- By CNI
- Category: အားကစား
- Hits: 72
CNI Sport News
၂၀၂၄ ခုနှစ်၊ မတ်လ ၂၅
အာဂျင်တီးနားလက်ရွေးစင်ကွင်းလယ်လူ မက်အယ်လစ္စတာက သူအပါအဝင် လီဗာပူးလ်အသင်းကစားသမား တွေဟာ နည်းပြ ကလောပ့်ကို ပရီးမီးယားလိဂ်ဖလားလက်ဆောင်ပေးချင်တယ်လို့ ပြောလိုက်ပါတယ်။
မက်အယ်လစ္စတာက “ကျနော်တို့ နည်းပြကလော့ပ်ကို ပရီးမီးယားလိဂ်ဖလား လက်ဆောင်ပေးချင်ပါတယ်။ ဒါက အကြီးမားဆုံးရည်မှန်းချက်ပါပဲ။ ကလောပ့်က သူ့ရဲ့ဆုံးဖြတ်ချက်ကို အလွန်ယုံကြည်မှုရှိနေပါတယ်။ ကျနော့် အတွက်တော့ သူနဲ့ တစ်နှစ်ပဲ လက်တွဲခွင့်ရခဲ့လို့ စိတ်မကောင်းပါဘူး။ အနာဂတ်မှာ ကျနော်တို့ ထပ်ပြီး ဆုံတွေ့ နိုင်ဖို့ မျှော်လင့်တယ်” လို့ ပြောခဲ့တာပါ။
လီဗာပူးလ်အသင်းကို ၂၀၁၅ ခုနှစ်၊အောက်တိုဘာမှာ စတင်ကိုင်တွယ်ခဲ့တဲ့ ကလောပ့်ဟာ ဒီရာသီအကုန်မှာ အသင်းကနေထွက်ခွာတော့မယ်လို့ တရားဝင်ကြေညာခဲ့ပြီးဖြစ်ပါတယ်။ အဲဒါကြောင့် လီဗာပူးလ်အသင်း ကစား သမားတွေဟာ ဒီရာသီအကုန်မှာ ထွက်ခွာမယ့် နည်းပြ ကလောပ့်ကို ဆုဖလားတွေနဲ့ နှုတ်ဆက်ဖို့ ဆုံးဖြတ် ထားတာပါ။ လီဗာပူးလ်အသင်းဟာ မကြာသေးခင်က ဒီရာသီ ပထမဆုံးဆုဖလားဖြစ်တဲ့ ကာရာဘောင်းဖလားကို ရယူထားနိုင်ခဲ့ပေမယ့် FA ဖလားပြိုင်ပွဲမှာတော့ ယူနိုက်တက်အသင်းကို အရေးနိမ့်ပြီး ထွက်ခွာခဲ့ရတာဖြစ်ပါတယ်။
လီဗာပူးလ်အသင်းဟာ ဒီရာသီ ပရီးမီးယားလိဂ်နဲ့ ယူရိုပါလိဂ်ဖလားတို့ကို ရယူနိုင်မယ့် လမ်းကြောင်းပေါ်မှာ ရှိနေ ပြီး ကွင်းလယ်လူ မက်အယ်လစ္စတာက နည်းပြ ကလောပ့်ကို ပရီးမီးယားလိဂ်ဆုဖလား လက်ဆောင်ပေးချင်တယ် လို့ ပြောလာခဲ့တာပါ။ လီဗာပူးလ်အသင်းဟာ ပရီးမီးယားလိဂ်ပြိုင်ပွဲမှာ အဆင့် ၁ နေရာက အာဆင်နယ်အသင်းနဲ့ ရမှတ်တူ ဂိုးကွာခြားချက်ကြောင့် အဆင့် ၂ နေရာမှာ ရပ်တည်နေတာဖြစ်ပါတယ်။ အာဆင်နယ်အသင်းဟာ လာ မယ့် ပရီးမီးယားလိဂ်ပွဲစဉ်မှာ မန်စီးတီးအသင်းနဲ့ ယှဉ်ပြိုင်ရမှာဖြစ်လို့ လီဗာပူးလ်အသင်းဟာ အဆင့် ၁ နေရာကို ပြန်တက်နိုင်မယ့် အခွင့်အရေးရှိနေတာပါ။
လီဗာပူးလ်အသင်းဟာ ဒီတစ်ပတ်ပရီးမီးယားလိဂ်ပွဲစဉ်အဖြစ် မတ် ၃၁ ရက်မှာ ဘရိုက်တန်အသင်းနဲ့ ယှဉ်ပြိုင် ရမှာဖြစ်ပါတယ်။
Source:Besoccer
- By CNI
- Category: အားကစား
- Hits: 89
CNI Sport News
၂၀၂၄ ခုနှစ်၊ မတ်လ ၂၁
၂၀၂၆ ကမ္ဘာ့ဖလားခြေစစ်ပွဲ(အာရှဇုန်)ဒုတိယအဆင့် အုပ်စု B ပွဲစဉ် တစ်ပွဲဖြစ်တဲ့ မြန်မာအသင်းနဲ့ ဆီးရီးယား အသင်းတို့ပွဲစဉ်ဟာ ၁ ဂိုးစီ သရေရလဒ်နဲ့ ပြီးဆုံးသွားခဲ့ပါတယ်။
ဒီပွဲစဉ်ရဲ့ပထမပိုင်း ၃၅ မိနစ်မှာ နောက်ခံလူ စိုးမိုးကျော်က မြန်မာအသင်းအတွက် ဦးဆောင်ဂိုး သွင်းယူနိုင်ခဲ့လို့ ပထမပိုင်းအပြီးမှာ မြန်မာအသင်းက ဆီးရီးယားအသင်းကို ၁ ဂိုး- ဂိုးမရှိနဲ့ ဦးဆောင်နေခဲ့တာပါ။
ဒုတိယပိုင်းမှာတော့ ဆီးရီးယားအသင်းဟာ ချေပဂိုးရယူနိုင်ဖို့ ဆက်တိုက် ဖိအားပေးကစားခဲ့တာကြောင့် ပွဲချိန် ၇၁ မိနစ်မှာ အယ်လ်ဒါလီက ဆီးရီးယားအသင်းအတွက် ချေပဂိုးသွင်းယူနိုင်ခဲ့ပါတယ်။
ဆီးရီးယားအသင်းဟာ ချေပဂိုး ရယူအပြီးမှာ အနိုင်ဂိုးရဖို့ ကြိုးစားခဲ့ပေမယ့် မြန်မာအသင်းခံစစ်က အကောင်းဆုံး ကစားနိုင်ခဲ့လို့ ၁ ဂိုးစီ သရေရလဒ်နဲ့ ပွဲပြီးဆုံးခဲ့တာပါ။
