်တာပေါ့၊ မြန်မာပြည်ကို ဒီသဘောပါ” ဟု ပြော သည်။
မြန်မာ-ထိုင်း နယ်စပ်ကုန်သွယ်ရေးထွက်ပေါက်ကို တွေ့ရစဉ်
လက်ရှိ ထိုင်းနိုင်ငံတွင် အလုပ်လုပ်ကိုင်နေကြသော မြန်မာ့ရွှေ့ပြောင်းလုပ်သား တရားဝင် ၃ သန်းကျော် ရှိနေ ကြောင်း ၎င်းက ပြောသည်။
မြန်မာ - ထိုင်း နယ်စပ်တစ်လျှောက်တွင် တိုက်ပွဲများ ဖြစ်ပွားလျက်ရှိနေပြီး ထိုင်း-မြန်မာ ကုန်သွယ်မှု အများဆုံး ပြုလုပ်လျက်ရှိနေသည့် မြဝတီနယ်စပ်ကုန်သွယ်ရေးမှာလည်း တိုက်ပွဲများကြောင့် ရပ်တန့်လျက်ရှိနေသည်။
ပြီးခဲ့သည့် ရက်ပိုင်းက ကရင်ပြည်နယ်၊ မြဝတီမြို့နယ်အတွင်းရှိ အရှေ့တောင်တိုင်းစစ်ဌာနချုပ် လက်အောက်ခံ သင်္ဃန်းညီနောင် ဗျူဟာစခန်းမှ တပ်မိသားစုဝင်များ အပါအဝင် တပ်ဖွဲ့ဝင် ၆၁၇ ဦး ကရင်အမျိုးသားအစည်းအရုံး (KNU) ထံ လက်နက်ချခဲ့ကြောင်း KNU က ဧပြီ ၆ ရက်နေ့တွင် ထုတ်ပြန်ခဲ့သည်။
မြန်မာပြည်ကို ဝင်ရောက်သည့် ကုန်ပစ္စည်းအများစုမှာ ပြည်တွင်းသို့ တိုက်ရိုက်ဝင်ရောက်ခြင်း မဟုတ်ဘဲ ဘန်ကောက်မှတဆင့် မြဝတီမှ ဝင်ရောက်ကြောင်း ကုန်သည်များက ပြောသည်။
လက်နက်ကိုင်အဖွဲ့တစ်ဖွဲ့ကို တွေ့ရစဉ်
ထို့နောက် နယ်စပ်တစ်လျှောက် တိုက်ပွဲဖြစ်ပွားနေခြင်းကြောင့် ကုန်သွယ်ရေး ရပ်တန့်သွားခြင်းကြောင့် ထိုင်းနိုင်ငံအတွက် ဆုံးရှုံးနစ်နာနေသလို ထိုင်းနိုင်ငံ၏ အမျိုးသားလုံခြုံရေးမှအစ အကျိုးစီးပွားကို ထိခိုက်နေ ကြောင်း စည်းလုံးညီညွတ်သော တိုင်းရင်းသားလူမျိုးများ မဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။
၎င်းက “တနည်းအားဖြင့် ပြောရရင် ဒီမြဝတီကို အခုသိမ်းတယ်ဗျာ၊ ဒီဟာကနေပြီးတော့ မြဝတီက ထိုင်းနဲ့ မြန်မာ နှစ်နိုင်ငံဆက်ဆံရေးတင်မကဘူး ဒီဟာက အာရှရဲ့ ကုန်သွယ်ရေး လမ်းကြောင်းပေါ်မှာ တော်တော်များများ ကုန်ပစ္စည်းတွေက ဒီကနေစီစဉ်တယ်၊ အထူးသဖြင့် ဗမာပြည်ကို ဝင်နေတဲ့ ကွန်တိန်နာနဲ့ ပစ္စည်းတချို့ဆိုရင် ဥပမာ ဂျပန်ကလာတဲ့ဟာမျိုး တခြားတခြား အဲဒီဖက်က လာတဲ့ပစ္စည်းတွေ လာတဲ့တော်တော်များများဟာ ဗမာပြည်ကို တိုက်ရိုက်မဝင်ဘဲနဲ့ ဘန်ကောက်ကတဆင့် မြဝတီနယ်စပ်ကနေတဆင့် အဲဒီလို ဝင်နေတဲ့ဟာတွေ ကြီးပဲ တနေ့တနေ့ ကုန်သွယ်ရေး လမ်းကြောင်းတွေကနေ နည်းတဲ့ဝင်ငွေ မဟုတ်ဘူး။ အဲဒါကတော့ အခုဒီလမ်း ကြောင်း မြဝတီကို သူတို့ စကစ ဆုတ်သွားတယ်ဆိုတာနဲ့ ဒီဟာရဲ့ အပေးအယူ ဒီလမ်းကြောင်းရဲ့ လုံခြုံရေးကအစ ထိုင်းကိုလည်း အတိုင်းအတာ တစ်ခုအထိ ထိခိုက်မှာပဲ ဖြစ်တယ်၊ အဲဒီအတွက်မှာတော့ ထိုင်းအနေနဲ့ကတော့ ဒီဟာကို မှီပြီးတော့ သူ့ရဲ့ အကျိုးစီးပွား ထိခိုက်မခံချင်ဘူးဆိုရင် သူတို့ကတော့ သူတို့အကျိုးစီးပွားဖြစ်အောင် ညှိနှိုင်းလိုတယ်လို့ပဲ ကျနော်ကတော့ အဲဒီလို နားလည်ပါတယ်” ဟု ပြောသည်။
မြဝတီမြို့မှာ တိုက်ပွဲပြင်းထန်နေခြင်းကြောင့် ထိုင်းဘက်ခြမ်း မဲဆောက်တွင် ထိုင်းစစ်တပ်နှင့် နယ်ခြားစောင့်တပ် တို့ ကင်းလှည့်ပြီး လုံခြုံရေးတင်းကြပ်ထားကြောင်း ထိုင်းသတင်းများ၌ ဖော်ပြလျက်ရှိသည်။
မြန်မာ-ထိုင်းနယ်စပ်မှာ မိုင်ပေါင်း ၁၃၀၀ ကျော် ထိစပ်လျက်ရှိနေပြီး နယ်စပ်တစ်လျှောက် KNU၊ သျှမ်းပြည် ပြန်လည်ထူထောင်ရေးကောင်စီ (RCSS/SSA)၊ “ဝ”ပြည်သွေးစည်းညီညွတ်ရေးပါတီ (UWSP/UWSA)၊ မွန်ပြည်သစ် ပါတီ (NMSP)၊ ကရင်နီအမျိုးသားတိုးတက်ရေးပါတီ (KNPP) နှင့် တော်လှန်ရေးအင်အားစု အများအပြား လှုပ်ရှား လျက်ရှိနေသည်။
- By CNI
- Category: နိုင်ငံရေး
- Hits: 228
CNI News
၂၀၂၄ ခုနှစ်၊ ဧပြီ ၉
ကရင်ပြည်နယ်အတွင်း ဖြစ်ပွားနေသော စစ်ပွဲများ ရပ်တန့်ပြီး ငြိမ်းချမ်းရေးကို ဖော်ဆောင်ရန် ကရင်ပြည်နယ် အတွင်းက ခရစ်ယာန် ဘာသာရေး ခေါင်းဆောင်များနှင့် ဗုဒ္ဓဘာသာ ဘုန်းတော်ကြီးများ ပူးတွဲ၍ ကရင်အမျိုး သား လွတ်မြောက်ရေးတပ်မတော်(KNU/KNLA)စစ်ဦးစီးချုပ် ဗိုလ်ချုပ်ကြီးစော်ဂျော်နီထံ စာပေးပို့ခဲ့သည်။
ငြိမ်းချမ်းရေး အထူးမေတ္တာရပ်ခံချက်ဟုဆိုကာ ဧပြီ ၅ ရက်နေ့စွဲဖြင့် ဘာသာရေး ခေါင်းဆောင်များက ပေးပို့ခဲ့ ခြင်း ဖြစ်သည်။
ကရင်ပြည်နယ်၊ ဘားအံမြို့၊ လှာကဒေါင်ကျေးရွာအုပ်စု၊ လှိုင်းပုံရွာ၊ လမင်းပရိယတ္တိစာသင်တိုက်၌ ၂၀၂၄ ခုနှစ်၊ ဧပြီ ၅ ရက်နေ့က ကရင်ပြည်နယ် ငြိမ်းချမ်းရေးအတွက် ကရင်ပြည်နယ်အတွင်းရှိ ဗုဒ္ဓဘာသာရဟန်း သံဃာတော်များမှ ဆွေးနွေးခဲ့ကြသည်။
ထို့နောက် ကရင်ပြည်နယ်၊ ဘားအံမြို့ ကြားတေရကျောင်း၌ ဗုဒ္ဓဘာသာ သံဃာတော်များနှင့် ခရစ်ယာန် ဘာသာရေး ခေါင်းဆောင်များ တွေ့ဆုံပြီး ငြိမ်းချမ်းရေး အထူးမေတ္တာရပ်ခံချက်ကို KNLA စစ်ဦးစီးချုပ် ဗိုလ်ချုပ်ကြီး စော်ဂျော်နီထံ ပေးပို့ခဲ့ခြင်းဖြစ်သည်။
