- By CNI
- Category: စီးပွားရေး
- Hits: 991
CNI News
၂၀၂၂ ခုနှစ်၊ ဇွန်လ ၉
မြန်မာနိုင်ငံ၏ ဆန်စပါးထွက်ရှိမှု အများဆုံးဒေသဖြစ်သည့် ဧရာဝတီတိုင်းဒေသကြီး၌ စက်သုံးဆီဈေးနှုန်း မြင့်တက်နေမှု ကြောင့် လယ်ယာလုပ်ငန်းခွင်များမှာ နွားများကို ယခင်နှစ်များထက် လက်ရှိတွင် ပိုမိုအသုံးပြုလာနေသည်ဟု တောင်သူများ ထံမှ သိရသည်။
ယခင်က စက်ကိရိယာများဖြင့် လုပ်ဆောင်ခဲ့သော်လည်း ယခုတွင် စက်သုံးဆီ ဈေးနှုန်းမြင့်တက်၍ ကုန်ကျစရိတ်များ သက်သာစေရန်အတွက် မိရိုးဖလာ လုပ်ငန်းစဉ်အတိုင်း နွားများကို ပြန်လည် အသုံးပြုလာကြောင်း၊ ထိုသို့ နွားများ အသုံးပြု၍ လယ်ယာလုပ်ငန်း လုပ်ကိုင်သည့်အခါ လုပ်ငန်းကြန့်ကြာမှုများ ဖြစ်ပေါ်နိုင်ပြီး အထွက်နှုန်းကိုလည်း ထိခိုက်နိုင်ကြောင်း တောင်သူတစ်ဦးဖြစ်သူ ဦးကြည်အောင်မင်း CNI သတင်းဌာနသို့ ပြောသည်။
ဦးကြည်အောင်မင်းက “လောလောဆယ် တောင်သူတွေက ဒီနှစ်အဖို့မှာတော့ စိုက်မယ့်ဟာက သွင်းအားစုတွေက များတယ် လေ။ သွင်းအားစုတွေက များတော့ တချို့တဝက်ဆိုရင် နွားတွေနဲ့ လုပ်တဲ့အပိုင်းတွေ ပါလာပြီ စက်သုံးဆီဈေး မြင့်တက်မှု ကြောင့် နွားတွေနဲ့ လုပ်လာတာတွေ။ အဲတော့ အချိန်တွေက ကြန့်ကြာမှု ဖြစ်လာမယ်။ အဲတော့ နောက်ပိုင်း ဘာဖြစ်လာမယ် ဆိုတော့ သီးမယ့်အချိန်မှာ မသီးဘဲနဲ့ ကြန့်ကြာမှုတွေ ဖြစ်လာလို့ရှိရင် အထွက်နှုန်းတွေ အပေါ်မှာပါ ထိခိုက်မှာပေါ့။ အဲလိုမျိုး မဖြစ်အောင်က စက်ပစ္စည်းတွေ ရင်းနှီးပြီးတော့ ချပေးမယ့် အနေအထားမျိုး ရရင်တော့ ပိုပြီးတော့ တောင်သူတွေအတွက်ကို ပိုပြီး အကျိုးအမြတ် ရှိလာမယ်လို့ မြင်တယ်” ပြောသည်။
တိုးတက်လာသည့် ခေတ်စနစ်ကြောင့် နွားများကို လယ်ယာလုပ်ငန်းခွင်များ၌ အသုံးပြုမှု နည်းပါးနေပြီ ဖြစ်သော်လည်း လက်ရှိ မြန်မာနိုင်ငံတွင် စက်သုံးဆီဈေးနှုန်းများ မြင့်တက်နေခြင်းကြောင့် လယ်ယာလုပ်ငန်းခွင်တွင် စက်ကိရိယာများ သုံးစွဲ ၍ ထွန်ယက်ခြင်းအစား တောင်သူများသည် နွားများအား ပိုမိုအသုံးပြုလာကြသည်။
လက်ရှိ ဖြစ်ပေါ်နေသော စက်သုံးဆီဈေးနှုန်းနှင့် သွင်းအားစုစရိတ် မြင့်တက်နေမှုကြောင့် လယ်ယာလုပ်ငန်း လုပ်ကိုင်သူများ အနေဖြင့် ကုန်ကျမှုစရိတ်များ ယခင်ကထက် အဆမတန် ပိုမိုကုန်ကျလာမည် ဖြစ်ကြောင်း ပြောင်းစိုက်တောင်သူ တစ်ဦးဖြစ် သူ ကိုမင်းခိုင်က CNI သတင်းဌာနသို့ ပြောသည်။
ကိုမင်းခိုင်က “ဒီနှစ်ဆိုရင်တော့ ကုန်ကျစရိတ်တွေက ပိုပြီးတော့ တက်လာမှာပဲလေ။ ဆီဈေးတွေ ဒီလိုတက်ပုံနဲ့ဆိုရင်။ ပထမ နှစ်တွေတုန်းက ကုန်ကျစရိတ်က အစားစားပေါ့လေ၊ မြို့နယ်အလိုက်ကို စိုက်ပုံချင်း မတူကြဘူး။ ပုံမှန်အားဖြင့်တော့ တစ်ဧက ကို ဒီလိုစက်သုံးဆီ ပုံစံမျိုးနဲ့ဆိုရင် အနိမ့်ဆုံး ၃/၄ သိန်းကတော့ တစ်ဧကကို ပိုပိုပြီးတော့ ကုန်ကျမှု ရှိသွားပြီ” ဟု ပြောသည်။
လက်ရှိတွင် ဧရာဝတီတိုင်းဒေသကြီး၌ တိုင်းဒေသကြီး တစ်ဝက်နီးပါးလောက်မှာ လယ်ယာလုပ်ငန်းခွင်တွင် နွားများကို ပြန် လည် အသုံးပြုနေကြကြောင်း၊ အများဆုံး အသုံးပြုသည့် မြို့နယ်များမှာ ဇလွန်မြို့နယ်၊ ဟင်္သာတမြို့နယ်၊ ဓနုဖြူမြို့နယ်၊ ညောင်တုန်းမြို့နယ် တို့ဖြစ်သည်။
