- By CNI
- Category: နိုင်ငံရေး
- Hits: 932
CNI News
၂၀၂၄ ခုနှစ်၊ ဧပြီ ၂၂
ဖက်ဒရယ်ဒီမိုကရေစီနည်းလမ်းတကျ တန်းတူရေးနှင့် ကိုယ်ပိုင်ပြဋ္ဌာန်းခွင့်တို့ဖြင့် အောက်ခြေမှ စတင်သော အုပ်ချုပ်မှု ပြုပြင်ပြောင်းလဲရေးကို စတင်ဆောင်ရွက်နေပြီဖြစ်ကြောင်း သျှမ်းပြည်ပြန်လည်ထူထောင်ရေး ကောင်စီ (RCSS) က ယနေ့ (ဧပြီ ၂၂ ရက်)မှာ ထုတ်ပြန်ခဲ့သည်။
RCSS ဥက္ကဋ္ဌ ဗိုလ်ချုပ်ကြီး ယွက်စစ်က ၎င်းတို့ အဖွဲ့အစည်း ထိန်းချုပ်ရာ နယ်မြေအတွင်း ဒေသခံလူထုနှင့် တွေ့ဆုံခဲ့သလို တပ်မဟာနယ်မြေအသီးသီးတွင် စစ်ပညာသင်ယူနေကြသော တပ်သားသစ်များအား တွေ့ဆုံကာ ခရီးစဉ်၏ ရည်ရွယ်ချက်ကိုပါ ဖော်ဆောင်ခဲ့ကြောင်း ဖော်ပြထားသည်။
RCSS က “သျှမ်းပြည်ပြန်လည်ထူထောင်ရေးကောင်စီ (RCSS) အနေဖြင့် ဒေသတွင်း တည်ငြိမ်ရေး၊ ဖက်ဒရယ် ဒီမိုကရေစီ နည်းလမ်းတကျ တန်းတူရေးနှင့် ကိုယ်ပိုင်ပြဋ္ဌာန်းခွင့်တို့ဖြင့် အောက်ခြေမှ စတင်သော အုပ်ချုပ်မှု ပြုပြင်ပြောင်းလဲရေးကို စတင်ဆောင်ရွက်နေပြီဖြစ်ပြီး ထိုသို့ ဆောင်ရွက်ရာတွင် တပ်မတော် အပါအဝင် သက်ဆိုင် ရာ လူမျိုးစုများ၊ အစုအဖွဲ့များမှ ပူးပေါင်း ပါဝင်လိုသူများကို ဖိတ်ခေါ်ကြိုဆိုလျက်ရှိကြောင်း” ထုတ်ပြန်ခဲ့သည်။
အကြောင်းအမျိုးမျိုးကြောင့် သျှမ်းပြည်တပ်မတော်တွင် စစ်မှုထမ်းရန်နှင့် စစ်ပညာကို လာရောက် သင်ယူနေကြ သော လူငယ်လူရွယ်များအား ကောက်ရိုးမီးကဲ့သို့ မဖြစ်စေဘဲ မိမိတို့၏ အမျိုးသားရေးဆိုင်ရာ တာဝန်များ၊ သျှမ်းပြည်နှင့် ဇာတိရပ်ရွာအပေါ် တန်ဖိုးထားမှုများ မှန်ကန်စွာ သိမြင်လာရန်၊ မိမိကိုယ်ကိုနှင့် မိမိရပ်ရွာကို ကိုယ်တိုင်ကာကွယ်နိုင်သည်အထိ အခြေခံစစ်ပညာအား သင်ကြားရန်များ ပါရှိသည်။
RCSS ရဲ့ စစ်သင်တန်းသားတွေကိုတွေ့ရစဉ်
လူသေဆုံးမှု၊ နေအိမ်မီးလောင်ပျက်စီးမှု မရှိဘဲ နိုင်ငံရေးအရ ငြိမ်းချမ်းရေး တွေ့ဆုံဆွေးနွေးပြီး နယ်မြေများ ရယူ၍ ရကြောင်းကို ပြသခြင်းဖြစ်ကြောင်း၊ ၎င်းနယ်မြေအတွင်း အုပ်ချုပ်ရေးယန္တရားများ စတင်နိုင်ခြင်းကိုလည်း သေနတ်မဖောက်ဘဲ ပြသခြင်းဖြစ်ကြောင်း ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) မှ နာယက ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။
၎င်းက “အဲဒါကတော့ ရှင်းပါတယ်၊ လက်နက်ကိုင်ပြီးတော့ တိုက်နေတဲ့ လူတွေကို ပညာပေးလိုက်တာပေါ့ဗျာ၊ သွယ်ဝိုက်တဲ့နည်းနဲ့ ပညာပေးလိုက်တာပေါ့၊ လက်နက်နဲ့ မတိုက်ဘဲနဲ့ သေနတ်မဖောက်ဘဲနဲ့ နယ်မြေတွေကိုလည်း သူရထားပါတယ်လို့ အဲဒါ သူပြတာပါ့၊ မြောက်ပိုင်းမဟာမိတ်တွေလည်း တိုက်ပြီးတော့ ရထားတယ်၊ ကရင်နီဆို လည်း တိုက်ပြီးတော့ ရထားတယ်၊ လူသေပျောက်တယ်၊ ရပ်ရွာမီးလောင်တယ်၊ KNU ဆိုရင်လည်း တိုက်နေရ တယ်၊ ကျန်တဲ့ဒေသတွေမှာလည်း ဒီလိုပဲ တိုက်နေရတယ်၊ မီးတွေလောင်တယ်၊ လူတွေ သေတယ်၊ နယ်မြေတချို့ ရတယ်၊ အခုသူသေနတ်မဖောက်ဘဲနဲ့ လင်းခေးခရိုင်တို့ ခရိုင်သုံးခုလောက် မိုင်းပန်တို့၊ မိုင်းပြင်းတို့၊ ဟိုဖက် မိုင်းရှုး တို့အထိ နယ်မြေတွေကို သေနတ်မဖောက်ဘဲနဲ့ သူရလိုက်တယ်ဆိုတဲ့ဟာကို တစ်ဖက်လှည့် ကြွားပြတာလည်း ပါတယ်၊ အဲဒီမှာ သူ့အုပ်ချုပ်ရေးတွေ လိုက်ချနေတာဆိုတာလည်း သူပြောတာပါတယ်။ အဲဒါတွေအားလုံး ထောက်ရှု့လိုက်ရင် ဒီလိုပုံစံပေါ့၊ အပစ်အခတ်ရပ်စဲရေး လုပ်ပြီးတော့ ငြိမ်းချမ်းရေး ဆွေးနွေးနေတဲ့ ပုံစံမှာလည်း နယ်မြေတွေကို သိမ်းလို့ရတယ်၊ ဥပမာ ကရင်နီမှာ ဒေသအုပ်ချုပ်ရေးတွေ လုပ်မယ်ပြောတယ်၊ ဒါပေမဲ့ လူတွေက စစ်ပြေး၊ စစ်ရှောင် စစ်မီးကလောင် အခုသူသွားတဲ့ နယ်မြေမှာ စစ်မီးမရှိဘူး။ ပဋိပက္ခမရှိဘူး၊ လက်နက်ကိုင် မရှိဘူး။ သို့သော် အဲဒီနယ်မြေတွေက သူ့နယ်မြေဖြစ်တယ်လို့ ပထမအစ စာရဲ့အပိုဒ်ထိပ်မှာကိုက ထည့်ထား တယ်” ဟု ပြောသည်။
ထိုကဲ့သို့ ထုတ်ပြန်လိုက်ခြင်းကြောင်း RCSS အုပ်ချုပ်ရေးနယ်မြေအတွင်း ဝင်ရောက်လာမည့် အခြားသော တိုင်းရင်းသားလက်နက်ကိုင်တပ်ဖွဲ့များကိုလည်း ဟန့်တားလိုက်ခြင်းဖြစ်ကြောင်း ဗိုလ်မှူးကြီးခွန်ဥက္ကာက ထောက်ပြသည်။
ဗိုလ်ချုပ်ကြီးယွက်စစ်နဲ့ RCSS ရဲဘော်တွေကိုတွေ့ရစဉ်
ဖြတ်သန်းခဲ့သော နိုင်ငံရေးဆွေးနွေးပွဲများမှ ထွက်ပေါ်လာသည့် ပြည်ထောင်စုအဆင့်၊ ပြည်နယ်အဆင့် သဘောတူညီချက်များကို လက်တွေ့ စတင်အကောင်အထည် ဖော်ဆောင်ရန်၊ ဒေသန္တရအဆင့်မှ အခြေခံတကျ ပြင်ဆင်သွားရန်များ ပါရှိသည်။
RCSS ဥက္ကဋ္ဌ ဗိုလ်ချုပ်ကြီးယွက်စစ်၏ ခရီးစဉ်အတွင်း အခြေခံစစ်ပညာသင်တန်းမှာ တပ်သားသစ် ၆၀၀၀ ဦး၊ ကျေးရွာ ၃၃ ရွာမှ ဒေသခံလူထုများနှင့် တွေ့ဆုံခဲ့ကြောင်း ထုတ်ပြန်ချက်တွင် ဖော်ပြထားသည်။
သျှမ်ပြည်ပြန်လည်ထူထောင်ရေးကောင်စီ (RCSS) သည် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူ စာချုပ် (NCA) ကို လက်မှတ်ရေးထိုးထားသော ရှမ်းလက်နက်ကိုင်တပ်ဖွဲ့ဖြစ်ပြီး လွယ်တိုင်းလျန်တွင် ဌာနချုပ် ထားရှိကာ လင်းခေး၊ မိုင်းပန်း၊ မိုင်းရှုး၊ လွိုင်လင်၊ ပန်လုံ၊ ခိုလမ်၊ လဲချား၊ မိုင်းကိုင်၊ တန့်ယန်း၊ မိုင်းရယ်၊ သီပေါ စသဖြင့် အခြေပြု လှုပ်ရှားလျက်ရှိကြောင်း သိရသည်။
- By CNI
- Category: နိုင်ငံရေး
- Hits: 259
CNI News
၂၀၂၄ ခုနှစ်၊ ဧပြီ ၁၇
စစ်ကိုင်းတိုင်းဒေသကြီး၊ ဟုမ္မလင်းခရိုင်အတွင်းရှိ ရှမ်းနီဒုလ္လဘရဟန်းအပါး ၁၂၁ ပါးကို ရှမ်းနီအမျိုးသားများ တပ်မတော်(SNA)က နံနက်ခင်း ဆွမ်းလောင်းလှူနေသည်ကို တွေ့ရှိရသည်။
မြန်မာ့နှစ်သစ်ကူးကာလ သင်္ကြန်တွင်းမှာ ရှမ်းနီတိုင်းရင်းသား ၁၂၁ ဦးကို SNA က ဒုလ္လဘရဟန်းခံပေးခဲ့ခြင်း ဖြစ်ကြောင်း သိရသည်။
SNA သည် စစ်ကိုင်းတိုင်းဒေသကြီးနှင့် ကချင်ပြည်နယ်အတွင်း ကွဲပြားစွာ ဖြစ်တည်နေသော ရှမ်းနီဒေသများကို ပြန်လည်စုစည်း၍ ရှမ်းနီပြည်နယ် ရရှိရေး ကြိုးပမ်းနေသလို တိုင်းရင်းသား တန်းတူညီမျှအခွင့်အရေးများ ရရှိရေး ကြိုးပမ်းလျက်ရှိသော ရှမ်းနီလက်နက်ကိုင်ဖြစ်သည်။
