- By CNI
- Category: စီးပွားရေး
- Hits: 219
CNI International News
ဗလာဒီဗော့စတော့၊ စက်တင်ဘာ ၁၃
ရုရှားတွင် ငွေကြေးဖောင်းပွမှု မြင့်တက်နေခြင်းကြောင့် ပြီးခဲ့သည့်လအတွင်း ဗဟိုဘဏ်က အတိုးနှုန်းကို ၁၂ ရာခိုင်နှုန်း မြှင့်တင်ခဲ့ရပြီး ထိုအခြေအနေကို မထိန်းချုပ်နိုင်ပါက ရုရှား၏ စီးပွားရေးကို ထိခိုက်စေလိမ့်မည်ဟု ရုရှားသမ္မတ ဗလာဒီမာပူတင် (Vladimir Putin) က စက်တင်ဘာ ၁၂ ရက်တွင် ပြောကြားခဲ့ကြောင်း ရိုက်တာမှ ဖော်ပြခဲ့သည်။
ငွေကြေးဖောင်းပွမှု အခြေအနေများကြောင့် စီးပွားရေးအစီအစဉ်မှာ ရေးဆွဲရန် မဖြစ်နိုင်ကြောင်း ပူတင်က ဗလာဒီဗော့စတော့မြို့တွင် ပြုလုပ်သည့် အရှေ့တိုင်း စီးပွားရေး ဖိုရမ်(Eastern Economic Forum)၌ ပြောကြား ခဲ့သည်။
ရုရှား၏ ရူဘယ် (Rouble) ငွေကြေး မတည်ငြိမ်မှုနှင့် ပတ်သက်ပြီး ပြဿနာများ မရှိကြောင်းနှင့် အာဏာပိုင်များ သည် ငွေတန်ဖိုးနှင့် ဈေးကွက်များကို ထိန်းချုပ်ရန် အစီအစဉ်များစွာ ချမှတ်ခဲ့ကြောင်း ပူတင်က ပြောသည်။
ဒေါ်လာနဲ့ ရူဘယ် ငွေကြေးကိုတွေ့ရစဉ်
စက်တင်ဘာ ၁၂ ရက်က ရူဘယ်ငွေတန်ဖိုးသည် ဒေါ်လာနှင့်နှိုင်းယှဉ်ပါက သီတင်းခြောက်ပတ်အတွင်း ငွေတန်ဖိုး အမြင့်ဆုံးနှုန်းအထိ ရောက်ရှိခဲ့ပြီး ပို့ကုန်တင်ပို့သည့်ကုမ္ပဏီများက နိုင်ငံခြားငွေကြေး ရောင်းချမှုများကို ပုံမှန် မြှင့်တင်နေကာ ဗဟိုဘဏ်ကလည်း ယခုသီတင်းပတ်အတွင်း အတိုးနှုန်းအား ထပ်မံ မြှင့်တင်ဖွယ်ရှိသည်။
အစိုးရအနေနှင့် လက်ရှိအနေအထားတွင် အခွန်များ တိုးမြှင့်ကောက်ခံရန် လိုအပ်မည်မဟုတ်ကြောင်း ပူတင်က ပြောသည်။
ရုရှားတွင် ယခုနှစ်အတွင်း ဘတ်ဂျက်ဝင်ငွေများကို တိုးမြှင့်ရန် အချို့ကုမ္ပဏီများအား အမြတ်အပေါ် ကောက်ခံ သည့် အခွန်နှုန်းထားကို မြှင့်တင်ခဲ့သည်။
ပြီးခဲ့သည့်လက ရူဘယ်ငွေတန်ဖိုးသည် အမေရိကန်ဒေါ်လာနှင့် နှိုင်းယှဉ်ပါက တစ်ဒေါ်လာကို ရူဘယ် ၁၀၀ ကျော် အထိရှိခဲ့သဖြင့် ဗဟိုဘဏ်သည် သြဂုတ် ၁၅ ရက်က ပြုလုပ်ခဲ့သည့် အစည်းအဝေးအတွင်း အတိုးနှုန်းကို ၁၂ ရာခိုင် နှုန်း တိုးမြှင့်ခဲ့ရသည်။
ဒေါ်လာနဲ့ ငွေကြေး တန်ဖိုးကို ပြသထားစဉ်
ထို့ပြင် စက်တင်ဘာ ၁၅ ရက်တွင်လည်း ဗဟိုဘဏ်သည် အတိုးနှုန်းများကို တိုးမြှင့်ဖွယ်ရှိနေသည်ဟု ကျွမ်းကျင် သူများက သုံးသပ်ခဲ့သော်လည်း ဘဏ်လုပ်ငန်းရှင်များကမူ ယခုသီတင်းပတ်အတွင်း ရူဘယ်ငွေတန်ဖိုး ပြန်လည် မြင့်တက်နေသဖြင့် ဗဟိုဘဏ်သည် အတိုးနှုန်းများအား တိုးမြှင့်ဖွယ်မရှိကြောင်း ပြောကြားခဲ့သည်။
ဗဟိုဘဏ်သည် ပြီးခဲ့သည့်လအတွင်း အချိန်မီ လုပ်ဆောင်နိုင်ခဲ့သော်လည်း အတိုးနှုန်းများ မြှင့်တင်ခြင်းသည် ငွေချေးလုပ်ငန်းနှင့် စီးပွားရေး ဖွံ့ဖြိုးတိုးတက်မှုကို အထိန်းအချုပ် ဖြစ်စေနိုင်သည်ဟု ပူတင်က ပြောသည်။
မိမိတို့အနေဖြင့် ငွေကြေးဖောင်းပွမှုကို ထိန်းချုပ်ရန် လိုအပ်ကြောင်း၊ ငွေကြေးဖောင်းပွမှု မြင့်တက်နေသည့် အခြေအနေအား ထိန်းချုပ်နိုင်ခဲ့ခြင်း မရှိပါက ရေရှည်တွင် စီးပွားရေးအတွက် အဆိုးဆုံး အခြေအနေအထိ ဖြစ်စေနိုင်ကြောင်း ပူတင်က ပြောကြားခဲ့သည်။
Source: ရိုက်တာ
- By CNI
- Category: စီးပွားရေး
- Hits: 220
CNI International News
ဘန်ကောက်၊ စက်တင်ဘာ ၉
ထိုင်းနိုင်ငံတွင် ကုန်သွယ်ရေးဝန်ကြီးအဖြစ် ခန့်အပ်ခံခဲ့ရသည့် ဖွမ်သမ် ဝီချာယာချိုင်း (Phumtham Wechaya chai)က ၎င်း၏ ဦးစားပေး အစီအစဉ်များထဲတွင် လူနေမှုကုန်ကျစရိတ်များကို ဖြေရှင်းရန် ကတိပြုခဲ့ကြောင်း ဘန်ကောက်ပို့စ်မှ ဖော်ပြခဲ့သည်။
ထို့နောက် ထုတ်လုပ်ရေး ကဏ္ဍ၏ ကုန်ကျစရိတ်များနှင့်အညီ ထုတ်ကုန်ဈေးနှုန်းများကို စိတ်ချသေချာမှုရှိစေရန် လုပ်ဆောင်မည်ဟုလည်း ၎င်းက ပြောသည်။
ထို့ပြင် ထိုင်း၏ ပင်လယ်ကူး သင်္ဘောကဏ္ဍအတွက် အခွင့်အလမ်းများကို တိုးမြှင့်ရန် ကုန်သွယ်ရေး ဆွေးနွေး ညှိနှိုင်းမှုများအား အရှိန်မြှင့်တင်လိုကြောင်း၊ ပို့ကုန်ဈေးကွက် အသစ်များကို ရှာဖွေရန် ရည်ရွယ်သည့် အစီအစဉ် များအား အရှိန်မြှင့်တင်ရန် ဆန္ဒရှိကြောင်း ဖွမ်သမ်က ပြောကြားခဲ့သည်။
