CNI Sport News
၂၀၂၃ ခုနှစ်၊ မေလ ၂၂
ဗလင်စီယာအသင်းကို အရေးနိမ့်ခဲ့တဲ့ လာလီဂါပွဲစဉ်မှာ လူမျိုးရေးခွဲခြားမှုကို ထပ်မံခံခဲ့ရပြီးနောက် ရီးရယ်လ် အသင်း တောင်ပံကစားသမား ဗီနီစီးယက်စ်က လာလီဂါက လူမျိုးရေးခွဲခြားတဲ့ ပြိုင်ပွဲလို့ ပြောလိုက်ပါတယ်။
ဗီနီစီးယက်စ်က “ဒါက ပထမအကြိမ် မဟုတ်သလို၊ ဒုတိယအကြိမ်လည်း မဟုတ်၊ တတိယအကြိမ်လည်း မဟုတ်ပါဘူး။ လူမျိုးရေးခွဲခြားမှုဟာ လာလီဂါမှာ ပုံမှန်ပါပဲ။ ဒီပြိုင်ပွဲမှာ ဒါကပုံမှန်လို့ ထင်ပါတယ်။ တစ်ချိန်က ရော်နယ်လ်ဒင်ဟို၊ ရော်နယ်ဒို၊ ခရစ္စတီယာနိုနဲ့ မက်ဆီတို့ကို ပိုင်ဆိုင်ခဲ့တဲ့ ဒီပြိုင်ပွဲဟာ အခုအချိန်မှာတော့ လူမျိုးရေး ခွဲခြားတဲ့ ပြိုင်ပွဲဖြစ်နေပါပြီ။ ဘရာဇီးလ်မှာဆိုရင် စပိန်နိုင်ငံကို လူမျိုးရေးခွဲခြားတဲ့ နိုင်ငံအဖြစ် လူသိများနေပါ ပြီ။ ဒါပေမယ့် ကျနော်က သန်မာတဲ့အတွက် လူမျိုးရေးခွဲခြားမှုကို ဆန့်ကျင်ဖို့ အဆုံးထိသွားမယ်”လို့ အင်စတာ ဂရမ်မှာ ရေးသားခဲ့ပါတယ်။
ရီးရယ်လ်အသင်းက ဗလင်စီယာအသင်းကို ၁ ဂိုး- ဂိုးမရှိနဲ့ အရေးနိမ့်ခဲ့တဲ့ လာလီဂါပွဲစဉ်မှာ ဗီနီစီးယက်စ်ကို လူမျိုးရေး ခွဲခြားခဲ့တဲ့ ဗလင်စီယာ ပရိသတ်တွေရဲ့ အပြုအမူကြောင့် ပွဲကို မိနစ်အတော်ကြာ ရပ်နားခဲ့ရတာ ဖြစ်ပါတယ်။
ဗီနီစီးယက်စ်ဟာ ဒေါသထွက်ပြီး ဗလင်စီယာအသင်း ပရိသတ်တွေနဲ့ ထိပ်တိုက် တွေ့ဆုံမှုတွေတောင် ဖြစ်ခဲ့ပါတယ်။
ဒါအပြင် ဘရာဇီးလ် ကစားသမားဟာ ဗလင်စီယာအသင်း ကစားသမား ဟူဂိုဒူရိုနဲ့ ရန်ပွဲဖြစ်ပွားခဲ့တာမှာ ကြမ်းတမ်းစွာ ပြုမူခဲ့တယ်ဆိုပြီး ပွဲချိန် ၉၇ မိနစ်မှာ တိုက်ရိုက်အနီကတ်နဲ့ ထုတ်ပယ်ခံခဲ့ရပါတယ်။
ဗီနီစီးယက်စ်နဲ့ အန်ဆယ်လော့တီကိုတွေ့ရစဉ်
ဗီနီစီးယက်စ်ဟာ ဒီရာသီ လာလီဂါပြိုင်ပွဲမှာ အကြိမ်ပေါင်းများစွာ လူမျိုးရေး ခွဲခြားခံခဲ့ရတာဖြစ်ပြီး ဗလင်စီယာနဲ့ ပွဲမှာတော့ သူရဲ့ခံစားချက်တွေကို ထိန်းချုပ်နိုင်ခြင်း မရှိခဲ့ပါဘူး။
ရီးရယ်လ် အသင်းနည်းပြ အန်ဆယ်လော့တီက ဗီနီစီးယက်စ်ကို တိုက်ရိုက် လူမျိုးရေး ခွဲခြားခဲ့တာကြောင့် ဗလင်စီယာနဲ့ပွဲကို ရပ်တန့်သင့်တယ်လို့ ပွဲအပြီးမှာ ပြောခဲ့ပါတယ်။
အန်ဆယ်လော့တီက “ဒီနေ့ မြင်တွေ့ခဲ့ရတဲ့ အရာတွေက လက်ခံနိုင်စရာ မရှိပါဘူး။ အားကစားကွင်း တစ်ခုလုံးမှာ လူမျိုးရေးခွဲခြားတဲ့ အသံတွေကို ကြားခဲ့ရပါတယ်။ ဒီနေ့မှာ ဘောလုံးအကြောင်းကို မပြောချင်ပါဘူး။ ဒီပွဲကို ရပ်တန့်သင့်တယ်ဆိုပြီး ဒိုင်ကို ကျနော်ပြောခဲ့ပါတယ်။ လာလီဂါမှာ ပြဿနာရှိနေပြီး၊ လူမျိုးရေးခွဲခြားမှုကြောင့် ပွဲတွေကို ရပ်တန့်ဖို့ လိုအပ်ပါတယ်”လို့ ပြောခဲ့ပါတယ်။
လာလီဂါကတော့ လူမျိုးရေး ခွဲခြားမှု အပြုအမူတွေကို နှစ်ပေါင်းများစွာကြာ ဆန့်ကျင်ပြီး တိုက်ခိုက်နေတယ်လို့ ထုတ်ပြန်ထားပါတယ်။
Source: Daily Mail
