- By CNI
- Category: ဆောင်းပါး
- Hits: 277
CNI Article
၂၀၂၄ ခုနှစ်၊ ဖေဖော်ဝါရီ ၄
၂၀၁၉ ခုနှစ်က ဟောင်ကောင်ဒေသ၏ လမ်းများပေါ်တွင် ဒီမိုကရေစီလိုလားသည့် ဆန္ဒပြသူများ ချီတက်ဆန္ဒပြခဲ့ ချိန်တွင် နာသန်လော (Nathan Law)သည် သူသွားရောက်သော နေရာတိုင်းတွင် ဒီမိုကရေစီလိုလားသည့် သီချင်း များကို ကြားခဲ့ရသည်။
ထိုအချိန်က လောသည် ဟောင်ကောင်တွင် လူသိအများဆုံး ဒီမိုကရေစီလိုလားသည့် တက်ကြွလှုပ်ရှားသူ တစ်ဦး ဖြစ်သည်။
သူသည် ၂၀၁၄ ခုနှစ်က ထီးရိပ် လှုပ်ရှားမှု (Umbrella Movement) ဟု လူသိများသည့် ဆန္ဒပြမှုကို ဦးဆောင်သည့် ကျောင်းသားခေါင်းဆောင်များထဲတွင် တစ်ဦးအပါအဝင်ဖြစ်ပြီး တစ်စတစ်စ လူသိများလာခဲ့ခြင်း ဖြစ်သည်။
ထိုဆန္ဒပြလှုပ်ရှားမှုသည် ဟောင်ကောင် ရွေးကောက်ပွဲများတွင် နိုင်ငံရေးကိုယ်စားလှယ်လောင်းများအား တရုတ် က ဗီတိုအာဏာဖြင့် ပယ်ချခွင့်ပြုမည့် အစီအစဉ်ကို ဆန့်ကျင်သည့်အနေဖြင့် ပြုလုပ်ခဲ့ခြင်းဖြစ်သည်။
နောက်ပိုင်းတွင် လောသည် နိုင်ငံရေးပါတီ အသစ်တစ်ခုကို ထူထောင်ခဲ့ပြီး ဟောင်ကောင်၏ အသက်အငယ်ဆုံး ရွေးကောက်ခံ လွှတ်တော်အမတ်တစ်ဦး ဖြစ်လာခဲ့သည်။
ဟောင်ကောင် ဘောလုံးပရိသတ်တွေကိုတွေ့ရစဉ်
သို့သော် နောက်ပိုင်းတွင် လောနှင့်အခြား ဒီမိုကရေစီလိုလားသည့် နိုင်ငံရေးသမားများသည် ကျမ်းသစ္စာ ကျိန်ဆိုခဲ့ ခြင်း မရှိသည့်အတွက် လွှတ်တော်အမတ်ဖြစ်ရန် အရည်အချင်း မပြည့်မီဟုဆိုကာ ဖယ်ရှားခံခဲ့ရသည်။
သို့သော် ၂၀၁၉ ခုနှစ်တွင် ဆန္ဒပြမှုများ နောက်တစ်ကြိမ် ဖြစ်ပွားခဲ့ပြီး လမ်းများပေါ်တွင် ဆန္ဒပြသူများနှင့် ပြည့်နှက် သွားခဲ့သည်။
ထို့ပြင် ဆန္ဒပြသူများသည် ၎င်းတို့၏ တော်လှန်မှုကို ပြသရန်အတွက် ပုံမှန်မဟုတ်သည့် ဆန္ဒပြနေရာတစ်ခုကို ရွေးချယ်ခဲ့ကြသည်။ ထိုနေရာမှာ ဘောလုံးကွင်းဖြစ်သည်။
ဟောင်ကောင်လက်ရွေးစဉ် ဘောလုံးအသင်း ကစားချိန်တိုင်းတွင် လမ်းများပေါ်မှ ဆန္ဒပြသံများသည် အခြားနေရာ များကထက် ပိုမိုကျယ်လောင်စွာ ထွက်ပေါ်ခဲ့သည်။
ဟောင်ကောင်ဘောလုံးပရိသတ်များက တရုတ်နိုင်ငံတော်သီချင်းကို မနှစ်သက်ကြောင်း ဖော်ပြသည့်အနေဖြင့် အော်ဟစ်ဆန္ဒပြကြမည်ဖြစ်သည်။
ထို့နောက် ဘောလုံးပရိသတ်များသည် တရုတ်နိုင်ငံတော်သီချင်းအစား ဆန္ဒပြလှုပ်ရှားမှုနှင့် ဆက်နွှယ်မှုရှိသည့် Glory to Hong Kong သီချင်းကို သီဆိုကြမည်ဖြစ်သည်။
ထိုဖြစ်စဉ်များကို ဟောင်ကောင်ဘောလုံးအသင်း ကစားသည့်ပွဲတိုင်းတွင် မြင်တွေ့ရမည်ဖြစ်သည်။
သို့သော်လည်း ဇန်နဝါရီ ၂၃ ရက်က ကာတာနိုင်ငံ ဒိုဟာ (Doha) မြို့တော်တွင် ကျင်းပသည့် ၂၀၂၄ အာရှ ဖလား၏ ရှုံးထွက်ပွဲစဉ်အဆင့်သို့ ရောက်ရှိရန် ဟောင်ကောင်နှင့် ပါလက်စတိုင်း အသင်းတို့ ယှဉ်ပြိုင်ခဲ့သည့် ပွဲစဉ်တွင်မူ တရုတ်နိုင်ငံတော်သီချင်းအား လှောင်ပြောင်သရော်သည့် အော်ဟစ်သံများကို မကြားခဲ့ရပေ။
ထိုပွဲတွင် ပါလက်စတိုင်းအသင်းက ၃ ဂိုးပြတ် အနိုင်ရရှိခဲ့သော်လည်း ၂၀၁၉ ခုနှစ် အာရှဖလားပြိုင်ပွဲနှင့် နှိုင်းယှဉ်ပါ က ဟောင်ကောင်အသင်းအတွက် နိုင်ငံရေးအခြေအနေ၊ လက်ရွေးစင်အသင်းအမည်များ တူညီခဲ့ခြင်းမရှိပေ။
ဟောင်ကောင် ဘောလုံးပရိသတ်တွေကိုတွေ့ရစဉ်
လက်ရှိတွင် ဟောင်ကောင် လက်ရွေးစဉ် ဘောလုံးအသင်းသည် "ဟောင်ကောင်၊ တရုတ်" ဟူသည့် အမည်ဖြင့် ပါဝင် ယှဉ်ပြိုင်နေရခြင်းကြောင့် ဖြစ်သည်။
ဟောင်ကောင်ကို ဗြိတိန်က ၁၉၉၇ ခုနှစ်တွင် တရုတ်ထံ လွှဲပြောင်းအပ်နှံခဲ့ချိန်က တရုတ်သည် "တစ်နိုင်ငံ၊ စနစ် နှစ်ခု" မူဝါဒအောက်တွင် ဟောင်ကောင်၏ အနေအထားကို အထူးကိုယ်ပိုင်အုပ်ချုပ်ခွင့်ရဒေသအဖြစ် နှစ်ပေါင်း ၅၀ ကြာ လုပ်ပိုင်ခွင့်အပ်နှင်းမည်ဟု ကတိပြုခဲ့သည်။
သို့သော်လည်း ဟောင်ကောင်၏ လစ်ဘရယ် ဒီမိုကရေစီစနစ်နှင့် မူမတူ ယှဉ်တွဲနေထိုင်မှု ဝါဒီများအကြားတွင် တင်းမာမှုများ မြင့်တက်လာခဲ့သည်။ ထိုတင်းမာမှုများသည် ဟောင်ကောင်နှင့် တရုတ် လက်ရွေးစင် ဘောလုံး အသင်းများ ယှဉ်ပြိုင်သည့် ပွဲစဉ်များတွင် ပိုမိုသိသာထင်ရှားလာခဲ့သည်။
5.19 Incident အမည်ရှိ ဖြစ်စဉ်သည် တရုတ်နှင့် ဟောင်ကောင် ဘောလုံးအသင်းများအကြား နာမည်ဆိုးဖြင့် ကျော်ကြားသည့် ဖြစ်စဉ်တစ်ခုဖြစ်သည်။
၁၉၈၆ ခုနှစ်က မက္ကဆီကိုနိုင်ငံတွင် ကျင်းပခဲ့သည့် ကမ္ဘာ့ဖလားပြိုင်ပွဲတွင် ဟောင်ကောင်နှင့် တရုတ်တို့သည် ၁၉၈၅ ခုနှစ်တွင် ခြေစစ်ပွဲယှဉ်ပြိုင်ခဲ့ရသည်။
ထိုအချိန်က ဟောင်ကောင်သည် ဗြိတိန်လက်အောက်တွင် ရှိနေဆဲဖြစ်သဖြင့် ကိုလိုနီခေတ် အလံအောက်တွင် ဟောင်ကောင် လက်ရွေးစင်အသင်းအမည်ဖြင့် ယှဉ်ပြိုင်ခဲ့ကာ God Save the Queen အမည်ရှိ သီချင်းကို နိုင်ငံတော်သီချင်းအဖြစ် အသုံးပြုခဲ့သည်။
