![](/images/tuktdjkyrkutkyr.jpg#joomlaImage://local-images/tuktdjkyrkutkyr.jpg)
- By CNI
- Category: နိုင်ငံရေး
- Hits: 505
CNI International News
ဘေရွတ်၊ ဇွန်လ ၂၈
အစ္စရေးက လက်ဘနွန်နိုင်ငံရှိ ဟစ်ဇ်ဘိုလာအဖွဲ့ကို စစ်ပွဲဆင်နွှဲခဲ့မည်ဆိုလျှင် အစ္စရေးကို တိုက်ခိုက်ရန် အသင့်ရှိ ကြောင်း လက်ဘနွန်နိုင်ငံမှ ပါလက်စတိုင်းများက ပြောကြားခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။
လက်ဘနွန်နိုင်ငံတွင် ခိုလှုံနေသည့် ပါလက်စတိုင်းများသည် ဂါဇာဒေသအား အစ္စရေး၏ တိုက်ခိုက်မှုကို ဒေါသ တကြီးဖြင့် စောင့်ကြည့်နေကြခြင်းဖြစ်ပြီး လက်ရှိတွင်လည်း အစ္စရေးနှင့် ဟစ်ဇ်ဘိုလာအကြား အပြန်အလှန် တိုက်ခိုက်မှုများကြောင့် တင်းမာမှုများ မြင့်တက်လျက်ရှိသည်။
ဂါဇာဒေသကို အစ္စရေးက ဝင်ရောက်တိုက်ခိုက်ခဲ့ချိန်ကတည်းက ဟစ်ဇ်ဘိုလာအဖွဲ့သည် အစ္စရေးကို တိုက်ခိုက်မှု များ ပြုလုပ်ခဲ့ပြီး ဂါဇာတွင် အစ္စရေး၏ တိုက်ခိုက်မှုများကြောင့် လူပေါင်း ၃၇,၀၀၀ ကျော် သေဆုံးခဲ့သည်။
ဟစ်ဇ်ဘိုလာအဖွဲ့ကမူ ဂါဇာတွင် အပစ်အခတ် မရပ်စဲမချင်းနှင့် ဂါဇာ၌ ဗုံးကြဲတိုက်ခိုက်မှုများကို အစ္စရေးက မရပ်တန့်မချင်း အစ္စရေးအား တိုက်ခိုက်မှုများ လုပ်ဆောင်သွားမည်ဟု ကြေညာထားသည်။
ပြီးခဲ့သည့်နှစ် အောက်တိုဘာ ၇ ရက်က အစ္စရေးနိုင်ငံတောင်ပိုင်းကို ဟစ်ဇ်ဘိုလာအဖွဲ့၏ မဟာမိတ်ဖြစ်သည့် ဟားမာ့စ်အဖွဲ့က ရုတ်တရက် ဝင်ရောက်မှုကြောင့် လူပေါင်း ၁၁၃၉ ဦးသေဆုံးခဲ့သည်။
အစ္စရေးတပ်ဖွဲ့ကိုတွေ့ရစဉ်
ထို့နောက် လူပေါင်း ၂၅၀ ခန့် ပြန်ပေးဆွဲ ခံခဲ့ရပြီးနောက် အစ္စရေးက ဂါဇာကို ဝင်ရောက်တိုက်ခိုက်ခဲ့ခြင်းဖြစ်သည်။
လက်ဘနွန်နိုင်ငံ၊ ဘေရွတ် (Beirut) မြို့တော်ရှိ ရှာတီလာ (Shatila) အမည်ရှိ ပါလက်စတိုင်း ဒုက္ခသည်စခန်း တစ်ခုတွင် နေထိုင်သည့် ပါလက်စတိုင်းကမူ ၎င်းတို့သည် အစ္စရေးကို ကြောက်ရွံ့ခြင်း မရှိကြောင်း၊ အစ္စရေးနှင့် စစ်ပွဲ ဖြစ်ပွားလာပါက ဟစ်ဇ်ဘိုလာအဖွဲ့ကို ကူညီပေးမည်ဖြစ်ကြောင်း အယ်လ်ဂျာဇီးယား သတင်းဌာနသို့ ပြော ကြားခဲ့သည်။
သို့သော် အစ္စရေးသည် လက်ဘနွန်နိုင်ငံအတွင်းရှိ ပါလက်စတိုင်း ဒုက္ခသည် စခန်းများကဲ့သို့ လူနေထူထပ်သည့် နေရာများကို ပစ်မှတ်ထား တိုက်ခိုက်မှုများ လုပ်ဆောင်နိုင်သဖြင့် ၎င်းတို့၏ မိသားစုများနှင့် အရပ်သားများ၏ လုံခြုံရေးကို စိုးရိမ်မိကြောင်း ပါလက်စတိုင်းဒုက္ခသည် အမျိုးသားများက ပြောသည်။
“အစ္စရေးစစ်တပ်က ကျင့်ဝတ်သိက္ခာမရှိပါဘူး။ သူတို့က လူ့အခွင့်အရေးကို လေးစားလိုက်နာတာ၊ ကလေးတွေရဲ့ အခွင့်အရေးတွေကို ထည့်သွင်းစဉ်းစားတာတွေ မရှိပါဘူး” ဟု ရှာတီလာဒုက္ခသည်စခန်းမှ ပါလက်စတိုင်း လွတ်မြောက်ရေးတပ်ဦး-အထွေထွေဌာနချုပ် (PFLP-GC) က ပြောကြားခဲ့သည်။
လက်ဘနွန်နိုင်ငံအတွင်းရှိ ဒုက္ခသည်စခန်း ၁၂ ခုတွင် ပါလက်စတိုင်းဒုက္ခသည် ၂၅၀,၀၀၀ ခန့် ခိုလှုံနေထိုင်လျက် ရှိပြီး ၁၉၄၈ ခုနှစ်တွင် အစ္စရေး၏ နှင်ထုတ်မှုကြောင့် လက်ဘနွန်နိုင်ငံအတွင်းသို့ ထွက်ပြေးဝင်ရောက် ခဲ့ကြသူများ ဖြစ်သည်။
Source: အယ်လ်ဂျာဇီးယား
![](/images/hgjghjgffjghjf.jpg#joomlaImage://local-images/hgjghjgffjghjf.jpg)
- By CNI
- Category: နိုင်ငံရေး
- Hits: 2516
CNI International News
ဘန်ကောက်၊ ဇွန် ၂၇
ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် ဇွန် ၂၅ ရက်က ဖြူးထိုင်းပါတီ ဌာနချုပ်တွင် နိုင်ငံရေးသင်ခန်းစာများကို ပို့ချခဲ့သည်ဟု Thai PBS World မှ ဖော်ပြခဲ့သည်။
