- By CNI
- Category: စီးပွားရေး
- Hits: 536
CNI International News
ဂျကာတာ၊ ဩဂုတ် ၂၇
အင်ဒိုနီးရှားနိုင်ငံတွင် ထောက်ပံ့ရေး အရန်ဘတ်ဂျက်မှ ဘဏ္ဍာရေးဖိအားများကို စီမံနိုင်ရန်အတွက် လောင်စာဆီ ဈေးနှုန်းကို ၃၀ ရာခိုင်နှုန်းမှ ၄၀ ရာခိုင်နှုန်းအထိ မြင့်တက်သွားနိုင်စရာရှိနေကြောင်း သမ္မတ ဂျိုကိုဝီဒိုဒို၏ အာဏာ ရ ညွန့်ပေါင်းအစိုးရမှ လွှတ်တော်ကိုယ်စားလှယ်များက ဩဂုတ် ၂၆ ရက်တွင် ရိုက်တာသတင်းဌာနသို့ ပြောကြားခဲ့သည်။
အမျိုးသားအုပ်ချုပ်ပိုင်ခွင့်ပါတီ (National Mandate Party) ပါတီဝင်လည်းဖြစ်၊ လွှတ်တော်စွမ်းအင်ရေးရာ ကော်မတီ၏ လက်ထောက် အကြီးအကဲလည်းဖြစ်သူ အက်ဒီစိုးပါနို (Eddy Soeparno) က “ယခု သီတင်းပတ် အစောပိုင်း၌ အစိုးရပိုင် ပါတာမီနာကုမ္ပဏီ၏ အမှုဆောင်အရာရှိများနှင့် လွှတ်တော်တို့ တံခါးပိတ် အစည်းအဝေး ကျင်းပခဲ့ရာမှ သတင်း အချက်အလက်များ သိခဲ့ရကြောင်း” ရိုက်တာသို့ ဆက်လက် ပြောကြားခဲ့သည်။
အရှေ့တောင်အာရှ၏ စီးပွားရေးအင်အား အကောင်းဆုံး နိုင်ငံတစ်နိုင်ငံဖြစ်သည့် အင်ဒိုနီးရှားတွင် အစိုးရက မူလ ဘတ်ဂျက်ထဲမှ ၂၀၂၂ စွမ်းအင် ထောက်ပံ့နိုင်ရေးခွဲဝေမှုကို ၃ ဆတိုးပေးခဲ့ရာ အင်ဒိုသုံး ရူပီယာငွေကြေး ၅၀၂ ထရီလီယံ (အမေရိကန်ဒေါ်လာ ၃၃ ဒသမ ၉ ဘီလီယံ) ဖြစ်သည်။
အဆိုပါ ပမာဏသည် ကမ္ဘာ့ရေနံဈေး တက်လာခြင်းနှင့် ရူပီတန်ဖိုး ကျဆင်းမှုကြားထဲတွင် စုစုပေါင်း အသုံးစရိတ် ၁၆ ရာခိုင်နှုန်းခန့် ရှိသည်။
လောင်စာဆီ ဈေးနှုန်း မတက်ခဲ့လျှင်ပင် ယခုနှစ်အတွက် ထောက်ပံ့ကြေး ဘတ်ဂျက်အတွက် အရန်ငွေကြေး လိုအပ်မည်ဖြစ်ကြောင်း အင်ဒိုအစိုးရက ပြောကြားခဲ့သည်။
အင်ဒိုနီးရှားက လောင်စာဆီ အရောင်းဆိုင် (GETTY IMAGES)
ပါတာမီနာကုမ္ပဏီ၏ ဦးစားပေး ရွေးချယ်သည့် အစီအစဉ်မှာ 90-octane ဓါတ်ဆီတစ်လီတာလျှင် ၇၆၅၀ ရူပီယာမှ ရူပီယာ ၁ သောင်းသို့ ဈေးမြှင့်ရန် ဖြစ်သည်။
အလားတူ 92-octane ဓါတ်ဆီကိုလည်း တစ်လီတာလျှင် ၁၂,၅၀၀ ရူပီယာမှ ၁၆,၀၀၀ ရူပီယာသို့ ဈေးတက်ရန် ရှိကြောင်း ဩဂုတ် ၂၇ ရက်တွင် ပြုလုပ်ခဲ့သော အင်တာဗျူး၌ အက်ဒီစိုးပါနိုက ပြောကြားခဲ့သည်။
အင်ဂျင်ပါဝါ ပိုမိုကြီးမားသည့် မော်တော်ကားမျိုးအတွက် လောင်စာဆီ အရောင်းအဝယ်မပြုရန် တားမြစ်ခြင်းမျိုး ကဲ့သို့ အရောင်း ကန့်သတ်ချက် အချို့ကိုလည်း ပါတာမီနာကုမ္ပဏီက ကျောထောက်နောက်ခံပြု သွားမည်ဖြစ် ကြောင်း ၎င်းက ဆက်လက် ပြောကြားခဲ့သည်။
“ဒီအချက်ကို ကျနော်တို့မြင်ပါတယ်။ ဈေးနှုန်းမြှင့်လိုက်တာ၊ အရောင်း ကန့်သတ်လိုက်တာမျိုးပေါ့။ ဒီနည်းက လူတွေကို ထိခိုက်မှု အနည်းဆုံး ဖြစ်စေတယ်” ဟု အက်ဒီစိုးက ရှင်းပြသည်။
ဈေးတက်လိုက်ခြင်းကြောင့် ၂၀၂၂ ငွေကြေးဖောင်းပွမှု လက်ရှိနှုန်းထဲသို့ ၁ ဒသမ ၉ ရာခိုင်နှုန်း ပေါင်းထည့်ရမည်ဟု ခန့်မှန်းထားကြောင်း ၎င်းက ရိုက်တာသို့ ပြောကြားခဲ့သည်။
Source: Reuters
- By CNI
- Category: စီးပွားရေး
- Hits: 553
CNI International News
နယူးဒေလီ၊ ဩဂုတ် ၂၅
ဝန်ကြီးချုပ် နရိန္ဒရာမိုဒီနှင့် နီးစပ်သည့် အိန္ဒိယဘီလီယံနာ သူဌေးတစ်ဦးသည် ရုပ်သံထုတ်လွှင့်ရေး လုပ်ငန်းတစ်ခု ကို ဝယ်ယူရန် ကြိုးစားလာကြောင်း တွေ့ရသဖြင့် ကမ္ဘာ့အကြီးဆုံး ဒီမိုကရေစီနိုင်ငံ တစ်နိုင်ငံဖြစ်သော အိန္ဒိယတွင် မီဒီယာလွတ်လပ်ခွင့်နှင့်ပတ်သက်၍ စိုးရိမ်စရာဖြစ်လာကြောင်း ဝေဖန်သံများ ထွက်ပေါ်လာခဲ့သည်။
မိုဒီ အစိုးရလက်ထက်တွင် အိန္ဒိယသည် နယ်စည်းမခြား သတင်းထောက်များအဖွဲ့၏ သတင်းလွတ်လပ်ခွင့်အဆင့် ၁၈၀ အနက် အဆင့် ၁၀ တွင် ရပ်တည်နိုင်ခဲ့သည်။
သို့သော် ဝေဖန်ထောက်ပြသည့် သတင်းထောက်များကို အကျဉ်းထောင် သံတိုင်နောက်တွင် မကြာခဏ တွေ့ရလေ့ရှိသည့်အပြင် အာဏာရ ဘယာတိယဂျနကာပါတီ (BJP) ပါတီကို ထောက်ခံသူများက သတင်းမီဒီယာများကို လူမှုကွန်ရက်ပေါ်တွင် လှောင်ပြောင် သရော်မှုများ ရှိခဲ့သည်။
ဘီလီယံနာသူဌေးကြီး ဂွါတမ်အဒါနီ (Reuters)
