- By CNI
- Category: ဆောင်းပါး
- Hits: 364
CNI Sport Article
၂၀၂၃ ခုနှစ်၊ ဒီဇင်ဘာ ၂၂
ဘွန်ဒစ်လီဂါကလပ် လေဗာကူဆင်အသင်းဟာ နည်းပြ အလွန်ဆိုရဲ့ ဦးဆောင်မှုနဲ့ ဒီရာသီမှာ အားလုံးအံ့အား သင့်အောင် လုပ်ဆောင်ပြနေတာ ဖြစ်ပါတယ်။
လေဗာကူဆင်အသင်းဟာ ဒီရာသီ ပြိုင်ပွဲစုံ ၂၅ ပွဲ ကစားအပြီးမှာ ရှုံးပွဲလုံးဝ မရှိသေးတာပါ။
လေဗာကူဆင် အသင်းအတွက်တော့ ဂျာမနီဘောလုံးသမိုင်းမှာ ၂၅ ပွဲဆက်တိုက် ရှုံးပွဲမရှိသေးတဲ့ ပထမဆုံးအသင်း ဖြစ်ပြီး အရင်က စံချိန်တင်ထားတဲ့ ဟမ်းဘတ်အသင်းရဲ့စံချိန်ကို ချိုးဖျက်နိုင်ခဲ့တာ ဖြစ်ပါတယ်။
ဟမ်းဘတ်အသင်းဟာ ၁၉၈၂-၈၃ ရာသီမှာ ပြိုင်ပွဲစုံ ၂၄ ပွဲ ဆက်တိုက် ရှုံးပွဲမရှိခဲ့တာဖြစ်ပြီး အခုတော့ လေဗာကူဆင်အသင်းက ၂၅ ပွဲဆက်တိုက် ရှုံးပွဲမရှိစံချိန်နဲ့ စံချိန်သစ်တင်နိုင်ခဲ့တာပါ။
လေဗာကူဆင်အသင်းဟာ ပြီးခဲ့တဲ့ရာသီ အလွန်ဆို စတင်ကိုင်တွယ်ချိန်ကတည်းက အားလုံးရဲ့ အထင်ကြီးမှုကို ခံခဲ့ရတာဖြစ်ပြီး ဒီရာသီမှာတော့ မနှစ်ကထက် ပိုပြီးကောင်းနေခဲ့တာ ဖြစ်ပါတယ်။
လေဗာကူဆင်အသင်း ကစားသမားတွေကိုတွေ့ရစဉ်
အလွန်ဆိုဟာ ကစားသမားဘဝမှာ အောင်မြင်မှု အများအပြား ရယူနိုင်ခဲ့သလို အသင်းကြီးနည်းပြဘဝ အစဖြစ်တဲ့ လေဗာကူဆင်အသင်းမှာလည်း တာထွက်ကောင်းနေခဲ့တာပါ။
စပိန်လူမျိုးနည်းပြ အလွန်ဆိုဟာ ကစားသမားဘဝမှာ ဘင်နီတက်ဇ်၊ မော်ရင်ဟို၊ အန်ဆယ်လော့တီနဲ့ ဂွာဒီယိုလာ တို့လို နည်းစနစ်ပိုင်းမှာ ဆရာတစ်ဆူလို့ သတ်မှတ်ခံထားရတဲ့ သူတွေလက်အောက်မှာ အလုပ်လုပ်ခဲ့တာကြောင့် သူ့ရဲ့နည်းစနစ်ပိုင်းတွေ ကောင်းမွန်နေတာ အရမ်းကြီးတော့ မထူးဆန်းတာ ဖြစ်ပါတယ်။
အလွန်ဆိုဟာ လေ့ကျင့်ရေးကွင်းမှာလည်း ကစားသမားတွေနဲ့အတူ ဝင်ရောက်ကစားပြီး သူသွားချင်တဲ့ ပုံစံအတိုင်း ရောက်အောင် လေ့ကျင့်မှုတွေ ပြုလုပ်ပေးနေတာပါ။ အဲ့ဒါကြောင့်လည်း လေဗာကူဆင်အသင်းဟာ ထိပ်တန်း အဆင့်ပုံစံ ရောက်ရှိနေတာ ဖြစ်ပါတယ်။
လေဗာကူဆင်အသင်းဟာ ဒီရာသီကစားထားတဲ့ ၂၅ ပွဲမှာ ၂၂ ပွဲအထိ အနိုင်ရခဲ့ပြီး ၃ ပွဲသာ သရေကျထားတာပါ။
သရေကျတဲ့ အသင်းတွေက ဘွန်ဒစ်လီဂါ ထိပ်တန်း အသင်းကြီးတွေဖြစ်တဲ့ ဘိုင်ယန်မြူးနစ်၊ ဒေါ့မွန်နဲ့ စတုဂတ် အသင်း ဖြစ်ပါတယ်။
လေဗာကူဆင်အသင်းဟာ ဒီ ၂၅ ပွဲမှာ ၈၁ ဂိုးအထိ သွင်းယူထားပြီး တစ်ပွဲကို ပျှမ်းမျှ ၃.၂၄ ဂိုး သွင်းယူနိုင်ခဲ့တာ ကြောင့် ဂိုးသွင်းနှုန်းက ပြိုင်ဘက် အသင်းတွေအတွက် ထိတ်လန့်စရာ ဖြစ်ခဲ့ရတာပါ။ ပေးဂိုးကလည်း ၁၈ ဂိုးသာ ပေးခဲ့ရပြီး ခံစစ်စွမ်းဆောင်ရည်ကလည်း တကယ်ကို ကောင်းမွန်ခဲ့တာ ဖြစ်ပါတယ်။
အဲ့ဒါကြောင့် လေဗာကူဆင်အသင်းရဲ့လက်ရှိ စွမ်းဆောင်ရည်တွေဟာ ပြီးပြည့်စုံတယ်လို့ ပြောနိုင်ပေမယ့် ရာသီကုန်ဆုံးဖို့ အဝေးကြီး လိုသေးတာကြောင့် ဒီခြေစွမ်းကို ဆက်ပြီး ထိန်းနိုင်ဖို့ လိုအပ်နေတာပါ။
အလွန်ဆိုကိုတွေ့ရစဉ်
လေဗာကူဆင်အသင်းရဲ့ လူစာရင်းမှာ လူငယ်ကြယ်ပွင့် ကစားသမားတွေ အများကြီးရှိပြီး ဝါရင့်ကစားသမားတွေ ဖြစ်တဲ့ ရှာခါ၊ ဂျိုနသန်တို့က အကောင်းဆုံး ထိန်းကျောင်းပေးနေတာကြောင့် ရလဒ်ကောင်းတွေ ဆက်တိုက် ရယူနိုင်တာ ဖြစ်ပါတယ်။
လက်ရှိအချိန်မှာ ဘွန်ဒစ်လီဂါပြိုင်ပွဲဟာ ဆောင်းရာသီ အားလပ်ရက်ကြောင့် ပြိုင်ပွဲတွေကို ရပ်နားထားတဲ့အတွက် လေဗာကူဆင်အသင်းဟာ ဒီပြိုင်ပွဲရဲ့ ဆောင်းရာသီ ချန်ပီယံဖြစ်ခဲ့သလို ယူရိုပါလိဂ်ပြိုင်ပွဲမှာလည်း အုပ်စုထိပ်ဆုံးနဲ့ ၁၆ သင်းအဆင့်ကို တက်ရောက်နိုင်ခဲ့ပြီ ဖြစ်တာပါ။
လေဗာကူဆင်အသင်းဟာ သူတို့ရဲ့သမိုင်းမှာ ဘွန်ဒစ်လီဂါ ချန်ပီယံဆုကို တစ်ကြိမ်မှ မရရှိသေးဘဲ ဒုတိယသာ အမြင့်ဆုံးရခဲ့တဲ့အတွက် အလွန်ဆိုအနေနဲ့ ချန်ပီယံဆုရယူပေးပြီး သမိုင်းမှတ်တိုင် စိုက်ထူပေးနိုင်မလား ဆိုတာ တော့ စိတ်ဝင်စားဖို့ ကောင်းနေပါတယ်။
လေဗာကူဆင်အသင်းဟာ လက်ရှိအချိန်မှာ ဘွန်ဒစ်လီဂါ၊ ပိုကယ်ဖလားနဲ့ ယူရိုပါလိဂ်ပြိုင်ပွဲ ၃ ခုစလုံးမှာ ပါဝင်ခွင့် ရနေတာကြောင့် ဘယ်ပြိုင်ပွဲကို ဦးစားပေးမလဲဆိုတာတော့ သူတို့အပေါ်မှာ မူတည်နေတာပါ။
