CNI International News

မော်စကို၊ ဇူလိုင် ၆

ယူကရိန်းစစ်တပ်သည် ဇူလိုင် ၄ ရက်က စိန့်ပီတာစဘတ်ချ် (St. Petersburg) မြို့ရှိ ရေနံသိုလှောင်သည့် စက်ရုံဝင်းတစ်ခုကို ဒရုန်းဖြင့် တိုက်ခိုက်ခဲ့ကြောင်း အေပီမှ ဖော်ပြခဲ့သည်။

ယူကရိန်းနိုင်ငံက ရုရှား၏ ရေနံအခြေခံ အဆောက်အအုံများကို ဗုံးကြဲတိုက်ခိုက်မှုများ ဆက်တိုက် လုပ်ဆောင်နေ သည်။

ယူကရိန်းသည် ရုရှားရေနံချက် စက်ရုံများနှင့် ရေနံသိုလှောင်ရုံများကို နေ့စဉ်နီးပါး တိုက်ခိုက်မှုများ ပြုလုပ်နေ ခြင်းကြောင့် ရုရှားတွင် စက်သုံးဆီ အကျပ်အတည်း ဖြစ်ပေါ်စေခဲ့ပြီး ရုရှားအစိုးရအပေါ် နိုင်ငံရေးအရ ဖိအားများ သက်ရောက်စေခဲ့သည်။

ဘော်လ်တစ်ပင်လယ် (Baltic Sea) ကမ်းခြေရှိ ကီရော့ဗ်စကီး (Kirovsky) အုပ်ချုပ်ရေးခရိုင် တိုက်ခိုက်ခံခဲ့ရ ကြောင်း အုပ်ချုပ်ရေးမှူး အလက်ဇန္ဒား ဘက်ဂလော့ဗ် (Alexander Beglov) က ပြောကြားခဲ့သည်။

ယူကရိန်းစစ်သားတွေကိုတွေ့ရစဉ်

ထို့ပြင် ရုရှား၏ ဒုတိယအကြီးဆုံးမြို့ဖြစ်သည့် စိန့်ပီတာစဘတ်ချ်နှင့် ၎င်း၏ ပတ်ဝန်းကျင် ဒေသတစ်ဝိုက်တွင် ယူကရိန်းဒရုန်း ၇၂ စင်းကို လေကြောင်းရန် ကာကွယ်ရေးစနစ်ဖြင့် ပစ်ချနိုင်ခဲ့ကြောင်းလည်း ၎င်းက ဆိုသည်။

စိန့်ပီတာစဘတ်ချ်ကမ်းလွန်ရှိ ခရွန်စတတ်ဒ် (Kronstadt) ကျွန်းပေါ်မှ စစ်ဘက်ဆိုင်ရာ ပစ်မှတ်တစ်ခုကိုလည်း ယူကရိန်းတပ်ဖွဲ့များက ထိမှန်အောင် တိုက်ခိုက်နိုင်ခဲ့ကြောင်း ယူကရိန်းသမ္မတ ဇာလန်းစကီး (Volodymyr Zelenskyy) က ပြောကြားခဲ့သည်။

“ယူကရိန်းကာကွယ်ရေး တပ်ဖွဲ့တွေဟာ ရုရှား စ-စ်ပွဲအတွက် ငွေရှာပေးနေတဲ့ ဆိပ်ကမ်း ရေနံ အခြေခံ အဆောက် အအုံကို ထိမှန်အောင် တိုက်ခိုက်နိုင်ခဲ့သလို အရေးပါတဲ့ စစ်ဘက် ပစ်မှတ်တစ်ခုဖြစ်တဲ့ ခရွန်စတတ်ဒ်ကျွန်းကို လည်း ထိမှန်အောင် တိုက်ခိုက်နိုင်ခဲ့ပါတယ်” ဟု ၎င်း၏ တယ်လီဂရမ် (Telegram) စာမျက်နှာတွင် ရေးသား ဖော်ပြခဲ့သည်။

ရုရှားသမ္မတ ပူတင်ကိုတွေ့ရစဉ်

စိန့်ပီတာစဘတ်မြို့၏ ကီရော့ဗ်စကီး (Kirovsky) ခရိုင်သည် ရုရှား၏ အထင်ကရ စိန့်ပီတာစဘတ်ချ် နိုင်ငံတကာ စီးပွားရေးဖိုရမ် မကျင်းပမီ ပြီးခဲ့သည့် ဇွန်လအတွင်းကလည်း ယူကရိန်း၏ တိုက်ခိုက်ခြင်း ခံခဲ့ရဖူးသည်။

ရုရှားနိုင်ငံက ၂၀၁၄ ခုနှစ်တွင် သိမ်းပိုက်ခဲ့သော ခရိုင်းမီးယားကျွန်းဆွယ်သည် ပြင်းထန်သော တိုက်ခိုက်မှုဒဏ်ကို ဆိုးရွားစွာ ခံစားခဲ့ရပြီး ဒေသန္တရအာဏာပိုင်များ အနေဖြင့် အရပ်သားပြည်သူများထံ စက်သုံးဆီ ရောင်းချမှုကို ဆိုင်းငံ့ထားရသည်အထိ ဖြစ်ပွားခဲ့သည်။

ဇူလိုင် ၃ ရက်က ယူကရိန်း၏ တိုက်ခိုက်မှုကြောင့် လူတစ်ဦး သေဆုံးခဲ့ပြီး ၁၀ နှစ်အရွယ် ကလေးငယ်တစ်ဦး အပါအဝင် အခြားလူနှစ်ဦး ဒဏ်ရာရရှိခဲ့ကြောင်း ခရိုင်းမီးယားကျွန်းဆွယ် အုပ်ချုပ်ရေးမှူး ဆာဂျေ အက်ဆီယွန်နော့ဗ် (Sergei Aksyonov) က ပြောကြားခဲ့သည်။

Source: အေပီ

CNI International News

ပြုံယမ်း၊ ဇူလိုင် ၆

မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) သည် တန်ချိန် ၅၀၀၀ ရှိသော ရေတပ်ဖျက်သင်္ဘော အသစ် တစ်စင်းပေါ်မှ မဟာဗျူဟာမြောက် ခရုဇ်ဒုံးကျည်များနှင့် အခြားလက်နက်များ စမ်းသပ်မှုကို ကိုယ်တိုင် ကြီးကြပ်ခဲ့သည်ဟု The Korea Times မှ ဖော်ပြခဲ့သည်။

ထိုစစ်သင်္ဘောကို လာမည့် ၂ လအတွင်း ရေတပ်သို့ လွှဲပြောင်းပေးရန် ကင်မ်ဂျုံအန်က ညွှန်ကြားခဲ့သည်။