ကုန်သွယ်ရေးဝန်ကြီးအဖြစ် စတင်ရုံးထိုင်သည့် နေ့မှာပင် ဖြူးထိုင်းပါတီ၏ မစ္စတာ ဖွမ်သမ်က သူသည် ဝန်ကြီး ချုပ် ဆရီသာ သာဗီဆင် (Srettha Thavisin) ၏ မူဝါဒများကို လေးစားလိုက်နာ သွားမည်ဖြစ်ကြောင်း၊ ပြည်သူ လူထုကို ထိခိုက်စေမည့် အကြောင်းအရာများ၊ အထူးသဖြင့် လူနေမှုကုန်ကျစရိတ်များနှင့် ထုတ်ကုန်ဈေးနှုန်းများ ကို ချက်ချင်း ဖြေရှင်းသွားမည်ဟု ပြောသည်။
ထိုင်းလူမှုဘဝကို တွေ့ရစဉ်
ကုန်သွယ်ရေးဝန်ကြီးဌာန အနေနှင့်လည်း ထုတ်ကုန်ဈေးနှုန်းများကို လူနေမှုကုန်ကျစရိတ်နှင့် ကိုက်ညီမှုရှိစေရန် လုပ်ဆောင်မည်ဖြစ်ပြီး ပြည်သူလူထုသာမက စီးပွားရေးလုပ်ငန်းရှင်များကိုပါ ကြွယ်ဝချမ်းသာစေလိုကြောင်း ဖွမ်သမ်က ပြောကြားခဲ့သည်။
ထိုင်းနိုင်ငံ၏ နှေးကွေးလေးလံနေသည့် ပို့ကုန်ကဏ္ဍသည် ယခုနှစ်အတွင်း ပိုမိုဆိုးရွားလာခဲ့သဖြင့် ပို့ကုန်ဈေးကွက် အသစ်များကို ရှာဖွေရန် အရေးတကြီး လိုအပ်သည်ဟု ၎င်းက ဆိုသည်။
ပြည်ပနိုင်ငံများရှိ စီးပွားရေး အတိုင်ပင်ခံများနှင့် ပူးပေါင်းဆောင်ရွက် ရမည်ဖြစ်ပြီး ပို့ကုန်အခွင့်အလမ်းများကို ပိုမို တိုးတက်စေမည့် အလားအလာအတွက် နိုင်ငံအများအပြားနှင့် ကုန်သွယ်ရေး ဆွေးနွေးညှိနှိုင်းမှုများ ပြုလုပ်ရမည် ဟုလည်း ထိုင်းကုန်သွယ်ရေးဝန်ကြီးက ပြောသည်။
ထိုင်းလူငယ်နှစ်ဦးကိုတွေ့ရစဉ်
ကုန်သွယ်ရေးဝန်ကြီးဌာနက နောက်ဆုံး ထုတ်ပြန်ထားသည့် အချက်အလက်များအရ ထိုင်း၏ ပို့ကုန်ကဏ္ဍသည် ဇူလိုင်လထဲတွင် ၁၀ လ ဆက်တိုက် ကျဆင်းခဲ့ကြောင်း သိရသည်။
ပြီးခဲ့သည့်နှစ်က ယူကရိန်းစစ်ပွဲ ဖြစ်ပွားမှုကြောင့် ကမ္ဘာလုံးဆိုင်ရာ ထုတ်ကုန်များ၏ ဈေးနှုန်းများအပေါ် ထိခိုက်မှု ရှိစေခဲ့သဖြင့် ထိုင်း၏ ပို့ကုန်ကဏ္ဍသည် မျှော်မှန်းထားသည့် ပမာဏထက် ပိုမိုကျဆင်းခဲ့ခြင်း ဖြစ်သည်။
ကုန်သွယ်ရေး လိုငွေပြမှု ဒေါ်လာ ၈ ဘီလျံရှိခဲ့သဖြင့် ယခုနှစ် ပထမ ၇ လအတွင်း ထိုင်း၏ ပို့ကုန်ကဏ္ဍသည် ၅ ဒသမ ၅ ရာခိုင်နှုန်း ကျဆင်းခဲ့ကာ တန်ဖိုးအားဖြင့် ဒေါ်လာ ၁၆၃ ဘီလျံအထိရှိခဲ့ပြီး၊ သွင်းကုန်ကဏ္ဍသည် ၄ ဒသမ ၇ ရာခိုင်နှုန်းလျော့ကျခဲ့ကာ တန်ဖိုးအားဖြင့် ဒေါ်လာ ၁၇၂ ဘီလျံရှိခဲ့သည်။
Source: ဘန်ကောက်ပို့စ်
- By CNI
- Category: စီးပွားရေး
- Hits: 272
CNI International News
ရှန်ဟိုင်း၊ စက်တင်ဘာ ၈
တရုတ်၏ အကြီးမားဆုံး အိမ်ခြံမြေကုမ္ပဏီများ၏ ဘဏ္ဍာရေး ပြဿနာသည် နိုင်ငံ၏စီးပွားရေးကို ထိခိုက်စေခဲ့ပြီး စီးပွားရေးလုပ်ငန်းများသည် တရားစွဲဆိုမှုများနှင့် ရင်ဆိုင်နေရသည်ဟု CNA မှ ဖော်ပြခဲ့သည်။
အိမ်ခြံမြေကဏ္ဍအား ပြုပြင်ပြောင်းလဲမည့် တရုတ်အစိုးရ၏ အားထုတ်ကြိုးပမ်းမှုများကြောင့် တရုတ်နိုင်ငံတွင် အိမ်ခြံမြေဈေးကွက် အကျပ်အတည်း ပေါ်ပေါက်လာခဲ့သည်။
အိမ်ခြံမြေလုပ်ငန်းများသည် တရုတ်စီးပွားရေး၏ ကျောရိုးတစ်ခုဖြစ်ပြီး ဒေသခံ ၈၀ ရာခိုင်နှုန်း၏ ပိုင်ဆိုင်မှုများ သည် အိမ်ခြံမြေကဏ္ဍထဲတွင် ရှိနေသည်။ ထိုပိုင်ဆိုင်မှုသည် တရုတ်နိုင်ငံ ဂျီဒီပီ၏ ၃၀ ရာခိုင်နှုန်းအထိ ရှိသည်။
Evergrande Group ကို တွေ့ရစဉ်
တစ်ချိန်က တရုတ်၏ ထိပ်သီး အိမ်ခြံမြေ ကုမ္ပဏီဖြစ်သည့် Evergrande Group သည် ပြီးခဲ့သည့်လက ဒေဝါလီခံ ရန် လျှောက်ထားမှုနှင့်အတူ ၂၀၂၂ ခုနှစ်က အိမ်ခြံမြေ အရောင်းဈေးကွက်တွင် အများဆုံး ရောင်းချနိုင်ခဲ့သည့် Country Garden ကုမ္ပဏီသည်လည်း ၎င်း၏ ပထမဆုံးအကြိမ် ကြွေးမြီပေးဆပ်ရန် ပျက်ကွက်မည့် အခြေအနေ နှင့် ပွတ်သီကာသီ ရှောင်လွှဲနိုင်ခဲ့သည်။
တရုတ်သည် အိမ်ခြံမြေကဏ္ဍအပေါ် မှီခိုအားထားမှုကို လျှော့ချခဲ့ချိန်တွင် တရုတ်အိမ်ခြံမြေကဏ္ဍသည် ရှေရှည် အသွင်ကူးပြောင်းမှုကာလအား ရင်ဆိုင်နေရသည်ဟု ကျွမ်းကျင်သူများက ပြောကြားခဲ့သည်။
တရုတ်၏ အိမ်ခြံမြေကုမ္ပဏီများကို ထောက်ပံ့ပေးနေသည့် ဘဏ္ဍာရေးအဖွဲ့သည် ထိုကုမ္ပဏီများထံမှ ဒေါ်လာ ၃၉၀ ဘီလျံ ရရှိမည့် အချိန်ကာလအား စောင့်ဆိုင်းနေရသည်ဟု ဟောင်ကောင်အခြေစိုက် Gavekal Research သုတေသန ကုမ္ပဏီ၏ အဆိုအရ သိရသည်။