ပြိုင်ပွဲ ၃ ခုစလုံးမှာ ချန်ပီယံဆုရယူဖို့ ပစ်မှတ်ထားမယ်ဆိုရင်တော့ ကစားသမားတွေ ပွဲပန်းတာနဲ့ ဒဏ်ရာကြောင့် အနားမယူဖို့တော့ လိုအပ်နေတာ ဖြစ်ပါတယ်။
အလွန်ဆိုကတော့ သူ့ရဲ့နည်းပြဘဝ ပထမဆုံးဆုဖလားကို ဒီရာသီမှာ လေဗာကူဆင်အသင်းနဲ့ ရယူဖို့ ပစ်မှတ်ထား နေတာကြောင့် ရယူနိုင်မလားဆိုတာ စောင့်ကြည့်ရမှာ ဖြစ်ပါတယ်။
- By CNI
- Category: ဆောင်းပါး
- Hits: 584
CNI International Article
၂၀၂၃ ခုနှစ်၊ ဒီဇင်ဘာ ၂၂
အောက်တိုဘာလကုန်ပိုင်းက တိုင်းရင်းသားလက်နက်ကိုင် သုံးဖွဲ့ဖြစ်သည့် မြောက်ပိုင်းညီနောင်သုံးဖွဲ့သည် မြန်မာ နိုင်ငံမြောက်ပိုင်းတွင် တပ်မတော်ကို အကြီးစား ထိုးစစ်ဆင်တိုက်ခိုက်မှုများ ပြုလုပ်ခဲ့သည်။
မကြာမီ အချိန်အတွင်းမှာပင် အခြားတိုင်းရင်းသား လက်နက်ကိုင်အဖွဲ့များ (EAOs) နှင့် PDF များသည် တပ်မတော်၏ အခက်တွေ့နေသည့် အခြေအနေကို အခွင့်ကောင်းယူပြီး မြန်မာနိုင်ငံ အနောက်ပိုင်း၊ အရှေ့ပိုင်းနှင့် တောင်ပိုင်းဒေသများတွင် စစ်မျက်နှာ အသစ်များဖွင့်ပြီး တိုက်ခိုက်ခဲ့သည်။
ထိုကဲ့သို့ အံ့အားသင့်ဖွယ် ထိုးစစ်ဆင် တိုက်ခိုက်မှုများကြောင့် တပ်မတော်သည် အရေးနိမ့်မှုများနှင့် ဆက်တိုက် ကြုံတွေ့ခဲ့ရသည်။ အတည်မပြုနိုင်သေးသည့် သတင်းရင်းမြစ်များ၏ ဖော်ပြချက်များအရ တပ်မတော်၏ စစ်စခန်း လေးခု၊ သေးငယ်သည့် လုံခြုံရေးစခန်း ၃၀၀ နှင့် အဓိကမြို့ကြီးအချို့သည် လက်နက်ကိုင်များ၏ ထိန်းချုပ်မှု အောက်သို့ ရောက်ရှိခဲ့သည်ဟု ဆိုသည်။
TNLA လက်နက်ကိုင်တပ်ဖွဲ့ကိုတွေ့ရစဉ်
ထိုအခြေအနေသည် ၂၀၂၁ ခုနှစ်၊ ဖေဖော်ဝါရီလတွင် အာဏာရယူခဲ့ပြီးနောက် တပ်မတော်အတွက် အကြီးမားဆုံး စစ်မြေပြင်ခြိမ်းခြောက်မှု တစ်ခုအဖြစ် ယူဆနိုင်ကြောင်း နိုင်ငံရေးကျွမ်းကျင်သူတစ်ဦးဖြစ်သူ ရစ်ချက် ဟော်ဆေး (Richard Horsey) က ရေးသားဖော်ပြခဲ့သည်။
ထို့ပြင် မြန်မာနိုင်ငံတွင် ၁၉၄၈ ခုနှစ် လွတ်လပ်ရေး ရပြီးကတည်းက ဗဟိုအစိုးရအတွက် အသိသာဆုံးနှင့် အထင်ရှားဆုံး ထိုးနှက်ချက်များ ဖြစ်လာနိုင်သည်ဟု ၎င်းကဆိုသည်။
ရလဒ်အနေနှင့် ပြည်တွင်းစစ်အတွင်း မဟာဗျူဟာမြောက် အပြောင်းအလဲတစ်ခု ဖြစ်လာခဲ့ပြီး အာဏာချိန်ခွင်လျှာ ညှိမှုတစ်ခု ဖြစ်ခဲ့သည်။
လက်ရှိတွင် မြန်မာနိုင်ငံ၏ အခြေအနေသည် ကြီးမားသည့် အပြောင်းအလဲ တစ်ခုဖြစ်လာနိုင်သည့် အခြေအနေ ဖြစ်ပြီး တပ်မတော်သည် စိတ်ဓာတ်ရေးရာ ထိခိုက်နေသည်ဟု ကျွမ်းကျင်သူများ၊ ဂျာနယ်လစ်များနှင့် တက်ကြွ လှုပ်ရှားသူများက ပြောကြားခဲ့သည်။
ထို့ပြင် တပ်မတော်သည် နိုင်ငံကို ထိန်းချုပ်နိုင်စွမ်း လျော့နည်းနေပြီဆိုသည့် ယူဆချက်များလည်း ထွက်ပေါ်နေ သည်။
အမေရိကန်၏ ကျွမ်းကျင်ပညာရှင်အဖွဲ့ဖြစ်သည့် နိုင်ငံခြား ဆက်ဆံရေး ကောင်စီ (Council on Foreign Relations) ကမူ အမေရိကန်အစိုးရအနေနှင့် မြန်မာနိုင်ငံ၏ နောက်ဆုံး အခြေအနေအတွက် ပြင်ဆင်ထားရန် တိုက်တွန်းခဲ့သည်။
တိုင်းရင်းသားလက်နက်ကိုင်အဖွဲ့များ၊ PDF နှင့် အခြား ပြည်သူ့စစ်များသည် ၎င်းတို့၏ အောင်မြင်မှုများအတွက် စိတ်ဓာတ်တက်ကြွနေပုံပေါ်သည်။
မြန်မာ့တပ်မတော်က လေကြောင်းနဲ့တိုက်ခိုက်နေစဉ်
ထိုလက်နက်ကိုင်အဖွဲ့များအကြား နိုင်ငံရေး ခံယူချက်များ ကွဲလွဲနေဆဲဖြစ်သော်လည်း နိုင်ငံတစ်နိုင်ငံ၏ စစ်တပ် တစ်ခုအဖြစ် ပူးပေါင်းဖွဲ့စည်းရေးသည် အောင်မြင်မှု ရရှိနိုင်ခြေရှိသည်။
သို့သော်လည်း အထက်ဖော်ပြပါ အချက်အလက်အများစုသည် အတည်မပြုနိုင်သေးသည့် သတင်းရင်းမြစ်များ အပေါ် အခြေခံထားသဖြင့် တပ်မတော်သည် ပျောက်ကွယ်သွားဖွယ်ရှိသည်ဆိုသည့် ထင်မြင်ယူဆချက်များကို အတည်ယူရန် အချိန်စောလွန်းနေသေးသည်။
Asia Times သတင်းဝက်ဘ်ဆိုက်တွင် အန်သိုနီ ဒေးဗစ် (Anthony Davis) ရေးသားခဲ့သည့် ဆောင်းပါးတစ်ပုဒ်တွင် မြန်မာနိုင်ငံ၏ လက်ရှိအနေအထားအရ တပ်မတော်အတွက် အခက်တွေ့နေသည့်ပုံ ပေါ်သော်လည်း ထိုအခြေ အနေသည် တပ်မတော်၏ အင်အား ပြန်လည်ဖွဲ့စည်းနိုင်စွမ်းနှင့် တုန့်ပြန်ဆောင်ရွက်နိုင်စွမ်း အားနည်းသည့် အဓိပ္ပာယ်မျိုး မဟုတ်ကြောင်း ရေးသားခဲ့သည်။