ကင်မ်သည် ဇူလိုင် ၃ ရက်က ကန်ကွန်(Kang Kon) ဖျက်သင်္ဘောပေါ်မှ ခရုဇ်ဒုံးကျည်များ၊ ရေတပ်အမြောက်ကြီး များ၊ စက်သေနတ်များနှင့် အီလက်ထရွန်နစ် စစ်ဆင်ရေးဆိုင်ရာ နည်းလမ်းများ စမ်းသပ်မှုကို ကြည့်ရှုစစ်ဆေးခဲ့ ကြောင်း မြောက်ကိုရီးယားနိုင်ငံပိုင် KCNA သတင်းအေဂျင်စီက ဇူလိုင် ၅ ရက်တွင် ဖော်ပြခဲ့သည်။

ဖျက်သင်္ဘောမှ ဒုံးကျည်ပစ်လွှတ်မှုကို တွေ့ရစဉ်

ပြီးခဲ့သည့်နှစ် ဇွန်လအတွင်းက မြောက်ကိုရီးယားသည် ကန်ကွန်(Kang Kon)ဖျက်သင်္ဘောကို ရေချခဲ့ခြင်းဖြစ် သည်။

တောင်ကိုရီးယားစစ်တပ်ကမူ မြောက်ကိုရီးယားနိုင်ငံသည် ဇူလိုင် ၃ ရက်တွင် ထိုစစ်သင်္ဘောပေါ်မှ အရှေ့ပင်လယ် (East Sea) ဆီသို့ ခရုဇ်ဒုံးကျည်များ ပစ်ခတ်ခဲ့သည်ကို ထောက်လှမ်းသိရှိခဲ့ကြောင်း ဇူလိုင် ၅ ရက်က ပြောကြား ခဲ့ပြီး တောင်ကိုရီးယားနှင့် အမေရိကန်တို့က မြောက်ကိုရီးယား၏ လက်နက်စမ်းသပ်မှုများကို အသေးစိတ် လေ့လာနေသည်။

မြောက်ကိုရီးယားနိုင်ငံပိုင် ရုပ်သံလိုင်းက ထုတ်လွှင့်ပြသခဲ့သည့် ဗွီဒီယိုမှတ်တမ်းများအရ ခရုဇ်ဒုံးကျည် ၁၀ စင်းခန့် သည် ကောင်းကင်ယံသို့ ဆက်တိုက် ပျံတက်သွားသည်ကို မြင်တွေ့ရသည်။

ယခု နောက်ဆုံးပြုလုပ်သည့် လက်နက် စမ်းသပ်မှုများသည် ဖျက်သင်္ဘောပေါ်တွင် တပ်ဆင်ထားသော လက်နက် စနစ် အမျိုးမျိုးကို တိုက်ပွဲအတွင်း လက်တွေ့ အသုံးချနိုင်စွမ်း ရှိ/မရှိ စစ်ဆေး အတည်ပြုရန် ကြိုးပမ်းမှုများ၏ တစ်စိတ်တစ်ပိုင်းဖြစ်ကြောင်း KCNA က ဖော်ပြခဲ့သည်။

ဖျက်သင်္ဘောမှ ဒုံးကျည်ပစ်လွှတ်မှုကို တွေ့ရစဉ်

ထို့ပြင် ကင်မ်သည် စစ်သင်္ဘော တည်ဆောက်ရေး လုပ်ငန်းကဏ္ဍ ဖွံ့ဖြိုးတိုးတက်စေရန်အတွက် အရေးကြီးသော အစည်းအဝေး တစ်ခုကိုလည်း ခေါ်ယူကျင်းပခဲ့ကြောင်း KCNA က ဖော်ပြခဲ့သော်လည်း အသေးစိတ် အချက် အလက်များကိုမူ ထုတ်ဖော်ပြောကြားခြင်း မရှိပေ။

မြောက်ကိုရီးယားက ယခုအကြိမ် ပစ်ခတ်စမ်းသပ်ခဲ့သည့် ဒုံးကျည်များသည် ဟွာဆယ်(Hwasal) အမျိုးအစား ခရုဇ်ဒုံးကျည်များ ဖြစ်ပုံရပြီး မြောက်ကိုရီးယား အနေဖြင့် ထိုဒုံးကျည်မျိုးကို ဖျက်သင်္ဘော အသစ်များတွင် တပ်ဆင်ရန် ရည်ရွယ်ထားပုံရကြောင်း ကျွမ်းကျင်သူများက ပြောကြားခဲ့သည်။

ပြီးခဲ့သည့်လကလည်း မြောက်ကိုရီးယားသည် ချိုဟွန်း(Choe Hyon)ဟု အမည်ပေးထားသည့် တန်ချိန် ၅၀၀၀ ရှိ ဖျက်သင်္ဘောတစ်စင်းကို ရေတပ်သို့ လွှဲပြောင်းပေးခဲ့သည်။

ချိုဟွန်း(Choe Hyon) ဖျက်သင်္ဘောကို လွှဲပြောင်းအပ်နှံသည့် အခမ်းအနားတွင် ကင်မ်က မြောက်ကိုရီးယား ရေတပ်ကို နျူကလီးယား လက်နက်များ တပ်ဆင်ပေးရန်နှင့် တန်ချိန် ၁၀,၀၀၀ ရှိသော ဖျက်သင်္ဘောအသစ်များ တည်ဆောက်သွားရန် ကတိပြုခဲ့သည်။

Source: The Korea Times

CNI International News

တိုင်ပေ၊ ဇူလိုင် ၆

ထိုင်ဝမ်စစ်တပ်သည် စစ်တက္ကသိုလ်မှ ဘွဲ့ရရှိခဲ့သည့် ကျောင်းသားများအတွက် ကွန်မြူနစ်ဆန့်ကျင်ရေးနှင့် မျိုးချစ် စိတ်ဓာတ် ရှင်သန်ထက်မြက်ရေး သင်တန်းများကို ပြန်လည်စတင် သင်ကြားပို့ချပြီဖြစ်ကြောင်း ရိုက်တာမှ ဖော်ပြ ခဲ့သည်။

ထိုသင်တန်းများကို ၂၅ နှစ်ကြာ ရပ်နားထားခဲ့ပြီးနောက် ယခုအခါတွင် ပထမဆုံးအကြိမ်အဖြစ် စတင်သင်ကြား ပို့ချခြင်းဖြစ်သည်ဟု ထိုင်ဝမ်ကာကွယ်ရေးဝန်ကြီးဌာနက ဇူလိုင် ၅ ရက်တွင် ပြောကြားခဲ့သည်။

တရုတ်ရေတပ်၏ လှုပ်ရှားမှုများ ထပ်မံမြင့်တက်လာကြောင်း ထိုင်ဝမ်အရာရှိတစ်ဦးက သတင်းပို့ခဲ့ပြီးနောက် တရုတ်နိုင်ငံထံမှ မြင့်တက်လာနေသည့် ခြိမ်းခြောက်မှုများကို အကြောင်းပြချက်အဖြစ် ထည့်သွင်းကာ ထိုသင်တန်းများအား ပြန်လည် ဖွင့်လှစ်ခဲ့ခြင်းဖြစ်သည်။