ဘာသာရေး ခေါင်းဆောင်များ၏ အထူးမေတ္တာရပ်ခံချက်ကို တွေ့ရစဉ်
အဆိုပါ ငြိမ်းချမ်းရေး အထူးမေတ္တာရပ်ခံချက်တွင် (၁) တစ်မျိုးသားလုံး ငြိမ်းချမ်းရေး၊ (၂) အလုံးစုံ သွေးစည်းညီ ညွတ်ရေး၊ (၃) ထာဝစဉ် အမြဲငြိမ်းချမ်းရေးအတွက် လိုလားနှစ်သက်တော်မူကြသည့်အလျှောက် ကရင်ပြည်နယ် တွင် ဖြစ်ပွားလျက်ရှိသော စစ်ဘေးစစ်ဒဏ်များတို့ဖြင့် ဘာသာရေး အဆောက်အဦးများ၊ ဆက်သွယ်ရေး လမ်း တံတားများ၊ ပညာသင်ကြားရေး စာသင်ကျောင်းများ၊ ပြည်သူများ၏ အသက်အိုးအိမ်စည်းစိမ်များ၊ စစ်ဘေး ရှောင် ပြည်သူများတို့၏ ဘဝဘေးဒဏ်များ ကင်းဝေးစေနိုင်ရေးအတွက် ကရင်ပြည်နယ်အတွင်းရှိ ဗုဒ္ဓဘာသာ ရဟန်းတော်များ အနေဖြင့် အထူးမေတ္တာရပ်ခံ ပန်ကြားအပ်ပါသည်ဟု ဖော်ပြထားသည်။
ထို့အပြင် လူသားချင်း ကိုယ်ချင်းစာနာထောက်ထားရေးကို ရှေးရှုလျက် ပဋိပက္ခဆောင် အချင်းချင်းတို့၏ ထာဝရငြိမ်းချမ်းရေးမဏ္ဍိုင် ပူးပေါင်းတည်ဆောက်နိုင်စေရေးနှင့် တစ်မျိုးသားလုံး အရေးအား ငြိမ်းချမ်းရေး အသွင် ဖော်ဆောင်နိုင်ကြစေရန် အထူးမေတ္တာရပ်ခံ ပန်ကြားသိစေပါသည်ဟုလည်း ဖော်ပြထားသည်။
ကရင်ပြည်နယ်အတွင်းမှာ မြန်မာ့တပ်မတော်နှင့် KNLA၊ ပြည်သူ့ကာကွယ်ရေးတပ်ဖွဲ့(PDF) ပူးပေါင်းတပ်ဖွဲ့ကြား တိုက်ပွဲများ အပြင်းအထန် ဖြစ်ပွားလျက်ရှိနေသည်။
အဆိုပါ တိုက်ပွဲများကြောင့် နေအိမ်များ မီးလောင်ပျက်စီးနေသလို ဒေသတွင်းနေ ပြည်သူများလည်း ထွက်ပြေး တိမ်းရှောင်နေကြရကြောင်း၊ နယ်စပ်ကုန်သွယ်ရေးလမ်းကြောင်းများ ပြတ်တောက်ကာ ကုန်ဈေးနှုန်း ကြီးမြင့်နေ ခြင်းတို့ ကြုံတွေ့နေကြရသည်။
- By CNI
- Category: နိုင်ငံရေး
- Hits: 224
CNI News
၂၀၂၄ ခုနှစ်၊ ဧပြီ ၉
ချင်းအမျိုးသားတပ်ဦး (CNF)က ချင်းပြည်နယ်မှာ တခြားသော လက်နက်ကိုင်အဖွဲ့အစည်းများကို မရှိစေရေး ချေမှုန်းမည့်ပေါ်လစီဖြင့် သွားနေကြောင်း ဇိုမီးတော်လှန်ရေးတပ်မတော်(ZRA)မှ အရှေ့ပိုင်းဒါရိုက်တာ ပူဇိုထန်က CNI သတင်းဌာနသို့ ပြောသည်။
နိုင်ငံရေးအရ တွေ့ဆုံဆွေးနွေးရန် မိမိတို့ ZRA က အဆင်သင့်ရှိနေကြောင်း၊ ချင်းပြည်နယ်တွင် CNF တစ်ဖွဲ့တည်း ရှိရမည်ဆိုသည့် ပေါ်လစီဖြင့် သွားနေကြောင်း ၎င်းက ပြောသည်။
