- By CNI
- Category: နိုင်ငံရေး
- Hits: 1338
CNI International News
ဘေကျင်း၊ ဇူလိုင် ၁
ထိုင်ဝမ်ဒေသခံ အများစုအနေဖြင့် တရုတ်ပြည်မကြီးသို့ စိုးရိမ်ပူပန်စရာမလိုဘဲ စိတ်ချလက်ချ လာရောက်နိုင် ကြောင်း တရုတ်အစိုးရက ပြောကြားခဲ့သည်ဟု CNA သတင်းဌာနမှ ဖော်ပြခဲ့သည်။
ထိုင်ဝမ်လူထုကို တရုတ်သို့ မသွားရန် သတိပေးခဲ့သည့် ထိုင်ဝမ်အာဏာပိုင်များကို တရုတ်က ရှုတ်ချခဲ့သည်။
တရုတ်သည် ထိုင်ဝမ်၏ တယူသန် ခွဲထွက်ဝါဒီများကို ကွပ်မျက်မည်ဟု ခြိမ်းခြောက်ခဲ့ပြီးနောက် ထိုင်ဝမ်က ၎င်း၏ဒေသခံများကို တရုတ်သို့ ခရီးသွားလာရေးနှင့်ပတ်သက်ပြီး သတိပေးနှိုးဆော်ချက် ထုတ်ပြန်ခဲ့ခြင်း ဖြစ်သည်။
ထိုင်ဝမ်လွတ်လပ်ရေး ခွဲထွက်ဝါဒီများအတွက် အလွန်ဆိုးရွားသည့် အမှုများတွင် သေဒဏ်ပေးမည်ဖြစ်ပြီး တရားစွဲဆိုမှုများ ပြုလုပ်မည်ဟု ခြိမ်းခြောက်ထားသည့် တရားရေးဆိုင်ရာ လမ်းညွှန်ချက်များကို တရုတ်က ကြေညာခဲ့ခြင်းဖြစ်သည်။
ထို့နောက် ထိုင်ဝမ်အာဏာပိုင်များက ထိုင်ဝမ်ဒေသခံများကို တရုတ်ပြည်မကြီး၊ ဟောင်ကောင်နှင့် မက္ကာအို ဒေသများသို့ မလိုအပ်ဘဲ ခရီးမသွားကြရန် သတိပေးချက် ထုတ်ပြန်ခဲ့သည်။
ထိုင်ဝမ်အလံများ လွှင့်ထူထားစဉ်
ဇွန်လ ၂၈ ရက်တွင် တရုတ်၏ ထိုင်ဝမ်ရေးရာရုံးက ထုတ်ပြန်ခဲ့သည့် အစီရင်ခံစာတွင် ထိုတရားရေးဆိုင်ရာ လမ်းညွှန်ချက်များသည် ထိုင်ဝမ်ရှိ ဆိုးယုတ်သည့် စကားများ၊ လုပ်ရပ်များကို ပြောဆိုလုပ်ဆောင်နေသည့် အနည်းငယ်သော ခွဲထွက်ဝါဒီများကိုသာ ရည်ရွယ်ခြင်းဖြစ်ကြောင်း ဖော်ပြခဲ့သည်။
“ထိုင်ဝမ် တစ်နယ်တည်းသားတွေ အများစုဟာ ရေလက်ကြား ဖြတ်ကျော်ဆက်ဆံမှုတွေနဲ့ ပူးပေါင်းဆောင်ရွက် မှုတွေ လုပ်ဆောင်နိုင်ပါတယ်။ သူတို့အနေနဲ့ စိုးရိမ်စရာမလိုဘဲ ပြည်မကြီးကို ဝင်ထွက်သွားလာနိုင်ပါတယ်”ဟု ထုတ်ပြန်ချက်တွင် ဖော်ပြခဲ့သည်။
တရုတ်၏ တရားရုံးများသည် ထိုင်ဝမ်တွင် တရားစီရင်ပိုင်ခွင့် မရှိသည့်တိုင် မည်သည့် နေရာတွင်မဆို ရှိနေသည့် ထိုင်ဝမ်ခွဲထွက်ဝါဒီများကို တရားရေးအရ အရေးယူမည့် လမ်းညွှန်ချက်များ ထုတ်ပြန်ခဲ့ခြင်းဖြစ်သည်။
တရုတ်သည် ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ကြေညာထားပြီး လိုအပ်လာပါက အင်အားသုံးပြီး သိမ်းယူသွားမည်ဟု ခြိမ်းခြောက်ခဲ့သည်။
ထိုင်ဝမ်ကမူ တရုတ်၏ အချုပ်အခြာ အာဏာပိုင်ကြောင်း ကြေညာချက်ကို ငြင်းဆိုခဲ့ပြီး ထိုင်ဝမ်၏ အနာဂတ်ကို ထိုင်ဝမ်ဒေသခံများကသာ ဆုံးဖြတ်ပိုင်ခွင့်ရှိသည်ဟု ပြောကြားခဲ့သည်။
Source: CAN
- By CNI
- Category: နိုင်ငံရေး
- Hits: 840
CNI International News
ဆိုးလ်၊ ဇူလိုင် ၁
တောင်ကိုရီးယား၊ ဂျပန်နှင့် အမေရိကန်တို့သည် အာရှနေတိုးအဖွဲ့ပုံစံကို ထူထောင်နေကြောင်း မြောက်ကိုရီးယား က ပြောကြားခဲ့သည်ဟု ရိုက်တာမှ ဖော်ပြထားသည်။
အဆိုပါ ၃ နိုင်ငံအကြား ယခုလအတွင်း ပြုလုပ်နေသည့် ပူးတွဲစစ်ရေးလေ့ကျင့်မှုများကိုလည်း မြောက်ကိုရီးယားက ဝေဖန်ခဲ့သည်။
ဇွန်လ ၂၇ ရက်က အမေရိကန်၊ ဂျပန်နှင့် တောင်ကိုရီးယားတို့သည် Freedom Edge အမည်ရှိ အကြီးစား ပူးတွဲ စစ်ရေး လေ့ကျင့်မှုများကို ပြုလုပ်ခဲ့သည်။
ထိုစစ်ရေး လေ့ကျင့်မှုများတွင် အမေရိကန်၏ နျူကလီးယားစွမ်းအင်သုံး လေယာဉ်တင်သင်္ဘောဖြစ်သည့် Theodore Roosevelt နှင့် ဂျပန်၊ တောင်ကိုရီးယားရေတပ်တို့၏ ဖျက်သင်္ဘောများ၊ တိုက်လေယာဉ်များ ပါဝင်ခဲ့သည်။
မြောက်ကိုရီးယား ခေါင်းဆောင် ကင်မ်ကိုတွေ့ရစဉ်