ဖြူးထိုင်းပါတီ အကယ်ဒမီတွင် ပြုလုပ်သည့် သင်ခန်းစာပို့ချမှုအတွင်း ဖြူးထိုင်းပါတီ လွှတ်တော်ကိုယ်စားလှယ်အများစုတက်ရောက်ခဲ့ပြီး သက်ဆင်သည် မကြာသေးမီက လွှတ်တော်အတွင်း အသုံးစရိတ်လျာထားမှုနှင့်ပတ်သက်ပြီး အေချအတင်ဆွေးနွေးခဲ့သည့်အကြောင်းများကို နားထောင်ခဲ့သည်။
ထို့နောက်သက်ဆင်က လွှတ်တော်အမတ်များကို ချီးးကျူးခဲ့ပြီး ၎င်းတို့၏အရည်အချင်းများ ပိုမိုတိုးတက်လာစေရန် စာတွေ့၊ လက်တွေ့ သင်ခန်းစာများကို လေ့လာသင်ယူကြရန် တိုက်တွန်းခဲ့သည်။
"ဝမ်းစာပြည့်နေပြီဆိုတဲ့ပုံစံမျိုးမလုပ်ကြပါတယ်။ အသိပညာ၊ဗဟုသုတတွေကို ပိုပြီး ရှာမှီးကြပါ" ဟု သက်ဆင်က ပြောကြားခဲ့သည်။
ထိုနိုင်ငံရေးသင်ခန်းစာများးပို့ချမှုကို တက်ရောက်နားထောက်သူများထဲတွင် သက်ဆင်၏ သမီးဖြစ်သူ ဖြူးထိုင်းပါတီခေါင်းဆောင် ပေတုံတန် ရှင်နာဝပ် (Paetongtarn Shinawatra) လည်း တက်ရောက်ခဲ့သည်။
သက်ဆင်သည် နိုင်ငံရေးသင်ခန်းစာများကို ပို့ချခဲ့ပြီးနောက် လူမှုမီဒီယာများပေါ်တွင် ၎င်း၏ တပည့်များနှင့်အတူ ရိုက်ကူးခဲ့သည့် ဓာတ်ပုံများကို တင်ခဲ့သည်။
သက်ဆင်သည် ပြီးခဲ့သည့်နှစ် သြဂုတ်လက ထိုင်ငးနိုင်ငံသို့ ပြန်လည်ဝင်ရောက်လာခဲ့ပြီးနောက် ယခုအကြိမ်သည် ဖြူးထိုင်းပါတီဌာနချုပ်သို့ ဒုတိယအကြိမ်မြောက် လာရောက်ခြင်းဖြစ်သည်။
မကြာသေးမီက တော်ဝင်အသရေဖျက်မှုစွဲချက်၊ ကွန်ပျူတာရာဇဝတ်မှု အက်ဥပဒေကိုချိုးဖောက်မှုစွဲချက်တို့ဖြင့် စွပ်စွဲပြစ်တင်ခံထားရသည့် သက်ဆင်သည် ထိုအမှုများနှင့်ပတ်သက်ပြီး ဘတ် ၅၀၀၀၀၀ အာမခံဖြင့် လွတ်မြောက်ခဲ့သူဖြစ်သည်။
သက်ဆင်ကမူ ၎င်းအပေါ်စွဲဆိုထားသည့် စွဲချက်အားလုံးကို ငြင်းဆိုထားပြီး ပြည်သူ့မြင်ကွင်းသို့ထွက်ကာ နိုင်ငံရေးးကိစ္စများကို မှတ်ချက်ပေးလေ့ရှိသည်။ ထို့ပြင်သူသည် ဖြူးထိုင်းပါတီ၏ မဟာဗျူဟာများနှင့် ဆုံးဖြတ်ချက်ချမှတ်မှုများကို နောက်ကွက်မှ ကြိုးကိုင်နေသည်ဟု ယူဆခံထားရသည်။
Source: Thai PBS World
![](/images/uytike8u4l658576u.jpg#joomlaImage://local-images/uytike8u4l658576u.jpg)
- By CNI
- Category: နိုင်ငံရေး
- Hits: 1097
CNI International News
တိုင်ပေ၊ ဇွန်လ ၂၇
တရုတ်ပြည်မကြီးအစိုးရနှင့် ထိုင်ဝမ်ကြား တင်းမာမှုများ ပိုမိုမြင့်တက်လာချိန်တွင် ထိုင်ဝမ်ကျွန်းအနီး၌ ဇွန်လ ၂၅ ရက်က တရုတ်ပြည်သူ့လွတ်မြောက်ရေးတပ်မတော် (PLA)၏ လေယာဉ် ၁၇ စင်းနှင့် ပြည်သူ့လွတ်မြောက်ရေး တပ်မတော်-ရေတပ်(PLAN)၏ သင်္ဘော ၈ စင်းတို့ ကျူးကျော်ဝင်ရောက် လာခဲ့သည်ဟု ထိုင်ဝမ်မှ ထုတ်ပြန်ခဲ့ ကြောင်း The Print သတင်းတွင် ဖော်ပြခဲ့သည်။
အမျိုးသားကာကွယ်ရေးဝန်ကြီးဌာန၏ ထုတ်ပြန်ချက်အရ တရုတ်လေယာဉ် ၁၀ စင်းသည် ထိုင်ဝမ် အနောက် တောင်ပိုင်း လေကြောင်းကာကွယ်ရေး သတ်မှတ်ဇုန်(ADIZ)အတွင်းသို့ ဝင်ရောက်လာခဲ့သည့်အတွက် ထိုင်ဝမ် တပ်မတော်က တုန့်ပြန်မှုတစ်ရပ် ဆောင်ရွက်ခဲ့ရသည်ဟု ဆိုသည်။
ထိုအခြေအနေကို အနီးကပ် စောင့်ကြည့်နေပြီး ထိုင်ဝမ်၏ လေကြောင်းနှင့် ရေပိုင်နက်အနီး တရုတ်စစ်တပ် ပိုင်ဆိုင်မှုများ တည်ရှိနေခြင်းကို သင့်လျော်သလို တုန့်ပြန်ဆောင်ရွက်သွားမည်ဟု ထိုင်ဝမ်ကာကွယ်ရေးဝန်ကြီး ဌာနက လူမှုမီဒီယာ X တွင် ထုတ်ပြန်ခဲ့သည်။
ထိုအခြေအနေသည် အချုပ်အခြာအာဏာနှင့် ဒေသတွင်း လုံခြုံရေးပြဿနာများ ဖြစ်ပွားနေသည့် တရုတ်ပြည်မ ကြီးနှင့်ထိုင်ဝမ်ကြား လက်ရှိဖြစ်ပွားနေသော တင်းမာမှုများကို ပိုမိုထင်ဟပ်လာစေခဲ့သည်။
ထိုင်ဝမ်ပြည်သူတစ်ဦးကိုတွေ့ရစဉ်