မြန်မာအသင်းဟာ ဒီပွဲသရေ ရလဒ်ကြောင့် ခြေစစ်ပွဲအုပ်စုပွဲစဉ် ၃ ပွဲ ကစားအပြီးမှာ ၁ ရမှတ် ရယူနိုင်ခဲ့တာ ဖြစ်ပါတယ်။
ဆီးရီးယားအသင်းကတော့ ၃ ပွဲ ကစားအပြီးမှာ ရမှတ် ၄ မှတ်ရရှိထားတာပါ။
ဆီးရီးယားနဲ့ မြန်မာအသင်းတို့ဟာ မတ်လ ၂၆ ရက်မှာ ၂၀၂၆ ကမ္ဘာ့ဖလားခြေစစ်ပွဲ (အာရှဇုန်) ဒုတိယအဆင့် ပွဲစဉ် အဖြစ် ဆော်ဒီမှာ ယှဉ်ပြိုင်ကြမှာလည်း ဖြစ်ပါတယ်။
- By CNI
- Category: အားကစား
- Hits: 129
CNI Sport News
၂၀၂၄ ခုနှစ်၊ မတ်လ ၁
အာဆင်နယ်အသင်းနည်းပြ အာတီတာက ဒဏ်ရာကြောင့် ၄ လကျော်ကြာ အနားယူခဲ့ရတဲ့ ကွင်းလယ်လူ ပါတေးဟာ ရှက်ဖီးယူနိုက်တက်အသင်းနဲ့ ကစားမယ့်ပွဲစဉ်မှာ အသင်းအတွက် ပြန်လည်ပါဝင်မယ်လို့ အတည်ပြု ခဲ့ပါတယ်။
အာတီတာက “ပါတေးဟာ နောက်ဆုံး ကစားခဲ့တဲ့ပွဲမတိုင်ခင် အသင်းရဲ့ လေ့ကျင့်ခန်း အစီအစဉ်မှာ ပါဝင်ခဲ့သလို ပြီးခဲ့တဲ့ လေ့ကျင့်ခန်း အစီအစဉ်တွေမှာလည်း ပါဝင်ခဲ့ပါတယ်။ အဲဒါကြောင့် ရှက်ဖီးယူနိုက်တက် အသင်းနဲ့ပွဲ အတွက် အသင်းလူစာရင်းမှာ သူပါဝင်နိုင်မှာပါ”လို့ ပြောခဲ့တာပါ။
ပါတေးဟာ ဒီရာသီမှာ ဒဏ်ရာတွေကြောင့် အောက်တိုဘာလကတည်းက အာဆင်နယ်အသင်းအတွက် ပါဝင် ကစားနိုင်ခြင်းမရှိသလို ဂါနာအသင်းနဲ့လည်း အာဖရိကဖလားပြိုင်ပွဲမှာ ပါဝင်နိုင်ခဲ့ခြင်း မရှိပါဘူး။
ဒီရာသီမှာ အာဆင်နယ်အသင်းအတွက် ပရီးမီးယားလိဂ် ၄ ပွဲသာ ပါဝင်ကစားနိုင်ခဲ့တဲ့ ပါတေးပြန်လာမှာက အသင်းရဲ့ လူစာရင်းအင်အားကို ပိုပြီးအားကောင်းသွားမှာ ဖြစ်ပါတယ်။
အာတီတာကို တွေ့ရစဉ်
ဒါအပြင် ဒဏ်ရာကြောင့် အနားယူနေရတဲ့ နောက်ခံလူ ဇင်ချန်ကိုနဲ့ တိုမီယာဆုတို့လည်း အသင်းအတွက် ပြန်ပါဝင် နိုင်ဖို့ နီးစပ်နေပြီလို့ နည်းပြ အာတီတာက ပြောခဲ့တာပါ။
ဒူးဒဏ်ရာကြောင့် အနားယူခဲ့ရပြီးနောက် နယူးကာဆယ်အသင်းကို အနိုင်ရခဲ့တဲ့ပွဲမှာ အသင်းရဲ့ အရန်လူစာရင်းမှာ ပြန်ပါဝင်လာခဲ့တဲ့ တိုက်စစ်မှူး ဂျီးဆပ်စ်အနေနဲ့ ပွဲချိန်ပြည့်ကစားနိုင်ဖို့အတွက် အချိန်လိုအပ်သေးတယ်လို့ စပိန် လူမျိုးနည်းပြက ပြောခဲ့ပါတယ်။
ရှက်ဖီးယူနိုက်တက်အသင်းဟာ ပရီးမီးယားလိဂ်အဆင့် ၂၀ နေရာမှာ ရပ်တည်နေတာကြောင့် တန်းဆင်းဇုန်က လွတ်မြောက်နိုင်ဖို့ ကြိုးစားနေတဲ့အတွက် ဒီပွဲစဉ်ဟာ အာဆင်နယ်အသင်းအတွက် ခက်ခဲနိုင်တယ်လို့ အာတီတာ က ပြောထားတာပါ။
အာဆင်နယ်အသင်းဟာ ပရီးမီးယားလိဂ်ပွဲစဉ် ၂၆ ပွဲ ကစားအပြီးမှာ ၅၈ မှတ်နဲ့ အဆင့် ၃ နေရာမှာ ရပ်တည်နေပြီး အဆင့် ၁ နေရာက လီဗာပူးလ်အသင်းနဲ့ ၂ မှတ်ကွာဟနေတာဖြစ်ပါတယ်။
Source: CNA
- By CNI
- Category: အားကစား
- Hits: 106
CNI Sport News
၂၀၂၄ ခုနှစ်၊ ဖေဖော်ဝါရီ ၁၇
ပြီးခဲ့တဲ့ ဇန်နဝါရီအတွက် ပရီးမီးယားလိဂ် တစ်လတာ အကောင်းဆုံးနည်းပြဆုကို လီဗာပူးလ်အသင်းနည်းပြ ကလော့ပ်က ရရှိခဲ့ပြီး အကောင်းဆုံး ကစားသမားဆုကို လီဗာပူးလ်အသင်း တောင်ပံကစားသမား ဂျိုတာက ရရှိသွားခဲ့ပါတယ်။
ဒီဇင်ဘာလ အကုန်ကမှ ဒဏ်ရာကနေ ပြန်ကောင်းမွန်လာခဲ့တဲ့ ဂျိုတာဟာ ပြီးခဲ့တဲ့လက ကစားခဲ့တဲ့ ပရီးမီးယားလိဂ်ပွဲစဉ်တွေမှာ လီဗာပူးလ်အသင်းအတွက် ၃ ဂိုးသွင်းပြီး ၂ ဂိုး ဖန်တီးနိုင်ခဲ့တာပါ။