မြောက်ကိုရီးယား၏ လက်နက် စမ်းသပ်မှုများကြောင့် ကိုရီးယားကျွန်းဆွယ်ပေါ်တွင် တင်းမာမှုများ မြင့်တက်နေ ချိန်တွင် အမေရိကန်၊ တောင်ကိုရီးယားနှင့် ဂျပန်တို့သည် ပြီးခဲ့သည့်နှစ်က အမေရိကန်နိုင်ငံ Camp David စစ်စခန်း၌ ပြုလုပ်ခဲ့သည့် သုံးပွင့်ဆိုင် အစည်းအဝေးတွင် ပူးတွဲစစ်ရေး လေ့ကျင့်မှုများ ပြုလုပ်ရန် သဘောတူ ခဲ့ကြခြင်းဖြစ်သည်။
မြောက်ကိုရီးယား အနေဖြင့် အမေရိကန်နှင့် ၎င်း၏မဟာမိတ်များ ဦးဆောင်သည့် စစ်အင်အားမြှင့်တင်မှုကို လျစ်လျူရှုသွားမည် မဟုတ်ဘဲ ဒေသတွင်း ငြိမ်းချမ်းရေးကို ကာကွယ်သွားမည်ဖြစ်ကြောင်း မြောက်ကိုရီးယား နိုင်ငံခြားရေးဝန်ကြီးဌာနက ထုတ်ပြန်ခဲ့သည်။
အမေရိကန်သည် ဂျပန်နှင့် တောင်ကိုရီးယားကို နေတိုးအဖွဲ့နှင့် ချိတ်ဆက်မှုရှိစေရန် ကြိုးပမ်းနေကြောင်း တောင်ကိုရီးယားသည် ယူကရိန်းစစ်ပွဲတွင် ယူကရိန်းကို လက်နက်များ ထောက်ပံ့ပေးရန် ကြိုးပမ်းနေခြင်းသည် နေတိုးအဖွဲ့၏ အစီအစဉ်အတိုင်း လိုက်နာလုပ်ဆောင်လိုသည့် အထောက်အထားဖြစ်ကြောင်း ထုတ်ပြန်ချက်၌ ဖော်ပြခဲ့သည်။
တောင်ကိုရီးယား ကာကွယ်ရေးဝန်ကြီးဌာနကမူ မြောက်ကိုရီးယား၏ ဝေဖန်မှုများကို ငြင်းဆိုခဲ့ပြီး Freedom Edge စစ်ရေး လေ့ကျင့်မှုသည် မြောက်ကိုရီးယား၏ နျူကလီးယားနှင့် ဒုံးကျည်စီမံကိန်းကို တုန့်ပြန်ရန်ဖြစ် ကြောင်း ပြောကြားခဲ့သည်။
အမေရိကန်ရဲ့ လေယာဉ်တင် သင်္ဘောကိုတွေ့ရစဉ်
ထို့ပြင် မြောက်ကိုရီးယားနှင့် ရုရှားအကြား အပြန်အလှန် ကာကွယ်ရေး သဘောတူစာချုပ် ချုပ်ဆိုမှုကို ဆန့်ကျင် သည့်အနေဖြင့် ယူကရိန်းသို့ လက်နက်များ ထောက်ပံ့ပေးနိုင်ခြေရှိသည့် အစီအစဉ်ကို စဉ်းစားသွားမည်ဖြစ် ကြောင်း တောင်ကိုရီးယားက ပြောကြားခဲ့သည်။
မြောက်ကိုရီးယားသည် ယူကရိန်းစစ်ပွဲတွင် ရုရှားအား လက်နက်များ ထောက်ပံ့ပေးနေသည်ဟု အမေရိကန်နှင့် တောင်ကိုရီးယားတို့က စွပ်စွဲခဲ့ပြီး မြောက်ကိုရီးယားနှင့် ရုရှားတို့ကမူ ထိုစွပ်စွဲချက်များကို ငြင်းဆိုထားသည်။
မြောက်ကိုရီးယားသည် အမေရိကန်နှင့် တောင်ကိုရီးယားတို့၏ ပူးတွဲစစ်ရေး လေ့ကျင့်မှုများကို အမြဲလိုလို ဝေဖန် ရှုတ်ချလေ့ရှိပြီး ထိုစစ်ရေး လေ့ကျင့်မှုများသည် ကျူးကျော်စစ်အတွက် အစမ်းလေ့ကျင့်မှုများဖြစ်သည်ဟု စွပ်စွဲ ခဲ့သည်။
Source: ရိုက်တာ
![](/images/thdjdejnetdhnje.jpg#joomlaImage://local-images/thdjdejnetdhnje.jpg)
- By CNI
- Category: နိုင်ငံရေး
- Hits: 1363
CNI International News
ဘေကျင်း၊ ဇူလိုင် ၁
တရုတ်နိုင်ငံတွင် ပြီးခဲ့သည့်ရက်ပိုင်းက ကာကွယ်ရေးဝန်ကြီးဟောင်းနှစ်ဦးကို အဂတိလိုက်စားမှု စွဲချက်များဖြင့် စုံစမ်းစစ်ဆေးမှုများပြုလုပ်ကြောင်း ကြေညာခဲ့ပြီးနောက် ကွန်မြူနစ်ပါတီ၏ ခေါင်းဆောင်ပိုင်းများအကြား အဂတိ လိုက်စားမှုအပေါ် ဒေါသတကြီး တိုက်ဖျက်နေသည့် အခြေအနေသည် ပိုမိုရှုပ်ထွေးလာခဲ့သည်ဟ်ု South China Morning Post မှ ဖော်ပြခဲ့သည်။
တရုတ်ခေါင်းဆောင်များက အဂတိလိုက်စားမှုသည် တရုတ်၏ တိုက်ခိုက်နိုင်စွမ်းနှင့် နျူကလီးယား အဟန့်အတား များအတွက် ခြိမ်းခြောက်မှုဖြစ်နေသည်ဟု ရှုမြင်ထားကြကြောင်း ကျွမ်းကျင်သူများက ပြောကြားခဲ့သည်။
မကြုံစဖူး လုပ်ဆောင်ချက် တစ်ရပ်အဖြစ် ကွန်မြူနစ်ပါတီတွင် အဖွဲ့ဝင် ၂၄ ဦး ပါဝင်သည့် ပေါ်လစ်ဗျူရိုသည် ကာကွယ်ရေးဝန်ကြီးချုပ်ဟောင်း နှစ်ဦးဖြစ်သည့် ဝေ့ဖန်ဂီ (Wei Fenghe) နှင့် လီရှန်ဖူ (Li Shangfu) တို့ကို အဂတိလိုက်စားမှုဆိုင်ရာ စုံစမ်းစစ်ဆေးမှုများ ပြုလုပ်ရန် ဆုံးဖြတ်ခဲ့သည်။