- By CNI
- Category: နိုင်ငံရေး
- Hits: 315
CNI News
၂၀၂၄ ခုနှစ်၊ ဧပြီ ၁၇
ဘယ်လိုစိန်ခေါ်မှုမျိုးကိုမဆို ရင်ဆိုင်ပြီး စီးပွားရေးတိုးတက်အောင်လုပ်မည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။
၂၀၂၄ ခုနှစ်၊ ဧပြီ ၁၇ ရက်တွင် ကျရောက်ခဲ့သော မြန်မာ့နှစ်သစ်ကူးကာလ နှစ်ဆန်းတစ်ရက်နေ့မှာ ၎င်းက ပြောကြားခဲ့သည်။
ဗိုလ်ချုပ်မှူးကြီးမင်းအောင်လှိုင်က “ ကျနော်တို့ မြန်မာနိုင်ငံအနေဖြင့် ပြီးခဲ့တဲ့ နှစ်ဟောင်းကာလအတွင်းမှာ ကြုံတွေ့ခဲ့ရတဲ့ အခက်အခဲနှင့် စိန်ခေါ်မှုများကို ရင်ဆိုင်ကျော်လွှားနိုင်ခဲ့ကြပြီးဖြစ်ပါတယ်။ ယခုနှစ်သစ်မှာလည်း ကျနော်တို့ အစိုးရအနေနဲ့ ပြည်သူအားလုံးရဲ့ ဇွဲ၊ သတ္တိ၊ ခိုင်မာတဲ့ ယုံကြည်ချက်တို့နဲ့အတူ ဘယ်လိုစိန်ခေါ်မှုမျိုး ကိုမဆို အောင်မြင်အောင် ဆက်လက်ရင်ဆိုင်သွားမှာဖြစ်ပါတယ်”ဟု ပြောသည်။
မိမိတို့အစိုးရအနေဖြင့် နိုင်ငံသားအားလုံး၏ လူမှုစီးပွားဘဝတိုးတက် ကောင်းမွန်စေဖို့အတွက် လိုအပ်သည့် အရင်းအမြစ်များ၊ စီမံခန့်ခွဲမှုများ၊ နည်းလမ်းများကို အသုံးပြုပြီး ဆောင်ရွက်သွားမည်ဟု ၎င်းက ပြောသည်။
ဗိုလ်ချုပ်မှူးကြီးမင်းအောင်လှိုင်က “ တစ်ဆက်တည်းမှာပဲ နိုင်ငံ့စီးပွားရေးမြှင့်တင်နိုင်ဖို့အတွက်လည်း ကုန်ထုတ် လုပ်မှု နယ်ပယ်အားလုံးက ကြိုးစားဆောင်ရွက်ကြစေလိုပါတယ်။ အခက်အခဲ အကျပ်အတည်း မျိုးစုံကြားက နိုင်ငံ့စီးပွားအတိုင်းအတာတစ်ခုအထိ တိုးတက်အောင် ဆောင်ရွက်နိုင်ခဲ့ပါတယ်။ ပိတ်ဆို့တားဆီးမှု အပါအဝင် အခက်အခဲအချို့သာ မရှိခဲ့ရင် နိုင်ငံ့စီးပွားဟာ ဒီထက်မက များစွာတိုးတက်နေမှာဖြစ်တယ်လို့ ကျနော်ယုံကြည် ပါတယ်”ဟု ပြောသည်။
တည်ငြိမ်းအေးချမ်းမှသာ ဖွံ့ဖြိုးတိုးတက်ရေး လုပ်ငန်းများကို ဆောင်ရွက်နိုင်မှာဖြစ်သည့်အတွက် မိမိတို့အစိုးရ အနေဖြင့် နိုင်ငံ၏ငြိမ်းချမ်းရေးကို ရေတိုကာလအတွက်မဟုတ်ဘဲ အနာဂတ် မျိုးဆက်များအထိ တည်တံ့နေ သည့် ထာဝရငြိမ်းချမ်းရေးရရှိဖို့ ကြိုးပမ်းဆောင်ရွက်နေသည်ဟု ၎င်းက ပြောသည်။
လက်ရှိ မြန်မာနိုင်ငံတွင် မြန်မာ့တပ်မတော်နှင့် တိုင်းရင်းသားလက်နက်ကိုင်များ၊ ပြည်သူ့ကာကွယ်ရေးတပ်ဖွဲ့(P DF)များ၊ ဒေသကာကွယ်ရေးတပ်ဖွဲ့(LDF)များကြား တိုက်ပွဲများ ဖြစ်ပွားနေခြင်းကြောင့် နယ်စပ်ကုန်သွယ်ရေး များ ရပ်တန့်နေပြီး ကုန်ဈေးနှုန်းများ ကြီးမြင့်မှုဒဏ်ကို ပြည်သူလူထုက ခံစားနေကြရသည်။
မြန်မာနိုင်ငံသည် တရုတ်၊ ဘင်္ဂလားဒေ့ရှ်၊ ထိုင်း၊ အိန္ဒိယတို့နှင့် နယ်စပ်ကုန်သွယ်ရေးများ လုပ်ဆောင်လျက်ရှိ သော်လည်း လက်ရှိတိုင်ပွဲများကြောင့် အားလုံးနီးပါး ကုန်သွယ်ရေးရပ်တန့်လျက်ရှိသည်။
ထို့နောက် ပြည်တွင်းနိုင်ငံရေး မတည်ငြိမ်မှုကြောင့် အလုပ်အကိုင်များ ရှားပါးနေသလို လုပ်ငန်းရှင်များကလည်း ရင်းနှီးမြှုုပ်နှံမှုအသစ်များ လုပ်ဆောင်ခြင်းမရှိတော့ စီးပွားရေးက ကျဆင်းလျက်ရှိနေသည်။