ဩစတြေးလျ ကျောက်မီးသွေး တွင်းများမှ အိန္ဒိယ၏ ကုန်တင်ကုန်ချ အများဆုံး ဆိပ်ကမ်းများအထိ စိတ်ဝင်စားမှု ရှိပြီး အာရှ၌ အချမ်းသာဆုံး ပုဂ္ဂိုလ်ဖြစ်သော ဂွါတမ်အဒါနီ (Gautam Adani) သည် ၎င်း၏ကုမ္ပဏီအနေဖြင့် နယူးဒေလီ ရုပ်သံလိုင်း တစ်လိုင်းဖြစ်သော (NDTV) တွင် ရှယ်ယာ ၂၉ ရာခိုင်နှုန်းကို သွယ်ဝိုက်ရယူခဲ့ကြောင်း၊ နောက်ထပ် ရှယ်ယာ ၂၆ ရာခိုင်နှုန်းကိုလည်း လေလံဆွဲခဲ့ကြောင်း ကြေညာခဲ့သည်။
အဆိုပါ အပြောင်းအလဲသည် မိမိတို့ရုပ်သံလွှင့်ဌာန NDTV နှင့် ဆွေးနွေးခြင်းမရှိ (သို့မဟုတ်) NDTV လုပ်ငန်း တည်ထောင်သူများဖြစ်ကြသည့် သတင်းစာဆရာ ရာဒီကာရွိုင် (Radhika Roy) နှင့် စီးပွားရေးပညာရှင် ပရန်နွိုင်းရွိုင် (Prannoy Roy) တို့၏ သဘောတူညီချက် မပါဝင်ကြောင်း NDTV က ဆက်လက် ကြေညာခဲ့သည်။
အဆိုပါ ရုပ်သံလွှင့်ဌာန၏ ချန်နယ်နှစ်ခုဖြစ်သော ဟိန္ဒီဘာသာဖြင့် လိုင်းတစ်လိုင်းနှင့် အင်္ဂလိပ်ဘာသာဖြင့် လိုင်း တစ်လိုင်းတို့မှာ အိန္ဒိယနိုင်ငံအတွင်း သတင်းမီဒီယာ လုပ်ငန်းများအကြား အစိုးရကို ဝေဖန်ခြင်းနှင့် သတင်း တင်ဆက်မှု ထက်မြက်စူးရှခြင်းတို့ကြောင့် အထူးထင်ရှားသည်။
အိန္ဒိယ သတင်းထုတ်လွှင့်နေမှု ကြည့်နေစဉ် (Reuters)
ထိုသို့ သတင်းတင်ဆက်သည့် အလေ့အထကြောင့် လုပ်ငန်းပိုင်ရှင်များအနေဖြင့် NDTV သည် တရားရေးဆိုင်ရာ အမှုအခင်းများစွာတို့ကို ရင်ဆိုင်ခဲ့ရကြောင်း သိရသည်။
ယခုသတင်းကို ဖတ်ကြား ကြေညာခဲ့ပြီးနောက် မိမိအနေဖြင့် သတင်းခန်းထဲ၌ တုန်လှုပ်မိပြီး မယုံကြည်နိုင် လောက်အောင် ဖြစ်ရကြောင်း NDTV ဝန်ထမ်းတစ်ဦးက AFP သတင်းဌာနသို့ ဩဂုတ် ၂၄ ရက် နံနက်ပိုင်းတွင် ပြောကြားခဲ့သည်။
“အခုလို အသိမ်းခံရတဲ့အတွက် တခြား သတင်းဌာနတွေကနေပဲ ကျနော်တို့ဟာ အလင်းအမှောင်ကို သိရတော့မှာ ဖြစ်လို့ ငရဲရောက်သွားသလိုပါပဲ” ဟု အမည်မဖော်လိုသူ အဆိုပါဝန်ထမ်းက ရင်ဖွင့်ပြောကြားခဲ့သည်။
အိန္ဒိယနိုင်ငံတွင် သတင်းမီဒီယာသမားများအတွက် နေရာဟူ၍ ပြီးခဲ့သည့် နှစ်အတွင်း သိသိသာသာ ကျုံ့ဝင် ကျဆင်း သွားခဲ့ကြောင်း သတင်းလွတ်လပ်ခွင့်ကို ထောက်ခံအားပေးသည့် Free Speech Collective အဖွဲ့ကို တည်ထောင်သူ ဂီးတာစီရှူ (Geeta Seshu) က ပြောကြားခဲ့သည်။
Source: Aljazeera
- By CNI
- Category: စီးပွားရေး
- Hits: 486
CNI International News
ဒါကာ၊ ဩဂုတ် ၂၄
လျှပ်စစ်ဓာတ်အားသုံးစွဲမှု ချွေတာရန်အတွက် ဘင်္ဂလားဒေ့ရှ်နိုင်ငံရှိ စာသင်ကျောင်းကို ရက်သတ္တတစ်ပတ်လျှင် တစ်ရက်ထပ်မံပိတ်မည်ဖြစ်ပြီး အစိုးရရုံးများနှင့်ဘဏ်များတွင်လည်း အလုပ်ချိန်တစ်နာရီ လျှော့ချသွားမည်ဟု အေပီသတင်းတစ်ပုဒ်တွင် တွေ့ရသည်။
လောင်စာဆီဈေး တက်လာမှုနှင့် ယူကရိန်းစစ်ပွဲ သက်ရောက်မှုများအပေါ် စိုးရိမ်နေချိန်တွင် ယင်းကဲ့သို့ ဘင်္ဂလားဒေ့ရှ်အစိုးရက လျှပ်စစ်ဓာတ်အား ချွေတာလာခြင်းဖြစ်သည်။
အဆိုပါအစီအမံသည် ဩဂုတ် ၂၅ ရက်မှစ၍ သက်ရောက်မည်ဖြစ်ပြီး ကျောင်းအများစုကို ယခင်က သောကြာ နေ့တိုင်း ပိတ်ခဲ့သော်လည်း ယခုအခါ စနေနေ့အထိ ထပ်မံပိတ်ထားမည် ဖြစ်ကြောင်း ဘင်္ဂလားဒေ့ရှ် အစိုးရအဖွဲ့ အတွင်းဝန်ဖြစ်သူ ခန်ဒကာအန်နဝါအစ္စလာမ်က ဩဂုတ် ၂၂ ရက်တွင် ပြောကြားခဲ့သည်။
အလားတူ အစိုးရရုံးများနှင့်ဘဏ်များတွင်လည်း အလုပ်ချိန်ကို ယခင် ၈ နာရီသတ်မှတ်ထားရာက ယခု ၇ နာရီ အထိသာ ထားရှိရန် လျှော့ချခဲ့ကြောင်း၊ သို့သော် ပုဂ္ဂလိကုမ္ပဏီရုံးများတွင် ၎င်းတို့ကိုယ်ပိုင်အချိန်ဇယားအတိုင်း သတ်မှတ်ခွင့်ပြုသွားမည်ဖြစ်ကြောင်း ၎င်းက ဆက်လက်ပြောကြားခဲ့သည်။
ယူကရိန်းစစ်ကြောင့် ကုန်စည်ပို့ဆောင်ရေးယန္တရားပြတ်တောက်ခဲ့၍ စွမ်းအင်နှင့်စားနပ်ရိက္ခာအတွက် ကမ္ဘာ့ ဈေးကွက်ထဲတွင် ဈေးနှုန်းများ တက်လာခဲ့သည်။
ဘင်္ဂလားဒေ့ရှ်နိုင်ငံတွင် လောင်စာဆီပြတ်လပ်မှု ပြဿနာကြောင့် ဆီဆိုင်တွင် စက်သုံးဆီရရှိဖို့ရန် လာရောက်စောင့်ဆိုင်းနေကြသည့် လူအုပ်ကြီးကိုတွေ့ရစဉ်(ဓါတ်ပုံ-credit)