ထိုင်ဝမ်ကျွန်းတစ်ဝိုက်တွင် တရုတ်ပြည်မကြီး၏ စစ်ဘက်ဆိုင်ရာ လှုပ်ရှားမှုများ ပိုမိုမြင့်တက် လာစဉ်အတွင်း ထိုင်ဝမ်ကာကွယ်ရေးဝန်ကြီးဌာနက ထိုင်ဝမ်၏ ပိုင်နက်နယ်မြေ တည်ငြိမ်မှုကို ကာကွယ်ရန်နှင့် ဒေသတွင်း တည်ငြိမ်မှုအား ထိန်းသိမ်းနိုင်ရန်အတွက် ကာကွယ်သွားမည်ဟု ထိုင်ဝမ်၏ ကတိကဝတ်ကို ထပ်လောင်း ပြောကြားခဲ့သည်။
ထိုင်ဝမ်အနီးတွင် PLA လေယာဉ်များနှင့် PLAN သင်္ဘောများ တည်ရှိမှုသည် အထူးသဖြင့် အာရှ-ပစိဖိတ်ဒေသ အတွင်း လက်ရှိ ပထဝီဝင်နိုင်ငံရေး တင်းမာမှုများတွင် နိုင်ငံတကာ၏ စိုးရိမ်မှုများ ပိုမိုမြင့်တက်လာခဲ့သည်။
အမေရိကန်နှင့် အခြားဒေသဆိုင်ရာ မဟာမိတ်များက အခြေအနေကို အနီးကပ် စောင့်ကြည့်လျက်ရှိပြီး ထိုင်ဝမ် ရေလက်ကြားတွင် ငြိမ်းချမ်းရေးနှင့် တည်ငြိမ်ရေးအား ထိန်းသိမ်းရန် အရေးကြီးကြောင်း အလေးပေး ပြောကြားခဲ့ သည်။
၂၀၂၀ ပြည့်နှစ်၊ စက်တင်ဘာလကတည်းက တရုတ်သည် ထိုင်ဝမ်ကျွန်းအနီးတွင် စစ်ပွဲနှင့် ငြိမ်းချမ်းရေးကြား ရေရာမှုမရှိသည့် နည်းဗျူဟာများကို(grey zone tactics) ချဉ်းကပ်လုပ်ဆောင်ခဲ့သည်။
Source: The Print
![](/images/reyujyrtiuolittiuliyuiyht.jpg#joomlaImage://local-images/reyujyrtiuolittiuliyuiyht.jpg)
- By CNI
- Category: နိုင်ငံရေး
- Hits: 2594
CNI International News
ဆိုးလ်၊ ဇွန်လ ၂၆
ကိုရီးယားစစ်ပွဲ စတင်ဖြစ်ပွားခဲ့ပြီးနောက် ၇၄ နှစ်အကြာတွင် မြောက်ကိုရီးယားသည် နယ်စပ်စစ်မဲ့ဇုန် (DMZ) အတွင်း ခံတပ်အသစ်များ တည်ဆောက်နေပြီး တောင်ကိုရီးယားစစ်တပ်က နယ်စပ်ဒေသတွင် သတိပေးပစ်ခတ် မှုများ ပြုလုပ်ခဲ့ရကြောင်း ရိုက်တာမှ ဖော်ပြခဲ့သည်။
မကြာသေးမီ သီတင်းပတ်များအတွင်း မြောက်ကိုရီးယားသည် စစ်မဲ့ဇုန်အတွင်း တင့်ကားများကို ဟန့်တားသည့် အတားအဆီးများ တည်ဆောက်ခြင်း၊ မြေမြှုပ်မိုင်းများထောင်ခြင်း၊ စစ်ကူပို့သည့် နည်းဗျူဟာမြောက် လမ်းများ ဖောက်လုပ်ခြင်းတို့ ပြုလုပ်ခဲ့သည်ဟု တောင်ကိုရီးယားစစ်တပ်က ပြောကြားခဲ့သည်။
ထိုဆောက်လုပ်ရေး လုပ်ငန်းများ လုပ်ဆောင်ချိန်တွင် တောင်ကိုရီးယား စစ်သားများက သတိပေး ပစ်ခတ်မှုများ ပြုလုပ်ခဲ့ပြီး မြောက်ကိုရီးယား စစ်သားအချို့သည် သူတို့ထောင်ထားသည့် မြေမြှုပ်မိုင်းများ မတော်တဆ ပေါက်ကွဲမှုများကြောင့် သေဆုံးသည့် ဖြစ်စဉ်များ ရှိခဲ့သည်ဟု တောင်ကိုရီးယားအရာရှိများက ပြောကြားခဲ့သည်။
တောင်ကိုရီးယားသမ္မတကို တွေ့ရစဉ်
၁၉၅၃ ခုနှစ် အဆုံးသတ်ခဲ့သည့် ကိုရီးယားစစ်ပွဲအပြီးတွင် နိုင်ငံတကာ၏ ထောက်ခံမှုများဖြင့် ကိုရီးယား နှစ်နိုင်ငံ အကြား နယ်စပ်စစ်မဲ့ဇုန်ကို ရေးဆွဲခဲ့ခြင်း ဖြစ်သည်။
ဇွန်လ ၂၅ ရက်သည် ကိုရီးယားစစ်ပွဲ စတင်သည့် ၇၄ နှစ်ပြည့် နှစ်ပတ်လည်နေ့ဖြစ်သည်။
မြောက်ကိုရီးယားစစ်တပ်သည် အမေရိကန်က ထောက်ခံထားသော တောင်ကိုရီးယားနိုင်ငံအတွင်း ဝင်ရောက်ပြီး တိုက်ခိုက်ရာမှ ကိုရီးယားစစ်ပွဲ စတင်ဖြစ်ပွားခဲ့ခြင်း ဖြစ်သည်။
ထိုစစ်ပွဲတွင် ပါဝင်ခဲ့သည့် ကုလသမဂ္ဂ တပ်ဖွဲ့များအတွင်း နိုင်ငံပေါင်း ၂၀ ခန့် ပါဝင်ခဲ့ကာ သန်းနှင့်ချီသည့် အသက်ဆုံးရှုံးမှုများရှိခဲ့သော်လည်း ငြိမ်းချမ်းရေးစာချုပ်နှင့်မဟုတ်ဘဲ စစ်ရပ်ဆိုင်းရေး သဘောတူညီမှုသာ ရရှိခဲ့သဖြင့် ကိုရီးယားနှစ်နိုင်ငံသည် သဘောတရားအရ စစ်ပွဲဖြစ်ပွားနေသည့် အခြေအနေမှာပင် ရှိနေဆဲဖြစ် သည်။
တောင်ကိုရီးယား ပြည်သူများကို တွေ့ရစဉ်
မြောက်ကိုရီးယားသည် နျူကလီးယား လက်နက်များကို ထုတ်လုပ်နေပြီး တောင်ကိုရီးယားကို အဓိကရန်သူ ဖြစ်ကြောင်း ကြေညာခဲ့မှုနှင့်အတူ မကြာသေးမီ လများအတွင်း ကိုရီးယားနှစ်နိုင်ငံအကြား တင်းမာမှုများ မြင့်တက်ခဲ့သည်။