အတိတ်ကာလကလည်း တပ်မတော် ခေါင်းဆောင်များသည် အခက်ခဲဆုံး အခြေအနေများ၌ပင် အံအားသင့်ဖွယ် ရှင်သန်နိုင်စွမ်းကို ပြသခဲ့ဖူးသည်။ ထို့ကြောင့် တပ်မတော်၏ ဒူပေနာပေ ခံနိုင်ရည်ရှိမှုကို လျှော့မတွက်သင့်် ကြောင်း အန်သိုနီ ဒေးဗစ်က ရေးသားခဲ့သည်။
လက်ရှိတွင် အခက်အခဲများနှင့် ရင်ဆိုင်နေရသော်လည်း တပ်မတော်သည် ခိုင်မာကျစ်လစ်စွာ ဖွဲ့စည်းထားပြီး၊ ကောင်းမွန်စွာ လေ့ကျင့်ထားသလို ကောင်းမွန်သည့် လက်နက်များ တပ်ဆင်ထားသည့် တပ်ဖွဲ့အင်အားကို ပိုင်ဆိုင်ထားသဖြင့် အတိုက်အခံ အင်အားစုများ၏ ရည်မှန်းချက်များ ပြည့်မြောက်ရန် လွယ်ကူလိမ့်မည် မဟုတ် ပေ။
မြန်မာ့တပ်မတော် စစ်ရေးလေ့ကျင့်နေစဉ်
ဥပမာပြရမည်ဆိုလျှင် မကြာသေးမီက ဖြစ်ပွားခဲ့သည့် တိုက်ပွဲများအတွင်း လက်နက်ကိုင်အဖွဲ့များသည် လက်နက် အင်အား၊ လူအင်အား နည်းပါးသည့် သေးငယ်သော တပ်စခန်းများကိုသာ သိမ်းယူနိုင်ခဲ့ခြင်း ဖြစ်သည်။
တပ်မတော်၏ တပ်ဖွဲ့အားလုံးကိုမူ လွယ်ကူစွာ အနိုင်တိုက်ခိုက်နိုင်မည် မဟုတ်ပေ။ တပ်တော်၏ တပ်ဖွဲ့များသည် တပ်မတော်အပေါ် အလွန်သစ္စာရှိပြီး စည်းလုံးညီညွတ်နေဆဲ ဖြစ်သည်။
မြန်မာ့အရေးကျွမ်းကျင်သူ ဘာတေးလ် လစ်တနာ (Bertil Lintner) ကလည်း တပ်မတော်အတွင်း သဘောထား မတိုက်ဆိုင်မှုများ ရှိနိုင်သော်လည်း စည်းကမ်းပိုင်းတွင် ကြီးကြီးမားမား ယိုယွင်းပျက်စီးနေသည့် အရိပ်အယောင် မရှိကြောင်း ပြောကြားခဲ့သည်။
လက်ရှိတွင် အရှိန်အဟုန်သည် အတိုက်အခံ အင်အားစုဘက်တွင် ရှိနေသော်လည်း အချိန်သည် တပ်မတော် ဘက်တွင် ရှိနေဆဲ ဖြစ်သည်။
တပ်မတော်တွင် EAO များနှင့် PDF တို့တွင် မရှိသည့် စီးပွားရေး အရင်းအမြစ်များလည်း ရှိနေသည်။ ထို့ပြင် တပ်မတော်တွင် ၎င်းအား အကာအကွယ်ပေးနိုင်သည့် ပြည်ပမဟာမိတ်များနှင့် ကုန်ဆုံးသွားသော လက်နက် ခဲယမ်းများကို ပြန်လည်ဖြည့်တင်းနိုင်သည့် အခြေအနေလည်း ရှိနေသည်။
ထို့ကြောင့် မကြာသေးမီက လက်နက်ကိုင်အဖွဲ့များ၏ တိုက်ခိုက်မှု အရှိန်အဟုန်များ မြင့်တက်ခဲ့သည့်တိုင် အခြေအနေ အရပ်ရပ်အရ တပ်မတော်ဘက်တွင် အချိန်၊ စီးပွားရေး၊ ပြည်ပမဟာမိတ်များနှင့် လက်နက်ခဲယမ်း အင်အားများ သာလွန်နေဆဲဖြစ်သဖြင့် တပ်မတော်နှင့်ပတ်သက်ပြီး ပြည်တွင်း/ပြည်ပမှ ထင်ကြေးပေး ခန့်မှန်းမှု များကို ချက်ချင်းကောက်ချက်ချရန် အချိန်စောလွန်းနေဆဲ ဖြစ်သည်။
Source: Asia Times
- By CNI
- Category: ဆောင်းပါး
- Hits: 376
CNI International Article
၂၀၂၃ ခုနှစ်၊ ဒီဇင်ဘာ ၁၇
ဂါဇာကမ်းမြောင်ဒေသတွင် လူသားချင်းစာနာ ထောက်ထားမှုဆိုင်ရာ အကျပ်အတည်းကို နိုင်ငံတကာ အသိုင်းအဝိုင်းက အာရုံစိုက်နေချိန် မြန်မာနိုင်ငံတွင် မြန်မာ့တပ်မတော်နှင့် တိုင်းရင်းသားလက်နက်ကိုင် တပ်ဖွဲ့များ အကြား ဖြစ်ပွားနေသည့် တိုက်ပွဲများကြောင့် ထိုင်းနိုင်ငံ၏ အနောက်ဘက် နယ်စပ်တစ်လျှောက်၌ နောက်ထပ် လူသားချင်းစာနာ ထောက်ထားမှုဆိုင်ရာ အကျပ်အတည်းတစ်ခု ဖြစ်ပွားလာခဲ့သည်။
ထိုင်း-မြန်မာနယ်စပ်တွင် ဖြစ်ပွားနေသည့် ပဋိပက္ခများကို ဆက်လက် ထိန်းချုပ်နိုင်ခြင်း မရှိပါက မြန်မာနိုင်ငံ အတွင်းရှိ စစ်ပွဲကြောင့် အိုးမဲ့အိမ်မဲ့ ဖြစ်ခဲ့ရသူများသည် အိမ်နီးချင်းနိုင်ငံများသို့ အစုလိုက်အပြုံလိုက် ဝင်ရောက် သွားနိုင်သည့် အခြေအနေသို့ ရောက်ရှိနိုင်သည်။
မြန်မာနိုင်ငံနှင့် နယ်စပ်ချင်း ထိစပ်နေသည့် နိုင်ငံများထဲတွင် ထိုင်း၊ တရုတ်၊ အိန္ဒိယ၊ ဘင်္ဂလားဒေ့ရှ်နှင့် လာအို နိုင်ငံတို့ ဖြစ်သည်။ ထိုနိုင်ငံများအနက် မြန်မာနှင့် အရှည်လျားဆုံး နယ်စပ်ချင်း ထိစပ်နေသည့် နိုင်ငံမှာ ထိုင်းနိုင်ငံ ဖြစ်သည်။
