- By CNI
- Category: နိုင်ငံရေး
- Hits: 3885
CNI International News
ပဲရစ်၊ ဇူလိုင် ၁၃
တရုတ်သည် ပါကစ္စတန်နိုင်ငံထံမှ တရားမဝင် ရယူခဲ့သည့် ရှက်စ်ဂမ် (Shaksgam) တောင်ကြားကို အသုံးပြုပြီး တောင်အာရှ၏ ရှိရင်းစွဲ အခြေအနေကို တစ်ဖက်သတ် ပြောင်းလဲရန်ကြိုးပမ်းနေသည်ဟု institut-ega ဝက်ဘ်ဆိုက်မှ ဖော်ပြခဲ့သည်။
ထိုအကြောင်းအရာနှင့် ပတ်သက်ပြီး ပြင်သစ်နိုင်ငံ၊ ပဲရစ်မြို့တော်ရှိ CRISIS24 အမည်ရှိ ကျွမ်းကျင်ပညာရှင်များ အဖွဲ့၏ သတင်းအချက်အလက် ညွှန်ကြားရေးမှူး အိုလီဗီယာ ဂီလာ့ဒ် (Olivier Guillard) က ၎င်း၏ အတွေးအမြင် ကို ရေးသားဖော်ပြခဲ့သည်။
၁၉၆၃ ခုနှစ် တရုတ်-ပါကစ္စတန် သဘောတူညီချက် (China-Pakistan Agreement 1963) အရ ပါကစ္စတန်သည် ရှက်စ်ဂမ်တောင်ကြားကို တရုတ်အား ၁၉၆၃ ခုနှစ်တွင် တရားမဝင် လက်ဆောင်ပေးခဲ့သည်ဟု ဆိုသည်။
ထိုအချိန်က ပါကစ္စတန် စစ်ဗိုလ်ချုပ်ကြီး အာယွတ်ခန်း (Ayub Khan) သည် ပါကစ္စတန်က သိမ်းပိုက်ထားသည့် ကက်ရှ်မီးယားဒေသ (PoK) ၏ နယ်မြေအစိတ်အပိုင်းအချို့ကိုလည်း တရုတ်အား ပေးအပ်ခဲ့သည်။
တရုတ်-ပါကစ္စတန်- အိန္ဒိယ နယ်နိမိတ်ကိုတွေ့ရစဉ်
၎င်းတို့၏ သဘောတူညီချက်သည် တရုတ်၏ ရှင်ကျန်း (Xinjiang) ဒေသနှင့် PoK အကြား နယ်မြေသတ်မှတ်ချက် မျဉ်းတစ်ခု ရေးဆွဲထူထောင်ရန်ဖြစ်ပြီး တောင်စောင်းများနှင့် မြစ်များကို ချိတ်ဆက်ရန် ရည်ရွယ်ခဲ့ခြင်းဖြစ်သည်။
သို့သော် ရှက်စ်ဂမ်တောင်ကြားတွင် ပါကစ္စတန်၏ သိမ်းပိုက်မှုအောက်၌ ရှိနေသည့် အိန္ဒိယ၏ နယ်နိမိတ်တစ်ခု ဖြစ်သဖြင့် တရုတ်၏ လုပ်ဆောင်မှုများသည် တရားမဝင်ကြောင်း ဂီလာ့ဒ်က ရေးသားခဲ့သည်။
ထိုနောက်ခံ ဇာတ်ကြောင်းများအရ တရုတ်သည် ရှက်စ်ဂမ်တောင်ကြားလမ်း ၃ လမ်းကို တရားမဝင် ဖောက်လုပ် ခဲ့ပြီး ၂၀၂၄ ခုနှစ်၊ မတ်လကလည်း ထိုဒေသတွင် ဆောက်လုပ်ရေးစခန်းအ သစ်များကို တည်ဆောက်ခဲ့သည်။
ထို့ကြောင့် ရှက်စ်ဂမ်တောင်ကြားတွင် တရုတ်၏ တရားမဝင် ဆောက်လုပ်မှုများသည် တောင်အာရှဒေသ၏ ရှိရင်းစွဲ အခြေအနေကို တစ်ဖက်သတ် ပြောင်းလဲရန်ဖြစ်ပြီး နိုင်ငံတကာဥပဒေများနှင့် သဘောတူညီမှုများကို လျစ်လျူရှုရာ ရောက်နေကြောင်း ဝေဖန်မှုများ ထွက်ပေါ်ခဲ့သည်။
ထို့ကြောင့် ဘူတန်၊ နီပေါနှင့် အိန္ဒိယကဲ့သို့ တောင်အာရှနိုင်ငံများက တရုတ်၏ လှုပ်ရှားမှုများကို ဝေဖန်ခဲ့ကြပြီး အထူးသဖြင့် အင်အားကြီးနိုင်ငံများဖြစ်သည့် တရုတ်နှင့် အိန္ဒိယအကြား အချုပ်အခြာ အာဏာပိုင်မှုဆိုင်ရာ အငြင်းပွားမှုများကို ပိုမိုမြင့်တက်စေခဲ့သည်။
Source: Institut-ega
- By CNI
- Category: နိုင်ငံရေး
- Hits: 2708
CNI International News
ဝါရှင်တန်၊ ဇူလိုင် ၁၃
အမေရိကန်သမ္မတ ဂျိုးဘိုင်ဒန် (Joe Biden) သည် ဇူလိုင် ၁၁ ရက်က ဝါရှင်တန်တွင် ပြုလုပ်သည့် နေတိုး အစည်းအဝေးပွဲ၏ သတင်းစာရှင်းလင်းပွဲ၌ ယူကရိန်းသမ္မတ ဗိုလိုဒီမာ ဇာလန်းစကီး (Volodymyr Zelenskiy) ၏ အမည်ကို ရုရှားသမ္မတ ဗလာဒီမာ ပူတင် (Vladimir Putin) နှင့် မှားယွင်းပြောဆိုခဲ့သည်ဟု ဘန်ကောက်ပို့စ်မှ ဖော်ပြခဲ့သည်။
ထိုသတင်းစာ ရှင်းလင်းပွဲတွင် ဘိုင်ဒန်က "အခုစကားပြောဖို့ အလှည့်ပေးချင်တဲ့ သူကတော့ ယူကရိန်းသမ္မတပါ။ ရဲစွမ်းသတ္တိနဲ့ ပြည့်စုံတဲ့သူပေါ့။ ဂုဏ်သရေရှိ လူကြီးမင်းများခင်ဗျား။ သူကတော့ သမ္မတ ပူတင်ပဲ ဖြစ်ပါတယ်" ဟု ပြောကြားခဲ့ပြီးနောက် လှည့်ထွက်ရန်ပြင်ခဲ့သည်။