အလားတူ ရခိုင်ပြည်နယ်တွင်လည်း လယ်ယာစိုက်ပျိုးရေး လုပ်ငန်းများတွင် နွားများကို ပြန်လည် အသုံးပြုလာနေခြင်း ကြောင့် နွားဈေးကွက် အားကောင်းလာနေကြောင်း သိရသည်။
- By CNI
- Category: စီးပွားရေး
- Hits: 617
CNI News
၂၀၂၂ ခုနှစ်၊ ဇွန်လ ၈
စစ်ကိုင်းတိုင်းဒေသကြီး၊ နာဂကိုယ်ပိုင်အုပ်ချုပ်ခွင့်ရဒေသအတွင်းရှိ အိန္ဒိယ-နာဂဒေသ ပန်ဆောင်မြို့ နယ်စပ်ဂိတ်ကို ပြန်ဖွင့် ပေးရန် ဒေသခံများက လိုလားနေကြောင်း သိရသည်။
အဆိုပါ ပန်ဆောင်(နာဂ)-နန်ပေါင်(အိန္ဒိယ)ဂိတ်မှာ ယခင် ကိုဗစ်-၁၉ ပထမလှိုင်းကတည်းက ပိတ်ထားကြောင်း၊ ထို နယ်စပ် ဂိတ် ပြန်ဖွင့်ပေးပါက ကုန်ဈေးနှုန်း မြင့်မားနေမှုများ အဆင်ပြေသွားမည်ဖြစ်ကြောင်း ပန်ဆောင် ဒေသခံတစ်ဦးဖြစ်သူ ဒေါ်ဒေါင်းနှင်းက CNI သတင်းဌာနသို့ ပြောသည်။
ဒေါ်ဒေါင်းနှင်းက “နယ်စပ်ဂိတ်လေးကိုတော့ ဖွင့်စေချင်တာပေါ့ နှစ်ဦးနှစ်ဖက်။ ဒီဂိတ်လည်း ဖွင့်လိုက်ခြင်းအားဖြင့် ပြည်သူ တွေလည်း ဒီဒေသထွက်တဲ့ ဂျင်းလေး၊ ဘာလေး ရောင်းလို့ရတယ်၊ သူတို့ဆီက ဆန်၊ ဆီ၊ ဆားလေး ဝယ်စားလို့ရတယ်၊ အဲဒီလို ဆိုရင်တော့ ပြည်သူတွေက အသက်ရှု ချောင်ချိတာပေါ့၊ ပြည်သူတွေ အများစိုက်တဲ့ ဂျင်းတို့ အဲဒါတွေက အိန္ဒိယကပဲ ဝယ်ပေး တာဆိုတော့ အိန္ဒိယ ဒီနယ်စပ်ဂိတ်လေး ဖွင့်ပေးလို့ရှိရင်တော့ သူတို့တွေ ဒီလိုလေးတွေ ကုန်စည် ဖလှယ်မှုတွေ ဖြစ်ပြီးမှ စား ဝတ် နေရေး နည်းနည်းပါးပါး၊ အများကြီး အထောက်အကူ မပြုရင်လည်း မိသားစု ဝမ်းစာရေး အတွက်တော့ အဆင်ပြေမယ် လို့ မျှော်လင့်တယ်လေ၊ အဲဒီလိုဆိုတော့ နယ်စပ်ဂိတ်လေးကိုတော့ ဖွင့်စေချင်တယ်” ဟု ပြောသည်။
ပန်ဆောင်မြို့တွင် ဒေသထွက်ဆန် တစ်အိတ်လျှင် ယခင်က ၄၅၀၀၀ သာရှိသော်လည်း ယခုအခါမှာတော့ ၅၅၀၀၀ ကျပ် ဈေးတက်ခဲ့သလို၊ ဓာတ်ဆီ တစ်ဂါလံ (၄ လီတာ)ကို ၁၈၀၀၀ ကျပ်ရှိကြောင်း ၎င်းက ပြောသည်။
လက်ရှိတွင် နန်ပေါင်(အိန္ဒိယ)-ပန်ဆောင်(နာဂ) နယ်စပ်ဂိတ် ပိတ်ထားသည့်အတွက် စားသောက်ကုန်များကို ရှင်ဗွေယန်၊ တနိုင်းမှ တဆင့် ဝယ်ယူရကြောင်း၊ ထို့ကြောင့် ကုန်ဈေးနှုန်းများ မြင့်တက်လျက်ရှိကြောင်း သိရသည်။
ပန်ဆောင်မြို့က ကိုယ်ထူကိုယ်ထဈေး
ယခင်နှစ်က ပန်ဆောင်တွင် မိုးခေါင်၍ စပါးစိုက်ပျိုးမှု လျော့ကျခဲ့ကြောင်း၊ လက်ရှိ မိုးတွင်းကာလ ရောက်ရှိလာသည့်အတွက် လမ်းပန်းဆက်သွယ်ရေးမှာ တောင်ပြိုကျမှုများ ရှိနေကြောင်း နာဂရိုးရာ ယဉ်ကျေးမှုကော်မတီမှ အတွင်းရေးမှူး ဦးကျော်ဆိုက်က CNI သတင်းဌာနသို့ ပြောသည်။
