CNI International News

ဆစ်ဒနီ၊ဖေဖော်ဝါရီ ၂

သီတင်းပတ် တစ်ပတ်နီးပါးကြာ ရှာဖွေခဲ့ပြီးနောက် သြစတြေးလျ အာဏာပိုင်များသည် အကြွေစေ့ထက် သေး သော ရေဒီယိုသတ္တိကြွ အတောင့်တစ်ခုကို ရှာတွေ့ခဲ့ပြီဟု CNA သတင်းတွင် ဖော်ပြထားသည်။

ကျယ်ပြန့်သော ကုန်းခေါင်ခေါင် ဒေသတွင် ရှာဖွေမှုကို လူ ၁၀၀ နီးပါး အသုံးပြုပြီး အဝေးပြေးလမ်း ၁၄၀၀ ကီလိုမီတာ တလျှောက် ရှာဖွေခဲ့ရခြင်းဟု အနောက်သြစတြေးလျ ပြည်နယ်(Western Australia) မှ အရာရှိ များက ပြောသည်။

Caesium-137 အတောင့်သည် လက်လွဲသယ်ယူနေစဉ် တစ်နာရီ ၇၀ ကီလိုမီတာဖြင့် သွားနေသော ယာဉ်ပေါ်မှ လွန်ခဲ့သော နှစ်ပတ်က ပျောက်ဆုံးသွားခဲ့ခြင်းဖြစ်ကြောင်း၊ ယင်းကို ရောင်ခြည်ထွက်မှုကို ရှာဖွေသည့် အထူး ကိရိယာများ အသုံးပြုကာ ရှာဖွေခဲ့ရသည်။

ထိုပစ္စည်းကို လူနေဧရိယာများနှင့် ဝေးလံသီခေါင်သည့် ဧရိယာတစ်ခုရှိ လမ်းဘေး နှစ်မီတာတွင် ရှာတွေ့ခဲ့သည်။

ပျောက်ဆုံးခဲ့သော ရေဒီယိုသတ္တိကြွပစ္စည်းသည် ဝေးလံသော ကင်ဘာလေ (Kimberley) ဒေသရှိ ရီယိုတီနို Rio Tinto ကုမ္ပဏီ၏ ဂွီဒိုင်-ဒါရီ (Gudai- Darri) သတ္တုမိုင်းမှ သံရိုင်းကြောများ၏ သိပ်သည်းဆကို တိုင်းတာရန် သုံး သော တိုင်းတာရေး ပစ္စည်းတစ်ခု၏ အစိတ်အပိုင်း ဖြစ်သည်။

 ရေဒီယိုသတ္တိကြွပစ္စည်းကို ရှာဖွေနေကြစဉ်(Reuters)

ထိုကိရိယာကို ပြည်နယ်၏ မြို့တော် ပတ်သ် (Perth)မြို့ ဆင်ခြေဖုံးရှိ စက်ရုံတစ်ခုသို့ သယ်ဆောင်လာခြင်း ဖြစ်သည်။

ပြည်နယ်အစိုးရဘက်မှသာ တောင်းခံလာမည်ဆိုလျှင် ရှာဖွေမှုအတွက် ကုန်ကျစရိတ်များကို ကုမ္ပဏီဘက်မှ ပေးရန် ဆန္ဒရှိသည်ဟု ရီယိုတီနို ကုမ္ပဏီက ပြောသည်။

ရေဒီယိုသတ္တိကြွပစ္စည်း ပျောက်ဆုံးမှုကြောင့် စိုးရိမ်မှုများ ဖြစ်ရခြင်းအတွက် တောင်းပန်ကြောင်းလည်း ကုမ္ပဏီ က ထုတ်ပြန်သည်။

ဓာတ်ရောင်ခြည် လောင်မှု သို့မဟုတ် ရောင်ခြည်ကြောင့်ဖြစ်သည့် အဖျားဝေဒနာများ ရှိနိုင်သောကြောင့် အဆိုပါ အတောင့်ကို တွေ့ရှိလျှင် ယင်းနှင့် ငါးမီတာ အကွာတွင်နေရန် တာဝန်ရှိသူများက ထုတ်ပြန်ခဲ့ရသည်။

သို့သော် ယာဉ်ဖြင့် ဖြတ်သန်းမိခဲ့လျှင် ဓာတ်ရောင်ခြည်သင့်မှုမှာ ဓာတ်မှန်ရိုက်ခြင်းတွင် ကြုံတွေ့ရသလောက်ပင် နည်းပါးသည်ဟု ယူဆရသည်။ တွေ့ရှိခဲ့သော ရေဒီယိုသတ္တိကြွပစ္စည်း၏ အမှတ်စဉ်ကို တာဝန်ရှိသူများက စစ်ဆေး နေစဉ် ယင်းကိုတွေ့ရှိရာ မီတာ ၂၀ ပတ်လည်ကို ပိတ်ထားသည်။

ထိုပစ္စည်းကို ခဲဗူးတစ်ခုအတွင်း ထည့်သွင်းကာ ပြည်နယ်တွင်းရှိ သတ္တုမိုင်းတစ်ခုတွင် တစ်ညထားပြီး ကြာသပတေးနေ့တွင် မြို့တော်ဆီ သယ်ဆောင်သွားရန် စီစဉ်ထားသည်။