ဝေ့နှင့် လီတို့သည် စစ်တပ်၏ ရှေ့နေများထံမှ ပြစ်မှုဆိုင်ရာ စွဲချက်များနှင့်လည်း ရင်ဆိုင်ရဖွယ်ရှိသည်။
တရုတ်သမ္မတ ရှီကျင့်ဖျင်ကို တွေ့ရစဉ်
ဝေ့သည် ၂၀၁၈ ခုနှစ်၊ မတ်လမှ ၂၀၂၃ ခုနှစ်၊ မတ်လအထိ ကာကွယ်ရေးဝန်ကြီးအဖြစ် တာဝန်ထမ်းဆောင်ခဲ့ပြီး လီသည် ၂၀၂၃ ခုနှစ်၊မတ်လမှ အောက်တိုဘာလအထိ တာဝန်ထမ်းဆောင်ခဲ့ကာ ရာထူးမှ ထုတ်ပယ်ခံခဲ့ရသည်။
ဝေ့နှင့် လီတို့သည် ကွန်မြူနစ်ပါတီနှင့် ဗဟိုစစ်ကော်မရှင်တို့၏ ယုံကြည်မှုအပေါ် သစ္စာမဲ့ခဲ့ပြီး စစ်တပ်၏ နိုင်ငံရေး အခြေအနေကို ညစ်နွမ်းစေခဲ့ကာ ပါတီ၏လမ်းစဉ်၊ အမျိုးသားကာကွယ်ရေး၊ စစ်တပ်၏ ဖွဲ့စည်းပုံနှင့် ထိပ်သီး ခေါင်းဆောင်များ၏ ပုံရိပ်ကို ထိခိုက်စေခဲ့သည်ဟု တရုတ်နိုင်ငံပိုင် ဆင်ဟွာသတင်းအေဂျင်စီက ဖော်ပြခဲ့သည်။
ထိုကဲ့သို့ သုံးနှုန်းဖော်ပြမှုများသည် တရုတ်သမ္မတ ရှီကျင့်ဖျင် (Xi Jinping) ၏ ပထမသက်တမ်းအတွင်း အဂတိ လိုက်စားမှုကြောင့် ထုတ်ပယ်ခံခဲ့ရသည့် ဗဟိုစစ်ကော်မရှင် ဒုဥက္ကဋ္ဌဟောင်း နှစ်ဦးကို သုံးနှုန်းဖော်ပြခဲ့သည့် ဝေဖန် ရှုတ်ချသည့် စကားလုံးများထက် ပိုမိုကြမ်းတမ်းခဲ့သည်။
တရုတ် ကာကွယ်ရေးဝန်ကြီးဟောင်း ဝေ့ဖန်ဂီကို တွေ့ရစဉ်
လီသည် စစ်ဘက်ဆိုင်ရာ လိုအပ်သည့် ပစ္စည်းများဝယ်ယူမှုတွင် အကျင့်ပျက်ခြစားမှု သံသယဖြင့် စုံစမ်းစစ်ဆေး ခံခဲ့ရကြောင်း ပြီးခဲ့သည့်နှစ်က ရိုက်တာသတင်းဌာနက ဖော်ပြခဲ့သည်။
တရုတ်ပြည်သူ့လွတ်မြောက်ရေးတပ်မတော် (PLA) ဗိုလ်ချုပ်ကြီး ၁၁ ဦးနှင့် လေကြောင်းအာကာသ ကာကွယ်ရေး လုပ်ငန်း အုပ်ချုပ်ရေး အဖွဲ့ဝင်အချို့သည် အမျိုးသားဥပဒေပြုရေးအဖွဲ့မှ ဖယ်ရှားခံခဲ့ရမှုနှင့်အတူ ပြီးခဲ့သည့်နှစ်က စပြီး တရုတ်စစ်တပ်သည် အကျင့်ပျက်ခြစားမှု တိုက်ဖျက်ရေး ပြုလုပ်ခဲ့ပြီး ရာထူးမှ ထုတ်ပယ်မှုများ ပြုလုပ်ခဲ့ သည်။
လီ မတိုင်မီ ကာကွယ်ရေးဝန်ကြီးအဖြစ် တာဝန်ထမ်းဆောင်ခဲ့သည့် ဝေ့သည် ပြီးခဲ့သည့်နှစ် မတ်လက အစိုးရအဖွဲ့ ပြင်ဆင်ဖွဲ့စည်းမှုအတွင်း ရာထူးမှ အစားထိုးခံခဲ့ရပြီးကတည်းက လူထုမြင်ကွင်းမှ ပျောက်ကွယ်နေခဲ့သူ ဖြစ်သည်။
Source: SCMP
![](/images/hjfghfghjgfjhgjfhgj.jpg#joomlaImage://local-images/hjfghfghjgfjhgjfhgj.jpg)
- By CNI
- Category: နိုင်ငံရေး
- Hits: 3792
CNI International News
လာပက်ဇ်၊ ဇွန်လ ၂၉
ဘိုလီဗီးယားနိုင်ငံတွင် ဖြစ်ပွားခဲ့သည့် အာဏာသိမ်းရန် ကြိုးပမ်းခဲ့သည့် ဖြစ်စဉ်နှင့်ပတ်သက်ပြီး ထောက်လှမ်းရေး သတင်းများ ကြိုရခဲ့ခြင်းမရှိကြောင်း ဘိုလီဗီးယားသမ္မတ လူးဝစ် အာရ်စီ (Luis Arce) က ပြောကြားခဲ့ကြောင်း ရိုက်တာမှ ဖော်ပြခဲ့သည်။
အာဏာသိမ်းရန် ကြိုးပမ်းမှုဖြင့် ဖမ်းဆီးခံခဲ့ရသည့် စစ်ဘက်တပ်မှူးဟောင်းဖြစ်သူ ဟွမ် ဟိုဆေး ဇူနီဂါ (Juan Jose Zuniga) က သမ္မတအာရ်စီသည် လူထုထောက်ခံမှု မြင့်တက်စေရန်အတွက် ၎င်းကို အာဏာသိမ်းရန် ခိုင်းစေခဲ့ခြင်းဖြစ်သည်ဟု စွပ်စွဲခဲ့ပြီးနောက် ထိုစွပ်စွဲချက်များကို အာရ်စီက ငြင်းဆိုခဲ့သည်။
“ဒီဖြစ်စဉ်နဲ့ပတ်သက်ပြီး သူ့ရဲ့ ရည်ရွယ်ချက်ကို ကျနော်တို့ ဘယ်တုန်းကမှ မသိခဲ့ရပါဘူး။ ကျနော်တို့ အံ့အားသင့် ခဲ့ရပါတယ်” ဟု အာရ်စီက အစိုးရဌာနချုပ်တွင် ပြုလုပ်သည့် သတင်းစာ ရှင်းလင်းပွဲတွင် သတင်းထောက်များကို ပြောကြားခဲ့သည်။
အာဏာသိမ်းရန် ကြိုးပမ်းစဉ် ဖမ်းခံလိုက်ရသည့် ဗိုလ်ချုပ်ကြီး ဟွမ် ဟိုဆေး ဇူနီဂါကို တွေ့ရစဉ်