ဂျိုတာဟာ အသင်းဖော်တိုက်စစ်မှူး ဆာလက် မပါဝင်နိုင်တဲ့အချိန်မှာ လီဗာပူးလ်အသင်းအတွက် ခြေစွမ်းပြသ နိုင်ခဲ့ပြီး အသင်းကို ပရီးမီးယားလိဂ် အမှတ်ပေးဇယား ထိပ်ဆုံးနေရာမှာ ဆက်လက် ရပ်တည်နိုင်အောင် ကူညီ ပေးခဲ့တာ ဖြစ်ပါတယ်။
အဲဒါကြောင့်လည်း ဂျိုတာဟာ ဇန်နဝါရီအတွက် ပရီးမီးယားလိဂ် အကောင်းဆုံး ကစားသမားဆုကို ရရှိခဲ့တာပါ။
ဂျိုုတာအတွက်တော့ ပရီးမီးယားလိဂ် တစ်လတာ အကောင်းဆုံး ကစားသမားဆုကို သူ့ရဲ့ ကစားသမားဘဝမှာ ပထမဆုံးအကြိမ် ရရှိခဲ့တာ ဖြစ်ပါတယ်။
လီဗာပူးလ်အသင်းဟာ ဇန်နဝါရီလမှာ ကစားခဲ့တဲ့ နယူးကာဆယ်၊ ဘုန်းမောက်နဲ့ ချယ်လ်ဆီး ပရီးမီးယားလိဂ်ပွဲစဉ် ၃ ပွဲစလုံး အနိုင်ရရှိခဲ့ပြီး တစ်ပွဲကို ၄ ဂိုးစီ သွင်းယူနိုင်ခဲ့တာပါ။
ကလော့ပ်ဟာ ဒီပွဲတွေမှာ လီဗာပူးလ်အသင်းကို အကောင်းဆုံး ကိုင်တွယ်နိုင်ခဲ့တဲ့အတွက် အကောင်းဆုံးနည်းပြ ဆုကို ရရှိခဲ့တာဖြစ်ပြီး ကလော့ပ်အတွက်တော့ လီဗာပူးလ်အသင်း နည်းပြဘဝမှာ ဒီဆုကို ၁၀ ကြိမ်မြောက် ရရှိခဲ့တာ ဖြစ်ပါတယ်။
အခြားဆုတွေဖြစ်တဲ့ ဇန်နဝါရီအတွက် အကောင်းဆုံး သွင်းဂိုးဆုကို မန်စီးတီးအသင်း လူငယ်ကြယ်ပွင့် အော်စကာဘော့က ရရှိခဲ့ပြီး အကောင်းဆုံး ဂိုးကာကွယ်နိုင်မှုဆုကို အဲဗာတန်အသင်းဂိုးသမား ပစ်ဖို့ဒ်က ရရှိသွားခဲ့တာပါ။
အော်စကာဘော့ဟာ မန်စီးတီးအသင်းက နယူးကာဆယ်အသင်းကို အနိုင်ရတဲ့ပွဲမှာ အသင်းအတွက် အဖိုးတန် အနိုင်ဂိုးနဲ့အတူ လှပတဲ့သွင်းဂိုးကြောင့် ဒီဆုကို ရရှိခဲ့တာဖြစ်ပါတယ်။
ပစ်ဖို့ဒ်ကတော့ ဖူလ်ဟမ်အသင်းနဲ့ပွဲမှာ ဖူလ်ဟမ်အသင်း ဂိုးရနိုင်မယ့် အခွင့်အရေးကို လက်စွမ်းပြ ကာကွယ်ခဲ့တာ ကြောင့် ဒီဆုကို ရရှိခဲ့တာ ဖြစ်ပါတယ်။
Source: Daily Mail
- By CNI
- Category: အားကစား
- Hits: 147
CNI Sport News
၂၀၂၄ ခုနှစ်၊ ဇန်နဝါရီ ၃၁
မြန်မာနေရှင်နယ်လိဂ်ချန်ပီယံ ရှမ်းယူနိုက်တက်အသင်းဟာ ဧရာဝတီယူနိုက်တက်အသင်းနည်းပြဟောင်း ဦးမျိုးလှိုင်ဝင်းကို နည်းပြချုပ်အဖြစ်ခန့်အပ်ကြောင်း တရားဝင်ကြေညာလိုက်ပါတယ်။
ဦးမျိုးလှိုင်ဝင်းဟာ မကြာသေးခင်ကမှ ဧရာဝတီယူနိုက်တက်အသင်းနဲ့ စာချုပ်ကုန်ဆုံးသွားပြီးနောက် ရှမ်းယူနိုက်တက်အသင်းနဲ့ စာချုပ်ချုပ်ဆိုခဲ့တာဖြစ်ပြီး စာချူပ်သက်တမ်းကိုတော့ ဖော်ပြထားခြင်းမရှိပါဘူး။ မြန်မာ့လက်ရွေးစင်တိုက်စစ်မှူးဟောင်း ဦးမျိုးလှိုင်ဝင်းဟာ မြန်မာနေရှင်နယ်လိဂ်ကလပ်အသင်းတွေဖြစ်တဲ့ ရန်ကုန်ယူနိုက်တက်နဲ့ နေပြည်တော်အသင်းတွေကို ကိုင်တွယ်ခဲ့ဖူးပြီး မြန်ယူ-၁၉ အသင်းမှာ နည်းပြချုပ်အဖြစ် လည်း ဆောင်ရွက်ခဲ့တာဖြစ်ပါတယ်။
ဒါ့အပြင် ဦးမျိုးလှိုင်ဝင်းဟာ မြန်မာ့လက်ရွေးစင်အသင်းမှာလည်း လက်ထောက်နည်းပြ တာဝန်ယူခဲ့တာပါ။ ဦးမျိုးလှိုင်ဝင်းဟာ ရှမ်းယူနိုက်တက်အသင်းနဲ့အတူ မြန်မာနေရှင်နယ်လိဂ်ချန်ပီယံဆုကို ကာကွယ်ဖို့၊ AFC Cup နဲ့ ပြည်တွင်းဖလားပွဲစဉ်တွေမှာ အောင်မြင်မှုရယူဖို့ ပစ်မှတ်ထားနေတာဖြစ်ပါတယ်။ ရှမ်းယူနိုက်တက်အသင်းဟာ မြန်မာနေရှင်နယ်လိဂ်ပြိုင်ပွဲမှာ ချန်ပီယံဆုကို ၄ ကြိမ်ဆက်တိုက်ရယူထားပေမယ့် AFC Cup ပြိုင်ပွဲမှာ အုပ်စု အဆင့်ကနေ ကျော်ဖြတ်နိုင်ခြင်းမရှိတာကြောင့် ပြည်ပပြိုင်ပွဲမှာ အောင်မြင်မှုတွေရယူနိုင်ဖို့ မျှော်လင့်နေတာပါ။