အဆိုပါ အခြေအနေများကို ရင်ဆိုင်နေရချိန်မှာပဲ နိုင်ငံတကာကလည်း မြန်မာနိုင်ငံနှင့် မြန်မာ့တပ်မတော် အပေါ် စီးပွားရေးပိတ်ဆို့မှုများ ပြုလုပ်နေသလို နိုင်ငံတကာ ငွေကြေးများ သုံးစွဲနိုင်ရေး ကန့်သတ်မှုများလည်း ပြုလုပ်လျက်ရှိနေသည်။
- By CNI
- Category: နိုင်ငံရေး
- Hits: 226
CNI News
၂၀၂၄ ခုနှစ်၊ ဧပြီ ၁၇
မြန်မာ့နှစ်သစ်ကူးကာလ နှစ်ဆန်းတစ်ရက်နေ့ဖြစ်သော ဧပြီ ၁၇ ရက်နေ့တွင် နစကဥက္ကဋ္ဌ ဗိုလ်ချုပ်မှူးကြီးမင်း အောင်လှိုင်က နိုင်ငံခြားသား ၂၈ ဦးကို ပြစ်ဒဏ်လွတ်ငြိမ်းချမ်းသာခွင့်ပေးလိုက်ကြောင်း ထုတ်ပြန်ခဲ့သည်။
အဆိုပါ နိုင်ငံခြားသား ၂၈ ဦးမှာ သီရိလင်္ကာနိုင်ငံသား ၁၅ ဦးနှင့် အင်ဒိုနီးရှားနိုင်ငံသား ၁၃ ဦးတို့ဖြစ်သည်။
- By CNI
- Category: နိုင်ငံရေး
- Hits: 159
- By CNI
- Category: နိုင်ငံရေး
- Hits: 227
CNI News
၂၀၂၄ ခုနှစ်၊ ဧပြီ ၁၅
မန္တလေးတိုင်းဒေသကြီး၊ ပြင်လွင်မြို့အတွင်းသို့ တော်လှန်ရေး အင်အားစုများက ၁၀၇ မမ ရှော့တိုက်ဒုံးများဖြင့် ပစ်ခတ်တိုက်ခိုက်ခဲ့ရာမှာ သံဃာ ၂ ပါး ပျံလွန်တော်မူခဲ့သလို ပြည်သူ ၂ ဦးလည်း သေဆုံးခဲ့ကြောင်း သိရသည်။
၂၀၂၄ ခုနှစ်၊ ဧပြီ ၁၄ ရက်နေ့ သင်္ကြန် အကျနေ့ ညပိုင်းက တော်လှန်ရေးအင်အားစုများက ပြင်ဦးလွင်မြို့ အနောက်ဘက်မှ ပြင်ဦးလွင်မြို့အတွင်းသို့ ၁၀၇ မမ ရှော့တိုက်ဒုံး ၁၁ လုံးဖြင့် ပစ်ခတ်တိုက်ခိုက်ခဲ့သည်။
အဆိုပါ ၁၀၇ မမ ရှော့တိုက်ဒုံးများသည် ပြည်သူ့ဆေးရုံရှိ အရိုးကုသဆောင်၊ အောင်မြေဇေယျာဘုန်းကြီး ကျောင်း၊ Luxury Hotel၊ ရပ်ကွက်ကြီး(၅)၊ ဗလမင်းထင်ရပ်ကွက်နှင့် စံပါယ်ရပ်ကွက်များအတွင်းသို့ ကျရောက် ပေါက်ကွဲခဲ့သည်။
ထို့နောက် အောင်မြေဇေယျာဘုန်းတော်ကြီးကျောင်းတွင် သီတင်းသုံးနေထိုင်သည့် သံဃာ ၁ ပါးနှင့် ဒုလ္လဘ ရဟန်း ၁ ပါးတို့ ပျံလွန်တော်မူခဲ့သလို အရပ်သား ၂ ဦး သေဆုံးပြီး ကလေးငယ် အပါအဝင် လူနာနှင့် ဆေးရုံ ဝန်ထမ်း ၁၁ ဦး အပြင်းအထန် ဒဏ်ရာရရှိခဲ့သည်ဟု နစကဘက်က သတင်းထုတ်ပြန်ခဲ့သည်။
အလားတူ သင်္ကြန် အကျနေ့ (ဧပြီ ၁၄ ရက်)က မန္တလေးမြို့ရှိ မြို့တော်ဝန်သင်္ကြန်မဏ္ဍပ် အနောက်ဘက် ဆိုင်ကယ်ရပ်နားဆောင်တွင် လက်လုပ်မိုင်း ၂ လုံးပေါက်ကွဲခဲ့ပြီး ကလေးငယ် ၅ ဦး အပါအဝင် ဒေသခံ အရပ် သား ၁၂ ဦး ထိခိုက်ဒဏ်ရာများ ရရှိခဲ့သေးသည်။
- By CNI
- Category: နိုင်ငံရေး
- Hits: 431
CNI News
၂၀၂၄ ခုနှစ်၊ ဧပြီ ၁၂
စစ်ကိုင်းတိုင်းဒေသကြီး၊ ခန္တီးမြို့နယ်၊ နန်စီပွန်ဒေသတွင် ကချင်လွတ်လပ်ရေးတပ်မတော်(KIA)က နာဂလူငယ် များနှင့် ရေမဆေးကျောက်ရှာသူများကို ဖမ်းဆီး ခေါ်ဆောင်သွားပြီး စစ်သားစုဆောင်းလျက်ရှိနေကြောင်း ဒေသခံ များက ပြောသည်။
ဧပြီ ၈ ရက်နေ့က နန်စီပွန်ကျေးရွာအနီးက ကျောက်စိမ်းမှော်တွင် ရေမဆေးကျောက်ရှာဖွေသူ အရပ်သား ၅၀ ကျော်အား KIS က ဖမ်းဆီး ခေါ်ဆောင်သွားခဲ့သည်။