မကြာသေးမီ သီတင်းပတ်များအတွင်း ကျဆင်းလာနေသည့် နိုင်ငံခြားအရန်ငွေကြေးကြောင့် ဖိအားများ လျှော့ချ နိုင်ရန်အတွက် ဘင်္ဂလားဒေ့ရှ်အစိုးရက ကိုင်တွယ်ဖြေရှင်းနိုင်မည့်အစီအမံများ ချမှတ်ခဲ့သည်။
ယခင်လ၌ စက်သုံးဆီဈေးနှုန်းမှာ ၅၀ ရာခိုင်နှုန်းကျော်အထိ တဟုန်ထိုးတက်ခဲ့သည်။
အစိုးရ၏အထူးအစီအစဉ်ဖြင့် ရုရှားနိုင်ငံထံမှ ဈေးနှုန်းသက်သာသော လောင်စာဆီ တင်သွင်းနိုင်ရေး ရွေးချယ်စရာ များကို ရှာဖွေနေကြောင်း ဘင်္ဂလားဒေ့ရှ်အစိုးရက ပြောကြားခဲ့သည်။
အဆိုပါဆုံးဖြတ်ချက်ကြောင့် ဝေဖန်သံများ ထွက်ပေါ်လာသော်လည်း နိုင်ငံတကာ စက်သုံးဆီဈေးနှုန်း တက်နေ ချိန်တွင် ဆုံးရှုံးနစ်နာမှုများ လျော့ပါးအောင် ဆောင်ရွက်ရန်လိုသည်ဟု အစိုးရက အကြောင်းပြခဲ့သည်။
ဘင်္ဂလားဒေ့ရှ်ပြည်တွင်း၌ ကုန်ဈေးနှုန်း ကြီးလာခြင်းကို ဆန့်ကျင်သည့် လမ်းပေါ်ထွက် ဆန္ဒပြမှုများ အနည်း အကျဉ်းရှိခဲ့ပြီး နိုင်ငံတကာဈေးနှုန်း ပြန်လည်လျော့ကျလာလျှင် ပြည်တွင်းနှုန်းထားများကိုလည်း ပြောင်းလဲ ပြင်ဆင်ပေးမည်ဟု အစိုးရက နှစ်သိမ့်ခဲ့သည်။
ဒီဇယ်သုံးဓာတ်အားပေးစက်ရုံများ လည်ပတ်မှုကို အစိုးရက ရပ်ဆိုင်းထားပြီး နေ့စဉ်လျှပ်စစ်ဓာတ်အား မဂ္ဂါဝပ် ၁,၀၀၀ ခန့်အထိ လျှော့ချထုတ်လုပ်ခဲ့သဖြင့် ဘင်္ဂလားဒေ့ရှ်နိုင်ငံ၌ မကြာခဏ ဓာတ်အားပြတ်တောက်မှု ရှိနေ သည်။
Source: AP
- By CNI
- Category: စီးပွားရေး
- Hits: 507
CNI International News
လန်ဒန်၊ ဩဂုတ် ၂၃
Covid-19 ကပ်ရောဂါဆိုးနှင့် ရင်ဆိုင်ခဲ့ရသော ဗြိတိန်နိုင်ငံအတွက် ၂၀၂၀ ပြည့်နှစ်အရောက်၌ နှစ်ပေါင်း ၃၀၀ ကျော်အတွင်း ကုန်စည်အထွက်နှုန်း အဆိုးဆုံး ထိုးကျသွားခဲ့ကြောင်း၊ ထို့ပြင် အခြားကြီးမားသော စီးပွားရေး လုပ်ငန်းများလည်း အလွန်အမင်း ကျဆင်းသွားခဲ့ကြောင်း နောက်ဆုံး တွက်ချက်ထားသည့် တရားဝင် စာရင်း ဇယားများက ပြသနေသည်ဟု ရိုက်တာသတင်းအရ သိရသည်။
ဗြိတိန်၏ ပြည်တွင်း အသားတင် ထုတ်လုပ်မှု (GDP) သည် ၂၀၂၀ ပြည့်နှစ်တွင် ၁၁ ရာခိုင်နှုန်း ကျဆင်းခဲ့ကြောင်း အမျိုးသားစာရင်းအင်းရုံးက ထုတ်ပြန်ခဲ့သည်။ ထိုပမာဏသည် စာရင်းအင်းရုံး၏ ယခင်ခန့်မှန်းချက် ပိုမိုကြီးမားစွာ ကျဆင်းသွားမှုဖြစ်ပြီး ၁၇၀၉ ခုနှစ်နောက်ပိုင်း အင်္ဂလန်ဘဏ်၏ သမိုင်းကြောင်း အချက်အလက်များနှင့် နှိုင်းယှဉ်ပြ ထားသည်။
အချက်အလက် (data) ရရှိမှုအပေါ် မူတည်၍ ဗြိတိန်စာရင်းအင်းပညာရှင်များသည် GDP ခန့်မှန်းချက်များကို ပုံမှန်အားဖြင့် နောက်ဆုံး အခြေအနေ တွက်ချက်ခဲ့ကြသည်။
ဗြိတိန်နိုင်ငံကိုတွေ့ရစဉ် (Reuters)
အမျိုးသားစာရင်းအင်းရုံး၏ ကနဦး ခန့်မှန်းချက်အရ ၁၇၀၉ ခုနှစ်၌ Great Frost (နှင်းခဲကြီး) ဟု အစွဲပြုခေါ်ဆိုခဲ့ ကြသည့် (နှစ်ပေါင်း ၅၀၀)အတွင်း အအေးဒဏ် အပြင်းထန်ဆုံးဖြစ်ခဲ့ရာ ထိုနှစ် စီးပွားရေး ကျဆင်းမှုနှင့် ၂၀၂၀ ပြည့်နှစ် စီးပွားရေး ကျဆင်းမှုကို နှိုင်းယှဉ်သုံးသပ်ကြရန် အကြံပြုထားသည်။
သို့သော် အဆိုပါ စာရင်းအင်းရုံးကပင် စီးပွားရေး ယိုင်လဲလာမှုနှုန်းကို တစ်နည်းတစ်ဖုံ တွက်ချက်ကြည့်ပြန်ရာ ဒုတိယကမ္ဘာစစ်အပြီး အဆိုးဆုံး ကျဆင်းမှုအဖြစ် ၉ ဒသမ ၃ ရာခိုင်နှုန်းသို့ ပြောင်းလဲပြင်ဆင်ခဲ့သည်။
ယင်းသို့ မပြင်ဆင်မီ ဗြိတိန်၏ စီးပွားရေးကျနှုန်းသည် စက်မှုထိပ်သီး ၇ နိုင်ငံ (G-7) စာရင်းတွင် အနိမ့်ဆုံး ကျသွား ခဲ့ပြီး နောက်ဆုံး ပြင်ဆင်တွက်ချက်မှုအရတော့ GDP မှာ စပိန်ထက် ပိုဆိုးနေလျက် ၁၀ ဒသမ ၈ ရာခိုင်နှုန်း ဖြစ် သွား ခဲ့သည်။
သို့ရာတွင် အမေရိကန်မှအပ အခြားနိုင်ငံများနှင့် တိုက်ရိုက်နှိုင်းယှဉ်၍ ထွက်လာသော ရလဒ်များကို စာရင်းအင်းရုံး က သတိပေးထားသော်လည်း ဗြိတိန်ပြည်တွင်း၌ နက်နက်ရှိုင်းရှိုင်း ပြန်လည် ပြင်ဆင်မှု အချိုးအစားဖြစ်အောင် မလုပ်ဆောင်နိုင်သေးပေ။
GDP တွက်ချက်မှုတွင် ပြန်လည်ပြင်ဆင်ရခြင်းသည် ယခင်က ထင်ထားသည်ထက် ကျန်းမာရေးစောင့်ရှောက်မှုနှင့် လက်လီရောင်းချသူများထံမှ ပံ့ပိုးကူညီမှု နည်းပါးနေပုံကို ထင်ဟပ်စေသည်။