အောက်တိုဘာ ၂၇ ရက်က တိုင်းရင်းသား လက်နက်ကိုင်အဖွဲ့များ၏ တိုက်ခိုက်မှုများ မြင့်တက် လာခဲ့ချိန် ကတည်းက မြန်မာနိုင်ငံအတွင်း အိမ်ပစ်ရာပစ် ထွက်ပြေးတိမ်းရှောင်ခဲ့ရသူ ၅၀၀,၀၀၀ နီးပါးရှိခဲ့ကြောင်း ကုလသမဂ္ဂ လူသားချင်း စာနာထောက်ထားမှုဆိုင်ရာ ညှိနှိုင်းဆောင်ရွက်ရေးရုံး၏ ထုတ်ပြန်ချက်တွင် ဖော်ပြထားသည်။
၂၀၂၁ ခုနှစ်၊ ဖေဖော်ဝါရီလတွင် တပ်မတော်က အာဏာကို လွှဲပြောင်းရယူခဲ့ပြီးနောက်ပိုင်း မြန်မာနိုင်ငံအတွင်း အိမ်ပစ်ရာပစ် ထွက်ပြေးတိမ်းရှောင်ခဲ့သူပေါင်း ၁ ဒသမ ၅ သန်းကျော်ရှိခဲ့သည်။
မြန်မာနိုင်ငံမှ ထောင်၊ သောင်းချီ ရှိသည့် မိသားစုဝင်များနှင့် ရွာသူ/ရွာသားများသည် နယ်စပ်ဒေသကို ဖြတ်ကျော်ပြီး ဒုက္ခသည်အဖြစ် ခိုလှုံရန် ကြိုးပမ်းနေသဖြင့် ထိုင်းနိုင်ငံသည် ထိုဒုက္ခသည်များကို လက်ခံရမည့် အခြေအနေများနှင့် ကြုံတွေ့လာနိုင်သည်။
စစ်စစ်တွင် ထိုင်းနိုင်ငံသည် မြန်မာနိုင်ငံ၏ ရွာသူ/ရွာသားများအတွက် ခိုလှုံနေထိုင်ရာ တစ်ခု ဖြစ်ခဲ့သည်မှာ ကြာမြင့်လှပြီ ဖြစ်သည်။
မြန်မာ့တပ်မတော်က အာဏာရယူခဲ့သည့် ၃ နှစ်တာ ကာလအတွင်း တပ်မတော်နှင့်လက်နက်ကိုင်အဖွဲ့များ အကြား တိုက်ပွဲများကြောင့် သောင်းနှင့်ချီသည့် ဒုက္ခသည်များသည် ထိုင်းနိုင်ငံသို့ ထွက်ပြေးဝင်ရောက်ခဲ့ကြသည်။
ထိုတိုက်ခိုက်မှုများ လျော့ကျ/ရပ်စဲသွားမည့် အချိန်တွင် ထိုင်းနိုင်ငံသို့ ထွက်ပြေးတိမ်းရှောင်ခဲ့သည့် မြန်မာနိုင်ငံ သား ၈၀ ရာခိုင်နှုန်းသည် နေရပ်သို့ ပြန်ကြလိမ့်မည်ဖြစ်သည်။
လက်ရှိအချိန်အထိ ရရှိထားသည့် စာရင်းများအရ ထိုင်းနိုင်ငံ၏ မဲဟောင်ဆန် (Mae Hong Son) ပြည်နယ်တွင် အိမ်ပစ်ရာပစ် ထွက်ပြေး တိမ်းရှောင်ခဲ့ရသူပေါင်း ၉၀,၀၀၀ ခန့် ရှိနေသည်။
သို့သော် ၂၄၀၁ ကီလိုမီတာ အရှည်ရှိသည့် ထိုင်း-မြန်မာနယ်စပ်၏ အခြေအနေသည် ရှုပ်ထွေးလွန်းလှသည်။
ထိုနယ်စပ်ဒေသ၏ နေရာအများစုသည် ခြံစည်းရိုးများ၊ တံတိုင်းများနှင့် တားမြစ်ကန့်သတ်ထားခြင်း မရှိသဖြင့် လူမှောင်ခိုကူးသည့် ဂိုဏ်းများသည် ထိုအခြေအနေကို အခွင့်ကောင်းယူပြီး အမြတ်ထုတ်လျက်ရှိသည်။
လက်ရှိ မြန်မာနိုင်ငံတွင် ဖြစ်ပွားနေသည့် ပဋိပက္ခသည် ထိုင်းအစိုးရအတွက် စိန်ခေါ်မှုတစ်ခု ဖြစ်နေသည်။
ထိုင်းဝန်ကြီးချုပ် ဆရီသာ သာဗီဆင် (Srettha Thavisin) သည် စက်တင်ဘာလ အစောပိုင်းက ဝန်ကြီးချုပ်အဖြစ် စတင်ရုံးထိုင်ခဲ့ချိန်ကတည်းက အလုပ်တာဝန်များဖြင့် မအားလပ်အောင် ရှိနေခဲ့သည်။
အစပိုင်းတွင် ဆရီသာက ထိုင်းပြည်သူများ၏ စားဝတ်နေရေးကို မြှင့်တင်ပေးရန်နှင့် စီးပွားရေး ပြဿနာများကို ပြင်ဆင်ရာသာ အာရုံစိုက်ထားခဲ့ဖွယ်ရှိသည်။
သို့သော် လက်ရှိအချိန်အထိ ဆရီသာ အစိုးရအဖွဲ့သည် နိုင်ငံခြားရေးမူဝါဒတွင် ကြီးမားသည့် စိန်ခေါ်မှုများနှင့် ရင်ဆိုင်နေရဆဲ ဖြစ်သည်။
ထိုအချိန်အတောအတွင်း မြန်မာနိုင်ငံတွင် တပ်မတော်နှင့် တိုင်းရင်းသား လက်နက်ကိုင်များအကြား တိုက်ပွဲများ ပြင်းထန်စွာ ဖြစ်ပွားခဲ့သဖြင့် ထိုင်း-မြန်မာ နယ်စပ်အရေးသည် ဆရီသာ အစိုးရအတွက်ရော၊ ထိုင်းနိုင်ငံရေး အတွက် အကြံပြုပုဂ္ဂိုလ်များအတွက်ပါ သတိထားကိုင်တွယ်ရမည့် အကြောင်းအရာတစ်ခု ဖြစ်လာခဲ့သည်။
လက်ရှိအချိန်တွင် ထိုင်းနိုင်ငံရေးလောက၌ သြဇာလွှမ်းမိုးထားသည့် အဖွဲ့အစည်းများနှင့် နိုင်ငံရေးသမားများသည် မြန်မာနိုင်ငံမှ ထွက်ပြေးတိမ်းရှောင်လာသော ဒုက္ခသည်များအား လူသားချင်းစာနာထောက်ထားမှုဆိုင်ရာ အကူအညီများကို မဆိုင်းမတွ ကူညီပေးရန် လိုအပ်ကြောင်းကို အလေးထား ပြောဆိုနေကြသည်။
ထို့ကြောင့် လာမည့်လများအတွင်း အင်ဒိုနီးရှားနိုင်ငံ၊ ဂျကာတာမြို့တော်တွင် အခြေစိုက် ဖွင့်လှစ်ထားသည့် အာဆီယံ ငြိမ်းချမ်းရေးနှင့် ပြန်လည်ရင်ကြားစေ့ရေး အင်စတီကျူ အပါအဝင် သက်ဆိုင်ရာ အဖွဲ့အစည်းများမှ ပါဝင်မည့် ဆွေးနွေးမှုများတွင် ထိုင်း-မြန်မာနယ်စပ်ဒေသအရေးကို အဓိကထားပြီး ဆွေးနွေးဖွယ်ရှိနေသည်။
ထိုင်းအစိုးရအဖွဲ့အနေနှင့် အခြေအနေ အရပ်ရပ်ကို သုံးသပ်ပြီး ဆက်လက် လုပ်ဆောင်မည်ဆိုပါက မြန်မာနိုင်ငံနှင့် ကောင်းမွန်သည့် ဆက်ဆံရေးကို ဆက်လက်ထိန်းသိမ်းထားရန် အရေးအကြီးဆုံး အချက်ဖြစ်ပြီး မြန်မာနိုင်ငံ၏ တိုင်းရင်းသား လက်နက်ကိုင်အဖွဲ့များနှင့်လည်း ကောင်းမွန်သည့် ဆက်ဆံရေးကို ဆက်လက်ထိန်းသိမ်းကာ ချဉ်းကပ်လုပ်ဆောင်ရန် လိုအပ်ပေသည်။