ထို့ပြင် မကြာသေးမီက မြောက်ကိုရီးယားသည် တောင်ကိုရီးယား နိုင်ငံအတွင်းသို့ အမှိုက်အိတ်များပါရှိသည့် မိုးပျံပူဖောင်းများ လွှတ်တင်ခဲ့သဖြင့် တောင်ကိုရီးယားကလည်း နယ်စပ်ဒေသတွင် မြောက်ကိုရီးယားကို ဆန့်ကျင်သည့် ဝါဒဖြန့်မှုများကို အသံချဲ့စက်များဖြင့် ထုတ်လွှင့်မှုကို ပြန်လည်ပြုလုပ်ခဲ့သည်။
လက်ရှိတွင် နယ်စပ်ဒေသ၌ မြောက်ကိုရီးယား၏ လုပ်ဆောင်ချက်များသည် ၎င်း၏ ကိုရီးယားနှစ်နိုင်ငံ မူဝါဒကို ပြောင်းလဲမှုနှင့် ဆက်နွှယ်နေဖွယ်ရှိကြောင်း လေ့လာသုံးသပ်သူအချို့က ပြောကြားခဲ့သည်။
Source: ရိုက်တာ
![](/images/6urjiktukugiii.jpg#joomlaImage://local-images/6urjiktukugiii.jpg)
- By CNI
- Category: နိုင်ငံရေး
- Hits: 2749
CNI International News
နယူးဒေလီ၊ ဇွန်လ ၂၆
အိန္ဒိယနိုင်ငံနှင့် ဘင်္ဂလားဒေ့ရှ်နိုင်ငံတို့အကြား စစ်ပညာသင်ကြားရေး နားလည်မှုစာချွန်လွှာ (MoU) လက်မှတ်ရေး ထိုးခဲ့ကြောင်း Devdiscourse သတင်းဝက်င်္ဘဆိုက်မှ ဖော်ပြခဲ့သည်။
အိန္ဒိယနိုင်ငံ၊ တမီလ်နားဒူး (Tamil Nadu) ပြည်နယ်၊ ဝယ်လင်တန် (Welligton) မြို့ရှိ ကာကွယ်ရေးတပ်ဖွဲ့များ ဝန်ထမ်းကောလိပ် (DSSC) နှင့် ဘင်္ဂလားဒေ့ရှ်နိုင်ငံ၊ ဒါကာ (Dhaka) မြို့တော်ရှိ ကာကွယ်ရေးတပ်ဖွဲ့များဌာန ဆိုင်ရာနှင့် ဝန်ထမ်းကောလိပ် (DSCSC) တို့အကြား မဟာဗျူဟာနှင့် စစ်ဆင်ရေးဆိုင်ရာ ဘာသာရပ်များ နယ်ပယ် တွင် စစ်ပညာသင်ကြားရေး ပူးပေါင်းဆောင်ရွက်ရန် နားလည်မှုစာချွန်လွှာ (MoU) လက်မှတ်ရေးထိုးခဲ့ကြောင်း သိရသည်။
ဘင်္ဂလားဒေ့ရှ်ဝန်ကြီးချုပ် ရှိတ်ဟာစီနာ (Sheik Hasina) ၏ အိန္ဒိယခရီးစဉ်အတွင်း ဇွန်လ ၂၂ ရက်က ထိုနားလည်မှုစာချွန်လွှာကို လက်မှတ်ရေးထိုးခဲ့ခြင်း ဖြစ်သည်။
ထိုကောလိပ်နှစ်ခုစလုံးသည် ကြည်း၊ ရေ၊ လေ တပ်ဖွဲ့များမှ အရာရှိများကို စစ်သင်တန်းများ သင်ကြားပို့ချမည် ဖြစ်ပြီး အရာရှိများ၏ ကွပ်ကဲနိုင်မှု စွမ်းဆောင်ရည်များနှင့် ဝန်ထမ်းအရည်အသွေးများကို မြှင့်တင်ပေးမည် ဖြစ်သည်။
မိုဒီနဲ့ရှိတ်ဟာစီနာကို တွေ့ရစဉ်
ထို့ပြင် တူညီသည့် သင်ရိုးညွှန်းတမ်း၊ နည်းပညာတို့နှင့်အတူ တူညီမှုရှိသည့် စိန်ခေါ်မှုများကို ရင်ဆိုင်ရာတွင် နှစ်နိုင်ငံ ထိတွေ့ဆောင်ရွက်မှုများအား ပိုမိုမြင့်တက်စေရန်အတွက် ပူးပေါင်းဆောင်ရွက်ရန် ဆုံးဖြတ်ခဲ့ပြီး နားလည်မှုစာချွန်လွှာကို လက်မှတ်ရေးထိုးခဲ့ခြင်း ဖြစ်သည်။
ထိုနားလည်မှု စာချွန်လွှာသည် ပရော်ဖက်ရှင်နယ် အမြင်ထက်မြက်မှုကို မြင့်တက်စေရန်၊ မဟာဗျူဟာမြောက် အရေးကိစ္စများတွင် နက်ရှိုင်းစွာ ထိုးထွင်းသိမြင်စေရန်၊ သင်တန်းသား အရာရှိများ၏ ပညာရေး စွမ်းဆောင်ရည် များကို ပိုမိုမြင့်တက်စေရန်၊ လက်တွေ့နှင့် စာတွေ့ ကျွမ်းကျင်မှုများကို ဖြစ်မြောက်စေရန် တို့အတွက် အထောက်အကူပြုလိမ့်မည်ဖြစ်သည်။
ထို့ပြင် လေ့ကျင့်ရေး အစီအစဉ်များ၊ ပူးတွဲနှီးနှောဖလှယ်ပွဲများ၊ စွမ်းဆောင်ရည်များ အပြန်အလှန်မျှဝေမှုများ၊ သင်တန်းနည်းပြများ၏ လာရောက်ကြည့်ရှုသည့် ခရီးစဉ်များကိုလည်း လွယ်ကူချောမွေ့ စေမည်ဖြစ်သည်ဟု တာဝန်ရှိသူများက ပြောကြားခဲ့သည်။
ဘင်္ဂလားဒေ့ရှ်ဝန်ကြီးချုပ် ရှိတ်ဟာစီနာသည် အိန္ဒိယဝန်ကြီးချုပ် မိုဒီ (Modi) ၏ ဖိတ်ကြားချက်အရ ဇွန်လ ၂၁ ရက်က အိန္ဒိယနိုင်ငံသို့ ၂ ရက်ကြာ နိုင်ငံတော်ခရီးစဉ်အဖြစ် ရောက်ရှိခဲ့ခြင်းဖြစ်သည်။