ZRA ၏ အရှေ့ပိုင်းဒါရိုက်တာ ပူဇိုထန်က “ကျနော်တို့ အမြဲတမ်း အဆင်သင့်ပါပဲ၊ သူတို့(CNF) ကတော့ လုံးဝ မရဘူးဗျ၊ ဘယ်သူမှလည်း သူတို့ကို အထင်မကြီးဘူးပေါ့နော်၊ CNF က သူတို့လက်နက်ကိုင်တာက ကျနော်တို့ ထက် ဦးဦးဖျားဖျားဆိုတော့ တကယ့် ချင်းပြည်နယ်မှာရှိတဲ့ လက်နက်ကိုင်တွေ အားလုံးကို သူတို့က ညှိဖို့မကြိုးစား ဘူးဗျ၊ အနိုင်ကျင့်ပြီးတော့ အကုန်လုံး ဖျက်ဆီးမယ်၊ CNF ပဲ ချင်းပြည်နယ်မှာ အဖွဲ့အစည်းတစ်ခုပဲ ရှိမယ်ဆိုတဲ့ ပေါ်လစီနဲ့ သွားနေတာလေ၊ ကျနော်တို့ က သူတို့ကို အမြဲတမ်းပြောတယ်၊ ကိုယ့်ဒေသမှာ ဒီမိုကရေစီ တော်လှန်ရေးကာလမှာ ကိုယ့်နယ်မြေကို ကျနော်တို့ လူမျိုးစု အချင်းချင်းကြား ထိန်းကြပေါ့၊ ပြီးသွားလို့ရှိရင် ကျနော်တို့ ပြန်ပြီးတော့ အပြန်အလှန် နားလည်မှုယူပြီးမှ တစ်ခုခု လုပ်ရမယ်ဆိုပြီးတော့ အောက်ခြေလူတွေကို ပြောပေမယ့် သူတို့က နာမခံဘူးဗျ၊ ချင်းပြည်နယ်မှာ ကျနော်တို့ မဟုတ်ဘဲနဲ့ လက်နက်ကိုင်တွေ အကုန်လုံး ချေမှုန်းမယ်ဆိုတဲ့ ပေါ်လစီနဲ့ သွားနေတယ်၊ နိုင်ငံရေးက တော့ ညှိလို့ မရဘူးဗျ၊ ဘယ်မှလည်း ပေါ်မလာဘူးဗျ၊ သူတို့က စစ်တပ်တွေနဲ့ သူတို့ရဲ့ CNF သောင်းကျန်းတဲ့ လူတွေပဲ လုပ်ပြီးတော့ ကျနော်တို့ နယ်မြေမှာ လာတိုက် တာလေ၊ အဲဒါပဲ နိုင်ငံရေးတော့ လုံးဝလုပ်လို့ မရဘူးဗျ” ဟု CNI သတင်းဌာနသို့ ပြောသည်။
ဇိုမီးတော်လှန်ရေးတပ်မတော်(ZRA)ကို တွေ့ရစဉ်
ပြီးခဲ့သည့် ရက်ပိုင်းက ချင်းပြည်နယ်၊ တီးတိန်မြို့နယ်အတွင်း ZRA နှင့် CNF တို့ နှစ်ဖက် တိုက်ပွဲဖြစ်ပွားခဲ့ပြီး လက်ရှိအချိန်ထိ စစ်ရေးတင်းမာနေဆဲဖြစ်ကြောင်း ၎င်းက ပြောသည်။
ချင်းပြည်နယ်မှာ တခြားသော လက်နက်ကိုင်အဖွဲ့အစည်းများကို ချေမှုန်းမည်ဆိုသည့် ပေါ်လစီဖြင့် သွားနေဟု ပြောဆိုချက်နှင့် ပတ်သက်၍ CNF ၏ သဘောထားကို သိရှိနိုင်ရေး ပြောရေးဆိုခွင့်ရှိသူ ဆလိုင်းထက်နီထံ ဖုန်းဆက်သွယ်ခဲ့သော်လည်း ဖုန်းလက်ခံ ဖြေကြားခြင်း မရှိပေ။
မိမိတို့ ZRA ဒေသကို တည်ငြိမ်းရေးအတွက် ထိန်းသိမ်းနေကြောင်း၊ သို့သော်လည်း CNF က မိမိတို့ လူမျိုးစုကြား တွင် စစ်သင်တန်းများပေးကာ လှုပ်ရှားလာကြောင်း ZRA ၏ အရှေ့ပိုင်းဒါရိုက်တာ ပူဇိုထန်က ပြောသည်။