ဦးကျော်ဆိုက်က “ ကျနော့် အနေနဲ့ကြတော့ အထူးသဖြင့် ကျနော်တို့ ဒေသရဲ့ အခြေအနေကတော့ ဒီကုန်ဈေးနှုန်းကြီးတဲ့ အတွက်ကြောင့်မို့ ကျနော်တို့ ဒေသရဲ့ အခြေအနေနဲ့ စီးပွားရေးက အစပေါ့နော်၊ လူမှုစီးပွားရေးကနေ ငွေရေးကြေးရေး ရှာတဲ့ နေရာလည်း မရှိဘူး။ ကုန်ဈေးနှုန်းတွေ မြင့်တက်လာတယ်၊ လမ်းပန်းဆက်သွယ်ရေး ခက်ခဲလာတယ်ဆိုတော့ ကျနော့် ဒေသ အတွက်တော့ တော်တော်လေးတော့ အခက်အခဲဖြစ်နေတဲ့ အတွက်ကြောင့်မို့ ဆန်ရေစပါးကလည်း မနှစ်က ပြတ်သွားတဲ့ အတွက်ကြောင့်မို့ အဲဒီမှာ အခက်အခဲတွေ ပိုများလာတာပေါ့လေ၊ နယ်စပ်ဈေးတွေပေါ့၊ အထူးသဖြင့် ကျနော်တို့ ဖြစ်ချင်တာ တော့ နယ်စပ်ဂိတ်တွေ ဖွင့်ပေးနိုင်ရင်တော့ တစ်ဖက်တစ်လမ်းကနေ လူထုအတွက် စားဝတ်နေရေး ကာဗာတစ်ခု ဖြစ်တာ ပေါ့” ဟု ပြောသည်။
ပန်ဆောင်မြို့သည် အိန္ဒိယနယ်စပ် မြန်မာနိုင်ငံ၏ နာဂကိုယ်ပိုင်အုပ်ချုပ်ခွင့်ရဒေသတွင် တည်ရှိသည်။
ထိုဒေသသည် လမ်းပန်းဆက်သွယ်ရေး ခက်ခဲခြင်းကြောင့် မြန်မာပြည်တွင်းမှ စားသုံးကုန်များ၊ လူသုံးကုန်များ တင်သွင်းရာ၌ ကုန်ကျစရိတ် မြင့်မားလေ့ရှိကြောင်း သိရသည်။
- By CNI
- Category: စီးပွားရေး
- Hits: 643
CNI News
၂၀၂၂ ခုနှစ်၊ ဇွန် ၈
မြန်မာနိုင်ငံ၏ တိုင်းနှင့်ပြည်နယ်အသီးသီးရှိ ကမ်းဝေးငါးဖမ်းလုပ်ငန်းများသည် စက်သုံးဆီဈေးနှုန်း မြင့်တက်နေမှုကြောင့် လုပ်ဆောင်နိုင်ခြင်းမရှိဘဲ ရပ်နားထားရခြင်းများ ဖြစ်ပေါ်နေကြောင်း ငါးဖမ်းလုပ်ငန်း လုပ်ကိုင်သူများထံမှ သိရသည်။
ရခိုင်ပြည်နယ်ရှိ ကမ်းဝေးငါးဖမ်းလုပ်ငန်းများသည်လည်း စက်သုံးဆီဈေးနှုန်း မြင့်တက်မှုကြောင့် အလုပ်သမားကြေးများ ပေးဆောင်ရန် မတတ်နိုင်သည့်အတွက် လုပ်ငန်းများ ရပ်နားထားရသည်မှာ ၇၀ ရာခိုင်နှုန်းခန့် ရှိကြောင်း ငါးလုပ်ငန်း လုပ်ကိုင်သူ ဦးခင်အေးမောင် CNI သတင်းဌာနသို့ ပြောသည်။
ဦးခင်မောင်အေးက “ဈေးတအားများနေတော့ ပင်လယ်ထဲမှာ ငါးဖမ်းတဲ့သူတွေက ငါးဖမ်းထွက် မရဘူးပေါ့။ ငါးဖမ်းလုပ်တဲ့ ဟာက ဟိုတုန်းကလိုမျိုး ငါးဈေးကလည်း မတက်ဘူး။ ဒီဘက်က ဆီဈေးကလည်း တက်နေတော့ ငါးတစ်နေ့ သွားဖမ်းတာ အဆင်မပြေဘူးဆိုတော့ အလုပ်တွေက ရာခိုင်နှုန်း အားဖြင့် ၃၀ ရာခိုင်နှုန်းလောက်ပဲ လုပ်တော့တယ်။ ကျန်တဲ့သူတွေက အကုန်လုံး ဖြစ်သလို လုပ်နေကြတာပေါ့။ အဆင်မပြေဘူးပေါ့” ဟု ပြောသည်။
ယခင်က ငါးမဖမ်းရ ရာသီကို ဧပြီလ၊ မေလ၊ ဇွန်လ ဟူ၍ သတ်မှတ်ထားသော်လည်း လက်ရှိတွင် ဇွန်လမှစတင်၍ ငါးဖမ်းခွင့် ကို ငါးဖမ်းလုပ်ငန်းဦးစီးဌာနမှ ခွင့်ပြုထားကြောင်း သိရသည်။
သို့သော် စက်သုံးဆီ ဈေးနှုန်းများသည် ရန်ကုန်တိုင်းဒေသကြီးမှလွဲ၍ ကျန် တိုင်းဒေသကြီးနှင့် ပြည်နယ် တချို့တွင် ၂၅၀၀ မှ ၃၀၀၀ ကြား ဝယ်ယူနေရသည့်အတွက် ငါးဖမ်း တစ်ခါထွက်သည့်အခါ စက်သုံးဆီဖိုး ၃၀၀၀၀၀(သုံးသိန်း)နီးပါး ကုန်ကျသော် လည်း ၃၀၀၀၀၀(သုံးသိန်း) ပြန်မရရှိခြင်းကြောင့် လုပ်ကိုင်မည့်သူ မရှိတော့ကြောင်း ဦးခင်အေးမောင်က ပြောသည်။
ငါးဖမ်းလုပ်ငန်း တစ်ခုကိုတွေ့ရ
၎င်းက “ဘယ်လိုလုပ် သွားနိုင်မှာလဲ။ ဆီ လီတာ ၁၀၀ ကုန်တာ။ တစ်နေ့သွားလိုက်ရင် တစ်နေ့ ၂ သိန်း၊ ၃ သိန်းဖိုး နုတ်လိုက် ရင် ပိုက်ဆံက ၂ သိန်း ၃ သိန်းဖိုး မရဘူး။ အလုပ်သမားဖိုး ရှိသေးတယ်။ စားဖို့ ရှိသေးတယ်။ ပိုက်ဖမ်းတဲ့ အခြေအနေပေါ်မှာ ပိုက်တွေရဲ့ တန်ဖိုး ရှိသေးတယ်။ အလုပ်က ဘယ်လိုပြောရမလဲ ရှေ့ဆက်ပြီး ဒီအတိုင်းသွားရင် အခြေအနေက ဘယ်လိုမှ မကောင်းဘူး။ လူလည်း မရှိတော့ဘူး။ နောက် အလုပ်ကောင်း လာမယ်ဆိုရင် လုပ်မယ့်လူလည်း မရှိတော့ဘူး ရခိုင်မှာ” ဟု CNI သတင်းဌာနသို့ ပြောသည်။