ရှမ်းယူနိုက်တက်အသင်းဟာ ၂၀၂၄ ခုနှစ် မြန်မာနေရှင်နယ်လိဂ်ရာသီသစ် မစတင်ခင်မှာ နည်းပြချုပ်နေရာကို ခန့်အပ်ခဲ့သလို ကစားသမားသစ်တွေအဖြစ် မဟာယူနိုက်တက်ကစားသမားဟောင်း ကောင်းမြတ်သူနဲ့ အသင်း ကစားသမားဟောင်းဖြစ်ခဲ့တဲ့ စအောင်ပြည့်ကို တို့ကို ခေါ်ယူပြီး အားဖြည့်ထားတာဖြစ်ပါတယ်။ ရာသီသစ် မြန်မာ နေရှင်နယ်လိဂ်ပြိုင်ပွဲမစတင်ခင် မြန်မာနေရှင်နယ်လိဂ်ဖလားပြိုင်ပွဲကို မတ်လဆန်းမှာ စတင်ကျင်းပသွားဖို့ ရှိနေတာပါ။
မြန်မာနေရှင်နယ်လိဂ်-၁ ပြိုင်ပွဲကိုတော့ ဇူလိုင် ၆ ရက်ကနေ ၂၀၂၅ ခုနှစ်၊ဖေဖော်ဝါရီအထိ ကျင်းပသွားမယ်လို့ မြန်မာနေရှယ်လိဂ်က ထုတ်ပြန်ထားတာဖြစ်ပါတယ်။
- By CNI
- Category: အားကစား
- Hits: 174
CNI Sport News
၂၀၂၃ ခုနှစ်၊ ဒီဇင်ဘာ ၂၈
မြန်မာ့လက်ရွေးစင်အသင်း နောက်ခံလူဟောင်း ဇော်မင်းထွန်းဟာ ထိုင်းလိဂ် ၁ ကလပ် နခွန်ပသွန်အသင်းနဲ့ တစ်ရာသီခွဲ စာချုပ်ချုပ်ဆိုလိုက်ပြီ ဖြစ်ပါတယ်။
ဇော်မင်းထွန်းဟာ မလေးရှားကလပ် ပီနန်းအသင်းနဲ့ ရာသီအဆုံးသတ်ပြီးနောက်မှာ နခွန်ပသွန်အသင်းကို ပြောင်းရွှေ့ဖို့ ရွေးချယ်ခဲ့တာပါ။
နခွန်ပသွန်အသင်းဟာ ပြီးခဲ့တဲ့ရာသီက ထိုင်းလိဂ် ၂ မှာ ချန်ပီယံအဖြစ်နဲ့ တန်းတက်လာခဲ့ပြီး ဒီရာသီ ထိုင်းလိဂ် ၁ မှာ ရလဒ်ကောင်းတွေ ရယူထားကာ အဆင့် ၇ နေရာမှာ ရပ်တည်နေတာ ဖြစ်ပါတယ်။
နခွန်ပသွန်အသင်းဟာ ဝါရင့်ကစားသမား ဇော်မင်းထွန်းကို အာဆီယံကစားသမား ခေါ်ယူခွင့်အဖြစ် စာချုပ် ချုပ်ဆိုခဲ့တာလို့ သူတို့ရဲ့ ထုတ်ပြန်ချက်ထဲမှာ ဖော်ပြထားတာပါ။
ဇော်မင်းထွန်းဟာ မလေးရှားကလပ် ပီနန်းအသင်းထံ မပြောင်းရွှေ့ခင် ထိုင်းကလပ်တွေဖြစ်တဲ့ ချောင်ဘူရီမှာ ၂ ကြိမ်၊ ဆူခိုထိုင်းနဲ့ ထရက်အသင်းတွေမှာ ကစားခဲ့ပြီး ထိုင်းဘောလုံးလောကမှာ အတွေ့အကြုံ အများအပြား ရှိခဲ့သူ ဖြစ်ပါတယ်။
ဇော်မင်းထွန်းကို တွေ့ရစဉ်
ဇော်မင်းထွန်းကတော့ နခွန်ပသွန်အသင်းအတွက် အစွမ်းကုန် ပေးဆပ်သွားမှာဖြစ်ပြီး အသင်းဖော်သစ်တွေနဲ့အတူ ထိုင်းလိဂ်မှာ အောင်မြင်မှု ရယူနိုင်အောင် တိုက်ပွဲဝင်နိုင်ဖို့အတွက် မစောင့်ဆိုင်းနိုင်တော့ဘူးလို့ သူ့ရဲ့ ဆိုရှယ် မီဒီယာမှာ ရေးသားထားပါတယ်။
ဇော်မင်းထွန်းဟာ ဇန်နဝါရီ ၅ ရက်မှာ ပြန်စမယ့် နခွန်ပသွန်အသင်းရဲ့ လေ့ကျင့်ခန်း အစီအစဉ်တွေကို စတင်ပြီး ပူးပေါင်းသွားမယ်လို့ သိရပါတယ်။
မြန်မာ့လက်ရွေးစင်အသင်း နောက်ခံလူဟောင်း ဇော်မင်းထွန်းဟာ ပြီးခဲ့တဲ့ရာသီက မလေးရှားကလပ် ပီနန်းအသင်း အတွက် ပွဲပေါင်း ၂၀ ပါဝင်ကစားခဲ့ပြီး သွင်းဂိုးနဲ့ ဂိုးဖန်တီးမှုတော့ မရှိခဲ့တာပါ။
ပီနန်းအသင်းဟာ ပြီးခဲ့တဲ့ရာသီ မလေးရှားစူပါလိဂ်ပြိုင်ပွဲမှာ အဆင့် ၁၀ နေရာ ရပ်တည်ခဲ့တာ ဖြစ်ပါတယ်။
- By CNI
- Category: အားကစား
- Hits: 174
CNI Sport News
၂၀၂၃ ခုနှစ်၊ ဒီဇင်ဘာ ၁၉
ရှမ်းယူနိုက်တက်အသင်းဟာ ၂၀၂၃ ခုနှစ် မြန်မာနေရှင်နယ်လိဂ်ပြိုင်ပွဲကြီးရဲ့ ချန်ပီယံဆုကို ရှုံးပွဲမရှိစံချိန်နဲ့ ၅ ကြိမ်မြောက်ရရှိသွားခဲ့ပြီဖြစ်ပါတယ်။