၎င်းက “ကျနော်တို့ကတော့ ထိန်းတာပေါ့လေ၊ ဒါပေမဲ့ နိုင်ငံရေး အခြေအနေအရပေါ့၊ ကျနော်တို့ နယ်မြေမှာ CNA/ CNF တွေက မတရား ကျနော်တို့ လူမျိုးစုကြားထဲမှာ လက်နက်ကိုင်သင်တန်းတွေ ပေးပြီးတော့ ကျနော်တို့ လူမျိုးစုတချို့မှာ သူတို့ လက်နက်တပ်ဆင်ပေးပြီးတော့ သူတို့နယ်မြေမှာ လှုပ်ရှားတဲ့ အဖွဲ့တွေ အများကြီးရှိ တာပေါ့၊ ဒါပေမဲ့ သူတို့က CNA က ထိန်းထားပြီးတော့ သူတို့ လူမျိုးစု လက်နက်ကိုင်တွေကို ကျနော်တို့ကို တိုက်ခိုင်းတာပေါ့၊ အဲဒီထဲမှာ သူတို့ ဦးဆောင်တာ အဲဒါနဲ့ ကျနော်တို့ ဇိုမီးတွေရဲ့ နယ်မြေမှာ သူတို့က လာပြီးတော့ သောင်းကျန်းမှုတွေ လာလုပ်တာပေါ့” ဟု ပြောသည်။
ချင်းအမျိုးသားတပ်ဦး(CNF)ကို တွေ့ရစဉ်
ချင်းပြည်နယ်တွင် ဇိုမီးတော်လှန်ရေးတပ်မတော်/အရှေ့ပိုင်းတိုင်း(ZRA)နှင့် ချင်းအမျိုးသားတပ်ဦး (CNF/CNA) တို့အကြား မကြာခဏ တိုက်ပွဲများ ဖြစ်ပွားလေ့ရှိသည်။
ZRA သည် မြန်မာနိုင်ငံအတွင်းရှိ ချင်းပြည်နယ် တွန်းဇံမြို့နယ်၊ တီးတိန်မြို့နယ်၊ စစ်ကိုင်းတိုင်း ဒေသကြီးအတွင်းရှိ ကလေးမြို့နယ်၊ တမူးမြို့နယ်၊ ကဘော်ချိုင့်ဝှမ်းဒေသ၊ မြန်မာ-အိန္ဒိယနယ်စပ် စသည့် နေရာဒေသများတွင် လှုပ် ရှား လျက်ရှိသည်။
CNF သည် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) လက်မှတ်ရေးထိုးထားသော ချင်းလက်နက်ကိုင်တပ်ဖွဲ့ဖြစ်ပြီး ထန်တလန်မြို့နယ်တွင် ဌာနချုပ်ထားရှိကာ ဟားခါး၊ တီးတိန်၊ မတူပီတို့တွင် လှုပ်ရှားလျက်ရှိသည်။
- By CNI
- Category: နိုင်ငံရေး
- Hits: 115
CNI News
၂၀၂၄ ခုနှစ်၊ ဧပြီ ၉
အမျိုးသားညီညွတ်ရေးအတိုင်ပင်ခံကောင်စီ(NUCC)မှ ဦးဆောင် ကျင်းပသည့် ဒုတိယအကြိမ် ပြည်သူ့ ညီလာခံ(ပဉ္စမနေ့)တွင် ပြည်ထာင်စုလွှတ်တော် ကိုယ်စားပြုကော်မတီနှင့် ရွေးကောက်ခံ လွှတ်တော် ကိုယ်စားလှယ် အစုအဖွဲ့အနေဖြင့် ဆက်လက် မတက်ရောက်နိုင်ကြောင်း ၂၀၂၄ ခုနှစ်၊ ဧပြီ ၈ ရက်နေ့စွဲဖြင့် စာပို့လာခဲ့သည်။
NUCC မှ ဦးဆောင် ကျင်းပသည့် ပြည်သူ့ညီလာခံကို ၂၀၂၄ ခုနှစ်၊ ဧပြီ ၄ ရက်နေ့မှ ၆ ရက်နေ့အထိ ကျင်းပခဲ့ပြီး နောက် ၂ ရက်ထပ်တိုး ကျင်းပခဲ့သည်။ သို့သော် ဧပြီ ၈ ရက်နေ့တွင် တစ်ရက်နားခဲ့ပြီးနောက် ဧပြီ ၉ ရက်နေ့မှာ နောက်ဆုံး ကျင်းပရန် အတည်ပြုဆောင်ရွက်ခဲ့သည်။
ထို့နောက် CRPH က အောက်ပါ အချက် ၅ ချက်ကို ဆောင်ရွက်လာခြင်းကြောင့် နောက်ဆုံးရက် ဧပြီ ၉ ရက်နေ့ တွင် ကျင်းပမည့် ပြည်သူ့ညီလာခံကို မတက်ရောက်နိုင်ကြောင်း NUCC စာပို့ခဲ့ခြင်း ဖြစ်သည်။