လက်ရှိတွင် ငါးဖမ်းလုပ်ငန်း အများအပြား ရပ်နားလာမှုသည် မြန်မာနိုင်ငံ၏ ကမ်းရိုးတမ်းဒေသ တစ်လျှောက်ရှိ ရခိုင်ပြည်နယ်၊ မွန်ပြည်နယ်၊ ဧရာဝတီတိုင်းဒေသကြီးနှင့် တနင်္သာရီတိုင်းဒေသကြီးတို့တွင် ဖြစ်ပေါ်လျက် ရှိသည်။
မွန်ပြည်နယ်တွင် စက်သုံးဆီ ဝယ်ယူရ ခက်ခဲခြင်းနှင့် ဈေးနှုန်း မြင့်တက်နေမှုကြောင့် ငါးဖမ်းလုပ်ငန်း လုပ်ကိုင်မှုများ ရပ်နား လာကြသလို လုပ်ကိုင်သူ အနည်းငယ်သာ ရှိတော့ကြောင်း သိရသည်။
စက်သုံးဆီ ဈေးနှုန်း မြင့်တက်သော်လည်း ငါးဈေးနှုန်း မြင့်တက်လာခြင်း မရှိကြောင်း၊ အလုပ်သမား စရိတ်များလည်း မြင့် တက်နေကြောင့် ရပ်နားထားရကြောင်း မွန်ပြည်နယ်၊ သံဖြူဇရပ် ငါးလုပ်ငန်းရှင်အသင်း ဥက္ကဋ္ဌ ဦးခင်ဝင်းက CNI သတင်းဌာန သို့ ပြောသည်။
ဦးခင်ဝင်းက “ဦးလေးလည်း ရပ်ထားရတာပဲ။ အခြေအနေ မကောင်းဘူး။ ငါးဈေးက မတက်ဘူးလေ။ ဆီဈေးပဲ တက်တယ်။ အလုပ်သမားခလည်း ဈေးတက်တယ်ဆိုတော့ အဲဒါကြောင့် ရပ်ထားတာပါ” ဟု ပြောသည်။
တခြားတစ်ဖက်မှာတော့ စက်သုံးဆီဈေး မြင့်တက်မှုကြောင့် ငါးဖမ်းလုပ်ငန်းများ လုပ်ကိုင်၍ မရခြင်းကြောင့် ဒေသခံပြည်သူ အများအပြား အလုပ်အကိုင် အခွင့်အလမ်း နည်းပါးသွားကြောင်း၊ ထို့နောက် ပြည်ပသို့ အလုပ်သွားရောက် လုပ်ကိုင်မှုများ နေ့စဉ်နှင့်အမျှ ရှိလာနေကြောင်း၊ ပြည်တွင်း လုပ်သား အရင်းအမြစ် အားနည်းလာကြောင်း သိရသည်။
- By CNI
- Category: စီးပွားရေး
- Hits: 802
CNI News
၂၀၂၂ ခုနှစ်၊ ဇွန်လ ၈
ကြက်သွန်စိုက်တောင်သူများသည် ယခုနှစ် နွေကြက်သွန်အား ဧက လျှော့စိုက်ခဲ့ကြသည့်အတွက် အထွက်နှုန်း နည်းသည့်အပြင် ပြည်ပသို့ တင်ပို့ခြင်းများလည်းရှိသဖြင့် ပြည်တွင်းတွင် လက်ကျန်နည်းကာ တစ်ပိဿာ လျှင် ကျပ် ၁၆၀၀ ဝန်းကျင်အထိ ဈေးနှုန်းမြင့်တက်နေသည်။
ကြက်သွန်သည် ဟင်းချက်ရာတွင် မပါမဖြစ် အသုံးပြုရသည့်အတွက် ယခုကဲ့သို့ တစ်ပိဿာ ကျပ် ၁၀၀၀ ကျော် အထိ ဈေးနှုန်းမြင့်တက်မှုသည် အခြေခံလူတန်းစားများအတွက် အခက်အခဲဖြစ်ကြောင်း အိမ်ထောင်ရှင်မတစ်ဦး ဖြစ်သည့် မပြည့်က CNI သတင်းဌာနသို့ ပြောသည်။
“ကြက်သွန်ဈေးတက်တော့လည်း ဟင်းက ချက်ရတာ အဆင်မပြေဘူးပေါ့။ အဲဒီကုန်ကျတဲ့ ပိုက်ဆံက တခြား တစ်ခု ဝယ်လို့ရတယ်လေ။ အရင်တုန်းက အမယ် နှစ်မျိုး ဝယ်လို့ရရင် အခု တစ်မျိုးပဲဝယ်လို့ရတယ်။ ချွေတာရတာ ပေါ့။ အဲဒီလိုလျှော့သုံးရတာပေါ့။ ခါတိုင်းဆို ကြက်သွန် ဟင်းတစ်ခွက်မှာ ၄၊ ၅ လုံး ထည့်ရတဲ့နေရာမှာဆို ၃ လုံး လောက်ပဲထည့်ရတာတို့ အဲဒီလိုမျိုး လျှော့ရတာပေါ့။ အကုန်လုံးကတော့ အစစ အရာရာ လျှော့ရတာပေါ့။ အရင်တုန်းကဆို တစ်ပိဿာ ၁၀၀၀ ဆို တစ်ပိဿာလောက်ဝယ်လို့ရတယ်။ အရင်က တစ်ပိဿာ ဝယ်တဲ့အစား အခုဆို ၅၀ သားလောက်ပဲဝယ်ရတာပေါ့။ လျှော့ပြီးတော့ ဝယ်ရတာပေါ့ အရင်ထက်။ ကြက်သွန်ဈေးတစ်ခုတည်း တက်တာမဟုတ်ဘူးလေ။ အကုန်လုံးက ကုန်ဈေးနှုန်းက တက်နေတော့ ခါတိုင်း တစ်နေ့ စရိတ်ကို ၅၀၀၀ ဆိုရင် အခုက တစ်နေ့ ၇၀၀၀ လောက်ဖြစ်သွားတာလေ။ ဈေးတွေက မကတော့လေ”ဟု ၎င်းက ပြောသည်။