တရုတ် အိမ်ခြံမြေကို တွေ့ရစဉ်
တရုတ်၏ ဆောက်လုပ်ရေး ကဏ္ဍတွင်လည်း အလုပ်အကိုင် အခွင့်အလမ်းများသည် ပြီးခဲ့သည့်နှစ်နှင့် နှိုင်းယှဉ်ပါ က အလုပ်အကိုင်နေရာ ၁ ဒသမ ၅ သန်း လျော့ကျသွားခဲ့သည်ဟု တရုတ် ဆောက်လုပ်ရေးလုပ်ငန်း အသင်း (China Construction Industry Association) ၏ ယခုနှစ် ဇွန်လ၌ ထုတ်ပြန်သည့် အချက်အလက်များတွင် ဖော်ပြခဲ့သည်။
"တရုတ်မှာ COVID-19 ကပ်ရောဂါ မဖြစ်ခင် ၂၀၁၉ ခုနှစ်တုန်းက အိမ်ခြံမြေကုမ္ပဏီတွေ ၁၀၀,၀၀၀ လောက်ရှိခဲ့ပါ တယ်။ အခုအချိန်မှာတော့ အဲဒီအိမ်ခြံမြေကုမ္ပဏီတွေထဲက ကုမ္ပဏီ ၅၀၀၀ လောက်ဟာ ဒေဝါလီခံကြောင်း ကြေညာခဲ့လို့ အခြေအနေက ပိုမိုဆိုးရွားလာခဲ့ပါတယ်" ဟု ဟောင်ကောင်အခြေစိုက် Hang Seng ဘဏ်၏ စီးပွားရေးပညာရှင် ဝမ်တန် (Wang Dan)က ပြောကြားခဲ့သည်။
Source: CAN
- By CNI
- Category: စီးပွားရေး
- Hits: 519
CNI International News
ဘန်ကောက်၊ စက်တင်ဘာ ၇
နိုင်ငံအတွင်း အစိုးရအရာရှိများ အပါအဝင် အကျင့်ပျက်ခြစားမှုများကို နှိမ်နင်းရန် တင်းကျပ်သည့် အားထုတ် ကြိုးပမ်းမှုများကို လုပ်ဆောင်သွားမည်ဟု ထိုင်းဝန်ကြီးချုပ်သစ် ဆရီသာ သာဗီဆင် (Srettha Thavisin) က စက်တင်ဘာ ၆ ရက်တွင် ကတိပြုခဲ့သည်ဟု The Nation မှ ဖော်ပြခဲ့သည်။
အစိုးရအဖွဲ့အတွင်း ရာထူးနေရာများကို ငွေကြေးပေးပြီး ဝယ်ယူခြင်း၊ ရောင်းချခြင်းတို့ကို အဆုံးသတ်သွားမည်ဟု စက်တင်ဘာ ၆ ရက်တွင် ကျရောက်သည့် ထိုင်း၏ အကျင့်ပျက်ခြစားမှု တိုက်ဖျက်ရေးနေ့၌ ပြုလုပ်သည့် ဖိုရမ်တစ်ခုမှာ ဆရီသာက ပြောကြားခဲ့သည်။
ထိုအခမ်းအနားကို ထိုင်း အကျင့်ပျက်ခြစားမှု တိုက်ဖျက်ရေးအဖွဲ့ (ACT)က ဘန်ကောက်မြို့တော်ရှိ Krung Thep Aphiwat Central Terminal ရထားဘူတာရုံတွင် ပြုလုပ်ခဲ့ခြင်းဖြစ်သည်။
"အစိုးရအရာရှိတွေ အားလုံးဟာ အစိုးရရဲ့ မူဝါဒတွေကို အကောင်အထည် ဖော်သူတွေအဖြစ် သူတို့ရဲ့ ဂုဏ်သိက္ခာ နဲ့အညီ သာတူညီမျှ ဆက်ဆံခံရဖို့အတွက် စိတ်ချာသေချာမှု ရှိစေအောင် ကျနော်တို့ လုပ်ဆောင်သွားမှာပါ။ အစိုးရ ရာထူးနေရာတွေကို ရရှိဖို့ ငွေနဲ့ ဝယ်ယူတဲ့သူတွေ၊ ရောင်းချတဲ့သူတွေအတွက် ဒီအစိုးရအဖွဲ့ထဲမှာ နေရာ မရှိစေရ ပါဘူး"ဟု ဆရီသာက ပြောကြားခဲ့သည်။
ထိုင်း အကျင့်ပျက်ခြစားမှု တိုက်ဖျက်ရေးအဖွဲ့ကို တွေ့ရစဉ်
အစိုးရအဖွဲ့သည် နိုင်ငံကို စီမံခန့်ခွဲရာတွင် တရားဥပဒေ၏ အခြေခံမူဝါဒများကို လေးစားလိုက်နာမည်ဖြစ်ပြီး ပွင့်လင်းမြင်သာမှုရှိစေရန် ခေတ်သစ် နည်းပညာများဖြင့် အကောင်အထည်ဖော် လုပ်ဆောင်သွားမည်ဟုလည်း ဆရီသာက ပြည်သူများကို ကတိပေးခဲ့သည်။
ထိုဖိုရမ်အတွင်း ACT ဥက္ကဋ္ဌ ဝီချီအန် ပွန်ဆာသွန် (Wichian Phongsathorn)က အကျင့်ပျက်ခြစားမှု တိုက်ဖျက်ရေး လုပ်ငန်းစဉ်များကို ပိုမိုခိုင်မာမှုရှိစေရန် အချက် ၅ ချက်အား အစိုးရအဖွဲ့သစ်ကို တောင်းဆိုခဲ့သည်။
ထိုအချက်များအနက် ပထမအချက်မှာ အကျင့်ပျက်ခြစားမှု ပြဿနာများကို တိုက်ဖျက်ရန် နယ်ပယ်အားလုံးမှ သက်ဆိုင်သည့် ကိုယ်စားလှယ်များ ပါဝင်သည့် ကော်မတီတစ်ရပ်ကို ဝန်ကြီးချုပ်က ကမကထပြုပြီး ထူထောင်ရန် ဖြစ်သည်။
ဒုတိယအချက်မှာ အမျိုးသား အကျင့်ပျက်ခြစားမှု တိုက်ဖျက်ရေး ကော်မရှင်၊ စာရင်းစစ်ချုပ်ရုံး၊ ပြည်သူ့ကဏ္ဍ အကျင့်ပျက်ခြစားမှု တိုက်ဖျက်ရေး ကော်မရှင် အပါအဝင် အကျင့်ပျက်ခြစားမှု တိုက်ဖျက်ရေး အေဂျင်စီများ၏ လွတ်လပ်မှုကို မြှင့်တင်ပေးရန်ဖြစ်သည်။
တတိယအချက်အနေဖြင့် နိုင်ငံတော်၏ ပိုင်ဆောင်မှုအောက်တွင် ပြည်သူလူထုအား သတင်းပြန်ကြားမှုဆိုင်ရာ ဥပဒေနှင့် အကျင့်ပျက်ခြစားမှုဥပဒေများကို ပြဋ္ဌာန်းရန် ဖြစ်သည်။
ထိုင်း အကျင့်ပျက်ခြစားမှု တိုက်ဖျက်ရေးအဖွဲ့နဲ့ ထိုင်းဝန်ကြီးချုပ်သစ် ဆရီသာ သာဗီဆင်ကို တွေ့ရစဉ်