ရှမ်းယူနိုက်တက်အသင်းဟာ ၂၀၂၃ ခုနှစ်ရာသီ မြန်မာနေရှင်နယ်လိဂ်ပြိုင်ပွဲရဲ့ နောက်ဆုံးပွဲစဉ်အဖြစ် ရန်ကုန်ယူနိုက်တက်အသင်းနဲ့ ကစားခဲ့တာမှာ ဂိုးမရှိသရေကျခဲ့ပြီးနောက် တစ်ရာသီလုံးရှုံးပွဲမရှိစံချိန်နဲ့ ချန်ပီယံဆုကို ရယူနိုင်ခဲ့တာပါ။ ရှမ်းယူနိုက်တက်အသင်းဟာ အခုနှစ်မတိုင်ခင် ၂၀၁၇၊၂၀၁၉၊၂၀၂၀နဲ့ ၂၀၂၂ ခုနှစ်တွေမှာလည်း ချန်ပီယံဆုကို ရယူနိုင်ခဲ့တာကြောင့် အခုတစ်ကြိမ်ဟာ သူတို့အတွက် မြန်မာနေရှင်နယ်လိဂ် ချန်ပီယံဆုကို ၅ ကြိမ်မြောက်ရယူနိုင်ခဲ့တာဖြစ်ပါတယ်။
ဒါ့အပြင် ရှမ်းယူနိုက်တက်အသင်းဟာ မြန်မာနေရှင်နယ်လိဂ်ချန်ပီယံဆုကို ၄ ကြိမ်ဆက်တိုက်ရရှိတဲ့ ပထမဆုံး အသင်းအဖြစ်လည်း စံချိန်မှတ်တမ်းတင်နိုင်ခဲ့တာပါ။ ရှမ်းယူနိုက်တက်အသင်းဟာ မြန်မာနေရှင်နယ်လိဂ်ပြိုင်ပွဲမှာ ရှုံးပွဲမရှိချန်ပီယံဆုကို ၂၀၁၉ နဲ့ ၂၀၂၂ ပြိုင်ပွဲတွေမှာလည်း ရယူနိုင်ခဲ့တာကြောင့် အခုတစ်ကြိမ်ဟာ သူတို့အတွက် ၃ ကြိမ်မြောက် ရှုံးပွဲမရှိချန်ပီယံဆုကို ရယူနိုင်ခဲ့တာဖြစ်ပါတယ်။ ဒီပြိုင်ပွဲရဲ့ ဂိုးသွင်းအများဆုံးကစားသမားဆုကို ရှမ်းယူနိုက်တက်အသင်းတိုက်စစ်မှူး ဘယ်လိုက ၁၃ ဂိုးနဲ့ ရရှိခဲ့တာပါ။
ရှမ်းယူနိုက်တက်အသင်းနည်းပြချုပ် ဦးဟန်ဝင်းအောင်ကတော့ ကျေးဇူးတင်ထိုက်တဲ့သူတွေကို ဒီနေရာကနေ ကျေးဇူးတင်တယ်လို့ပြောချင်ပြီး လာမယ့်နှစ်မှာတော့ ပြိုင်ပွဲ ၃ ပွဲကစားရမှာဖြစ်လို့ သေချာပြင်ဆင်ဖို့ လိုတယ်လို့ ဆုယူအပြီးမှာ ပြောခဲ့ပါတယ်။ ရှမ်းယူနိုက်တက်အသင်းနောက်ခံလူ နန္ဒကျော်က ဘယ်အသင်းမှ မရယူဖူးတဲ့ ၄ နှစ် ဆက်တိုက်ချန်ပီယံဆုကိုရခဲ့တဲ့အတွက် အလွန်ထူးခြားပါတယ်လို့ ပြောခဲ့တာပါ။
၂၀၂၃ ခုနှစ်မြန်မာနေရှင်နယ်လိဂ်ပြိုင်ပွဲအပြီးမှာ ရန်ကုန်ယူနိုက်တက်အသင်းက ဒုတိယ၊ ဟံသာဝတီယူနိုက်တက် က တတိယ၊ ISPE က စတုတ္တနဲ့ ဒဂုံစတားက ပဉ္စမနေရာမှာ ရပ်တည်ခဲ့ပြီး အောက်ဆုံးနေရာမှာ ရပ်တည်ခဲ့တဲ့ GFA နဲ့ ကချင်ယူနိုက်တက်အသင်းတို့ဟာ လာမယ့်နှစ် မြန်မာနေရှင်နယ်လိဂ် ၂ ပြိုင်ပွဲကို တန်းဆင်းပြီး ယှဉ်ပြိုင်ရမှာဖြစ်ပါတယ်။
- By CNI
- Category: အားကစား
- Hits: 238
CNI Sport News
၂၀၂၃ ခုနှစ်၊ နိုဝင်ဘာ ၂၈
ဩစတြေးလျအစိုးရဟာ ရှမ်းယူနိုက်တက်အသင်းက ကစားသမားတွေကို ဗီဇာခွင့်ပြုပေးဖို့ ငြင်းဆန်ခဲ့ပြီးနောက် မက်အာသာနဲ့ ရှမ်းယူနိုက်တက်အသင်းတို့ရဲ့ AFC Cup ပွဲစဉ်ကို ကြားကွင်းဖြစ်တဲ့ ဘန်ကောက်မှာ ကျင်းပသွားမယ်လို့ သြစတြေးလျဘောလုံးအဖွဲ့ချုပ်က ကြေညာချက်ထုတ်ပြန်ခဲ့ပါတယ်။
“အခုလိုကြားကွင်းမှာပြောင်းရွှေ့ပြီးကျင်းပမှာက သြစတြေးလျအစိုးရဟာ ရှမ်းယူနိုက်တက်အသင်းရဲ့ ကစားသမားတွေနဲ့ တာဝန်ရှိသူတွေကို သြစတြေးလျ ဗီဇာ ထုတ်ပေးဖို့ ငြင်းဆန်ခဲ့တာကြောင့်ပါ။ အဲ့ဒါကြောင့် ဒီပွဲကို သြစတြေးလျမြေမှာ ကစားဖို့ အလားအလာမရှိဘူး”လို့ သြစတြေးလျဘောလုံးအဖွဲ့ချုပ်ရဲ့ထုတ်ပြန်ချက်မှာ ဖော်ပြထားတာပါ။
သြစတြေးလျကလပ် မက်အာသာအသင်းဟာ ပြီးခဲ့တဲ့ စက်တင်ဘာလက ရန်ကုန်မှာ ရှမ်းယူနိုက်တက်အသင်းနဲ့ ပွဲကစားခဲ့တဲ့အတွက် လူ့အခွင့်အရေးအဖွဲ့ရဲ့ ဝေဖန်မှုခံခဲ့ရပါတယ်။
ရှမ်းယူနိုက်တက်အသင်းအား တွေ့ရစဉ်
မက်အာသာနဲ့ ရှမ်းယူနိုက်တက်အသင်းတို့ရဲ့ ပွဲစဉ်ကို ကြားကွင်းဖြစ်တဲ့ ဘန်ကောက်ရှိ BG Stadium မှာ ကျင်းပသွားမှာပါ။