ငွေဖြင့် ပြုလုပ်ထားသော ရေဒီယိုသတ္တုကြွ အတောင့်သည် ခြောက်မီလီမီတာ အချင်းရှိပြီး ရှစ်မီလီမီတာ ရှည်ကာ တစ်နာရီအတွင်း ဓာတ်မှန်ရိုက်မှု ၁၀ ကြိမ်နှင့်ညီမျှသော ဓာတ်ရောင်ခြည်ကို ထုတ်လွှင့်နိုင်သည်။

ထိုပစ္စည်းကို သယ်ဆောင်စဉ် ကားပေါ်မှ ရုတ်တရက် ပြုတ်ကျသွားခဲ့သည်ဟု အာဏာပိုင်များက ယူဆထားသည်။

ထို့ကြောင့် ပတ်ဝန်းကျင် ညစ်ညမ်းမှု တစ်စုံတစ်ရာ မရှိနိုင်ဟုလည်း ပြောသည်။

Source: CNA

CNI International News

ကိယက်ဗ်၊ စက်တင်ဘာ ၁၃

စစ်ပွဲဖြစ်နေစဉ်အတွင်း ယူကရိန်းသည် ခေတ်ပြိုင် သတင်းအချက်အလက် (IT) နည်းပညာသုံးစွဲရာ၌ ဂြိုဟ်တု စလောင်းများမှသည် စမတ်ဖုန်း Apps များအထိ အလွန်ထိရောက်ကြောင်း သက်သေပြစရာ နေရာတစ်ခု ဖြစ်လာ ကြောင်း Google အမှုဆောင်အရာရှိချုပ်ဟောင်း အဲရစ်ရှမစ်က စက်တင်ဘာ ၁၂ ရက်တွင် ပြောကြားခဲ့ကြောင်း South China Morning Post သတင်းအရ သိရသည်။

ဉာဏ်ရည်တု (AI) နည်းပညာဆိုင်ရာ အမေရိကန်အစိုးရ၏ အတိုင်ပင်ခံပုဂ္ဂိုလ်လည်းဖြစ်သူ အဲရစ်ရှမစ်သည် ယူကရိန်းနိုင်ငံထဲသို့ ၃၆ နာရီကြာ အလည်အပတ် ခရီးစဉ်အဖြစ် ရောက်ရှိခဲ့ပြီးနောက် အရပ်ဘက် နည်းပညာ ကဏ္ဍအနေဖြင့် ကိယက်ဗ်၏ ကာကွယ်ရေးအတွက် အရေးကြီးကြောင်း သတင်းထောက်များနှင့် တွေ့ဆုံစဉ် ပြောကြားခဲ့သည်။

ပြီးခဲ့သည့် ဖေဖော်ဝါရီ ၂၄ ရက်က ရုရှားတပ်များ ယူကရိန်းနယ်မြေထဲသို့ ကျူးကျော် ထိုးဖောက်ပြီး နောက် တစ်ရက်တွင် နည်းပညာ၏ အထောက်အကူပြုမှုကို သက်သေပြနိုင်ခဲ့သည်။

ရုရှားဟက်ကာများ လက်ချက်ကြောင့် အချိန်အတန်ကြာ ရပ်တန့်ခဲ့ရသော ယူကရိန်းအစိုးရ ယန္တရားအတွင်း IT ပိုင်း လုပ်ငန်းဆောင်တာများကို ပြန်လည် လည်ပတ်စေရန်နှင့် ကာကွယ်နိုင်ရန် အရေးကြီးသော ခြေလှမ်းတစ်ရပ် ကို ယူကရိန်းဥပဒေပြုလွှတ်တော်က တညီတညွှတ်တည်း သဘောတူ လက်ခံခဲ့ကြသည်။

ယူကရိန်းစစ်သားများကိုတွေ့ရစဉ် (AFP)

“စစ်ဖြစ်ပြီး နောက်တစ်ရက်မှာပဲ သူတို့ လွှတ်တော် အစည်းအဝေးလုပ်ပြီး အဲဒီဥပဒေကို ပြောင်းလိုက်ကြတယ်။ သူတို့ အချက်အလက် (data) တွေအားလုံးကို ကိယက်ဗ်မြို့တော်မှာရှိတဲ့ အစိုးရ server တွေကနေ cloud ထဲကို ရွှေ့လိုက်ကြတယ်။ လူတိုင်းကို မှန်ကန်တဲ့လုပ်ရပ်တွေ လုပ်မိစေဖို့ ဒီစစ်ပွဲကနေ နိုင်ငံရေးအကြောင်း ပြချက်တစ်ခု ပေးခဲ့တယ်” ဟု ရှမစ်က ရှင်းပြသည်။

အမေရိကန် နည်းပညာလုပ်ငန်းရှင် ဘီလီယံနာ အီလွန်မက် (Elon Musk) သည် ၎င်း၏ Starlink ဂြိုဟ်တုအခြေခံ broadband စနစ်ထဲသို့ ဝင်ရောက်သုံးစွဲနိုင်ရန် လှူဒါန်းမှုနှင့်အတူ အမေရိကန်နှင့်ယူကရိန်း စစ်တပ်တို့ကို ရုရှား၏ ဆက်သွယ်ရေး ကွန်ရက်မှတစ်ဆင့် တိုက်ခိုက်ခြင်းကို ထိရောက်စွာ အကာအကွယ် ပေးနိုင်ခဲ့ခြင်းမှာလည်း ဒုတိယ မြောက် အရေးကြီးသော ခြေလှမ်းဖြစ်ခဲ့သည်။