ပြီးခဲ့သည့်နှစ်က ကြက်သွန်စိုက်တောင်သူနှင့် ကုန်သည်တို့ အများအပြားအရှုံးပေါ်ခဲ့ပြီး သွင်းအားစုနှင့် စက်သုံးဆီ ဈေးတို့ အဆမတန် မြင့်တက်မှုကြောင့် ယခုနှစ်တွင် ဧကလျှော့ပေါ့ စိုက်ပျိုးခဲ့ကြခြင်းဖြစ်သည်။
တောင်သူများမှ ရောင်းချသည်ဈေးနှုန်းသည် တစ်ပိဿာ ၁၀၀၀ ဝန်းကျင်နှုန်းထားဖြစ်သဖြင့် ပြည်တွင်းဈေးကွက် တွင် ကြက်သွန်တစ်ပိဿာလျှင် နယ်မြေဒေသပေါ်မူတည်က ကျပ်ငွေ ၁၀၀၀ မှ ၁၆၀၀ ဝန်းကျင်အထိ ပေါက်ဈေး ရှိနေခြင်းဖြစ်သည်။
ကြက်သွန်အပါအဝင် အခြားကုန်ဈေးနှုန်းများမှာ နေ့စဉ်နှင့်အမျှ တက်နေသော်လည်း စားသုံးသူများအား ပြန် ကြည့်နေရသဖြင့် ဈေးမတက်သေးကြောင်း ဂုံးခေါက်ဆွဲရောင်းချနေတဲ့ ကိုချမ်းမြေ့က CNI သတင်းဌာနသို့ ပြောသည်။
“ဈေးတက်တာကတော့ နည်းနည်းတော့ အခက်တွေ့တာပေါ့။ ဒီကြက်သွန်မှမဟုတ်ဘူး တခြားကုန်ပစ္စည်း ကလည်း နေ့စဉ်နဲ့အမျှ တက်နေတာ။ ကျနော်တို့ဆိုရင် စရောင်းလာကတည်းက ဈေးက ဒီအတိုင်းပဲ။ ဒါပေမယ့် ထပ်ပြီးတော့ တက်လိုက်လို့မရဘူး။ သူတို့အတွက်က ဈေးတက်ပေမယ့် အကိုတို့ဘက်က တက်လို့မရတော့ အကို တို့အတွက်က ဒီကာလ နည်းနည်းတော့ ခက်ခဲတာပေါ့။ လောလောဆယ်တော့ ဈေးတက်ဖို့မရှိသေးဘူး။ အကို ဈေးနှုန်းပြောင်းထားလည်းမကြာသေးဘူးဆိုတော့။ ပြီးခဲ့တဲ့လလောက်ကမှ နေရာပြောင်းဘာညာဆိုတော့ ပုံမှန် ထက် ဈေးနည်းနည်းလေးတက်ထားတာရှိတယ်ဆိုတော့။ အခုကုန်ဈေးနှုန်းတက်ပေမယ့်လည်း ထပ်ပြီးတက်ဖို့ မရှိသေးဘူး။ ဘာလို့ဆို စားသုံးသူတွေကိုနည်းနည်း ပြန်ပြီးကြည့်ပေးတဲ့သဘောပေါ့”ဟု ပြောသည်။
ယခုနှစ်၏ နွေကြက်သွန်ဈေးနှုန်းသည် အခြေခံလူတန်းစားများအတွက် အဆင်မပြေသော်လည်း တောင်သူနှင့် ကုန်သည်များအတွက် အဆင်ပြေကြောင်း ပွဲရုံကုန်သည်များနှင့် တောင်သူများထံက သိရသည်။
ကြက်သွန်ကုန်သည်တစ်ဦးဖြစ်သည့် ကိုသက်ဖြိုးက“ပြည်တွင်းဈေးအရမ်းကောင်းနေတဲ့အနေအထားပဲ။ ၆ လပိုင်း ဆိုရင် ခါတိုင်းတုန်းက ဖြစ်မှ ၇၀၀၊ ၈၀၀ ပေါ့လေ။ အခုချိန်မှာ တောင်သူရောင်းဈေးကိုက ၁၀၀၀၊ ၁၁၀၀၊ ၁၂၀၀ ပေါ့။ တောင်သူတွေရဲ့ရောင်းဈေးကိုက အဲဒီလောက်ရှိနေတာ။ ဒီနှစ်ကတော့ အကျိုးရှိပါတယ်။ အကျိုးရှိပါတယ် ဆိုပေမယ့် ဒီဟာက ဈေးနှုန်းတစ်ခုသာ မြင့်လာတာလေ။ ကုန်ကျစရိတ်မြင့်တာတွေလည်း ရှိသေးတာပေါ့။ ဒီဘက် ဓာတ်မြေဩဇာတို့ နောက်ပြီးတော့ အကုန်လုံးပေါ့ အစစ အရာရာ ကုန်ဈေးနှုန်းတက်တာနဲ့ဆိုရင် ဒါကြီးက တောင်သူတွေအတွက် အရမ်းကြီးအကျိုးရှိပါတယ်လို့တော့ ပြောလို့မရဘူး။ ဒီဈေးကလည်း အဆင်ပြေတဲ့ အနေအထားမှာပဲ ရှိပါသေးတယ်” ဟု ပြောသည်။
ယခုကဲ့သို့နှုန်းထားအရ တောင်သူများအတွက် အကျိုးအမြတ်ရှိမည်ဆိုပါက မိုးကြက်သွန်စိုက်ပျိုးမှုတွင် စိုက်ပျိုးမှု နှုန်း များပြားလာနိုင်ကြောင်း ကုန်သည်များက သုံးသပ်သည်။