ဇွန်လ ၂၆ ရက်က ဇူနီဂါသည် လာပက်ဇ် (La Paz) မြို့တော်ရှိ အဓိကရင်ပြင်တွင် စစ်သားများကို စုဆောင်းခဲ့ပြီး ကျည်ကာကားတစ်စီးက အစိုးရအဖွဲ့ဌာနချုပ်၏ ဂိတ်တံခါးကို ဝင်တိုက်နေသည့် ဗွီဒီယို မှတ်တမ်းများ ထွက်ပေါ်ခဲ့ သည်။
ထိုဖြစ်စဉ် ဖြစ်ပွားပြီးနောက် မကြာမီအချိန်မှာပင် ဇူနီဂါသည် ဖမ်းဆီးခံခဲ့ရသည်။ သူသည် သမ္မတ၏ ခိုင်းစေချက် ဖြင့် ထိုသို့ လုပ်ဆောင်ရခြင်း ဖြစ်သည်ဟု သတင်းထောက်များကို ပြောကြားခဲ့သည်။
အာရ်စီသည် နိုင်ငံအတွင်း ပဋိပက္ခအခြေအနေကို ထိန်းချုပ်ရန် ရည်ရွယ်ချက်ဖြင့် အသုံးပြုလေ့ရှိသည့် ကျည်ကာ ကားများကို စုဝေးခေါ်ယူရန် အာဏာမသိမ်းမီ ၃ ရက်အလိုကတည်းက ညွှန်ကြားခဲ့ကြောင်း ဇူနီဂါက ရဲတပ်ဖွဲ့ကို ပြောကြားခဲ့သည်ဟု ဒေသခံမီဒီယာဖြစ်သည့် Fides သတင်းအေဂျင်စီက ဖော်ပြခဲ့သည်။
အာဏာသိမ်းရန် ကြိုးပမ်းစဉ် ဖမ်းခံလိုက်ရသူတစ်ဦးကို တွေ့ရစဉ်
ထိုဖြစ်စဉ် မဖြစ်ပွားမီက အစိုးရအဖွဲ့သည် အကြောင်းစုံကို မသိရသေးသည့်တိုင် အာရ်စီသည် တည်ငြိမ်မှုပျက်ပြား စေမည့် ကြိုးပမ်းမှုများနှင့် ပတ်သက်သည့် သတင်းများ ရရှိခဲ့သည်ဟု ပြည်ထဲရေးဝန်ကြီး အယ်ဒိုရာဒို ဒယ် ကက်စတီလို (Eduardo del Castillo) က ဇွန်လ ၂၇ ရက်တွင် ပြုလုပ်သည့် အင်တာဗျူးတစ်ခု၌ ပြောကြားခဲ့ သည်။
အာရ်စီကမူ ဇူနီဂါသည် သူ့သဘောနှင့်သူ လုပ်ဆောင်ခဲ့ခြင်းဖြစ်ကြောင်း ပြောကြားခဲ့သည်။
ထိုသတင်းများ ထွက်ပေါ်လာချိန်တွင် အာရ်စီ၏ နိုင်ငံရေး ပြိုင်ဘက်ဖြစ်သည့် သမ္မတဟောင်း အီဗို မိုရာလက်စ် (Evo Morales) က အာရ်စီကို သတိပေးစကားဆိုခဲ့သည်။
ဇူနီဂါနှင့်အတူ ရေတပ်တပ်မှူးဟောင်း ဟွမ် အားနက်ဇ် ဆယ်လ်ဗေးဒိုး (Juan Arnez Salvador) လည်း ဖမ်းဆီးခံ ရပြီး နောက်ထပ် သံသယရှိသူ ၁၇ ဦးကို ထပ်မံဖမ်းဆီး ထိန်းသိမ်းခဲ့ကြောင်း တာဝန်ရှိသူများက ပြောကြားခဲ့သည်။
Source: ရိုက်တာ
![](/images/hgjfghjghhgjgfhj.jpg#joomlaImage://local-images/hgjfghjghhgjgfhj.jpg)
- By CNI
- Category: နိုင်ငံရေး
- Hits: 145
CNI International News
အတ္တလန္တာ၊ ဇွန်လ ၂၉
အမေရိကန်သမ္မတ ရွေးကောက်ပွဲမတိုင်မီ ကိုယ်စားလှယ်လောင်း နှစ်ဦးအကြား စကားစစ်ထိုးပွဲများ ပြုလုပ်လေ့ ရှိသည့် အစဉ်အလာအတိုင်း အမေရိကန်သမ္မတ ဂျိုးဘိုင်ဒန် (Joe Biden) နှင့် သမ္မတဟောင်း ဒေါ်နယ်ထရမ့် (Donald Trump) တို့သည် ဇွန်လ ၂၇ ရက်နေ့ ညပိုင်းက စကားစစ်ထိုးပွဲ ပြုလုပ်ခဲ့သည်ဟု ရိုက်တာမှ
ဖော်ပြခဲ့ သည်။
ဂျော်ဂျီယာ (Georgia) ပြည်နယ်၊ အတ္တလန္တာ (Atlanta) မြို့တွင် ပြုလုပ်သည့် အဆိုပါ စကားစစ်ထိုးပွဲတွင် ဘိုင်ဒန် နှင့် ဒေါ်နယ်ထရမ့်တို့သည် ကိုယ်ဝန်ဖျက်ချခွင့်၊ စီးပွားရေးကို စီမံကိုင်တွယ်မှုများနှင့်ပတ်သက်ပြီး တစ်ဦးနှင့်တစ်ဦး ဝေဖန်တိုက်ခိုက်ခဲ့ကြသည်။
ထိုစကားစစ်ထိုးပွဲတွင် ဒီမိုကရက်တစ် ကိုယ်စားလှယ်လောင်း ဘိုင်ဒန်သည် အသံဝင်ခြင်း၊ စကားထစ်ခြင်းတို့ ရှိခဲ့ပြီး ရီပတ်ဘလစ်ကန် ကိုယ်စားလှယ်လောင်း ဒေါ်နယ်ထရမ့်သည် ရွှေ့ပြောင်းနေထိုင်သူများ အပါအဝင် အရေးကိစ္စ အများအပြားတွင် မှန်ကန်မှုမရှိသည့် စကားများကို ပြောဆိုခဲ့သည်။
ဘိုင်ဒန်နဲ့ ဒေါ်နယ်ထရမ့် စကားစစ်ထိုးပွဲကို ကြည့်နေကြစဉ်
အသက် ၈၁ နှစ်အရွယ် ဘိုင်ဒန်နှင့် ၇၈ နှစ်အရွယ် ဒေါ်နယ်ထရမ့်တို့၏ စကားစစ်ထိုးပွဲတွင် အမေရိကန် သမိုင်း တစ်လျှောက် အသက်အကြီးဆုံး သမ္မတရွေးကောက်ပွဲဝင် ကိုယ်စားလှယ်လောင်းများ၏ စကားစစ်ထိုးပွဲအဖြစ် မှတ်တမ်းဝင်ခဲ့သည်။
ဒေါ်နယ်ထရမ့်သည် တရားရုံးချုပ်တွင် ရှေးရိုးစွဲဝါဒီများကို ခန့်အပ်ခြင်းဖြင့် နိုင်ငံတစ်ဝန်း ကိုယ်ဝန်ဖျက်ချခွင့်ကို တားမြစ်ပိတ်ပင်ခဲ့ကြောင်း ဘိုင်ဒန်က ဝေဖန်ပြောဆိုခဲ့သည်။
