- By CNI
- Category: စီးပွားရေး
- Hits: 756
CNI International News
ဝါရှင်တန်၊ နိုဝင်ဘာ ၁၀
ကိုယ်ပိုင်အုပ်ချုပ်နေသည့် ထိုင်ဝမ်ကျွန်း၊ ရုရှားနှင့်တရုတ်တို့၏ ဆက်ဆံရေး၊ ကုန်သွယ်ရေးမူဝါဒများနှင့် ပတ်သက် ၍ တရုတ်သမ္မတ ရှီကျင့်ဖျင်နှင့် တွေ့ဆုံဆွေးနွေးရန် စီစဉ်ထားကြောင်း အမေရိကန်သမ္မတ ဂျိုးဘိုင်ဒန်က နိုဝင်ဘာ ၉ ရက်တွင် ပြောကြားခဲ့သည်ဟု အေပီသတင်း တစ်ပုဒ်တွင် တွေ့ရသည်။
ဝါရှင်တန်နှင့် ဘေဂျင်းတို့အကြား တင်းမာမှုများ တိုးပွားနေချိန်၌ ထိုကဲ့သို့ ဘိုင်ဒန်၏ ပြောကြားချက် ပေါ်ထွက် လာခဲ့သည်။
အင်ဒိုနီးရှားနိုင်ငံ၊ ဘာလီကျွန်းတွင် လာမည့် သီတင်းပတ်၌ ကျင်းပမည့် စက်မှုထိပ်သီး (G-20) အစည်းအဝေး ပြင်ပ၌ ဘိုင်ဒန်နှင့်ရှီကျင့်ဖျင်တို့ သီးခြား တွေ့ဆုံနိုင်စေရန် တရုတ်အစိုးရ တာဝန်ရှိသူများနှင့် ပူးပေါင်း ဆောင်ရွက် နေကြောင်း အိမ်ဖြူတော်က ကြေညာခဲ့သည်။
သို့သော် နှစ်ဘက် တွေ့ဆုံကြမည့် အစီအစဉ်ကိုတော့ အတည်ပြုခြင်း မရှိသေးပေ။
မကြာသေးမီ လများအတွင်း အမေရိကန်-တရုတ် ဆက်ဆံရေးမှာ ပိုမိုဆိုးရွားလာသဖြင့် ရှီကျင့်ဖျင်နှင့် ဆွေးနွေးရန် များစွာလိုအပ်နေပြီဟု အိမ်ဖြူတော် သတင်းစာ ရှင်းလင်းပွဲတွင် ဘိုင်ဒန်က သတင်းထောက်များကို အသိပေးခဲ့သည်။
ဘိုင်ဒန်ကို တွေ့ရစဉ် (AP)
“ကျနော်နဲ့သူနဲ့ စကားပြောဖြစ်တဲ့အခါမှာ အနီရောင်မျဉ်း တစ်ကြောင်းစီဟာ ဘာတွေလဲဆိုတာ ဖော်ထုတ်သွားမှာ ပါ။ တရုတ်နိုင်ငံရဲ့ အရေးကြီးတဲ့ အမျိုးသားအကျိုးစီးပွားအတွက် သူ ယုံကြည်ထားတာကို ကျနော်နားလည်ဖို့၊ တစ်ခါ အမေရိကန်ရဲ့ အရေးပါတဲ့ အကျိုးစီးပွားက ဘာလဲဆိုတာ ကျနော်သိထားတာ သူ့ကို မျှဝေဖို့ပါ။ အချင်းချင်း အငြင်းအခုံ လုပ်စရာ ရှိ/မရှိ ဆုံးဖြတ်သွားမှာပါ” ဟု ဘိုင်ဒန်က ပြောကြားခဲ့သည်။
ရှီ၏ အစိုးရသည် ထိုင်ဝမ်အပေါ် ဘိုင်ဒန်အစိုးရ၏ သဘောထားကို ရှုတ်ချခဲ့ပြီး ဘေဂျင်းသည် နောက်ဆုံးတွင် ထိုင်ဝမ်ကျွန်းကို ကွန်မြူနစ်အုပ်စိုးသည့် ပြည်ပကြီးနှင့် ပေါင်းစည်းရန် ဖြစ်သည်။ ဘိုင်ဒန်အစိုးရသည် တရုတ်၏ နယ်မြေပိုင်ဆိုင်မှုကို ထိခိုက်စေသည်ဟု ရှီ၏အစိုးရက ဝေဖန်အပြစ်တင်ခဲ့သည်။
အမေရိကန်ကို ကျော်တက်ဖို့ ကြိုးစားရင်း ကမ္ဘာ့နံပါတ် ၁ စီးပွားရေးနိုင်ငံအဖြစ် ဘေဂျင်း၏ ကြီးထွားလာနေသော ဩဇာလွှမ်းမိုးမှုကို ဝါရှင်တန်က အဟန့်အတား ပြုလုပ်နေကြောင်း တရုတ်သမ္မတ ရှီက ထောက်ပြခဲ့သည်။
အောက်လွှတ်တော်ဥက္ကဋ္ဌ နန်စီပလိုစီသည် ထိုင်ဝမ်သို့ ပြီးခဲ့သည့် ဩဂုတ်လတွင် ရောက်ရှိလာပြီးနောက် အမေရိကန်နှင့် တရုတ် ဆက်ဆံရေးမှာ ပိုမိုတင်းမာလာခဲ့သည်။
အမေရိကန်၏ ထိုင်ဝမ်အပေါ် မူဝါဒနှင့်ပတ်သက်၍ အခြေခံကျကျ လိုက်လျောပေးရန် ဆန္ဒမရှိကြောင်း ဘိုင်ဒန်က အခိုင်အမာ ပြောကြားခဲ့သည်။
၎င်းသည် တရုတ်တစ်ပြည်ထောင်တည်း မူဝါဒနှင့် ဘေဂျင်းအစိုးရကို အသိအမှတ် ပြုသော်လည်း တိုင်ပေ အစိုးရ နှင့် အလွတ်သဘော ဆက်ဆံရေး၊ ကာကွယ်ရေးဆိုင်ရာ ထိတွေ့ချိတ်ဆက်မှုများကိုတော့ ခွင့်ပြုထားသည်။
Source: AP
- By CNI
- Category: စီးပွားရေး
- Hits: 479
CNI International News
မော်စကို၊ နိုဝင်ဘာ ၈
ရုရှားနိုင်ငံခြားရေးဝန်ကြီး ဆာဂျေလာဗရော့သည် ၎င်းနှင့်ရာထူးအဆင့်တူသော အိန္ဒိယနိုင်ငံခြားရေးဝန်ကြီး ဆူဘရာမန်ယန်ဂျိုင်ရှန်ကာနှင့် နိုဝင်ဘာ ၈ ရက်တွင် တွေ့ဆုံ၍ ငွေကြေးနှင့် ကုန်သွယ်ရေး စီမံကိန်းများအရေး ဆွေးနွေးရန် စီစဉ်ထားကြောင်း မော်စကို အခြေစိုက် တာ့စ်သတင်းဌာနက ရေးသားဖော်ပြသည်။
ရုရှားနှင့် အိန္ဒိယတို့၏ ထိပ်တန်း သံတမန်များသည် ပုံမှန်အားဖြင့် အဆက်အသွယ်ရှိကြသည်။
အိန္ဒိယနိုင်ငံခြားရေးဝန်ကြီးသည် ၂၀၂၁ ခုနှစ်၊ ဇူလိုင်လတွင် ရုရှားသို့ သွားရောက် လည်ပတ်ခဲ့သလို လာဗရော့ ကလည်း ပြီးခဲ့သည့် ဧပြီလတွင် နယူးဒေလီသို့ ရောက်ရှိခဲ့သည်။