ထို့နောက် ဧပြီ ၉ ရက်နေ့တွင် နန်စီပွန်ဒေသ အထက်ဆိပ်ရွာသို့ KIA အဖွဲ့များ ရောက်ရှိလာပြီး နာဂလူငယ် ၁၆ ဦးကို ဖမ်းဆီးခေါ်ဆောင်သွားကြောင်း ဒေသခံများက ပြောသည်။
KIA နဲ့ နန်စီပွန်ကျောက်မှော်ကို တွေ့ရစဉ်
ဖမ်းဆီး ခေါ်ဆောင်သွားခံရသူများမှာ မောင်အိုက်ထုတ် (၂၁ နှစ်)၊ အောင်ကျော်သူ(၂၀ နှစ်)၊ မောင်ရင် (၂၅ နှစ်) ၊ မောင်အနိုင်(၂၁ နှစ်)၊ မောင်သော်သော် (၁၉ နှစ်၊ မောင်ပါခေါင် (၁၈ နှစ်)၊ မောင်မောင် (၃၅ နှစ်)၊ မောင်ပါ ကြောင် (၂၀ နှစ်)၊ မောင်ဇာနည်ထက် (၁၉ နှစ်)၊ မောင်အောင်ကာဆန် (၂၅ နှစ်)၊ မောင်အောင်ကာ (၂၁ နှစ်)၊ မောင်ရဲဝင်း (၂၀ နှစ်)၊ မောင်ဂျွန်ဆန်းဒေး (၃၀ နှစ်)၊ မောင်ရန်နိုင်ထွန်း (၁၇ နှစ်)၊ မောင်ဖန်လိုင် (၂၇ နှစ်)၊ မောင်အောင်မြတ် မင်း (၁၈ နှစ်)တို့ဖြစ်ကြောင်း သိရသည်။
ခန္တီးမြို့နယ်နှင့် နာဂကိုယ်ပိုင်အုပ်ချုပ်ခွင့်ရဒေသတွင် နာဂလက်နက်ကိုင်အဖွဲ့များဖြစ်သည့် နာဂအမျိုးသားဆို ရှယ်လစ်ကောင်စီ-ကပ္ပလန်/ယုံးအောင်(NSCN-K/YA)၊ နာဂအမျိုးသားဆို ရှယ်လစ်ကောင်စီ-ကပ္ပလန်/အန်းမိုင် (NSCN-K/AM)၊ အရှေ့နာဂများကာကွယ်ရေးတပ်မတော်(ENDA/ENNO)၊ KIA၊ SNCN-IM၊ ရှမ်းနီအမျိုးသားများ တပ်မတော်(SNA)တို့ စစ်ရေးလှုပ်ရှားလျက်ရှိသည်။
ENDA/ENNO သည် NSCN ကနေ ထုတ်ပယ်ခံလိုက်ရသူများက KIA ၏ အကူအညီဖြင့် ဖွဲ့စည်းခဲ့ခြင်းဖြစ်ပြီး ဗဟိုဌာနချုပ်ကို KIA ၏ လိုင်ဇာမြို့မှာ တည်ဆောက်ထားသည်။
- By CNI
- Category: နိုင်ငံရေး
- Hits: 389
CNI News
၂၀၂၄ ခုနှစ်၊ ဧပြီ ၁၂
မြန်မာ့နိုင်ငံအတွင်း ဖြစ်ပွားနေသော လက်နက်ကိုင်ပဋိပက္ခ ချုပ်ငြိမ်းအောင် မည်သို့လုပ်ဆောင်သင့်သလဲ ဆိုသည့်အပေါ် ပြည်တွင်း/ပြည်ပ နိုင်ငံရေးအသိုင်းအဝိုင်းကြား ဆွေးနွေးမှုများ ရှိနေသည်။
မြန်မာနိုင်ငံသည် ၁၉၄၈ ခုနှစ်၊ လွတ်လပ်ရေးနှင့်အတူ ပြည်တွင်းလက်နက်ကိုင်ပဋိပက္ခ စတင်ဖြစ်ပွားခဲ့သည်။
ထို့နောက် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က ဖြစ်ပေါ်ခဲ့သော နိုင်ငံရေး အကျပ်အတည်းများကြောင့် လက်နက်ကိုင်ပဋိပက္ခသည် ပိုမိုကျယ်ပြန့်လာပြီး နိုင်ငံတစ်ဝှမ်း တိုက်ပွဲများ ကျယ်ကျယ်ပြန့်ပြန့် ဖြစ်ပေါ်လာခဲ့ သည်။
ဗမာပြည်နယ် အပါအဝင် လူမျိုးကို အခြေခံသည့် ဖက်ဒရယ်စနစ်ဖြင့် သွားရမှာဖြစ်ကြောင်း၊ တိုင်းရင်းသား အခွင့်အရေး၊ ကိုယ်ပိုင်ပြဋ္ဌာန်းပိုင်ခွင့်ရရှိပါက လက်ရှိပဋိပက္ခများ ချုပ်ငြိမ်းသွားမည်ဟု ယူဆကြောင်း စည်းလုံးညီညွတ်သော တိုင်းရင်းသား လူမျိုးများ မဟာမိတ် (UNA) ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။
မြန်မာ့တပ်မတော်ကို တိုက်ခိုက်နေသည့် BPLA ရဲဘော်တွေကိုတွေ့ရစဉ်