ထို့နောက် ၂ စက္ကန့်အကြာမှာပင် မိုက်ခရိုဖုန်းထံ ပြန်လှည့်လာခဲ့ပြီး "သမ္မတပူတင်လေ။ ခင်ဗျားက သမ္မတပူတင် ကို အနိုင်ယူရမှာ သမ္မတ ဇာလန်းစကီးရဲ့။ ကျနော်က ပူတင်ကို အနိုင်ယူဖို့ပဲ အရမ်းအာရုံစိုက်ခဲ့ပါတယ်" ဟု ဘိုင်ဒန်က သူ့အမှားကို ပြန်လည်ပြင်ဆင်ပြောကြားခဲ့သည်။
ဘိုင်ဒန်၏ မှားယွင်းပြောဆိုခဲ့ချိန်တွင် သတင်းစာ ရှင်းလင်းပွဲ ပြုလုပ်သည့် တစ်ခန်းလုံး အံ့အားသင့်သွားခဲ့သည်။
ထို့နောက် ဇာလန်းစကီးက ဘိုင်ဒန်၏ မှားယွင်းပြောဆိုမှုကို တုန့်ပြန်သည့်အနေဖြင့် "ကျနော်က (ပူတင်ထက်) ပိုကောင်းပါတယ်" ဟု ရယ်မောပြီး အရွှန်းဖောက် ပြောဆိုခဲ့သည်။
ဘိုင်ဒန်ကလည်း "ဟုတ်တာပေါ့။ ခင်ဗျားက အများကြီး ပိုကောင်းတာပေါ့" ဟု ပြန်ပြောချိန်တွင် စင်အောက်မှ ရယ်သံအချို့ ထွက်ပေါ်လာခဲ့သည်။
ဘိုင်ဒန်သည် ပြီးခဲ့သည့်လက ဒေါ်နယ်ထရမ့် (Donald Trump) နှင့် ပြုလုပ်ခဲ့သည့် စကားစစ်ထိုးပွဲတွင် စကား ထစ်ခြင်း၊ အသံဝင်ခြင်းနှင့် ထရမ့်၏ ထိုးနှက်ချက်များကို ကောင်းမွန်စွာ မချေပနိုင်ခြင်းတို့ကြောင့် ၎င်း၏ အသက်အရွယ်နှင့် စိတ်ပိုင်းဆိုင်ရာ ကြံ့ခိုင်မှုတို့အပေါ် မေးခွန်းများ ထွက်ပေါ်ခဲ့ကာ ဖိအားများနှင့် ရင်ဆိုင်နေရသည်။
ဘိုင်ဒန်၏ အသက်အရွယ်သည် ရွေးကောက်ပွဲ ဝင်ရောက်ယှဉ်ပြိုင်ရန် သင့်/မသင့်အပေါ် ဒီမိုကရက်များအကြား စိုးရိမ်မှုများ မြင့်တက်နေချိန်တွင် ယခုကဲ့သို့ ဇာလန်းစကီး အမည်နှင့် ပူတင်၏ အမည်ကို မှားယွင်းပြောဆိုခဲ့ခြင်း ဖြစ်သည်။
ဘိုင်ဒန်ကမူ သူသည် ရွေးကောက်ပွဲမှ နုတ်ထွက်မည် မဟုတ်ကြောင်းနှင့် နိုဝင်ဘာ ၅ ရက်တွင် ပြုလုပ်မည့် သမ္မတရွေးကောက်ပွဲ၌ ထရမ့်ကို အနိုင်ယူရန် အကောင်းဆုံး အနေအထားတွင် ရှိနေကြောင်း ပြောကြားခဲ့သည်။
Source: ဘန်ကောက်ပို့စ်
![](/images/Untitled-6.jpg#joomlaImage://local-images/Untitled-6.jpg)
- By CNI
- Category: နိုင်ငံရေး
- Hits: 1156
CNI International News
အစ္စလာမ်မာဘက်၊ ဇူလိုင် ၁၃
ပါကစ္စတန်သည် ၎င်း၏ အနောက်ဘက် နယ်စပ်ဒေသတွင် နောက်ထပ် ရန်သူအသစ်ကို ဖန်တီးနေသည်ဟု Islam Khabar မှ ဖော်ပြခဲ့သည်။
တစ်ချိန်က ပါကစ္စတန်၏ အနီးကပ် မဟာမိတ်ဖြစ်ခဲ့သည့် အာဖဂန်နစ္စတန်သည် Durand Line အမည်ရှိ နယ်စပ်စည်းကို ပါကစ္စတန်က ဖြတ်ကျော်မည်ဆိုပါက ပါကစ္စတန်စစ်တပ်ကိုပင် မျက်နှာမထောက်ဘဲ ပစ်ခတ်မှုများ ပြုလုပ်ရန် အစီအစဉ်များကို တိုးမြှင့်ခဲ့သည်။
အာဖဂန်နစ္စတန်သည် ပါကစ္စတန် တာလီဘန်အဖွဲ့ အပြင် ပါကစ္စတန်စစ်တပ်နှင့် လက်တွဲခဲ့ဖူးသည့် အကြမ်းဖက် အုပ်စုများဖြင့်ပါ လက်တွဲခဲ့ဖူးသည်။
ယခင်က ထိုအဖွဲ့များကို ပါကစ္စတန်စစ်တပ်ကပင် လေ့ကျင့်သင်ကြား ပေးခဲ့ခြင်းဖြစ်သော်လည်း လက်ရှိတွင် ထိုအဖွဲ့များကို ပါကစ္စတန်က ပြန်လည်နှိမ်နင်းနေရသည်။
တာလီဘန်တွေကိုတွေ့ရစဉ်
၂၀၂၁ ခုနှစ်က အာဖဂန်နစ္စတန်တွင် အာဏာပြန်ရလာသည့် အာဖဂန်တာလီဘန်အဖွဲ့ကမူ တရုတ်၊ ရုရှား အပါအဝင် မဟာမိတ်များနှင့် လက်တွဲလုပ်ဆောင်လိုပြီး ပါကစ္စတန်တာလီဘန်အဖွဲ့နှင့် အခြားလက်နက်ကိုင် အဖွဲ့များ၏ အရေးကိစ္စကို ဖြေရှင်းရန် ကြိုးပမ်းနေသည်။