Source: ဘန်ကောက်ပို့စ်
- By CNI
- Category: ဆောင်းပါး
- Hits: 319
CNI Sport Article
၂၀၂၃ ခုနှစ်၊ ဒီဇင်ဘာ ၁၅
ရာသီအစကတည်းက ရလဒ်တွေ တည်ငြိမ်မှုမရှိတဲ့ ယူနိုက်တက်အသင်းဟာ ခက်ခဲတဲ့ ရက်သတ္တပတ်တွေကို ဆက်ပြီး ဖြတ်သန်းနေရပါတယ်။
ယူနိုက်တက်အသင်းဟာ နိုဝင်ဘာလက ကစားခဲ့တဲ့ပွဲတွေမှာ ရလဒ်ကောင်းတွေ ရခဲ့တာကြောင့် နည်းပြ အဲရစ်တန်ဟတ်၊ နောက်ခံလူ မက်ဂွဲယားနဲ့ တောင်ပံကစားသမား ဂါနာချိုတို့ဟာ ပရီးမီးယားလိဂ်ရဲ့ တစ်လတာ အကောင်းဆုံးဆုတွေကို သိမ်းပိုက်နိုင်ခဲ့ပါတယ်။
ဒါပေမယ့် အပျော်တွေကူးစက်မှုဟာ အနည်းငယ်သာကြာခဲ့ပြီး ဒီဇင်ဘာလ အရောက်မှာတော့ အခြေအနေတွေ ဟာ ပြောင်းပြန်ဖြစ်သွားခဲ့ပါတယ်။
ယူနိုက်တက်အသင်း ကစားသမားများကိုတွေ့ရစဉ်
ဘုန်းမောက်၊ ဘိုင်ယန်မြူးနစ်အသင်းတို့ကို အိုးထရက်ဖို့ဒ်မှာ ၂ ပွဲဆက် ရှုံးပွဲကြုံတွေ့ခဲ့တာက ယူနိုက်တက်နဲ့ နည်းပြ အဲရစ်တန်ဟတ်အတွက် အိပ်မက်ဆိုးလို့ ပြောရမှာပါ။
ယူနိုက်တက်အသင်းဟာ ချန်ပီယံလိဂ်ပြိုင်ပွဲကို စံချိန်တင် ရလဒ်ဆိုးတွေနဲ့ အဆုံးသတ်ခဲ့ပြီးနောက်မှာ ပရီးမီးယားလိဂ်ပြိုင်ပွဲကို လုံးဝအာရုံစိုက်ဖို့ ရှိတော့တာ ဖြစ်ပါတယ်။
ဒီအချိန်မှာ တွေ့ရမယ့်ပြိုင်ဘက်က လီဗာပူးလ်အသင်းဖြစ်နေပြီး အန်ဖီးလ်ကွင်းမှာ ကစားရမှာက ယူနိုက်တက် အတွက် စိတ်ပျက်စရာ ဖြစ်ခဲ့ရတာပါ။
ယူနိုက်တက်အသင်းဟာ လီဗာပူးလ်အသင်း အိမ်ကွင်းမှာ နောက်ဆုံး ကစားခဲ့တဲ့ပွဲမှာ ၇ ဂိုး- ဂိုးမရှိနဲ့ ဂိုးပြတ် အရေးနိမ့်ခဲ့တာ အပါအဝင် ဂိုးပြတ်ရှုံးပွဲတွေချည်း ကြုံတွေ့ထားရတာ ဖြစ်ပါတယ်။
အဲ့ဒါကြောင့် အားလုံးက ယူနိုက်တက်အသင်း အနေနဲ့ ၃ ပွဲဆက် ရှုံးနိမ့်ကြုံတွေ့ပြီး အဲရစ်တန်ဟတ်ရဲ့ မန်ချက်စတာကလပ် နည်းပြဘဝ အဆုံးသတ်တော့မယ်လို့ သုံးသပ်နေကြတာပါ။
ယူနိုက်တက်အသင်းဟာ ဒီရာသီ ရလဒ်တွေ ဆိုးနေတာက အဓိက ကစားသမားတွေ ဒဏ်ရာရနေတာကြောင့် ဆိုပြီး ဆင်ခြေပေးကောင်းပေးလို့ရပေမယ့် အခုအချိန်ထိ ကစားကွက် ပုံဖော်နိုင်ခြင်း မရှိတာကတော့ အဲရစ်တန်ဟတ်အနေနဲ့ ဆင်ခြေပေးလို့မရတာ ဖြစ်ပါတယ်။
ယူနိုက်တက်အသင်းဟာ ဒီရာသီ ပြိုင်ပွဲစုံ ၂၄ ပွဲ ကစားအပြီးမှာ ၁၂ ပွဲအထိ ရှုံးနိမ့်ထားတာက အသင်းရဲ့ ရာသီအစ အလွန်ဆိုးရွားတဲ့ မှတ်တမ်းပါ။
အဲရစ်တန်ဟတ်နဲ့ ယူနိုက်တက်ကစားသမားကိုတွေ့ရစဉ်
ယူနိုက်တက်အသင်းဟာ လက်ရှိအချိန်ထိ အဲရစ်တန်ဟတ်ကို ထောက်ခံမှု ပေးထားတယ်လို့ ပြောနေကြပေမယ့် နောက်ထပ် ရှုံးပွဲတွေ ဆက်ရင်တော့ သည်းခံနိုင်စွမ်းက အဆုံးသတ်သွားမှာ ဖြစ်ပါတယ်။
လက်ရှိအချိန်မှာတောင် အဲရစ်တန်ဟတ် နေရာအစားထိုးဖို့ နည်းပြသစ်တွေကို ယူနိုက်တက်အသင်း ရှာဖွေနေ ပြီလို့ သတင်းတွေ ထွက်ပေါ်နေတာပါ။
ဝုလ်ဗ်စ်အသင်း နည်းပြဟောင်း လိုပက်တယ်ဂီနဲ့ ချယ်လ်ဆီးအသင်း နည်းပြဟောင်း ဂရေဟမ်ပေါ်တာတို့ဟာ အဲရစ်တန်ဟတ်နေရာမှာ အစားဝင်မယ့် နည်းပြတွေအဖြစ် ထင်ကြေးတွေ ထွက်ပေါ်နေတာ ဖြစ်ပါတယ်။
လီဗာပူးလ်အသင်းနဲ့ပွဲကတော့ ဒတ်ချ်လူမျိုးနည်းပြရဲ့ ယူနိုက်တက်အသင်း နည်းပြရာထူးကို ဆုံးဖြတ်မယ့် ပွဲစဉ်ဖြစ်ဖို့ များနေတာပါ။ တိုက်ဆိုင်တာကတော့ ယူနိုက်တက်အသင်းဟာ လီဗာပူးလ်အသင်းနဲ့ တွေ့ဆုံတဲ့ ပွဲအပြီးမှာ မော်ရင်ဟို၊ ဆိုးလ်ရှားတို့ ထုတ်ပယ်ခံရတဲ့ ဖြစ်ရပ်တွေရှိခဲ့ပါတယ်။
ယူနိုက်တက်အသင်း ကစားသမားများကိုတွေ့ရစဉ်
အဲ့ဒါကြောင့် အဲရစ်တန်ဟတ်အနေနဲ့ ယူနိုက်တက်အသင်း နည်းပြဟောင်းတွေရဲ့ လမ်းစဉ်ကို မလိုက်ဖို့ လီဗာပူးလ်အသင်းနဲ့ ပွဲမှာ ရလဒ်ကောင်းရဖို့ လိုအပ်နေတာပါ။
ဒါပေမယ့် အကောင်းဆုံးပုံစံနဲ့ အရှိန်ရနေတဲ့ လီဗာပူးလ်အသင်းကို ယူနိုက်တက် အသင်းအနေနဲ့ ကျော်ဖြတ်နိုင်ဖို့ က မလွယ်ကူနိုင်လို့ အဲရစ်တန်ဟတ်အနေနဲ့ ယူနိုက်တက်အသင်း၊ ကစားသမား၊ ပရိသတ်တွေရဲ့ထောက်ခံမှုကို ဆက်ပြီး လိုအပ်နေတာ ဖြစ်ပါတယ်။