ဒေါ်နယ်ထရမ့်ကလည်း ဘိုင်ဒန်သည် ကိုယ်ဝန်ဖျက်ချမှုနှင့် ပတ်သက်ပြီး မည်သည့် တားမြစ်ကန့်သတ်ချက်ကို မဆို ထောက်ခံလိမ့်မည် မဟုတ်ကြောင်း၊ ထိုအရေးကိစ္စသည် လမ်းကြောင်းမှန်ပေါ် ရောက်နေသည့် နိုင်ငံကို နောက်ပြန်ဆွဲခြင်းဖြစ်ကြောင်း တုန့်ပြန်ခဲ့သည်။
ဘိုင်ဒန်နဲ့ ဒေါ်နယ်ထရမ့် စကားစစ်ထိုးပွဲ လုပ်နေကြစဉ်
ထို့ပြင် ဒေါ်နယ်ထရမ့်က ဘိုင်ဒန်သည် အမေရိကန် တောင်ပိုင်းဒေသကို ကာကွယ်ရန် ပျက်ကွက်ခဲ့ပြီး ရာဇဝတ် သမားများ (ရွှေ့ပြောင်းများကို ရည်ညွှန်း) ကို ဝင်ခွင့်ပြုထားကြောင်း ပြောကြားခဲ့သည်။
“ဘိုင်ဒန်ဟာ ရွှေ့ပြောင်းနေထိုင်သူ အရေးမှာ ရာဇဝတ်မှု ကျူးလွန်တယ်လို့ ကျနော် ပြောချင်ပါတယ်” ဟု ဒေါ်နယ်ထရမ့်က ပြောကြားခဲ့သည်။
ဒေါ်နယ်ထရမ့်၏ ပြောဆိုမှုကို တုန့်ပြန်ရာတွင် ဘိုင်ဒန်က “သူ (ထရမ့်) ဟာ နောက်တကြိမ် ပုံကြီးချဲ့ပြော နေတာပါ။ သူလိမ်ပြောနေတာပါ” ဟု ပြောကြားခဲ့သည်။
CNN သတင်းဌာနမှ ထုတ်လွှင့်သည့် မိနစ် ၉၀ ကြာ စကားစစ်ထိုးပွဲသည် မျက်မှောက်ခေတ် သမ္မတရွေးကောက်ပွဲ အကြို စကားစစ်ထိုးပွဲများတွင် အစောဆုံးပြုလုပ်ခဲ့သည့် စကားစစ်ထိုးပွဲဖြစ်ပြီး နိုဝင်ဘာ ၅ ရက် ရွေးကောက်ပွဲ မတိုင်မီ ၄ လကျော်အလိုတွင် ပြုလုပ်ခဲ့ခြင်းဖြစ်သည်။
Source: ရိုက်တာ
- By CNI
- Category: နိုင်ငံရေး
- Hits: 375
CNI International News
ဝါရှင်တန်၊ ဇွန်လ ၂၉
တရုတ်၏ လုံခြုံရေးခြိမ်းခြောက်မှုများ၊ မျှတမှုမရှိသည့် ကုန်သွယ်ရေး အစီအစဉ်များနှင့်ပတ်သက်ပြီး အမေရိကန် အောက်လွှတ်တော်က ဇွန်လ ၂၆ ရက်တွင် ကြားနာစစ်ဆေးမှု ပြုလုပ်ခဲ့သည်ဟု South China Morning Post မှ ဖော်ပြခဲ့သည်။
အဆိုပါ ကြားနာစစ်ဆေးမှုအတွင်း တရုတ်လုပ် လျှပ်စစ်ကားများကို အမေရိကန်စျေးကွက်အတွင်း အရေအတွက် ကန့်သတ်ရေး၊ တရုတ်လုပ် တစ်ပိုင်းလျှပ်ကူးပစ္စည်းများနှင့် အစိတ်အပိုင်းများကို အမေရိကန်စျေးကွက်အတွင်း ပိတ်ပင်ရေး၊ အမေရိကန် ဆိပ်ကမ်းများတွင် ဆိုက်ကပ်မည့် တရုတ်လုပ်သင်္ဘောများကို အခကြေးငွေများ ပိုမို ကောက်ခံရေး အစရှိသည့် ကိစ္စရပ်များ ပါဝင်ခဲ့သည်။
ထို့ပြင် တရုတ်နည်းပညာကဏ္ဍ၏ မျှတမှုမရှိသည့် ကုန်သွယ်ရေး အစီအစဉ်များနှင့် အမျိုးသားလုံခြုံရေး အန္တရာယ် များကို ဖြေရှင်းရန် လိုအပ်ကြောင်းကိုလည်း ဖက်ဒရယ်အရာရှိများနှင့် အောက်လွှတ်တော်အဖွဲ့ဝင်များက ပြောကြားခဲ့သည်။
အမေရိကန်ကုန်သွယ်ရေးဝန်ကြီး ဂျီနာ ရိုင်မွန်ဒို (Gina Raimondo) က ယခုနှစ်ကုန်ပိုင်းတွင် တရုတ်၏ လျှပ်စစ် ကားများနှင့်ပတ်သက်ပြီး အချက်အလက် စုဆောင်းမှုများအပေါ် စည်းကမ်းများ ထုတ်ပြန်ရန် ရည်ရွယ်ထား ကြောင်း ပြောကြားခဲ့သည်။
တရုတ်ပို့ကုန်များကိုတွေ့ရစဉ်
“အမေရိကန်ရဲ့ လမ်းတွေပေါ်မှာ တရုတ်လုပ်ကားတွေ ၁ သန်းရှိပြီဆိုပါစို့။ အဲဒီကားတွေဟာ အချင်းချင်း ချိတ်ဆက်မှုရှိရှိနဲ့ အမေရိကန်နိုင်ငံသားတွေရဲ့ အချက်အလက်တွေကို စုဆောင်းပြီး တရုတ်နိုင်ငံကို ပြန်လည် ပေးပို့နေမယ်ဆိုရင် ကျမတို့အနေနဲ့ တင်းတင်းကျပ်ကျပ် ကိုင်တွယ်ရမှာပါ” ဟု ရိုင်မွန်ဒိုက ပြောကြားခဲ့သည်။
အမေရိကန်ကုန်သွယ်ရေးဝန်ကြီးဌာနက ရေးဆွဲနေသည့် စည်းမျဉ်းစည်းကမ်း မူကြမ်းများသည် အမေရိကန်၏ လမ်းများပေါ်မှ တရုတ်လုပ် လျှပ်စစ်ကားများကို ပိတ်ပင်မှုမှအစ ထိုကားများ၏ ဆော့ဖ်ဝဲများအထိ လွှမ်းခြုံ သက်ရောက်သည့် စည်းကမ်းများ ပါဝင်သည်ဟု ၎င်းက ပြောကြားခဲ့သည်။