အာဖဂန်မှ အမေရိကန်တပ်များ ထွက်ခွာသွားချိန်တွင် အာဖဂန်ရှိ အမေရိကန်၏ ရင်းနှီးမြှုပ်နှံမှုများသည် အာဖဂန်တာလီဘန်တို့ လက်ထဲရောက်သွားခဲ့ပြီး တန်ဖိုးအားဖြင့် ဒေါ်လာ ၂ ဒသမ ၉ ဘီလျံနီးပါးရှိခဲ့သည်။
ထိုအချိန်အတောအတွင်း ပါကစ္စတန်က အာဖဂန်နှင့် ထိစပ်နေသည့် ၎င်း၏ နယ်စပ်ဒေသတွင် အကြမ်းဖက်မှု တိုက်ဖျက်သော စစ်ဆင်ရေးအသစ်တစ်ခုကို ကြေညာခဲ့ပြီး ပါကစ္စတန်တာလီဘန် (TTP) အဖွဲ့နှင့် အခြား လက်နက်ကိုင် အဖွဲ့များကို တိုက်ခိုက်ခဲ့သည်။
ပြီးခဲ့သည့် ၆ လတာ ကာလအတွင်း ပါကစ္စတန်စစ်တပ်သည် နယ်စပ်တွင် စစ်ဆင်ရေးပေါင်း ၂၂၇၀၀ ကျော် ပြုလုပ်ခဲ့သော်လည်း ရလဒ်မှာ ကောင်းမွန်ခဲ့ခြင်းမရှိပေ။
အာဖဂန်နစ္စတန်နိုင်ငံအတွင်းကိုတွေ့ရစဉ်
အထူးသဖြင့် ပါကစ္စတန်စစ်တပ်၏ စစ်ဆင်ရေးများကို နယ်စပ်ဒေသမှ လူမျိုးစုများက ထောက်ခံခဲ့ခြင်း မရှိခြင်းကြောင်း ဖြစ်သည်။
ပါကစ္စတန်အစိုးရကမူ အာဖဂန်တာလီဘန်များသည် ပါကစ္စတန်တာလီဘန်နှင့် အခြားစစ်သွေးကြွအဖွဲ့များကို အာဖဂန်နစ္စတန်နိုင်ငံ၏ နယ်စပ်ဒေသများတွင် ခိုလှုံခွင့်ပေးထားကာ အကာအကွယ် ပေးထားသည်ဟု စွပ်စွဲခဲ့သည်။
သို့သော် အာဖဂန်တာလီဘန်များကမူ ပါကစ္စတန်၏ စွပ်စွဲချက်ကို ငြင်းဆိုခဲ့ပြီး ထိုအရေးကိစ္စသည် တစ်ချိန်က မဟာမိတ်ဖြစ်ခဲ့သည့် နှစ်နိုင်ငံအကြား ဆက်ဆံရေးအား တင်းမာလာစေခဲ့သည်။
ထို့ကြောင့် ပါကစ္စတန်သည် ၎င်း၏နယ်စပ်ဒေသတွင် အာဖဂန်တာလီဘန်အဖွဲ့ကို မိတ်ဆွေမှ ရန်သူအဖြစ်သို့ ပြောင်းလဲနေသည့် အခြေအနေမျိုးနှင့် ရင်ဆိုင်လာရနိုင်ကြောင်း ကျွမ်းကျင်သူများက ပြောကြားခဲ့သည်။
Source: Islam Khabar
- By CNI
- Category: နိုင်ငံရေး
- Hits: 4337
CNI International News
ပဲရစ်၊ ဇူလိုင် ၁၃
ပြင်သစ်နိုင်ငံတွင် ပြုလုပ်ခဲ့သည့် လွှတ်တော်ရွေးကောက်ပွဲတွင် အနိုင်ရလိမ့်မည်ဟု ထင်ကြေးပေးခံထားရသော အတိုက်အခံခေါင်းဆောင် မာရင်း လီပန် (Marine Le Pen) ၏ National Rally (NR) သည် အံ့အားသင့်ဖွယ် ရှုံးနိမ့် ခဲ့ပြီးနောက် ပါတီကိုယ်စားလှယ်လောင်းများအတွင်း အစားထိုး ပြုပြင်ပြောင်းလဲမှုများ ပြုလုပ်သွားရန် စီစဉ်ထား ကြောင်း ရိုက်တာမှ ဖော်ပြခဲ့သည်။
NR ပါတီသည် ၎င်း၏ လက်ယာယိမ်း အစိုးရဖွဲ့ရန် အားထုတ်ကြိုးပမ်းမှုကို တားဆီးနေသည့် အခြားပါတီများ၏ အစီအစဉ်ကို အောင်မြင်စွာ တန်ပြန်နိုင်ရန် ကိုယ်စားလှယ်လောင်းများ လဲလှယ်ရန် စီစဉ်ဖွယ်ရှိနေသည်။
ဇွန်လက ပြုလုပ်ခဲ့သည့် ဥရောပ ပါလီမန်ရွေးကောက်ပွဲတွင် လီပန်၏ပါတီက ပြတ်သားစွာ အနိုင်ရခဲ့သဖြင့် ပြင်သစ် လွှတ်တော်ရွေးကောက်ပွဲတွင်လည်း RN ပါတီကသာ နေရာအများစု အနိုင်ရလိမ့်မည်ဟု ရွေးကောက်ပွဲ အကြို လူထုသဘောထားဆန္ဒ စစ်တမ်းများက ဖော်ပြခဲ့သည်။
လီပန်ကိုတွေ့ရစဉ်
သို့သော် ရွေးကောက်ပွဲအပြီး ရလဒ်များတွင် RN ပါတီသည် ၁၂၅ နေရာဖြင့် တတိယအများဆုံး နေရာသာရရှိခဲ့ပြီး New Popular Front ပါတီက နေရာ ၁၈၀ ဖြင့် နေရာအများဆုံးရခဲ့ကာ Ensemble လစ်ဘရယ်ညွှန့်ပေါင်းအဖွဲ့က ၁၅၉ နေရာဖြင့် ဒုတိယရရှိခဲ့သည်။
ထို့ကြောင့် ဒုတိယကမ္ဘာစစ် နောက်ပိုင်း ပြင်သစ်တွင် လက်ယာစွန်း အစိုးရဖွဲ့စည်းမည့် RN ပါတီ၏ မျှော်လင့်ချက် များကို အကောင်အထည် ပေါ်မလာစေရန် ဗဟိုနှင့် လက်ဝဲပါတီများက တားဆီးနိုင်ခဲ့သည်။