အဆိုပါ ခရီးစဉ်များအပြင် နှစ်နိုင်ငံဝန်ကြီးများသည် နိုင်ငံတကာ အစည်းအဝေးများ ကျင်းပသည့် နေရာများတွင် တွေ့ဆုံနိုင်သည့် အခွင့်အလမ်းအားလုံးကို အသုံးချလျက်ရှိကြရာ ပြီးခဲ့သည့် စက်တင်ဘာလ နှောင်းပိုင်း ၇၇ ကြိမ် မြောက် ကုလသမဂ္ဂ အထွေထွေ ညီလာခံတွင်လည်း သီးခြားတွေ့ဆုံခဲ့ကြသည်။
ဂျိုင်ရှန်ကာသည် ရုရှားဒုတိယဝန်ကြီးချုပ် ဒင်းနစ်မန်တူရော့ဗ်နှင့်လည်း တွေ့ဆုံရန် မျှော်လင့်ထားသည်။
အိန္ဒိယ၊ ရုရှား၊ တရုတ် နိုင်ငံခြားရေးဝန်ကြီးများကိုတွေ့ရစဉ် (GETTY IMAGES)
ထို့နောက် အိန္ဒိယ-ရုရှား နှစ်နိုင်ငံအစိုးရ ကော်မရှင်များ၏ အစည်းအဝေးသို့ ကုန်သွယ်ရေး၊ စီးပွားရေး၊ သိပ္ပံ၊ နည်းပညာနှင့် ယဉ်ကျေးမှု ပူးပေါင်းဆောင်ရွက်ရေးအတွက် တက်ရောက်ဆွေးနွေးခဲ့သည်။
“ဒီခရီးစဉ်ဟာ နှစ်နိုင်ငံ အဆင့်မြင့် သံတမန်အဆက်အသွယ် စဉ်ဆက်မပြတ် လုပ်သွားဖို့အတွက် ဖြစ်ပါတယ်” ဟု အိန္ဒိယနိုင်ငံခြားရေးဝန်ကြီးဌာန ပြောခွင့်ရသူ အရီဒမ်ဘက်ချီက ပြောကြားခဲ့သည်။
ကုလသမဂ္ဂအထွေထွေညီလာခံ၊ ရှန်ဟိုင်းပူးပေါင်းဆောင်ရွက်ရေး (SCO) အဖွဲ့နှင့် G-20 အုပ်စုအစည်းအဝေးများ အပြင် ရုရှား-အိန္ဒိယ-တရုတ် (RIC) သုံးပွင့်ဆိုင် ဆွေးနွေးမှုများလည်း ယခုနှစ်အတွင်း ရှိခဲ့သည်။
ယခု ဝန်ကြီးနှစ်ဦး တွေ့ဆုံရာတွင် ရုရှား-အိန္ဒိယ ပူးပေါင်းဆောင်ရွက်မှုအပေါ် အလေးပေးပြီး နိုင်ငံတကာအရေး ကိစ္စများကိုလည်း ထည့်သွင်း ဆွေးနွေးကြမည်ဟု ရုရှားနိုင်ငံခြားရေးဝန်ကြီးဌာနက သတင်းထုတ်ပြန်ခဲ့သည်။
အဆိုပါ ဆွေးနွေးမှုများအနက် အိန္ဒိယက SCO အဖွဲ့၏ဥက္ကဋ္ဌ တာဝန်ထမ်းဆောင်မည့် အစီအစဉ်၊ အကြမ်းဖက်ဝါဒ တိုက်ဖျက်ရေးနှင့် အာရှ-ပစိတ်ဖိတ်ဒေသ လုံခြုံရေးတည်ဆောက်မှု၊ အီရန်၏ နျူကလီးယားအရေးနှင့် ဆီးရီးယား အခြေအနေ ဖြစ်ပေါ်တိုးတက်မှုများ အပါအဝင် ဒေသတွင်း ပြဿနာများစွာကို အမြင်ချင်း ဖလှယ်ကြရန် ရှိသည်။
ယူကရိန်း စစ်ရေးပဋိပက္ခနှင့် နယူးဒေလီ၏ ရပ်တည်ချက်ကို ဂျိုင်ရှန်ကာက ချပြသွားမည်ဖြစ်ပြီး သံခင်းတမန်ခင်း ပြန်လည်စတင်ကြဖို့ တိုက်တွန်းသွားမည်ဖြစ်ကြောင်း အိန္ဒိယနိုင်ငံခြားရေးဝန်ကြီးဌာန ပြောခွင့်ရသူက ဆက်လက် ပြောကြားခဲ့သည်။
နယူးဒေလီ၏ ထိုသို့ရပ်တည်ချက်ကို အသိအမှတ်ပြု လေးစားပါကြောင်း ရုရှားသမ္မတ ဗလာဒီမာပူတင်က ပြောကြားခဲ့ပြီး ဖြစ်သည်။
Source: တာ့စ်သတင်းဌာန
- By CNI
- Category: စီးပွားရေး
- Hits: 787
CNI International News
ဘန်ကောက်၊ နိုဝင်ဘာ ၁
ထိုင်းခရီးသွားလုပ်ငန်း လုပ်ကိုင်သူများသည် လူစည်းကားသော ပွဲတော်များနှင့် ပတ်သက်ပြီး ၎င်းတို့၏ စိုးရိမ်ပူပန် မှုများကို ထုတ်ဖော် ပြောကြားခဲ့ကြကြောင်း၊ တောင်ကိုရီးယားနိုင်ငံ၊ ဆိုးလ်မြို့တော်ရှီ အီထယ်ဝမ်ခရိုင်၌ ကြေကွဲ စရာ အဖြစ်ဆိုးနောက်ပိုင်း ဖြစ်နိုင်ခြေရှိသော မတော်တဆမှုများကို ကြိုတင်ပြင်ဆင်ထားကြရန် ထိုင်းအာဏာ ပိုင်များကို ၎င်းတို့က တိုက်တွန်းခဲ့ကြကြောင်း ဘန်ကောက်ပို့စ် သတင်းဝက်ဘ်ဆိုက်က ရေးသားဖော်ပြသည်။
ထိုင်းခရီးသွား လုပ်ငန်းကောင်စီ၏ ဒုတိယဥက္ကဋ္ဌ ဆူသီပေါင်ဖူဖီပေါက်က “ဆိုးလ်ဖြစ်ရပ်ကြောင့် ထိုင်းနိုင်ငံတွင် ခရီးသွား ဧည့်သည်များ၏ ယုံကြည်စိတ်ချမှုကို ထိခိုက်စေမည် မဟုတ်ကြောင်း မိမိယူဆသည်” ဟု ပြောကြား ခဲ့သည်။
ယခု Loy Krathong နှင့် လာမည့်နှစ် ဆောင်ခရမ်(ထိုင်းသင်္ကြန်) ပွဲတော်ကဲ့သို့ အထူးလူစည်ကားသည့် နေ့များ၌ သက်ဆိုင်ရာ အာဏာပိုင်များအနေဖြင့် မတည်မငြိမ် ဖြစ်နိုင်ခြေများကို ထိန်းချုပ်တားဆီးနိုင်မည်ဟု ၎င်းယုံကြည် ကြောင်း မစ္စတာဆူသီပေါင်က ဆက်လက်ပြောကြားခဲ့သည်။