စစ်အေးတိုက်ပွဲ ကာလအတွင်း ထိုင်ဝမ်သည် တရုတ်နိုင်ငံရှိ ဆိုးသွမ်းကွန်မြူနစ်များ၏ အန္တရာယ်များကို သတိပေး သည့် ဝါဒဖြန့်လှုပ်ရှားမှုများကို ကျယ်ကျယ်ပြန့်ပြန့် လုပ်ဆောင်ခဲ့ဖူးသည်။

တရုတ်ကွန်မြူနစ်ကို တွေ့ရစဉ်

သို့သော် စစ်တက္ကသိုလ်မှ ဘွဲ့ရရှိခဲ့သူများအတွက် တရားဝင်ဖွင့်လှစ်ခဲ့သည့် "ကွန်မြူနစ်ဆန့်ကျင်ရေးနှင့် မျိုးချစ် စိတ်ဓာတ် မြှင့်တင်ရေး ပညာပေး သင်တန်း" ကို ၂၀၀၂ ခုနှစ်တွင် ရပ်ဆိုင်းခဲ့ပြီး၊ ထိုသင်တန်း၏ အမည်ကို "မျိုးချစ် စိတ်ဓာတ် မြှင့်တင်ရေး ပညာပေးသင်တန်း" ဟု အမည်ပြောင်းလဲခဲ့သည်။

တရုတ်နိုင်ငံ၏ စစ်ရေးအရ ခြိမ်းခြောက်မှုများနှင့် ထိုးဖောက် ဝင်ရောက်လာမည့် အန္တရာယ်များ မြင့်တက်လာခြင်း ကြောင့် စစ်တက္ကသိုလ်မှ ဘွဲ့ရကျောင်းသားများအတွက် အဆိုပါ သင်တန်းများကို ပြန်လည် စတင်ခဲ့ရခြင်းဖြစ် ကြောင်း ထိုင်ဝမ်ကာကွယ်ရေးဝန်ကြီးဌာနက ထုတ်ပြန်ခဲ့သည်။

“သူတို့အနေနဲ့ အမျိုးသားလုံခြုံရေး ခြိမ်းခြောက်မှုတွေကို ရှင်းရှင်းလင်းလင်း နားလည်ထားဖို့နဲ့ ကျနော်တို့ ဘာကြောင့် တိုက်ပွဲဝင်နေတာလဲ၊ ဘယ်သူ့အတွက် တိုက်ပွဲဝင်နေတာလဲဆိုတဲ့ စစ်ဘက်ဆိုင်ရာ မစ်ရှင်ရဲ့ ရည်ရွယ် ချက်ကို သိရှိနားလည်ထားဖို့ လိုအပ်ပါတယ်” ဟု ထုတ်ပြန်ချက်တွင် ဖော်ပြထားသည်။

ထိုအကြောင်းအရာနှင့်ပတ်သက်ပြီး ရိုက်တာသတင်းဌာနက တရုတ်ကာကွယ်ရေးဝန်ကြီးဌာနထံမှ မှတ်ချက် တောင်းခံခဲ့သော်လည်း ရုံးပိတ်ရက် ဖြစ်နေသဖြင့် ဆက်သွယ်မရခဲ့ပေ။

 ထိုင်ဝမ်စစ်တပ်ကိုတွေ့ရစဉ်

တရုတ်သည် ထိုင်ဝမ်ကို ၎င်း၏ နယ်နိမိတ် တစ်ခုအဖြစ် သတ်မှတ်ထားပြီး လိုအပ်လာပါက အင်အားသုံး ထိန်းချုပ် သွားမည်ဟု ကြေညာထားသည်။

ထိုင်ဝမ် စစ်တက္ကသိုလ် ဘွဲ့ရကျောင်သားများအတွက် တရုတ်နိုင်ငံဆိုင်ရာ မူဝါဒ ချမှတ်ရေးအဖွဲ့ဖြစ်သော ပြည်မ ကြီး ရေးရာကောင်စီ၊ အမျိုးသားလုံခြုံရေးကောင်စီ၊ တရားရေးဝန်ကြီးဌာနနှင့် အစိုးရ၏ ထိပ်တန်း သုတေသန အဖွဲ့ဖြစ်သော Academia Sinica အဖွဲ့ အပါအဝင် ဌာနဆိုင်ရာများမှ အရာရှိကြီးများက လာရောက် ပို့ချပေးကြ မည်ဖြစ်ကြောင်း ထိုင်ဝမ်ကာကွယ်ရေးဝန်ကြီးဌာနက ပြောကြားခဲ့သည်။

“ရည်ရွယ်ချက်ကတော့ ကျောင်းသားတွေအကြား မိတ်ဆွေနဲ့ ရန်သူကို ပြတ်ပြတ်သားသား ခွဲခြားသိမြင်တဲ့ အသိ စိတ်ဓာတ်တစ်ခု တည်ဆောက်ပေးဖို့ ဖြစ်ပါတယ်”ဟု ထုတ်ပြန်ချက်တွင် ဖော်ပြခဲ့သည်။

Source: ရိုက်တာ

CNI International News

နယူးဒေလီ၊ ဇူလိုင် ၃

အိန္ဒိယနိုင်ငံ အနောက်ဘန်ဂေါ (West Bengal) ပြည်နယ်၊ မူရှီဒါဘတ် (Murshidabad) ခရိုင်ရှိ ကျေးရွာများတွင် နေထိုင်သူများသည် အစိုးရ၏ နယ်စပ်ခြံစည်းရိုးခတ်မည့် အစီအစဉ်အပေါ် စိုးရိမ်နေကြေကြောင်း The Print သတင်းဝက်ဘ်ဆိုက်၌ ဖော်ပြထားသည်။

ထိုနယ်စပ်အနီးရှိ ကျေးရွာတစ်ရွာမှ လယ်သမားတစ်ဦးဖြစ်သူ ဂျာလာလူဒင် မွန်ဒယ်လ် (Jalaluddin Mondal) သည် ဇွန်လ မနက်ခင်းတစ်ခုတွင် ၎င်း၏ ဂုန်လျှော်စိုက်ခင်းထဲ၌ အလံဖြူတစ်ထည် စိုက်ထူထားခဲ့သည်။

ထိုအလံဖြူသည် ငြိမ်းချမ်းရေးသင်္ကေတ မဟုတ်ဘဲ မြေယာဆုံးရှုံးမည့် တိုက်ပွဲသစ် တစ်ခုဖြစ်နေသည်။