ဗြိတိန်နိုင်ငံကိုတွေ့ရစဉ် (GETTY IMAGES)
“ကျန်းမာရေး စောင့်ရှောက်မှု အပိုင်းမှာ ကျနော်တို့ ကနဦး ခန့်မှန်းထားတာထက် ပိုမြင့်မားနေတဲ့ ကုန်ကျစရိတ် တွေကို တွေ့ခဲ့ရပါတယ်။ ဆိုလိုတာကတော့ အခု စီးပွားရေး အခြေအနေကို ဘက်စုံကနေ ဝိုင်းကူခဲ့တာ အင်မတန် နည်းနေတယ်ဆိုတာပဲ” ဟု စာရင်းအင်းရုံးမှ ကျွမ်းကျင်ပညာရှင် ခရက်မက်လာရန်က ပြောကြားခဲ့သည်။
အဆိုပါ ရုံးသည် Covid-19 လူနာများ ကုသရေးနှင့်ဆေးရုံများတွင် ရောဂါပျံ့နှံ့မှု ကန့်သတ်ခြင်းအပေါ် အာရုံစိုက် တွက်ချက်ခဲ့သဖြင့် ဗြိတိန်နိုင်ငံတွင် အမျိုးသား ကျန်းမာရေး ဝန်ဆောင်မှု အနေဖြင့် ပံ့ပိုးပေးသည့် ပုံမှန် စောင့် ရှောက်မှုမှာ ကျဆင်းသွားပြီဟု ထင်ရှားစွာ ပေါ်ထွက်လာခဲ့သည်။
လက်လီရောင်းချသူများ ကြုံတွေ့နေရသော ကုန်ကျစရိတ် ကြီးမြင့်လာခြင်းကို အနီးကပ်ကြည့်ရှု၍ ပြန်လည် ပြင်ဆင် တွက်ချက်ခဲ့ရသလို စက်ရုံများမှ ထွက်ကုန်စွမ်းအားကို ကုန်ကြမ်းစရိတ်နှင့် ကာမိစေရန်လည်း ပြင်ဆင် တွက်ချက်ခဲ့ရသည်။
ဗြိတိန်စီးပွားရေးသည် ယမန်နှစ်တွင် သိသိသာသာ ပြန်လည်ဦးမော့လာခဲ့ပြီး ၂၀၂၁ ခုနှစ်၊ နိုဝင်ဘာလတွင် ကပ်ရောဂါ မဖြစ်ပွားမီက စီးပွားရေးပမာဏအတိုင်း တဖန်ကောင်းမွန်လာခဲ့သည်။
သို့သော် ငွေကြေးဖောင်းပွမှု မြန်ဆန်နေခြင်းကြောင့် တိုင်းပြည်စီးပွားရေးသည် ယခုနှစ်နှောင်းပိုင်း ပြန်ကျနိုင်သည် ဟု အင်္ဂလန်ဘဏ်က မျှော်မှန်းထားသည်။
Source: Reuters
- By CNI
- Category: စီးပွားရေး
- Hits: 666
CNI International News
ကိုလံဘို၊ ဩဂုတ် ၁၉
ယခုလအကုန်ပိုင်း၌ သီရိလင်္ကာသို့ နိုင်ငံတကာငွေကြေးရန်ပုံငွေအဖွဲ့ (IMF) မှ တာဝန်ရှိသူများ ရောက်ရှိလာစဉ်အတွင်း သီရိလင်္ကာ ဗဟိုဘဏ်အုပ်ချုပ်ရေးမှူးက ၎င်းတို့အစိုးရအနေဖြင့် ဘဏ္ဍာရေးကယ်ဆယ်ရန် ဦးတည်နိုင်သော ပဏာမ သဘောတူညီချက်တစ်ရပ် ရရှိနိုင်မည်ဟု မျှော်လင့်ကြောင်း ပြောကြားခဲ့သည်ဟု အေပီသတင်းတစ်ပုဒ်တွင် တွေ့ရသည်။
အိန္ဒိယသမုဒ္ဒရာထဲ၌ အချက်အချာကျသော ကျွန်းနိုင်ငံဖြစ်သည့် သီရိလင်္ကာသည် အတိအလင်း ဒေဝါလီခံထားရပြီး စီးပွားရေး အကျပ်အတည်း ပိုမိုဆိုးရွားလာမှုကြောင့် လူထုဆန္ဒပြမှုများ ပြင်းထန်လာခဲ့သဖြင့် ယခင်လ၌ သမ္မတဟောင်း ဂိုတာဘာယာ ရာဂျာပက်ဆာ ရာထူးကနေ နုတ်ထွက်၍ နိုင်ငံအတွင်းမှ ထွက်ပြေးခဲ့ရသည်။
ယခုရင်ဆိုင်နေရသော အကျပ်အတည်းသည် IMF နှင့် ညှိနှိုင်းမှုများ၌ ခက်ခဲနေခဲ့ကြောင်း အစိုးရက ပြောကြားခဲ့သည်။
သီရိလင်္ကာ ဗဟိုဘဏ် အုပ်ချုပ်ရေးမှူး နန်ဒလင်းဝီရာဆင်းက “IMF တာဝန်ရှိသူများနှင့် သီရိလင်္ကာအစိုးရတို့သည် ညှိနှိုင်း မှုများအတွင်း မူဝါဒရေးရာပိုင်းအတွက် ဝန်ထမ်းအဆင့် သဘောတူညီချက် အပြီးသတ်နိုင်မည်ဟု မျှော်လင့်ထားကြောင်း” ပြောကြားခဲ့သည်။
သီရိလင်္ကာ ဆန္ဒပြသူများနဲ့ လုံခြုံရေးတပ်ဖွဲ့ (AP)
သီရိလင်္ကာသည် ပြီးခဲ့သည့် ဧပြီလတွင် ပြည်ပချေးငွေများကို အကျေအလည် ပြန်မဆပ်နိုင်တော့ကြောင်း ကြေညာခြင်းဖြင့် လူမွဲစာရင်းဝင်(ဒေဝါလီ)နိုင်ငံအဖြစ်သို့ ဆိုက်ရောက်သွားခဲ့ရသည်။
၎င်း၏ စုစုပေါင်း ကြွေးမြီသည် ဒေါ်လာ ၅၁ ဘီလီယံဖြစ်ပြီး လာမည့် ၂၀၂၇ ခုနှစ်အရောက်တွင် ဒေါ်လာ ၂၈ ဘီလီယံအထိ အကြွေးနွံထဲ နစ်နေသည်။ သို့ဖြစ်၍ တင်ရှိနေသော ကြွေးမြီအားလုံးကို ပြန်လည် စုစည်းသုံးသပ်ရန်လိုကြောင်း နန်ဒလင်း ဝီရာဆင်းက သတင်းထောက်များအား ရှင်းပြခဲ့သည်။
IMF နှင့် လတ်တလော ရရှိထားသည့် သဘောတူညီချက်မှာ လာမည့် ၁၀ နှစ်အတွင်း အောင်မြင်စွာ ကြွေးမြီ ပပျောက်ရေး အတွက် ရှင်းလင်းတိကျစွာ ပုံဖော်နိုင်ရေး ဖြစ်ကြောင်း၊ ခိုင်မာသည့် သဘောတူညီချက်တစ်ရပ် ထပ်မံထွက်ပေါ်လာလျှင် သီရိလင်္ကာသည် အချုပ်အခြာအာဏာ ပိုင်ဆိုင်သူများနှင့် အခြားပြည်ပ ကြွေးမြီရှင်များထံ ချဉ်းကပ်ရလိမ့်မည်ဖြစ်ကြောင်း ၎င်းက ဆက်လက် ပြောကြားခဲ့သည်။