Loy Krathong ပွဲတော်အတွင်း အစိုးရ၊ ဘန်ကောက်မြို့တော် အုပ်ချုပ်ရေးပိုင်း၊ ရေကြောင်း ပို့ဆောင်ရေး ညွှန်ကြားမှု ဦးစီးဌာနနှင့် သဘာဝဘေး ကာကွယ်ရေးနှင့် လျော့ပါးသက်သာရေး ဦးစီးဌာနတို့ ပူးပေါင်း၍ အထူး သဖြင့် ကျောက်ဖရားမြစ်ကြောင်း တလျှောက် နေရာအသီးသီး၌ အသင့်အနေအထားဖြင့် ဆောင်ရွက်သင့်ကြောင်း ၎င်းက ထပ်လောင်း ပြောကြားခဲ့သည်။
တောင်ကိုရီးယားက Halloween ပွဲတော်မှာ သေဆုံးသွားသူများကိုတွေ့ရစဉ်
“ပုဂ္ဂလိကကဏ္ဍ (ဒါမှမဟုတ်) စေတနာ့ဝန်ထမ်းတွေ တင်မကဘဲ အဲဒီတာဝန်တွေကို အစိုးရကပါ အဓိက တာဝန်ယူသင့်တယ်” ဟု ဆူသီပေါင်က တိုက်တွန်းခဲ့သည်။
ဘန်ကောက်မြို့တော်မှ ပွဲတော်သို့ ပါဝင်ဆင်နွှဲကြသူပေါင်း ၁၀၀,၀၀၀ ခန့်ရှိလိမ့်မည်ဟု မျှော်လင့်ထားကြောင်း၊ ပုဂ္ဂလိကပိုင်းနှင့် စေတနာ့ဝန်ထမ်းများတင် မဟုတ်ဘဲ အဓိကတာဝန်ယူခြင်းမှာ အစိုးရပဲ ဖြစ်သင့်ကြောင်း ၎င်းက ကောက်ချက်ချခဲ့သည်။
ထိုင်းနိုင်ငံတွင် ၂၀၀၉ ခုနှစ်ကလည်း ဆန်တီကာနိုက်ကလပ် မီးလောင်မှုနှင့် ပြီးခဲ့သည့် ၃ လ၌ Mountain B နိုက်ကလပ် မီးလောင်မှုကဲ့သို့ လူပြွတ်သိပ်၍ ထွက်ပေါက်ရှာမရသော နေရာမျိုးတွင် ဖြစ်ပွားလေ့ရှိသော မတော်တဆမှုများ၌ အသေအပျောက် များပြားခြင်း ကြုံခဲ့ရကြောင်း ၎င်းက သတိပေးခဲ့သည်။
Source: Bangkok Post
- By CNI
- Category: စီးပွားရေး
- Hits: 856
CNI International News
နယူးဒေလီ၊ အောက်တိုဘာ ၂၁
လူပေါင်း ၁ သန်းကို အစိုးရအလုပ်အကိုင်များ ရရှိစေရန် ယခုသီတင်းပတ်အကုန်ပိုင်း၌ ဦးစားပေးလုပ်ဆောင် သွားမည်ဟု အိန္ဒိယဝန်ကြီးချုပ် နရိန္ဒရာမိုဒီ ရုံးက အောက်တိုဘာ ၂၀ ရက်တွင် ထုတ်ပြန်ကြေညာခဲ့သည်။
အလုပ်လက်မဲ့များပြားနေမှုအပေါ် ဝေဖန်ခံနေရခြင်းကို ကိုင်တွယ်ဖြေရှင်းရန် ကြိုးပမ်းမှုတစ်ရပ်အနေဖြင့် အလုပ်အကိုင်ပေါင်း ၇၅,၀၀၀(ခုနှစ်သောင်း ငါးထောင်)ကို စတင်ပေးအပ်ခဲ့သည်။
လူဦးရေ ၁ ဒသမ ၄ ဘီလီယံရှိသည့် အိန္ဒိယနိုင်ငံတွင် အလုပ်လက်မဲ့ဖြစ်ပွားမှုနှုန်းသည် လအတန်ကြာအောင် ၇ ရာခိုင်နှုန်းခန့်အထိ ရှိနေသဖြင့် လာမည့်လတွင် စတင်မည့် ပြည်နယ်အသီးသီး ရွေးကောက်ပွဲများကျင်းပရာတွင် အတိုက်အခံနိုင်ငံရေးသမားအတွက် ဝေဖန်ထောက်ပြစရာဖြစ်နေခဲ့သည်။
အလုပ်အကိုင်သစ်ပေါင်း ၇၅,၀၀၀ သည် ဖက်ဒရယ်အစိုးရ၏ ဝန်ကြီးဌာန ၃၈ ခု (သို့မဟုတ်) ဌာနဆိုင်ရာ ၃၈ ခုတွင် သက်ကြီးပိုင်းများအထိ အကျုံးဝင်မည်ဖြစ်ကြောင်း မိုဒီ၏ရုံးက ဆက်လက်ပြောကြားခဲ့သည်။
“ဝန်ကြီးချုပ်ရဲ့လမ်းညွှန်ချက်အတိုင်း ဝန်ကြီးဌာနတွေနဲ့ ဌာနဆိုင်ရာအားလုံးမှာ အရေးယူခံရလို့ လက်ရှိလစ်လပ် နေရာတွေကို ဖြည့်ဖို့ ဆောင်ရွက်နေပါတယ်” ဟု ၎င်းရုံးက ဖြည့်စွက်ပြောကြားခဲ့သည်။
၂၀၂၁ ခုနှစ်က အိန္ဒိယနိုင်ငံ မွန်ဘိုင်းမြို့ရှိ ဘူတာရုံတစ်ခုမြင်ကွင်း(ဓါတ်ပုံ-ရိုက်တာ)
အစိုးရဌာနများတွင် လစ်လပ်နေရာ တစ်သန်းခန့် ရှိ/မရှိ (သို့မဟုတ်) အချို့အလုပ်အကိုင်များ မည်သို့ဖန်တီးပေး မည်ကိုတော့ လတ်တလော မသိရသေးပေ။
ရည်ရွယ်ချက်မှာ လာမည့်နှစ် စက်တင်ဘာလအရောက်တွင် အစိုးရရာထူးတာဝန်များကို ဖြည့်စွက်ရန်ဖြစ်ကြောင်း မိုဒီက ပြီးခဲ့သည့် ဇွန်လတွင် တွီတာလူမှုကွန်ရက်မှ ပြောကြားခဲ့ဖူးသည်။
Covid-19 ပထမ တစ်နှစ်အတွင်း ၂၀၂၀ ပြည့်နှစ်၌ အိန္ဒိယ၏အလုပ်လက်မဲ့နှုန်းသည် ၂၃ ဒသမ ၅ ရာခိုင်နှုန်းအထိ အမြင့်ဆုံးအမှတ်သို့ ရောက်ရှိခဲ့သော်လည်း ကပ်ရောဂါဆိုင်ရာ ကန့်သတ်ချက်များ ပြန်လည်ဖြေလျှော့ပေး၍ ပြန်လည်ကျဆင်းခဲ့သည်။
သို့သော် မွန်ဘိုင်းမြို့အခြေစိုက် အိန္ဒိယစီးပွားရေးစောင့်ကြည့်လေ့လာရေးဌာနမှ အချက်အလက်များအရ အိန္ဒိယ အလုပ်လက်မဲ့နှုန်းမှာ ကမ္ဘာလုံးဆိုင်ရာပျမ်းမျှအဆင့်ထက် ပိုမိုမြင့်မားခဲ့သော်လည်း ယခုအခါ ၇ ရာခိုင်နှုန်း ဝန်း ကျင်သာ ရှိတော့ကြောင်း သိရသည်။