ဂျာလူလာဒင်သည် နယ်စပ်နှင့် နီးကပ်စွာ နေထိုင်ဖြစ်သဖြင့် ၎င်း၏ ကိုယ်ပိုင် မြေကွက်များအတွက် နယ်နိမိတ် စည်း သတ်မှတ်မှုများသည် တည်မြဲရန် ခက်ခဲကြောင်း ညည်းတွားပြောဆိုခဲ့သည်။

ထို့နောက် မြေယာပြုပြင်ပြောင်းလဲရေးရုံး (BLRO) က ၎င်း၏ စိုက်ခင်းများကို ဖြတ်ပြီး နယ်စပ်ဆူးကြိုး ခြံစည်းရိုး ခတ်မည်ဖြစ်ကြောင်း ဖုန်းဖြင့် အကြောင်းကြားလာခဲ့ပြီး ခြံစည်းရိုး ခတ်ရန်အတွက် ကန့်ကွက်ရန် မရှိကြောင်း ထောက်ခံချက် (NOC) ပေးရန်လည်း ၎င်းအား ဖိအားပေးခဲ့သည်ဟု ဆိုသည်။

အနောက်ဘန်ဂေါပြည်နယ်သည် ဘင်္ဂလားဒေ့ရှ်နိုင်ငံနှင့် ကီလိုမီတာ ၂၂၀၀ ကျော် နယ်နိမိတ်ချင်း ထိစပ်နေပြီး ကီလိုမီတာ ၄၅၀ ကျော်ရှိသည့် နယ်စပ်အပိုင်းသည် ခြံစည်းရိုး ခတ်ရန် ကျန်ရှိနေသေးသည်။

အိန္ဒိယ-ဘင်္ဂလားဒေ့ရှ်နယ်စပ် ခြံစည်းရိုးခတ်မည့်အပေါ် လယ်သမားတွေ စိုးရိမ်နေစဉ်

ထိုကဲ့သို့ နယ်စပ်ခြံစည်းရိုး ခတ်သည့် ကိစ္စသည် ရွေးကောက်ပွဲ ကာလအတွင်း အငြင်းပွားစရာ ဖြစ်ခဲ့ပြီး အာဏာရ BJP ပါတီက ၎င်းတို့ အနိုင်ရရှိခဲ့မည်ဆိုပါက ခြံစည်းရိုးခတ်သည့်ကိစ္စကို အရှိန်မြှင့် လုပ်ဆောင်မည်ဟု ကတိပြုခဲ့ သည်။

ရွေးကောက်ပွဲတွင် အနိုင်ရခဲ့ပြီးနောက် မေလ၌ BJP ပါတီမှ ဝန်ကြီးချုပ်သစ် တာဝန်ယူပြီးနောက်ပိုင်း ခြံစည်းရိုး ခတ်ရန် မြေယာသိမ်းဆည်းမှုများ ပိုမိုမြန်ဆန်လာခဲ့သည်။

လက်ရှိတွင် အာဏာပိုင်များသည် ခြံစည်းရိုးခတ်မည့် နယ်မြေတစ်လျှောက် အလံဖြူများစိုက်ထူကာ နစ်နာကြေး အတွက် မြေပိုင်ရှင်များနှင့် ညှိနှိုင်းနေကြသည်။

ဂျာလာလူဒင်ကမူ အမှန်တကယ် နိုင်ငံတကာ နယ်စပ်မျဉ်းသည် ယခုမှတ်သားထားသည့် နေရာနှင့် အနည်းဆုံး ၃ ကီလိုမီတာခန့် ကွာဝေးသေးကြောင်း ရှင်းပြသည်။

နယ်စပ်နှင့် ခြံစည်းရိုးအကြား ကျရောက်သွားမည့် မြေယာများသည် ဒေသခံတောင်သူများအတွက် အသုံးပြုနိုင် တော့မည် မဟုတ်ဘဲ ကျေးရွာများရှိ လူနေအိမ်များကိုပါ လက်လွတ်ဆုံးရှုံးရမည့် အခြေအနေကို ရောက်ရှိစေလိမ့် မည်ဟု ဂျာလာလူဒင်က ပြောကြားခဲ့သည်။

Source: The Print

CNI International News

ဟောင်ကောင်၊ ဇူလိုင် ၃

ဟောင်ကောင်ရှိ ကွမ်-ထုံ-မေရီနိုးလ် (Kwun Tong Maryknoll) ကောလိပ်က ကျောင်းဝင်းအတွင်း မိုဘိုင်းလ်ဖုန်း အသုံးပြုမှု စည်းကမ်းချက်များကို တင်းကျပ်တော့မည်ဟု ကြေညာခဲ့ကြောင်း South China Morning Post မှ ဖော်ပြခဲ့သည်။

ထို့နောက် ကျောင်းသားအချို့၏ ကန့်ကွက်မှုများကြောင့် စည်းကမ်းချက် အပြောင်းအလဲများကို ခေတ္တ ဆိုင်းငံ့ ထားသည်။

လက်ရှိတွင် ကျောင်းဝင်းအတွင်း ဖုန်းသုံးစွဲခွင့်ကိုသာ ပိတ်ပင်ထားသည့် ထိုကောလိပ်သည် နောက်ပိုင်း၌ ဖုန်းများကို သတ်မှတ်ထားသော Locker များထဲ၌ သိမ်းဆည်းထားရန် စီစဉ်ခဲ့ခြင်းဖြစ်သည်။

ထို့ပြင် ကျောင်းအဝင်ဝအနီး၌ ဂိမ်းဆော့ခြင်းကိုလည်း ပိတ်ပင်ရန် စီစဉ်ခဲ့ပြီး စည်းကမ်း ဖောက်ဖျက်သူများကို အပြစ်ပေးသည့် အနေဖြင့် အမှတ် ၄ မှတ်အထိ ဒဏ်ရိုက်မည်ဟု ကြေညာခဲ့သည်။

သို့သော် ကျောင်းသားများကမူ ထိုစည်းကမ်းချက်များသည် တင်းကျပ်လွန်းကြောင်း စောဒကတက်ခဲ့ပြီး ထိုစည်းကမ်းချက်များကို ကန့်ကွက်ရန်အတွက် လက်မှတ်ရေးထိုး တောင်းဆိုမှု ပြုလုပ်ခဲ့ကြသည်။

ကွမ်ထုံမေရီနိုးလ် ကောလိပ်မှ ကျောင်းသားတွေ မိုဘိုင်းလ်ဖုန်း သုံးနေစဉ်

အတန်းတစ်ခုတည်းမှ ကျောင်းသား ၁၂၀ ကျော်ကို နေ့လယ်စာ စားချိန်၌ Locker တစ်ခုတည်းမှ ဖုန်းများ ပြန်လည် ထုတ်ယူခိုင်းခြင်းသည် နေ့စဉ် ရုန်းရင်းဆန်ခတ်မှုများ ဖြစ်ပေါ်စေလိမ့်မည်ဟု ကျောင်းသားများက ပြောကြားခဲ့သည်။