လီပန်သည် လက်ရှိသမ္မတ အီမန်နျူယယ် မက်ခရွန် (Emmanuel Macron) ကို ရှုံးနိမ့်ခဲ့သည့် ၂၀၁၇ ခုနှစ် သမ္မတရွေးကောက်ပွဲအပြီးတွင် ချမှတ်ခဲ့သော လမ်းစဉ်အတိုင်း အပြောင်းအလဲများကို လုပ်ဆောင်မည်ဆိုပါက ရွေးကောက်ပွဲဆိုင်ရာ အတားအဆီးများအား ကျော်လွှားနိုင်လိမ့်မည်ဟု ယုံကြည်ကြောင်း RN ပါတီအရာရှိများနှင့် လွှတ်တော်အမတ်များက ပြောကြားခဲ့သည်။
ပြင်သစ်ပြည်သူများကိုတွေ့ရစဉ်
ရွေးကောက်ပွဲပြုလုပ်သည့် ကာလအတွင်း RN ပါတီ၏ ကိုယ်စားလှယ်လောင်းတစ်ဦးသည် နာဇီ ဦးထုပ်ဆောင်းပြီး ဓာတ်ပုံအရိုက်ခံခဲ့သည့် သတင်းများ ပေါ်ထွက်လာခဲ့ပြီး၊ အခြားကိုယ်စားလှယ်လောင်း တစ်ဦးကလည်း လူမျိုးရေး ခွဲခြားမှုဆန်သော စကားလုံးများ ပြောကြားခဲ့သဖြင့် RN ပါတီကို ထိခိုက်စေခဲ့သည်ဟု ကျွမ်းကျင်သူများက ပြောကြားခဲ့သည်။
"ကျနော်တို့အနေနဲ့ ကျနော်တို့ကို ပြင်းပြင်းထန်ထန် ထိခိုက်စေတဲ့ အဲဒီလို အမှားအယွင်းတွေကို ရှောင်ကြဉ်ရမှာ ဖြစ်ပါတယ်" ဟု RN ပါတီအရာရှိ တစ်ဦးဖြစ်သည့် ဂျူလီယန် မက်ဆန် (Julien Masson) က ပြောကြားခဲ့သည်။
ထို့ကြောင့် RN ပါတီသည် ပါတီတွင်းရှိ ပရော်ဖက်ရှင်နယ် မဆန်သည့် ကိုယ်စားလှယ်လောင်းများ နေရာတွင် ပိုမို သင့်လျှော်သော ကိုယ်စားလှယ်လောင်းများဖြင့် အစားထိုးပြီး ပြုပြင်ပြောင်းလဲမှုများ ပြုလုပ်ရန် ကြိုးပမ်းနေခြင်း ဖြစ်ကြောင်း ကျွမ်းကျင်သူများက ပြောကြားခဲ့သည်။
Source: ရိုက်တာ
- By CNI
- Category: နိုင်ငံရေး
- Hits: 518
CNI International News
ကာရာကက်စ်၊ ဇူလိုင် ၁၂
ဗင်နီဇွဲလားနိုင်ငံတွင် ဇူလိုင် ၂၈ ရက်တွင် သမ္မတရွေးကောက်ပွဲ ပြုလုပ်မည်ဖြစ်ပြီး ထိုရွေးကောက်ပွဲသည် ဗင်နီဇွဲလား အစိုးရအတွက် ဆယ်စုနှစ်များအတွင်း အပြင်းထန်ဆုံး ရွေးကောက်ပွဲဆိုင်ရာ စာမေးပွဲတစ်ခု ဖြစ်လာလိမ့်မည်ဟု အေပီမှ ဖော်ပြခဲ့သည်။
ထိုရွေးကောက်ပွဲသည် သမ္မတ နီကိုလပ်စ် မာဒူရို (Nicolas Maduro) အတွက် နောက်ထပ် ၆ နှစ်သက်တမ်းကို ရရှိစေမည်လော သို့မဟုတ် ၎င်း၏ ဆိုရှယ်လစ်မူဝါဒများ အဆုံးသတ်သွားမည်လော အစရှိသည့် ရလဒ် ၂ ခု ထွက်ပေါ်လာမည် ဖြစ်သည်။
ပြီးခဲ့သည့် နှစ်များအတွင်း ဗင်နီဇွဲလား အတိုက်အခံ နိုင်ငံရေးသမားများသည် ရွေးကောက်ပွဲများကို အယုံအကြည် မရှိသဖြင့် ရွေးကောက်ပွဲများအား ဝင်ရောက်ယှဉ်ပြိုင်ခြင်းမရှိဘဲ သပိတ်မှောက်ခဲ့ကြသည်။
သို့သော် အစိုးရ၏ လူထုထောက်ခံမှုနှုန်း ကျဆင်းလာပြီး အတိုက်အခံဘက်က လူထုထောက်ခံမှုနှုန်း မြင့်တက်လာ ချိန်တွင် အခြေအနေများ ပြောင်းလဲလာခဲ့သည်။
မာဒူရိုကို တွေ့ရစဉ်
ဗင်နီဇွဲလား သမ္မတရွေးကောက်ပွဲတွင် ပါဝင်ယှဉ်ပြိုင်မည့် အဓိကကိုယ်စားလှယ်လောင်းများမှာ လက်ရှိသမ္မတ နီကိုလပ်စ် မာဒူရို (PSUV ပါတီ) ၊ အက်ဒ်မန်ဒို ဂွန်ဇာလက် (Edmundo Gonzalez- တစ်သီးပုဂ္ဂလ) ၊ လူးဝစ် အယ်ဒိုရာဒို မားတီးနက် (Luis Eduardo Martinez - Democratic Action ပါတီ) ၊ အန်တိုနီယို အီကာရီ (Antonio Ecarri - Pencil Alliance ပါတီ) ၊ ဒန်နီယယ် စီဘယ်လော့ (Daniel Ceballos - AREPA ပါတီ) နှင့် ဘင်ဂျမင် ရူးဆိုး (Benjamin Rausseo - တစ်သီးပုဂ္ဂလ) တို့ဖြစ်သည်။
ဥရောပသမဂ္ဂ လေ့လာစောင့်ကြည့်သူများကမူ မကြာသေးမီက ပြုလုပ်ခဲ့သည့် ဒေသန္တရ ရွေးကောက်ပွဲများသည် နှစ်ပေါင်း ၂၀ အတွင်း တရားမျှတမှုအရှိဆုံး ရွေးကောက်ပွဲဖြစ်ကြောင်း ပြောကြားခဲ့သည်။