အလုပ်အကိုင်သန်းနှင့်ချီ၍ ဖန်တီးပေးမည်ဟု ကတိပြုခဲ့သော မိုဒီသည် ၂၀၁၄ ခုနှစ်တွင် အာဏာရလာခဲ့ပြီးနောက် အိန္ဒိယစီးပွားရေးမှာ တစ်နှစ်လျှင် လူပေါင်း ၁၂ သန်းခန့်အထိ လုပ်သားအင်အား အရှိန်အဟုန်ဖြင့် တိုးလာနေ သည်။
Source: Reuters
- By CNI
- Category: စီးပွားရေး
- Hits: 557
CNI International News
ဘေဂျင်း၊ အောက်တိုဘာ ၂၀
တရုတ်၏ ချမ်းသာကြွယ်ဝမှု စုဝေးလာခြင်းအား ထိရောက်စွာ တင်းကြပ်ရန် သမ္မတ ရှီကျင့်ဖျင်က ကြေညာပြီး ရက်ပိုင်းအတွင်း ဘေဂျင်းနည်းပညာကဏ္ဍ လှုပ်ခတ်သွားခဲ့သည်။
ထို့နောက် ပုဂ္ဂလိကစီးပွားရေး လုပ်ငန်းအပေါ် ယုံကြည်မှု ထိပါးလာသဖြင့် မည်သူ့ ပစ်မှတ်ထားခြင်းခံရမလဲ ထင်ကြေးများ တိုးလာနေကြောင်း South China Morning Post သတင်းစာက ရေးသားဖော်ပြသည်။
အောက်တိုဘာ ၁၆ ရက်တွင် ထုတ်ပြန်ခဲ့သော ရှီကျင့်ဖျင်၏ အစီရင်ခံစာတွင် “ဘုံကြွယ်ဝမှုအောက်၌ တရုတ်သည် လျင်မြန်သော ဖွံ့ဖြိုးတိုးတက်မှုဆိုင်ရာ လုယူခံရခြင်းအတွက် အညီအမျှ ဖြန့်ဝေသွားရန် ပိုမိုခိုင်မာသည့် စည်းမျဉ်း စည်းကမ်းများကို” ပြသသွားခဲ့သည်။
ရှီကျင့်ဖျင် မိန့်ခွန်းပြောနေသည်ကို ပြသထား(GETTY IMAGES)
“ကျနော်တို့ဟာ ဝင်ငွေခွဲဝေပုံနဲ့ စည်းစိမ်ဥစ္စာ စုဆောင်းတဲ့ နည်းလမ်းတွေကို ကောင်းကောင်း ထိန်းချုပ်ထားမှာပါ။ တရားဝင် ဝင်ငွေကို အကာအကွယ်ပေးမယ်။ အလွန်အကျွံရလာတဲ့ ဝင်ငွေကို ချိန်ညှိပြီးတော့ တရားမဝင် ဝင်ငွေ ကို တားမြစ်သွားမှာ ဖြစ်ပါတယ်” ဟု ရှီက ၎င်း၏အစီရင်ခံစာ (အင်္ဂလိပ်ဘာသာသို့ပြန်ဆိုချက်) ထဲတွင် ပြောကြား ထားသည်။
ဘုံကြွယ်ဝ ချမ်းသာမှုသည် မူဝါဒအသစ် မဟုတ်သော်လည်း ကြွယ်ဝချမ်းသာမှု စုဆောင်ခြင်း နည်းလမ်းများကို စီမံခန့်ခွဲခြင်းနှင့် ပတ်သက်၍ တရုတ်ထိပ်တန်း ခေါင်းဆောင်များအနက် ပထမဆုံးအကြိမ် ရှီကျင့်ဖျင်၏ မှတ်ချက် များ ထွက်ပေါ်လာခြင်းဖြစ်သည်ဟု South China Morning Post က ဆက်လက် ရေးသားသည်။
ကွန်မြူနစ်ပါတီ၏ ကွန်ဂရက်(အစည်းအဝေး)တွင် ရှီကျင့်ဖျင် တိုတိုတုတ်တုတ် ပြောကြားသော သဘောထား မှတ်ချက်များသည် နောင်လာမည့် ပိုမိုခိုင်မာသော မူဝါဒများ၏ သွင်ပြင်လက္ခဏာ တစ်ရပ်လည်း ဖြစ်သည်။
ရှီ၏ အစီရင်ခံစာတွင် နောက်ထပ် အသေးစိတ် အချက်အလက်များကို မဖော်ပြထားသော်လည်း ဆင်းရဲနွမ်းပါး သော မိသားစုများကို ထောက်ပံ့ရန်၊ အလုပ်အကိုင် အခွင့်အလမ်း ဖန်တီးပေးရန်၊ လူမှုလုံခြုံရေး ကွန်ရက် အား ကောင်းလာစေရန်နှင့် အများပြည်သူ ဝန်ဆောင်မှု ကဏ္ဍများ၌ အခွန်အခကိစ္စ ကိုင်တွယ်ဖြေရှင်းရန် လေ့လာ သုံးသပ်သူများက မျှော်လင့်နေကြသည်။
ဖွံ့ဖြိုးတိုးတက်နေတဲ့ တရုတ်နိုင်ငံ(GETTY IMAGES)
တရုတ်နိုင်ငံတွင် အလွန်အကျွံ ရရှိသော ဝင်ငွေကို ချိန်ညှိနိုင်ပြီး ဘေဂျင်း၏ လူလတ်တန်းစား များများ ပေါ်ပေါက်စေရေး ရည်မှန်းချက်မှာ ဆက်လက် ရှိနေဖွယ်ရှိကြောင်း ၎င်းတို့က ပြောကြသည်။
ပြည်ပရောက် တရုတ်ပညာရှင် အချို့ကတော့ ပြည်တွင်း၌ ပုဂ္ဂလိက စွန့်ဦးတီထွင် သူများအတွက် ခက်ခဲ ကြမ်းတမ်းသော လမ်းတစ်လမ်းကို ကြိုတင်ရှုမြင်နေကြသည်။
ပြင်သစ်နိုင်ငံ၊ ပါရီမြို့အခြေစိုက် Natixi ရင်းနှီးမြှုပ်နှံမှုဘဏ်မှ အာရှ-ပစိဖိတ် စီးပွားရေး ပညာရှင်အဖွဲ့၏ အကြီး အကဲဖြစ်သူ အလီစီယာဂါစီယာက “ဒါက လူချမ်းသာတွေအတွက် ဂရုစိုက်စေရမယ့် အချက်ပြမှု ဖြစ်သင့်တယ်” ဟု ရှီ၏ အစီရင်ခံစာကို ရည်ညွှန်းလျက် သတိပေးခဲ့သည်။
Source: South China Morning Post
- By CNI
- Category: စီးပွားရေး
- Hits: 630
CNI International News
ဝါရှင်တန်၊ အောက်တိုဘာ ၁၉
OPEC+ အဖွဲ့က မကြာသေးမီက ကြေညာခဲ့သော ထုတ်လုပ်မှုလျှော့ချရေးကို တုံ့ပြန်သည့်အနေဖြင့် အမေရိကန် သမ္မတ ဂျိုးဘိုင်ဒန်သည် အောက်တိုဘာ ၁၉ ရက် (ယနေ့)တွင် အမေရိကန်၏မဟာဗျူဟာအရ ဖယ်ချန်ထားသည့် အရန်ရေနံစည်ပေါင်း ၁၅ သန်းကို ထုတ်ပြန်ကြေညာရန်ရှိသည်ဟု South China Morning သတင်းစာက ရေးသားဖော်ပြသည်။