NUCC သို့ ပေးပို့သော စာထဲတွင် CRPH က (က) ညီလာခံတွင် ဖက်ဒရယ်ဒီမိုကရေစီပဋိညာဉ် အစိတ်အပိုင်း (၂)ပါ ပြဋ္ဌာန်းချက်များထက် ကျော်လွန်၍ ဆွေးနွေးဆုံးဖြတ် အတည်ပြုချက်ရယူရန် လုပ်ဆောင်မှုများ ရှိလာ ခြင်း၊ (ခ) ညီလာခံတွင် ကြိုတင် ဖြန့်ဝေထားသည့် အစီအစဉ်များထက် ကျော်လွန်၍ ဆွေးနွေးဆုံးဖြတ် အတည် ပြုချက် ရယူရန် လုပ်ဆောင်မှု များရှိလာခြင်း၊ (ဂ) ညီလာခံ၏ အစီအစဉ်တစ်ခုတွင် သဘာပတိက မှတ်တမ်း တင်ရန် ဆုံးဖြတ်ခဲ့ပြီးသော အကြောင်းအရာအား နောက်အစီအစဉ်တစ်ခုတွင် ပြန်လည်ပြင်ဆင်ဆုံးဖြတ် အတည်ပြုရန် ဆောင်ရွက်ခြင်း စသဖြင့် ဖော်ပြထားသည်။
ထို့နောက် (ဃ) ညီလာခံ၌ မူလအစီအစဉ်တွင် ပါဝင်ခြင်းမရှိသော ထပ်မံ တင်သွင်းသည့် အဆိုပြုချက်များသည် သက်ဆိုင်ရာ အစုအဖွဲ့များအတွင်း အကျေအလည် အချိန်ယူဆွေးနွေးပြီး သဘောထားရယူရန် လိုအပ်သည့် အပြင် ယခုထက် ပိုမိုစုံလင်သော Stakeholder များနှင့် ကျယ်ကျယ်ပြန့်ပြန့် ဆွေးနွေးရန် လိုအပ်သည့် အကြောင်းအရာကိစ္စရပ်များဖြစ်ခြင်း၊ (င) အချို့သော ညီလာခံကိုယ်စားလှယ်များသည် ညီလာခံက ချမှတ်ထား သော စည်းမျဉ်းစည်းကမ်းများကို လေးစားလိုက်နာရန် ပျက်ကွက်ခြင်း တို့ဖြစ်သည်။
CRPH မှ NUCC သို့ ပေးပို့သော စာပါ အကြောင်းအရာများကို လေ့လာကြည့်ပါက အတိုက်အခံများကြား ပူးပေါင်းဆောင်ရွက်မှု အားနည်းနေသည်ကို တွေ့ရနိုင်ကြောင်း၊ နိုင်ငံရေးလုပ်ငန်းစဉ်များကို အကျေအလည် မဆွေးနွေးဘဲ လူထုထောက်ခံမှု ရရှိရေးကိုသာ ဦးစားပေး လုပ်လာခြင်းဖြစ်သည်ကိုလည်း တွေ့ရနိုင်ကြောင်း နိုင်ငံရေးလေ့လာသုံးသပ်သူများက ထောက်ပြကြသည်။
CRPH ဆိုသည်မှာ ၂၀၂၀ အထွေထွေရွေးကောက်ပွဲတွင် အနိုင်ရရှိခဲ့သော လွှတ်တော်ကိုယ်စားလှယ်များဖြင့် စုဖွဲ့ထားသော ကော်မတီဖြစ်သည်။ သို့သော် အများစုမှာ အမျိုးသားဒီမိုကရေစီအဖွဲ့ချုပ်(NLD) ကိုယ်စားလှယ် များဖြစ်ပြီး အမျိုးသားညီညွတ်ရေးအစိုးရ(NUG)မှာ ပါဝင်နေသူများလည်း ဖြစ်သည်။
- By CNI
- Category: နိုင်ငံရေး
- Hits: 126
CNI News
၂၀၂၄ ခုနှစ်၊ ဧပြီ ၉
ရှမ်းနီအမျိုးသားများတပ်မတော်(SNA)၏ တပ်မဟာ ၈၉၁၊ တပ်ရင်း(၄)မှ အခြေခံစစ်သင်တန်း ဆင်းပွဲတစ်ရပ် ကို ပြီးခဲ့သည့် ရက်ပိုင်းက ကျင်းပခဲ့ကြောင်း သိရသည်။