၎င်းက “ကျနော်တို့က နဂိုကတည်းကလည်း ဒီပါတီထောင်ကတည်းကလည်း ပြောခဲ့တယ်၊ ကျနော်တို့ ပြည်ထောင်စုကိုကတော့ ဖက်ဒရယ်စနစ်နဲ့ သွားရမယ်၊ အဲဒီမှာကလည်း ကျနော်တို့က လူမျိုးကို အခြေခံတဲ့ ပြည်နယ်တွေပေါ့ဗျာ၊ ဟိုတုန်းကတော့ ၈ ပြည်နယ်၊ အခုကတော့ ၈ အပေါင်းပြည်နယ်ပေါ့၊ တနည်းအားဖြင့် ဗမာလည်း ဖက်ဒရယ်ယူနစ်တစ်ခုယူ တစ်ယူနစ်ယူပေါ့၊ သူလည်း လူမျိုးတစ်မျိုး ဖြစ်တဲ့အတွက် တိုင်းရင်းသား တွေရဲ့ လုပ်ပိုင်ခွင့် အပြည့်အဝ ရှိလာမယ်ဆိုရင် အခုလိုပဲ ဗဟိုက အရာရာကို ကြီးကြပ်ထားတာ မဟုတ်ဘူး။ အုပ်ချုပ်ရေးလည်း သူတို့၊ ကာကွယ်ရေးလည်း သူတို့၊ အစစအရာရာကို အဲဒီလိုမျိုး လုပ်ထားတဲ့ဟာ မဟုတ်ဘဲနဲ့ သူတို့ဟာသူတို့ ဗဟိုက ဗဟိုအဆင့်မှာပဲနေ၊ အရာရာကို ဝင်မစွက်ဖက်တဲ့ အနေအထားမျိုးပေါ့၊ တိုင်းရင်းသားတွေ ကိုယ်၌ကိုယ်က သူ့လူမျိုး၊ သူ့ဒေသမှာ လုပ်ပိုင်ခွင့် အပြည့်အဝရှိတယ်၊ ကိုယ်ပိုင်ပြဋ္ဌာန်းပိုင်ခွင့်ရရင် ဒီကိစ္စဟာ ငြိမ်းအေးသွားလိမ့်မယ်လို့ ထင်တယ်၊ ဒါပေမဲ့ အဲဒီဟာကို အကောင်အထည်ဖော်ဖို့တော့ အချိန်ကာလတစ်ခုတော့ ပေးရပါလိမ့်မယ်” ဟု ပြောသည်။
လက်ရှိတွင် နစကနှင့် NUG တို့က အနာဂတ်တွင် ဖက်ဒရယ်ပြည်ထောင်စု တည်ဆောက်မည်ဟု အသီးသီး ပြောဆိုလျက်ရှိနေသည်။ သို့သော်လည်း မည်ကဲ့သို့သော ဖက်ဒရယ်ပြည်ထောင်စုမျိုးကို တည်ဆောက်မည်ကို တော့ အတိအကျ ပြောဆိုခြင်းမျိုး မရှိသေးပေ။
စစ်အာဏာရှင်စနစ် ရှိနေသေးသမျှ တိုက်ပွဲများ ဆက်ရှိနေမှာဖြစ်ကြောင်း၊ ထို့အတူ လူမျိုးကြီးဝါဒမျိုး ရှိနေသရွေ့ အပြန်အလှန် တွန်းလှန်မှုတွေ ရှိနေမှာဖြစ်ကြောင်း တအာင်းအမျိုးသမီးအဖွဲ့အစည်း (TWO)မှ ပြောရေးဆိုခွင့်ရှိသူ လွေးချီဆငါးက CNI သတင်းဌာနသို့ ပြောသည်။
၎င်းက “ဒီအာဏာရှင်စနစ် ရှိနေသေးသရွေ့ ကျမတို့ မြန်မာနိုင်ငံက ထပ်ပြီးတော့မှ တိုက်ပွဲ ဆက်ဝင်နေရဦးမှာပေါ့ နော်၊ လူဘယ်လောက်ပဲ ပြောင်းပြောင်း မူမပြောင်းဘူး ဒီစနစ်က မပြောင်းလဲနေသေးသရွေ့ကတော့ ဒီလိုမျိုး ဆက်ဖြစ်နေဦးမှာ အဲဒါကြောင့်မို့လို့ ကျမတို့က တိုက်ခိုက်တဲ့နေရာမှာ အဓိက မူတွေကို ဖျက်ဆီးနိုင်ဖို့အတွက် ကျမတို့ ကျင့်သုံးနေတဲ့ အာဏာရှင်စနစ်ကို ကျမတို့က တွန်းလှန်နိုင်ဖို့အတွက် ဒီဟာတွေကို ဖျက်သိမ်းနိုင်မှသာ ကျမတို့နိုင်ငံက ကျမတို့ လိုလားတဲ့ တည်ငြိမ်အေးချမ်းမှုတွေ၊ ဖက်ဒရယ်ဒီမိုကရေစီစနစ်အထိ သွားနိုင်မှာပေါ့နော်၊ တစ်ဖက်ကလည်း ကျမတို့ဆီမှာက တောက်လျှောက်ကျင့်သုံးလာနေတဲ့ လူမျိုးကြီးဝါဒ ပုံစံမျိုးတွေ မမျှတမှုတွေ စသဖြင့် အဲဒီလိုမျိုး ရှိနေသေးသရွေ့ကတော့ အပြန်အလှန် တွန်းလှန်မှုတွေ တိုက်ခိုက်မှုတွေ ဆက်ရှိနေမှာပေါ့ နော်” ဟု ပြောသည်။
နိုင်ငံရေးပါတီ ခေါင်းဆောင်များကို တွေ့ရစဉ်
တစ်ဖက်နှင့်တစ်ဖက် သွေးစွန်းမည့် လက်နက်ကိုင် တိုက်ပွဲများထက် နိုင်ငံရေးအရ တွေ့ဆုံဆွေးနွေးပြီး ခိုင်မာ သည့် ငြိမ်းချမ်းရေး တည်ဆောက်နိုင်မှသာလျှင် လက်ရှိပဋိပက္ခများကို ချုပ်ငြိမ်းနိုင်မှာဖြစ်ကြောင်း ရခိုင်အမျိုးသား ပါတီ (ANP)မှ မူဝါဒရေးရာဦးဆောင်ကော်မတီဝင် ဦးထွန်းအောင်ကျော်က CNI သတင်းဌာနသို့ ပြောသည်။