တရုတ်နိုင်ငံ၊ ဘေကျင်းမြို့တော်ရှိ Worker's Stadium အမည်ရှိ ဘောလုံးကွင်းတွင် ပြုလုပ်သည့် ထိုပွဲစဉ်၌ ပရိသတ် ၈၀၀၀၀ ရှေ့တွင် ဟောင်ကောင်က တရုတ်ကို ၂ ဂိုး- ၁ဂိုးဖြင့် အနိုင်ရရှိခဲ့သည်။
ထိုပွဲစဉ်အပြီးတွင် တရုတ်ဘောလုံး ပရိသတ်များက ဘောလုံးကွင်း အပြင်ဘက်တွင် ဆူပူသောင်းကျန်းခဲ့ကြသဖြင့် ဟောင်ကောင် ဘောလုံးသမားများသည် ဘောလုံးကွင်းထဲမှ ထွက်မရခဲ့ဘဲ နှစ်နာရီကြာ ပိတ်မိနေခဲ့သည်။
ဟောင်ကောင်ကို တရုတ်က လွှဲပြောင်းရယူခဲ့သည့် ၁၉၉၇ ခုနှစ်မှစပြီး တရုတ်၏ The March of The Volunteers အမည်ရှိ နိုင်ငံတော်သီချင်းသည် ဟောင်ကောင်၏ တရားဝင် နိုင်ငံတော်သီချင်းဖြစ်လာခဲ့သည်။
၂၀၁၈ ခုနှစ် ကမ္ဘာ့ဖလား ခြေစစ်ပွဲစဉ်နှင့် ၂၀၁၅ ခုနှစ်က ဟောင်ကောင်နှင့် တရုတ်လက်ရွေးစင် ဘောလုံးအသင်း များ ယှဉ်ပြိုင်ကစားခဲ့သည့် ပွဲစဉ်တိုင်းတွင် ဟောင်ကောင် ဘောလုံးပရိသတ်များသည် ၎င်းတို့၏ နိုင်ငံတော်သီချင်း ကို လှောင်ပြောင်အော်ဟစ်ခဲ့ ကြသည်။
တရုတ်နိုင်ငံတော်သီချင်း ဖွင့်သည့်အချိန်များတွင် ဟောင်ကောင် ဘောလုံပရိသတ်များသည် ဘောလုံးကွင်းကို ကျောခိုင်းထားပြီး "ဟောင်ကောင်သည် တရုတ်မဟုတ်" ဆိုသည့် စာသားများ ရေးသားထားသည့် ပိုစတာများကို ကိုင်ဆောင်ခဲ့ကြသည်။
ထိုဘောလုံးများသည် ဂိုးမရှိ သရေရလဒ်ဖြင့် ပြီးဆုံးခဲ့ပြီး ကမ္ဘာ့ဘောလုံးအဖွဲ့ချုပ် (ဖီဖာ)က ဟောင်ကောင် ဘောလုံးအဖွဲ့ချုပ်ကို ပြစ်ဒဏ်ချမှတ်ခဲ့သည်။
ထိုပြဿနာမျိုး ထပ်မဖြေစ်စေရန် ဟောင်ကောင်အစိုးရသည် ၂၀၂၀ ပြည့်နှစ်၊ ဇွန်လတွင် နိုင်ငံတော်သီချင်း ဥပဒေကို ထုတ်ပြန်ခဲ့သည်။
ဟောင်ကောင် ဘောလုံးပရိသတ်တွေကိုတွေ့ရစဉ်
ထိုဥပဒေအရ အထင်ကရ ပွဲအခမ်းအနားများ အထူးသဖြင့် အားကစားပွဲများတွင် The March of Volunteers နိုင်ငံတော်သီချင်းကို ဖွင့်ထားသည့်အချိန်တွင် ဟောင်ကောင်ဒေသခံအားလုံးသည် မတ်တပ်ရပ်နေရမည်ဖြစ်ပြီး နိုင်ငံတော်သီချင်းဖွင့်ချိန်တွင် ရည်ရွယ်ချက်ရှိရှိ နှောင့်ယှက်မည့်သူများသည် ထောင်ဒဏ် ၃ နှစ်နှင့် ဒဏ်ငွေ ဒေါ်လာ ၆၀၀၀ ချမျတ်ခံရမည်ဖြစ်ကြောင်း ပြဋ္ဌာန်းခဲ့သည်။
မည်သို့ပင်ဆိုစေ ပြီးခဲ့သည့်နှစ်က ဟောင်ကောင်နှင့် မြန်မာလက်ရွေးစင် အသင်းတို့၏ ပွဲစဉ်တွင် ဟောင်ကောင် ပရိသတ်အချို့သည် ၎င်းတို့၏ နိုင်ငံတော်သီချင်းကို လှောင်ပြောင် အော်ဟစ်ခဲ့ကြသည်။
ယခုနှစ် ဇန်နဝါရီ ၁ ရက်ကလည်း ယူအေအီးနိုင်ငံ အဘူဒါဘီ (Abu Dhabi) တွင် တံခါးပိတ်ပြုလုပ်သည့် ဟောင်ကောင်နှင့် တရုတ်ဘောလုံးအသင်းတို့၏ ပွဲစဉ်တွင် ဟောင်ကောင်က တရုတ်ကို ၂ ဂိုး-၁ဂိုးဖြင့် အနိုင် ရရှိခဲ့ပြီး ထိုပွဲစဉ်သည် ၂၈ နှစ်အတွင်း တရုတ်ကို ပထမဆုံးအကြိမ် အနိုင်ရခဲ့သည့်ပွဲစဉ်ဖြစ်သည်။
"ဒါပေမယ့် ဟောင်ကောင်အသင်းကို ဂုဏ်ပြုခဲ့တဲ့ ဟောင်ကောင်အရာရှိ တစ်ယောက်မှ မရှိခဲ့ပါဘူး။ တရုတ်ကို ဟောင်ကောင်က အနိုင်ရခဲ့တဲ့ အကြောင်းကိုလည်း ဘယ်သူကမှ မပြောကြပါဘူး။ တကယ်လို့ ဟောင်ကောင်သာ ဂျပန် ဒါမှမဟုတ် ကိုရီးယားအသင်းတွေကို အနိုင်ရခဲ့မယ်ဆိုရင် ဟောင်ကောင်အစိုးရဟာ ဟောင်ကောင်ဘောလုံး အသင်းကို ချီးကျူးဂုဏ်ပြုပါလိမ့်မယ်" ဟု လောက ပြောကြားခဲ့သည်။
တစ်ချိန်က ဘောလုံးကွင်းများသည် ဟောင်ကောင်ဆန္ဒပြသူများအတွက် အထင်ကရနေရာတစ်ခု ဖြစ်ခဲ့သော် လည်း ယခုနှစ် အာရှဖလားပြိုင်ပွဲတွင်မူ ဟောင်ကောင်ဆန္ဒပြသူများ၏ အသံမှာ တိတ်ဆိတ်ငြိမ်သက်နေသည်ကို မြင်တွေ့ရမည်ဖြစ်သည်။
Source: အယ်လ်ဂျာဇီးယား
- By CNI
- Category: ဆောင်းပါး
- Hits: 495
CNI Sport Article
၂၀၂၄ ခုနှစ်၊ ဖေဖော်ဝါရီ ၄
၂၀၂၃-၂၄ ရာသီ ပရီးမီးယားလိဂ်ပြိုင်ပွဲရဲ့ ရာသီဝက်ကာလကို ကျော်လွန်ပြီး အသင်းတိုင်းက သူတို့ရဲ့ ရည်မှန်းချက် တွေ ပစ်မှတ်ထား ကြိုးပမ်းနေတဲ့အချိန်မှာ အားလုံး မထင်မှတ်ထားတဲ့ သတင်းတစ်ပုဒ် ထွက်ပေါ်လာခဲ့ပါတယ်။
ဒါကတော့ လီဗာပူးလ်အသင်းကနေ ဒီရာသီအကုန်မှာ ထွက်ခွာတော့မယ်လို့ ကလော့ပ်က အံ့အားသင့်ဖွယ် ကြေညာခဲ့တာ ဖြစ်ပါတယ်။
ပရီးမီးယားလိဂ်ပြိုင်ပွဲနဲ့ လီဗာပူးလ်အသင်းကို အားပေးတဲ့သူတွေအတွက် တကယ်ကို အံ့အားသင့်ပြီး တုန်လှုပ် ခဲ့ကြရတာပါ။ အထူးသဖြင့် လီဗာပူးလ်အသင်းကို အားပေးတဲ့ ပရိသတ်တွေအတွက် စိတ်ထိခိုက်စရာ ဖြစ်ခဲ့ရပါ တယ်။
၂၀၁၅ ခုနှစ်က လီဗာပူးလ်အသင်းကို ရောက်ရှိလာခဲ့တဲ့ ကလော့ပ်ဟာ အသင်းကို ကမ္ဘာ့အကောင်းဆုံး အသင်းတွေ ထဲက တစ်သင်းဖြစ်အောင် ပြုလုပ်ပေးနိုင်ခဲ့တဲ့သူ ဖြစ်ပါတယ်။