Musk နှင့် အလှူရှင်များသည် ယူကရိန်းဘက်မှ နေ့စဥ်ထုတ်လွှင့် တင်ဆက်နိုင်အောင် ပံ့ပိုးပေးခဲ့သည့်အပြင် တိုက်ခိုက်ရေးသမားများကို ပစ်မှတ်ထား၍ အချက်အလက်များ ကူညီပေးနိုင်သည့် ပန်းကန်ပြားအရွယ် အင်တင်နာငယ်များဖြင့် မြေပြင် gateway ၂ သောင်းခန့်ဖြင့် အင်တာနက် ဝန်ဆောင်မှုပေးခဲ့သည်။

ထိုပံ့ပိုးမှုသည် ရုရှားတို့၏ အဓိကစစ်ရေး ရည်မှန်းချက်ကို ချိုးဖျက်တွန်းလှန်နိုင်ခဲ့သည်။

Source: South China Morning Post

CNI International News

ပိုခါရာ၊ ဇန်နဝါရီ ၁၆

နီပေါနိုင်ငံတွင် တနင်္ဂနွေနေ့၌ လေယာဉ်ပျက်ကျမှုတစ်ခု ဖြစ်ပွားခဲ့ကာ ၆၈ ဦး သေဆုံးပြီး ၄ ဦး ပျောက်ဆုံးနေဆဲ ဖြစ်သည်ဟု အေပီသတင်းတွင် ဖော်ပြထားသည်။

အပန်းဖြေမြို့ဖြစ်သော ပိုခါရာမြို့တွင် အသစ်ဖွင့်လှစ်ထားသော လေဆိပ်သို့ ဆင်းသက်စဉ် ပျက်ကျခဲ့ခြင်းဖြစ်ပြီး လေယာဉ်ပေါ်တွင်လူ ၇၄ ဦး ပါဝင်ကြောင်း၊ လေယာဉ်သည် ချောက်ထဲသို့ ပျက်ကျခဲ့ခြင်း ဖြစ်ကြောင်း နီပေါအရပ် ဘက် လေကြောင်း ထိန်းချုပ်ရေးက ပြောသည်။

ယင်းသည် ဆယ်စုနှစ်သုံးခုအတွင်း နီပေါတွင် လူသေဆုံးမှု အများဆုံး လေယာဉ်ပျက်ကျမှု ဖြစ်ရပ်လည်း ဖြစ်သည်။

လေယာဉ်ပျက်ကျမှုမှ သေဆုံးသူများအား ရှာဖွေနေမှုကို တနင်္ဂနွေနေ့ မှောင်ချိန်တွင် ရပ်နားလိုက်ပြီး တနင်္လာနေ့ တွင် ဆက်လက် ရှာဖွေသွားမည်ဟု တာဝန်ရှိသူများက ပြောသည်။

နီပေါလေယာဉ်ပျက်ကျမှု အလောင်းများ သယ်ထုတ်နေစဉ်(AP)

အခင်းဖြစ်ရာတွင် မီးလောင်နေဆဲ ဖြစ်ပြီး မီးခိုးများ ထွက်ပေါ်နေမှုကြောင့် ရှာဖွေရေး လုပ်ငန်းများတွင် အခက်အခဲ များ ရှိနေသည်ဟု ဒေသခံတစ်ဦးက ပြောသည်။ လက်ရှိအချိန်အထိ လေယာဉ်ပျက်ကျရသည့် အကြောင်းအရင်း ကို မသိရသေးပေ။

စတင် ဆင်းသက်ချိန်တွင် လေယာဉ်သည် အထိန်းအချုပ်မဲ့နေခဲ့ကာ နောက်ဆုံးတွင် ချောက်တွင်းသို့ ပျက်ကျသွား ခဲ့သည်ဟု မျက်မြင် တွေ့ခဲ့သူတစ်ဦးက ပြောသည်။ လေယာဉ်ပျက်ကျမှု မဖြစ်ပွားခင် မနက် ၁၀ နာရီ ၅၀ မိနစ် တွင် ဆီတီဂျော့ (Seti Gorge) အနီးမှာ နောက်ဆုံး အဆက်အသွယ် ရရှိခဲ့သည်ဟု လေကြောင်း အာဏာပိုင်များက ပြောသည်။

ပျက်ကျခဲ့သော လေယာဉ်သည် အင်ဂျင်နှစ်လုံးတပ် ATR-72 အမျိုးအစားဖြစ်ကာ ထိုလေယာဉ်ကို ကိုနီပေါ၏ ယေတီ (Yeti) လေကြောင်းလိုင်းမှ တာဝန်ယူ ဆောင်ရွက်နေခြင်း ဖြစ်သည်။

ပျက်ကျသည့် လေယာဉ်ပေါ်ပါလာသော ခရီးသည်တစ်ဦး ငိုကြွေးနေစဉ်(AP)

လေယာဉ်သည် မြို့တော်ခေတ္တမန္ဒူ (Kathmandu) မှ ပိုခါရာသို့ ၂၇ မိနစ်ကြာ ခရီးစဉ်ကို ပျံသန်းနေစဉ်အတွင်း ပျက်ကျခဲ့ခြင်းဖြစ်ကာ လေယာဉ်ပေါ်တွင် နိုင်ငံခြားသား ၁၅ ဦး အပါအဝင် ခရီးသည် ၆၈ ဦးနှင့် အမှုထမ်း ၄ ဦး ပါဝင်သည်ဟု အရပ်ဘက် လေကြောင်းအာဏာပိုင်အဖွဲ့က ထုတ်ပြန်သည်။