သို့သော် အစိုးရက မျက်နှာသာပေးထားသည့် ကိုယ်စားလှယ်လောင်းများသည် အစိုးရက ထောက်ပံ့ပေးသော လောင်စာများနှင့် ရန်ပုံငွေများကဲ့သို့ အခြားလိုအပ်သည့် အရာများတွင် အသာစီးရရှိခဲ့ပြီး နိုင်ငံတဝန်း ကျယ်ကျယ် ပြန့်ပြန့် မဲဆွယ်စည်းရုံးနိုင်ခဲ့သည်။
ဗင်နီဇွဲလားအတိုက်အခံကို တွေ့ရစဉ်
ဥရောပသမဂ္ဂ၏ ပိတ်ဆို့မှုများကြောင့် ယခုလကုန်ပိုင်းတွင် ပြုလုပ်မည့် သမ္မတရွေးကောက်ပွဲကို လေ့လာ စောင့်ကြည့်ခွင့်ပေးရန် ဥရောပသမဂ္ဂ၏ တောင်းဆိုချက်ကို ဗင်နီဇွဲလား ရွေးကောက်ပွဲ အာဏာပိုင်များက ငြင်းပယ်ခဲ့သည်။
ထိုရွေးကောက်ပွဲတွင် နိုင်ငံအတွင်း မဲပေးခွင့်ရှိသူပေါင်း ၁၇ သန်းခန့်ရှိသည်။
ပြည်ပတွင် နေထိုင်သည့် ဗင်နီဇွဲလားနိုင်ငံသား ၄ သန်းကလည်း မဲပေးရန် စာရင်းသွင်းခဲ့သော်လည်း မဲပေးပိုင်ခွင့် ရှိသည့် သတ်မှတ်ချက်များနှင့် ပြည့်မီသူ ၆၉,၀၀၀ ခန့်သာ ရှိခဲ့သည်။
မဲရုံများအားလုံးကို အစိုးရ စာသင်ကျောင်းများတွင် ပြုလုပ်မည်ဖြစ်ပြီး စစ်တပ်က လုံခြုံရေးယူပေးမည်ဖြစ်သည်။
ရွေးကောက်ပွဲတွင် အနိုင်ရရှိသူသည် ၂၀၂၅ ခုနှစ်၊ ဇန်နဝါရီ ၁၀ ရက်မှ ၂၀၃၁ ခုနှစ်၊ ဇန်နဝါရီ ၁၀ ရက်အထိ ဗင်နီဇွဲလားသမ္မတအဖြစ် တာဝန်ထမ်းဆောင်ရမည်ဖြစ်သည်။
Source: အေပီ
- By CNI
- Category: နိုင်ငံရေး
- Hits: 1052
CNI International News
မနီလာ၊ ဇူလိုင် ၁၂
တောင်တရုတ်ပင်လယ်တွင် ဖိလစ်ပိုင်နှင့် တရုတ်အကြား ထိပ်တိုက်တွေ့မှုများ ရှိခဲ့သည့်အချိန်တွင် ဖိလစ်ပိုင် သည် ကြိုတင်ပြင်ဆင်မှုများကို လုံလောက်စွာ မပြုလုပ်ခဲ့ဘဲ အရဲစွန့်လုပ်ဆောင်မှုများ မရှိခဲ့ကြောင်း ဟောင်ကောင်ပို့စ်မှ ဖော်ပြခဲ့သည်။
သို့သော် လက်ရှိတွင် တရုတ်နှင့် ဖြစ်ပွားနေသည့် တင်းမာမှုများသည် ပိုမိုဆိုးရွားသော အခြေအနေသို့ ရောက်ရှိ လာပါက ဖိလစ်ပိုင်သည် တရုတ်တပ်ဖွဲ့များကို တိုက်ခိုက်ရန် ၎င်း၏ကာကွယ်ရေးစနစ်ကို အဆင့်မြှင့်တင်ရန် ဆုံးဖြတ်ခဲ့သည်။
ထိုကဲ့သို့ ကာကွယ်ရေးကဏ္ဍ အဆင့်မြှင့်တင် မွမ်းမံမှု အစီအစဉ်များထဲတွင် တိုက်လေယာဉ်များ၊ အသံထက်မြန် သည့် စူပါဆောနစ်ဒုံးကျည်များ၊ ရေငုပ်သင်္ဘောများ ဝယ်ယူသည့် အစီအစဉ်များ ပါဝင်ခဲ့သည်။
တောင်တရုတ်ပင်လယ်တွင် တရုတ်၏ ရန်လိုမှုများနှင့် ဗိုလ်ကျစိုးမိုးမှုများက ဖိလစ်ပိုင်အစိုးရကို ကြီးမားသည့် ပဋိပက္ခတစ်ခုအတွက် ပြင်ဆင်စေရန် လှုံ့ဆော်ရာရောက်ခဲ့သည်။
မကြာသေးမီက တောင်တရုတ်ပင်လယ်အတွင်း တရုတ်ရေတပ်၏ နှောင့်ယှက်မှုများကြောင့် ဖိလစ်ပိုင်သင်္ဘောအချို့ ထိခိုက်ခဲ့သည်။
ပြီးခဲ့သည့် ရက်ပိုင်းအတွင်းကမူ တရုတ်နှင့် ဖိလစ်ပိုင်အကြား တင်းမာမှုများကို လျှော့ချရန်အတွက် ဆွေးနွေးမှုများ ပြုလုပ်ရန် သဘောတူညီမှု ရရှိခဲ့သည်။
မည်သို့ပင်ဆိုစေ တရုတ်သည် ဖိလစ်ပိုင်သင်္ဘောများကို ထိခိုက်စေရန် မီးသတ်ပိုက်များ အသုံးပြုခြင်း၊ သင်္ဘော ချင်း ဝင်တိုက်ခြင်း အစရှိသည့် နည်းဗျူဟာများကိုသာ ဆက်လက် ကျင့်သုံးနေသည်။
တရုတ်သင်္ဘောများသည် ဖိလစ်ပိုင်၏ ရေပြင်နယ်နိမိတ်များအတွင်း ဝင်ရောက်ပြီး ငါးဖမ်းခြင်း၊ ကင်းလှည့်ခြင်းတို့ ပြုလုပ်ခဲ့ကာ မကြာသေးမီကလည်း ဖိလစ်ပိုင်က ၎င်း၏ အထူးစီးပွားရေးဇုန်ဟု သတ်မှတ်ထားသည့် Second Thomas သောင်ခုံအနီးတွင် တရုတ်ကမ်းခြေစောင့်တပ်ဖွဲ့၏ အကြီးဆုံးသင်္ဘောကို ကျောက်ချရပ်နားခဲ့သည်။