စတုတ္ထအချက်မှာ အစိုးရအေဂျင်စီ အားလုံးအနေနှင့် ကန်ထရိုက်ပေးမှုများ၊ ပရောဂျက်များကို ဝယ်ယူမှုများနှင့် ပတ်သက်သည့် သတင်းအချက်အလက်များအား နိုင်ငံတကာ ပွင့်လင်းမြင်သာမှုရှိသည့် စံချိန်စံနှုန်းများနှင့်အညီ ပြည်သူလူထုအား ထုတ်ပြန်ပေးရန် ဖြစ်သည်။
ပဉ္စမအချက်မှာ အကျင့်ပျက်ခြစားမှုနှင့်ဆက်နွှယ်သည့် သတင်းအချက်အလက်များကို ခြွင်းချက်အနေဖြင့် ထုတ်ပြန်မှု မရှိခဲ့သည့် အတိတ်က ကျင့််သုံးခဲ့သည့် နိုင်ငံ၏စည်းမျဉ်းစည်းကမ်းများကို ပြုပြင်ပြောင်းလဲရန် ဖြစ်သည်။
ထိုင်းသည် ၂၀၂၂ ခုနှစ် နိုင်ငံတကာ အကျင့်ပျက်ခြစားမှုဆိုင်ရာ ပွင့်လင်းမြင်သာမှု ညွှန်းကိန်း (Transparency International Corruption Index) ၏ အမှတ် ၁၀၀ တွင် ၃၆ မှတ် ရရှိခဲ့သည်။
ထို့ပြင် အာဆီယံတွင် စင်ကာပူ၊ မလေးရှားနှင့် ဗီယက်နမ်တို့ပြီးလျှင် စတုတ္ထနေရာ၌ ရပ်တည်ခဲ့ပြီး ကမ္ဘာ့အဆင့်မှာ ၁၀၁ နေရာတွင် ရပ်တည်ခဲ့သည်။
Source: The Nation
- By CNI
- Category: စီးပွားရေး
- Hits: 260
CNI International News
နယူးဒေလီ၊ စက်တင်ဘာ ၆
ကမ္ဘာ့အချမ်းသာဆုံး ပုဂ္ဂိုလ်များကို အခွန်များ တိုးမြှင့်ကောက်ခံရန် စီးပွားရေး လုပ်ငန်းရှင်များနှင့် မီလျံနာ အများ စုက စက်မှုထိပ်သီးနိုင်ငံ-၂၀ (G-20)အား အိတ်ဖွင့်ပေးစာ ပေးပို့ပြီး တောင်းဆိုခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။
ချမ်းသာကြွယ်ဝမှု မမျှတသည့် အခြေအနေများ မြင့်တက်လာမှုကြောင့် စီးပွားရေး၊ ဂေဟစနစ်နှင့် လူ့အခွင့်အရေး ပြဿနာများ ပိုမိုဆိုးရွား လာနိုင်သည်ဟုလည်း ၎င်းတို့က သတိပေးခဲ့သည်။
အိန္ဒိယနိုင်ငံတွင် စက်တင်ဘာ ၉ ရက်မှ ၁၁ ရက်အထိ ပြုလုပ်မည့် ချမ်းသာကြွယ်ဝသည့် G-20 နိုင်ငံများ၏ အစည်းအဝေးမတိုင်မီ လူပေါင်း ၃၀၀ ကျော် ပါဝင်သည့် အဖွဲ့တစ်ဖွဲ့က ထိုအိတ်ဖွင့်ပေးစာထဲ၌ လက်မှတ် ရေးထိုးပြီး တောင်းဆိုခဲ့ကြခြင်း ဖြစ်သည်။
အခြေခံ လူတန်းစားများကိုတွေ့ရစဉ်
"လူအနည်းငယ်လောက်ကပဲ တစ်နေ့ထက်တစ်နေ့ ပိုပြီး ချမ်းသာလာတာဟာ ကမ္ဘာ့နိုင်ငံရေး တည်ငြိမ်မှုကို ခြိမ်းခြောက်နေပါတယ်"ဟု ထိုအိတ်ဖွင့် ပေးစာထဲတွင် ပါဝင်ရေးသားခဲ့သည့် မီလျံနာများ၊ နိုင်ငံရေးသမားများနှင့် စီးပွားရေးပညာရှင်များက ပြောကြားခဲ့သည်။
ပြီးခဲ့သည့် ၁၀ စုနှစ်အတွင်း ဘီလျံနာများ၏ ချမ်းသာကြွယ်ဝမှုသည် ၁၀၉ ရာခိုင်နှုန်းအထိ မြင့်တက်လာခဲ့ပြီး ပမာဏအားဖြင့် ဒေါ်လာ ၅ ဒသမ ၆ ထရီလျံမှ ဒေါ်လာ ၁၁ ဒသမ ၈ ထရီလျံအထိ ရှိခဲ့သည်ဟု ကမ္ဘာလုံးဆိုင်ရာ ဆင်းရဲမွဲတေမှု လျော့ပါးသက်သာစေရေး အဖွဲ့ဖြစ်သည့် Oxfam International ၏ အဆိုအရ သိရသည်။
ဘီလျံနာ စုစုပေါင်း၏ ကြွယ်ဝချမ်းသာမှုသည် တစ်နေ့လျှင် ၂ ဒသမ ၇ ဘီလျံအထိ ရှိခဲ့သည်ဟုလည်း Oxfam International က တွက်ချက် ဖော်ပြခဲ့သည်။
ကမ္ဘာ့အချမ်းသာဆုံး ပုဂ္ဂိုလ်များ၏ ၁၀ ရာခိုင်နှုန်းသည် ကမ္ဘာလုံးဆိုင်ရာ ချမ်းသာကြွယ်ဝမှု စုစုပေါင်း၏ ၇၆ ရာခိုင်နှုန်းကို ပိုင်ဆိုင်ထားပြီး ကမ္ဘာ့လူဦးရေ စုစုပေါင်း၏ အောက်ခြေမှ ၅၀ ရာခိုင်နှုန်းသည် ၂ ရာခိုင်နှုန်းကိုသာ ပိုင်ဆိုင်ခဲ့သည်ဟု ၂၀၂၂ ခုနှစ် World Inequality သတင်းတစ်ရပ်တွင် ဖော်ပြခဲ့သည်။
စီးပွားရေး မညီမျှမှုအပေါ် သဘောထား ထုတ်ဖော်နေကြစဉ်
"အဲဒီလို သာတူညီမျှမှုမရှိတဲ့ အခြေအနေ ပိုမိုမြင့်တက်လာတာက ကမ္ဘာလုံးဆိုင်ရာ စနစ်တွေရဲ့ ခိုင်မာမှုကို လျော့ပါးစေနိုင်ပြီး ဒီကိစ္စကို ခေါင်းချင်းဆိုင် ဖြေရှင်းရပါလိမ့်မယ်" ဟု ထိုအိတ်ဖွင့်ပေးစာထဲတွင် ဖော်ပြခဲ့သည်။
ကမ္ဘာတစ်ဝန်းရှိ အစိုးရများ၏ မူဝါဒများသည် အလွန်အမင်း ချမ်းသာကြွယ်ဝ သူများနှင့် ဘဏ္ဍာရေးကဏ္ဍထံမှ အကျိုးအမြတ်များစွာ ရရှိနေချိန်တွင် အလုပ်သမား လူတန်းစားများ၏ အကျိုးစီးပွားများကို ကာကွယ်ပေးရန် ပျက်ကွက်ခဲ့သည်ဟုလည်း ကျွမ်းကျင်သူများက ပြောသည်။
အလွန်အမင်း ချမ်းသာကြွယ်ဝသူများကို အခွန် ၅ ရာခိုင်နှုန်း တိုးမြှင့်ကောက်ခံမည်ဆိုပါက တစ်နှစ်ကို ဒေါ်လာ ၁ ဒသမ ၇ ထရီလျံအထိ ရရှိမည်ဖြစ်ပြီး ထိုငွေပမာဏသည် လူပေါင်း သန်း ၂၀၀၀ ကို ဆင်းရဲတွင်းထဲမှ ဆွဲထုတ်ရန် လုံလောက်သည်ဟု Oxfam က ထုတ်ပြန်ခဲ့သည်။