နိုင်ငံခြားသားများတွင် အိန္ဒိယ ၅ ဦး၊ ရုရှား ၄ ဦး၊ တောင်ကိုရီးယား ၂ ဦးနှင့် အိုင်ယာလန်၊ သြစတြေးလျ၊ အာဂျင် တီးနားနှင့် ပြင်သစ်တို့မှ ပါဝင်ကာ လက်ရှိအချိန်အထိ အသက်ရှင် ကျန်ရစ်သူတစ်ဦးကိုမှ ရှာမတွေ့သေးပေ။

အပျက်အစီးများ အောက်ခြေတွင် အလောင်းများ ရှိနေနိုင်သည်ဟု အာဏာပိုင်များက ယူဆထားကာ မီးခိုးများ ထွက်နေသော လေယာဉ်အပိုင်းအစများနှင့် ရှာဖွေကယ်ဆယ်ရေး လုပ်ဆောင်နေသော နီပေါကယ်ဆယ်ရေး သမားများ၊ စစ်သားများကိုလည်း လူမှုကွန်ယက်ပေါ်တွင် ထွက်ပေါ်လာသည့် ဗွီဒီယိုများတွင် တွေ့မြင်ရသည်။

Source: AP

CNI News

၂၀၂၂ ခုနှစ်၊ စက်တင်ဘာ ၉

Wave Money မှ အေးဂျင့်ဆိုင်များတွင် ငွေသွင်းငွေထုတ် ပြုလုပ်ပါက မှတ်ပုံတင် မဖြစ်မနေ ယူလာရမည်ဟု သတ်မှတ်ခြင်းသည် လုံခြုံရေးအရ ပိုကောင်းသွားသည်ဟု ချစ်ကမ္ဘာ Wave Money အေးဂျင့်ဆိုင်မှ ပြောသည်။

၎င်းက “ကောင်းပါတယ် အဲ့ဒါက လုံခြုံရေးအရ၊ ဘာလို့ဆိုတော့ ထုတ်သွားရင်လည်း ထုတ်သွားတဲ့လူရဲ့ မှတ်ပုံတင် တစ်ခါတည်း ရှိပြီးသားလေ၊ လိမ်လို့ညာလို့မှ မရတာ ၊ ဒီလူကို လွှဲထားရင် ဒီလူဘဲ ထုတ်တယ်ဆိုတဲ့ အကြောင်း ကို ညာလို့ မရတော့ဘူးလေ” ဟု CNI သတင်းဌာနသို့ ပြောသည်။

မိုဘိုင်းလ် ငွေရေးကြေးရေး ဝန်ဆောင်မှုလုပ်ငန်း စည်းမျဥ်းစည်းကမ်းများအရ ငွေလွှဲ၊ငွေထုတ် လုပ်ငန်းစဥ် များ ပိုမို လုံခြုံ စိတ်ချရစေဖို့ Wave Money က လုံခြုံရေး အဆင့်မြှင့်တင် ဆောင်ရွက်ပေးလျှက်ရှိကြောင်း wave Money က စက်တင်ဘာ ၈ ရက်နေ့တွင် သတင်းထုတ်ပြန်ခဲ့သည်။

Wave Money က “ယခုလို အဆင့်မြှင့်တင် လုပ်ဆောင်ချက်များအရ Wave ဆိုင်များမှာ ငွေလွှဲ၊ ငွေထုတ် ဝန်ဆောင်မှု အသုံးပြုသူများ အနေဖြင့် မှတ်ပုံတင်ကို မဖြစ်မနေ ယူလာပြီး အချက်အလက် အပြည့်အစုံကို ဖြည့်စွက်ဖို့ လိုအပ်ပါကြောင်း အသိပေးအပ်ပါတယ်ရှင်။ သို့မှသာ ငွေလွှဲ၊ ငွေထုတ် လုပ်ငန်းစဥ်များ ဆောင်ရွက်နိုင်မှာ ဖြစ်ပါတယ်” ဟု ထုတ်ပြန်ချက်တွင် ပြောထားသည်။

wave money အသုံးပြုသူ ကိုစစ်မှူးဇော်ကတော့ ယခင်ကလို message နှင့် မထုတ်ရတော့ဘဲ မှတ်ပုံတင် ပါမှ ထုတ်၍ရသည်ဟု သတ်မှတ်လိုက်ကြောင့် ငွေလိမ်မှုများ နည်းသွားလိမ့်မည်ဟု ပြောသည်။

Wave Money အသုံးပြုခြင်းတွင် မှတ်ပုံတင်ယူလာရန် ကြေညာထား

၎င်းက “အရင်တုန်းကဆိုရင်လည်း သူတို့က မှတ်ပုံတင်တွေ ဘာတွေလည်း မပေးဘူးလေ။ message လေး က ကျလာတဲ့ဟာလေးတွေနဲ့ အဲ့ဒါလေးနဲ့ ပြလိုက်လို့ရှိရင် အဆင်ပြေသွားတယ်ဆိုတော့၊ မှတ်ပုံတင်ရှိမှ ဆိုပြီး ပြောင်းလဲလိုက်တာတော့ ကောင်းတော့ ကောင်းပါတယ်။ ဘာလို့ဆို ငွေလိမ်တာတွေ ဘာတွေ နည်းနည်း လျှော့ကျသွား တယ်ပေါ့နော်၊ ပြီးတော့ ထုတ်ရတာလဲ လုံခြုံမှုရှိသွားတာပေါ့” ဟု ပြောသည်။