သြစတြေးလျအစိုးရဟာ လက်ရှိမြန်မာနိုင်ငံအတွင်းမှာ ဖြစ်ပျက်နေတဲ့ အခြေအနေတွေကြောင့် မြန်မာနိုင်ငံထဲကို ခရီးသွားခွင့်တားမြစ်ဖို့ အကြံပြုထားတာဖြစ်ပါတယ်။
မက်အာသာအသင်းဟာ ရှမ်းယူနိုက်တက်အသင်းနဲ့ ကစားမယ့်ပွဲကို ပြန်ပြီးမစီစဉ်နိုင်ရင် AFC Cup ပြိုင်ပွဲမှာ သူတို့ရဲ့နေရာကို ဆုံးရှုံးရမှာဖြစ်တဲ့အတွက် ထိုင်းနိုင်ငံမှာ ကျင်းပနိုင်ဖို့ စီစဉ်ခဲ့ရတာပါ။
AFC Cup အုပ်စု F ရဲ့ ပွဲစဉ် ၄ ပွဲကစားအပြီးမှာ မက်အာသာအသင်းဟာ ရမှတ် ၉ မှတ်နဲ့ ထိပ်ဆုံးနေရာမှာ ရပ်တည်နေပြီး ရှမ်းယူနိုက်တက်အသင်းကတော့ ရမှတ် ၁ မှတ်နဲ့ အုပ်စုနောက်ဆုံးနေရာမှာ ရပ်တည်နေတာ ဖြစ်ပါတယ်။
မက်အာသာနဲ့ ရှမ်းယူနိုက်တက်အသင်းတို့ရဲ့ AFC Cup ပွဲစဉ်ကို နိုဝင်ဘာ ၃၀ ရက်မှာ ကျင်းပသွားမှာ ဖြစ်ပါတယ်။
- By CNI
- Category: အားကစား
- Hits: 250
CNI Sport News
၂၀၂၃ ခုနှစ်၊ နိုဝင်ဘာ ၂၂
မြောက်ကိုရီးယားအသင်းကို အိမ်ကွင်းမှာ ၆ ဂိုး- ၁ ဂိုးနဲ့ ဂိုးပြတ်အရေးနိမ့်ပြီးနောက် မြန်မာအသင်းနည်းပြ မိုက်ကယ်က ယှဉ်ပြိုင်ကစားပြီးတဲ့ ခြေစစ်ပွဲ ၂ ပွဲကို ပြန်သုံးသပ် ပြင်ဆင်သွားမယ်လို့ ပွဲအပြီး သတင်းစာ ရှင်းလင်းပွဲမှာ ပြောလိုက်ပါတယ်။
မိုက်ကယ်က "ခက်ခဲတဲ့ပွဲပါ။ ဂျပန်အသင်းနဲ့ ပွဲကလိုမျိုး ဂိုးကွာခြားချက်က ၅ ဂိုး ဖြစ်သွားခဲ့ပါတယ်။ ပွဲချိန် မိနစ် ၃၀ လောက်အထိ အကောင်းဆုံး ကစားနိုင်ပေမယ့် ၃ ဂိုး ပေးလိုက်ရပြီးနောက် ပုံစံကောင်း မရှိတော့ပါဘူး။ ရလဒ် က ကျေနပ်စရာ မဟုတ်ပေမယ့် ကစားသမားတွေ ကြိုးစားကစားခဲ့ပါတယ်။ နှစ်သင်းစလုံး အခွင့်အရေးတွေ ဖန်တီးနိုင်ပေမယ့် မြောက်ကိုရီးယားက ပထမပိုင်းရရှိတဲ့ အခွင့်အရေး ၃ ကြိမ်စလုံး ဂိုးရခဲ့ပါတယ်။ ကစားသမား အချို့ အမှားလုပ်ခဲ့ကြပါတယ်။ ကစားပြီးတဲ့ ၂ ပွဲကို ပြန်သုံးသပ်ပြီး ပြင်ဆင်သွားပါမယ်"လို့ပြောခဲ့ပါတယ်။
မြန်မာအသင်းဟာ ဒီပွဲမှာ မြောက်ကိုရီးယား အသင်းဆီကနေ သရေတစ်မှတ် ရအောင်ယူမယ်ဆိုပြီး ဂျပန်အသင်းနဲ့ ပွဲစဉ်က ပွဲထွက်လူစာရင်းကို အနည်းငယ်ပြောင်းလဲပြီး ပွဲထွက်လာခဲ့တာ ဖြစ်ပါတယ်။
မြန်မာအသင်း ကစားသမားများကိုတွေ့ရစဉ်
မြန်မာအသင်းဟာ မြောက်ကိုရီးယားအသင်းကို ဂိုးမပေးရခင် အချိန်ထိ အကောင်းဆုံးပုံစံနဲ့ ကစားနိုင်ခဲ့ပေမယ့် ဂိုးပေးရအပြီးမှာ ကစားသမားတွေဟာ အမှားအယွင်းပိုပြီး လုပ်ခဲ့တာကြောင့် ဂိုးပြတ်ရှုံးပွဲကြုံတွေ့ခဲ့ရပါတယ်။
ပြီးခဲ့တဲ့ ဂျပန်အသင်းနဲ့ ပွဲစဉ်မှာ ဂိုးပေါက်ကန်သွင်းမှု တစ်ကြိမ်တောင် ပြုလုပ်နိုင်ခဲ့ခြင်းမရှိတဲ့ မြန်မာအသင်းဟာ မြောက်ကိုရီးယားအသင်းနဲ့ ပွဲမှာတော့ ဂိုးရနိုင်မယ့် အခွင့်အရေးတွေရခဲ့ပြီး တိုက်စစ်မှူး ဝင်းနိုင်ထွန်းရဲ့ သွင်းဂိုး တစ်ဂိုးသာ သွင်းယူနိုင်ခဲ့တာ ဖြစ်ပါတယ်။
မြန်မာအသင်းနဲ့ ပွဲစဉ်မှာ မြောက်ကိုရီးယား အသင်းအတွက် ဟက်ထရစ် ဂိုးသွင်းယူပေးနိုင်ခဲ့တဲ့ တိုက်စစ်မှူး ဂွမ် က မြန်မာအသင်းဟာ ကစားပုံကောင်းပေမယ့် နောက်တန်းနဲ့ ကွင်းလယ်က ချိတ်ဆက်မှုပိုင်း အားနည်းတယ်လို့ သုံးသပ်ခဲ့ပါတယ်။
၂၀၂၆ ကမ္ဘာ့ဖလားခြေစစ်ပွဲ(အာရှဇုန်)ဒုတိယအဆင့် ၂ ပွဲစီ ကစားအပြီးမှာ အုပ်စုတွင်းက ဂျပန်အသင်းဟာ ၂ ပွဲ စလုံးနိုင် ရမှတ် ၆ မှတ်၊ မြောက်ကိုရီးယားအသင်းက ၁ ပွဲနိုင် ၃ မှတ်၊ ဆီးရီးယားအသင်းက ၁ ပွဲနိုင် ၃ မှတ်နဲ့ မြန်မာအသင်းက ရမှတ်မရရှိသေးတာ ဖြစ်ပါတယ်။