အိန္ဒိယနဲ့ ဘင်္ဂလားဒေ့ရှ် စစ်ပညာသင်ကြားရေး MoU လက်မှတ်ထိုးစဉ်
ထိုခရီးစဉ်သည် အိန္ဒိယလွှတ်တော် ရွေးကောက်ပွဲတွင် မိုဒီက တတိယသက်တမ်းကို အနိုင်ရရှိခဲ့ပြီးနောက် ရှိတ်ဟာစီနာ၏ ပထမဆုံး နိုင်ငံတော်ခရီးစဉ်ဖြစ်သည်။
ရှိတ်ဟာစီနာသည် ဇွန်လ ၉ ရက်က ဝန်ကြီးချုပ်မီုဒီ၏ ကျမ်းသစ္စာကျိန်ဆိုပွဲကို တက်ရောက်ခဲ့သည့် ကမ္ဘာ့ ခေါင်းဆောင်များထဲတွင် တစ်ဦး အပါအဝင်ဖြစ်ပြီး နိုင်ငံအကြား လွတ်လပ်မှု၊ ပွင့်လင်းမှု၊ ဘက်စုံပါဝင်မှု၊ လုံခြုံမှု၊ စည်းမျဉ်းအခြေပြုမှုရှိသည့် အင်ဒို-ပစိဖိတ်ဒေသဖြစ်စေရန် ၎င်းတို့၏ ကတိကဝတ်များကို ထပ်လောင်း အတည်ပြု ခဲ့သည်။
ထို့ပြင် အင်ဒို-ပစိဖိတ် သမုဒ္ဒရာဆိုင်ရာ အစီအစဉ် (IPOI) ၏ ဘေးအန္တရာယ် လျှော့ချရေးနှင့် စီမံခန့်ခွဲရေးကဏ္ဍကို ပူးပေါင်း ဦးဆောင်သွားမည်ဖြစ်သလို နှစ်နိုင်ငံစလုံး၏ ဘုံအကျိုးစီးပွားများ၊ အထူးသဖြင့် ကမ္ဘာ့တောင်ခြမ်း ဒေသတွင်ရှိသည့် နိုင်ငံများ၏ အကျိုးစီးပွားများကို မြှင့်တင်ရန် ကမ္ဘာလုံးဆိုင်ရာ အစီအစဉ်များအား အတူတကွ ပူးပေါင်းဆောင်ရွက်ရန်လည်း ကတိပြုခဲ့ကြသည်။
Source: Devdiscourse
![](/images/uktyititruit.jpg#joomlaImage://local-images/uktyititruit.jpg)
- By CNI
- Category: နိုင်ငံရေး
- Hits: 1882
CNI International News
စင်ကာပူ၊ ဇွန်လ ၂၆
အသစ်ထွက်ပေါ်လာသည့် သက်သေ အထောက်အထားများအရ ဆစ်ခ်ခွဲထွက်ရေးဝါဒီများကို သွေးထိုးလှုံ့ဆော်နေ မှုတွင် တရုတ်၏ အခန်းကဏ္ဍသည် ပိုမိုထင်ရှားလာသည်ဟု စင်္ကာပူပို့စ်မှ ဖော်ပြခဲ့သည်။
ထွက်ပေါ်လာသည့် သက်သေ အထောက်အထားများတွင် တရုတ်သည် ခါလစ္စတန် လိုလားသည့် သဘောထား များကို ဝါဒဖြန့်ရန် Facebook နှင့် Instagram အကောင့်တုများအား အများအပြား ဖွင့်လှစ်ခဲ့ကြောင်း တွေ့ရှိခဲ့ရ သည်ဟု Facebook နှင့် Instagram တို့၏ မိခင်ကုမ္ပဏီဖြစ်သည့် Meta က သတင်းထုတ်ပြန်ခဲ့သည်။
ပဋိပက္ခဆန်သည့် ခြိမ်းခြောက်မှု သတင်း (Adversarial Threat Report)ဟု ခေါင်းစဉ်တပ်ထားသည့် Meta ကုမ္ပဏီ၏ ထုတ်ပြန်ချက်တွင် တရုတ်၏ လူမှုမီဒီယာ အကောင့်တုများသည် ဆစ်ခ်ဘာသာဝင်များအဖြစ် ဟန်ဆောင်ထားပြီး သြစတြေးလျ၊ ကနေဒါ၊ အိန္ဒိယ၊ နယူးဇီလန်၊ ပါကစ္စတန်၊ ဗြိတိန်နှင့် နိုက်ဂျီးရီးယားနိုင်ငံများ အပါအဝင် ကမ္ဘာတစ်ဝန်းရှိ ဆစ်ခ်ဘာသာဝင်များကို ရည်ရွယ်ချက်ရှိရှိဖြင့် လှုံ့ဆော်သည့် သတင်းအမှားများကို ဖြန့်နေကြောင်း ဖော်ပြခဲ့သည်။
ဆစ်ခ်ခွဲထွက်ရေးသမားများကို တွေ့ရစဉ်
Meta ကုမ္ပဏီသည် သတင်းအမှားများကို ဖြန့်ရန် AI နည်းပညာဖြင့် ဖန်တီးထားသည့် အကြောင်းအရာများကို ပို့စ်တင်နေသော တရုတ်အခြေစိုက် ထိုအကောင့်တုများကို ဖယ်ရှားခဲ့သည်ဟု ဆိုသည်။
"သူတို့ (အကောင့်တုများ) တွေက Operation K လို့ခေါ်တဲ့ ဆစ်ခ်လိုလားတဲ့ ဆန္ဒပြမှုတွေ ပြုလုပ်ဖို့အတွက် အတုအယောင် တက်ကြွလှုပ်ရှားမှုကို ဖန်တီးခဲ့ပုံပေါ်ပါတယ်။ သူတို့က AI နဲ့ဖန်တီးထားတဲ့ ဓာတ်ပုံတွေ အပါအဝင် သတင်းတွေ၊ လက်ရှိဖြစ်စဉ်တွေကို အင်္ဂလိပ်ဘာသာ၊ ဟိန္ဒီဘာသာတွေနဲ့ ရေးသားပြီး ပို့စ်တွေ တင်ခဲ့ပါတယ်" ဟု Meta ၏ ထုတ်ပြန်ချက်တွင် ဖော်ပြခဲ့သည်။
တရုတ်သည် မကြာသေးမီ ကာလအတွင်း ဆိုက်ဘာစစ်ဆင်ရေးများ၊ ဟက်ကာများနှင့် ဆက်နွှယ်မှုရှိနေကြောင်း လေ့လာတွေ့ရှိခဲ့ပြီးနောက် တရုတ်အခြေစိုက် သတင်းအမှားဖြန့်သည့် လှုပ်ရှားမှုများသည် အလွန်စိုးရိမ်စရာ ကောင်းသည့် အခြေအနေသို့ ရောက်ရှိခဲ့သည်။
ဆစ်ခ်ခွဲထွက်ရေးသမားများကို တွေ့ရစဉ်