ကလော့ပ် မရောက်ခင်က ဆုဖလား အောင်မြင်မှုတွေရဖို့ ခက်ခဲခဲ့တဲ့ လီဗာပူးလ်အသင်းဟာ သူရောက်လာအပြီး မှာတော့ ဆုဖလားရဖို့ နှစ်တိုင်း စိန်ခေါ်နိုင်တဲ့ အသင်းအဖြစ် ပြောင်းလဲသွားခဲ့ပါတယ်။
လီဗာပူးလ်အသင်း ပရိသတ်တွေကို ကလော့ပ် နှုတ်ဆက်နေစဉ်
ပရီးမီးယားလိဂ်ဖလားရဖို့ နှစ်ပေါင်း ၃၀ ကျော်ကြာ စောင့်ဆိုင်းခဲ့ရတဲ့ လီဗာပူးလ်အသင်းဟာ ကလော့ပ် ရောက်လာအပြီးမှာ ပရီးမီးယားလိဂ်ဖလားကို ပထမဆုံးအကြိမ် ကိုင်မြှောက်နိုင်ခဲ့ပါတယ်။
ကလော့ပ်ဟာ လီဗာပူးလ်အသင်းကို စွဲမက်ဖွယ်ရာကောင်းတဲ့ ကစားကွက်တွေ၊ အန်ဖီးလ်ကွင်းမှာ စံချိန်သစ်တွေနဲ့ အတူ ချန်ပီယံလိဂ်၊ ဥရောပစူပါဖလား၊ ဖီဖာကလပ် ကမ္ဘာ့ဖလား၊ ကာရာဘောင်းဖလား၊ FA ဖလား၊ ကွန်မြူနတီ ဒိုင်းတို့ကို ရယူပေးနိုင်ခဲ့တာပါ။
ကလော့ပ်ဟာ သူ့ရဲ့လက်ထက်မှာ လီဗာပူးလ်အသင်းကို ချန်ပီယံလိဂ်ပြိုင်ပွဲရဲ့ ဗိုလ်လုပွဲကို ၃ ကြိမ်အထိ ရောက်အောင် ပို့ဆောင်ပေးနိုင်ခဲ့ပြီး ပရီးမီးယားလိဂ်ပြိုင်ပွဲမှာ မန်စီးတီးအသင်းကို အနီးကပ် ဖိအားပေးနိုင်ခဲ့တာ ဖြစ်ပါတယ်။
မန်စီးတီးနဲ့ ရီးရယ်လ်အသင်းတို့နဲ့ ယှဉ်ပြိုင်ခဲ့ရတာကြောင့်သာ ကလော့ပ်ဟာ လီဗာပူးလ်အသင်းကို ရသင့်တဲ့ နောက်ထပ် ဆုဖလားတွေထပ်ပြီး မရယူပေးနိုင်ခဲ့တာပါ။
မန်စီးတီးအသင်းနည်းပြ ဂွာဒီယိုလာဆိုရင် ကလော့ပ် ထွက်ခွာမှာဖြစ်လို့ သူအိပ်လို့ ပိုကောင်းတော့မယ်လို့ ပြောခဲ့တဲ့အထိ ဂျာမန်လူမျိုးနည်းပြက သူ့ကို ဒုက္ခပေးနိုင်ခဲ့တယ်ဆိုတာ ပေါ်လွင်ခဲ့ပါတယ်။
ပရိသတ်တွေက ကလော့ပ်ကို ဂုဏ်ပြုနေစဉ်
လီဗာပူးလ်အသင်းကတော့ ကလော့ပ်လို အသင်းကို အောင်မြင်မှု အများအပြား ရယူပေးပြီး အသင်းအပေါ် အလွန်ချစ်တဲ့ နည်းပြတစ်ဦးကို ရာသီအကုန်မှာ ဆုံးရှုံးရတော့မှာပါ။
ကလော့ပ် တစ်ဦးတည်းလားဆိုရင် သူ့ရဲ့ လက်ထောက်နည်းပြ ၂ ဦးနဲ့ ဖွံ့ဖြိုးတိုးတက်ရေးနည်းပြတို့ပါ ဒီရာသီ အကုန်မှာ လီဗာပူးလ်အသင်းကနေ ထွက်ခွာတော့မယ်လို့ ကြေညာခဲ့ပါတယ်။
အဲဒါကြောင့် လီဗာပူးလ်အသင်းဟာ ကလော့ပ်ခေတ် အလွန်အသင်းကို ပြန်လည် တည်ဆောက်ရတော့မှာဖြစ်ပြီး အရင်လိုမျိုး ပြန်လည်အောင်မြင်မှုတွေရဖို့ အချိန်အတော်ကြာအောင် စောင့်ဆိုင်းရမှာကို လီဗာပူးလ်အသင်း ပရိသတ်တွေက စိုးရိမ်နေကြတာပါ။
ကလော့ပ်ကတော့ သူထွက်ခွာမှာကို လီဗာပူးလ်အသင်း ပရိသတ်တွေနဲ့ ကစားသမားတွေ မေ့ထားပြီး အောင်မြင်မှု တွေရဖို့သာ အာရုံစိုက်ဖို့ တိုက်တွန်းထားတာ ဖြစ်ပါတယ်။
လီဗာပူးလ်အသင်း ကစားသမားတွေကလည်း ဒီရာသီမှာ ဆုဖလား အောင်မြင်မှုတွေရယူပြီး နည်းပြ ကလော့ပ်ကို နှုတ်ဆက်ဖို့ ဆုံးဖြတ်ထားတယ်လို့ အသင်းခေါင်းဆောင် ဗန်ဒိုက်က ပြောထားတာပါ။
လီဗာပူးလ်အသင်းဟာ ကလော့ပ် ထွက်ခွာမယ်လို့ ကြေညာပြီးနောက် ကစားခဲ့တဲ့ ၂ ပွဲစလုံးမှာ ၅ ဂိုး-၂ ဂိုး၊ ၄ ဂိုး-၁ ဂိုးနဲ့ ဂိုးပြတ်အနိုင်ရပြီး ရလဒ်ကောင်းတွေကို ပိုင်ဆိုင်ခဲ့တာ ဖြစ်ပါတယ်။
ပရိသတ်တွေက ကလော့ပ်ကို ဂုဏ်ပြုနေစဉ်
လီဗာပူးလ်အသင်းဟာ ဒီရာသီမှာ အကောင်းဆုံးပုံစံ တစ်ခုကို ပိုင်ဆိုင်ထားပြီး ဆုဖလား ၄ လုံး ရယူနိုင်မယ့် လမ်းကြောင်းပေါ်မှာ ရှိနေတာပါ။
ပရီးမီးယားလိဂ်ပြိုင်ပွဲမှာ အမှတ်ပေးဇယား ထိပ်ဆုံးနေရာ ဦးဆောင်နေသလို ယူရိုပါလိဂ်ပြိုင်ပွဲမှာ ၁၆ သင်းအဆင့်၊ FA ဖလားပြိုင်ပွဲမှာ ပဉ္စမအဆင့်နဲ့ ကာရာဘောင်းလိဂ်ဖလား ဗိုလ်လုပွဲကို တက်ရောက်ထားတာ ဖြစ်ပါတယ်။
အဲဒါကြောင့် လီဗာပူးလ်အသင်း ကစားသမားတွေဟာ ဆုဖလားတွေ ရယူပေးပြီး နည်းပြ ကလော့ပ်ရဲ့ ခေတ်ကို အောင်မြင်မှုတွေနဲ့ အဆုံးသတ် ပေးနိုင်မလားဆိုတာကို စောင့်ကြည့်ရတော့မှာပါ။
လီဗာပူးလ်အသင်းဟာ အနီးစပ်ဆုံး ဆုဖလားအဖြစ် ဖေဖော်ဝါရီ ၂၅ ရက်မှာ ချယ်လ်ဆီးအသင်းနဲ့ ကာရာဘောင်း လိဂ်ဖလား ဗိုလ်လုပွဲ ယှဉ်ပြိုင်ရမှာဖြစ်ပြီး ဒီရာသီ ပထမဆုံးဆုဖလားကို ကလော့ပ်အတွက် ရယူပေးနိုင်မလား ဆိုတာတော့ မကြာခင်မှာ မြင်တွေ့ရတော့မှာ ဖြစ်ပါတယ်။
- By CNI
- Category: ဆောင်းပါး
- Hits: 478
CNI Sport Article
၂၀၂၄ ခုနှစ်၊ ဇန်နဝါရီ ၂၈
ကာတာနိုင်ငံမှာကျင်းပနေတဲ့ အာရှဖလားပြိုင်ပွဲကတော့ အုပ်စုတွင်းအဆင့်တွေ ပြီးဆုံးသွားခဲ့ပြီဖြစ်ပြီး ၁၆ သင်း အဆင့်တွေကို စတင်ယှဉ်ပြိုင်ကြတော့မှာဖြစ်ပါတယ်။
ဒီပြိုင်ပွဲကို အာဆီယံဒေသတွင်းက အသင်းတွေဖြစ်တဲ့ ထိုင်း၊ ဗီယက်နမ်၊ အင်ဒိုနီးရှားနဲ့ မလေးရှားအသင်းတို့ ဝင်ရောက်ယှဉ်ပြိုင်ခဲ့ကြတာပါ။
ဒီအသင်းတွေထဲမှာ ထိုင်းနဲ့အင်ဒိုနီးရှားအသင်းတို့ဟာ ၁၆ သင်းအဆင့်ကို တက်နိုင်ခဲ့ပြီး ကျန်တဲ့ ၂ သင်းဟာ အုပ်စုကနေ ထွက်ခဲ့ရပေမယ့် အာရှထိပ်သီးအသင်းတွေကို သူတင်ကိုယ်တင် ကစားပြီး မညံ့ခဲ့ကြောင်း သက်သေပြသခဲ့တာဖြစ်ပါတယ်။