ထို့ပြင် ကျောင်းသားအများစုသည် အွန်လိုင်းမှတစ်ဆင့် နေ့လယ်စာ မှာယူခြင်းနှင့် ငွေပေးချေခြင်းများ ပြုလုပ်ရန် ၎င်းတို့၏ ဖုန်းများကိုသာ အားကိုးနေရကြောင်းလည်း ဂျိမ်းစ်အမည်ရှိ ကျောင်းသားတစ်ဦးက ပြောကြားခဲ့သည်။

“အချို့စာသင်ချိန်တွေက ပျင်းစရာကောင်းလို့ အချိန်ဖြုန်းတဲ့ အနေနဲ့ ဖုန်းသုံးနေကြတာပါ” ဟု ၎င်းက ပြောသည်။

၎င်းအနေဖြင့် ပိတ်ရက်မဟုတ်သော နေ့ရက်များတွင် ဖုန်းကို ၆ နာရီခန့် အသုံးပြုပြီး၊ ပိတ်ရက်များတွင် ၈ နာရီ အထိ အသုံးပြုလေ့ရှိကာ သူငယ်ချင်းများနှင့် WhatsApp မှတစ်ဆင့် ဖုန်းခေါ်ဆိုမှု ပြုလုပ်ရာတွင် ပျမ်းမျှ ၅ နာရီ ခန့် အချိန်ကုန်ဆုံးလေ့ရှိကြောင်း ဂျိမ်းစ်က ပြောကြားခဲ့သည်။

၎င်း၏ မိဘများသည် ဖုန်းအသုံးပြုမှုကို ကန့်သတ်ထားခြင်း မရှိသော်လည်း ကျောင်းသားများ အနေဖြင့် ဖုန်း အသုံးပြုချိန်ကို ကိုယ်တိုင် စီမံခန့်ခွဲနိုင်ကြောင်းလည်း ဂျိမ်းစ်က ပြောကြားခဲ့သည်။

Source: South China Morning Post

CNI International News

မော်စကို၊ ဇူလိုင် ၃

ယူကရိန်း၏ တိုက်ခိုက်မှုများကြောင့် ရုရှား၏ စွမ်းအင်အခြေခံ အဆောက်အအုံများ ထိခိုက်ပျက်စီးခဲ့ပြီးနောက် ပေါ်ပေါက်လာသည့် စက်သုံးဆီ ပြတ်လပ်မှုများကို လျှော့ချရန် ရုရှားသည် အိန္ဒိယထံမှ စက်သုံးဆီများအား ရေကြောင်းခရီးဖြင့် တင်သွင်းနေကြောင်း ရိုက်တာမှ ဖော်ပြခဲ့သည်။

ရုရှားနိုင်ငံ၏ နယ်မြေဒေသများတွင် စက်သုံးဆီ ပြတ်လပ်မှုဒဏ်ကို ခံစားနေရပြီး စက်သုံးဆီကို ခွဲတမ်းစနစ်ဖြင့် ရောင်းချခြင်း၊ ဆီဆိုင်များတွင် တန်းစီ စောင့်ဆိုင်းရခြင်းများနှင့် ဓာတ်ဆီဈေးနှုန်းများ စံချိန်တင် မြင့်တက်ခြင်းတို့ ဖြစ်ပေါ်နေသည်။

ရုရှားနိုင်ငံ အနေဖြင့် အခြားနိုင်ငံများနှင့်လည်း ဆက်သွယ် ဆောင်ရွက်နေပြီး သင့်တော်သည့် ဈေးနှုန်းများဖြင့် စက်သုံးဆီ တင်သွင်းနိုင်ရန် ဆွေးနွေးနေကြောင်း ကရင်မလင်နန်းတော်က ဇူလိုင် ၃ ရက်တွင် ပြောကြားခဲ့သည်။

ရုရှားနိုင်ငံ စွမ်းအင်ဝန်ကြီးဌာနနှင့် အိန္ဒိယနိုင်ငံ ရေနံဝန်ကြီးဌာနတို့ကမူ ယခုကိစ္စနှင့်ပတ်သက်၍ မှတ်ချက်ပေးရန် တောင်းဆိုမှုများကို ချက်ချင်းတုံ့ပြန်ခြင်း မရှိသေးပေ။

အိန္ဒိယနိုင်ငံမှ ရုရှားနိုင်ငံသို့ စက်သုံးဆီ မက်ထရစ်တန်ချိန် ၆၀,၀၀၀ ပေးပို့ထားပြီးဖြစ်ကြောင်း သတင်းမြစ်တစ်ခု က ပြောကြားခဲ့သည်။

ရုရှားသမ္မတ ပူတင်နဲ့ အိန္ဒိယဝန်ကြီးချုပ် ပူတင်ကို တွေ့ရစဉ်

 အခြား သတင်းမြစ် တစ်ခုကမူ တန်ချိန် ၃၀,၀၀၀ မှ ၄၀,၀၀၀ စီ အသီးသီး ဝင်ဆံ့သည့် လောင်စာဆီတင် သင်္ဘော နှစ်စင်းကို စေလွှတ်ထားပြီးဖြစ်ကြောင်း ပြောကြားခဲ့သည်။

တတိယသတင်းမြစ် တစ်ခု၏ အဆိုအရ ရုရှားနိုင်ငံသို့ စက်သုံးဆီများ တင်ပို့ပေးနေသည့် အိမ်နီးချင်း ဘယ်လာရုစ် နိုင်ငံ အပါအဝင် နိုင်ငံအသီးသီးမှ စက်သုံးဆီ မက်ထရစ်တန်ချိန် စုစုပေါင်း ၄၀၀,၀၀၀ ကို လစဉ် တင်သွင်းရန် ရုရှားနိုင်ငံက စီစဉ်နေကြောင်း သိရသည်။

ရုရှားနိုင်ငံတွင် စက်သုံးဆီ လိုအပ်ချက် မြင့်မားသည့် နွေရာသီကာလ၌ နေ့စဉ် စက်သုံးဆီ သုံးစွဲမှု ပမာဏမှာ အနည်းဆုံး တန်ချိန် ၁၁၀,၀၀၀ ရှိသည်။

ရုရှားသမ္မတ ပူတင် (Vladimir Putinacknowledged) က ယူကရိန်း၏ ဒရုန်းဖြင့် တိုက်ခိုက်မှုများကြောင့် အချို့ ဒေသများတွင် ရေနံချက်စက်ရုံများ ထိခိုက်ပြီး စက်သုံးဆီ ပြတ်လပ်မှုများ ဖြစ်ပေါ်ခဲ့ကြောင်း အစိုးရဝန်ကြီးများ၊ အရာရှိများနှင့် ဇွန်လ ၂၈ ရက်က ပြုလုပ်သည့် အစည်းအဝေး၌ ဝန်ခံပြောကြားခဲ့သည်။