“တစ်ချိန်ချိန်မှာ IMF က ထောက်ခံတဲ့ ကျနော်တို့ရဲ့ မက်ခရိုစီးပွားရေး အစီအစဉ်ကို ပေါ်ထွက်လာပြီဆိုတာနဲ့ ကျနော်တို့ရဲ့ ကြွေးရှင်တွေ အားလုံးကနေ သီရိလင်္ကာကို ပံ့ပိုးနိုင်ကြမယ်လို့ မျှော်လင့်ပါတယ်” ဟု ဝီရာဆင်းက ဆက်လက် ပြောကြားခဲ့ သည်။
ပြီးခဲ့သည့် ရက်သတ္တပတ် နှစ်ပတ်အတွင်း ၎င်းတို့အစိုးရသည် IMF နှင့်လက်တွဲ၍ ၄ နှစ်ကြာ ဘဏ္ဍာရေး ကယ်ဆယ်မည့် အစီအစဉ်အတွက် ဆွေးနွေးခဲ့ကြကြောင်း၊ ကြွေးမြီဖိစီးမှုမှ ရုန်းထွက်၍ ပြန်လည်ထူထောင်ရေး အပြီးသတ် အတည်ပြု နိုင်ခဲ့ ကြောင်း လက်ရှိ အုပ်ချုပ်နေသည့် သမ္မတသစ်ဖြစ်သူ ရာနေးလ်ဝီကရီမီဆင်က ကြေညာခဲ့သည်။
Source: AP
- By CNI
- Category: စီးပွားရေး
- Hits: 808
CNI International News
နယူးယောက်၊ ဩဂုတ် ၁၈
အမေရိကန်ရင်းနှီးမြှုပ်နှံသူများသည် ရေနံစိမ်းသိုလှောင်နိုင်ရေး ကျဆင်းမှုအတွက် အားထုတ်နေသဖြင့် ဩဂုတ် ၁၈ ရက် (ယနေ့) တွင် ရေနံဈေးနှုန်း အနည်းငယ်ပြောင်းလဲ၍ တည်ငြိမ်လာခဲ့ကြောင်း၊ ၎င်းတို့သည် ရုရှားမှ ရေနံအထွက်နှုန်းတက်လာပြီး ကမ္ဘာလုံးဆိုင်ရာ တုံ့ဆိုင်းကျဆင်းသွားမည်ကို စိုးရိမ်နေကြကြောင်း ရိုက်တာ သတင်းတစ်ပုဒ်တွင် တွေ့ရသည်။
ဘရန့်ရေနံစိမ်းဈေးသည် ယနေ့နံနက် ဂရင်းနစ်စံတော်ချိန် ၃ နာရီ ၄၇ မိနစ်၌ ၁၅ ဆင့်ဈေးပိုများလာခဲ့ပြီး တစ်စည်လျှင် ၉၃ ဒသမ ၈၀ ဒေါ်လာသို့ တက်ခဲ့၍ ရာခိုင်နှုန်းအားဖြင့် (၀ ဒသမ ၂) တက်ခဲ့ကြောင်း၊ အမေရိကန်ရေနံစိမ်းဈေးမှာလည်း ၄ ဆင့်တက်၍ (ဝ ဒသမ ၁) ရာခိုင်နှုန်းဖြင့် ၈၈ ဒသမ ၁၅ ဒေါ်လာဈေး ပေါက်ကြောင်း သိရသည်။
ဘရန့်ဈေးနှုန်းသည် ပြီးခဲ့သည့် ဖေဖော်ဝါရီလကတည်းက အနိမ့်ဆုံးသို့ တစ်ကြိမ် ကျဆင်းခဲ့သော်လည်း ယခင်ကာလအတိုင်း ဈေးနှုန်းမှာ ၁ ရာခိုင်နှုန်းထက် ပိုတက်လာခဲ့သည်။
စီးပွားရေးကျဆင်းမှုအလားအလာအတွက် စိုးရိမ်စရာ လှုံ့ဆော်ပေးသည့် အချက်အလက်များ ရင်းနှီးမြှုပ်နှံမှု များကြားသို့ ထိုးဖောက်ဝင်ရောက်လာသဖြင့် ထိုအချက်အလက်များကြောင့် စွမ်းအင်လိုအပ်ချက်ကို ထိခိုက် နိုင်ကြောင်း ရိုက်တာက ဆက်လက်ရေးသားဖော်ပြသည်။
ဗြိတိန်စားသုံးသူဈေးနှုန်းဖောင်းပွမှုသည် ပြီးခဲ့သည့် ဇူလိုင်လတွင် ၁၀ ဒသမ ၁ ရာခိုင်နှုန်းသို့ ခုန်တက်ခဲ့သဖြင့် ၁၉၈၂ ခုနှစ်၊ ဖေဖော်ဝါရီလနောက်ပိုင်း အိမ်ထောင်စုအသီးသီးအတွက် ပိုမိုကျပ်တည်းလာစေခဲ့သည်။
ရေနံဈေးကွက်သည် နှစ်ပေါင်းများစွာတိုင်အောင် တင်းကျပ်သည့်အဝန်းအဝိုင်းထဲတွင် ဆက်လက်ရှိနေဆဲ ဖြစ်ကြောင်း၊ ကာလတိုအတွင်း အတက်အကျရှိသော အထောက်အကူပြုမည့်အစီအစဉ်များကို ကြိုးစားရှာဖွေ နေကြောင်း ကနေဒါနိုင်ငံအခြေစိုက် RBC ရင်းနှီးမြှုပ်နှံမှုငွေကြေးလုပ်ငန်းမှ မိုက်ထရန်း (Mike Tran) က ပြောကြားခဲ့သည်။
“စီးပွားရေးတုံ့ဆိုင်းကျဆင်းမှုကို ကြောက်ကြတယ်ဆိုတာ အသိအမှတ်ပြုပါတယ်။ ဒါပေမယ့် တရုတ်ဆီက ပြန်ရတာမျိုးလို တွန်းအားပေးမှု (ဒါမှမဟုတ်) ရုရှားဆီက ရောင်းလိုအား နှောင့်နှေးတာမျိုးကိုတော့ တွေ့ဖို့ ခဲယဉ်းပါတယ်” ဟု ၎င်းက ထပ်လောင်းပြောကြားခဲ့သည်။
ဆော်ဒီအာရေးဗျနိုင်ငံရှိ ရေနံထုတ်လုပ်ရေးလုပ်ငန်းတစ်ခုကို တွေ့ရစဉ်(ဓါတ်ပုံ-credit)
တင်းကျပ်သော Covid-19 အတားအဆီးများနှင့် လောင်စာဆီတင်ပို့မှု ထိန်းချုပ်မှုများကြောင့် အကန့်အသတ် ဖြင့်သာ ထုတ်လုပ်နိုင်ခဲ့သဖြင့် တရုတ်၏ သန့်စင်ပြီးရေနံထွက်ကုန်ပမာဏမှာ ပြီးခဲ့သည့် ဇူလိုင်လအထိ အားပျော့ နေခဲ့သည်။
ရောင်းလိုအားအနေဖြင့် ရုရှားသည် ပိတ်ဆို့အရေးယူမှုများနှင့် ဆက်နွှယ်လျက် ကန့်သတ်ခံရပြီးနောက် ရေနံ ထုတ်လုပ်မှုများကို တဖြည်းဖြည်း တိုးမြှင့်လာခဲ့သလို အာရှဝယ်လက်များထံမှ ဝယ်ယူသုံးစွဲမှု တိုးလာခဲ့သည်။
မော်စကိုသည် ၂၀၂၅ ခုနှစ်အကုန်ပိုင်းအထိ ၎င်း၏ထုတ်ကုန်နှင့်ပို့ကုန်အတွက် မျှော်မှန်းချက်များကို မြှင့်တင်ရန် အလေးပေးနေကြောင်း ရိုက်တာသတင်းဌာနမှ ရရှိထားသည့် ရုရှားစီးပွားရေးဝန်ကြီးဌာန၏ စာရွက်စာတမ်းများ တွင် ဖော်ပြထားသည်။