၎င်းက “ကျနော်ကတော့ ကိုယ်ယုံကြည်ချက်အတိုင်း နိုင်ငံရေးအရပဲ ကျနော့်ဘဝမှာ ကျနော် ဆောင်ရွက်လာ တယ်၊ ကျနော် နိုင်ငံရေးလမ်းစဉ်ကိုပဲ ကျနော်ယုံကြည်တယ်၊ ကျနော်တို့ကတော့ တစ်ဖက်နဲ့တစ်ဖက် သွေးစွန်း မယ့် လက်နက်ကိုင်တိုက်ပွဲတွေကို ကျနော်တို့ကတော့ ငြိမ်းချမ်းတဲ့နည်းနဲ့ပဲ ဖြေရှင်းစေချင်တယ်၊ ငြိမ်းချမ်းရေး နှစ်ဖက် တွေ့ဆုံဆွေးနွေးပြီးတော့ စားပွဲခုံပေါ်မှာ ငြိမ်းချမ်းရေးအရ စကားပြောပြီးတော့ ခိုင်မာတည်မြဲတဲ့ ငြိမ်းချမ်းရေးကို တည်ဆောက်နိုင်ကြမှသာလျှင် ဒီအခက်အခဲတွေရဲ့ ပဋိပက္ခတွေကို ချုပ်ငြိမ်းစေနိုင်မယ်လို့ ကျနော် အလေးအနက် ယုံကြည်ထားပါတယ်ခင်ဗျ” ဟု ပြောသည်။
မြန်မာနိုင်ငံမှာ ဒီမိုကရေစီရရှိရုံမျှ တိုင်းရင်းသားအရေး ပြေလည်မှာ မဟုတ်ကြောင်း၊ ထို့ကြောင့် တိုင်းရင်းသား အရေးကို ပြေလည်ရန် လုပ်ဆောင်ရန် လိုအပ်ကြောင်း နိုင်ငံရေးသမားတစ်ဦးက ထောက်ပြသည်။
လက်ရှိ လက်နက်ကိုင်ပဋိပက္ခကို ဖြေရှင်းနိုင်ရေး တိုင်းရင်းသား လက်နက်ကိုင် အဖွဲ့အစည်းအချို့၊ နိုင်ငံရေးပါတီ အချို့နှင့် အာဆီယံတို့က ကြိုးပမ်းလျက်ရှိနေသည်။
မြန်မာနိုင်ငံအတွင်း ဖြစ်ပွားနေသော လက်နက်ကိုင်ပဋိပက္ခသည် နှစ်ပေါင်း ၇၀ ကျော်လာပြီးဖြစ်ရာ ဖြေရှင်းနိုင် မည့် နည်းလမ်းရှာမတွေ့သေးပါက ရာစုနှစ် ၁၀ စုကျော်ထိ ဖြစ်ပွားသွားနိုင်ကြောင်း စစ်ရေးအကဲခတ်များက ထောက်ပြကြသည်။
- By CNI
- Category: နိုင်ငံရေး
- Hits: 217
CNI News
၂၀၂၄ ခုနှစ်၊ ဧပြီ ၁၁
ရှမ်းပြည်နယ်မြောက်ပိုင်းတွင် မြန်မာ့တပ်မတော်ထံကနေ တိုက်ခိုက်သိမ်းပိုက်ထားသည့် နယ်မြေများ၌ ပလောင်ပြည်လွတ်မြောက်ရေးတပ်ဦး (PSLF/TNLA)က အုပ်ချုပ်ရေးယန္တရားများ စတင်လည်ပတ်နိုင်ရေး ဆောင်ရွက်နေပြီဖြစ်ကြောင်း သိရသည်။
ပြီးခဲ့သည့် ၂၀၂၃ ခုနှစ်၊ အောက်တိုဘာ ၂၇ ရက်က စတင်ခဲ့သော ညီနောင်မဟာမိတ်သုံးဖွဲ့ (AA-TNLA-MNDAA) ၏ ၁၀၂၇ စစ်ဆင်ရေးအပြီး ရှမ်းမြောက်ရှိ နမ့်ဆန်၊ မန်တုံ၊ နမ့်ခမ်း၊ ကွတ်ခိုင်၊ နမ္မတူ၊ မိုင်းငေါ့နှင့် မိုင်းလုံမြို့တို့ကို TNLA က တိုက်ခိုက်သိမ်းပိုက်ထားသည်။
TNLA သိမ်းပိုက်ထားသော နယ်မြေအတွင်း လူမျိုးစုပေါင်းစုံ ရှိနေသည့်အတွက် ၎င်းတို့ လုပ်ဆောင်ချက်အပေါ် စောင့်ကြည့်မှုများ ရှိနေကြောင်း၊ ယုံကြည်မှုအားဖြင့် ၃ ပုံ ၁ ပုံခန့်သာ ရှိသေးကြောင်း တအာင်းအမျိုးသမီး အဖွဲ့အစည်း (TWO)မှ ပြောရေးဆိုခွင့်ရှိသူ လွေးချီဆငါးက CNI သတင်းဌာနသို့ ပြောသည်။
TNLA ရဲဘော်တစ်ဦးကို တွေ့ရစဉ်