သို့သော် ရုရှားအနေဖြင့် စက်သုံးဆီ ပြတ်လပ်မှုပြဿနာကို ကိုင်တွယ်ဖြေရှင်း နေပြီဖြစ်ကြောင်းလည်း ပူတင်က ပြောကြားခဲ့သည်။

Source: Reuters

CNI International News

အင်ဖာ၊ ဇူလိုင် ၂

အိန္ဒိယနိုင်ငံ၊ မဏိပူရပြည်နယ်တွင် ငြိမ်းချမ်းရေး ရရှိရန်အတွက် တစ်ခုတည်းသော နည်းလမ်းမှာ လူမျိုးစုများ ကြား ပြန့်နှံ့နေသည့် လက်နက်များအားလုံးကို ဖြုတ်သိမ်းရေးဖြစ်သည်ဟု The Print သတင်းဝက်ဘ်ဆိုက်က အကြံပြုရေးသားထားသည်။

၂၀၂၆ ခုနှစ်၊ မေလ ၁၃ ရက်နေ့တွင် မဏိပူရပြည်နယ် Kangpokpi ခရိုင်ရှိ Leilon Vaiphei ကျေးရွာမှ နာဂ အရပ်သား ၆ ဦး ပြန်ပေးဆွဲခံခဲ့ရပြီးနောက် နှိပ်စက်ညှင်းပန်း ခံထားရသည့် ၎င်းတို့၏ ရုပ်အလောင်းများကို ဇွန်လ ၁၀ ရက်နေ့တွင် အနီးနားရှိ တောအုပ်တစ်ခုအတွင်းမှ ပြန်လည်တွေ့ရှိခဲ့သည်။

ထိုကိစ္စနှင့်ပတ်သက်ပြီး ရက်ပေါင်းများစွာ အသံတိတ်နေခဲ့ပြီးနောက် ကူကီး-ဇို ကောင်စီ (Kuki-Zo Council) က ကြေညာချက်တစ်စောင် ထုတ်ပြန်ခဲ့ပြီး  ထိုလူသတ်မှုများသည် စိတ်လှုပ်ရှားသွားသည့် အခိုက်အတန့်တွင် ဖြစ်ပွားခဲ့သော ကြီးမားသည့် အမှားတစ်ခုဖြစ်သည်ဟု ပြောကြားခဲ့ကာ လူထုကိုယ်စား တောင်းပန်ခဲ့သည်။

နာရီပိုင်းအတွင်းမှာပင် နာဂကျောင်းသားများအဖွဲ့ချုပ် (ANSAM) က ကူကီး-ဇို ကောင်စီ၏ တောင်းပန်မှုကို မရိုးသားကြောင်းပြောကာ ပယ်ချခဲ့ပြီး ပြစ်မှုကျူးလွန်သူများကို ဖမ်းဆီးပေးရန် တောင်းဆိုခဲ့သည်။

လူသတ်သမားများကို လွတ်လပ်စွာ လွှတ်ထားပြီး မည်သူမည်ဝါဖြစ်ကြောင်း ထုတ်ဖော်ခြင်း မရှိသရွေ့ ပြန်လည် သင့်မြတ်ရေး အစီအစဉ်များ စတင်နိုင်မည် မဟုတ်ကြောင်း ANSAM က ပြောကြားခဲ့သည်။

မဏိပူရပြည်နယ်၊ အင်ဖာမြို့မှာ လုံခြုံရေးတပ်ဖွဲ့ဝင် တစ်ဦးကိုတွေ့ရစဉ်

ထိုကိစ္စ၏ နောက်ကွယ်တွင် အလွန်ရှုပ်ထွေးသည့် မေးခွန်းတစ်ခုရှိနေသည်။ အဆိုပါ မေးခွန်းမှာ နာဂအရပ်သား ၆ ဦးကို သတ်ဖြတ်ခဲ့သော လက်နက်များသည် မည်သည့်နေရာမှ ရောက်ရှိလာသနည်းဆိုသည့် မေးခွန်းဖြစ်သည်။

၂၀၂၃ ခုနှစ်၊ မေလကတည်းက လူပေါင်းရာနှင့်ချီ၍ သေဆုံးခဲ့ရသည့် လက်နက်များကဲ့သို့ပင် ယခု အရပ်သား ၆ ဦး ကို သတ်ဖြတ်ခဲ့သည့် လက်နက်များသည် အရပ်သားများ၏ လက်ထဲတွင် ရှိမနေသင့်သော လက်နက်များ ဖြစ် သည်။

မဏိပူရ၏ လူမျိုးစုပဋိပက္ခ သုံးနှစ်တာ ကာလအတွင်းသို့ ရောက်ရှိလာချိန်တွင် အရပ်သားများ၏ လက်ထဲ၌ ပျံ့နှံ့နေသည့် လက်နက် အရေအတွက်မှာ ၆၀၀၀ ခန့်ရှိနေသဖြင့် ထိုကိန်းဂဏန်းသည် စိုးရိမ်စရာကောင်း‌သော ပမာဏဖြစ်သည်။

ကူကီး-ဇိုနှင့် ကသည်းလူမျိုးစုများကြား ပဋိပက္ခ စတင်ဖြစ်ပွားခဲ့သည့် အစောပိုင်း သီတင်းပတ်များအတွင်း ပြည်နယ်ရဲတပ်ဖွဲ့၏ လက်နက်တိုက်များအတွင်းမှ စိန်ပြောင်းများ၊ လက်ပစ်ဗုံးများ၊ ကျည်ကာအင်္ကျီများ အပါအဝင် သိန်းနှင့်ချီသော ကျည်ဆန်များနှင့်အတူ သေနတ်အလက်ပေါင်း ၆၀၀၀ ခန့် ခိုးယူခံခဲ့ရသည်။

အိန္ဒိယအစိုးရက လက်နက်တွေ သိမ်းဆည်းရမိစဉ်

သုံးနှစ်အကြာတွင် ထိုကဲ့သို့ ခိုးယူခံခဲ့သည့် လက်နက်များ ပြန်လည် သိမ်းဆည်းရမိမှုနှုန်းမှာ ၇၀ ရာခိုင်နှုန်းခန့် ရှိကြောင်း မဏိပူရပြည်နယ် ရဲချုပ်က ပြောကြားခဲ့သော်လည်း ကျန်ရှိနေသည့် လက်နက် ၄၀ ရာခိုင်နှုန်း သို့မဟုတ် သေနတ်အလက်ပေါင်း ၂၀၀၀ နီးပါးကို ရှာမတွေ့သေးပေ။