သေချာတာကတော့ အဲရစ်တန်ဟတ်အနေနဲ့ ဗြိတိန်ဘီလျံနာ ဆာဂျင်ရက်ကလစ်ဖ် အသင်းကို မရောက်လာခင်မှာ ယူနိုက်တက်အသင်းရဲ့ ရလဒ်တွေကို ကောင်းမွန်အောင် လုပ်ပေးရမှာပါ။
ဒီလိုမှမဟုတ်ရင် ဆာဂျင်ရက်ကလစ်ဖ် အနေနဲ့ အသင်းရဲ့ အောင်မြင်မှုအတွက် အဲရစ်တန်ဟတ်ကို ငဲ့ညာပေးမယ့် သူ မဟုတ်ပါဘူး။
အဲရစ်တန်ဟတ်ကတော့ ယူနိုက်တက်အသင်းကို ရလဒ်ကောင်းတွေ ရအောင်ယူပေးမယ်လို့ ကတိပြုထားတာ ကြောင့် အသင်းမှာ ဆက်ပြီးရှိနေနိုင်မလား ဒါမှမဟုတ် မကြာခင်မှာ ထုတ်ပယ်ခံရမလားဆိုတာ စောင့်ကြည့်ရမှာ ဖြစ်ပါတယ်။
- By CNI
- Category: ဆောင်းပါး
- Hits: 684
CNI Article
၂၀၂၃ ခုနှစ်၊ ဒီဇင်ဘာ ၈
ဂါဇာကမ်းမြောင်ဒေသတွင် အစ္စရေးနှင့် ဟားမာ့စ်အကြား စစ်ပွဲစတင် ဖြစ်ပွားလာခဲ့ချိန်ကတည်းက တရုတ်သည် သူ့ကိုယ်သူ မရှိမဖြစ် ကြားဝင်စေ့စပ်သူတစ်ဦးအဖြစ် ဖော်ပြရန် သံတမန်ရေးအရ တက်ကြွစွာ ပါဝင်ဆောင်ရွက် ခဲ့သည်။
ယခုနှစ်အစောပိုင်းက အီရန်နှင့် ဆော်ဒီအာရေဗျအကြား ဆက်ဆံရေးများ ပုံမှန်ပြန်လည်ထူထောင်ရန် တရုတ်က ကြားဝင်စေ့စပ်ပေးနိုင်ခဲ့သဖြင့် ယခုအကြိမ်တွင်လည်း တရုတ်သည် အစ္စရေးနှင့် ဟားမာ့စ်အကြား ကြားဝင်စေ့စပ် ပေးနိုင်လိမ့်မည်ဟု မျှော်လင့်ချက်များ ကြီးမားစွာ ထွက်ပေါ်လျက်ရှိသည်။
သို့သော် လက်ရှိအချိန်အထိ တရုတ်သည် ဂါဇာဒေသအတွက် အားထုတ်ကြိုးပမ်းမှု အနည်းငယ်သာ ရှိခဲ့သဖြင့် အစ္စရေး-ဟားမာ့စ်ပဋိပက္ခကို ကြားဝင်စေ့စပ်မှုတွင် တရုတ်၏ အခန်းကဏ္ဍအပေါ် မေးခွန်းများ ထွက်ပေါ်လာခဲ့ သည်။
အစ္စရေးစစ်သားတွေကိုတွေ့ရစဉ်
ထိုမေးခွန်းများအတွက် အဖြေတစ်ခုကို ထွက်ပေါ်စေရန် ထည့်သွင်းစဉ်းစားရမည့် အချက် ၃ ချက်ထက်မနည်း ရှိနိုင်သည်။
ပထမအချက်မှာ တရုတ်ခေါင်းဆောင်များက အရှေ့အလယ်ပိုင်းဒေသသည် တရုတ်နှင့် သက်ဆိုင်သည့်် ဒေသတစ်ခုဖြစ်သည်ကို အများက ယူဆစေချင်ခြင်းကြောင့် ဖြစ်သည်။
တရုတ်သည် သူ့ကိုယ်သူ တာဝန်ခံမှုရှိသည့် အင်အားကြီးနိုင်ငံအဖြစ် ပုံဖော်နေချိန်တွင် ကမ္ဘာလုံးဆိုင်ရာ အကျပ်အတည်းများကို ဖြေရှင်းရန် ကြိုးပမ်းအားထုတ်မှုများ မရှိပါက ထိုအခြေအနေသည် မခန့်မှန်းနိုင် လောက်သည့် အခြေအနေမျိုးအထိ ရောက်ရှိသွားစေနိုင်သည်။
တရုတ်သည် ၎င်း၏ စီးပွားရေး ဆက်ဆံမှုများကို အမျိုးမျိုး ပြောင်းလဲလုပ်ဆောင်နေပြီး အရှေ့အလယ်ပိုင်း ဒေသတွင်းနိုင်ငံများ အထူးသဖြင့် ဆော်ဒီအာရေဗျ၊ ယူအေအီးနိုင်ငံတို့နှင့် နိုင်ငံရေး ဆက်ဆံရေးများကို တိုးမြှင့်လျက်ရှိသည်။
တရုတ်သည် အမေရိကန်ကဲ့သို့ လုံခြုံရေးကဏ္ဍကို ထောက်ပံ့ပေးနိုင်ခြင်း မရှိသေးသည့်တိုင် အမေရိကန်ကဲ့သို့ လုံခြုံရေးကဏ္ဍကို ထောက်ပံ့ပေးနိုင်မည့် အခြေအနေမျိုးအထိ ရောက်ရှိစေရန် ကြိုးပမ်းအားထုတ်လျက်ရှိသည်။
တရုတ်သမ္မတ ရှီကျင့်ဖျင် (Xi Jinping) ၏ နိုင်ငံရေးမူဝါဒ ရည်မှန်းချက်တစ်ခုမှာ ဒေသတွင်း လုံခြုံရေးနှင့် နိုင်ငံရေး ကိစ္စများတွင် တရုတ်၏ ပါဝင်မှုကို မြှင့်တင်ရန်ဖြစ်ပြီး တရုတ်နိုင်ငံကို အဓိက ပထဝီနိုင်ငံရေး အင်အားစု တစ်ခုအဖြစ် ရပ်တည်နိုင်ရည် ဖြစ်သည်။
ဒုတိယအချက်မှာ တရုတ်နိုင်ငံအတွက် အစ္စရေး-ဟားမာ့စ် အကျပ်အတည်းသည် အာရပ်နိုင်ငံများ၊ အစ္စလာမ်မစ် နိုင်ငံများနှင့် ၎င်း၏ ဆက်ဆံရေးနှင့် ရပ်တည်ချက်ကို မြှင့်တင်နိုင်ရန် အလမ်းတစ်ခုဖြစ်သည်။
အမေရိကန်သမ္မတကို တွေ့ရစဉ်
ထိုအချက်သည် စစ်အေးကာလ တစ်လျှောက်လုံး တရုတ်က ကျင့်သုံးလာခဲ့သည့် မူဝါဒတစ်ခုဖြစ်ပြီး ထိုမူဝါဒကို ဆက်လက်ကျင့်သုံးကာ အာရပ်နိုင်ငံများအကြား တရုတ်၏ ချစ်ခင်ရင်းနှီးမှုများကို ရယူရန်ဖြစ်သည်။
တတိယအချက်မှာ ဂါဇာပဋိပက္ခမဖြစ်ပွားခင် အလွန်ကြာမြင့်လှသည့် အချိန်ကာလကတည်းက တရုတ်သည် အရှေ့အလယ်ပိုင်းဒေသတွင် လုံခြုံရေး ပဲ့ကိုင်ထိန်းကျောင်းသူ အသစ်တစ်ဦး ဖြစ်လာစေရန် အဆိုပြုခဲ့ခြင်းကြောင့် ဖြစ်သည်။