ထို့ပြင် လာမည့်လ ကြားဖြတ်ရွေးကောက်ပွဲများ မတိုင်မီ ၎င်းအစိုးရအဖွဲ့၏ ရပ်နားထားသမျှကို ပြန်လည် စတင် South China Morning က ဆက်လက်ရေးသားသည်။
ဘိုင်ဒန်သည် မဟာဗျူဟာမြောက် အရန်ရေနံစိမ်းများကို ထုတ်သုံးရန် ကြေညာချက်အတွက် အောက်တိုဘာ ၁၉ ရက်တွင် သဘောထားမှတ်ချက်များ ပေးပို့လိမ့်မည်ဟု အမည်မဖော်လိုသူ အမေရိကန်အဆင့်မြင့်အရာရှိများက အောက်တိုဘာ ၁၈ ရက်တွင် ပြောကြားခဲ့သည်။
အမေရိကန်နိုင်ငံ တက္ကဆက်ပြည်နယ် တက္ကဆက်စီးတီးရှိ ရေနံစိမ်းသိုလှောင်ကန်များကို တွေ့ရစဉ်(ဓါတ်ပုံ-The Newyork Times)
ပြီးခဲ့သည့်မတ်လတွင်လည်း ဘိုင်ဒန်၏ခွင့်ပြုချက်ဖြင့် ၆ လတွင်း ရေနံစည် သန်း ၁၈၀ ကို ဖြန့်ဝေပေးခဲ့သည်။ ထို ပမာဏသည် ၁၉၈၄ ခုနှစ်မှ သမ္မတဟောင်းထရမ့်လက်ထက်အထိ ပေါင်းကူးတံတားဟုခေါ်သည့် မဟာဗျူဟာ မြောက်အရန်ရေနံစိမ်းကို ပြည်တွင်းထုတ်လုပ်မှုအနေဖြင့် လျှော့ချခဲ့သည်။
ယခုအခါ အမေရိကန်တွင် အရန်ရေနံစိမ်းစည် သန်း ၄၀၀ ခန့်ရှိသည်။
ဘိုင်ဒန်သည် ယခုနှစ်ဆောင်းရာသီတွင် လောင်စာဆီဈေးနှုန်းများ ကျဆင်းစေရန် ကြိုးပမ်းမှုတွင် ထပ်လောင်း ထုတ်လုပ်ခြင်းများကို တံခါးဖွင့်ပေးမည်ဖြစ်သည်။ သို့သော် အစိုးရတာဝန်ရှိသူများကတော့ ၎င်းတို့ လုပ်ဆောင် ရမည့်အခြေအနေများကို အသေးစိတ်ထုတ်ဖော်ခြင်းမရှိပေ။
ရေနံဈေး တစ်စည်လျှင် ၆၇ ဒေါ်လာမှ ၇၂ ဒေါ်လာအောက် (သို့မဟုတ်) ယင်းထက်ကျဆင်းလာသည့်အချိန်ကျမှ မဟာဗျူဟာမြောက် အရန်သိုလှောင်ခြင်း ပြန်လည်စတင်မည်ဟု ဘိုင်ဒန်က ပြောကြားထားပြီးဖြစ်သည်။
Source: South China Morning Post
- By CNI
- Category: စီးပွားရေး
- Hits: 492
CNI International News
ဘေရွတ်၊ အောက်တိုဘာ ၅
ငွေသားအကျပ်အတည်းဖြစ်ပေါ်နေသော လက်ဘနွန်နိုင်ငံတွင် အငြိမ်းစားရဲအရာရှိတစ်ဦးအပါအဝင် ငွေအပ်နှံသူ များသည် အောက်တိုဘာ ၄ ရက်တွင် ဘဏ် ၄ ဘဏ်ထက်မနည်း ဝင်ရောက်စီးနင်း၍ ၎င်းတို့အပ်နှံထားသော ငွေသားများ ပြန်လည်ရရှိရေး အတင်းအကျပ်တောင်းခံခဲ့ကြကြောင်း အေပီသတင်းဌာနက ရေးသားခဲ့သည်။
လက်ဘနွန်ဘဏ်များ သီတင်းတစ်ပတ်ကြာ ပိတ်ထားပြီးနောက် တစိတ်တပိုင်းပြန်လည်ဖွင့်လှစ်ချိန်၌ အဆိုပါ ဖြစ်စဉ် ပေါ်ပေါက်လာခြင်းဖြစ်သည်။
မြေထဲပင်လယ်ဒေသရှိ လက်ဘနွန်နိုင်ငံတွင် အထိနာနေသည့် စီးပွားရေးအခက်အခဲ ဆိုးရွားလာသည်နှင့်အမျှ ငွေအပ်နှံသူများသည် ဘဏ်များအတွင်းသို့ အင်အားသုံးဝင်ရောက်ကာ ၎င်းတို့အပ်နှံထားသော ငွေသားများ ပြန်လည်ထုတ်ယူနိုင်ရေးအတွက် ရုန်းရင်းဆန်ခတ် ကြိုးပမ်းခဲ့ကြသည်။
ထိုသို့ ရုန်းရင်းဆန်ခတ်ဖြစ်မှုများသည် တိုင်းပြည်အတွင်း အကျင့်ပျက်ခြစားမှုများကြောင့် အထိနာနေသည့် စီးပွားရေး ပြုပြင်ပြောင်းလဲရန်အတွက် ဘဏ်များနှင့်အာဏာပိုင်များအပေါ် လူထုဒေါသကို ထင်ဟပ်စေခဲ့သည်။
ဆူပူဆန္ဒပြသူများမှ လက်ဘနွန်ဘဏ် ဉက္ကဋ္ဌများနှင့် တာဝန်ရှိသူများ၏ ပုံများကို ရေးကပ်ထားကြစဉ်(ဓါတ်ပုံ-အေပီ)
ရာစုနှစ်တစ်ခုအတွင်း အဆိုးဆုံးအကျပ်အတည်းဟု ကမ္ဘာ့ဘဏ်က သတ်မှတ်ဖော်ပြသည့် လက်ဘနွန်စီးပွားရေး အကျပ်အတည်း၌ နိုင်ငံ့လူဦးရေ၏ လေးပုံတစ်ပုံမှာ ဆင်းရဲတွင်း နက်နေခဲ့သည်။
တစ်ချိန်တည်းတွင် လက်ဘနွန်သုံး ပေါင်ငွေကြေးသည် ဒေါ်လာနှင့် ယှဉ်ပါက ၉၀ ရာခိုင်နှုန်း တန်ဖိုးကျဆင်းခဲ့ရာ ကုန်ဈေးနှုန်းကြီးမြင့်မှုဒဏ်ကို ရင်ဆိုင်နေရသည်။
လက်ဘနွန်ပြည်တွင်းလုံခြုံရေးတပ်ဖွဲ့များတွင် တာဝန်ထမ်းဆောင်ပြီး အငြိမ်းစားယူခဲ့သူ ရဲအရာရှိ အလီအယ်လ်ဆာလီသည် ချာတော်ရာဒေသအရှေ့ပိုင်းရှိ BLC ဘဏ်ခွဲကို ဝင်ရောက်စီးနင်းခဲ့သည်။ ၎င်း၏ အပ်နှံစုဆောင်းငွေ ဒေါ်လာ ၂၄,၀၀၀(နှစ်သောင်းလေးထောင်)ကို သားဖြစ်သူထံသို့ လွှဲပြောင်းပေးရန် ဘဏ်ကို တင်းတင်းမာမာ တောင်းဆိုခဲ့သည်။ သားဖြစ်သူသည်လည်း ယူကရိန်းနိုင်ငံသို့ ရောက်ရှိနေပြီး အိမ်ငှားခနှင့် ကျူရှင်လခ များဖြင့် အကြွေးတင်နေသည်။