ထိုလက်နက်များသည် ပဋိပက္ခ ဖြစ်ပွားနေသည့် နှစ်ဖက်စလုံးရှိ လက်နက်ကိုင်ပြည်သူ့စစ်များ၊ သူပုန်အဖွဲ့များ၏ လက်ထဲတွင် ပျံ့နှံ့နေဆဲဖြစ်သည်။

ထို့ကြောင့် မဏိပူရပြည်နယ်တွင် လက်နက် ဖြုတ်သိမ်းရေးသည် လွယ်ကူလိမ့်မည် မဟုတ်ဘဲ မဖြစ်နိုင်သည့် အခြေအနေဟုပင် ပြောနိုင်သည်။

သေနတ်များသည် မဏိပူရပြည်နယ်၏ လူမျိုးစုကွဲပြားမှုကို ဖန်တီးခဲ့ခြင်း မဟုတ်သော်လည်း သေနတ်များ ရှိနေသရွေ့ ပဋိပက္ခကို အဆုံးသတ်နိုင်မည် မဟုတ်ဘဲ ငြိမ်းချမ်းရေးနှင့်လည်း အလှမ်းဝေးနေဦးမည်ဖြစ်သည်။

Source: The Print

CNI International News

မော်စကို၊ ဇူလိုင် ၂

မကြာသေးမီ လများအတွင်းက ယူကရိန်း၏ ဒရုန်းတိုက်ခိုက်မှုများကြောင့် ရုရှား၏ ရေနံချက်စက်ရုံများ မီးလောင် ပျက်စီးခဲ့ပြီး နယ်နိမိတ်ကျယ်ဝန်းသည့် ရုရှားနိုင်ငံတစ်ဝန်းရှိ မော်တော်ယာဉ် မောင်းသူများအတွက် စက်သုံးဆီ ထောက်ပံ့မှုများ ပြတ်တောက်သွားခဲ့ကြောင်း အေပီမှ ဖော်ပြခဲ့သည်။

နေရာဒေသ အများအပြားတွင် စက်သုံးဆီကို ခွဲတမ်းစနစ်ဖြင့် စတင် ရောင်းချနေပြီး လမ်းဘေး၌ နာရီပေါင်းများစွာ တန်းစီစောင့်ဆိုင်းနေသည့် မော်တော်ယာဉ်များ၏ ဓာတ်ပုံများကိုလည်း လူမှုမီဒီယာများပေါ်မှာ တွေ့ရှိရသည်။

ဆိုက်ဘေးရီးယားဒေသရှိ အီကုထ်စ် (Irkutsk) မြို့တော်ဝန်ကမူ စက်သုံးဆီ တန်းစီစောင့်ဆိုင်းနေသူများ အဆင်ပြေ စေရန်အတွက် ရွှေ့ပြောင်း အိမ်သာများကိုပင် ချထားပေးရန် အမိန့်ပေးခဲ့သည်။

ရုရှားရေနံချက်စက်ရုံ တိုက်ခိုက်ခံရစဉ်

ကမ္ဘာ့အကြီးဆုံး စွမ်းအင်ထုတ်လုပ်သည့် ရုရှားနိုင်ငံအတွက် ယခုကဲ့သို့ တစ်ခါမျှ မကြုံဖူးသည့် စက်သုံးဆီ အကျပ်အတည်းသည် ယူကရိန်းစစ်ပွဲ၏ အကျိုးဆက် တစ်ခုဖြစ်သည်။ ထိုအကျိုးဆက်သည် ရုရှားပြည်သူများ ကိုပါ တိုက်ရိုက် သက်ရောက်လာခြင်းဖြစ်သည်။

ရုရှားသမ္မတ ပူတင် (Vladimir Putin) ကမူ စက်သုံးဆီ ပြတ်လပ်မှုများသည် စိုးရိမ်ရလောက်သည့် အဆင့် မဟုတ် ကြောင်းနှင့် ယာယီသာဖြစ်ကြောင်း ပြောကြားခဲ့သည်။

“မော်တော်ယာဉ် မောင်းသူတွေရော စီးပွားရေး လုပ်ငန်းတွေ အတွက်ပါ အခက်အခဲတွေ ဆက်ရှိနေပါတယ်။ စက်သုံးဆီဆိုင်တွေမှာ တန်းစီနေရတုန်းပဲဖြစ်ပြီး ကိုယ်လိုချင်တဲ့ စက်သုံးဆီ အမျိုးအစားကို ရှာဖွေဖို့က အမြဲတမ်း မလွယ်ကူပါဘူး” ဟု ၎င်းက ဝန်ခံပြောကြားခဲ့သည်။

ပြီးခဲ့သည့် မတ်လနှောင်းပိုင်း ကတည်းက ရုရှားနိုင်ငံအတွင်းနှင့် ရုရှားက သိမ်းပိုက်ထားသော ခရိုင်းမီးယား ကျွန်းဆွယ် (Crimean Peninsula) ရှိ ရေနံချက်စက်ရုံများ၊ ရေနံသိုလှောင်ရုံများ၊ ရေနံဆိပ်ကမ်းများနှင့် အခြား ရေနံ အခြေခံ အဆောက်အအုံများအပေါ် ယူကရိန်း၏ တိုက်ခိုက်မှုပေါင်း အကြိမ် ၅၀ ကျော် ရှိခဲ့ကြောင်း အေပီ သတင်းဌာန၏ စာရင်းဇယားများတွင် ဖော်ပြထားသည်။

ရုရှားမှာ စက်သုံးဆီ တန်းစီစောင့်ထည့်နေကြရစဉ်

စက်ရုံ တစ်ရုံချင်းစီသည် တစ်ကြိမ်ထက်မက ထပ်တလဲလဲ တိုက်ခိုက်ခံရလေ့ရှိပြီး ဥပမာအားဖြင့် ပင်လယ်နက် ကမ်းခြေမြို့ဖြစ်သော တူအပ်စ် (Tuapse) မြို့ ရှိ ရေနံချက်စက်ရုံသည် သီတင်းပတ် ၂ ပတ်ကျော် အတွင်းမှာပင် ၄ ကြိမ်တိုင်တိုင် တိုက်ခိုက်ခံခဲ့ရသည်။

ထိုအကျိုးဆက်ကြောင့် ဇွန်လအတွင်း ရုရှားနိုင်ငံက စက်သုံးဆီအဖြစ် ချက်လုပ်ခဲ့သည့် ရေနံစိမ်း ပမာဏသည် လွန်ခဲ့သည့် နှစ်ကထက် ၂၅ ရာခိုင်နှုန်းခန့် ကျဆင်းသွားခဲ့ပြီး တစ်ရက်လျှင် စည်ပေါင်း ၃ ဒသမ ၉၅ သန်း အထိ ရှိခဲ့သည်။