အာရှနဲ့ အာဆီယံအသင်းတွေဟာ ကမ္ဘာ့အဆင့်သတ်မှတ်ချက်တွေ အများကြီးကွာသလို ခြေစွမ်းနဲ့ နာမည်ကြီး ကစားသမားတွေပါဝင်တာလည်း ကွာခြားနေတာပါ။
အာဆီယံအသင်းတွေအတွက် အုပ်စုတိုင်းဟာ အလွန်ခက်ခဲခဲ့ပေမယ့် သူတို့တွေဟာ ဘယ်ပြိုင်ဘက်ကိုမဆို အကောင်းဆုံးပုံစံနဲ့ တုန့်ပြန်သွားခဲ့ပြီး ပွဲသိမ်းခရာမမှုတ်ခင်အချိန်အထိ အကောင်းဆုံးပေးဆပ်ခဲ့ကြတာ ဖြစ်ပါတယ်။
အာဆီယံအသင်း၂ သင်းဖြစ်တဲ့ ဗီယက်နမ်နဲ့ အင်ဒိုနီးရှားအသင်းတို့ဟာ အုပ်စုတွင်းမှာ ဗိုလ်စွဲဖို့ ရေပန်းအစားဆုံးနဲ့ ချန်ပီယံဟောင်းတွေဖြစ်တဲ့ ဂျပန်၊ အီရတ်အသင်းတို့နဲ့ တစ်အုပ်စုတည်းကျရောက်ခဲ့တာပါ။
ဗီယက်နမ်အသင်းဟာ အုပ်စုပွဲစဉ် ၃ ပွဲစလုံး အရေးနိမ့်ခဲ့ပေမယ့် ထိပ်သီးအသင်းတွေကို ဦးဆောင်ဂိုးတွေတောင် သွင်းယူနိုင်ခဲ့တာဖြစ်ပါတယ်။
ဗီယက်နမ်အသင်း
ဗီယက်နမ်အသင်းဟာ အဖွင့်ပွဲစဉ်မှာ ဂျပန်အသင်းကို ၂ ဂိုး-၁ ဂိုးနဲ့ ဦးဆောင်ပြီးမှ ၄ ဂိုး-၂ ဂိုးနဲ့ အရေးနိမ့်ခဲ့တာပါ။
အီရတ်အသင်းနဲ့ ပွဲစဉ်မှာဆိုရင်လည်း ဗီယက်နမ်အသင်းဟာ ဦးဆောင်ဂိုးအရင်သွင်းနိုင်ခဲ့ပြီး ကစားသမားတစ်ဦး ထုတ်ပယ်ခံခဲ့ရတာကြောင့် ဒုတိယပိုင်းတစ်ပိုင်းလုံး တစ်ယောက်လျော့နဲ့ ကစားခဲ့ရပေမယ့် နာကျင်အချိန်ပိုမှာ ပေးခဲ့ရတဲ့ ပင်နယ်တီဂိုးကြောင့်သာ အရေးနိမ့်ခဲ့တာဖြစ်ပါတယ်။
ဗီယက်နမ်အသင်းဟာ ဒေသတွင်းအသင်းဖြစ်တဲ့ အင်ဒိုနီးရှားအသင်းကို အရေးနိမ့်ခဲ့ပေမယ့် ပြိုင်ပွဲတစ်လျှောက် သူတို့ရဲ့ကစားအား၊ နိုင်လိုစိတ်ပြင်းထန်တာတွေကို မြင်တွေ့ခဲ့ရတာပါ။
အင်ဒိုနီးရှားအသင်းကတော့ အီရတ်အသင်းနဲ့ ဂျပန်အသင်းကို ၃ ဂိုး-၁ ဂိုးစီနဲ့ အရေးနိမ့်ပြီး ဗီယက်နမ်အသင်းကို ၁ ဂိုး- ဂိုးမရှိနဲ့ အနိုင်ရခဲ့တာဖြစ်ပါတယ်။
အင်ဒိုနီးရှားအသင်းဟာ ဒီပွဲတွေမှာ သူတို့ရဲ့လျင်မြန်မှုနဲ့ အာရှထိပ်သီးအသင်းတွေကို ဒုက္ခရောက်အောင် လုပ်ဆောင်နိုင်ခဲ့တာပါ။
အင်ဒိုနီးရှားအသင်းဟာ ဗီယက်နမ်အသင်းကို အနိုင်ရခဲ့တာကြောင့်လည်း အကောင်းဆုံးအုပ်စုတတိယနဲ့ ၁၆ သင်း အဆင့်ကို တက်နိုင်ခဲ့ပါတယ်။
မလေးရှားအသင်း
မလေးရှားအသင်းကတော့ ဘာရိန်း၊ တောင်ကိုရီးယား၊ ဂျော်ဒန်အသင်းတို့နဲ့ တစ်အုပ်စုတည်းကျရောက်ခဲ့ပြီး ဘာရိန်းနဲ့ ဂျော်ဒန်အသင်းတို့ကို အရေးနိမ့်ခဲ့ပေမယ့် နောက်ဆုံးပွဲဖြစ်တဲ့ တောင်ကိုရီးယားအသင်းနဲ့ပွဲမှာတော့ အားလုံးအံ့အားသင့်ဖွယ်လုပ်ပြခဲ့တာဖြစ်ပါတယ်။
မလေးရှားအသင်းဟာ ဆွန်ဟောင်မင်၊ ဟွမ်ဟီချန်း၊ လီကန်အင်တို့လို ထိပ်တန်းကြယ်ပွင့်တွေပါတဲ့ တောင်ကိုရီးယားအသင်းကို နောက်ဆုံးမိနစ်အထိ လုံးဝအရှုံးမပေးဘဲ ၃ ဂိုးစီသရေကျအောင် ကစားသွားပြခဲ့တာပါ။
ဒီရလဒ်အပေါ် ပရိသတ်တွေက အံ့အားသင့်နေခဲ့ကြပြီး မလေးရှားကို ချီးကျူးမှုတွေပြုလုပ်သွားခဲ့တာဖြစ်ပါတယ်။
ထိုင်းအသင်းကတော့ အဖွင့်ပွဲစဉ်မှာ ကာဂျစ္စတန်အသင်းကို ၂ ဂိုး-ဂိုးမရှိနဲ့ အနိုင်ရခဲ့ပြီး ဒုတိယပွဲမှာ အိုမန်အသင်းနဲ့ ဂိုးမရှိသရေကျခဲ့သလို နောက်ဆုံးပွဲမှာလည်း အင်အားကြီးဆော်ဒီအသင်းနဲ့ ဂိုးမရှိသရေကျခဲ့တာပါ။
ထိုင်းအသင်း
ထိုင်းအသင်းဟာ ဒီပြိုင်ပွဲကို ဝင်ရောက်ယှဉ်ပြိုင်တဲ့ အာဆီယံအသင်း ၄ သင်းထဲမှာ အတည်ငြိမ်ဆုံးနဲ့ အကောင်းဆုံးပုံစံရှိနေပြီး ပေးဂိုး ၁ ဂိုးမှမပေးရဘဲ နောက်တစ်ဆင့်ကို တက်ရောက်နိုင်ခဲ့တာဖြစ်ပါတယ်။
ထိုင်းအသင်းဟာ နောက်ဆုံးပွဲမှာဆိုရင် ဆော်ဒီအသင်းကို အရန်ကစားသမားအများစုနဲ့ ကစားသွားခဲ့ပြီး သူတို့ဘယ်လောက်သန်မာလဲဆိုတာကို ပြသနိုင်ခဲ့တာပါ။
အာဆီယံအသင်း ၄ သင်းစလုံးဟာ လက်ရှိအချိန်မှာ အကောင်းဆုံးပုံစံတစ်ခုနဲ့ အာရှထိပ်သီးအသင်းတွေကို ဂိုးပြတ်မရှုံးဘဲ သူတင်ကိုယ်တင်ယှဉ်ပြိုင်ခဲ့တာကိုကြည့်မယ်ဆိုရင် အာဆီယံဘောလုံးလောကအတွက် ကောင်းတဲ့လက္ခဏာဖြစ်ပြီး နောက်လာမယ့် အာရှဖလားပြိုင်ပွဲတွေမှာ ဒီထက်ပိုမျှော်လင့်လို့ရလာမှာလည်း ဖြစ်ပါတယ်။
လက်ရှိကမ္ဘာပေါ်မှာ လူဦးရေအများဆုံးရှိတဲ့ တရုတ်နဲ့အိန္ဒိယတောင် အာရှဖလားပြိုင်ပွဲမှာ သွင်းဂိုးတစ်ဂိုးမှ မရဘဲ အုပ်စုက ထွက်ခွာခဲ့ရတဲ့အချိန်မှာ အာဆီယံအသင်းတွေရဲ့စွမ်းဆောင်ရည်ဟာ တကယ်ကို ကျေနပ်စရာလို့ ပြောရမှာပါ။
အဲ့ဒါကြောင့်လည်း အာဆီယံအသင်း၂ သင်းဖြစ်တဲ့ အင်ဒိုနီးရှားနဲ့ ထိုင်းအသင်းတို့ဟာ အာရှဖလားပြိုင်ပွဲမှာ ဘယ်အဆင့်အထိ တက်နိုင်မလဲဆိုတာ စောင့်ကြည့်ချင်စရာကောင်းနေတာတော့ အသေအချာပဲဖြစ်ပါတယ်။
- By CNI
- Category: ဆောင်းပါး
- Hits: 607
CNI Article
ဘန်ကောက်၊ ဇန်နဝါရီ ၂၈