ရှီ၏ ကမ္ဘာလုံးဆိုင်ရာ လုံခြုံရေး အစီအစဉ် (GSI) ဟု ခေါ်သည့် စီမံကိန်းအရ ပူးပေါင်းဆောင်ရွက်မှုရှိသည့်၊ ပြည့််စုံ ကျယ်ပြန့်သည့်၊ ပူးပေါင်းဆောင်ရွက်မှုရှိသည့် ရေရည်တည်တံ့မှုရှိသော လုံခြုံရေးအခင်းအကျင်း အသစ်တစ်ခု အပေါ် အခြေခံသွားမည်ဟု ဖော်ပြခဲ့သည်။
ထိုအစီအစဉ်ကို အရှေ့အလယ်ပိုင်း နိုင်ငံများက ဦးဆောင်မည်ဖြစ်ကာ ကုလသမဂ္ဂ၏ ပဋိညာဉ်နှင့် မူဝါဒများ အတိုင်း လိုက်နာပြီး ဒေသတွင်း လုံခြုံရေးဆိုင်ရာ ဆွေးနွေးမှုများမှတစ်ဆင့် အကောင်အထည်ဖော်သွားမည်ဟု ဖော်ပြခဲ့သည်။
GSI ၏ အနှစ်သာရသည် ဒေသတွင်းနှင့် ကမ္ဘာလုံးဆိုင်ရာ လုံခြုံရေးအတွက် ကွဲပြားခြားနားသည့် အစီအစဉ် တစ်ခု ဖြစ်ပြီး အနောက်နိုင်ငံများနှင့် အမေရိကန်က ဦးဆောင်သည့် အင်အားစုများ၏ စံချိန်စံညွှန်းများနှင့် ကွဲလွဲလျက် ရှိသည်။
တရုတ်၏ GSI အစီအစဉ်သည် ဒီမိုကရေစီ တန်ဖိုးများကို မျှဝေပြီး မတူကွဲပြားမှုများကို အခြေခံမည့် လုံခြုံရေး ကဏ္ဍအစား ညှိနှိုင်းပြေလည်မှု၊ ဆွေးနွေးမှုနှင့် အတူယှဉ်တွဲနေထိုင်မှုတို့အပေါ် အခြေခံသည့် လုံခြုံရေး အစီအစဉ် ဖြစ်သည်။
အချုပ်ဆိုရပါက တရုတ်သံတမန်များအတွက် အမေရိကန်တို့ အောင်မြင်ခဲ့ခြင်းမရှိသည့် နယ်ပယ်ကဏ္ဍများတွင် အောင်မြင်စွာ လုပ်ဆောင်နိုင်ရေးသည် ဦးစားပေးကိစ္စတစ်ရပ် ဖြစ်လာခဲ့သည်။
ဥပမာတစ်ခုကို ပြရမည်ဆိုပါက ၂၀၂၁ ခုနှစ်၊ သြဂုတ်လက အာဖဂန်နစ္စတန်မှ အမေရိကန်တပ်များ ရုပ်သိမ်းသွား ခဲ့ပြီးနောက် အာဏာရလာခဲ့သည့် တာလီဘန်အုပ်ချုပ်သူများကို တရုတ်က ထိတွေ့ဆက်ဆံမှုများ ပြုလုပ်ခဲ့သည်။
အီရန်သမ္မတနဲ့ တရုတ်သမ္မတကိုတွေ့ရစဉ်
တရုတ်သည် တာလီဘန်အဖွဲ့နှင့် စီးပွားရေး ပူးပေါင်းဆောင်ရွက်မှုကို မြှင့်တင်ရန်နှင့် တာလီဘန်တို့၏ သဘော ထား အလယ်အလတ်ရှိသည့် ပြည်ထဲရေးမူဝါဒများ အကောင်အထည် ဖော်စေရန် ဆန္ဒရှိခဲ့သည်။
ထို့အတူ တရုတ်သည် လုံခြုံရေးအတွက် စိုးရိမ်စရာကောင်းသည်ဟု နိုင်ငံတကာက သတ်မှတ်ထားသည့် ရုရှားနှင့် အီရန်နိုင်ငံတို့ဘက်မှ ရပ်တည်ပေးခဲ့သည်။
တရုတ်၊ ရုရှားနှင့် အီရန်တို့က အမေရိကန်၏ ကျရှုံးမှုသည် ၎င်းတို့ ၃ နိုင်ငံ၏ ခေါင်းဆောင်မှုအပိုင်းနှင့် လုံခြုံရေး အခင်းအကျင်းသစ်အတွက် အောင်မြင်မှုတစ်ခု ရရှိလာစေနိုင်သည့် အခြေအနေတစ်ရပ်အဖြစ် အသိအမှတ်ပြု လက်ခံထားကြသည်။
ထို့ကြောင့် တရုတ်အနေနှင့် အစ္စရေး-ဟားမာ့စ် ပဋိပက္ခကို အမှန်တကယ် ကြားဝင်စေ့စပ်ပေးလိုသည့်ဆန္ဒ ရှိမည်ဆိုပါက ၎င်း၏ ကြားနေရပ်တည်မှု သဘောထားတွင် ဆန့်ကျင်ဘက်ဖြစ်စေမည့် အချက်များကို ပထမဆုံး အကြိမ် ဖြေရှင်းရမည် ဖြစ်သည်။
အဘယ်ကြောင့်ဆိုသော် တရုတ်သည် အစ္စရေး-ပါလက်စတိုင်း ပဋိပက္ခတွင် အာရပ်၊ အစ္စလာမ်မစ်နိုင်ငံများနှင့် တစ်သားတည်းရှိကြောင်း ပြောကြားခဲ့ခြင်းကြောင့် ဖြစ်သည်။
ကြားနေဝါဒသည် အောင်မြင်သည့် ကြားဝင်စေ့စပ်ညှိနှိုင်းမှုများအတွက် ကြိုတင်သတ်မှတ်ချက်တစ်ခု မဟုတ် သော်လည်း သမာသမတ်ကျသည့် ရပ်တည်ချက်တစ်ခုတော့ မဟုတ်ပေ။
ထို့ကြောင့် တရုတ်အနေနှင့် အစ္စရေး-ဟားမာ့စ် ပဋိပက္ခကို အောင်မြင်စွာ ကြားဝင်စေ့စပ်နိုင်ပြီး ၎င်း၏ သြဇာ လွှမ်းမိုးမှုကို မြှင့်တင်လိုပါက လက်တွေ့ကျပြီး လိမ္မာပါးနပ်မှုရှိသည့် သံတမန်ပရိယာယ်တစ်ခုဖြင့် ဂရုတစိုက် ချဉ်းကပ်ရန် လိုအပ်လှပေသည်။
Source: Asia Times
- By CNI
- Category: ဆောင်းပါး
- Hits: 296
CNI Sport Article
၂၀၂၃ ခုနှစ်၊ ဒီဇင်ဘာ ၈
မန်စီးတီးအသင်းဟာ နောက်ဆုံးကစားခဲ့တဲ့ ပရီးမီးယားလိဂ်ပွဲမှာ အက်စတွန်ဗီလာအသင်းကို ၁ ဂိုး- ဂိုးမရှိနဲ့ အရေးနိမ့်ပြီးနောက် ပရီးမီးယားလိဂ်မှာ နိုင်ပွဲပျောက်ဆုံးတာ ၄ ပွဲဆက် ရှိသွားခဲ့ပြီ ဖြစ်ပါတယ်။
မန်စီးတီးအသင်း နိုင်ပွဲပျောက်ဆုံးတဲ့ ၄ ပွဲမှာ တွေ့ခဲ့ရတဲ့ အသင်းတွေကတော့ ချယ်လ်ဆီး၊ လီဗာပူးလ်၊ စပါးနဲ့ အက်စတွန်ဗီလာအသင်းစတဲ့ ထိပ်တန်းအသင်းတွေပါ။
တချို့အသင်းတွေအတွက် ဒီလိုအသင်းတွေနဲ့ တွေ့ဆုံချိန်မှာ နိုင်ပွဲပျောက်ဆုံးတာ ဘယ်သူမှ သတိပြုမိမှာ မဟုတ်ပေမယ့် မန်စီးတီးလို လက်ရှိချန်ပီယံ အသင်းအတွက်တော့ စိုးရိမ်စရာ ဖြစ်ခဲ့ရပါတယ်။