Source: အယ်လ်ဂျာဇီးယား
- By CNI
- Category: စီးပွားရေး
- Hits: 249
CNI International News
တိုကျို၊ စက်တင်ဘာ ၅
တရုတ်ကုမ္ပဏီများသည် ခေတ်မီနည်းပညာပစ္စည်းများ၊ လျှပ်စစ်ကားများနှင့် အခြား အဓိက ထုတ်ကုန်များနှင့် ဝန်ဆောင်မှု ၁၆ မျိုးအတွက် ဈေးကွက်များအတွင်း ၎င်းတို့၏ တည်ရှိမှုကို ချဲ့ထွင်ခဲ့သည်ဟု Nikkei Asia က ပြုလုပ်ခဲ့သည့် စစ်တမ်းတစ်ရပ်တွင် ဖော်ပြခဲ့သည်။
အမေရိကန်နှင့် အခြားနိုင်ငံများသည် ပြည်တွင်းလုပ်ငန်း ကာကွယ်ရေး အစီအမံများဖြင့် ၎င်းတို့၏ စီးပွားရေး လုံခြုံမှုကို စိတ်ချသေချာအောင် လုပ်ဆောင်ရန် ကြိုးပမ်းနေသည်။
ထိုသို့ ကြိုးပမ်းနေသည့်တိုင် အမေရိကန်နှင့် အခြားနိုင်ငံများသည် လျှပ်စစ်ကားများနှင့် အခြားထုတ်ကုန်များ အတွက် တရုတ်၏ ထောက်ပံ့ရေး ကွင်းဆက်အပေါ် မှီခိုအားထားမှုကို လျှော့ချရန် အခက်တွေ့နေ ကြသည်။
ကမ္ဘာလုံးဆိုင်ရာ စီးပွားရေးလှု ပ်ရှားမှုအတွက် မရှိမဖြစ်လိုအပ်သည့် အချောသတ် ထုတ်ကုန်များ၊ ဝန်ဆောင်မှု များ၊ အဓိက အစိတ်အပိုင်းများနှင့် ပစ္စည်းကိရိယာ ၆၃ မျိုးအတွက် ဈေးကွက်များ၏ ခွဲတမ်းများကို Nikkei က လေ့လာခဲ့သည်။
BYD ကား ကုမ္ပဏီကို တွေ့ရစဉ်
ထိုနယ်ပယ် တစ်ခုချင်းစီ၏ ဈေးကွက်များတွင် ထိပ်ဆုံးမှ ဦးဆောင်နေသည့် ထိပ်သီးကုမ္ပဏီ ၅ ခုအနက် တရုတ်ကုမ္ပဏီများသည် ၂၀၂၂ ခုနှစ်အတွင်း လျှပ်စစ်ကားများ၊ ဘက်ထရီများ၊ LCD ပြားများ၊ အခြား အဓိက ထုတ်ကုန်များနှင့် ဝန်ဆောင်မှု ဈေးကွက်များတွင် ၎င်းတို့၏ ချုပ်ကိုင်ထားမှုအား ၂၀၂၁ ခုနှစ်ကထက်ပိုပြီး ချဲ့ထွင်ခဲ့သည်ကို တွေ့ရှိခဲ့သည်။
ထို့ပြင် အဆိုပါဈေးကွက်များ၏ ဈေးကွက် ၁၃ ခုတွင် တရုတ်ကုမ္ပဏီများက ၃၀ ရာခိုင်နှုန်းကျော်အထိ လွှမ်းမိုး ချုပ်ကိုင်ခဲ့သည်။ အထူးသဖြင့် တရုတ်ကုမ္ပဏီများသည် လျှပ်စစ်ကားများနှင့် ဆက်နွှယ်သည့် ဈေးကွက်များတွင် သိသာထင်ရှားစွာ လွှမ်းမိုးနိုင်ခဲ့သည်။
အမေရိကန်၏ Tesla ကုမ္ပဏီသည် ၂၀၂၂ ခုနှစ်အတွင်း လျှပ်စစ်ကားဈေးကွက်ကို ၁၈ ဒသမ ၉ ရာခိုင်နှုန်းဖြင့် ကုမ္ပဏီ တစ်ခုချင်းစီအလိုက် ဈေးကွက်အများဆုံး ထိန်းချုပ်ထားနိုင်ခဲ့သော်လည်း တရုတ်ကုမ္ပဏီ သုံးခုပေါင်း၏ လျှပ်စစ်ကားဈေးကွက် ထိန်းချုပ်မှု ရာခိုင်နှုန်းသည် ၂၇ ဒသမ ၇ ရာခိုင်နှုန်းရှိခဲ့ပြီး Tesla ကုမ္ပဏီထက် ပိုမိုများပြား ခဲ့သည်။
Tesla ကားကုမ္ပဏီကို တွေ့ရစဉ်
ယခုနှစ်အတွင်း လျှပ်စစ်ကားဈေးကွက်တွင် Tesla ကုမ္ပဏီ၏ ထိန်းချုပ်မှုသည် ၂၀၂၁ ခုနှစ်ကထက် ၃ ဒသမ ၄ ရာခိုင်နှုန်း လျော့နည်းသွားခဲ့ချိန်တွင် တရုတ်၏ BYD ကုမ္ပဏီသည် လျှပ်စစ်ကားဈေးကွက်တွင် ထိန်းချုပ်မှုသည် ၆ ဒသမ ၉ ရာခိုင်နှုန်းမှ ၁၁ ဒသမ ၅ ရာခိုင်နှုန်းအထိ မြင့်တက်ခဲ့ပြီး Tesla ပြီးလျှင် ဒုတိယမြောက် ဈေးကွက် ထိန်းချုပ်မှု အများဆုံး ကုမ္ပဏီ ဖြစ်ခဲ့သည်။
လျှပ်စစ်ကားများနှင့် အခြား ထုတ်ကုန်များတွင် အသုံးပြုနေသည့် လစ်သီယံ အိုင်းယွန်း (lithium-ion) အတွက် အင်ဆူလိတ်တာ (insulator) ထုတ်လုပ်မှု အများဆုံးကုမ္ပဏီ ငါးခုအနက် လေးခုသည် တရုတ်ကုမ္ပဏီများဖြစ်ပြီး ထိုကုမ္ပဏီ လေးခု စုစုပေါင်း၏ ဈေးကွက် ထိန်းချုပ်မှု ရာခိုင်နှုန်းသည် ၆၃ ရာခိုင်နှုန်း ရှိခဲ့သည်။
၂၀၂၁ ခုနှစ်က ထိပ်သီးကုမ္ပဏီ ၅ ခုစာရင်းတွင် မပါဝင်ခဲ့သည့် တရုတ်၏ Sinona Science & Technology ကုမ္ပဏီသည် လက်ရှိတွင် ဈေးကွက်ထိန်းချုပ်မှု ၁၁ ရာခိုင်နှုန်းဖြင့် ဒုတိယနေရာ၌ ရပ်တည်နိုင်ခဲ့သည်။
Source: Nikkei Asia
- By CNI
- Category: စီးပွားရေး
- Hits: 284
CNI International News
စင်ကာပူ၊ စက်တင်ဘာ ၄
၂၀၂၂ ခုနှစ်၊ သြဂုတ်လက ထိုင်းတွင် ဖမ်းဆီးခံခဲ့ရသည့် တရုတ် ကာစီနိုစီးပွားရေးလုပ်ငန်းရှင် ရှီကျိကျန် (She Zhijiang) သည် အေရှေ့တောင်အာရှ တစ်ဝန်းရှိ တရားမဝင် လောင်းကစား လုပ်ငန်းများနှင့် အွန်လိုင်းပေါ်မှ ငွေကြေးလိမ်ညာမှုများဖြင့် ဆက်နွှယ်မှုရှိသော လူပုဂ္ဂိုလ်များနှင့် ကုမ္ပဏီများ၏ နောက်ကွယ်မှာ ကြိုးကိုင်သူ တစ်ဦးဖြစ်သည်ဟု The Straits Times မှ ဖော်ပြခဲ့သည်။