မြန်မာနိုင်ငံတွင် ပြီးခဲ့သည့်နှစ် အောက်တိုဘာလကုန်ပိုင်းက တိုင်းရင်းသားလက်နက်ကိုင်များ၏ ၁၀၂၇ အမည်ရှိ စစ်ဆင်ရေး စတင်ခဲ့ချိန်ကတည်းက နိုင်ငံတော်စီမံအုပ်ချုပ်ရေးကောင်စီ (နစက)သည် မြန်မာနိုင်ငံတစ်ဝန်းရှိ စစ် စခန်း ၄၆၉ ခုထက်မနည်းကို ဆုံးရှုံးခဲ့ရသည်ဟု ယုံကြည်ရလောက်သည့် သတင်းရင်းမြစ်များက ဖော်ပြခဲ့သည်။
ပြီးခဲ့သည့် သီတင်းပတ် ၁၁ ပတ်အတွင်း မြန်မာနိုင်ငံ၏ အဓိက နယ်စပ်ဒေသ ၅ ခု (ရှမ်းပြည်နယ်၊ ချင်းပြည်နယ်၊ စစ်ကိုင်းတိုင်းဒေသကြီး၊ ကယားပြည်နယ်နှင့် ကချင်ပြည်နယ်)တို့တွင် တိုက်ပွဲများ ပြင်းထန်စွာ ဖြစ်ပွားခဲ့ပြီး လက်နက်ကိုင်အဖွဲ့များသည် မြို့နယ်များနှင့် ခရိုင်ပေါင်း ၃၀ ထက်မနည်းကို သိမ်းပိုက်နိုင်ခဲ့သည်။
၁၀၂၇ စစ်ဆင်ရေးသည် AA ၊ MNDAA နှင့် TNLA တို့ ပူးပေါင်းသည့် ညီနောင်မဟာမိတ်သုံးဖွဲ့၏ စစ်ဆင်ရေး ဖြစ်သည်။
ရှမ်းပြည်မြောက်ပိုင်းရှိ နယ်မြေဒေသပေါင်း ၁၆ ခုထက်မနည်းကို ညီနောင်မဟာမိတ်သုံးဖော်က သိမ်းပိုက်ခဲ့သည်။
ကျန်နယ်မြေဒေသ ၁၅ ခုကို “ဝ”ပြည်သွေးစည်းညီညွတ်ရေးတပ်မတော်(UWSA)၊ ကချင်လွတ်လပ်ရေး တပ်မတော်(KIA)၊ ချင်းအမျိုးသားတပ်ဦး(CNF)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF)၊ နှင့် ပြည်သူ့ကာကွယ်ရေးတပ်ဖွဲ့(PDF) တို့အပါအဝင် လက်နက်ကိုင်အဖွဲ့များက သိမ်းပိုက်ခဲ့သည်။
AA က မြန်မာ့တပ်မတော်ပိုင် လက်နက်ခဲယမ်းများကို သိမ်းဆည်းထားစဉ်
နစကအတွက်မူ လက်ရှိ အခြေအနေသည် ကောင်းမွန်သည်ဟု မဆိုနိုင်ဘဲ တပ်မတော်၏ လုပ်ဆောင်ပုံများနှင့် စီးပွားရေး ယိုယွင်းမှုတို့ကြောင့် မြန်မာပြည်သူများ၏ ဖိအားများ မြင့်တက်နေချိန်တွင် တိုက်ပွဲများမှာလည်း ဆက်လက် ဖြစ်ပွားနေသည်။
ထိုအခြေအနေမျိုးတွင် အရေးကြီးသည့် မေးခွန်းတစ်ခု ပေါ်ပေါက်လာခဲ့သည်။ ထိုမေးခွန်းမှာ တပ်မတော်အနေနှင့် လက်နက်ကိုင်အဖွဲ့များကို လေကြောင်းတိုက်ခိုက်မှုများ၊ ရော့ကတ်များနှင့် ပစ်ခတ်တိုက်ခိုက်မှုများဖြင့် စစ်ပွဲကို ဆက်လက် ဆင်နွှဲမည်လောဟူသည့် မေးခွန်းဖြစ်သည်။
ထိုတိုက်ခိုက်မှုများကြောင့် အရပ်သားများ ထိခိုက်နစ်နာမှုများ ရှိခဲ့ပြီး မြန်မာနိုင်ငံအတွင်း လူပေါင်း ၂ သန်းနီးပါး သည် အိမ်ပစ်ရာပစ် ထွက်ပြေးတိမ်းရှောင်ခဲ့ရသည်။
သို့သော် ထိုအခြေအနေသည် တပ်မတော်အနေဖြင့် မကြာမီ အချိန်အတွင်း ပြိုလဲတော့မည့် အဓိပ္ပာယ်မျိုး မဟုတ်ပေ။
မူဝါဒချမှတ်သူများနှင့် ကျွမ်းကျင်သူများက မြန်မာ့အရေးနှင့်ပတ်သက်ပြီး အနာဂတ် စိတ်မှန်းဖြစ်နိုင်ခြေများကို တွက်ချက်ပြီး ထင်ကြေးပေးနေချိန်တွင် အာဆီယံအသိုင်းအဝိုင်းအတွင်း မည်သည့်နိုင်ငံကမျှ တပ်မတော်အနေဖြင့် အလုံးစုံ ပြိုလဲသွားလိမ့်မည်ဟု ခန့်မှန်းခဲ့ခြင်းမရှိပေ။
ထိုင်းနိုင်ငံ၏ နောက်ဆုံးအကြိမ် လေ့လာသုံးသပ်ချက်မှာလည်း ထိုနည်းတူဖြစ်သည်။ နစကသည် မကြာသေးမီက နယ်မြေအချို့ကို လက်လွတ်ခဲ့ရပြီး အင်အားနည်းပါးလာသည့်တိုင် ယခုအနေအထားအတိုင်း ဆက်လက် ရပ်တည် နေလိမ့်မည်ဟု ထိုင်းနိုင်ငံက သုံးသပ်ထားသည်။
TNLA တပ်ဖွဲ့ကိုတွေ့ရစဉ်
လက်ရှိဖြစ်ပွားနေသည့် အကျပ်အတည်းကို အဆုံးသတ်ရန်မှာ အနောက်နိုင်ငံများ အပါအဝင် အခြား သက်ဆိုင် သည့် အဖွဲ့အစည်းများနှင့် ဆွေးနွေးညှိနှိုင်းမှုများ ပြုလုပ်ပြီး အထိအခိုက်မရှိသည့် ထွက်ပေါက်တစ်ခုကို ရှာဖွေရန် ဖြစ်သည်။
လတ်တလော အနေအထားများအရ နစကသည် ယခုလကုန်ပိုင်းတွင် သက်တမ်းကုန်ဆုံးမည့် အရေးပေါ်ကာလ ကို ထပ်မံ သက်တမ်းတိုးရန် ကြိုးပမ်းခြင်းထက် ပဋိပက္ခကို မကြာမီအချိန်အတွင်း အဆုံးသတ်စေရန် လုပ်ဆောင် ဖွယ်ရှိသည်။
နစကသည် ယခုနှစ်အတွင်း အထွေထွေရွေးကောက်ပွဲကို ကျင်းပမည်ဟု ပြောကြားထားသဖြင့် အရေးပေါ်ကာလ ကို ထပ်မံသက်တမ်းတိုးပါက ရွေးကောက်ပွဲသည် ထပ်မံ နှောင့်နှေးကြန့်ကြာသွားမည်ဖြစ်ကာ လက်ရှိ အကျပ်အတည်းများသည်လည်း နေရာအနှံ့တွင် ပေါ်ပေါက်လာနိုင်မည်ဖြစ်သည်။
ဇန်နဝါရီ ၂၈ ရက်နှင့် ၂၉ ရက်တွင် လာအိုနိုင်ငံက အာဆီယံဥက္ကဋ္ဌအဖြစ် လာအို၏မြို့တော် အဟောင်းဖြစ်သည့် လူအန် ပရာဘန် (Luang Prabang)တွင် အာဆီယံ နိုင်ငံခြားရေးဝန်ကြီးအဆင့် အစည်းအဝေးကို ပြုလုပ်မည် ဖြစ်သည်။
ထိုအစည်းအဝေးတွင် အဓိကထား ဆွေးနွေးမည့် အကြောင်းအရာများထဲ၌ မြန်မာ့အရေးလည်း ပါဝင်မည်ဖြစ် သည်။ အာဆီယံခေါင်းဆောင်များသည် မြန်မာ့အရေးနှင့်ပတ်သက်ပြီး အာဆီယံ၏ ဘုံသဘောတူညီချက် ၅ ချက် ပါ ငြိမ်းချမ်းရေးအစီအစဉ် (5PC) ကို အကောင်အထည်ဖော်ရေးအတွက် စိစစ်သုံးသပ်မှုများ ပြုလုပ်မည်ဖြစ်သည်။
