CNI Sport News
၂၀၂၄ ခုနှစ်၊ မတ်လ ၁၄
အင်တာမီလန်အသင်းကို အနိုင်ရခဲ့တဲ့ ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ ပင်နယ်တီ အဆုံးအဖြတ် ကန်သွင်းတာကို မကြည့်ခဲ့ဘူးလို့ အသလက်တီကိုအသင်းနည်းပြ ဆီမြွန်နီက ပြောခဲ့ပါတယ်။
ဆီမြွန်နီက “ပင်နယ်တီ ကန်သွင်းတာကို ကျနော် မကြည့်ခဲ့ပါဘူး။ ကြည့်ရတာ ကျနော့်အတွက် အဆင်မပြေတဲ့ အတွက် မကြည့်ဖို့ ဆုံးဖြတ်ခဲ့ပါတယ်။ ပင်နယ်တီနဲ့ ပတ်သက်ရင် ကျနော်တို့ဟာ အမြဲတမ်းခက်ခဲပါတယ်။ တီဗွီ ပေါ်မှာရှိတဲ့ ပရိသတ်တွေရဲ့ ပုံရိပ်တွေကိုကြည့်ရတာ စိတ်လှုပ်ရှားဖို့ ကောင်းပါတယ်။ ကျနော်တို့ဟာ အခုဆိုရင် ဥရောပရဲ့ အကောင်းဆုံး ၈ သင်းထဲကို ထပ်ပြီးရောက်ရှိလာခဲ့ပါပြီ။ ဒါက ကလပ်အသင်းရဲ့ အကြောင်းကို အများ ကြီးပြောနေတာပါ”လို့ Movistar ရဲ့ မေးမြန်းမှုကို ဖြေခဲ့တာပါ။
ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ အသလက်တီကိုအသင်းက အင်တာမီလန်အသင်းကို ၂ ဂိုး- ၁ ဂိုးနဲ့ အနိုင်ရရှိခဲ့တာပါ။
ဒါပေမယ့် ပထမအကျော့ပွဲစဉ်မှာ အင်တာမီလန်အသင်းက ၁ ဂိုး- ဂိုးမရှိနဲ့ အနိုင်ရရှိခဲ့တဲ့အတွက် နှစ်ကျော့ပေါင်း ရလဒ် ၂ ဂိုးစီ သရေကျနေလို့ အချိန်ပိုဆက်ပြီး ကစားခဲ့ရတာဖြစ်ပါတယ်။
အချိန်ပိုမှာ အဖြေမထွက်ခဲ့တာကြောင့် ပင်နယ်တီ အဆုံးအဖြတ်ခံယူခဲ့တာမှာ အသလက်တီကိုအသင်းက ၃ ဂိုး-၂ ဂိုးနဲ့ အနိုင်ရပြီး ကွာတားဖိုင်နယ်ကို တက်နိုင်ခဲ့တာပါ။
အင်တာမီလန်နဲ့ အသလက်တီကို ယှဉ်ပြိုင်နေစဉ်
ပင်နယ်တီ အဆုံးအဖြတ်မှာ အင်တာမီလန်အသင်းရဲ့ ကန်သွင်းမှုတွေကို ကာကွယ်နိုင်ခဲ့တဲ့ အသလက်တီကို အသင်းဂိုးသမား အိုဘလက်ခ်ဟာ ဒီပွဲရဲ့ အကောင်းဆုံး ကစားသမားဆုကို ရရှိခဲ့ပါတယ်။
အသလက်တီကိုအသင်းဟာ ၂၀၁၆ ချန်ပီယံလိဂ် ဗိုလ်လုပွဲမှာ ရီးရယ်လ်အသင်းကို ပင်နယ်တီအဆုံးအဖြတ်နဲ့ အရေးနိမ့်ခဲ့တာကြောင့် ဆီမြွန်နီဟာ ပင်နယ်တီ အဆုံးအဖြတ်ကို မကြည့်နိုင်ခဲ့တာပါ။
ဆီမြွန်နီဟာ ဒီပွဲမှာ အရေးနိမ့်ခဲ့တဲ့ အင်တာမီလန်အသင်းကို ဥရောပရဲ့ အကောင်းဆုံးအသင်းတွေထဲက တစ်သင်းအဖြစ် ချီးကျူးခဲ့ပါတယ်။
ဆီမြွန်နီက “သူတို့ဟာ မယုံနိုင်စရာကောင်းတဲ့ အသင်းပါ။ အလွန်ကောင်းမွန်စွာ ကစားနိုင်ပြီး လျင်မြန်သလို ရှေ့တန်းကလည်း အလုပ်ကို ကြိုးစားပါတယ်။ ကျနော်တို့ရဲ့ နောက်ခံလူတွေက အလွန်ကောင်းမွန်တဲ့ ပွဲကို ကစားနိုင်ခဲ့ပါတယ်။ ကျနော်တို့ဟာ ဒီပွဲမှာ လုပ်ဆောင်ခဲ့တဲ့ အရာတွေကို ဆက်ပြီးထိန်းသိမ်းသွားမယ်”လို့ ပြောခဲ့တာပါ။
အသလက်တီကိုအသင်းဟာ ဒီတစ်ပတ် လာလီဂါပွဲစဉ်အဖြစ် ဘာစီလိုနာအသင်းနဲ့ ယှဉ်ပြိုင်ရမှာဖြစ်ပါတယ်။
Source: ESPN