Wave Money တွင် တယ်လီနောမှ ရှယ်ယာ ၅၁ ရာခိုင်နှုန်း ပိုင်ဆိုင်ထားသည်။ သို့သော် တယ်လီနောသည် မြန်မာနိုင်ငံမှ ထွက်ခွာသွားခြင်းကြောင့် ဒေါ်လာ ၅၃ သန်းဖြင့် Yoma အုပ်စုသို့ ရှယ်ယာပိုင်ဆိုင်မှုများကို ရောင်းချရန် ၂၀၂၂ ခုနှစ်၊ ဇန်နဝါရီလပိုင်းက သဘောတူညီမှု ရရှိခဲ့သည်။

Wave Money သည် မြန်မာနိုင်ငံတွင် ငွေလွှဲခြင်းနှင့် ဒစ်ဂျစ်တယ် ငွေပေးချေမှု ဖြေရှင်းချက်များကို ဦးဆောင် နေသည့် ကုမ္ပဏီတစ်ခုဖြစ်ပြီး မြန်မာ့မိုဘိုင်းလ်ဘဏ္ဍာရေး ဝန်ဆောင်မှု စည်းမျဉ်းဥပဒေသစ်အရ ဘဏ် မဟုတ်သော အဖွဲ့အစည်းအဖြစ် ပထမဆုံး လုပ်ကိုင်ခွင့်ရရှိခဲ့ကာ ရိုးမဘဏ်နှင့် တယ်လီနော အုပ်စုတို့ အကြား ၂၀၁၆ ခုနှစ် နိုဝင်ဘာလက ဖက်စပ်လုပ်ငန်းအဖြစ် တယ်လီနော (မြန်မာ) က ရှယ်ယာ ၅၁ ရာခိုင် နှုန်း၊ ရိုးမအုပ်စုဝင် ရိုးမမဟာဗျူဟာ ရင်းနှီးမြှုပ်နှံမှုလီမိတက်(YSIL) က ၄၄ ရာခိုင်နှုန်း၊ ရိုးမဘဏ်က ရှယ်ယာ ငါးရာခိုင်နှုန်းဖြင့် လုပ်ကိုင်ခဲ့ကြခြင်း ဖြစ်သည်။

ထို့နောက်၂၀၂၀ ပြည့်နှစ်တွင် Wave Money အနေဖြင့် ငွေလွှဲခြင်း၊ ငွေပေးချေခြင်းတို့တွင် အမေရိကန် ဒေါ်လာ ၈ ဒသမ ၇ ဘီလျံအထိ ဆောင်ရွက်ပေးခဲ့ကြောင်း၊ လက်ရှိတွင် မြန်မာနိုင်ငံရှိ မြို့နယ်ပေါင်း ၃၀၀ ကျော်တွင် Wave Money ဆိုင်ပေါင်း ၆၅၀၀၀ အထိ ချိတ်ဆက်ထားကြောင်း Wave Money က ထုတ်ပြန် ထားသည့် အချက်အလက်များအရ သိရသည်။

လက်ရှိတွင် တယ်လီနော(မြန်မာ)သည် ၂၀၂၂ ခုနှစ်၊ မတ်လ ၁၈ ရက်တွင် လက်ဘနွန်အခြေစိုက် M1 Group ကို ရောင်းချခဲ့ပြီးနောက် ၂၀၂၂ ခုနှစ်၊ ဇွန်လ ၈ ရက်တွင် အက်တမ်(Advancing Telecommunications of Myanmar )ဟု အမည်ပြောင်းလဲခဲ့သည်။

CNI International News

ဘန်ကောက်၊ဇန်နဝါရီ ၁၃

လူမှုကွန်ယက် အကောင့်များကို ဟက်မှုဖြင့် စင်္ကာပူနိုင်ငံမှ ထွက်ပြေးလာသော စင်္ကာပူနိုင်ငံသား ဟက်ကာတစ်ဦး ကို ဘန်ကောက်မြို့တွင် ထိုင်းအာဏာပိုင်များက ဖမ်းဆီးလိုက်သည်ဟု ဘန်ကောက်ပို့စ် သတင်းတွင် ဖော်ပြထား သည်။

အသက် ၃၂ နှစ်အရွယ် အွန်ဂျန်ချန်န်(Ong Jian Zhen) ဆိုသူကို ထိုင်းရဲတပ်ဖွဲ့က ကြာသပတေးနေ့တွင် ထိုင်းနိုင်ငံ၊ ဘန်ကောက်မြို့ ဟွေကွမ်(Huai Kawang) ခရိုင်တွင် ဖမ်းဆီးခဲ့ခြင်း ဖြစ်သည်။

၎င်းနှင့်အတူ အသက် ၂၈ နှစ်အရွယ် ထိုင်းအမျိုးသမီး အနန်ယာလတ် ချူယန်ဂျိုင်း (Ananyalak Chuenjai) ဆို သူကိုလည်း ၎င်းတို့ တိုက်ခန်းအတွင်း ခရစ္စတယ်မက်သာဖက်တမင်း တစ်ထုပ်၊ ကတ်တမင်း နှစ်ထုပ်နှင့် Erimin 5 ဟုခေါ်သော မူးယစ်ဆေးတစ်ထုပ်တို့ တွေ့ရှိခဲ့ခြင်းကြောင့် ဖမ်းဆီးခဲ့သည်။