ထိုအခြေအနေများကြောင့် ဖိလစ်ပိုင်သည် အမေရိကန်၏ F-16 နှင့် ဆွီဒင်၏ JAS-39 ကဲ့သို့ ဘက်စုံသုံး တိုက် လေယာဉ်များကို ဝယ်ယူရန်အတည်ပြုခဲ့ပြီး ကာကွယ်ရေး စွမ်းဆောင်ရည်ကို မြှင့်တင်ရန် ပြင်ဆင်လာခဲ့သည်။
ထို့ပြင် ဖိလစ်ပိုင်သည် အိန္ဒိယထံမှ BrahMos စူပါဆောနစ် ခရုဇ်ဒုံးကျည်များကိုလည်း ဝယ်ယူရရှိခဲ့ပြီး ထိုဒုံးကျည် များသည် ကမ်းရိုးတန်းတွင် တပ်ဆင်နိုင်ကာ သင်္ဘောဖျက်စနစ်ပါဝင်ပြီး ကီလိုမီတာ ၂၉၀ အထိ ပစ်ခတ်နိုင်သည်။
ထိုဒုံးကျည်များသည် ဖိလစ်ပိုင်၏ ကမ်းရိုးတန်း လုံခြုံရေးစနစ်ကို မြှင့်တင်ပေးနိုင်မည်ဖြစ်သည်။
ထို့ပြင် ဖိလစ်ပိုင်အစိုးရသည် ဖိလစ်ပိုင် ရေပြင်များအတွင်းသို့ တရုတ်သင်္ဘောများ မကြာခဏ ဝင်ရောက်မှုကို တားဆီးနိုင်ရန် ရေငုပ်သင်္ဘောများ ဝယ်ယူရေးကိုလည်း အတည်ပြုခဲ့သည်။
Source: ဟောင်ကောင်ပို့စ်
![](/images/ApNewsroom_Biden_NATO_Summit_36393.jpg#joomlaImage://local-images/ApNewsroom_Biden_NATO_Summit_36393.jpg)
- By CNI
- Category: နိုင်ငံရေး
- Hits: 1546
CNI International News
ဝါရှင်တန်၊ ဇူလိုင် ၁၂
ယူကရိန်းသည် နေတိုးအဖွဲ့ဝင်နိုင်ငံဖြစ်ရန် လမ်းကြောင်းပေါ်တွင် ရှိနေကြောင်း နေတိုးအဖွဲ့ဝင် ၃၂ နိုင်ငံစလုံးက ဇူလိုင် ၁၀ ရက်တွင် တရားဝင် ကြေညာခဲ့သည်။
သို့သော်လည်း ရုရှားနှင့် ဖြစ်ပွားနေသည့် စစ်ပွဲ အဆုံးသတ်မှသာ အဖွဲ့ဝင်ဖြစ်ရေး လုပ်ထုံးလုပ်နည်းများကို လုပ်ဆောင်နိုင်လိမ့်မည်ဟု နေတိုးအဖွဲ့ဝင် ၃၂ နိုင်ငံစလုံးက ပြောကြားခဲ့ကြောင်း အေပီမှ ဖော်ပြခဲ့သည်။
အမေရိကန်နိုင်ငံ၊ ဝါရှင်တန် (Washington) မြို့တော်တွင် ပြုလုပ်ခဲ့သည့် နေတိုးအစည်းအဝေး၌ အဖွဲ့ဝင် နိုင်ငံတစ်နိုင်ငံချင်းစီက ထုတ်ပြန်သည့် ကြေညာချက်များနှင့် ပူးတွဲကြေညာချက် တစ်စောင်တွင် ယူကရိန်း၏ ကာကွယ်ရေးကဏ္ဍကို မြင့်တက်စေမည့် အစီအစဉ်များကို ကြေညာခဲ့သည်။
ထိုအစီအစဉ်များထဲတွင် အမေရိကန်၊ နယ်သာလန်နှင့် ဒိန်းမတ်နိုင်ငံများက ယခုနှစ် နွေရာသီ၌ ယူကရိန်းထံ နေတိုးက ပထမဆုံးထောက်ပံ့မည့် F-16 တိုက်လေယာဉ်များကို ပေးအပ်မည့် အစီအစဉ်လည်း ပါဝင်ခဲ့သည်။
ထို့ပြင် နေတိုးအဖွဲ့သည် ယူကရိန်းအတွက် လုံခြုံရေး အထောက်အပံ့များကို ကာလကြာရှည် ထောက်ပံ့ပေးမည့် ကတိကဝတ်များကိုလည်း ကြေညာခဲ့ပြီး မဟာမိတ်နိုင်ငံများထံမှ လက်နက်များနှင့် စစ်သင်တန်းများကို ယူကရိန်း ထံ ပိုမိုအဆင်ပြေချောမွေ့စွာ ရရှိနိုင်ရေးအတွက် နေတိုးစင်တာ အသစ်တစ်ခု ထူထောင်ရေးကိုလည်း အတည်ပြုခဲ့ ကြသည်။
နေတိုး၏ နောက်ဆုံး ကြေညာချက်ထဲတွင် တရုတ်သည် ယူကရိန်းကို တိုက်ခိုက်နေသည့် ရုရှား၏ စစ်ပွဲတွင် ပျက်စီးရာပျက်စီးကြောင်း တိုက်တွန်းနေသည့် နိုင်ငံဖြစ်ကြောင်း ဖော်ပြခဲ့သည်။
အနောက်နိုင်ငံများကလည်း တရုတ်သည် ရုရှား၏ လက်နက်များအတွက် အစိတ်အပိုင်းများ ထောက်ပံ့ပေးနေ ကြောင်း ကာလကြာရှည် စွပ်စွဲခဲ့ပြီး တရုတ်ကမူ ထိုစွပ်စွဲချက်များကို ငြင်းဆိုခဲ့သည်။
“ယူကရိန်းရဲ့ အနာဂတ်ဟာ နေတိုးရဲ့ လက်ထဲမှာပါ။ ကျနော်တို့ဟာ ယူကရိန်းကို အဖွဲ့ဝင်နိုင်ငံ ဖြစ်ရေးအတွက် ဆက်လက် ထောက်ခံသွားပါမယ်”ဟု နေတိုး၏ ပူးတွဲကြေညာချက်တွင် ဖော်ပြခဲ့သည်။