ပြီးခဲ့သည့် သုံးနှစ်အတွင်း အာဆီယံ၏ ငြိမ်းချမ်းရေးအစီအစဉ်သည် အလုပ်မဖြစ်ခဲ့သဖြင့် ဝေဖန်ခံခဲ့ရသည်။
သို့သော် မကြာသေးမီ သီတင်းပတ်များအတွင်း မြန်မာနိုင်ငံနှင့် ထိုင်း-မြန်မာ နယ်စပ်ဒေသရှိ အိုးမဲ့အိမ်မဲ့ ပြည်သူ များကို လူသားချင်းစာနာ ထောက်ထားမှုဆိုင်ရာ အကူအညီများပေးအပ်မည့် အစီအစဉ်များနှင့်ပတ်သက်ပြီး တိုးတက်မှုအချို့ ရရှိခဲ့သည်။
လူသားချင်းစာနာ ထောက်ထားမှုဆိုင်ရာ အကူအညီပေးရေး အစီအစဉ်များကို ပြီးခဲ့သည့် သီတင်းပတ်က မြန်မာနိုင်ငံဆိုင်ရာ အာဆီယံ အထူးသံတမန် Alounkeo Kittikhoun ၏ နေပြည်တော်ခရီးစဉ်တွင် အလေးထား ပြောဆိုခဲ့သည်။
အတွေ့အကြုံ ရင့်ကျက်သည့် သံတမန်တစ်ဦးဖြစ်သည့် Alounkeo သည် နစကခေါင်းဆောင်များ၊ နိုင်ငံရေးသမား များ၊ သက်ဆိုင်ရာ တာဝန်ရှိသူများနှင့် တွေ့ဆုံခဲ့ပြီး အာဆီယံ ဘုံသဘောတူညီချက် ၅ ချက်ပါ ငြိမ်းချမ်းရေး အစီအစဉ်ကို အကောင်အထည် ဖော်ဆောင်ရေးကို ဆွေးနွေးခဲ့သည်။
နိုင်ငံရေးပါတီတွေနဲ့ ဗိုလ်ချုပ်မှူးကြီးမင်းအောင်လှိုင်တွေ့ဆုံစဉ်
နောက်ထပ် တိုးတက်မှုတစ်ခုမှာ ပြီးခဲ့သည့်နှစ် ဒီဇင်ဘာလ အစောပိုင်းက ထိုင်းနှင့်မြန်မာအကြား လူသားချင်း စာနာထောက်ထားမှုဆိုင်ရာ အကူအညီပေးရေး အစီအစဉ်တစ်ခုကို ထူထောင်နိုင်ခဲ့ခြင်းဖြစ်သည်။
ပြီးခဲ့သည့် သီတင်းပတ်က ထိုင်းဒုတိယဝန်ကြီးချုပ် ပန်ပရီ ဘာဟစ်ဒါ နျူကာရာ (Parnpree Bahiddha-nukara) ကလည်း ဆွစ်ဇာလန်နိုင်ငံ ဒါးဗို့စ် (Davos) မြို့တွင် ပြုလုပ်သည့် ကမ္ဘာ့စီးပွားရေးဖိုရမ်၌ မြန်မာ့အရေးကို ဖြေရှင်း ရာမှာ အာဆီယံအနေနှင့် တက်ကြွစွာ ပါဝင်လုပ်ဆောင်ရန် ပြောကြားခဲ့သည်။
ထိုအချိန်အတောအတွင်း တပ်မတော်အနေနှင့် လာအို၏ အာဆီယံအလှည့်ကျဥက္ကဋ္ဌ သက်တမ်းအတွင်း အာဆီယံ ၏ ဘုံသဘောတူညီချက် ၅ ချက်ပါ ငြိမ်းချမ်းရေးအစီအစဉ်ကို မည်ကဲ့သို့အကောင်အထည်ဖော် ဆောင်ရွက်မည်ကို စောင့်ကြည့်ရမည် ဖြစ်သည်။
မကြာသေးမီက အာဆီယံ အထူးကိုယ်စားလှယ်နှင့် နစကတို့ တွေ့ဆုံမှုများကို သုံးသပ်ရမည်ဆိုပါက ထိုငြိမ်းချမ်း ရေး အစီအစဉ်သည် နောက်ထပ် တိုးတက်မှုများရရှိနိုင်သည့် အလားအလာများကို မြင်တွေ့ရသည်။
ထို့ကြောင့် နစကအနေနှင့် လာအို၏ အာဆီယံဥက္ကဋ္ဌ သက်တမ်းအတွင်း အာဆီယံ၏ငြိမ်းချမ်းရေး အစီအစဉ်ကို အတိမ်းအစောင်းမရှိ အကောင်အထည် ဖော်နိုင်လိမ့်မည်ဟု မျှော်လင့်ရပြီး အာဆီယံအနေနှင့်လည်း အဖွဲ့အစည်း အတွင်း မတူညီသည့် နိုင်ငံများတွင် အစည်းအဝေးများပြုလုပ်ကာ သက်ဆိုင်သူများကို ဖိတ်ကြားခြင်းအားဖြင့် မြန်မာ့အရေးကို ဖြေရှင်းနိုင်လိမ့်မည်ဟု မျှော်လင့်နိုင်သည်။
Source: ဘန်ကောက်ပို့စ်
- By CNI
- Category: ဆောင်းပါး
- Hits: 323
CNI International Article
၂၀၂၄ ခုနှစ်၊ ဇန်နဝါရီ ၂၁
၂၀၂၃ ခုနှစ် ခရစ္စမတ်မတိုင်မီအချိန်က မိသားစုဝင် ၁၀ ဦး ပါဝင်သည့် ဗင်နီဇွဲလား မိသားစုတစ်စုသည် အခြား ခိုလှုံခွင့် တောင်းခံသူ အများအပြားနှင့်အတူ မက္ကဆီကိုနိုင်ငံမှ အမေရိကန်နိုင်ငံအတွင်းသို့ ဖြတ်သန်း ဝင်ရောက်ခဲ့သည်။
ဒီဇင်ဘာ ၁၈ ရက် တစ်နေ့တည်းမှာပင် အမေရိကန်တောင်ပိုင်း နယ်စပ်တစ်လျှောက် ရွှေ့ပြောင်းနေထိုင်သူ ၁၂၆၀၀ ကျော်နှင့် ရင်ဆိုင်တွေ့ခဲ့ရကြောင်း အမေရိကန်အကောက်ခွန်နှင့် နယ်စပ်ကာကွယ်ရေးအဖွဲ့က ပြောကြားခဲ့သည်။
ထိုဖြစ်စဉ်ကို Fox News သတင်းဌာနက " တက္ကဆက်ပြည်နယ်အတွင်းသို့ လူပေါင်း ထောင်၊သောင်းချီ ဝင်ရောက်မှု" အဖြစ် ဖော်ပြခဲ့သည်။
နိုဝင်ဘာလ အစောပိုင်းက ဂွာတီမာလာ နယ်စပ်အနီးရှိ မက္ကဆီကိုနိုင်ငံတောင်ပိုင်း တာပါချူလာ ( Tapachula) မြို့တွင် ဗင်နီဇွဲလား မိသားစုတစ်စုနှင့် ခင်မင်ရင်းနှီးခဲ့ပြီး ထိုလထဲမှာပင် မက္ကဆီကို၏ တီဟွန်တီပက် (Tehuantepec ) ကျွန်းဆက်ပေါ်၌ ထိုမိသားစုနှင့် နောက်တစ်ကြိမ် ထပ်မံတွေ့ဆုံခဲ့သည်။
ထိုအချိန်က ထိုဗင်နီဇွဲလား မိသားစုသည် အမေရိကန်နိုင်ငံအတွင်းသို့ ဝင်ရောက်ရန် ခရီးကြမ်းကိုနှင်ပြီး ဆက်လက် သွားရောက်နေကြချိန်ဖြစ်သည်။
မက္ကဆီကို၏ နာမည်ဆိုးဖြင့် ကျော်ကြားသည့် “မရဏ ရထား” (La Bestia) အမည်ရှိ ကုန်တင်ရထားပေါ်တွင် သီတင်းတစ်ပတ်ကြာ စီးနင်းလိုက်ပါလာခဲ့ပြီးနောက် သူတို့သည် မက္ကဆီကို၏ ပီးဒရက်စ် နီဂရက်စ် (Piedras Negras) မြို့မှ အမေရိကန်နိုင်ငံ၊ တက္ကဆက်မြို့၏ အီးဂဲလ် ပက်စ် ( Eagle Pass) မြို့ထဲသို့ ဝင်ရောက်ရန် ကြိုးပမ်းခဲ့ကြသော်လည်း အမေရိကန်အာဏာပိုင်များ၏ ဟန့်တားမှုကို ခံခဲ့ရသည်။
အမေရိကန်အာဏာပိုင်များနှင့် ရက်အနည်းငယ်ကြာ ထိပ်တိုက်တွေ့ခဲ့သည့် အခြေအနေသည် အစားအစာနှင့် သောက်သုံးရေများ ကုန်ခန်းသွားချိန်တွင် အဆုံးသတ်သွားခဲ့သည်ဟု ထိုမိသားစုက ပြောသည်။