ထိုပမာဏသည် ဆယ်စုနှစ် နှစ်ခုကျော်အတွင်း အနိမ့်ဆုံး ပမာဏဖြစ်သည်။

ဓာတ်ဆီ ထုတ်လုပ်မှုသည်လည်း လွန်ခဲ့သည့် တစ်နှစ်က တစ်ရက်လျှင် စည်ပေါင်း ၁ ဒသမ ၀၃ သန်းရှိခဲ့ရာမှ ယခုအခါ ၁၇ ရာခိုင်နှုန်းခန့် ကျဆင်းသွားခဲ့ပြီး တစ်ရက်လျှင် စည်ပေါင်း ၈၅၀,၀၀၀ သာ ရှိတော့သဖြင့် ပြည်တွင်း စျေးကွက် လိုအပ်ချက်ထက် များစွာလျော့နည်းနေသည်။

Source: အေပီ

CNI International News

ဝါရှင်တန်၊ ဇူလိုင် ၂

အမေရိကန်နှင့် တရုတ်အစိုးရတို့ အနေဖြင့် တစ်ဖက်နှင့်တစ်ဖက် အပြန်အလှန် လက်တုံ့ပြန်သည့် လုပ်ဆောင် ချက်များဖြင့် တင်းမာမှုများကို ပိုမိုမြင့်တက်လာစေသော အခြေအနေအား ရှောင်ရှားကြရန် အမေရိကန် အထက် လွှတ်တော်အမတ် စတိဗ် ဒိန်းစ် (Steve Daines) က တိုက်တွန်းခဲ့ကြောင်း South China Morning Post မှ ဖော်ပြခဲ့သည်။

အမေရိကန် မြေရှားသတ္တုကုမ္ပဏီများကို တရုတ်က မကြာသေးမီက ပို့ကုန်ထိန်းချုပ် ကန့်သတ်မှုများ ပြုလုပ်ခြင်း၊ အမေရိကန်စစ်ဌာနချုပ်က တရုတ်နည်းပညာကုမ္ပဏီအချို့ကို နာမည်ပျက် စာရင်းသွင်းခြင်း အစရှိသည့် အပြန် အလှန် လက်တုံ့ပြန်မှုများကို ကိုးကားပြီး ဒိန်းစ်က ထိုကဲ့သို့ ပြောကြားခဲ့ခြင်းဖြစ်သည်။

“ဒါတွေဟာ စိတ်မကောင်းစရာ အဖြစ်အပျက်တွေပါပဲ။ နှစ်ဖက်စလုံးမှာ တင်းမာမှုတွေ အရှိန်မြင့်တက်လာတာကို ကျနော် မမျှော်လင့်ခဲ့ပါဘူး” ဟု မွန်တားနားပြည်နယ်မှ ရီပတ်ဘလစ်ကန် အထက်လွှတ်တော်အမတ် ဒိန်းစ်က ဇွန်လ ၂၉ ရက်တွင် ပြောကြားခဲ့သည်။

ဒိန်းစ်သည် အမေရိကန်အထက်လွှတ်တော်တွင် သြဇာအရှိဆုံး ကော်မတီနှစ်ခုဖြစ်သည့် နိုင်ငံခြားဆက်ဆံရေး ကော်မတီနှင့် ဘဏ္ဍာရေးကော်မတီများ၏ အဖွဲ့ဝင်တစ်ဦး ဖြစ်သည်။

အမေရိကန် အထက် လွှတ်တော်အမတ် စတိဗ် ဒိန်းစ်ကို တွေ့ရစဉ်

အမေရိကန်သမ္မတ ဒေါ်နယ်ထရမ့် (Donald Trump) နှင့် တရုတ်ခေါင်းဆောင် ရှီကျင့်ဖျင် (Xi Jinping) တို့ ပေကျင်းမြို့တွင် ပြုလုပ်ခဲ့သော ထိပ်သီး အစည်းအဝေးအတွင်း တင်းမာမှုများကို လျှော့ချရန် သဘောတူညီခဲ့ကြ သလို သီတင်းပတ် အနည်းငယ်အကြာမှာပင် နှစ်နိုင်ငံကြား စီးပွားရေးနှင့် ပို့ကုန်ကဏ္ဍများ၌ အပြန်အလှန် လက်တုံ့ပြန်မှုများ ပေါ်ပေါက်ခဲ့ခြင်းဖြစ်သည်။

ပြီးခဲ့သည့် သီတင်းပတ်က တရုတ်နိုင်ငံသည် အမေရိကန်၏ မြေရှားသတ္တု လုပ်ငန်းကြီး နှစ်ခုဖြစ်သော MP Materials နှင့် USA Rare Earths အပါအဝင် အခြား အမေရိကန်ကုမ္ပဏီ ၈ ခုကို ပစ်မှတ်ထားပြီး ပို့ကုန်ထိန်းချုပ် ကန့်သတ်မှုများ ချမှတ်ခဲ့ကာ အမေရိကန်ကုမ္ပဏီ ၄၆ ခုကိုလည်း အစိုးရ၏ တင်ဒါခေါ်ယူမှုတွင် ပါဝင်ခွင့် ပိတ်ပင် ခဲ့သည်။

တရုတ်အစိုးရကမူ ၎င်းတို့၏ တားမြစ်ကန့်သတ်ချက်များသည် တရုတ်၏ နည်းပညာကုမ္ပဏီများကို အမည်ပျက် စာရင်း သွင်းခဲ့သည့် အမေရိကန်၏ လုပ်ဆောင်ချက်ကို တုံ့ပြန်ခြင်းဖြစ်ကြောင်း ပြောကြားခဲ့သည်။

သတ္တုတူးဖော်နေစဉ်

ဇွန်လ အစောပိုင်းက အမေရိကန်စစ်ဌာနချုပ်ဖြစ်သည့် ပင်တဂွန်သည် Alibaba၊ Baidu နှင့် BYD တို့ အပါအဝင် တရုတ်ကုမ္ပဏီပေါင်း ၆၀ ကျော်ကို အမေရိကန်တွင် စီးပွားရေး လုပ်ကိုင်နေသည့် တရုတ်စစ်ဘက်ဆိုင်ရာ ကုမ္ပဏီ များ စာရင်းအတွင်းသို့ ထည့်သွင်းခဲ့သည်။

Alibaba ကုမ္ပဏီကမူ ခိုင်လုံသော အထောက်အထား သို့မဟုတ် ရှင်းလင်းချက်မရှိဘဲ အမည်ပျက်စာရင်းထဲသို့ ထည့်သွင်း ခံခဲ့ရသည်ဟုဆိုကာ ပြီးခဲ့သည့် သီတင်းပတ်တွင် အမေရိကန် ကာကွယ်ရေးဝန်ကြီးဌာနကို တရားစွဲ ဆိုခဲ့သည်။

Source: South China Morning Post