၎င်းက “အခက်အခဲလို့ ပြောတဲ့နေရာမှာကြတော့ အခုလောလောဆယ် ဒီဧရိယာတွေထဲမှာကြတော့ လူမျိုး ပေါင်းစုံတွေပဲ ရှိတဲ့အခါကြတော့ EAO ထိန်းချုပ်တဲ့ နယ်မြေတွေထဲမှာ တချို့ကလည်း စောင့်ကြည့်နေတဲ့ အနေအထားမှာ ရှိနေတယ်၊ တချို့ကလည်း လုပ်ဆောင်မှုက ဘယ်လောက်အထိ အောင်မြင်မလဲဆိုတဲ့ စောင့်ကြည့်မှုတွေလည်း ရှိတယ်၊ တချို့ကလည်း ဒီအပေါ်မှာက ဘယ်ဟာကို အရင်လုပ်သင့်တယ်၊ ဘယ်ဟာက နောက်မှ လုပ်သလဲစသဖြင့် အဲဒီလိုမျိုး ပြောဆိုနေတာတွေလည်း ကြားရတယ်၊ လုပ်သင့်တဲ့ဟာနဲ့ နောက်မှ လုပ်ရ မယ့်ဟာ ပြောတာတွေရှိတယ်၊ တချို့ကလည်း ဒီအပေါ်မှာ အဲဒီလောက်အထိ ပြောရမယ်ဆိုရင်တော့ ရာခိုင်နှုန်း အရ ၃ ပုံ ၁ ပုံလောက်ပဲ ယုံကြည်နေသေးတယ်၊ စသဖြင့် အဲဒီလိုမျိုးတွေတော့ တွေ့နေရတာပေါ့” ဟု ပြောသည်။
ထို့အတူ အုပ်ချုပ်ရေးအပိုင်း ထူထောင်ရာတွင် သက်ဆိုင်ရာဌာနအလိုက် ဝတ်စုံများ ဝတ်ဆင်သင့်ကြောင်း လူထု နှင့်ဆက်ဆံရာမှာ အရေးကြီးကြောင်း ၎င်းက ပြောသည်။
အုပ်ချုပ်ရေးယန္တရား လည်ပတ်နေမှု အခြေအနေများ သိရှိနိုင်ရေး TNLA ၏ ပြန်ကြားရေးတာဝန်ခံ ဗိုလ်မှူးကြီး မိုင်းအိုက်ကျော်ထံ ဖုန်းဆက်သွယ်ခဲ့သော်လည်း ဆက်သွယ်၍ မရသေးပေ။
လက်ရှိ TNLA က သိမ်းပိုက်ထားသော မြို့နယ်များအားလုံး အုပ်ချုပ်ရေးယန္တရားများ စတင်လည်ပတ်နေပြီ ဖြစ် ကြောင်း၊ လာမည့် အခြေခံကျောင်းများ ဖွင့်လှစ်သည့်ရာသီတွင် အတန်းကျောင်းများ ဖွင့်လှစ်နိုင်ရေး လုပ်ဆောင် နေကြောင်း ပလောင်နိုင်ငံရေးသမား ဦးအိုက်လူက CNI သတင်းဌာနသို့ ပြောသည်။
TNLA ခေါင်းဆောင်များနဲ့ ဒေသခံလူထုများ တွေ့ဆုံစဉ်
၎င်းက “အခုက တအာင်းတွေ သိမ်းထားတဲ့ လက်ရှိ ဒီမြို့နယ် ၇ မြို့နယ်လုံးကတော့ ကျနော်တို့ကတော့ အများ ကြီးတော့ လည်ပတ်နေပြီပေါ့၊ ဥပမာ ဌာနတွေ၊ ကျန်းမာရေးဌာနတွေ နောက် လျှပ်စစ်မီးတွေ၊ ရေမီးတွေ စည်ပင်သာယာရေးတွေ ပြီးတော့ အခွန်ဌာနတွေ တော်တော်များများတော့ လည်ပတ်နေပြီဗျ၊ လာမယ့် ကျောင်းဖွင့်တဲ့ ရာသီမှာလည်း အတန်းကျောင်းတွေ ပြန်လည်ဖွင့်လှစ်နိုင်အောင်လည်း အခုက ကြိုးစားနေပြီ ပြန်လည်ဖွင့်နိုင်မှာပေါ့၊ ကျနော်တို့ အများအားဖြင့်က CDM သမားတွေကို ဖိတ်ခေါ်ထားတာလည်း ရှိပါတယ်။ ဘာပဲဖြစ်ဖြစ်ပေါ့၊ ကျနော်တို့ ဒေသအတွက်ကတော့ ကျနော်တို့ အကောင်အထည် ဆက်လက်ဖော်ဆောင်သွားမှာ ပဲလေ၊ သူ့ဟာသူ ရှုပ်တာပဲ ဖြစ်ဖြစ်၊ ရှင်းတာပဲဖြစ်ဖြစ် လုပ်စရာရှိတာတော့ ကျနော်တို့ လုပ်သွားနေမှာပဲလေ” ဟု ပြောသည်။
တရုတ်နိုင်ငံ၏ ကြားဝင်စေ့စပ်မှုကြောင့် မြန်မာ့တပ်မတော်နှင့် TNLA တို့သည် အပစ်အခတ်ရပ်စဲခဲ့ကြသည်။
လက်ရှိတွင် TNLA က မြို့နယ် ၇ မြို့ကို ထိန်းချုပ်ထားပြီး အုပ်ချုပ်ရေး၊ ဥပဒေပြုရေး၊ တရားစီရင်ရေး လုပ်ငန်းများ စတင်လည်ပတ်နိုင်ရေး လုပ်ဆောင်နေကြောင်း သိရသည်။
အုပ်ချုပ်ရေး ထူထောင်မှုလုပ်ငန်းသည် အပြောလွယ်သလောက် လက်တွေ့မှာ ခက်ခဲကြောင်း၊ ထူထောင်ရေး လုပ်ငန်း တစ်ခုလုံးကို လည်ပတ်နိုင်ဖို့အတွက် ငွေကြေး အပါအဝင် လူသားအရင်းအမြစ်၊ အခြေခံ အဆောက်အအုံ နှင့် အင်စတီကျူရှင်းများ အားကောင်းမှသာလျှင် အဆင်ပြေမည်ဟု နိုင်ငံရေးသမားများက ထောက်ပြကြသည်။