နောက်ထပ် ကြားနာစစ်ဆေးမှု တစ်ခုတွင်လည်း လွှတ်တော်အမတ်များက တစ်ပိုင်းလျှပ်ကူးပစ္စည်းများ၊ သင်္ဘော တည်ဆောက်မှုနှင့် ဒရုန်းများ ထုတ်လုပ်မှုနယ်ပယ်တွင် တရုတ်၏ လွှမ်းမိုးမှုကို လျှော့ချရန် အမေရိကန် ကျွမ်းကျင်သူများထံမှ အဆိုပြုချက်များကို နားထောင်ခဲ့ကြသည်။
အမေရိကန်နဲ့တရုတ် ကိုယ်စားလှယ်များကိုတွေ့ရစဉ်
အီလီနွိုက်စ် (Illinois) ပြည်နယ် လွှတ်တော်ကိုယ်စားလှယ် ရာဂျာ ခရစ္စနာမိုရ်သီ (Raja Krishnamoorthi) ကလည်း တရုတ်၏ စိန်ခေါ်မှုများကို ဖြေရှင်းနိုင်ခြင်းမရှိပါက အန္တရာယ်ကို ဖိတ်ခေါ်ရာ ရောက်လိမ့်မည်ဟု ပြောကြားခဲ့သည်။
တရုတ်၏ စျေးပေါသည့် ကုန်ထုတ်လုပ်မှုကဏ္ဍမှ ထွက်ရှိသည့် သွင်းကုန်များ မြင့်တက်လာမှုကြောင့် စျေးကွက် မတည်တငြိမ်ဖြစ်မှုကို လျှော့ချရန် ကာလတို ထုတ်ပြန်ထားသော အခွန်ဥပဒေပုဒ်မ ၄၂၁ ကို ပြန်လည် အသက် သွင်းရန် အချိန်ကျပြီဖြစ်ကြောင်းလည်း ခရစ္စနာမိုရ်သီက ပြောကြားခဲ့သည်။
ထိုဥပဒေပုဒ်မသည် ၂၀၂၃ ခုနှစ်က သက်တမ်းကုန်ခဲ့ခြင်းဖြစ်သည်။
Source: SCMP
![](/images/hgjhgjhghjfhjfhgj.jpg#joomlaImage://local-images/hgjhgjhghjfhjfhgj.jpg)
- By CNI
- Category: နိုင်ငံရေး
- Hits: 442
CNI International News
လာပက်ဇ်၊ ဇွန်လ ၂၈
ဘိုလီဗီးယားနိုင်ငံတွင် ဇွန်လ ၂၆ ရက်က အာဏာသိမ်းရန် ကြိုးပမ်းမှုတစ်ခု ဖြစ်ပွားခဲ့သော်လည်း အောင်မြင်ခြင်း မရှိခဲ့ဘဲ သမ္မတ လူးဝစ် အာရ်စီ (Luis Arce) ၏ အစိုးရအဖွဲ့ကပဲ အာဏာကို ဆက်လက် ထိန်းသိမ်းနိုင်ခဲ့သည်ဟု အေပီမှ ဖော်ပြခဲ့သည်။
ကျွမ်းကျင်သူများကမူ ထိုအာဏာသိမ်းရန် ကြိုးပမ်းမှုကို ဖြစ်စေခဲ့သည့် နောက်ကွယ်မှ အကြောင်းရင်းခံများအား လေ့လာလျက်ရှိပြီး ငွေကြေးဖောင်းပွမှု၊ ဖွံ့ဖြိုးတိုးတက်မှုနှေးကွေးမှုတို့ကြောင့် နိုင်ငံအတွင်း တင်းမာမှုများ မြင့်တက်လာခဲ့သည်ဟု ယူဆခဲ့ကြသည်။
ဘိုလီဗီးယား၏ စီးပွားရေးဖွံ့ဖြိုးတိုးတက်မှုသည် ၂၀၁၀ ပြည့်နှစ်မှစပြီး နှစ်စဉ် ၄ ရာခိုင်နှုန်းနီးပါး မြင့်တက်ခဲ့ သော်လည်း ကိုရိုနာဗိုင်းရပ်စ် ကပ်ရောဂါ ဖြစ်ပွားမှုနှင့်အတူ စီးပွားရေးလည်း သိသိသာသာကျ ဆင်းခဲ့သည်။
၂၀၁၄ ခုနှစ်ကလည်း ဘိုလီဗီးယားနိုင်ငံအတွင်း ကုန်စည်စျေးနှုန်းများ ကျဆင်းမှုနှင့် အစိုးရ၏ နိုင်ငံခြားအရံငွေ များလည်း လျော့ကျလာခဲ့ကာ ပြည်တွင်းတွင် ဒေါ်လာများ ထုတ်ရောင်းခဲ့ရသည်။
ယခင်သမ္မတ အီဗို မိုရာလက်စ် (Evo Morales) လက်ထက်က လက်ရှိသမ္မတ အာရ်စီသည် ဘဏ္ဍာရေးဝန်ကြီး အဖြစ် တာဝန်ထမ်းဆောင်ခဲ့ဖူးသူ ဖြစ်သည်။
အာရ်စီသည် ၂၀၂၀ ပြည့်နှစ်တွင် သမ္မတအဖြစ် စတင် တာဝန်ထမ်းဆောင်ခဲ့ပြီးနောက် ကပ်ရောဂါကြောင့် ထိခိုက်ခဲ့သည့် စီးပွားရေး အကျပ်အတည်းကို ရင်ဆိုင်ခဲ့ရသည်။
အာဏာသိမ်းရန် ဦးဆောင်သည့် ဗိုလ်ချုပ်ကြီး ဖမ်းခံရစဉ်
သို့သော် လက်ရှိ အချိန်အထိ စီးပွားရေး ပြန်လည် ဦးမော့မလာသေးဘဲ လောင်စာများ ဝယ်ယူတင်သွင်းရန် ရုန်းကန်နေရသဖြင့် နိုင်ငံအတွင်းရှိ စက်သုံးဆီ အရောင်းဆိုင်များတွင် ဆီများပြတ်လပ်မှုနှင့် ရင်ဆိုင်ခဲ့ရသည်။
ကပ်ရောဂါဖြစ်ပွားသည့် ခုနှစ်များကို ထည့်တွက်ခြင်း မရှိပါက ယခုနှစ်သည် ဘိုလီဗီးယား၏ စီးပွားရေး ဖွံ့ဖြိုး တိုးတက်မှုနှုန်းသည် ၂၅ နှစ်အတွင်း အနှေးကွေးဆုံး ဖြစ်လာလိမ့်မည်ဟု နိုင်ငံတကာ ငွေကြေးရန်ပုံငွေအဖွဲ့ (IMF) က ပြောကြားခဲ့သည်။