ရှီ၏ လုပ်ငန်းများသည် မလေးရှား၊ မြန်မာမှ ရင်းနှီးမြှုပ်နှံသူများနှင့် ဒစ်ဂျစ်တယ်ငွေကြေး လွှဲပြောင်းမှုများ အပြင် ဖိလစ်ပိုင်နှင့် ကမ္ဘောဒီးယားတို့တွင် တားမြစ်ပိတ်ပင်ခံခဲ့ရသည့် ကာစီနိုကစားဝိုင်းများကို ကြီးကြပ်ရန် စင်္ကာပူ အခြေစိုက် ကုမ္ပဏီတစ်ခုက တီထွင်ခဲ့သည့် Blockchain နည်းပညာကို အသုံးပြုခဲ့ခြင်းဖြစ်သည်။
Blockchain နည်းပညာသည် ငွေကြေးများကို သိမ်းဆည်းနိုင်ခြင်း၊ မှတ်တမ်းများကို တိုးချဲ့မှတ်သားနိုင်ခြင်းနှင့် နည်းပညာကဏ္ဍကို မတူခြားနားအောင် အသွင်ပြောင်းနိုင်ခြင်း အစရှိသည့် ဂုဏ်သတ္တိများရှိသည်။
အသက် ၄၁ နှစ်အရွယ် ရှီကျိကျန်သည် ဗြိတိန် အပါအဝင် ကမ္ဘာတစ်ဝန်းရှိ ကုမ္ပဏီများ၏ ကျယ်ပြန့်သော ကွန်ရက်နှင့်လည်း ဆက်နွှယ်မှုရှိခဲ့သည်။
ရွှေကုက္ကို အထူးစီးပွားရေးဇုန်ကို တွေ့ရစဉ်
ရှီသည် တရုတ်နိုင်ငံ ဟူနန်ပြည်နယ်တွင် စီးပွားရေးလုပ်ငန်းရှင်တစ်ဦးအဖြစ် စတင်လုပ်ကိုင်ခဲ့ချိန်ကတည်းက ထိုကွန်ရက်ကို အသုံးပြုပြီး ဘီလျံနှင့်ချီသည့် ငွေကြေးများကို ခဝါချခဲ့သည်။
ရှီသည် ရှီကိုင်လွန် (She Kailun) နှင့် တန်ကိုင်လွန် (Tang Kailun) အစရှိသည့် အမည်များ အပါအဝင် အမည်ခွဲ အများအပြားရှိပြီး မြန်မာနိုင်ငံနှင့် ကမ္ဘောဒီးယားနိုင်ငံတို့တွင် ငွေကြေးလိမ်ညာသည့် လုပ်ငန်းများ၊ လူမှောင်ခိုကူး မှုများနှင့် ဆက်နွှယ်မှုရှိခဲ့သည်ဟု တရုတ်အခြေစိုက် Caixin သတင်းဝက်ဘ်ဆိုက်က ဖော်ပြခဲ့သည်။
ရှီ၏ ကုမ္ပဏီများထဲမှ တစ်ခုဖြစ်သည့် Yatai International Holdings ကုမ္ပဏီသည် အလုပ်အကိုင် ရှားပါးမှုများ၊ အလုပ်လက်မဲ့နှုန်းများ မြင့်တက်ခဲ့သည့် Covid-19 ကပ်ရောဂါ ကာလအတွင်းက ဝင်ငွေကောင်းသည့် အလုပ် အကိုင်များကို ခေါ်ယူနေကြောင်း ကတိကဝတ်များနှင့်တကွ Facebook ပေါ်တွင် ကြော်ငြာများတင်ပြီး ဝန်ထမ်း များ ခေါ်ယူခဲ့သည်။
ကာစီနိုကိုတွေ့ရစဉ်
ထိုကဲ့သို့ မက်လုံးပေး ခေါ်ယူမှုများကြောင့် အာရှနှင့် အာဖရိကမှ ရာနှင့်ချီသည့် လူငယ်များ လိမ်ညာခေါ်ယူခံခဲ့ရပြီး မြန်မာနိုင်ငံ၏ ရွှေကုက္ကို အထူးစီးပွားရေးဇုန်ရှိ အွန်လိုင်း လောင်းကစား လုပ်ငန်းလုပ်သည့် အဆောက်အအုံများ၊ ငွေကြေးလိမ်ညာသည့် စင်တာများတွင် အတင်းအဓမ္မ အလုပ်လုပ်ကိုင်ရန် စေခိုင်းခံခဲ့ရသည်။
ကုလသမဂ္ဂ လူ့အခွင့်အရေးဆိုင်ရာ မဟာမင်းကြီးရုံး (OHCHR) ၏ သြဂုတ် ၂၉ ရက်က ထုတ်ပြန်သည့် သတင်း တစ်ရပ်တွင် အလိမ်ခံခဲ့ရသည့် လူငယ်များသည် သူတို့၏ သဘောဆန္ဒမပါဘဲ အခြားလူများကို လိမ်ညာရန် အတင်းအဓမ္မ စေခိုင်းခံခဲ့ရပြီး ထိုလူငယ်များထဲတွင် စင်္ကာပူနိုင်ငံသားများလည်း ပါဝင်သည်ဟု ဖော်ပြခဲ့သည်။
၂၀၂၁ ခုနှစ်တွင် တရုတ်သည် ရှီကို ဖမ်းဆီးရန် နိုင်ငံတကာ ရဲတပ်ဖွဲ့ (Interpol) တွင် အနီရောင်နို့တစ် တင်ခဲ့ သည်။
ထို့နောက် ရှီသည် ၂၀၂၂ ခုနှစ်၊ သြဂုတ်လတွင် ထိုင်းနိုင်ငံ၌ ဖမ်းဆီးခံခဲ့ရသည်။
Source: The Straits Times
- By CNI
- Category: စီးပွားရေး
- Hits: 302
CNI International News
ဘန်ကောက်၊ စက်တင်ဘာ ၄
ဖြူးထိုင်းပါတီ ဦးဆောင်သည့် ထိုင်းညွန့်ပေါင်း အစိုးရအဖွဲ့သည် ဒီဇယ်ဈေးနှုန်းများကို ချက်ချင်း လျှော့ချပေးသွား မည်ဖြစ်ပြီး ဓာတ်ဆီဈေးနှုန်းများကိုလည်း သတ်မှတ်နှုန်းထားအလိုက် လျှော့ချပေးသွားမည်ဖြစ်ကြောင်း ဖြူးထိုင်း ပါတီဘက်က ပြောသည်ဟု ဘန်ကောက်ပို့စ်မှ ရေးသားဖော်ပြခဲ့သည်။
ထို့နောက် လျှပ်စစ်ရထား စီးနင်းခကိုလည်း ဘတ် ၂၀ အထိ လျှော့ချပေးသွားမည်ဟု အတည်ပြုခဲ့သည်။
ဒီဇယ်အပေါ် ယစ်မျိုးခွန် လျှော့ချမှုသည် ကုမ္ပဏီ၊ လုပ်ငန်း၊ အဖွဲ့အစည်း အားလုံးအတွက် ဒီဇယ်ဈေးနှုန်းများကို လျှော့ချရာတွင် မှန်ကန်သည့် လမ်းနည်းတစ်ခုဖြစ်ပြီး ဓာတ်ဆီဈေးနှုန်းများကိုမူ အသုံးပြုသူများအလိုက် အုပ်စု များခွဲပြီး လျှော့ချပေးသွားမည်ဟု ဖြူးထိုင်းပါတီက ၎င်း၏ Facebook page တွင် စက်တင်ဘာ ၃ ရက်က ရေးသား ဖော်ပြခဲ့သည်။