ထို့ပြင် နေတိုးမဟာမိတ်နိုင်ငံများက ယူကရိန်း၏ ဒီမိုကရေစီ၊ စီးပွားရေးနှင့် လုံခြုံရေးပြုပြင်ပြောင်းလဲမှုကို ကြိုဆိုခဲ့ပြီး ထိုပြောင်းလဲမှုများသည် နေတိုးအဖွဲ့၏ သတ်မှတ်ချက်များနှင့် ကိုက်ညီမည့်အချိန်တွင် ယူကရိန်းကို အဖွဲ့ဝင်အဖြစ် ဖိတ်ကြားသွားမည်ဖြစ်ကြောင်း ပြောကြားခဲ့သည်။
နေတိုးအတွင်းရေးမှူးချုပ် ဂျန်း စတိုတန်ဘာ့ချ် (Jens Stoltenberg) ကလည်း ယူကရိန်းသည် နေတိုးအဖွဲ့ထဲသို့ ချက်ချင်း ဝင်ရောက်မည် မဟုတ်သော်လည်း ရုရှားက ယူကရိန်းကို နောက်တစ်ကြိမ် မတိုက်ခိုက်ရန် သေချာ အောင် လုပ်ဆောင်သည့်အနေဖြင့် စစ်ပွဲပြီးသွားသည့် အချိန်မှသာ နေတိုးအဖွဲ့ဝင် ဖြစ်လာလိမ့်မည်ဟု ပြောကြားခဲ့သည်။
Source: အေပီ
- By CNI
- Category: နိုင်ငံရေး
- Hits: 3815
CNI International News
ဗီယင်နာ၊ ဇူလိုင် ၁၂
အိန္ဒိယဝန်ကြီးချုပ် နာရန်ဒရာ မိုဒီ (Narendra Modi) သည် ဩစတြီးယားသို့ သွားရောက်သည့် နိုင်ငံတော်ခရီးစဉ် အတွင်း နှစ်နိုင်ငံအကြား စီးပွားရေး ဆက်ဆံမှုများကို မြင့်တက်စေရန်အတွက် အိန္ဒိယတွင် ရင်းနှီးမြှုပ်နှံမှုများ ပြုလုပ်ရန် ဩစတြီးယားကုမ္ပဏီများကို ကမ်းလှမ်းခဲ့သည်ဟု Mid Day သတင်းဝက်ဘ်ဆိုက်မှ ဖော်ပြခဲ့သည်။
မိုဒီနှင့် ဩစတြီးယားဝန်ကြီးချုပ် ကားလ် နီဟမ်မာ (Karl Nehammer) သည် ဇူလိုင် ၁၀ ရက်က ဗီယင်နာ (Vienna) မြို့တော်ရှိ Hofburg နန်းတော်တွင် ဩစတြီးယား၊ အိန္ဒိယ စီအီးအိုများနှင့် အစည်းအဝေး ပြုလုပ်ကာ မိန့်ခွန်းပြောကြားခဲ့သည်။
မိုဒီသည် ဗီယင်နာရှိ အိန္ဒိယနှင့် ဩစတြီးယား ကုမ္ပဏီများအကြား ပူးပေါင်းဆောင်ရွက်မှု၏ အလားအလာကို အလေးထား ပြောဆိုခဲ့သည်ဟု အိန္ဒိယနိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ ရန်ဒီယာ ဂျိုင်စဝယ် (Randhir Jaiswal) က X လူမှုမီဒီယာတွင် ရေးသားခဲ့သည်။
အိန္ဒိယနှင့် ဩစတြီးယား ကုမ္ပဏီများအကြား အခြေခံ အဆောက်အအုံ၊ ပြန်ပြည့်မြဲစွမ်းအင်၊ သဘာဝပတ်ဝန်းကျင်၊ နည်းပညာ၊ ဆန်းသစ်တီထွင်မှုတို့ အပါအဝင် နယ်ပယ်ကဏ္ဍအသီးသီးတွင် ပူးပေါင်းဆောင်ရွက်မှုအတွက် ကြီးမာ သည့် အလားအလာကို ဝန်ကြီးချုပ်က အလေးထား ပြောဆိုခဲ့သည်ဟု အိန္ဒိယနိုင်ငံခြားရေးဝန်ကြီးဌာနက ထုတ်ပြန်ခဲ့သည်။
မိုဒီနဲ့ သြစတြီးယားဝန်ကြီးချုပ်ကို တွေ့ရစဉ်
ထိုနေ့ အစောပိုင်းကလည်း မိုဒီနှင့် နီဟမ်မာတို့သည် အိန္ဒိယ-ဩစတြီးယား စီးပွားရေး အစည်းအဝေးကို တက်ရောက်ခဲ့ပြီး ထိုအစည်းအဝေးတွင် နှစ်နိုင်ငံ ကုန်သွယ်မှုဆက်ဆံရေးများ ပိုမိုခိုင်မာစေရန်နှင့် စီးပွားရေး အခွင့်အလမ်းသစ်များအား ရှာဖွေဖော်ထုတ်ရန် နိုင်ငံစလုံးမှ စီးပွားရေးလုပ်ငန်း ၄၀ ခန့် ပါဝင်ခဲ့ကြသည်။
မိုဒီသည် ဗီယင်နာမြို့တော်သို့ ဇူလိုင် ၉ ရက် မွန်းလွဲပိုင်းက တစ်ရက်ကြာ ခရီးစဉ်အဖြစ် သွားရောက်ခဲ့ခြင်း ဖြစ်သည်ဟု ANI မှ ဖော်ပြခဲ့သည်။
ထိုခရီးစဉ်သည် မိုဒီ၏ ပထမဆုံး နိုင်ငံတော်ခရီးစဉ်ဖြစ်ပြီး ဩစတြီးယားဝန်ကြီးချုပ် နီဟမ်မာက အိန္ဒိယ၏ အခြေခံ အဆောက်အအုံနှင့် ဒစ်ဂျယ်တယ် ကဏ္ဍပြောင်းလဲမှု ဖွံ့ဖြိုးတိုးတက်နေသည့် အခြေအနေများကို ချီးကျူးခဲ့သည်ဟု ANI သတင်းဌာနက ထုတ်ပြန်ခဲ့သည်။