ရေနံတင်ပို့မှုပမာဏ တိုးလာခဲ့သဖြင့် စွမ်းအင်မှ ရရှိသော ရုရှားဝင်ငွေသည် ယခုနှစ်အတွင်း ၃၈ ရာခိုင်နှုန်း တက်လာနိုင်ဖွယ်ရှိကြောင်း၊ ပြည်တွင်းရောင်းလိုအားသည် မူလမျှော်မှန်းထားသလောက် ဈေးကွက် ထိခိုက်ခြင်း မရှိကြောင်း အဆိုပါစာရွက်စာတမ်းများအရ သိရသည်။
ဆော်ဒီအာရေဗျ၏ ရေနံစိမ်းတင်ပို့မှုသည် ပြီးခဲ့သည့် ဇွန်လတွင် တိုးတက်လာခဲ့ပြီး အထွက်နှုန်းမှာလည်း နှစ်နှစ်ကျော်အတွင်း ပိုမိုကောင်းမွန်လာကြောင်း စီးပွားရေးအချက်အလက်ဆိုင်ရာပူးပေါင်းအဖွဲ့ (Joint Organizations Data Initiative- JODI) ၏ အစီရင်ခံစာတွင် ဖော်ပြထားသည်။
ကမ္ဘာ့အင်အားကြီးနိုင်ငံများနှင့် အီရန်၏ ၂၀၁၅ ခုနှစ် နျူကလီးယားသဘောတူညီချက်ကို ပြန်လည်အသက်သွင်း ရန် ဆွေးနွေးနေမှုတိုးတက်သည့်အခြေအနေကို စောင့်ဆိုင်းလျက်ရှိရာ နောက်ဆုံးတွင် အီရန်ရေနံတင်ပို့မှုလည်း အားကောင်းလာနိုင်သည်ဟု ရိုက်တာက ရေးသားထားသည်။
ရုရှားရေနံဈေး ပိုတက်လာခဲ့ခြင်း၊ တရုတ်ဝယ်လိုအားရှိနေခြင်းတို့ကြောင့် ယခုဩဂုတ်လအတွင်း အီရန်ရေနံ တင်ပို့မှုမှာလည်း ၃ ရက်ဆက်တိုက် တက်လာနိုင်ကြောင်း စီးပွားရေးအချက်အလက်များကို ကောက်ယူ စာရင်း ပြုစုသည့် ကုမ္ပဏီများက ပြောကြားခဲ့ကြသည်။
Source: Reuters
- By CNI
- Category: စီးပွားရေး
- Hits: 650
CNI International News
ကိယက်ဗ်၊ ဩဂုတ် ၁၃
အာဖရိကတိုက်ရှိ အီသီယိုးပီးယားနိုင်ငံမှ အငတ်ဘေး ဆိုက်ရောက် နေသူများအတွက် ဂျုံများကို စတင် သယ်ဆောင်ရန် ယူကရိန်း ပင်လယ်နက်ဆိပ်ကမ်းသို့ ဩဂုတ် ၁၂ ရက်တွင် သင်္ဘောတစ်စင်း ဆိုက်ကပ်ခဲ့ကြောင်း အေပီသတင်းတစ်ပုဒ်တွင် တွေ့ရသည်။
ရုရှား၏ ကျူးကျော်စစ်အတွင်း ယူကရိန်း ဆိပ်ကမ်းများကို ရုရှားပိတ်ဆို့ ထားခြင်းကြောင့်ဖြစ်ပြီး ယူကရိန်း ပြည်တွင်း၌ ဂျုံစပါးများမှာ သိုလှောင်ကန်များတွင် သောင်တင်နေခဲ့သည်။
လအတန်ကြာ ဖြစ်ပွားနေသော ယူကရိန်းစစ်ပွဲကြောင့် ဆိပ်ကမ်းများကို ရုရှား ပိတ်ဆို့ထား၍ ကမ္ဘာ့စားနပ်ရိက္ခာအတွက် အရေးပါသော ပေါင်မုန့်အတွက် ယူကရိန်းဂျုံများမှာ ပြည်တွင်းရှိ သိုလှောင်ကန် (Silo) များထဲတွင် သောင်တင်လျက် စုပုံနေခဲ့သည်။
ထို့ကြောင့် ကမ္ဘာ့ဈေးကွက်ထဲ စားနပ်ရိက္ခာဈေးနှုန်းများ တက်လာခဲ့ပြီး အာဖရိက၊ အရှေ့အလယ်ပိုင်းဒေသနှင့် အာရှတို့တွင်ပါ ငတ်မွတ်ခေါင်းပါးမှု ဖြစ်လာခဲ့သည်။
ယူကရိန်းအလံကို ပင်လယ်နက်ဆိပ်ကမ်းတစ်ခုမှာ လွှင့်ထူထား(AP)
မကြာသေးမီ ရက်များအတွင်း ဂျုံစပါးတင်ဆောင်သည့် သင်္ဘောအများအပြားသည် စာချုပ်သစ်အရ ယူကရိန်း၊ ပင်လယ်နက် ဆိပ်ကမ်းများသို့ ဦးတည် ထွက်ခွာခဲ့ကြသော်လည်း တင်ပို့ကုန်အများစုမှာ တိရစ္ဆာန်အစာသာ ဖြစ်နေပြီး ယခင်စာချုပ်များအရ တူရကီ (သို့မဟုတ်) အနောက်ဥရောပသို့လည်း လမ်းကြောင်း ခွဲထွက်သွားကြသည်။
ယခုရက်ပိုင်း၌ Brave Commander အမည်ရှိသင်္ဘောသည် ဂျုံများကို တင်ဆောင်လျက် အာဖရိကဦးချိုဒေသရှိ အီသီပီးယား နိုင်ငံသို့ ပို့ဆောင်မည်ဟု ကုလသမဂ္ဂပြောရေးဆိုခွင့်ရှိသူ စတီဖင်ဒူဂျာရစ် (Stephane Dujarric) က ပြောကြားခဲ့သည်။
မိုးခေါင်ရေရှား၍ အငတ်ဘေး ခြိမ်းခြောက်မှုဒဏ် ခံစားနေရသော အီသီယိုးပီးယားရှိ ကမ္ဘာ့စားနပ်ရိက္ခာ အစီအစဉ်၏ လှုပ်ရှား လည်ပတ်မှုများကို ယခုဂျုံစပါးသင်္ဘောက အထောက်အကူပြုသွားမည်ဟု ၎င်းက ဆက်လက် ပြောကြားခဲ့သည်။
ရုရှားစစ်တပ် ရေကြောင်းစိုးမိုးထား (GETTY IMAGES)
“ကမ္ဘာ့ဈေးကွက်မှာ ယူကရိန်းကောက်ပဲသီးနှံနဲ့ စားနပ်ရိက္ခာတွေ လုံးဝပြတ်တောက်လု နီးပါးအချိန်မှာ ငတ်မွတ်မှုပမာဏ တက်လာနေတဲ့ မိသားစုအတွက် ဘဝရှင်သန်ရေး ခက်ခဲနေကြပါတယ်” ဟု ၎င်းက ရှင်းပြသည်။
အဆိုပါ သင်္ဘောသည် ကုန်တန်ချိန် မက်ထရစ်တန်ပေါင်း ၂၃,၀၀၀ ကျော် တင်ဆောင်နိုင်မည်ဟု မျှော်မှန်းထားကြေင်း ယူကရိန်းအစိုးရ၊ အခြေခံ အဆောက်အဦးဆိုင်ရာဝန်ကြီးဌာနက ပြောကြားခဲ့သည်။
ယခုအချိန်အထိ ယူကရိန်းတွင် ဂျုံစပါးတန်ချိန် သန်း ၂၀ ကျန်ရှိသေးသည်။ ယင်းသင်္ဘောသည် ယူကရိန်းပိုင် Yuzhe ဆိပ်ကမ်းမြို့တွင် ဩဂုတ် ၁၂ ရက်နှောင်းပိုင်းက ဆိုက်ကပ်ခဲ့ကြောင်း ဝန်ကြီးဌာနက ဆက်လက် ပြောကြားခဲ့သည်။