ကြက်သွန်များအား ဘင်္ဂလားဒေ့ရှ်၊ တရုတ်၊ အိန္ဒိယ၊ ထိုင်းနှင့် မလေးရှား နိုင်ငံများသို့ တင်ပို့ရောင်းချနေခြင်းဖြစ်ပြီး ယခုနှစ်တွင် ဘင်္ဂလားဒေ့ရှ်မှ ဝယ်ယူမှု နည်းကြောင်း သိရသည်။
- By CNI
- Category: စီးပွားရေး
- Hits: 622
CNI News
၂၀၂၂ ခုနှစ်၊ ဇွန်လ ၇
ရခိုင်ပြည်နယ်သို့ စက်သုံးဆီ ခွဲတမ်းရရှိမှု လျော့နည်းသွားခြင်းကြောင့် လိုသလောက် မရောင်းချပေးနိုင်သည့် အခြေအနေ ဖြစ်ပေါ်နေကြောင်း ရခိုင်ပြည်နယ်ရှိ စက်သုံးဆီ အရောင်းဆိုင်များထံမှ သိရသည်။
ယခင်က စက်သုံးဆီများကို လိုသလောက် ဝယ်ယူ၍ ရသော်လည်း လက်ရှိတွင် စက်သုံးဆီ ဝယ်ယူရာ၌ လိုအပ်သည့် ပမာဏအား တင်ပြရကြောင်း၊ လိုအပ်သလောက် ဝယ်ယူ၍မရဘဲ ခွဲတမ်းရရှိမှု လျော့ကျသွားခြင်းကြောင့် ပြန်လည် ရောင်းချရာတွင် လိုအပ်သလောက် ရောင်းချမပေးနိုင်သည့် အခြေအနေ ဖြစ်နေကြောင်း တောင်ကုတ်မြို့နယ်မှ စက်သုံးဆီဆိုင်ပိုင်ရှင် တစ်ဦး က CNI သတင်းဌာနသို့ ပြောသည်။
၎င်းက “၁ လမှာ ကိုယ်ရောင်းတဲ့အားကို တင်ပြလို့ရှိရင် ကိုယ်လိုချင်တဲ့အားကို တင်ပြလို့ရှိရင် ၃ စီးလောက် လိုချင်ရင် ၂ စီး လောက်ပဲ ပေးတယ်ပေါ့။ အဲလိုပုံစံ လျှော့ချလိုက်တာပေါ့။ အခက်အခဲတော့ ဖြစ်တာပေါ့။ ကိုယ်ရောင်းချင်သလောက် ရောင်း လို့ မရတော့ဘူးလေ။ ဝယ်တဲ့သူကလည်း လယ်ထွန်မယ့် သူကလည်း ၁ ရာသီမှာ ဂါလံ ၅၀ ကုန်မယ်။ လာဝယ်တော့ သူ့ကို ဂါလံ ၅၀ မရောင်းနိုင်ဘူး။ ဂါလံ ၂၀ လောက်ပဲ ရောင်းနိုင်တယ်။ အဲလို အခက်အခဲ ဖြစ်ကုန်တာပေါ့” ဟု ပြောသည်။
စစ်တွေမြို့ ဆီဆိုင်ကြီးများတွင် ပရီမီယမ် ဒီဇယ်ဆီ တစ်လီတာကို ၂၆၈၀ ကျပ်၊ ဒီဇယ်ဆီ တစ်လီတာကို ၂၆၅၀ ကျပ်၊ အောက် တိန်း-95 တစ်လီတာကို ၂၄၂၀ ကျပ်၊ အောက်တိန်း-92 တစ်လီတာကို ၂၃၃၅ ကျပ် စသဖြင့် စျေးနှုန်းအသီး ရှိသည်။
ထို့နောက် မောင်တောမြို့နယ်ရှိ ဆီဆိုင်ကြီးများတွင် ဓာတ်ဆီ တစ်လီတာကို ၃၀၀၀ ကျပ် ပေးဝယ်နေရကြောင်း၊ လမ်းဘေး ဆိုင်များတွင် ၃၅၀၀ ကျပ်ခန့်အထိ မြင့်တက်လျက်ရှိကြောင်း သိရသည်။
စက်သုံးဆီ ဈေးနှုန်း မြင့်တက်မှုကြောင့်လည်း ရခိုင်ပြည်နယ်သည် ဘင်္ဂလားဒေ့ရှ်နိုင်ငံနှင့် ကုန်သွယ်မှု ပြုလုပ်ရာတွင် ချင့်ချိန် ၍ လုပ်ဆောင်နေရကြောင်း၊ အမြတ်အစွန်းရရှိမှု နည်းပါးသွားကြောင်း ရခိုင်ပြည်နယ် ကုန်သည်နှင့် စက်မှုအသင်းချုပ် အတွင်းရေးမှူး ဦးအောင်အောင်က CNI သတင်းဌာနသို့ ပြောသည်။
စက်သုံးဆီ အရောင်းဆိုင်
ဦးအောင်အောင်က “ဒီလိုမျိုး ဆီဈေးတွေ တက်လာတယ်။ ဆီပြတ်လပ်မှုတွေ ဖြစ်လာတဲ့အခါမှာ သယ်ယူပို့ဆောင်ရေး စရိတ် တွေက တက်လာပါတယ်။ တစ်ဖက်နိုင်ငံကို ကျနော်တို့ ကုန်တင်ပို့နေရတဲ့ နယ်စပ်ကုန်သွယ်ရေး လုပ်ငန်းတွေမှာလည်း သယ်ယူ ပို့ဆောင်ရေး စရိတ်တွေ မတည်ငြိမ်တဲ့ အတွက်ကြောင့် လုပ်ငန်းတွေ အနေနဲ့ တော်တော်လေး စဉ်းစားပြီးတော့ လုပ်နေရပါတယ်။ ကုန်ဈေးနှုန်း အခက်အခဲ ကနေပြီးတော့ မျှော်လင့်မထားတာတွေ ဖြစ်နေတဲ့ဟာမျိုးပေါ့နော်။ အဲဒါကြောင့် တော်တော်လေး ဂရုစိုက်ပြီးတော့ လုပ်ရပါမယ် အခုချိန်မှာ။ ရောင်းထားတဲ့ ပစ္စည်းကနေတဆင့် ပြင်ဆင်စရိတ် နှုတ်ပြီးတော့ ကျနော်တို့ အကျိုးအမြတ် မရှိတာတွေ၊ အမြတ်နည်းတာတွေ၊ ဆုံးရှုံးမှု ရှိတာတွေ ရှိကောင်း ရှိနိုင်တာပေါ့နော်” ဟု ပြောသည်။