ထို့ပြင် ကမ္ဘာလုံးဆိုင်ရာ စီးပွားရေး အခြေအနေတွင် စီးပွားရေး မိတ်ဖက်နိုင်ငံ အသစ်များကို ရှာဖွေခြင်း၏ အရေးကြီးပုံကိုလည်း နီဟမ်မာက အလေးထား ပြောဆိုခဲ့သည်။
“လက်ရှိမှာ ကမ္ဘာ့စီးပွားရေးဟာ စိန်ခေါ်မှုရှိတဲ့ အခြေအနေနဲ့ ရင်ဆိုင်နေရပါတယ်။ ဒါကို တွန်းလှန်နိုင်ဖို့အတွက် ဩစတြီးယားဟာ စီးပွားရေးပူးပေါင်းဆောင်ရွက်မှု ပုံစံအသစ်တွေကို ရှာဖွေဖို့ အရမ်းအရေးကြီးပါတယ်”ဟု နီဟမ်မာက ပြောကြားခဲ့သည်။
Source: Mid Day
![](/images/hgjhgjfjgjhjfgj.jpg#joomlaImage://local-images/hgjhgjfjgjhjfgj.jpg)
- By CNI
- Category: နိုင်ငံရေး
- Hits: 3803
CNI International News
ခါတွန်၊ ဇူလိုင် ၁၁
ဆူဒန်နိုင်ငံတွင် စစ်တပ်နှင့် အရန်တပ် (RSF) အကြား ဖြစ်ပွားနေသည့် ပဋိပက္ခကို အဆုံးသတ်ရန် ဒေသတွင်းနှင့် နိုင်ငံတကာက ကြိုးပမ်းနေချိန်တွင် အီသီယိုပီးယားဝန်ကြီးချုပ် အဘီ အာမက် (Abiy Ahmed)သည် ဆူဒန် စစ်တပ်အကြီးအကဲ ဗိုလ်ချုပ်ကြီး အဗ္ဗဒယ် ဖာတာ အယ်ဘာဟန် (Abdel Fattah al-Burhan) နှင့် တွေ့ဆုံခဲ့ သည်ဟု အယ်လ်ဂျာဇီးယားမှ ဖော်ပြခဲ့သည်။
ဆူဒန်တွင် ၂၀၂၃ ခုနှစ်၊ ဧပြီလကတည်းက အယ်ဘာဟန်ကို သစ္စာခံသည့် စစ်တပ်နှင့် အယ်ဘာဟန်၏ လက်ထောက်ဟောင်းဖြစ်သော မိုဟာမက် ဟမ်ဒန် ဒါဂလို (Mohamed Hamdan Dagalo) အား သစ္စာခံသည့် RSF အကြား စစ်ပွဲဖြစ်ပွားခဲ့ခြင်းဖြစ်သည်။
ဇူလိုင် ၉ ရက်က အာမက်သည် ပင်လယ်နီ ဆိပ်ကမ်းမြို့ဖြစ်သည့် ပို့ဆူဒန် (Port Sudan) မြို့ကို ရောက်ရှိလာခဲ့သည်။
ထိုခရီးသည် ဆူဒန်ပဋိပက္ခ စတင်ဖြစ်ပွားခဲ့ချိန်ကတည်းက ရာထူးအမြင့်ဆုံး နိုင်ငံတော်ခရီးစဉ် တစ်ခုဖြစ်ခဲ့သည်။
အာမက်နှင့် အယ်ဘာဟန်တို့အကြား အစည်းအဝေးသည် နှစ်နိုင်ငံအကြား နက်ရှိုင်းသည့် ဆက်ဆံရေးများအတွက် သက်သေ အထောက်အထားတစ်ခုဖြစ်သည်ဟု ဆူဒန် အချုပ်အခြာအာဏာပိုင်ကောင်စီက ထုတ်ပြန်ခဲ့သည်။
အာဏာသိမ်း ဆူဒန်စစ်တပ်အကြီးအကဲနဲ့ အီသီယိုပီးယား၀န်ကြီးချုပ်ကိုတွေ့ရစဉ်
အာမက်၏ ခရီးစဉ်သည် ဆူဒန်တွင် ငြိမ်းချမ်းရေးနှင့် လုံခြုံရေးကို ရရှိစေရန် ရည်ရွယ်ခြင်းဖြစ်ကြောင်း အီသီယိုပီးယားဝန်ကြီးချုပ်၏ သတင်းပြန်ကြားရေးအရာရှိက ပြောကြားခဲ့သည်။
မည်သို့ပင်ဆိုစေ အာမက်၏ အဆိုပြုချက်များကို ရှင်းရှင်းလင်းလင်း မသိရသေးကြောင်း ပို့ဆူဒန်မှ သတင်းပေး ပို့နေသည့် အယ်လ်ဂျာဇီးယား သတင်းထောက် မိုဟာမက် ဗောလ် ( Mohamed Vall ) က ပြောကြားခဲ့သည်။
စစ်တပ်နှင့် မဟာမိတ်ဖြစ်သည့် အစိုးရဌာနများ ဖွင့်လှစ်ထားသည့် ပိုဆူဒန်မြို့တွင် ပြုလုပ်ခဲ့သော တံခါးပိတ် အစည်းအဝေးအတွင်း အယ်ဘာဟမ်က RSF အဖွဲ့၏ သောင်းကျန်းမှု၊ နိုင်ငံနှင့် နိုင်ငံ၏ အင်စတီကျူးရှင်းများကို တိုက်ခိုက်မှုနှင့် ရာဇဝတ်မှုများနှင့်ပတ်သက်ပြီး အာမက်ကို ပြောကြားခဲ့သည်။
သို့သော် ကုလသမဂ္ဂနှင့် အခြား နိုင်ငံတကာ လူ့အခွင့်အရေး အဖွဲ့များကမူ ဆူဒန်စစ်တပ်နှင့် RSF အဖွဲ့ နှစ်ဖွဲ့စလုံး သည် စစ်ရာဇဝတ်မှုများ ကျူးလွန်နေကြောင်း စွပ်စွဲခဲ့သည်။
ဆူဒန်တွင် စစ်ပွဲ စတင်ဖြစ်ပွားပြီးကတည်းက လူပေါင်း ၁၀ သန်းခန့်သည် အိမ်ပစ်ရာပစ် ထွက်ပြေးတိမ်းရှောင် ခဲ့ရကြောင်း ကုလသမဂ္ဂ ဒုက္ခသည်ဆိုင်ရာ အေဂျင်စီ (UNHCR) က ထုတ်ပြန်ခဲ့သည်။
Source: အယ်လ်ဂျာဇီးယား