SNA သည် တပ်မဟာ ၈၉၁၊ တပ်မဟာ ၇၅၃၊ တပ်မဟာ ၉၇၂၊ တပ်မဟာ ၆၁၄ ဆိုပြီး ရှိသည်။
SNA သည် ၁၉၈၉ ခုနှစ်၊ ဇူလိုင် ၅ ရက်နေ့မှာ စတင်ဖွဲ့စည်းခဲ့ပြီး နိုင်ငံရေး ရည်မှန်းချက် ၅ ရပ်ကို ချမှတ်၍ အကောင်အထည်ဖော်လျက်ရှိနေသည်။
SNA ၏ နိုင်ငံရေးရည်မှန်းချက် ၅ ရပ်မှာ (၁) ဒေသခံ ပြည်သူလူထုအပေါ် လက်နက်ကိုင် အနိုင်ကျင့် ဗိုလ် ကျစိုးမိုးနေမှုများကို ကာကွယ်သွားမည်၊ (၂) မူးယစ်ဆေးဝါး အန္တရာယ်များကို ကာကွယ်သွားမည်၊ (၃) ဒေသတွင်းရှိ ပြည်သူလူထုများ၏ ဖွံ့ဖြိုးရေးလုပ်ငန်းဖြစ်သည့် ကျန်းမာရေး၊ ပညာရေး၊ စီးပွားရေး၊ စိုက်ပျိုး မွေးမြူရေး၊ လူနေ မှု ဘဝမြှင့်တင်ရေး၊ ဘက်စုံဖွံ့ဖြိုးတိုးတက်ရေးတို့ကို ပြုလုပ်ဆောင်ရွက်သွားမည်၊ (၄) ဒေသတွင်းရှိ သဘာဝ ပတ်ဝန်းကျင်များကို ကာကွယ်၊ တားဆီး၊ ထိန်းသိမ်း၊ စောင့်ရှောက်သွားမည်၊ (၅) တိုင်းရင်းသားများ၏ တန်းတူရေး၊ ကိုယ်ပိုင်ပြဋ္ဌာန်းခွင့်နှင့် စစ်မှန်သော ဖက်ဒရယ်ပြည်ထောင်စု တည် ဆောက်ရာတွင် အခြားသော တိုင်းရင်း သားများနှင့် လက်တွဲ ဆောင်ရွက်သွားမည်တို့ ဖြစ်သည်။
ထို့နောက် SNA သည် မြန်မာနိုင်ငံ လွတ်လပ်ရေး ရပြီးနောက်ပိုင်း ကချင်ပြည်နယ်နှင့် စစ်ကိုင်းတိုင်းဒေသကြီး အတွင်းသို့ ထည့်သွင်း၍ ကွဲခြမ်းခံလိုက်ရသော ရှမ်းနီဒေသများဖြစ်သည့် မြစ်ကြီးနားခရိုင်၊ ဗန်းမော်ခရိုင်၊ မိုးညှင်းခရိုင်၊ မိုး ကောင်းခရိုင်၊ ကလေးခရိုင်၊ တမူးခရိုင်၊ ဟုမ္မလင်းခရိုင်၊ ခန္တီးခရိုင်၊ ကသာခရိုင်၊ မော်လိုက်ခရိုင် တို့ကို စုစည်းပြီး ရှမ်းနီပြည်နယ်ရရှိရေး ကြိုးပမ်းလျက်ရှိနေသည်။
- By CNI
- Category: နိုင်ငံရေး
- Hits: 89
CNI News
၂၀၂၄ ခုနှစ်၊ ဧပြီ ၉
လျှင်မြန်စွာ ပြောင်းလဲနေသော မြန်မာ့နိုင်ငံရေး အခြေအနေကြောင့် ထိုင်းအစိုးရသည် အရေးပေါ် အစည်းအဝေး တစ်ရပ်ကို ၂၀၂၄ ခုနှစ်၊ ဧပြီ ၉ ရက်နေ့ နံနက်ပိုင်းက ကျင်းပခဲ့ပြီး အလုပ်ကော်မတီတစ်ရပ် ဖွဲ့စည်းလိုက်ကြောင်း ထိုင်းဝန်ကြီးချုပ် ဆရီသာက ပြောသည်။
အဆိုပါ အလုပ်ကော်မတီသည် နယ်စပ်ကုန်သွယ်ရေး၊ နယ်စပ်ဒေသတည်ငြိမ်အေးချမ်းရေး အပါအဝင် မြန်မာ့အရေးကိစ္စ အားလုံးကို စောင့်ကြည့်ရန်ဖြစ်သည်။
ထိုင်းဝန်ကြီးချုပ် ဆရီသာသည် အရေးပေါ် အစည်းအဝေး ကျင်းပနေခြင်းနှင့် အလုပ်ကော်မတီတစ်ရပ် ဖွဲ့စည်း လိုက်ကြောင်းကို သူ၏ ဖေ့စ်ဘွတ်ခ် လူမှုကွန်ရက်ကနေ သတင်းထုတ်ပြန်ခဲ့သည်။