စက်သုံးဆီ လိုသလောက် ဝယ်ယူ၍ မရသည့်အပြင် စက်သုံးဆီ ဆိုင်များသို့ လာရောက်သူ များပြားသောကြောင့် တန်းစီ စောင့်ဆိုင်း နေရခြင်း၊ စက်သုံးဆီ ဆိုင်တချို့တွင် ဆီအမျိုးအစား စုံလင်စွာ ရောင်းချမှုများ မရှိတော့ခြင်းနှင့် စက်သုံးဆီ ဈေး နှုန်း များသည်လည်း အလွန်မြင့်တက်နေကြောင်း ရခိုင်ပြည်နယ် ဒေသခံများထံမှ သိရသည်။
စစ်တွေဒေသခံ ကိုမိုးဇော်က “စက်သုံးဆီက အခုက ဈေးတွေ တအားမြင့်နေလို့။ ဝယ်ရမလွယ်ဘူး။ ဝယ်ရတာလည်း ခက် တယ်။ ဆိုင်ကယ်တွေတောင် တန်းစီရတယ် ဆိုင်ကယ်ဆီဖြည့်ဖို့ တစ်ခေါက်ဆိုရင်လေ။ ဆီဆိုင်တွေမှာ အကြာကြီးပဲ တန်းစီ ရတာ။ ကျနော်တို့ဆီမှာလည်း တစ်ခါတလေ ဒီဇယ်ပြတ်သွားတာ ရှိတယ်။ ဆီမရှိဘူးလို့ ပြောပဲ ပြောတယ်သူတို့က။ ဒီအတိုင် ဈေးတက်လာရင် ကျနော်တို့ မှာ ကုန်နဲ့ ဆန်ကားတွေ အဆင်ပြေမှာ မဟုတ်တော့ဘူးဗျ။ ကား ၃ စီးထွက်မယ့် နေရာမှာ ၁ စီး ပဲ ထွက်ရမှာ။ အဲဒါဆိုရင် အဆင်မပြေတော့ဘူး။ ကုန်စည်စီးဆင်းမှုလည်း အဆင်ပြေတော့မှာ မဟုတ်ဘူး” ဟု ပြောသည်။
ယခုအတိုင်း စက်သုံးဆီ ဝယ်ယူရ ခက်ခဲခြင်း၊ ဈေးနှုန်း တည်ငြိမ်မှု မရှိခြင်းများကို မြန်မာ့ရေနံနှင့် သဘာဝဓာတ်ငွေ့လုပ်ငန်းမှ ဖြေရှင်းပေးရန် လိုအပ်သလို စက်သုံးဆီ တင်သွင်းဖြန့်ဖြူး ရောင်းချသူများ အနေဖြင့်လည်း ထိန်းညှိပေးရန် လိုအပ်ကြောင်း၊ စက်သုံးဆီ ပြတ်လပ်မှု မဖြစ်ပေါ်ရေး ဆောင်ရွက်သင့်ကြောင်း လုပ်ငန်းရှင်များက လိုလားနေကြသည်။
စက်သုံးဆီ ဈေးနှုန်း မြင့်တက်ပြီး တည်ငြိမ်မှု မရှိခြင်းနှင့် လိုအပ်သလောက် ဝယ်ယူ၍ မရခြင်းများကြောင့် လုပ်ငန်း လည်ပတ်မှု နှောင့်နှေးခြင်းများ ရှိလာသကဲ့သို့ ရပ်နားထားရသည့် လုပ်ငန်းများ ရှိနေကြောင်းလည်း သိရသည်။
- By CNI
- Category: စီးပွားရေး
- Hits: 1156
CNI News
၂၀၂၂ ခုနှစ်၊ ဇွန်လ ၆
မြန်မာ - တရုတ် နယ်စပ်ကုန်သွယ်ရေးတွင် နှစ်ဖက်နိုင်ငံ ကုန်တင်ယာဉ်များကို မေလ ၁၆ ရက်နေ့မှ စတင်၍ ဝင်ထွက်ခွင့် ပြုလိုက်ခြင်းကြောင့် ခေါက်တိုကုန်တင်ယာဉ် ငှားရမ်းခများ ယခင်ကထက် အဆမတန် သက်သာလာကြောင်း မူဆယ် ကုန် သည်များထံမှ သိရသည်။
မြန်မာကုန်တင်ယာဉ်များ တရုတ်နိုင်ငံတွင်းသို့ ဝင်ရောက်ခွင့် မရရှိခင် အချိန်က ခေါက်တိုကုန်တင်ယာဉ် ငှားရမ်းခသည် တန် ၅၀ ဆံ့ တွဲကားတစ်စီးကို သိန်း ၁၀၀ နီးပါးဖြင့် ငှားရမ်းရကြောင်း၊ လက်ရှိ မြန်မာကုန်တင်ယာဉ်များ တရုတ်နိုင်ငံသို့ တိုက်ရိုက် ဝင်ရောက်ခွင့် ရရှိသွားသည့်အတွက် ငှားရမ်းခ ၁၀ သိန်းသာ ပေးရတော့ကြောင်း မူဆယ်ဆန်စပါးကုန်စည်ဒိုင် ဒုတိယဥက္ကဋ္ဌ ဦးမင်းသိန်းက CNI သတင်းဌာနသို့ ပြောသည်။