“မင်းတို့ထဲက တစ်ယောက် မသေခင်မှာ ပိုက်ဆံတွေ ရေပြစမ်းပါ” ဟု အယ်လ်ဆာလီက လက်တစ်ဖက်တွင် သေနတ်ဝှေ့ယမ်းရင်း အခြားလက်တဖက်ဖြင့် ကိုယ်တိုင်ရိုက်ကူးထားသော ဗီဒီယိုဖိုင်ထဲ၌ အော်ဟစ်ပြောဆိုခဲ့ သည်။
Byblos ဘဏ်ခွဲတစ်ခုရဲ့ အဝင်ပေါက်တွင် ထောက်လှမ်းရေးတပ်သားတစ်ဦးမှ ၎င်း၏ လက်ကိုင်ဖုန်းဖြင့် ဓာတ်ပုံရိုက်ယူနေစဉ်(ဓါတ်ပုံ-အေပီ)
ငွေအပ်နှံသူထားသူများ ပူးပေါင်းထားသည့် ဆူပူဆန္ဒပြအဖွဲ့တစ်ဖွဲ့၏အဆိုအရ အယ်လ်ဆာလီသည် လက်ဘနွန် အခြေစိုက်ဘဏ်မှ လအတန်ကြာ ငွေမလွှဲနိုင်သဖြင့် သားဖြစ်သူ၏အကြွေးများကို ကျောက်ကပ်ရောင်းချပြီး ပြန်ဆပ်နိုင်ဖို့ ကြိုးစားခဲ့သေးကြောင်း သိရသည်။
သားဖြစ်သူထံ လပေါင်းများစွာ အိမ်ငှားခနှင့်ကျူရှင်လခ ပေးပို့နေရသဖြင့် အငြိမ်းစားရဲအရာရှိ အယ်လ်ဆာလီ သည် ငွေထုတ်၍မရသည့်အခက်အခဲအတွက် ဆူပူဆန္ဒပြအဖွဲ့နှင့် ပူးပေါင်းသွားခဲ့သည်။
၎င်း၏ ဆဲလ်ဖုန်းဖြင့် ရိုက်ကူးထားသည့် ဗီဒီယိုဖိုင်ထဲတွင် ဘဏ်ဝန်ထမ်းများကို “လိုချင်တာမရရင် ပစ်သတ်မယ်” ဟု အယ်လ်ဆာလီက ခြိမ်းခြောက်ခဲ့ပြီး သေနတ်ဝှေ့ယမ်းပြခဲ့ကြောင်း တွေ့ရှိရသည်။
ဆူပူဆန္ဒပြအဖွဲ့နှင့် ဘေးလူများက ဘဏ်ပြင်ပမှ စောင့်ကြည့်နေကြချိန်တွင် ဘဏ်ဝန်ထမ်းများက အယ်လ်ဆာလီ ကို စိတ်တည်ငြိမ်အောင် ကြိုးစားရှင်းပြခဲ့ကြသည်။
Source: AP
- By CNI
- Category: စီးပွားရေး
- Hits: 543
CNI International News
ဂျကာတာ၊ အောက်တိုဘာ ၅
အာဆီယံ ၅ နိုင်ငံနှင့် နယ်စပ်ဖြတ်ကျော် ငွေပေးချေနိုင်မည့် အစီအစဉ်ကို အင်ဒိုနီးရှားနိုင်ငံ၏ ဗဟိုဘဏ် အုပ်ချုပ်ရေးမှူးက အောက်တိုဘာ ၅ ရက်က ကြေညာခဲ့ကြောင်း ရိုက်တာသတင်းကို ကိုးကား၍ Channel News Asia သတင်းဝက်ဘ်ဆိုက်က ရေးသားဖော်ပြသည်။
အဆိုပါ အစီအစဉ်အရ ထိုင်း၊ စင်ကာပူ၊ မလေးရှား၊ ဖိလစ်ပိုင်နှင့် အင်ဒိုနီးရှားတို့သည် နယ်စပ်ဖြတ်ကျော် ငွေပေးမှု စနစ်ကို လာမည့်နှစ်တွင် အပြည့်အဝ ချိတ်ဆက် ဆောင်ရွက်သွားမည် ဖြစ်သည်။
အင်ဒိုနီးရှားသည် ၎င်း၏ ငွေပေးချေမှုစနစ် ထိုင်းနှင့် လက်ရှိ ချိတ်ဆက်ထားပြီး မလေးရှား၊ စင်ကာပူတို့နှင့် မကြာ မီ ဆက်လက် ချိတ်ဆက်သွားမည်ဟု ဗဟိုဘဏ်အုပ်ချုပ်ရေးမှူး ပါရီဝါဂျီယို (Perry Warjiyo) က အစ္စလာမ့် စီးပွားရေး အခမ်းအနားတစ်ခုတွင် ပြောကြားခဲ့သည်။
ဖိလစ်ပိုင်နှင့် သဘောတူညီထားမှု အခြေအနေ အသေးစိတ်ကိုတော့ ၎င်းက ထုတ်ဖော်ပြောကြားခြင်း မရှိပါ။
QR စနစ်နဲ့ ငွေပေးချေမှုကိုတွေ့ရစဉ် (GETTY IMAGES)
ထိုင်းနှင့်အင်ဒိုနီးရှား ဗဟိုဘဏ်များသည် နှစ်နိုင်ငံကြား နယ်စပ်ဖြတ်ကျော် QR စနစ်ဖြင့် ငွေပေးချေ ချိတ်ဆက် မှုကို ပြီးခဲ့သည့် ဩဂုတ်လ၌ စတင်ခဲ့ကြောင်း ဆင်ဟွာသတင်းအရ သိရသည်။
အဆိုပါ နှစ်နိုင်ငံရှိ လက်လီငွေပေးချေမှုစနစ် အော်ပရေတာများကို ပထမဆုံး ချိတ်ဆက်နိုင်မှုသည် နှစ်နိုင်ငံစလုံးရှိ စားသုံးသူနှင့် ကုန်သည်များအပေါ် ကုန်စည်နှင့်ဝန်ဆောင်မှုများအတွက် QC ငွေပေးချေမှုကို လက်ခံစေနိုင် ကြောင်း ထိုင်းနှင့်အင်ဒို ဗဟိုဘဏ်များ၏ ပူးတွဲကြေညာချက် တစ်စောင် ထုတ်ပြန်ခဲ့ပြီး ဖြစ်သည်။
အဆိုပါ နှစ်နိုင်ငံ ငွေပေးချေချိတ်ဆက်မှု အစပျိုးနိုင်ခဲ့ခြင်းသည့် အရှေ့အာရှနိုင်ငံများအသင်း (အာဆီယံ) ဒေသ တွင်း၌ အထင်ကရ မှတ်တိုင်တစ်ခု ဖြစ်ခဲ့ကြောင်း ထိုင်းဗဟိုဘဏ်က ပြောကြားခဲ့သည်။
ထိုင်းနှင့်အင်ဒိုတို့၏ အစီအစဉ်သည် ရှေ့ပြေးအဆင့်ဖြစ်ခဲ့ပြီး လာမည့်နှစ်များ၌ အပြည့်အဝ စီးပွားဖြစ် ချိတ်ဆက် နိုင်ရေး လမ်းခင်းပေးသွားဖို့ ရည်ရွယ်ထားကြောင်း ဆင်ဟွာသတင်းတွင် ဆက်လက် ရေးသားထားသည်။