ခြေစစ်ပွဲတွေကို မတ်လမှ ပြန်လည်ယှဉ်ပြိုင်မှာဖြစ်ပြီး မြန်မာအသင်းဟာ ဆီးရီးယားအသင်းနဲ့ အိမ်ကွင်း၊ အဝေး ကွင်းယှဉ်ပြိုင်ရမှာ ဖြစ်ပါတယ်။
- By CNI
- Category: အားကစား
- Hits: 236
CNI Sport News
၂၀၂၃ ခုနှစ်၊ အောက်တိုဘာ ၂
ရန်ကုန်ယူနိုက်တက်အသင်းဟာ ဂီနီတိုက်စစ်မှူး ဆီလာနဲ့ ၂၀၂၃ ခုနှစ်၊ နိုဝင်ဘာလ ၁ ရက်က စတင်ကာ နှစ်ဦး သဘောတူ စာချုပ်ဖျက်သိမ်းလိုက်ပြီလို့ တရားဝင် ထုတ်ပြန်လိုက်ပါတယ်။
မြန်မာနေရှင်နယ်လိဂ် ကလပ်ဟာ ဆီလာကို အခုနှစ် ဇန်နဝါရီလကမှ ၁ နှစ်စာချုပ်နဲ့ ခေါ်ယူခဲ့တာဖြစ်ပြီး ကစား သမားဟာ ဒီရာသီမှာ ရန်ကုန်ယူနိုက်တက် အသင်းအတွက် ၁၁ ဂိုး သွင်းယူထားပါတယ်။
ဆီလာကို ခေါ်ယူဖို့ အင်ဒိုနီးရှားကလပ် ပါဆီကတ်ဘ်ဘန်ဒေါင်းအသင်းက ကမ်းလှမ်းလာတာကြောင့် ကစားသမား ရဲ့ ပိုမိုကောင်းမွန်တဲ့ အခွင့်အရေးအတွက် စာချုပ်ဖျက်သိမ်းပေးခဲ့တာလို့ ရန်ကုန်ယူနိုက်တက်အသင်းက ထုတ်ပြန် ချက်မှာ ဖော်ပြထားပါတယ်။
ဆီလာဟာ ရန်ကုန်ယူနိုက်တက်အသင်းမှာ ၂၀၁၇ ကနေ ၂၀၁၈ ခုနှစ်အထိ တစ်ရာသီကြာ ကစားခဲ့ဖူးပြီး ၅၇ ပွဲမှာ ၄၆ ဂိုးသွင်းယူကာ မြန်မာနေရှင်နယ်လိဂ်ဖလားနဲ့ ဗိုလ်ချုပ်အောင်ဆန်းဒိုင်း ချန်ပီယံဆုတို့ကို ရယူနိုင်ခဲ့တာပါ။
ရန်ကုန်ယူနိုက်တက်အသင်းမှာ ကစားခဲ့တဲ့ ဆီလာကို တွေ့ရစဉ်
ဂီနီတိုက်စစ်မှူးဟာ ရန်ကုန်ယူနိုက်တက်အသင်း မတိုင်ခင်က မြန်မာနေရှင်နယ်လိဂ် ကလပ်အသင်းဖြစ်ခဲ့တဲ့ မကွေးအသင်းမှာ ကစားခဲ့ပြီး ၂၀၁၆ ခုနှစ်က ဗိုလ်ချုပ်အောင်ဆန်းဒိုင်း ချန်ပီယံဆုကို ရယူနိုင်ခဲ့ပါတယ်။
ရန်ကုန်ယူနိုက်တက်အသင်းဟာ ဆီလာ မတိုင်ခင်ကလည်း ကိုလံဘီယာတိုက်စစ်မှူး ဗလင်စီယာနဲ့ နှစ်ဦး သဘောတူစာချုပ် ဖျက်သိမ်းထားခဲ့တာ ဖြစ်ပါတယ်။
ဗလင်စီယာဟာ ပြီးခဲ့တဲ့ ဇူလိုင်လကမှ ရန်ကုန်ယူနိုက်တက်အသင်းကို ရောက်ရှိလာခဲ့တာဖြစ်ပြီး သွင်းဂိုး ၇ ဂိုး သွင်းယူနိုင်ခဲ့တာ ဖြစ်ပါတယ်။
ရန်ကုန်ယူနိုက်တက်အသင်းဟာ နောက်ဆုံး ကစားခဲ့တဲ့ မြန်မာနေရှင်နယ်လိဂ်ပွဲစဉ်မှာ ရတနာပုံအသင်းကို ၄ ဂိုး- ဂိုးမရှိနဲ့ ဂိုးပြတ်အနိုင်ရပြီး ထိပ်ဆုံးနေရာက ရှမ်းယူနိုက်တက်အသင်းထက် ၁ ပွဲ ပိုကစားထားကာ ရမှတ် ၃ မှတ် လျော့နဲ့ ဒုတိယနေရာမှာ ရပ်တည်နေတာပါ။
ရန်ကုန်ယူနိုက်တက်အသင်းဟာ နိုဝင်ဘာ ၂၆ ရက်မှာ မြန်မာနေရှင်နယ်လိဂ် ပွဲစဉ်အဖြစ် ဟံသာဝတီယူနိုက်တက် အသင်းနဲ့ ယှဉ်ပြိုင်ရမှာ ဖြစ်ပါတယ်။
- By CNI
- Category: အားကစား
- Hits: 219
CNI Sport News
၂၀၂၃ ခုနှစ်၊ အောက်တိုဘာ ၂၅
ရှမ်းယူနိုက်တက်အသင်း နည်းပြချုပ် ဦးဟန်ဝင်းအောင်က AFC Cup ပထမပွဲ ၂ ပွဲမှာ ရှုံးနိမ့်ထားတဲ့အတွက် ဖိလစ်ပိုင်ကလပ် ဒိုင်းနမစ်ဟတ်ဆီဘူးအသင်းနဲ့ ပွဲမှာ နိုင်ပွဲရအောင် ယူရမယ်လို့ ပြောလိုက်ပါတယ်။