ထို့နောက် အီလက်ထရွမ်းနစ် ချိန်စက်တစ်ခုနှင့် ဘဏ်အကောင့် နှစ်ခုတို့ကိုလည်း ရှာဖွေတွေ့ရှိခဲ့သည်။

အွန်ဂျန်ချန်သည် ပတ်စပို့စ် အတု အသုံးပြုခြင်းကြောင့် ထိုင်းတရားရုံးတစ်ခုက ဝရမ်းထုတ် ခံထားရသူ တစ်ဦး ဖြစ်သည်ဟု ထိုင်းရဲအရာရှိ ဖာဒွန်ချန်ဒွန်း (Phadol Chandorn)က ပြောသည်။

စင်္ကာပူဟက်ကာကို ဖမ်းဆီးရာမှာ မူးယစ်ဆေးများလည်းတွေ့ရစဉ်(GETTY IMAGES)

အွန်ဂျန်ချန်သည် အွန်လိုင်းမှ ပစ္စည်းများကို ဝယ်ယူရန် တခြားသူများ၏ အကောင့်များအား ဟက်ခဲ့သူဖြစ်သည်။ ၎င်းကြောင့် လူများစွာ ထိခိုက်နစ်နာခဲ့သဖြင့် စင်္ကာပူရဲတပ်ဖွဲ့မှ ချန်(အွန်ဂျန်ချန်)ကို ဖမ်းဆီးပေးရန် ထိုင်းဘက်သို့ ဆက်သွယ်ခဲ့သည်ဟု ဖာဒွန်က ပြောသည်။

အောက်တိုဘာ ၂၆ ရက်တွင် စင်္ကာပူနိုင်ငံသားတစ်ဦးကို ပတ်စပို့စ် အတူဖြင့် နိုင်ငံတွင်း ဝင်ရောက်ခဲ့မှုအတွက် လူဝင်မှုရဲက ဖမ်းဆီးခဲ့ကြောင်း၊ သို့သော် ၎င်းကို အာမခံဖြင့် ယာယီလွှတ်ပေးခဲ့စဉ် ထွက်ပြေးသွားခဲ့ကြောင်း ဖာဒွန်က ပြောသည်။

ထို့ကြောင့် ထိုင်းရဲတပ်ဖွဲ့က စုံစမ်းစစ်ဆေးမှု လုပ်ဆောင်ခဲ့ရာ ၎င်းပုန်းခိုရာ နေရာကို ရှာဖွေတွေ့ရှိခဲ့ခြင်း ဖြစ်သည်။

၎င်းကို ခြေရာခံ၍ ထိုင်းအမျိုးသမီးနှင့်အတူ အဖမ်းခံခဲ့ရခြင်း ဖြစ်သည်။ ထုတ်ပြန်ထားသော ဝရမ်းအရ အွန်ဂျန်ချန် အား ကနဦး ဖမ်းဆီးခဲ့ခြင်းဖြစ်ပြီး ၎င်းတို့ကို တရားမဝင် မူးယစ်ဆေးဝါး လက်ဝယ် ပိုင်ဆိုင်မှုဖြင့် တရားစွဲဆိုထားကာ တခြားသော ဥပဒေရေးရာများ ဆောင်ရွက်ရန် ဆွတ်သီဆန်ရဲတပ်ဖွဲ့သို့ လွှဲပြောင်းပေးခဲ့သည်ဟု သိရသည်။

Source: ဘန်ကောက်ပို့စ်

နျူကလီးယားစွမ်းအင် ပူးပေါင်းဆောင်ရွက်ရေး နစကနှင့် ရုရှား လက်မှတ်ရေးထိုး

CNI News

၂၀၂၂ ခုနှစ်၊ စက်တင်ဘာ ၆

နျူကလီးယားစွမ်းအင် ပူးပေါင်းဆောင်ရွက်ရေး ရုရှားနိုင်ငံပိုင် အဏုမြူကော်ပိုရှေးရှင်း (Rosatom State Corpo rations)နှင့် နစက၏ သိပ္ပံနှင့်နည်းပညာဝန်ကြီးဌာန၊ လျှပ်စစ်စွမ်းအား ဝန်ကြီးဌာနတို့အကြား စက်တင်ဘာ ၆ ရက်နေ့တွင် သဘောတူညီမှု စာချွန်လွှာ လက်မှတ်ရေးထိုးခဲ့ကြသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ရုရှားနိုင်ငံပိုင် အဏုမြူကော်ပိုရေးရှင်း Rosatom State Corporations ၏ အမှုဆောင်အရာရှိချုပ် Mr.Alexey Evgenievich Likhachev ဦးဆောင်သော အဖွဲ့နှင့် တွေ့ဆုံ၍ နျူကလီးယား စွမ်းအင် နည်းပညာ ပူးပေါင်းဆောင်ရွက်မှု နယ်ပယ်များတွင် အတွေ့အကြုံနှင့် နည်းပညာများကို လေ့လာခွင့်ရရှိနိုင်မည့် အခြေအနေများကို ဆွေးနွေးခဲ့ကြသည်။