ကျနော့် မိတ်ဆွေများ ဖမ်းဆီးထိန်းသိမ်းခံခဲ့ရပြီး မိသားစုနှင့် ခွဲထားခံခဲ့ရသည်။ အမျိုးသမီးတစ်ဦးနှင့် ကလေး အချို့ကို အီးဂဲလ်ပက်စ်မြို့နှင့် ကီလိုမီတာ ၅၀၀ (မိုင် ၃၀၀) နီးပါး အကွာအဝေးတွင်ရှိသည့် မက်အလန် (McAllen) မြို့သို့ ပို့ဆောင်ခဲ့သည်။
နောက်ဆုံးတွင်မူ မိသားစုဝင် အားလုံးသည် ချီကာဂို (Chicago) မြို့သို့ သွားရောက်သည့် ဘတ်စ်ကားပေါ်တွင် ပြန်လည်ဆုံစည်းခဲ့ကြသည်။
ချီကာဂိုမြို့သည် အမေရိကန်သမ္မတ ဂျိုးဘိုင်ဒန် (Joe Biden) ၏ နယ်စပ်လုံခြုံရေးကို ငြင်းပယ်မှုအပေါ် ဝေဖန်ခဲ့သည့် တက္ကဆက်ပြည်နယ် အုပ်ချုပ်ရေးမှူး ဂရက် အက်ဘော့ (Greg Abbott) ၏ ပြည်နယ်အတွင်းရှိ မြို့များထဲမှ တစ်မြို့ဖြစ်သည်။
လက်ရှိတွင် ထိုဗင်နီဇွဲလားမိသားစုသည် ချီကာဂိုမြို့၌ ခိုလှုံနေထိုင်လျက်ရှိသည်။
ဇန်နဝါရီ ၅ ရက်က တက္ကဆက်ပြည်နယ် အုပ်ချုပ်ရေးမှူးရုံးက ထုတ်ပြန်သည့် သတင်းထုတ်ပြန်ချက်တွင် ဘိုင်ဒန်၏ နယ်စပ်ဒေသ အကျပ်အတည်းအပေါ် တက္ကဆက်ပြည်နယ်၏ သမိုင်းဝင် တုန့်ပြန်ဆောက်ရွက်မှုများ အကြောင်းကို အမွှမ်းတင် ဖော်ပြခဲ့သည်။
နယ်စပ်လုံခြုံရေးကို ဘိုင်ဒင်က ငြင်းပယ်ခဲ့မှုအား တုန့်ပြန်သည့်အနေဖြင့် တက္ကဆက်ပြည်နယ်သည် ၂၀၂၂ ခုနှစ်၊ သြဂုတ်လမှစပြီး ရွှေ့ပြောင်းနေထိုင်သူ ၂၉၄၀၀ ကျော်ကို ချီကာဂိုမြို့၊ရွှေ့ပြောင်းနေထိုင်သူ ၂၅၆၀၀ ကျော်ကို နယူးယောက်မြို့ (New York City) နှင့် ရွှေ့ပြောင်းနေထိုင်သူ ၁၂၅၀၀ ကျော်ကို ဝါရှင်တန် ဒီစီ (Washington, DC) မြို့များသို့ ပို့ဆောင်ပေးခဲ့သည်။
ထိုမြို့အားလုံးသည် ဒီမိုကရက်များအုပ်ချုပ်သည့် မြို့များဖြစ်သည်။ အချို့ ရွှေ့ပြောင်း နေထိုင်သူများကိုမူ ပုဂ္ဂလိက လေယာဉ်များဖြင့်ပင် ပို့ဆောင်ပေးခဲ့သည်။
လက်ရှိတွင် ဘိုင်ဒန်အစိုးရအဖွဲ့သည် ရွှေ့ပြောင်းနေထိုင်သူ အားလုံးကို ခိုလှုံနေထိုင်ခွင့် ပေးရေးနှင့်ပတ်သက်ပြီး ခက်ခဲစွာ ကိုင်တွယ်ဖြေရှင်းနေရသည်။
ဒီဇင်ဘာ ၂၉ ရက်က The Washington Post သတင်းစာ၏ ဖော်ပြချက်တွင် အမေရိကန် လူဝင်မှုကြီးကြပ်ရေးနှင့် အကောက်ခွန်အာဏာပိုင်အဖွဲ့သည် ၂၀၂၃ ခုနှစ် ဘဏ္ဍာနှစ်အတွင်း ရွှေ့ပြောင်းနေထိုင်သူ ၁၄၂,၀၀၀ ကို နိုင်ငံ အတွင်းမှ နှင်ထုတ်ခဲ့ကြောင်း ဖော်ပြထားသည်။
ထိုကဲ့သို့ နှင်ထုတ်ခံရသူ အရေအတွက်သည် ၂၀၂၂ ခုနှစ် ဘဏ္ဍာနှစ်အတွင်းက နှင်ထုတ်ခံခဲ့ရသူ အရေအတွက်ထက် နှစ်ဆနီးပါး ပိုမိုများပြားခဲ့သည်။
ဘိုင်ဒန်သည် ယခင်သမ္မတ ဒေါ်နယ်ထရမ့် ( Donald Trump) ၏ မူဝါဒဖြစ်သည့် မက္ကဆီကိုနိုင်ငံသား မဟုတ် သော ခိုလှုံခွင့်တောင်းခံသူများကို မက္ကဆီကိုသို့ ပြန်လည်ပို့ဆောင်သည့်မူကို မကြာခဏ ကျင့်သုံးခဲ့သည်။
ထို့နောက် အမေရိကန်မှ ဗင်နီဇွဲလားသို့ တိုက်ရိုက်ပြန်ပို့သည့် လေကြောင်းခရီးစဉ်များကိုလည်း ပြန်လည် စတင်ခဲ့သည်။
ထိုလေကြောင်း ခရီးစဉ်များသည် ၂၀၂၄ ခုနှစ်တွင် သိသိသာသာ မြင့်တက်လာဖွယ်ရှိကာ ဗင်နီဇွဲလား နိုင်ငံသား များသည် အမေရိကန်၏ ပိတ်ဆို့မှုများအောက်တွင် စားဝတ်နေရေး ခက်ခဲ့သည့် အမိမြေ၌ ပြန်လည်နေထိုင်ရမည့် အခြေအနေနှင့် ကြုံတွေ့ရနိုင်ခြေရှိသည်။
ထိုအချိန်အတောအတွင်း ဘိုင်ဒန်သည် ယခင်သမ္မတ ထရမ့်၏ နယ်စပ်တံတိုင်း စီမံကိန်းကို ဆန့်ကျင်ကန့်ကွက် သည့်ပုံစံမျိုး ပြောကြားခဲ့သော်လည်း လက်တွေ့တွင်မူ ထရမ့်၏ နယ်စပ်တံတိုင်း တည်ဆောက်ရေး အစီအစဉ်ကို ဆက်လက်ချဲ့ထွင်နေပြီး အပြောနှင့်အလုပ် ကွဲလွဲနေသည့် မူဝါဒများကို ဆက်လက်လုပ်ဆောင်ခဲ့သည်။
ထို့ကြောင့် နိုဝင်ဘာလတွင် ကျင်းပမည့် အမေရိကန်သမ္မတ ရွေးကောက်ပွဲ မတိုင်မီ နယ်စပ်ဒေသအရေးနှင့် ရွှေ့ပြောင်းနေထိုင်သူများ ဝင်ရောက်လာသည့် အရေးကိစ္စများသည် ဘိုင်ဒန်အတွက် အဓိကထားဖြေရှင်းရမည့် ခေါင်းခဲစရာ ကိစ္စများဖြစ်နေသည်ဟု ကျွမ်းကျင်သူများက ပြောကြားခဲ့သည်။
Source: Al Jazeera
- By CNI
- Category: ဆောင်းပါး
- Hits: 534
CNI Sport Article
၂၀၂၄ ခုနှစ်၊ ဇန်နဝါရီ ၂၁
ဆော်ဒီပရိုလိဂ်ဟာ ဒီရာသီမှာ ဥရောပရဲ့နာမည်ကြီး ကစားသမား အများအပြားကို ခေါ်ယူပြီး သူတို့ရဲ့လိဂ်ကို ကမ္ဘာ့အဆင့် ဝင်ခွင့်ရအောင် လုပ်ဆောင်နေပေမယ့် ကစားသမားအချို့ကတော့ လပိုင်းအကြာမှာ ပြန်ထွက်ခွာဖို့ လုပ်ဆောင်နေကြပြီ ဖြစ်ပါတယ်။
ဆော်ဒီလိဂ်ဟာပြီးခဲ့တဲ့ နွေရာသီက ဘန်ဇီမာ၊ နေမာ၊ မာနေး၊ ကန်တီ၊ ဖာမီနို၊ မာရက်ဇ်၊ ဖာဘင်ဟို၊ မီထရိုဗစ်နဲ့ နာမည်ကြီး ကစားသမား အများအပြားကို ခေါ်ယူခဲ့ပါတယ်။ ကစားသမားအများစုဟာ အယ်လ်ဟီလယ်၊ အယ်လ်နာဆာ၊ အယ်လ်အစ်တီဟတ်နဲ့ အယ်လ်အာလီအသင်းတို့ကို ပြောင်းရွှေ့ခဲ့ကြတာ ဖြစ်ပါတယ်။