ထို့ကြောင့် ထိုအကြောင်းအရာများသည် နိုင်ငံအတွင်း တင်းမာမှုများကို မြင့်တက်စေခဲ့ပြီး အာဏာသိမ်းရန် ကြိုးပမ်းမှုကို ဖြစ်စေခဲ့သည့် နောက်ကွယ်မှ အကြောင်းရင်းများ ဖြစ်နိုင်သည်ဟု ကျွမ်းကျင်သူများက ပြောကြား ခဲ့သည်။
လက်ရှိတွင်လည်း တစ်ချိန်က မဟာမိတ်ဖြစ်ခဲ့သည့် ယခင်သမ္မတ မိုရာလက်စ်နှင့် ယခုသမ္မတအာရ်စီတို့အကြား နိုင်ငံရေးအားပြိုင်မှုများ ဖြစ်ပွားလျက်ရှိသည်။
ဘိုလီဗီးယားနိုင်ငံတွင် ၁၈၂၅ ခုနှစ်က လွတ်လပ်ရေး ရပြီးကတည်းက အာဏာသိမ်းရန် ကြိုးပမ်းမှုများနှင့် တော်လှန်မှုများ အကြိမ်ပေါင်း ၁၉၀ ကျော် ဖြစ်ပွားခဲ့သည်။
Source: အေပီ
![](/images/ttttttwrtge_hrfyjy.jpg#joomlaImage://local-images/ttttttwrtge_hrfyjy.jpg)
- By CNI
- Category: နိုင်ငံရေး
- Hits: 1113
CNI International News
မနီလာ၊ ဇွန်လ ၂၈
တောင်တရုတ်ပင်လယ်တွင် ပြီးခဲ့သည့် သီတင်းပတ်က ဖိလစ်ပိုင်ရေတပ်၏ ထောက်ပို့မစ်ရှင်အတွင်း တရုတ်၏ တရားမဝင် လုပ်ရပ်ကို ဆန့်ကျင်ခြင်းထက် ပိုမိုထိရောက်သည့် အစီအစဉ်များ လုပ်ဆောင်ရမည်ဟု ဖိလစ်ပိုင် သမ္မတ ဖာဒီနန် မားကို့စ် ဂျူနီယာ (Ferdinand Marcos Jr) က ဇွန်လ ၂၇ ရက်တွင် ပြောကြားခဲ့ကြောင်း ရိုက်တာ မှ ဖော်ပြခဲ့သည်။
ဇွန်လ ၁၇ ရက်က တောင်တရုတ်ပင်လယ်တွင် တရုတ်ကမ်းခြေစောင့်တပ်ဖွဲ့နှင့် ဖိလစ်ပိုင်ရေတပ် သင်္ဘောများ အကြား ခိုက်ရန်ဖြစ်ပွားမှု၌ ဖိလစ်ပိုင်သင်္ဘောသားတစ်ဦး ဒဏ်ရာရသွားခဲ့သည်။
ထိုဖြစ်စဉ်သည် တရုတ်၏ ရည်ရွယ်ချက်ရှိရှိ လုပ်ဆောင်သည့် လုပ်ရပ်ဖြစ်ကြောင်း ဖိလစ်ပိုင်စစ်တပ်က ပြောကြား ခဲ့သည်။
တောင်တရုတ်ပင်လယ်အတွင်း သင်္ဘောတစ်စီးကိုတွေ့ရစဉ်
“ကျနော်တို့ဘက်က ဆန့်ကျင်ကန့်ကွက်မှုတွေ၊ စောဒက တက်တာတွေကို အကြိမ်ပေါင်း ရာချီ ပြုလုပ်ခဲ့ပြီးပါပြီ၊ နိုင်ငံရေးနည်းလမ်းတွေနဲ့လည်း လုပ်ဆောင်ခဲ့ပြီးပါပြီ။ အခုဆိုရင် အဲဒီထက်ပိုပြီး လုပ်ဆောင်ရမှာ ဖြစ်တယ်” ဟု မားကို့စ်က မနီလာ (Manila) မြို့တော်တွင် သတင်းထောက်များကို ပြောကြားခဲ့သော်လည်း အသေးစိတ် ထုတ်ပြန်ခဲ့ခြင်းမရှိပေ။
ဇွန်လ ၁၇ ရက်က ဖြစ်ပွားခဲ့သည့် ပဋိပက္ခတွင် ပစ်ခတ်မှုများ မရှိခဲ့သဖြင့် တရုတ်၏ လုပ်ရပ်ကို လက်နက် (သေနတ်)ကိုင် တိုက်ခိုက်မှုဟု မယူဆနိုင်ကြောင်း၊ တရုတ်သည် Second Thomas သောင်ခုံအနီးတွင် ကျောက်ချ ရပ်နားထားသည့် သင်္ဘောပေါ်ရှိ စစ်သားများအတွက် ရိက္ခာများပေးပို့သော ဖိလစ်ပိုင်ထောက်ပို့ သင်္ဘောများကို တားဆီးရန် ရည်ရွယ်ချက်ရှိရှိ လုပ်ဆောင်ခဲ့ခြင်းဖြစ်သည်ဟု မားကို့စ်က ပြောကြားခဲ့သည်။
မားကို့စ်၏ ပြောကြားချက်နှင့်ပတ်သက်ပြီး ရိုက်တာသတင်းဌာနက မနီလာမြို့တော်ရှိ တရုတ်သံရုံးကို မှတ်ချက် ပေးရန် တောင်းဆိုခဲ့သော်လည်း တရုတ်သံရုံးက ချက်ချင်းတုန့်ပြန်ခဲ့ခြင်းမရှိပေ။
တရုတ်၏ လုပ်ရပ်များကို ဝေဖန်ရှုတ်ချသည့် အမေရိကန်ကမူ ဖိလစ်ပိုင်ကို ကာကွယ်မည့်အကြောင်း အမေရိကန် နိုင်ငံခြားရေးဝန်ကြီး လွိုက်အော်စတင် (Lloyd Austin) နှင့် ဖိလစ်ပိုင်ကာကွယ်ရေးဝန်ကြီးတို့အကြား ဖုန်းဆက် သွယ် ပြောဆိုမှုအတွင်း ထပ်လောင်း အတည်ပြုခဲ့သည်။
တရုတ်နဲ့ဖိလစ်ပိုင် ရေပိုင်နက်အငြင်းပွားနေစဉ်
“အရာရှိနှစ်ဦးစလုံးက နိုင်ငံတကာဥပဒေအရ ခွင့်ပြုချက်ရှိတဲ့ ဘယ်နေရာ ဒေသမှာမဆို နိုင်ငံတိုင်းအတွက် လေယာဉ်ပျံသန်းခွင့်တွေ၊ သင်္ဘောမောင်းနှင်ခွင့်တွေ ရှိတယ်ဆိုတဲ့အချက်ကို အဓိကထား ဆွေးနွေးခဲ့ါတယ်” ဟု အမေရိကန် ကာကွယ်ရေးဝန်ကြီးဌာနက ထုတ်ပြန်ခဲ့သည်။