Source: AP
- By CNI
- Category: စီးပွားရေး
- Hits: 544
CNI International News
ဟာဗားနား၊ ဩဂုတ် ၉
ကျူးဘားနိုင်ငံ အနောက်ပိုင်းရှိ ရေနံသိုလှောင်ထားသည့် စက်ရုံတစ်ရုံတွင် ဩဂုတ် ၈ ရက်၌ မီးလောင်မှု ဖြစ်ပွားခဲ့ရာ ကျွန်းနိုင်ငံဖြစ်သည့် ကျူးဘား၏ အဓိကအားထားရာ လျှပ်စစ်ဓာတ်အားပေး စက်ရုံကို ပိတ်ရမည့် အခြေအနေသို့ ရောက်ရှိ သွားခဲ့ကြောင်း အေပီသတင်း တစ်ပုဒ်တွင် တွေ့ရသည်။
အစိုးရက ဟာဗားနားမြို့တော်ကို လျှပ်စစ်မီးဖြတ်တောက်ရန် စီစဉ်ထားကြောင်း ကြေညာအပြီး ရက်ပိုင်းအကြာ အဆိုပါ မီးလောင်မှု စတင်ခဲ့ခြင်းဖြစ်သည်။
နိုင်ငံ၏အနောက်ပိုင်း မာတန်ဇာ ပြည်နယ်ရှိ ရေနံသိုလှောင်စက်ရုံ မီးလောင်မှုကို မီးသတ်သမားများက ကြိုးစား ငြှိမ်းသတ်ခဲ့ ကြသော်လည်း ဩဂုတ် ၉ ရက် နံနက် အရုဏ်တက်ချိန်၌ တတိယမြောက် ရေနံလှောင်ကန်ကို ကူးစက်လောင်ကျွမ်းခဲ့သည်။
“ကလေးသူငယ်နဲ့ သက်ကြီးရွယ်အိုတွေ၊ မာတန်ဇာ ဒေသခံတွေနဲ့ တိုင်းပြည်ရဲ့ စီးပွားရေးကို ကျနော် အင်မတန် စိုးရိမ်မိပါ တယ်။ ဒီမီး ဘယ်လို ငြိမ်းမယ်ဆိုတာတော့ ကျနော်တို့လည်း မပြောတတ်ပါဘူး” ဟု အသက် ၂၈ နှစ်အရွယ်ရှိ ဒေသခံတစ်ဦး ဖြစ်သူ Dailyn de la Caridad က အေပီသို့ ပြောသည်။
ကျူးဘားရေနံစက်ရုံမီးလောင်နေ (AP)
အဆိုပါ မီးလောင်မှုကြောင့် အနည်းဆုံး လူ ၁ ဦး သေဆုံးပြီး ၁၂၅ ဦး ဒဏ်ရာရရှိကြောင်း၊ ပျောက်ဆုံးသူ ၁၄ ဦးရှိကြောင်း၊ စက်ရုံဝင်းအတွင်းရှိ သိုလှောင်ကန် ၈ ကန်ထဲမှ ၁ ကန်မှာ ဩဂုတ် ၅ ရက်၊ ညပိုင်း၌ မီးလောင်ခံခဲ့ရကြောင်း သိရသည်။
ကျူးဘား လျှပ်စစ်ဓာတ်ပေး စနစ်အတွက် အဓိက အစိတ်အပိုင်းဖြစ်သော အဆိုပါစက်ရုံတွင် ဩဂုတ် ၆ ရက်၌ ဒုတိယမြောက် ရေနံသိုလှောင်ကန်မှာ မီး ထပ်မံ ကူးစက်ခံခဲ့ရပြီး ပေါက်ကွဲသွားခဲ့သည်။
“အန္တရာယ်များနေတဲ့ အခြေအနေကို ကျနော်တို့ ကြေညာပြီးပါပြီ။ ဒုတိယမြောက် ကန် မီးလောင်ခံရတာကနေ တတိယ မြောက် ကန်ကိုလည်း ကူးစက်ခံရပြီး ဆုံးရှုံးနေရပါတယ်” ဟု မာတန်ဇာ ပြည်နယ်အုပ်ချုပ်ရေးမှူး မာရီယိုဆာဗင်းစ်က ပြောကြားခဲ့သည်။
ဩဂုတ် ၈ ရက် နှောင်းပိုင်းမှာတော့ ရေနံသိုလှောင်ကန် ၄ ကန်အထိ မီးကူးစက်ခံခဲ့ရကြောင်း ကျူးဘားမီးသတ်ဌာန ဒုတိယ တပ်ဖွဲ့မှူး အလက်ဇန္ဒား အေဗာလော့စ်က ကျူးဘားရုပ်သံဌာနသို့ ပြောကြားခဲ့သည်။
“ မီးက တော်တော်ပြင်းတယ်ဗျ” ဟု ၎င်းက ရှင်းပြသည်။
ကျူးဘားရေနံစက်ရုံ မီးလောင်မှု ရဟတ်ယာဉ်ဖြင့် ငြှိမ်းသတ်နေစဉ်(AP)
မီးသတ်သမားများသည် ယခင်သီတင်းပတ် အကုန်ပိုင်းတွင် ကျန်ရှိနေသည့် ကန်များကို မီးမကူးစက်အောင် ဆက်တိုက် ရေဖျန်း ပေးနေခဲ့သော်လည်း တားဆီးနိုင်ခဲ့ခြင်း မရှိပါ။
မီးလောင်မှုကြောင့် ဩဂုတ် ၈ ရက် မွန်းလွဲပိုင်းတွင် ကျူးဘားကျွန်း၏ အနောက်ဘက်ကို လျှပ်စစ်ဓာတ်အား ပို့လွှတ်ပေးနေ သည့် အပူစွမ်းအင်သုံး လျှပ်စစ်ဓာတ်အားပေး စက်ရုံကို အစိုးရက ပိတ်ခဲ့ကြောင်း Cubadebate ဝက်ဘ်ဆိုက်၏ ရေးသားချက် အရ သိရသည်။
အဆိုပါ မီးဘေးအတွက် ဝိုင်းဝန်း ငြှိမ်းသတ်နိုင်ရန် မက္ကစီကိုနှင့် ဗင်နီဇွဲလား အစိုးရများက အထူးတပ်ဖွဲ့များ စေလွှတ်၍ ကူညီခဲ့ကြသည်။ မီးသတ်ပိုက်များ၊ လေယာဉ်များနှင့် ရဟတ်ယာဉ်များသုံး၍ လမ်းကြောင်း အသွယ်သွယ်မှ စစ်ရေး၊ ဆောက်လုပ်ရေး ကျွမ်းကျင်သူများ ပူးပေါင်းပါဝင်လျက် ရေနံယိုဖိတ်မှု ထိန်းချုပ်နိုင်ရန် ကြိုးစားတားဆီးခဲ့ကြသည်။
ဟာဗားနားမြို့တော်မှ ၆၅ မိုင် အကွာအဝေးရှိ ဒေသများအထိ မီးခိုးငွေ့များ ဖုံးလွှမ်းနေသဖြင့် မျက်နှာဖုံးနှင့် နှာခေါင်းစည်များ အသုံးကြဖို့ ဒေသခံများကို တိုက်တွန်းနှိုးဆော်ထားသည်။
Source: AP
- By CNI News
- Category: စီးပွားရေး
- Hits: 753
CNI Sport News
၂၀၂၂ ခုနှစ်၊ ဇူလိုင် ၂၈
ဖီနာဘာချီအသင်း ပရိသတ်တွေဟာ ဒိုင်နမိုကိဗ်အသင်း ဂိုးသွင်းပြီး အောင်ပွဲခံချိန်မှာ ရုရှားသမ္မတ ပူတင်ရဲ့ နာမည်ကို ကြွေးကြော်ခဲ့လို့ ဝေဖန်မှုတွေ ခံနေရပါတယ်။