ထို့နောက် နှစ်နိုင်ငံ ပြည်သူလူထုအကျိုးရှိစေနိုင်မည့်ကဏ္ဍများ၌ ပူးပေါင်းဆောင်ရွက်နိုင်မည့် အခြေအနေများ၊ နျူကလီးယား စွမ်းအင်ကို နိုင်ငံသူ/သားများ၏ လူမှုဘဝ စီးပွားဖွံ့ဖြိုးတိုးတက်ရေးအတွက် ငြိမ်းချမ်းစွာ အသုံးပြု နိုင်ရန် ပူးပေါင်းဆောင်ရွက်မှုအတွက် လုပ်ငန်းစဉ်များ(Road Map)ချမှတ်ဆောင်ရွက်မည့် အစီအစဉ်များကို လည်း ဆွေးနွေးခဲ့ကြောင်း နစကဘက်က ထုတ်ပြန်ခဲ့သည်။

၂၀၂၂ ခုနှစ်၊ စက်တင်ဘာ ၆ ရက်က နစကဥက္ကဋ္ဌနှင့် Mr. Alexey Evgenievich Likhachev တွေ့ဆုံ ဆွေးနွေးကြစဉ်

အလားတူ နျူကလီးယားစွမ်းအင်ကို လျှပ်စစ်ဓာတ်အား ထုတ်လုပ်ရေးကဲ့သို့သော လုပ်ငန်း အပါအဝင် သိပ္ပံနှင့် သုတေသန စမ်းသပ်ခြင်း၊ ဆေးဝါးထုတ်လုပ်ခြင်း၊ စက်မှုကဏ္ဍနှင့် ကဏ္ဍပေါင်းစုံတွင် အကျိုးရှိစွာ အသုံးပြု ဆောင်ရွက်နိုင်မည့် အခြေအနေများကို ဗိုလ်ချုပ်မှူးကြီးမင်းအောင်လှိုင်နှင့် Mr. Alexey Evgenievich Likha chev တို့ ဆွေးနွေးခဲ့ကြသည်။

အဆိုပါ ဆွေးနွေးမှုများ အပြီးမှာတော့ နှစ်ဖက်ရှေ့ဆက်လုပ်ဆောင်သွားမည့် လုပ်ငန်းဆိုင်ရာ သဘောတူညီမှု စာချွန်လွှာ နှစ်ဖက်ကိုယ်စားလှယ်များက လက်မှတ်ရေးထိုးခဲ့ကြသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ဦးဆောင်သည့် ကိုယ်စားလှယ်အဖွဲ့သည် အရှေ့ဖျားစီးပွားရေးဖိုရမ်(EEF) တက်ရောက်ရန် ရုရှားနိုင်ငံသို့ စက်တင်ဘာ ၄ ရက်က ရောက်ရှိလျက်ရှိပြီး စက်တင်ဘာ ၈ ရက်နေ့အထိ ရုရှား ခရီးစဉ် အဖြစ်သွားရောက်ခြင်း ဖြစ်ကြောင်း သိရသည်။

CNI News

၂၀၂၂ ခုနှစ်၊ နိုဝင်ဘာ ၁၉

ရန်ကုန်မြို့၌ Nuclear Technology Information Center တည်ထောင်ဖွင့်လှစ်ရန် ရုရှားနိုင်ငံပိုင် အဏုမြူစွမ်း အင် ကော်ပိုရေးရှင်း (ROSATOM)နှင့် မြန်မာနိုင်ငံ၏ သိပ္ပံနှင့်နည်းပညာဝန်ကြီးဌာနတို့ ပူးပေါင်းဆောင်ရွက်ရေး သဘောတူညီချက် လက်မှတ်ရေးထိုးခဲ့ကြသည်။

နစက၏ သိပ္ပံနှင့်နည်းပညာဝန်ကြီးဌာနမှ ပြည်ထောင်စုဝန်ကြီး ဒေါက်တာမျိုးသိန်းကျော် ဦးဆောင်သည့် ကိုယ်စားလှယ်အဖွဲ့သည် ၂၀၂၂ ခုနှစ်၊ နိုဝင်ဘာ ၁၈ ရက်က ရုရှားနိုင်ငံ၊ Sanit Petersburg ရှိ Nuclear Technology Information Center သို့ သွားရောက် လေ့လာပြီးနောက် အထက်ပါအတိုင်း သဘောတူ လက်မှတ်ရေးထိုးခဲ့ကြခြင်း ဖြစ်သည်။

သို့သော် မည်သည့် အချိန်ကာလတွင် တည်ထောင်ဖွင့်လှစ်သွားမည်ဆိုသော အခြေအနေကိုတော့ နစက၏ ထုတ်ပြန်ချက်တွင် ဖော်ပြမထားပေ။

CNI International News

၂၀၂၂ ခုနှစ်၊ ဇွန်လ ၁၅

IE ဟု အတိုကောက် ခေါ်ခဲ့ကြသည့် Internet Explore ကို ၎င်း၏မိခင် ကုမ္ပဏီဖြစ်သော မိုက္ကရိုဆော့ဖ်က ယခုဇွန်လ ၁၅ ရက် မှစ၍ နည်းပညာအရ ဆက်လက်ပံ့ပိုးခြင်း၊ အဆင့်မြှင့်တင်ခြင်း ပြုတော့မည် မဟုတ်ကြောင်း အေပီသတင်းအရ သိရသည်။

IE က သုံးစွဲသူအချို့က မနှစ်သက်ကြသော်လည်း စွဲလန်းနှစ်ခြိုက်သူ အချို့ကတော့ ရှိနေဆဲဖြစ်သည်။ သက်တမ်း ၂၇ နှစ်ရှိ အဆိုပါ IE app သည် ယနေ့တွင် နည်းပညာသမိုင်း၏ အမှိုက်ပုံးထဲသို့ Black Berry ဖုန်းများ၊ dial-up modems, Palm Pilots တို့နှင့်အတူ ရောက်ရှိသွားပြီ ဖြစ်သည်။