ထိုင်းဝန်ကြီးချုပ် ဆရီသာက “ မြန်မာနိုင်ငံတွင် ဖြစ်ပေါ်နေသော အခြေအနေများသည် ထိုင်းနိုင်ငံအတွက် အရေးကြီးကြောင်း၊ မြန်မာနိုင်ငံ ငြိမ်းချမ်းရေးနှင့် တည်ငြိမ်ရေး၊ နှစ်နိုင်ငံ ပြည်သူများ အကျိုးစီးပွားအတွက် ထိုင်းနိုင်ငံက မူဝါဒချမှတ် အလုပ်လုပ်နေကြောင်း။ ယနေ့ နံနက်ပိုင်းတွင် အရေးပေါ် အစည်းအဝေး ခေါ်ယူ၍ ထိုင်း- မြန်မာ နယ်စပ်အရေးကိစ္စ ဆွေးနွေးခဲ့ကြောင်း” ထုတ်ပြန် ပြောကြားခဲ့သည်။
ထို့နောက် ထိုင်းနိုင်ငံအနေဖြင့် လူသားချင်းစာနာထောက်ထားမှုအတွက် ပံ့ပိုးလျှက်ရှိကြောင်း၊ နယ်စပ်ကုန် သွယ်ရေး အပါအဝင် မြန်မာနိုင်ငံအတွင်း တည်ငြိမ်အေးချမ်းရေးအတွက် နယ်ပယ် ပေါင်းစုံနှင့် လက်တွဲ အလုပ် လုပ်ရန် အဆင်သင့်ဖြစ်နေကြောင်း၊ ဖြစ်ပေါ်နေသော အခြေအနေများကြောင့် နယ်စပ် ကုန်သွယ်ရေး အပါအဝင် ဖြစ်ပေါ်လာနိုင်သော သက်ရောက်မှုများကိုလည်း လေ့လာစောင့်ကြည့်နေကြောင်း ၎င်းက ပြောသည်။
၂၀၂၄ ခုနှစ်၊ ဧပြီ ၉ ရက်နေ့က ထိုင်းအစိုးရ မြန်မာ့အရေးအတွက် အရေးပေါ် အစည်းအဝေး ကျင်းပနေစဉ်
လက်ရှိ မြန်မာနိုင်ငံ၏ ထိုင်းနယ်စပ်ရှိ ကရင်ပြည်နယ်နှင့် ကယားပြည်နယ်များတွင် တိုင်းရင်းသားလက်နက်ကိုင် အဖွဲ့များ၊ ပြည်သူ့ကာကွယ်ရေးတပ်ဖွဲ့(PDF) ပူးပေါင်းတပ်ဖွဲ့နှင့် မြန်မာ့တပ်မတော်ကြား တိုက်ပွဲများ အပြင်း အထန်ဖြစ်ပွားလျက်ရှိနေသည်။
အဆိုပါ တိုက်ပွဲများကြောင့် တရားဝင် နယ်စပ်ကုန်သွယ်ရေးများ ရပ်တန့်နေပြီး ထိုင်းအစိုးရဘက်မှ နေ့စဉ် ဘတ် သန်းနှင့်ချီ ကုန်သွယ်မှုများ ဆုံးရှုံးနေသလို ထိုင်းဘက်သို့ ထွက်ပြေးတိမ်းရှောင်လာနေသော ဒုက္ခ သည်များကို ကယ်ဆယ်နေရသည်။
အလားတူ ထိုင်းနိုင်ငံဘက်သို့ တရားမဝင်နှင့် တရားဝင် ရောက်ရှိလာသော မြန်မာနိုင်ငံသား ရွှေ့ပြောင်း လုပ်သားများအရေးကိုလည်း ဖြေရှင်းနေရသည်။
လက်ရှိတွင် ထိုင်း-မြန်မာနယ်စပ် မြဝတီမြို့အနီးက သင်္ဃန်းညီနောင်တွင် တိုက်ပွဲများ အပြင်းအထန် ဖြစ်ပွား နေပြီး မြဝတီမြို့၏ လုံခြုံရေးလည်း စိုးရိမ်နေကြရသည်။
မြန်မာ့အရေးကို ကြားဝင်ဖြေရှင်းပေးရန်အတွက် ထိုင်းအစိုးရကို တရုတ်၊ အိန္ဒိယ၊ အမေရိကန်တို့က တောင်းဆို လျက်ရှိနေကြောင်း သိရသည်။