နောက်ပိုင်းတွင် ပါတီအနေနှင့် ဒီဇယ်ဈေးနှုန်းများကို အမြဲတမ်း လျှော့ချသွားရန် နည်းလမ်းများကို ရှာဖွေသွား မည်ဟုလည်း ဖြူးထိုင်းက ပြောသည်။
ဖြူထိုင်းပါတီက ထိုင်း၀န်ကြီးချုပ်ကိုတွေ့ရစဉ်
စက်တင်ဘာ ၃ ရက်က ထိုင်းနိုင်ငံတစ်ဝန်းရှိ စက်သုံးဆီ ဆိုင်အများစုတွင် ဒီဇယ်ဈေးနှုန်းများသည် တစ်လီတာ လျှင် ၃၁ ဒသမ ၉၄ ဘတ် ရှိခဲ့သည်။
လျှပ်စစ်ဓာတ်အား ထုတ်လုပ်မှုအတွက် ကုန်ကျစရိတ်များ မြင့်တက်နေသည့် ကာလအတွင်း လျှပ်စစ်ဓာတ်အားခ များကို လျှော့ချရန် အစိုးရအနေနှင့် ထိုင်း လျှပ်စစ်ဓာတ်အား ထုတ်လုပ်ရေး အာဏာပိုင်အဖွဲ့၏ ဓာတ်အားခ ထောက်ပံ့မှုအတွက် ကြွေးမြီ ပြန်လည်ပေးဆပ်မှုကို သက်တမ်းတိုးချဲ့ သွားမည်ဖြစ်သည်။
ထိုင်းတွင် ယခုလမှစပြီး ဒီဇင်ဘာလအထိ လျှပ်စစ်ဓာတ်အားခများကို တစ်ယူနစ်လျှင် ၄ ဒသမ ၄၅ ဘတ် အဖြစ် သတ်မှတ်ပေးခဲ့သည်။
ဖြူးထိုင်းပါတီ၏ သယ်ယူပို့ဆောင်ရေးဝန်ကြီး သူရိယ ဂျန်ကရွန်ရန်ကစ်ကို တွေ့ရစဉ်
အစိုးရအဖွဲ့သည် ပထမဆုံးအကြိမ် ပြုလုပ်မည့် အစည်းအဝေးအတွင်း စွမ်းအင်နှင့် ရေနံဈေးနှုန်းများကို လျှော့ချ ဖြတ်တောက်ရန် ဆွေးနွေးသွားမည်ဟု ဖြူးထိုင်းက ပြောသည်။
ထိုင်းအစိုးရအဖွဲ့ဝင် ဝန်ကြီးအသစ်များသည် စက်တင်ဘာ ၅ ရက်တွင် ကျန်းသစ္စာ ကျိန်ဆိုမည်ဖြစ်သည်။
ထိုအချိန်အတောအတွင်း ဖြူးထိုင်းပါတီ၏ သယ်ယူပို့ဆောင်ရေးဝန်ကြီး သူရိယ ဂျန်ကရွန်ရန်ကစ် (Suriya Jungrungreangkit) က လျှပ်စစ်ရထား စီးနင်းခကို ဘတ် ၂၀ သတ်မှတ်ခြင်းသည် အဓိကအချက်ဖြစ်ပြီး ပါတီ၏ မူဝါဒနှင့် အကောင်အထည် ဖော်ရေးတို့အတွက် ဘဏ္ဍာရေးဝန်ကြီးဌာန၊ မီးရထားဝန်ကြီးဌာနတို့ကဲ့သို့ အဖွဲ့ အစည်းများနှင့် ဆွေးနွေးသွားမည်ဟု ပြောကြားခဲ့သည်။
ထို့ပြင် မူဝါဒများကို အကောင်အထည်ဖော်ရေးအတွက် အချိန်သတ်မှတ်ချက်နှင့် ရန်ပုံငွေများ ရရှိရေးအတွက်ကို လည်း ဆွေးနွေးညှိနှိုင်းပြီး အဖြေရှာသွားမည်ဟု သူရိယက ပြောကြားခဲ့သည်။
Source: ဘန်ကောက်ပို့စ်
- By CNI
- Category: စီးပွားရေး
- Hits: 250
CNI International News
ဘန်ကောက်၊ စက်တင်ဘာ ၂
တရုတ်နှင့် အိန္ဒိယ ခရီးသွားများကို ဗီဇာ လျှော့ပေါ့ပေးရန် အဆိုပြုထားသည့် ထိုင်းဝန်ကြီးချုပ်သစ် ဆရီသာ သာဗီဆင် (Srettha Thavisin) ၏ အစီအစဉ်များသည် ထိုင်းနိုင်ငံ၏စီးပွားရေးကို ပြန်လည်အသက်သွင်းမည့် မျှော်လင့်ချက်များကို ထွန်းတောက်စေခဲ့သည်ဟု CNA မှ ဖော်ပြခဲ့သည်။
သို့သော် ထိုအစီအစဉ်သည် နိုင်ငံအတွင်း ခရီးသွားလုပ်ငန်းအပေါ် ဝန်ပိစေပြီး ခရီးသွား အများအပြား ဝင်ရောက်မှု ကြောင့် သဘာဝပတ်ဝန်းကျင်ကို ထိခိုက်စေမည့် စိုးရိမ်မှုများကိုလည်း မြင့်တက်စေခဲ့သည်ဟု ကျွမ်းကျင်သူများက ပြောသည်။
ခရီးသွားလုပ်ငန်း လုပ်ကိုင်သူများနှင့် လေ့လာသုံးသပ်သူများကမူ ဗီဇာလျှော့ပေါ့ခွင့်ပြုသည့် အစီအစဉ်သည် ထိုင်းနိုင်ငံ၏ ခရီးသွားလုပ်ငန်းကို ပြန်လည်နာလန်ထူရန်နှင့် ခရီးသွားများ ဝင်ရောက်မှုကို သတ်မှတ် နှုန်းထား ပြည့်မီစေရေးအတွက် အထောက်အကူ ဖြစ်စေလိမ့်မည်ဟု ယုံကြည်ကြောင်း ပြောကြားခဲ့သည်။
ထိုင်းဝန်ကြီးချုပ်သစ် ဆရီသာ သာဗီဆင်ကို တွေ့ရစဉ်
ယခုနှစ်၏ ပထမ ၆ လတာ ကာလအတွင်း တရုတ်ခရီးသွားများသည် ထိုင်းတွင် ခရီးသွားဗီဇာရရှိရန် ၁၅ ရက်နီးပါး စောင့်ဆိုင်းခဲ့ရသည်ဟု ထိုင်း၏ Kasikorn Securities ကုမ္ပဏီ၏ ဈေးကွက်လေ့လာသုံးသပ်သူတစ်ဦးက ပြော သည်။
ထိုင်းတွင် ခရီးသွားဗီဇာဖြင့် ရက်ပေါင်း ၆၀ နေထိုင်ရန် ဘတ် ၃၅၀၀ (အမေရိကန်ဒေါ်လာ ၁၀၀ နီးပါး) ကုန်ကျ မည်ဖြစ်ပြီး လျှောက်ထားသူများသည် တစ်ဦးချင်းစီအတွက် လျှောက်ထားရမည်ဖြစ်သည်။
ထိုင်းခရီးသွားလုပ်ငန်းကောင်စီ၏ဥက္ကဋ္ဌ ချမ်နန် သီရိသာဝတ်ကို တွေ့ရစဉ်
တရုတ်နှင့် အိန္ဒိယ ခရီးသွားများအတွက်မူ ဆိုက်ရောက်ဗီဇာ လျှောက်ထားရန် ထိုင်းဘတ် ၂၀၀၀ ( အမေရိကန် ဒေါ်လာ ၅၇ ဒေါ်လာ) ခန့် ကုန်ကျမည်ဖြစ်ပြီး ၁၅ ရက်ကြာ နေထိုင်ခွင့်ပေးမည် ဖြစ်သော်လည်း သတ်မှတ်ချက် အချို့နှင့် ကိုက်ညီရမည် ဖြစ်သည်။