ဆစ်ခ်ခွဲထွက်ရေးအဖွဲ့များနှင့် တရုတ်ဆိုက်ဘာ ကုမ္ပဏီများအကြား ဆက်နွှယ်မှုသည် အလွန်သတိထားရမည့် အဆင့်သို့ ရောက်ရှိနေကြောင်း ဝါရှင်တန် (Washington) အခြေစိုက် မူဝါဒရေးရာအကြံပေးပုဂ္ဂိုလ်လည်းဖြစ် ပထဝီနိုင်ငံရေးလေ့လာသုံးသပ်သူလည်းဖြစ်သည့် အတ်ဆက်ဗ် ဆန်ဒူဂျား (Utsav Sanduja) က ပြောကြားခဲ့ သည်။
တရုတ်ကုမ္ပဏီတစ်ခုဖြစ်သည့် Qihoo 360 သည် ခါလစ္စတန်အရေးတွင် တရုတ်၏ စိတ်ဝင်စားမှုများ မြင့်တက် နေမှုနှင့်အတူ ဆစ်ခ်ခွဲထွက်ရေး ဝါဒဖြန့်မှုများကို တွန်းအားပေး လုပ်ဆောင်ခဲ့သည်ဟု လန်ဒန် (London) အခြေစိုက် နိုင်ငံတကာလုံခြုံရေးကျွမ်းကျင်သူ ခရစ် ဘလက်ဘန်း (Chris Blackburn) က ပြောသည်။
“Qihoo 360 ကုမ္ပဏီဟာ တရုတ်အစိုးရနဲ့ ဆက်နွှယ်မှုရှိပြီး အဲဒီကုမ္ပဏီရဲ့ ထောက်လှမ်းရေးဆန်တဲ့ အသွင်အပြင် ကြောင့် အမေရိကန်ကာကွယ်ရေးဝန်ကြီးဌာနရဲ့ ပိတ်ဆို့မှု ချမှတ်ခံထားရတဲ့ ကုမ္ပဏီပါ။ အဲဒါကြောင့် ခါလစ္စတန် ခွဲထွက်ရေး လှုပ်ရှားမှုနဲ့ တရုတ်အကြား ဆက်နွှယ်မှုရှိနေတဲ့ ယုံကြည်ရလောက်တဲ့ သက်သေဖြစ်နေပါတယ်" ဟု ဘလက်ဘန်းက ပြောကြားခဲ့သည်။
Source: စင်္ကာပူပို့စ်
![](/images/jyrukmyflotyik7ri5.jpg#joomlaImage://local-images/jyrukmyflotyik7ri5.jpg)
- By CNI
- Category: နိုင်ငံရေး
- Hits: 5381
CNI International News
တိုင်ပေ၊ ဇွန်လ ၂၅
အာဏာရှင်စနစ်သည် ဆိုးယုတ်ကြောင်းနှင့် ဒီမိုကရေစီစနစ်သည် ရာဇဝတ်မှုတစ်ခု မဟုတ်ကြောင်း ထိုင်ဝမ် သမ္မတ လိုင်ချင်တေ (Lai Ching-te) က ပြောကြားခဲ့ကြောင်း ရိုက်တာမှ ဖော်ပြခဲ့သည်။
ထိုင်ဝမ်၏ တစ်ယူသန် လွတ်လပ်ရေး ခွဲထွက်ဝါဒီများအတွက် ဆိုးရွားသည့် တရားရေးဆိုင်ရာ အမှုများတွင် သေဒဏ်ချမှတ်မည်ဟု တရုတ်က ခြိမ်းခြောက်ခဲ့ပြီးနောက် လိုင်၏ မှတ်ချက်စကား ထွက်ပေါ်ခဲ့ခြင်း ဖြစ်သည်။
ထိုင်ဝမ်ကို ၎င်း၏နယ်နိမိတ်အဖြစ် သတ်မှတ်ထားသည့် တရုတ်သည် လိုင်အပေါ် အမြင်မကြည်ကြောင်း မကြာခဏပြသခဲ့ပြီး လိုင်သည် ခွဲထွက်ဝါဒီ တစ်ဦးဖြစ်သည်ဟု ပြောကြားခဲ့သည်။
ထို့နောက် ပြီးခဲ့သည့်လက လိုင်၏ ကျမ်းသစ္စာ ကျိန်ဆိုပွဲအပြီးတွင် စစ်ရေးလေ့ကျင့်မှုများကို ပြုလုပ်ခဲ့သည်။
တရုတ်၏ တရားရုံးများသည် ထိုင်ဝမ်အပေါ် တရားစီရင်ပိုင်ခွင့် မရှိသည့်တိုင် ဇွန်လ ၂၁ ရက်တွင် တရုတ်က ထိုင်ဝမ်လွတ်လပ်ရေး ကြိုးပမ်းသူများကို တရားရေးအရ အရေးယူမည့် လမ်းညွှန်ချက်များ ထုတ်ပြန်ခဲ့ကာ ဖိအားများ တိုးမြှင့်ခဲ့သည်။
အမေရိကန်နဲ့ တရုတ် အလံများကို တွေ့ရစဉ်
တရုတ်၏ လုပ်ဆောင်ချက်နှင့်ပတ်သက်ပြီး တိုင်ပေ (Taipei) မြို့တော်တွင် ပြုလုပ်သည့် သတင်းစာ ရှင်းလင်းပွဲ၌ မေးမြန်းခံရချိန်မှာ လိုင်က မကြာသေးမီက တရုတ်နိုင်ငံ တောင်ပိုင်းတွင်ဖြစ်ပွားခဲ့သော ရေလွှမ်းမိုးမှုများအတွက် သနားဂရုဏာသက်ကြောင်း အရင်ဖြေကြားခဲ့သည်။
ထို့နောက် ဒီမိုကရေစီသည် ရာဇဝတ်မှု မဟုတ်ကြောင်း၊ အာဏာရှင်စနစ်သည်သာ စစ်မှန်သည့် ဆိုးယုတ်မှု ဖြစ်ကြောင်း၊ ထိုင်ဝမ်လူမျိုးများကို အရေးယူပိတ်ဆို့ရန် တရုတ်တွင် အခွင့်မရှိကြောင်း လိုင်က ဆက်လက် ဖြေကြားခဲ့သည်။
ထို့ပြင် တရုတ်အနေဖြင့် ထိုင်ဝမ်၏ တည်ရှိမှုကို လက်ခံရန်၊ ထိုင်ဝမ်၏ ဒီမိုကရေစီနည်းကျ ရွေးကောက်ခံ ထားရသည့် အစိုးရနှင့် ဆွေးနွေးမှုများ၊ ဖလှယ်မှုများ ပြုလုပ်ရန် တောင်းဆိုကြောင်း လိုင်က ပြောကြားခဲ့သည်။
"အဲဒီလို ထိတွေ့ဆက်ဆံမှုတွေ မလုပ်ဘူးဆိုရင်တော့ ထိုင်ဝမ်နဲ့ တရုတ်ကြားက ဆက်ဆံရေးဟာ ပိုပြီး တင်းမာလာဖို့ပဲရှိပါတယ်" ဟု လိုင်က ပြောကြားခဲ့သည်။