တောင်တရုတ်ပင်လယ်သည် ကမ္ဘာလုံးဆိုင်ရာ ရေကြောင်းကုန်သွယ်ရေးအတွက် အသက်သွေးကြော တစ်ခုဖြစ် ပြီး တရုတ်နှင့် အမေရိကန်အကြား ဆက်ဆံရေးအတွက် အဓိကကျသည့် အရေးကိစ္စတစ်ခု ဖြစ်သည်။
တရုတ်သည် တောင်တရုတ်ပင်လယ်၏ နယ်နိမိတ် အားလုံးနီးပါးကို ပိုင်ဆိုင်ကြောင်း ကြေညာထားပြီး ဖိလစ်ပိုင် အပါအဝင် အိမ်နီးချင်းနိုင်ငံအချို့နှင့် ပိုင်ဆိုင်မှုများ အငြင်းပွားလျက်ရှိသည်။
Source: ရိုက်တာ
![](/images/rirydikukotflotfiuoutf.jpg#joomlaImage://local-images/rirydikukotflotfiuoutf.jpg)
- By CNI
- Category: နိုင်ငံရေး
- Hits: 1708
CNI International News
လာပက်ဇ်၊ ဇွန်လ ၂၈
ဘိုလီဗီးယားနိုင်ငံတွင် ဇွန်လ ၂၆ ရက်က စစ်ဗိုလ်ချုပ်ကြီး ဟွမ်ဟိုဆေးဇူနီဂါ (Juan Jose Zuniga) ဦးဆောင်သည့် အာဏာသိမ်းရန် ကြိုးပမ်းမှုတစ်ခု ဖြစ်ပွားခဲ့သော်လည်း အောင်မြင်ခြင်းမရှိခဲ့ဘဲ ထိုအစီအစဉ်ကို ဦးဆောင်သော ဇူနီဂါသည် ဖမ်းဆီးခံခဲ့ရသည်ဟု အေပီမှ ဖော်ပြခဲ့သည်။
ထိုဖြစ်စဉ်တွင် လာပက်ဇ် (La Paz) မြို့တော်ရှိ ဘိုလီဗီးယားအစိုးရနန်းတော်၏ ဂိတ်တံခါးများကို ကျည်ကာကား များက ဝင်တိုက်သည့်ခဲ့ပြီး စစ်သားများကလည်း သမ္မတ လူးဝစ် အာရ်စီ (Luis Arce) ၏ အစိုးရအဖွဲ့ကို ထိန်းချုပ် ခဲ့သည်။
သမ္မတအာရ်စီကမူ ထိုအာဏာသိမ်းရန် ကြိုးပမ်းမှုကို အလျှော့ပေးမည် မဟုတ်ကြောင်း ပြောကြားခဲ့ပြီး စစ်ဦးစီးချုပ် အသစ်တစ်ဦး ချက်ချင်းခန့်အပ်ခဲ့သည်။
ထို့နောက် သမ္မတအာရ်စီ ခန့်အပ်လိုက်သော စစ်ဦးစီးချုပ်အသစ်က စစ်သားများကို စစ်တန်းလျားပြန်ရန် အမိန့်ပေးခဲ့ပြီးနောက် စစ်သားများသည် ထိုအမိန့်ကို နာခံခဲ့ကြသည်။
သမ္မတ လူးဝစ် အာရ်စီကို တွေ့ရစဉ်
ထိုအမိန့်နှင့်အတူ စစ်သားများနှင့် ကျည်ကာကားများ ပြန်လည်ဆုတ်ခွာ သွားခဲ့ပြီးနောက် အာဏာသိမ်းရန် ကြံစည်မှုသည် ၃ နာရီအကြာအတွင်း အဆုံးသတ်သွားခဲ့သည်။
သမ္မတအာရ်စီကို ထောက်ခံသူများက နန်းတော်အပြင်ဘက်ရှိ ရင်ပြင်ကို အလျင်အမြန် ထွက်လာခဲ့ကြပြီး နိုင်ငံတော်သီချင်းကို သီဆိုခြင်း၊ အောင်ပွဲခံခြင်းတို့ ပြုလုပ်ခဲ့သည်။
စစ်သားများ ပြန်လည်ဆုတ်ခွာသွားခဲ့ပြီးနောက် အာဏာသိမ်း လှုပ်ရှားမှုခေါင်းဆောင် ဗိုလ်ချုပ်ကြီး ဇူနီဂါသည် ဖမ်းဆီးခံခဲ့ရပြီး အစိုးရရှေ့နေချုပ်က စုံစမ်းစစ်ဆေးမှုများ စတင်ပြုလုပ်ခဲ့သည်။
ဇူနီဂါအပြင် ရေတပ်ဗိုလ်ချုပ်ကြီးဟောင်း ဟွမ် အားနက် ဆယ်လ်ဗေးဒိုး (Juan Arnez Salvador) လည်း ဖမ်းဆီး ခံခဲ့ရကြောင်း အစိုးရအဖွဲ့ဝန်ကြီး အယ်ဒိုရာဒို ဒယ် ကက်စတီလို (Eduardo del Castillo) က ပြောကြားခဲ့သည်။
ဘိုလီဗီးယားစစ်တပ်ကိုတွေ့ရစဉ်
“သူတို့အုပ်စုရဲ့ ရည်ရွယ်ချက်က ဘာလဲဆိုတော့ ဒီမိုကရေစီနည်းကျ ရွေးကောက်ခံထားရတဲ့ အစိုးရကို ဖြုတ်ချဖို့ ဖြစ်ပါတယ်” ဟု ဒီ ကက်စတီလိုက သတင်းထောက်များကို ပြောကြားခဲ့သည်။
ဇွန်လ ၂၆ ရက် နှောင်းပိုင်းတွင် အီကွေဒေါကာကွယ်ရေးဝန်ကြီး အက်ဒ်မွန်ဒို နာဗီလို (Edmundo Vovillo) က အခြေအနေကို ထိန်းချုပ်နိုင်ခဲ့ပြီဖြစ်ကြောင်း ကြေညာခဲ့သည်။
ထို့ပြင် ဘိုလီဗီးယားသည် အာဏာသိမ်းမှုကို ကျရှုံးစေရန် လုပ်ဆောင်နိုင်ခဲ့ကြောင်း နိုဗီလိုက စစ်တပ် အကြီးအကဲ သစ်များနှင့်အတူ ပြောကြားခဲ့သည်။
ဘိုလီဗီးယားတွင် သမ္မတအာရ်စီနှင့် လက်ဝဲယိမ်း သမ္မတဟောင်း အီဗို မိုရာလက်စ် (Evo Molales) တို့အကြား အာဏာရပါတီကို လွှမ်းမိုးရေးအတွက် အားပြိုင်မှုများကြောင့် တင်းမာမှုများ ဖြစ်ပွားနေချိန်တွင် ယခုကဲ့သို့ အာဏာသိမ်းရန် ကြိုးပမ်းသည့် ဖြစ်စဉ် ဖြစ်ပွားခဲ့ခြင်းဖြစ်သည်။
Source: အေပီ