ဟန်ဒါဆန်ကတော့ လီဗာပူးလ်ဂန္ထဝင် စတီဗင်ဂျရတ်နဲ့ အယ်လ်အက်တီဖတ်အသင်းမှာ ပူးပေါင်းခဲ့ပါတယ်။
ဒါပေမယ့် ကစားသမား အချို့ကတော့ ဥရောပကထွက်ခွာပြီး လပိုင်းအကြာမှာ ဥရောပကို ပြန်လည် သွားရောက်ဖို့ စိတ်အားထက်သန်နေပြီး ဒီကစားသမားတွေထဲမှာ ဥပမာဖြစ်ခဲ့တာကတော့ ဟန်ဒါဆန် ဖြစ်ပါတယ်။
ဟန်ဒါဆန်ဟာ အယ်လ်အက်တီဖတ်အသင်းနဲ့ ချုပ်ဆိုထားတဲ့ စာချုပ်ကို ဖျက်သိမ်းပြီးနောက် အေဂျက်ဇ်အသင်း ထံ ပြောင်းရွှေ့ခဲ့တာပါ။
နောက်ထပ် ကစားသမားတွေဖြစ်တဲ့ ဖာမီနို၊ ဘန်ဇီမာနဲ့ ဂျိုတာတို့လည်း ဥရောပအသင်းတွေနဲ့ ချိတ်ဆက်မှုတွေ ပြုလုပ်နေကြပါတယ်။
ဒီကစားသမားတွေဟာ ဆော်ဒီကနေ ဘာကြောင့် အမြန်ဆုံး ပြန်ထွက်ခွာချင်နေလဲဆိုတဲ့ အဓိက အကြောင်းအရင်း အချို့ကို SunSport က ဖော်ပြခဲ့ပါတယ်။
ပထမဆုံးကတော့ ဆော်ဒီနိုင်ငံရဲ့ပူပြင်းတဲ့ အပူဒဏ်ကို မခံနိုင်တာကြောင့် ဖြစ်နိုင်ပါတယ်။ ဆော်ဒီနိုင်ငံရဲ့ အပူချိန်ဟာ ပြင်းတာကြောင့် ကစားသမားတွေဟာ အပူဒဏ်ကို တော်တော်လေး ခံစားခဲ့ရတာ ဖြစ်ပါတယ်။
ဆော်ဒီလိဂ်မှာ ပရိသတ်ဦးရေနည်းပါးသည်ကို တွေ့ရစဉ်
ဆော်ဒီနိုင်ငံရဲ့ နေရာအချို့မှာ အပူချိန်ဟာ ၄၀ ဒီဂရီစင်တီဂရိတ်အထိရှိတာကြောင့် အသင်းတွေဟာ ညနေပိုင်းမှာ လေ့ကျင့်မှုတွေ ပြုလုပ်ရတာပါ။
လွန်ခဲ့တဲ့ ၂ နှစ်က ဆော်ဒီလိဂ်ကို ရောက်ရှိလာတဲ့ ပထမဆုံးပုံရိပ်မြှင့် ကစားသမား စီရော်နယ်ဒိုက ဆော်ဒီနိုင်ငံရဲ့ အပူချိန်မြင့်မားမှုတွေကြောင့် လေ့ကျင့်ချိန်တွေကို ပြောင်းလဲမှုတွေ ပြုလုပ်ခဲ့ရတယ်လို့ ဝန်ခံခဲ့ပါတယ်။
နောက်တစ်ခုကတော့ ပွဲကြည့် ပရိသတ်ဦးရေ အလွန်နည်းပါးတာကြောင့်ပါ။ ဆော်ဒီနိုင်ငံမှာ အယ်လ်ဟီလယ်၊ အယ်လ်နာဆာနဲ့ အယ်လ်အစ်တီဟတ်အသင်းတို့ရဲ့ ပွဲတွေမှာသာ ကြည့်ရှုတဲ့ ပရိသတ်ဦးရေ များပြားတာဖြစ်ပြီး ကျန်ပွဲတွေမှာတော့ သိသိသာသာကို နည်းပါးတာ ဖြစ်ပါတယ်။
ဟန်ဒါဆန်ဟာ လီဗာပူးလ်အသင်းရဲ့ အန်ဖီးလ်ကွင်းမှာ ပရိသတ် ၅၀,၀၀၀ အရှေ့ ကစားရပေမယ့် ပြီးခဲ့တဲ့ နိုဝင်ဘာက ပရိသတ်ပေါင်း ၆၁၀ ဦးသာရှိတဲ့ အရှေ့မှာ အယ်လ်အက်တီဖတ်အသင်းအတွက် ကစားခဲ့ရတာပါ။
ဒီအရေအတွက်ဟာ ဒီရာသီ ဆော်ဒီပရိုလိဂ်ပြိုင်ပွဲမှာ ပရိသတ်တက်ရောက် ကြည့်ရှုသူဦးရေ အနည်းဆုံးနံပါတ် ၅ နေရာမှာ ရပ်တည်နေတာ ဖြစ်ပါတယ်။
ဆော်ဒီပရိုလိဂ် ပြိုင်ပွဲဝင်ကလပ် ၁၈ သင်းထဲက အယ်လ်ရီယက်ဒ်အသင်းရဲ့ပွဲစဉ်တစ်ပွဲဆိုရင် ပရိသတ်ဦးရေ ၁၅၀ အောက်သာ တက်ရောက်ကြည့်ရှုခဲ့တယ်လို့ အချက်အလက်တွေအရ သိရပါတယ်။
နောက်တစ်ခုကတော့ လူနေထိုင်မှု ဘဝတွေဟာ သိသိသာသာ ကွာခြားနေတာ ဖြစ်ပါတယ်။
လူမှုရေး ကန့်သတ်ချက် အများအပြားဟာ ဆော်ဒီကို ရောက်ရှိလာတဲ့ နိုင်ငံခြားသား ကြယ်ပွင့် ကစားသမားတွေ အတွက် ခက်ခဲတဲ့ ပြုပြင်ပြောင်းလဲမှုတွေကို ဖြစ်စေခဲ့တာပါ။
အရှေ့အလယ်ပိုင်းဒေသရဲ့ ယဉ်ကျေးမှုတွေဟာ ဥရောပအခြေစိုက် ကစားသမားတွေအတွက် အလွန်ခက်ခဲခဲ့ပြီး ဟန်ဒါဆန်ရဲ့မိသားစုဟာ ဆော်ဒီမှာ နေထိုင်ရတာ အဆင်မပြေတာကြောင့် ပြန်ထွက်ခွာခဲ့တာလို့ သတင်းတွေမှာ ဖော်ပြထားပါတယ်။
နောက်ဆုံးတစ်ခုကတော့ နိုင်ငံအသင်းတွေမှာ ပါဝင်ကစားခွင့်ရဖို့အတွက် စိုးရိမ်စရာ အခြေအနေမှာ ရှိနေတာ ကြောင့် ဖြစ်ပါတယ်။
ဆော်ဒီလိဂ်ကို ရောက်လာတဲ့ ရော်နယ်ဒိုကို တွေ့ရစဉ်
ဆော်ဒီလိဂ်ရဲ့ စံနှုန်းဟာ ကစားသမားတွေအတွက် ပြဿနာတစ်ခုအနေနဲ့ ရှိနေပြီး နိုင်ငံအသင်းမှာ ရွေးချယ် မခံရမှာကို စိုးရိမ်နေကြတာပါ။
ဟန်ဒါဆန်ဟာ ဆော်ဒီကို ပြောင်းရွှေ့လာပြီးကတည်းက အင်္ဂလန်အသင်းမှာ ရွေးချယ်ခြင်း ခံခဲ့ရပေမယ့် ယူရို ၂၀၂၄ ပြိုင်ပွဲဝင်မယ့် လူစာရင်းမှာ သူ့နေရာကို ဆက်ထိန်းနိုင်ဖို့ အခက်အခဲရှိနေတာ ဖြစ်ပါတယ်။
ဆော်ဒီပရိုလိဂ်ဟာ နိုင်ငံတကာ စူပါစတား အများအပြားကို ခေါ်ယူပြီး လိဂ်ကို အပြိုင်အဆိုင်ဖြစ်အောင် လုပ်နေကြပေမယ့် ဒီမှာကစားနေတဲ့ ကစားသမား အများစုရဲ့စံနှုန်းဟာ လိဂ်တူးအဆင့်နဲ့ နီးစပ်မှုရှိတယ်လို့ သတ်မှတ်ထားတာပါ။
ဆော်ဒီလိဂ်ကတော့ ထိပ်တန်း ကစားသမားအချို့ကို ပြန်လက်လွှတ်ရရင်တောင် ငွေကိုရေလိုသုံးနိုင်တဲ့ သူတို့ အတွက်တော့ နောက်ထပ် နာမည်ကြီး ကစားသမားတွေကို ထပ်ပြီးခေါ်ယူနိုင်ဖို့ ပြင်ဆင်နေပါတယ်။
ဒါကြောင့် ဆော်ဒီလိဂ်မှာ နာမည်ကြီး ကစားသမားတွေ ပြန်လည်မထွက်ခွာအောင်နဲ့ နောက်ထပ် နာမည်ကြီး ကစားသမားတွေကို ခေါ်ယူနိုင်ဖို့ ဘယ်လိုပုံစံနဲ့ ရှေ့ဆက်မလဲဆိုတာကိုတော့ စောင့်ကြည့်ရတော့မှာဖြစ်ပါတယ်။
Source: The Sun