Source: Reuters, CNA, Xinhua
- By CNI
- Category: စီးပွားရေး
- Hits: 499
CNI International News
အန်ကာရာ၊ စက်တင်ဘာ ၂၆
သမ္မတတေယစ် အာဒိုဂန်က သဘာပတိအဖြစ် စက်တင်ဘာ ၂၆ ရက်တွင် ကျင်းပသည့် အစည်းအဝေး၌ “တူရကီအစိုးရ အနေဖြင့် စီးပွားရေး အခြေအနေများကို ပြန်လည်သုံးသပ်သွားရန် ရှိကြောင်း၊ ပြည်တွင်း MIR ငွေပေးချေမှု ကတ်ပြားများ သုံးခြင်းနှင့် ရုရှားငွေပေးချေမှု စနစ်အတွက် ဖြစ်နိုင်ခြေရှိသော အခြားရွေးချယ်စရာများကို လမ်းညွှန်ကြောင်း” အန်ကာရာ မြို့တော်မှ သတင်းရင်းမြစ်တစ်ခုက တာ့စ်မီဒီယာသို့ ပြောသည်။
ပြီးခဲ့သည့် ရက်သတ္တပတ်၌ တူရကီသမ္မတ အာဒိုဂန်သည် ရုရှား၏ MIR ဘဏ်ကတ်များ သုံးစွဲရေးနှင့် ငွေပေးချေမှုစနစ် အတွက် ဖြစ်နိုင်ခြေရှိသည့် အခြားနည်းလမ်းများ ရှာဖွေရန် စက်တင်ဘာ ၂၃ ရက်၌ အစ္စတန်ဘူလ်မြို့တွင် တံခါးပိတ် အစည်းအဝေးတစ်ရပ် ခေါ်ယူခဲ့သည်။
အဆိုပါ အစည်းအဝေးသည် ၆ နာရီကျော်ကြာမြင့်ခဲ့ပြီး တူရကီဘဏ္ဍာရေးဝန်ကြီးဌာန၊ ဗဟိုဘဏ် အကြီးအကဲများအပြင် တူရကီဘဏ်ပေါင်းစုံမှ ထိပ်တန်းအကြီးအကဲများလည်း တက်ရောက်ခဲ့ကြကြောင်း TRT ရုပ်သံလိုင်း၏ ထုတ်လွှင့်ချက်အရ သိရသည်။
အစည်းအဝေးများမှ ချမှတ်လိုက်သည့် ဆုံးဖြတ်ချက် အသေးစိတ်များကိုတော့ လတ်တလော မသိရသေးပေ။
တူရကီဘဏ်တစ်ခုကိုတွေ့ရစဉ်
တူရကီပြည်တွင်း ဘဏ်များဖြစ်ကြသည့် Is Bankasi နှင့် Denizbank တို့သည် ရုရှား MIR ငွေပေးချေမှု စနစ်အောက်ရှိ ဘဏ် ကတ်များဖြင့် တူရကီသုံး လီရာငွေကြေး ထုတ်ပေးမှုကို ဆိုင်းငံ့ထားကြောင်း အစောပိုင်း၌ သတင်းရရှိသည်။
ရုရှားဖက်ဒရေးရှင်းနိုင်ငံ၏ ပြင်ပတွင် MIR ငွေပေးချေမှုစနစ်ကို ချဲ့ထွင်ရန် မော်စကို၏ ကြိုးပမ်းမှုများကို ထောက်ခံဖို့ ပိတ်ဆို့ အရေးယူမှုများ ဖယ်ရှားရန် အဆင်သင့်ဖြစ်နေပြီဟု အမေရိကန်ဘဏ္ဍာရေးဌာနက ပြီးခဲ့သည့်သီတင်းပတ်တွင် ပြောကြားခဲ့ ကြောင်း တာ့စ်သတင်းဌာနက ဆက်လက် ရေးသားဖော်ပြသည်။
သို့သော် အမေရိကန်နှင့် အနောက်အုပ်စု မီဒီယားများတွင်တော့ အမေရိကန်ဘဏ္ဍာရေးဌာနက ရုရှား၏ MIR ငွေပေးချေမှု စနစ်ကို ထောက်ခံရန်နှင့် ပတ်ဆို့အရေးယူမှုများ ဖယ်ရှားရန် အဆင်သင့်ဖြစ်နေသည်ဆိုသော အခြေအနေကို ရေးသား ဖော်ပြ ထားသည်ကို မတွေ့ရပေ။
လတ်တလော ကာလအထိ အမျိုးသားငွေပေးချေမှုကတ်စနစ် (National Payment Card System) ၏ အမှုဆောင် အရာရှိ ချုပ် ဗလာဒီမာကွမ်လက်ဗ်ကို အမေရိကန်၏ အမည်မည်းစာရင်း (black list) ထဲ ထည့်သွင်းထားဆဲ ဖြစ်သည်။
Source: တာ့စ်သတင်းဌာန
- By CNI
- Category: စီးပွားရေး
- Hits: 962
CNI News
၂၀၂၂ ခုနှစ်၊ စက်တင်ဘာ ၂၂
ရုရှားငွေပေးချေရေး MIR card စနစ်ကို မြန်မာနိုင်ငံတွင် အသုံးပြုနိုင်ရန်နှင့် ရုရှားရူဘယ်နှင့် မြန်မာကျပ်ငွေကို တိုက်ရိုက် လဲလှယ်အသုံးပြုနိုင်ရန် နစက-က ဆောင်ရွက်နေကြောင်း ပြီးခဲ့သည့် စက်တင်ဘာ ၂၀ ရက်နေ့မှာ ကျင်းပသည့် သတင်းစာရှင်းလင်းပွဲတွင် ပြောကြားခဲ့သည်။
MIR Card အသုံးပြုခြင်းနှင့် ပတ်သက်ပြီး ရေတိုတွင် အကျိုးသက်ရောက်မှု သိပ်မရှိသေးသော်လည်း ရေရှည်တွင် ရုရှားမှ ရင်းနှီးမြှုပ်နှံမှု ဝင်ရောက်လာမည့် အခြေအနေပေါ် မူတည်ပြီး အကျိုးသက်ရောက်မှု ရှိနိုင်သည်ဟု စီးပွားရေး ပညာရှင်တစ်ဦးက CNI သတင်းဌာနသို့ ပြောသည်။