ပြီးခဲ့သည့် ရက်ပိုင်းအတွင်း ထိုင်ဝမ်ကျွန်းအနီးတွင် တရုတ်၏ စစ်ရေးလှုပ်ရှားမှုကို မြင်တွေ့ခဲ့ရပြီး ဇွန်လ ၂၀ ရက်မှ ၂၁ ရက်အတွင်း ထိုင်ဝမ်ကျွန်းအနီး၌ ပျံသန်းခဲ့သည့် တရုတ်စစ်လေယာဉ် ၁၁၅ စင်းကို ထောက်လှမ်းတွေ့ရှိခဲ့ သည်ဟု ထိုင်ဝမ်ကာကွယ်ရေးဝန်ကြီးဌာနက ထုတ်ပြန်ခဲ့သည်။
Source: ရိုက်တာ
![](/images/tukuoltuiopityoty.jpg#joomlaImage://local-images/tukuoltuiopityoty.jpg)
- By CNI
- Category: နိုင်ငံရေး
- Hits: 977
=CNI International News
နယူးဒေလီ၊ ဇွန် ၂၅
အိန္ဒိယနှင့် ဘင်္ဂလားဒေ့ရှ်နိုင်ငံတို့သည် အင်ဒို-ပစိဖိတ်ဒေသကို လွတ်လပ်ပွင့်လင်းမှု၊ ဘက်စုံပါဝင်မှု၊ လုံခြုံမှုနှင့် စည်းမျဉ်းအခြေပြုဒေသဖြစ်စေရန် ပူးပေါင်းဆောင်ရွက်ရေး ၎င်းတို့၏ ကတိကဝတ်များကို ထပ်လောင်း အတည် ပြုခဲ့သည်ဟု Economic Times မှ ဖော်ပြခဲ့သည်။
နှစ်နိုင်ငံစလုံးသည် ဘေးအန္တရာယ်များကို လျော့ပါးသက်သာစေရန်အတွက် ပူးပေါင်းဆောင်ရွက်ရေး၊ အင်ဒို-ပစိဖိတ် သမုဒ္ဒရာဆိုင်ရာ အစီအစဉ် (IPOI) ၏ ဘေးအန္တရာယ်လျှော့ချရေးနှင့် စီမံခန့်ခွဲရေးကဏ္ဍကို ပူးပေါင်း ဦးဆောင်သွားရန်လည်း ကတိပြုခဲ့ကြသည်။
ဘင်္ဂလားဒေ့ရှ်ဝန်ကြီးချုပ် ရှိတ် ဟာစီနာ (Sheikh Hasina) ၏ ၂ ရက်ကြာ အိန္ဒိယခရီးစဉ်တွင် အိန္ဒိယဝန်ကြီးချုပ် မိုဒီ (Narendra Modi) နှင့် အစည်းအဝေး ပြုလုပ်ခဲ့ပြီးနောက် ပူးတွဲအစီရင်ခံစာကို ထုတ်ပြန်ခဲ့သည်။
ဘင်္ဂလားဒေ့ရှ်နဲ့ အိန္ဒိယ အလံကို တွေ့ရစဉ်
ထိုအစီရင်ခံစာထဲတွင် မိမိတို့၏ ချစ်ကြည်ရင်းနှီးမှုသည် ဒေသတွင်း ငြိမ်းချမ်းရေး၊ လုံခြုံရေးနှင့် တည်ငြိမ်ရေးတို့ကို ဖြစ်ပေါ်စေခဲ့သည့် အချက်ကို အသိအမှတ်ပြုကြောင်း၊ အင်ဒို-ပစိဖိတ်ဒေသကို လွတ်လပ်မှု၊ ပွင့်လင်းမှု၊ ဘက်စုံ ပါဝင်မှု၊ လုံခြုံမှုနှင့် စည်းမျဉ်းအခြေပြု ဒေသဖြစ်စေရန် မိမိတို့၏ ကတိကဝတ်များကို ထပ်လောင်း အတည်ပြု ကြောင်း ဖော်ပြခဲ့သည်။
အင်ဒို-ပစိဖိတ်ဒေသအပေါ် မိမိတို့၏ တူညီသည့် အမြင်နှင့် ရာသီဥတု ဖောက်ပြန်ပြောင်းလဲမှု၏ ဆိုးရွားသည့် သက်ရောက်မှုများကို ခံနိုင်ရည်မရှိသော အချက်အပေါ် အခြေခံပြီး အင်ဒို-ပစိဖိတ် သမုဒ္ဒရာဆိုင်ရာ အစီအစဉ် (IPOI) ၏ ဘေးအန္တရာယ်လျှော့ချရေးနှင့် စီမံခန့်ခွဲရေးကဏ္ဍကို ပူးပေါင်းဦးဆောင်သွားမည်ဖြစ်သည်။
ဘေးအန္တရာယ်ဒဏ်ကို ခံနိုင်သည့် အခြေခံ အဆောက်အအုံများ တည်ဆောက်မှုနှင့် မိမိတို့၏ ပင်လယ်ရေကြောင်း ဒေသအား ပိုမိုခိုင်မာစေရန် လုပ်ဆောင်သွားမည်ဖြစ်ကြောင်း ထုတ်ပြန်ချက်တွင် ဖော်ပြခဲ့သည်။
ထို့ပြင် နှစ်နိုင်ငံစလုံး၏ ဘုံအကျိုးစီးပွားများ၊ အထူးသဖြင့် ကမ္ဘာ့တောင်ခြမ်း ဒေသတွင်ရှိသည့် နိုင်ငံများ၏ အကျိုးစီးပွားများကို မြှင့်တင်ရန် ကမ္ဘာလုံးဆိုင်ရာ အစီအစဉ်များအား အတူတကွ ပူးပေါင်းဆောင်ရွက်ရန်လည်း ကတိပြုခဲ့ကြသည်။
အင်ဒို-ပစိဖိတ်အရေး ဆွေးနွေးပွဲတက်ရောက်လာသော ခေါင်းဆောင်သုံးဦးကိုတွေ့ရစဉ်
အိန္ဒိယနှင့် ဘင်္ဂလားဒေ့ရှ်အကြား အပြန်အလှန် ယုံကြည်မှုနှင့် အကျိုးဖြစ်ထွန်းမှုတို့အပေါ် အခြေခံသည့် နက်ရှိုင်းပြီး အရည်အသွေးမြင့်မားသော ဆက်ဆံရေးကို တည်ဆောက်ရန် လိုအပ်ကြောင်းလည်း ထုတ်ပြန်ချက်တွင် ဖော်ပြခဲ့သည်။
ဘင်္ဂလားဒေ့ရှ် ဝန်ကြီးချုပ် ဟာစီနာသည် အိန္ဒိယဝန်ကြီးချုပ် မိုဒီ၏ ဖိတ်ကြားချက်အရ ဇွန်လ ၂၁ ရက်က အိန္ဒိယနိုင်ငံသို့ ၂ ရက်ကြာ နိုင်ငံတော်ခရီးစဉ်အဖြစ် ရောက်ရှိခဲ့ခြင်းဖြစ်သည်။