ဖီနာဘာချီနဲ့ ဒိုင်နမိုကိဗ်တို့ တူရကီမှာ ကစားခဲ့တဲ့ ချန်ပီယံလိဂ် ခြေစစ်ပွဲမှာ ဒိုင်နမိုကိဗ်အသင်းက ၂ ဂိုး- ၁ ဂိုးနဲ့အနိုင်ရပြီး နောက်တစ်ဆင့် တက်ခဲ့ပါတယ်။ အဲဒီပွဲရဲ့ ပွဲချိန်အတွင်း ၁ ဂိုးစီ သရေကျနေခဲ့လို့ အချိန်ပိုကစားစဉ် အချိန်ပိုမှာ ဒိုင်နမိုကိဗ် အသင်းက အနိုင်ဂိုး သွင်းယူနိုင်ခဲ့တာ ဖြစ်ပါတယ်။
ဒီပွဲမှာ ဒိုင်နမိုကိဗ်အတွက် အဖွင့်ဂိုးသွင်းယူခဲ့တဲ့ ဘူရယ်လ်စကီးဟာ ဖီနာဘာချီ ပရိသတ်တွေရှေ့မှာ လင်းယုန်လက်ဟန် ပုံစံနဲ့ အောင်ပွဲခံခဲ့တာပါ။ ဒါကို တုံ့ပြန်တဲ့ အနေနဲ့ ဖီနာဘာချီအသင်း ပရိသတ်တွေဟာ ယူကရိန်းတစ်နိုင်ငံလုံးကို ဒုက္ခ ပေးနေတဲ့ ပူတင်ရဲ့နာမည်ကို ကျယ်လောင်စွာ ကြွေးကြော်ခဲ့တာ ဖြစ်ပါတယ်။
ဖီနာဘာချီအသင်း ပရိသတ်တွေ အော်ဟစ်နေတဲ့ ရုပ်သံဖိုင်ဟာ ဆိုရှယ်မီဒီယာမှာ ပျံ့နှံ့ခဲ့ပြီး ကြည့်ရှုသူ ၅ သန်းကျော်အထိ ရှိနေခဲ့တာပါ။ ဒီနောက်မှာတော့ ဖီနာဘာချီကို ပြိုင်ပွဲယှဉ်ပြိုင်ခွင့် ပိတ်ပင်ဖို့ ယူအီးအက်ဖ်အေကို တိုက်တွန်းမှုတွေ ပြုလုပ် လာခဲ့ကြပါတယ်။
Source: Sport Bible
- By CNI
- Category: စီးပွားရေး
- Hits: 827
CNI International News
ဝါရှင်တန် ဇူလိုင် ၂၆
ဒီမိုကရေစီအရေး တက်ကြွလှုပ်ရှားသူ ၄ ဦးကို ကွပ်မျက်လိုက်ပြီးနောက် မြန်မာစစ်တပ် အုပ်ချုပ်သူများနှင့် ပုံမှန်အတိုင်း စီးပွားရေးလုပ်၍ မရတော့ကြောင်း အမေရိကန် နိုင်ငံခြားရေးဝန်ကြီးဌာနက ဇူလိုင် ၂၅ ရက်တွင် ပြောကြားခဲ့သည်။
မြန်မာ့တပ်မတော် အုပ်ချုပ်နေခြင်းကို ဒဏ်ခတ် အရေးယူရန် နောက်ထပ် အစီအမံများ ထည့်သွင်း စဉ်းစားထားပြီး ရွေးချယ် စရာအားလုံး မိမိတို့၏ စားပွဲအပေါ်မှာ အသင့်ရှိနေကြောင်း ဆက်လက် ပြောကြားခဲ့သည်။
မြန်မာနိုင်ငံသို့ စစ်လက်နက်ပစ္စည်းများ ရောင်းချခြင်းကို တားမြစ်ရန်နှင့် နိုင်ငံတကာ၏ ယုံကြည်ကိုးစားမှုဖြင့် မည်သည့် ချေးငှားမှုမျိုးမဆို အရေးယူမည်ဖြစ်၍ ရှောင်ကြဉ်ကြရန် ကမ္ဘာ့နိုင်ငံများကို အမေရိကန် နိုင်ငံခြားရေးဝန်ကြီးဌာန ပြောရေး ဆိုခွင့်ရှိသူ နက်ပရိုက်စ် (Ned Price) က ပုံမှန် သတင်းစာ ရှင်းလင်းပွဲတွင် တိုက်တွန်းသွားခဲ့သည်ဟု ရိုက်တာသတင်းဌာနက ဖော်ပြသည်။
ယခင် အမေရိကန် ပိတ်ဆို့အရေးယူမှုများတွင် ချန်လှပ်ခဲ့သော မြန်မာ့သဘာဝ ဓာတ်ငွေ့လုပ်ငန်းကို ဘိုင်ဒန်အစိုးရက ပိတ်ဆို့ ရန် စဉ်းစားနေသလားဟု မေးမြန်းရာ နက်ပရိုက်စ်က “နောက်ထပ် ပိတ်ဆို့မည့် အစီအမံများအတွက် ရွေးချယ်စရာအားလုံးမှာ စားပွဲပေါ်တွင် အသင့်ရှိကြောင်း” ဖြေကြားခဲ့သည်။
အမေရိကန် နိုင်ငံခြားရေးဝန်ကြီးဌာန ပြောရေး ဆိုခွင့်ရှိသူ နက်ပရိုက်စ်
“သူတို့လုပ်ခဲ့တဲ့ ကြောက်စရာကောင်းအောင် ရက်စက်မှုတွေကြောင့် ဒီအုပ်ချုပ်နေတဲ့ လက်ထက်မှာ ပုံမှန်အတိုင်း စီးပွားရေး လုပ်လို့ မရပါဘူး” ၎င်းက ပြောကြားခဲ့သည်။
ယခုနှစ် ဇန်နဝါရီလနှင့် ဧပြီလအတွင်း လျှို့ဝှက်စုံစမ်း စစ်ဆေးမှုများအရ သေဒဏ် ချမှတ်ခံခဲ့ရသည့် တက်ကြွလှုပ်ရှား ၄ ဦး သည် စစ်တပ်အပေါ် တိုက်ခိုက်ခဲ့သည့် အရပ်သား တော်လှန်ရေး လှုပ်ရှားမှုတွင် ပါဝင်ကူညီသည်ဟု စွပ်စွဲခံခဲ့ရသည်။
ယမန် နှစ်က မြန်မာ့တပ်မတော် အာဏာရယူလိုက်ပြီးနောက်ပိုင်း နိုင်ငံတဝန်းတွင် ပေါ်ပေါက်လာခဲ့သော ဆန္ဒပြပွဲများကို သွေးထွက် သံယို ဖြိုခွင်းခဲ့သည်။
ဆယ်စုနှစ်များစွာအတွင်း ပြည်တွင်း၌ ယခုကဲ့သို့ ပထမဆုံး ကွပ်မျက်မှုအပေါ် နိုင်ငံတကာ၏ အပြစ်တင်ဝေဖန်သံများ ကျယ်လောင်သွားခဲ့သည်။
မြန်မာ့လမ်းကြောင်းကို လွှမ်းမိုးနိုင်သည့် အလားအလာမှာ တရုတ်ထက်ပို၍ အခြားမည်သည့်နိုင်ငံမှ မရှိကြောင်း၊ ဒေသတွင်း အာဆီယံအဖွဲ့၏ အစည်းအဝေးများသို့ မြန်မာ့တပ်မတော် ကိုယ်စားလှယ်များကို ဖယ်ချန်ထားခြင်းအား ဆက်လက်၍ စံနမူနာ ထားလျက် ထိန်းသိမ်းသွားရန် တောင်းဆိုပါကြောင်း နက်ပရိုက်စ်က ဆက်လက် ပြောကြားခဲ့သည်။
Source: Reuters