"ဗီဇာလျှောက်ထားမှု လုပ်ငန်းစဉ်တွေ ပိုမိုအဆင်ပြေချောမွေ့အောင် လုပ်ဆောင်မယ်ဆိုရင် ကျနော်တို့အနေနဲ့ ဘာကိုမှ ရင်းနှီးမြှုပ်နှံစရာမလိုဘဲ ခရီးသွားလုပ်ငန်းအတွက် ထိခိုက်စေတဲ့ ပြဿနာကိုလည်း ဖြေရှင်းပြီးသား ဖြစ်လာပါလိမ့်မယ်။ ပြီးတော့ ခရီးသွားတွေ ဝင်ရောက်မှု အရေအတွက်ကို လျင်မြန်စွာ မြှင့်တင်နိုင်မှာ ဖြစ်ပါတယ်" ဟု ထိုင်းခရီးသွားလုပ်ငန်းကောင်စီ၏ဥက္ကဋ္ဌ ချမ်နန် သီရိသာဝတ် (Chamnan Srisawat) က ပြောသည်။
ထိုင်းနိုင်ငံသည် ယခုနှစ်အတွင်း နိုင်ငံတကာမှ ခရီးသွား အရေအတွက် သန်း ၃၀ ဝင်ရောက်လိမ့်မည်ဟု မျှော်လင့် ထားသည်။
ထိုအရေအတွက်သည် ကိုဗစ်ကပ်ရောဂါ မတိုင်မီ နိုင်ငံအတွင်း ဝင်ရောက်သည့် နိုင်ငံတကာ ခရီးသွား အရေ အတွက် သန်း ၄၀ နှင့်နှိုင်းယှဉ်ပါက ၁၀ သန်းခန့် လျော့ကျနေဆဲ ဖြစ်သည်။
Source: CNA
- By cni
- Category: စီးပွားရေး
- Hits: 292
CNI International News
ဘန်ကောက်၊ စက်တင်ဘာ ၁
အစိုးရအဖွဲ့သစ် ကျမ်းသစ္စာကျိန်ဆိုပြီးနောက် လွှတ်တော်တွင် အစိုးရ၏ မူဝါဒကို ထုတ်ပြန်သွားမည်ဟု ထိုင်း ဝန်ကြီးချုပ်သစ် ဆရီသာ သာဗီဆင် (Srettha Thavisin) က ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့ သည်။
"မူဝါဒ ကြေညာချက်ကို တစ်ပတ်အတွင်း ထုတ်ပြန်ဖို့ အဆင်သင့် ဖြစ်နေပါပြီ။ မူဝါဒတွေ ရေးဆွဲနေတာဟာလည်း ၁၀၀ ရာခိုင်နှုန်းနီးပါး ပြီးစီးနေပါပြီ။ ဖြူးထိုင်းပါတီရဲ့ မူဝါဒရေးရာ ကော်မတီဥက္ကဋ္ဌ ဒေါက်တာ ပရွမ်မင် လတ်ဆူရီ ဒက် (Prommin Lertsuridej) ဟာ ညွန့်ပေါင်းအဖွဲ့ထဲမှာ ပါဝင်တဲ့ ပါတီတွေအားလုံးဆီက မူဝါဒတွေကို စုဆောင်း နေပါတယ်" ဟု ဆရီသာက ပြောသည်။
ထို့ပြင် မူဝါဒ ကြေညာချက်နှင့် ပတ်သက်ပြီး United Thai Nation (UTN) ပါတီခေါင်းဆောင် ပီရာပန် ဆာလီရာ ဗီဟာဂါ (Pirapan Salirathavibhaga)နှင့် ဆွေးနွေးမည်ဟုလည်း ဖြူးထိုင်းပါတီ၏ ဝန်ကြီးချုပ်က ပြောသည်။
ပထမဆုံးအကြိမ် ပြုလုပ်မည့် အစိုးရအဖွဲ့ အစည်းအဝေးတွင် စွမ်းအင်ဈေးနှုန်းများ လျှော့ချရေးကို ဦးစားပေး အကြောင်းအရာအဖြစ် ဆွေးနွေးသွားမည်ဖြစ်ပြီး လျှပ်စစ်ရထားစီးနင်းခများကို လျှော့ချရေး၊ ဗီဇာ အာမခံနှင့် လယ်သမားများ၏ ကြွေးမြီများကို တရားဝင်ဆိုင်းငံ့ရေးတို့ကိုလည်း ဆွေးနွေးမည်ဟု ဆရီသာက ပြောသည်။
စွမ်းအင်ဝန်ကြီး သုပတ္တနာပွန် ပွန်မီချောကိုတွေ့ရစဉ်
ထို့ပြင် ဆရီသာသည် စိုက်ပျိုးရေးနှင့် စိုက်ပျိုးရေး ပူးပေါင်းဆောင်ရွက်မှုဘဏ် (BAAC) ၏ မန်နေဂျာချုပ်နှင့် ရာထူးမှ ထွက်ခွာတော့မည့် လက်ထောက်ဘဏ္ဍာရေးဝန်ကြီးတို့ကိုလည်း ဖိတ်ကြားခဲ့ပြီး လယ်သမားများ ရင်ဆိုင်နေရသည့် စိန်ခေါ်မှုများနှင့် ကြွေးမြီများ ဆိုင်းငံ့ရေးတို့ကို ဆွေးနွေးခဲ့သည်။
"သြဂုတ် ၃၀ ရက်က စွမ်းအင်ဝန်ကြီး သုပတ္တနာပွန် ပွန်မီချော (Supattanapong Punmeechaow) က သတင်း အချက်အလက်တွေ လာပေးခဲ့ပါတယ်။ စွမ်းအင်ဈေးနှုန်းတွေ လျှော့ချရေးအတွက် ကျနော်တို့မှာ ရှင်းလင်းပြတ် သားတဲ့ နည်းလမ်းတစ်ခု ရှိပြီးသားပါ။ ဒါပေမယ့် ကျနော်တို့ အနေနဲ့ နယ်ပယ်ကဏ္ဍ အများကြီးကို ထည့််သွင်း စဉ်းစားဖို့လိုပါတယ်။ ဒါ့အပြင် ကျနော်တို့ဟာ ဘတ်ဂျက်ကိစ္စအတွက် ဘဏ္ဍာရေးဝန်ကြီးဌာနနဲ့လည်း တိုင်ပင်ရ မှာ ဖြစ်ပါတယ်။ ကျနော်တို့ ဆွေးနွေးခဲ့တာတွေကို အခြေခံပြီး ပြောရမယ်ဆိုရင် ပြဿနာမရှိဘူးလို့ ကျနော် ထင် ပါတယ်" ဟု ဆရီသာက ပြောကြားခဲ့သည်။
လေကြောင်းလိုင်းများမှု အမှုဆောင်များနှင့် ပြုလုပ်သည့် ဆွေးနွေးမှုများတွင်လည်း လေကြောင်းလိုင်း အများစု သည် ထိုင်း၏ ခရီးသွားကဏ္ဍနှင့် စီးပွားရေးကို လှုံ့ဆော်ရန် အစိုးရ၏ အစီအစဉ်များကို တုံ့ပြန်သည့် အနေဖြင့် ၎င်းတို့၏ လေကြောင်းလိုင်း ဝန်ဆောင်မှုများကို တိုးမြှင့်ရန် ဆန္ဒရှိကြောင်း ပြသခဲ့သည်ဟု ဆရီသာက ပြောကြား ခဲ့သည်။
Source: ဘန်ကောက်ပို့စ်