၎င်းက “General Public အတွက်ကတော့ သိပ်အများကြီးတော့ မရှိပါဘူး။ ဘာဖြစ်လို့လဲဆိုတော့ Russian investment ဘယ်လောက်ထိ လာမလဲဆိုတာ အဲဒါလည်း တစ်ချက်ကြည့်ရမယ်။ ဒီ short term မှာတော့ သိပ် အများကြီး မရှိဘူး။ ဒီ short term မှာတော့ ဒေါ်လာအစားထိုး သုံးမယ်ဆိုရင်တောင်မှ ရုရှားငွေကို လက်ခံတဲ့ နိုင်ငံ တွေက ဘယ်လောက်ရှိမှာလဲ။ နောက် လေကြောင်းလိုင်းတွေ ဘာတွေကရော အဲဒီဟာနဲ့ လက်ခံမလား။ ဒါတွေ လက်မခံဘူးဆိုရင်တော့ ဘာမှ လောက်လောက်လားလား သိပ်အကျိုးမရှိပါဘူး။ အခုက ရုရှား - မြန်မာ တိုက်ရိုက် Flight တွေ ဆွဲတော့မယ်။ Tourist Promotion တွေ လုပ်နေတယ်။ မြန်မာပြည်က ရုရှားသွားလည်ချင်တဲ့သူတွေ အတွက်ဆိုရင်တော့ အဆင်ပြေမှာပေါ့။ ဒီ short term အတွက်ကတော့ သိပ်လောက်လောက်လားလား မရှိဘူး။ Negative ရော Positive ရော။ Long term မှာတော့ Russian investment ရုရှားနဲ့ပတ်သက်တဲ့ employer တွေက ဘယ်လောက်ထိ investment လုပ်မလဲဆိုတာ အဲပေါ်မှာပဲ ကြည့်ရမှာပေါ့” ဟု ပြောသည်။
၂၀၂၂ ခုနှစ်၊ စက်တင်ဘာ ၂၀ ရက်နေ့က နစကသတင်းစာရှင်းလင်းပွဲမှာ MIR Card စနစ်အကြောင်း ရှင်းပြနေစဉ်
MIR card စနစ်ကို ၂၀၂၂ ခုနှစ်၊ စက်တင်ဘာလအထိ နိုင်ငံ ၁၀ နိုင်ငံမှာ အသုံးပြုနေပြီး အာဆီယံဒေသအတွင်းတွင် ဗီယက်နမ်နိုင်ငံ၌ အသုံးပြုလျက် ရှိကြောင်း သိရသည်။
ရုရှားငွေပေးချေရေး MIR card စနစ်ကို လျင်မြန်စွာ အသုံးပြုနိုင်ရေးအတွက် ရုရှား ငွေရေးကြေးရေး အဖွဲ့အစည်း များက ကူညီဆောင်ရွက်ပေးသွားမည် ဖြစ်ကြောင်း၊ ရုရှားနိုင်ငံ၏ MIR card ကို မြန်မာနိုင်ငံ၏ ငွေပေးချေမှုစနစ် မှာ အသုံးပြုနိုင်ဖို့အတွက် ဆွေးနွေးနေကြောင်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ် ဇော်မင်းထွန်းက စက်တင်ဘာ ၂၀ ရက်တွင် ပြောသည်။
နိုင်ငံရေး လေ့လာသုံးသပ်သူ ဦးရဲထွန်းက “အဲဒါသုံးတာကို မြန်မာက လက်ခံတယ်ဆိုလို့ရှိရင် မြန်မာနိုင်ငံနဲ့ ရုရှား ကြားမှာ စီးပွားကုန်သွယ်မှု များဖို့တော့ လိုတာပေါ့။ များမှ အသုံးများမှာလေ။ လက်ခံတယ်လို့ ပြောထားပြီးတော့ ဦးတို့က ရုရှားကထွက်တဲ့ ပစ္စည်းကို သိပ်မဝယ်ဘူးဆို ဝယ်တဲ့သူတွေကျတော့ ရေနံတို့၊ သဘာဝဓာတ်ငွေ့တို့၊ ရွှေ တို့ စသဖြင့်ပေါ့ကွာ။ အဲဒါမျိုးလေးတွေ ဝယ်မယ့်သူတွေကပဲ သုံးတယ်။ ဖုန်းတို့၊ တယ်လီဖုန်းတို့ လူသုံးများတဲ့ဟာ တွေကျတော့ ရုရှားကနေ မဝယ်ဘူး။ တရုတ်ကနေ ဝယ်မယ်။ ရုရှားကနေ ဝယ်စရာပစ္စည်း သိပ်မရှိဘူးဆိုရင် အသုံးက နည်းမှာပဲလေ” ဟု CNI သတင်းဌာနသို့ ပြောသည်။
MIR card စနစ်ကို ရုရှားနိုင်ငံဗဟိုဘဏ်က ၂၀၁၇ ခုနှစ်တွင် စတင်အသုံးပြုခဲ့ကြောင်း၊ Master card နှင့် Visa card များ၏ လွှမ်းမိုးမှုအပြင် နိုင်ငံတကာ၏ ပိတ်ဆို့မှုများကို ကျော်လွှားနိုင်ရန် ဈေးကွက်အတွင်း အသုံးပြုလာ ခြင်းဖြစ်ကြောင်း သိရသည်။
ထို့နောက် MIR Card သည် လက်ရှိ မြန်မာနိုင်ငံတွင် အသုံးပြုနေသည့် MPU Card နှင့် သဘောတရား တူညီသည် ဟု စီးပွားရေးပညာရှင်တစ်ဦးက CNI သတင်းဌာနသို့ ပြောသည်။
MIR ရုံးချုပ်ကိုတွေ့ရစဉ်
၎င်းက “အဲဒီဟာကတော့ ထုတ်ပေးတဲ့ဟာအပေါ်မှာ မူတည်တယ်။ credit card အနေနဲ့ ထုတ်ပေးမှာလား Debit card အနေနဲ့ ထုတ်ပေးမှာလား သူက ဒီမှာသုံးနေတဲ့ MPU Card နဲ့ တူတူပဲလေ သဘောတရားကလေ။ ရုရှားရဲ့ ငွေနဲ့ စပြီးတော့ issue ထုတ်ရတာပေါ့။ ဒါပေမယ့် အဲဒါက ဘယ်နိုင်ငံသွားသွား သွားတဲ့နိုင်ငံက အဲဒီဟာကို လက်ခံ တဲ့ post တွေမှာ သုံးလို့ရတယ်ပေါ့။ အဲဒီဟာတော့ ဒီ MPU Card လိုပါပဲ။ ဈေးဝယ်တာ၊ Transition ငွေ လှမ်းလွှဲ ပေးတာတို့။ ဒီကဒ်က သိပ်ပြီးတော့ Amount အကြီးကြီးတော့ သိပ်အဆင်မပြေပါဘူး” ဟု ပြောသည်။
MIR Card သည် ဈေးဝယ်ခြင်း၊ လေယာဉ်လက်မှတ်ကဲ့သို့ တခြားသော လက်မှတ်များ ဝယ်ယူခြင်း၊ ဘဏ် အကောင့်များနှင့် ချိန်ဆက်ကာ ငွေလွှဲငွေထုတ် လုပ်ဆောင်ခြင်း စသည့် လုပ်ငန်းများကို ဆောင်ရွက်နိုင်ကြောင်း သိရသည်။
ငွေထည့်ဝင်နိုင်သည့် ပမာဏနှင့် လွှဲပြောင်းနိုင်သည့် ပမာဏ ကန့်သတ်ချက် ရှိခြင်းကြောင့် ကုန်သွယ်ရေးကဏ္ဍ အပိုင်းတွင် MIR Card ကို အသုံးပြုနိုင်ခြေ နည်းပါးနိုင်သည်ဟု စီးပွားရေးလုပ်ငန်းရှင်များက ပြောသည်။