ဦးဟန်ဝင်းအောင်က “ကျနော်တို့ ကစားကွက် ပြောင်းထားတယ်၊ ပြိုင်ဘက်ကိုချဉ်းကပ်တဲ့ ဗျူဟာလည်း ပြောင်း ထားပါတယ်။ အစွမ်းအစရှိသလောက် သင်ပေးထားတဲ့အတွက် ကစားသမားတွေကလည်း အစွမ်းကုန် ကစားကြ မယ်လို့ ယုံကြည်ပါတယ်။ ဆီဘူးအသင်း ပွဲတွေလည်း ကြည့်ထားပါတယ်၊ ပိုအန္တရာယ်ပေးနိုင်တဲ့ သူဆိုတာ မရှိပါ ဘူး။ ပွဲထဲမှာ ပါဝင်နေတဲ့ ကစားသမား ၁၁ ဦးစလုံးက အရေးကြီးပါတယ်၊ ပြိုင်ဘက်အသင်း ဘယ်ကစားသမားက မဆို ပွဲရလဒ်ကို ပြောင်းလဲနိုင်လို့ သတိထား ကစားရမှာပါ"လို့ ပြောခဲ့ပါတယ်။
ရှမ်းယူနိုက်တက်အသင်းဟာ AFC CUP ပထမ ၂ ပွဲမှာ မက်အာသာအသင်းကို ၃ ဂိုး- ဂိုးမရှိ၊ ဖနွမ်းပင်ခရောင်း အသင်းကို ၄ ဂိုး- ဂိုးမရှိနဲ့ အရေးနိမ့်ထားတာ ဖြစ်ပါတယ်။
ရှမ်းယူနိုက်တက်အသင်းကို တွေ့ရစဉ်
ရှမ်းယူနိုက်တက်အသင်းနဲ့ ယှဉ်ပြိုင်ရမယ့် ဒိုင်းနမစ်ဟတ်ဆီဘူး အသင်းကလည်း ဖနွမ်းပင်ခရောင်းအသင်းကို ၃ ဂိုး- ဂိုးမရှိ၊ မက်အာသာအသင်းကို ၈ ဂိုး- ၂ ဂိုးနဲ့ ဂိုးပြတ် အရေးနိမ့်ထားပါတယ်။
အဲ့ဒါကြောင့် ဒီပွဲမှာ ၂ သင်းစလုံးဟာ အမှတ်ရယူနိုင်ဖို့အတွက် ကြိုးစားလာကြမှာ ဖြစ်ပါတယ်။
ရှမ်းယူနိုက်တက်အသင်းဟာ AFC Cup ပြိုင်ပွဲမှာ ရလဒ်မကောင်းပေမယ့် မြန်မာနေရှင်နယ်လိဂ် ပြိုင်ပွဲမှာတော့ ဒုတိယနေရာက ရန်ကုန်ယူနိုက်တက်အသင်းကို ၆ မှတ်အထိ ဖြတ်ထားပါတယ်။
အခုနှစ် မြန်မာနေရှင်နယ်လိဂ် ပြိုင်ပွဲပြီးဆုံးဖို့ ၆ ပွဲသာ လိုတော့တာကြောင့် ရှမ်းယူနိုက်တက်အသင်းဟာ အမှတ်ပေး ချန်ပီယံဆုကို ဆက်ထိန်းသိမ်းနိုင်ဖို့ အခြေအနေကောင်းနေလို့ AFC Cup ပြိုင်ပွဲကို ပိုပြီးအာရုံစိုက်ဖို့ ရှိနေတာဖြစ်ပါတယ်။
ဒိုင်းနမစ်ဟတ်ဆီဘူးအသင်းနဲ့ ရှမ်းယူနိုက်တက်အသင်းတို့ရဲ့ ပွဲစဉ်ကို အောက်တိုဘာ ၂၆ ရက် ဖိလစ်ပိုင်နိုင်ငံမှာ ကျင်းပသွားမှာ ဖြစ်ပါတယ်။
- By CNI
- Category: အားကစား
- Hits: 451
CNI Sport News
၂၀၂၃ ခုနှစ်၊ အောက်တိုဘာ ၅
မြန်မာအသင်းဟာ မကာအိုအသင်းနဲ့ ကစားမယ့် ၂၀၂၆ ကမ္ဘာ့ဖလားခြေစစ်ပွဲ ပထမအဆင့်အတွက် လေ့ကျင့်မှု တွေကို အောက်တိုဘာ ၇ ရက်မှာ စတင်ပြုလုပ်သွားမှာ ဖြစ်ပါတယ်။
နည်းပြချုပ် မိုက်ကယ်ရဲ့ ကမ္ဘာ့ဖလား ခြေစစ်ပွဲကစားမယ့် ပဏာမမြန်မာအသင်း လူစာရင်းဟာ ပြီးခဲ့တဲ့ နီပေါ အသင်းနဲ့ ခြေစမ်းပွဲကစားခဲ့တဲ့ လူစာရင်းကိုအခြေခံပြီး အာရှအားကစားပြိုင်ပွဲ ဝင်ရောက်ယှဉ်ပြိုင်ခဲ့တဲ့ ယူ-၂၄ အသင်းက လူငယ်ကစားသမားတွေနဲ့ ပေါင်းစပ်ဖွဲ့စည်းထားပါတယ်။
အခုနှစ် ဘောလုံးရာသီ မြန်မာနေရှင်နယ်လိဂ် ပြိုင်ပွဲမှာ ခြေစွမ်းပြသနေတဲ့ ဟံသာဝတီယူနိုက်တက်အသင်း တိုက်စစ်မှူး အောင်မြတ်သူကို ပဏာမလူစာရင်းထဲမှာ ထည့်သွင်းထားခဲ့ပါတယ်။
မြန်မာအသင်း ယှဉ်ပြိုင်နေစဉ်
နည်းပြချုပ် မိုက်ကယ်ဟာ ပြီးခဲ့တဲ့ နီပေါအသင်းနဲ့ ခြေစမ်းပွဲ ၂ ပွဲက ခြေစွမ်းတွေကို ပြန်လည်သုံးသပ်ပြီး မကာအို အသင်းနဲ့ ပွဲစဉ်ကို ပြင်ဆင်သွားမယ်လို့ ပြောထားပါတယ်။
မြန်မာအသင်းဟာ ဇွန်လတုန်းက တရုတ်မှာ ကစားခဲ့တဲ့ ခြေစမ်းပွဲမှာ မကာအိုအသင်းကို ၂ ဂိုး- ဂိုးမရှိနဲ့ အနိုင် ရထားတာ ဖြစ်ပါတယ်။
မြန်မာအသင်းဟာ ကမ္ဘာ့ဖလားခြေစစ်ပွဲ ပထမအဆင့်အဖြစ် အောက်တိုဘာ ၁၂ ရက်မှာ မကာအိုအသင်းကို အိမ်ကွင်း၊ အောက်တိုဘာ ၁၇ ရက်မှာ အဝေးကွင်း သွားရောက်ယှဉ်ပြိုင်ရမှာပါ။
မြန်မာအသင်းဟာ မကာအိုအသင်းကို အနိုင်ရခဲ့ရင် ဒုတိယအဆင့်မှာ ဂျပန်၊ မြောက်ကိုရီးယား၊ ဆီးရီးယား အသင်း တို့နဲ့ ယှဉ်ပြိုင်ရမှာ ဖြစ်ပါတယ်။