အိန္ဒိယလွှတ်တော် ရွေးကောက်ပွဲတွင် မိုဒီက တတိယသက်တမ်းကို အနိုင်ရရှိခဲ့ပြီးနောက် ဟာစီနာ၏ အိန္ဒိယခရီးစဉ်သည် ပထမဆုံး နိုင်ငံတော်ခရီးစဉ်တစ်ခု ဖြစ်ခဲ့သည်။
Source: Economic Times
![](/images/jjyrjk5yui96utio6.jpg#joomlaImage://local-images/jjyrjk5yui96utio6.jpg)
- By CNI
- Category: နိုင်ငံရေး
- Hits: 923
CNI International News
မနီလာ၊ ဇွန်လ ၂၄
ဖိလစ်ပိုင်နိုင်ငံအနေဖြင့် စစ်ပွဲကို စတင်လှုံ့ဆော်မည် မဟုတ်ဘဲ အငြင်းပွားမှုများကို ငြိမ်းချမ်းစွာ ဖြေရှင်းရန် ရည်ရွယ်ကြောင်း ဖိလစ်ပိုင်သမ္မတ ဖာဒီနန် မားကို့စ် ဂျူနီယာ (Ferdinand Marcos Jr) က ဇွန်လ ၂၃ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။
“နိုင်ငံကို ကာကွယ်ရာမှာ ကျနော်တို့ အနေနဲ့ ဖိလစ်ပိုင်လူမျိုးတွေရဲ့ သဘာဝအတိုင်း ရပ်တည်မှာ ဖြစ်ပါတယ်။ အဲဒါကတော့ ပြဿနာတွေကို ငြိမ်းချမ်းစွာ ဖြေရှင်းလိုတဲ့ သဘောထားအတိုင်း လုပ်ဆောင်သွားမှာပါ”ဟု မားကို့စ် က တောင်တရုတ်ပင်လယ်အရေးကို တာဝန်ယူရသည့် အနောက်တိုင်းစစ်ဌာနသို့ သွားရောက်သည့် ခရီးစဉ်တွင် ပြောကြားခဲ့သည်။
ပြီးခဲ့သည့် သီတင်းပတ်က တောင်တရုတ်ပင်လယ်တွင် ဖိလစ်ပိုင် ရေတပ် စစ်မှုထမ်းများနှင့် တရုတ်ကမ်းခြေ စောင့် တပ်ဖွဲ့သင်္ဘောမှ တပ်ဖွဲ့ဝင်များအကြား ခိုက်ရန်ဖြစ်ပွားခဲ့ပြီး ဖိလစ်ပိုင် သင်္ဘောသားတစ်ဦး အပြင်းအထန် ဒဏ်ရာရသွားခဲ့သလို သင်္ဘောများလည်း ထိခိုက်ပျက်စီးခဲ့သည်ဟု ဖိလစ်ပိုင်စစ်တပ်က ပြောသည်။
ဖိလစ်ပိုင်နဲ့ တရုတ် ရေပိုင်နက် အငြင်းပွားနေစဉ်
တရုတ်ကမ်းခြေစောင့် တပ်ဖွဲ့ဝင်များသည် ဓားများ၊ လှံများကို ကိုင်ဆောင်ကာ ဖိလစ်ပိုင် သင်္ဘောများကို တိုက်ခိုက်ခဲ့ကြသည်ဟု ဖိလစ်ပိုင်စစ်တပ်က ထုတ်ပြန်ခဲ့သည်။
ထိုဖြစ်စဉ်နှင့်ပတ်သက်ပြီး တရုတ်အာဏာပိုင်များ၏ ထုတ်ပြန်ချက်သည် ဖိလစ်ပိုင်၏ ထုတ်ပြန်ချက်နှင့် ကွဲလွဲနေပြီး တရုတ်ကမ်းခြေစောင့် တပ်ဖွဲ့ဝင်များသည် တရားဝင်မှုရှိပြီး ပရောဖက်ရှင် နယ်ဆန်သည့် လုပ်ဆောင်ချက်များကို မဖြစ်မနေ လုပ်ဆောင်ခဲ့ခြင်းဖြစ်ကြောင်း တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူက ပြောကြားခဲ့သည်။
မားကို့စ်ကမူ ဖိလစ်ပိုင်စစ်သားများ အနေဖြင့် ပြင်းထန်သည့် ရန်စမှုများ ခံရသည့်အချိန်တွင် ထိန်းထိန်းသိမ်းသိမ်း လုပ်ကိုင်ဆောင်ရွက်ကြရန် ညွှန်ကြားခဲ့သည်။
ဖိလစ်ပိုင်သည် နိုင်ငံတကာ ဥပဒေများနှင့်အညီ လွတ်လပ်စွာ ရေကြောင်းသွားလာခွင့်ကို ကျင့်သုံးသွားမည် ဖြစ်ကြောင်း ပြောကြားခဲ့သည်။
ဖိလစ်ပိုင်နဲ့ တရုတ် ရေပိုင်နက် အငြင်းပွားနေစဉ်
“ကျနော်တို့ တာဝန်ဝတ္တရားတွေအရ ကျနော်တို့ဟာ အင်အားသုံးတာ ဒါမှမဟုတ် ခြိမ်းခြောက်တာ ဒါမှမဟုတ် တစ်ယောက်ယောက်ကို နာကျင်အောင် လုပ်တာမျိုးတွေကို လုပ်ဆောင်မှာ မဟုတ်ပါဘူး။ ကျနော်တို့ဟာ မားမားမတ်မတ် ရပ်တည်ပြီး ငြိမ်းချမ်းတဲ့ စရိုက်လက္ခဏာကို အတိမ်းစောင်းခံမှာ မဟုတ်ပါဘူး”ဟု မားကို့စ်က ပြောကြားခဲ့သည်။
အရှေ့တောင်အာရှတွင် အမေရိကန်၏ မဟာမိတ်ဖြစ်သည့် ဖိလစ်ပိုင်နှင့် တရုတ်အကြား မကြာသေးမီက ပင်လယ်ရေကြောင်း ထိပ်တိုက်တွေ့မှုများသည် မဟာဗျူဟာအရ အရေးကြီးသော တောင်တရုတ်ပင်လယ်တွင် အမေရိကန်နှင့် တရုတ်အကြား တင်းမာမှုများကို မြင့်တက်စေခဲ့သည်။
အမေရိကန်ကမူ တောင်တရုတ်ပင်လယ်တွင် တရုတ်၏ လုပ်ဆောင်မှုများကို ဝေဖန်ရှုတ်ချခဲ့ပြီး ဖိလစ်ပိုင်နှင့် ချုပ်ဆိုထားသည့် ကာကွယ်ရေး သဘောတူစာချုပ်အရ ဖိလစ်ပိုင်အပေါ် မည်သည့် တိုက်ခိုက်မှုကိုမဆို ကာကွယ် ပေးမည်ဖြစ်ကြောင်း ပြောကြားခဲ့သည်။
Source: ရိုက်တာ