ဟာလန်းနဲ့ အသင်းဖော်တွေကိုတွေ့ရစဉ်
ပြီးခဲ့တဲ့ရာသီက ဆုဖလား ၃ လုံး ရယူနိုင်ခဲ့တဲ့ မန်စီးတီးအသင်း အတွက်တော့ ဒီ ၄ ပွဲမှာ အမြင့်ဆုံး ရနိုင်တဲ့အမှတ် ၁၂ မှတ်ထဲက ၃ မှတ်သာ ရယူနိုင်ခဲ့တာဟာ ပရီးမီးယားလိဂ် ချန်ပီယံဆုကို ဆက်ပြီးထိန်းသိမ်းနိုင်မယ့် မျှော်လင့် ချက်ကို အနည်းငယ် ထိခိုက်ခဲ့ပါတယ်။
ပရီးမီးယားလိဂ်ပြိုင်ပွဲဟာ တစ်ဝက်မကျိုးသေးပေမယ့် ဒီရာသီမှာ ချန်ပီယံဆုအတွက် ပြိုင်ဆိုင်တဲ့ အသင်း အရေအတွက်ဟာ ပြီးခဲ့တဲ့နှစ်ကထက် ပိုပြီးတိုးလာနိုင်တာကြောင့် ဒါဟာ မန်စီးတီးအသင်းအတွက် အချက်ပေးသံ ဖြစ်နိုင်ပါတယ်။
အာဆင်နယ်နဲ့ လီဗာပူးလ်အသင်းတို့ဟာ ဒီရာသီမှာ အမှားအယွင်းနည်းနိုင်သမျှ နည်းအောင် လုပ်ဆောင်နေသလို စပါး၊ ဗီလာ၊ ယူနိုက်တက်နဲ့ နယူးကာဆယ် အသင်းတို့ကလည်း အနောက်ကနေ ဖိအားပေးနေတာပါ။
အဲ့ဒါကြောင့် မန်စီးတီးအသင်းအနေနဲ့ ပရီးမီးယားလိဂ် ချန်ပီယံဆုကို ကာကွယ်ချင်တယ်ဆိုရင် လက်ကျန်ပွဲစဉ် တွေမှာ လုံးဝအမှားအယွင်းခံလို့ မရတော့တာ ဖြစ်ပါတယ်။
မန်စီးတီးအသင်းနည်းပြ ဂွာဒီယိုလာက သူတို့ဟာ ဒီရာသီမှာလည်း ပရီးမီးယားလိဂ် ချန်ပီယံဆုကို ထပ်ပြီး ရယူသွားမယ်လို့ ပြောခဲ့ပေမယ့် အက်စတွန်ဗီလာအသင်းကို အရေးနိမ့်အပြီးမှာ သူတို့ရုန်းကန်နေရပြီလို့ ဝန်ခံခဲ့တာပါ။
ဒီဘရိုင်းကိုတွေ့ရစဉ်
မန်စီးတီးအသင်း ဒီလိုမျိုးရုန်းကန်နေရတဲ့ အကြောင်းအရင်းတွေကလည်း ရှိနေတာ ဖြစ်ပါတယ်။
ဒါကတော့ ကွင်းလယ်ဖန်တီးရှင် ဒီဘရိုင်းကို ဒဏ်ရာကြောင့် ရာသီအစကတည်းက အနားပေးထားရတာပါ။
ဒီဘရိုင်းဟာ မန်စီးတီးရဲ့အသက်လို့ ပြောလို့ရတာဖြစ်ပြီး သူပါဝင်တယ်ဆိုရင် ကစားသမားတွေ အားလုံးဟာ လွတ်လွတ်လပ်လပ်နဲ့ ကစားလို့ရပြီး တိုက်စစ်လမ်းကြောင်းတွေဟာ ပိုပြီးပွင့်သွားတာ ဖြစ်ပါတယ်။
ပြီးခဲ့တဲ့ရာသီက မန်စီးတီးအသင်း ဆုဖလား ၃ လုံး ရယူနိုင်တာနဲ့ ဟာလန်း ဂိုး အများအပြား သွင်းယူနိုင်တာက ဒီဘရိုင်းကြောင့်လို့ ပြောရင် မှားမယ်မထင်ပါဘူး။
ဂွာဒီယိုလာနဲ့ မန်စီးတီးအသင်း တစ်သင်းလုံးက အခုဆိုရင် ဒီဘရိုင်းကို လွမ်းနေလောက်ကြပြီ ဖြစ်ပါတယ်။
မန်စီးတီးအနေနဲ့ ဒီဘရိုင်းအပြင် ကွင်းလယ်လူ ရိုဒရီ မပါဝင်နိုင်တဲ့ ပွဲတွေအတွက် အဖြေရှာဖို့လည်း လိုအပ်နေပြီ လို့ ထင်ပါတယ်။
ရိုဒရီဟာ မန်စီးတီးအသင်းရဲ့ ကွင်းလယ် ကစားသမားဖြစ်ပေမယ့် နောက်တန်း နေရာမှာလည်း ကစားပြီး လိုအပ်ရင် ဂိုးပါသွင်းတဲ့သူဖြစ်တာကို ပြီးခဲ့တဲ့ ချန်ပီယံလိဂ်ဗိုလ်လုပွဲမှာ မြင်တွေ့ခဲ့ရတာပါ။
မန်စီးတီးအသင်းဟာ ဒီရာသီ ရိုဒရီမပါဝင်တဲ့ ပြည်တွင်းပွဲစဉ် ၄ ပွဲစလုံး ရှုံးနိမ့်ခဲ့တာတော့ စပိန်ကစားသမားရဲ့ အရေးပါမှုကို မြင်တွေ့ခဲ့ရတာ ဖြစ်ပါတယ်။
မန်စီးတီးအသင်းဟာ ဒီရာသီ ခံစစ်ပိုင်းမှာလည်း မနှစ်ကနဲ့ မတူဘဲ လိုအပ်ချက်တွေ အများကြီး ရှိနေတာကြောင့် သွင်းဂိုးတွေ အများကြီးကို ခွင့်ပြုပေးနေရတာပါ။
မန်စီးတီးအသင်းဟာ ဒီရာသီမှာ လိုအပ်ချက်အချို့ရှိနေပေမယ့် ပရီးမီးယားလိဂ် ချန်ပီယံဆုကို ရယူဖို့ ရေပန်း စားနေတဲ့ စာရင်းကို ဆက်ပြီး ဦးဆောင်နေတာ ဖြစ်ပါတယ်။
ပရီးမီးယားလိဂ်ဖလားနဲ့မန်စီးတီးအသင်းကို တွေ့ရစဉ်
အဲ့ဒါကြောင့် မန်စီးတီးအသင်းဟာ နည်းစနစ်ပိုင်းမှာ ဆရာတစ်ဆူအဖြစ် သတ်မှတ်ထားတဲ့ ဂွာဒီယိုလာ လက်အောက်မှာ ရလဒ်ကောင်းတွေနဲ့အတူ ပြန်လာနိုင်မယ်ဆိုတာတော့ သေချာနေတာပါ။
ဂွာဒီယိုလာက မန်စီးတီးအသင်းကို ပရီးမီးယားလိဂ်ဖလား ၄ နှစ်ဆက်တိုက် ရယူနိုင်တဲ့ ပထမဆုံးအသင်း ဖြစ်အောင် လုပ်ဖို့ ရည်ရွယ်ထားတာ ဖြစ်ပါတယ်။
ပရီးမီးယားလိဂ် သမိုင်းမှာ ဆုဖလားကို ၃ နှစ်ဆက်တိုက် ရယူနိုင်တဲ့ အသင်းတွေအဖြစ် ယူနိုက်တက်ရဲ့စံချိန်ကို မန်စီးတီးအသင်းက အမှီလိုက်နိုင်ခဲ့တာပါ။
ဂွာဒီယိုလာအနေနဲ့ မန်စီးတီးအသင်းကို ရလဒ်ကောင်းတွေ ပြန်ရယူပေးပြီး ပရီးမီးယားလိဂ်မှာ စံချိန်တင်အောင် လုပ်ပေးနိုင်မလားဆိုတာ စောင့်ကြည့်ရမှာ ဖြစ်ပါတယ်။