စင်စစ်အားဖြင့် IE ရပ်တန့် သွားခြင်းသည် အံ့ဩစရာတော့ မဟုတ်ပေ။ ပြီးခဲ့သည့် နှစ်ကတည်းက IE ကို ၂၀၂၂ ခုနှစ်၊ ဇွန်လ ၁၅ ရက်တွင် ရပ်တန့်မည်ဟု မိုက္ကရိုဆော့ဖ်က ကြေညာခဲ့ပြီး ၂၀၁၅ ခုနှစ်၌ စတင် ထုတ်လုပ်ခဲ့သော ၎င်း၏ Edge browser ကို လူသုံးပိုများအောင် တွန်းအား ပေးသွားမည် ဖြစ်ကြောင်း ပြောခဲ့သည်။

“မိုက္ကရိုဆော့ဖ်၏ Edge သည် IE ထက် ပိုမိုမြန်ဆန်၊ ပိုမိုလုံခြုံပြီး ခေတ်မီသော ရှာဖွေမှု ပေးစွမ်းရုံသာမက အတိတ်က အဖြစ် အပျက်ဟောင်းများ၊ အမွေအနှစ် ဝက်ဘ်ဆိုက်များနှင့် App များအတွက် ဟန်ကျညီညီ သုံးစွဲနိုင်မည် ဖြစ်ကြောင်း” မိုက္ကရို ဆော့ဖ် Edge လုပ်ငန်း၏ အထွေထွေမန်နေဂျာ ရှောင်လင်ဒါဆေးက ၂၀၂၁ ခုနှစ်၊ မေလတွင် ဘလော့ပို့စ် တစ်ခု၌ ပြောကြားခဲ့ သည်။

IE ကို လက်ခံကြသူ အချို့ကတော့ တွစ်တာ လူမှုကွန်ရက်ကို IE ဖြင့် သုံးစွဲရခြင်း အတွေ့အကြုံများကို အမှတ်တရ ရှိနေကြပြီး "bug-ridden, insecure POS" (သို့မဟုတ်) အခြား brower များကို စက်ထဲထည့်ဖို့ အားကိုးသုံးစွဲရသည့် browser အဖြစ် အသိအမှတ် ပြုကြသည်။

IE အမှတ်တံဆိပ်

အနှစ် ၂၀ ကျော် ထိတွေ့ခဲ့ရသည့် IE ရပ်တန့် သွားခြင်းအတွက် စိတ်မကောင်း ဖြစ်ရကြောင်း ဝေါစထရိဂျာနယ်က ရေးသား ဖော်ပြခဲ့သည်။

အင်တာနက် သုံးရန်အတွက် လူကြိုက်များသော browser အဖြစ် Netscape ကို မိုက္ကရိုဆော့ဖ်က ၁၉၉၅ ခုနှစ်တွင် ပထမဆုံး ထုတ်လုပ်ခဲ့ပြီး Netscape Navigator ဟူ၍ တစ်ခေတ်တစ်ခါက ကွန်ပျူတာ သုံးစွဲသူများအကြား ရေပန်းစား၍ လွှမ်းမိုးခဲ့ သည်။

ထို့နောက် IE ကို ဝင်းဒိုးစ်နှင့်အတူ အခိုင်အမာ ဖြန့်ဝေပေးခဲ့ရာ သုံးစွဲသူ အများအပြားက Netscape အစား IE ကို ပြောင်းလဲ သုံးစွဲလာခဲ့ ကြသည်။

IE ကို ဝင်းဒိုးစ်နှင့် ချိတ်ဆက် သုံးစွဲခြင်းအတွက် Mozilla ၏ Firefox, Opera နှင့် Google ၏ Chrome ပြိုင်ဘက်များအတွက် တရားမျှတမှုမရှိသော အားသာချက်ကို မိုက္ကရိုဆော့ဖ်က ပေးခဲ့ကြောင်း ဥရောပတွင် အငြင်းပွားခဲ့ကြသည်။

တစ်ချိန်တည်းမှာ IE သည် နှေးကွေးကြောင်းနှင့် စက်ထဲမှ အချက်အလက်များ hack ခံနိုင်ရခြေ ရှိကြောင်း စောဒကတက်ခဲ့ ကြသည်။

၂၀၂၀ ပြည့်နှစ် မတိုင်မီက ဈေးကွက်ဝေစု ၉၀ ရာခိုင်နှုန်းကျော် ရှိခဲ့သည့် IE သည် သုံးစွဲသူများ အကြားတွင် ၎င်းထက် ပို၍ ရွေးချယ်စရာများ အသစ်အသစ် ထွက်ပေါ်လာနေခြင်းကြောင့် မှေးမှိန်လာခဲ့သည်။

ယနေ့ခေတ်တွင် Chrome က ကမ္ဘာတလွှား browser များ ဈေးကွက်၏ ၆၅ ရာခိုင်နှုန်း ရှယ်ယာကို လွှမ်းမိုးထားပြီး Apple ၏ Safari က ၁၉ ရာခိုင်နှုန်းဖြင့် ရပ်တည်နေကြောင်း အင်တာနက် ခွဲခြမ်းစိတ်ဖြာ သုံးသပ်ပေးသည့် Statcounter ကုမ္ပဏီ၏ အဆိုအရ သိရသည်။

Source: AP