ဦးမင်းသိန်းက “ မေလ ၁၆ ရက်နေ့မှာ မြန်မာကားတွေကို အစားထိုး ယာဉ်မောင်းစနစ်ကနေ တိုက်ရိုက် ဝင်ရောက်လို့ ရပြီးတဲ့ နောက်မှာ ခေါက်တိုကားခတွေက ဈေးတွေ ကျသွားတယ်။ မေလ ၁၆ ရက်နေ့ မတိုင်မီက ဆန်အိတ် ၁ ထောင် တန် ၅၀ တင် တဲ့ တွဲကားတစ်စီးကို ကားခ သိန်း ၁၀၀ လောက် ပေးရတယ် ဗမာငွေ။ အခုကျတော့ မေလ ၁၆ ရက်နေ့ နောက်ပိုင်းမှာ ယခင် သိန်း ၁၀၀ လောက် ပေးရတဲ့ ကားခက အခု ၁၀ သိန်းလောက်ပဲ တန်တယ်။ ကားခက သိသိသာသာ ကျသွားတယ်။ ဘာကြောင့်လဲ ဗမာကားတွေ တိုက်ရိုက် ဝင်ခွင့်ရတဲ့အတွက်။ တကယ်လို့များ ဗမာကားတွေက မိမိကားကို မိမိကိုယ်တိုင် မောင်း ပြီး ဝင်လို့ရမယ်ဆိုရင် ခေါက်တိုကားခလည်း ဒီထက် ပြန်ကျအုံးမယ်” ဟု ပြောသည်။
ခေါက်တိုကုန်တင်ယာဉ် ငှားရမ်းခ ဈေးနှုန်းများ ကျဆင်းသွားရခြင်းသည် မြန်မာကုန်တင်ယာဉ်များ တရုတ်နိုင်ငံသို့ တိုက်ရိုက်ဝင်ရောက်ခွင့် ရရှိသွားခြင်းနှင့် ယခုအချိန်သည် ကုန်ပစ္စည်းရှားပါးသည့် အချိန်ဖြစ်ခြင်းကြောင်းဟု သိရ သည်။
ယခင် သစ်သီးတင်ပို့မှု များပြားနေချိန် ကုန်တင်ယာဉ်များလည်း များပြားကာ အဆိုပါ အချိန်များတွင်မူ ကုန်တင် ယာဉ်ငှားရမ်းခများမှာ နှစ်နိုင်ငံအပြန်အလှန် ဈေးနှုန်းမြင့်တက်နေသော်လည်း လက်ရှိတွင် ကုန်စည် ရှားပါးခြင်း ကြောင့် ဈေးနှုန်း ကျဆင်းလာနေပြီဖြစ်သည်ဟု သစ်သီးကုန်ကားသမားတစ်ဦးဖြစ်သူ ကိုဆန်းဝင်းက CNI သတင်း ဌာနသို့ ပြောသည်။
“ကားခတွေကတော့ ကျသွားပြီ။ အဝင်လည်း ကျသွားပြီ။ အထွက်လည်း ကျသွားပြီ။ သစ်သီးရှားတဲ့အပေါ်မှာပဲ မူတည်တယ်။ အခုက သစ်သီးက ရှားသွားပြီလေ။ အရင်တုန်းက ဖရဲသီးတို့၊ သခွားမွှေးတို့ ဗမာကုန်သည်တွေက ဝင်ချင်တာများတော့ ကားခတွေ ဈေးတင်ပြီး ရတယ်။ အခုက ကျသလောက် ဖြစ်သွားပြီးတော့ တရုတ်ကားက ၈၅၀၀ (ယွမ်)၊ ၈၀၀၀၊ ၉၀၀၀ ပေါ့။ အရင်တုန်းက ၃ သောင်းခွဲလောက် ပေးရတာပေါ့။ ဟိုဘက်က အထွက်က အရင်တုန်းက ၃ သောင်းလောက် ပေးရတယ်။ အခုက ၆ ထောင်၊ ၅ ထောင် အမျိုးမျိုးပဲ” ဟု ပြောသည်။
ယခု ကုန်တင်ယာဉ် ငှားရမ်းခဈေးနှုန်းများ ကျဆင်းလာပြီဖြစ်သော်လည်း မူလပထမဈေးနှုန်း၊ ကိုဗစ် - ၁၉ ရောဂါ မဖြစ်ပွားမီဈေးနှုန်းနှင့် နယ်စပ်ကုန်သွယ်ရေးဂိတ်များ အားလုံး ဖွင့်လှစ်ထားသည့် အချိန်၏ဈေးနှုန်းသို့ ပြန်လည် မရောက်ရှိသေးကြောင်း ဦးမင်းသိန်းက ပြောသည်။
“မူလဈေးနှုန်းမှာ အမှန်မှာ သူက ဟိုဘက်နဲ့ ဒီဘက်က မိုင်က ၁ မိုင်လောက်ပဲ ဝေးတယ်။ ပုံမှန်ဟိုးအရင်တုန်းက ဈေး ကိုဗစ်မဖြစ်ခင်တုန်းက ဈေးဆိုရင်၊ ဂိတ်တွေ အားလုံးဖွင့်တုန်းက ဈေးဆိုရင် ၂ သိန်းလောက်ပဲ ရှိတယ်။ အရင်တုန်းက ဂိတ်က ၅ ဂိတ်ဖွင့်တယ်။ ၅ ဂိတ် ဖွင့်တုန်းကကျတော့ ကျင်စန်းကျော့ကနေ ဝမ်တိန်သွားရင် ခေါက်တိုခက ၂ သိန်းလောက်ပဲ ကုန်တယ်။ ကိုဗစ်ဖြစ်ပြီးတဲ့နောက်ပိုင်းမှာ ဂိတ်တွေ ပိတ်တယ်။ စည်းကမ်းချက် တွေ ထုတ်တယ်။ ဗမာကားတွေ မဝင်ရဘူး။ အစားထိုးယာဉ်မောင်းတွေနဲ့ သွားတဲ့နောက်ပိုင်းမှာ ကားခတွေ ဈေးတက်လာတာ” ဟု ပြောသည်။
ကိုဗစ်ရောဂါ အကြောင်းပြချက်ဖြင့် ၂၀၂၁ ခုနှစ် ဇူလိုင်လမှစတင်၍ မြန်မာ - တရုတ် ကုန်သွယ်ရေးတွင် အရေးပါသည့် ချင်းရွှေဟော်၊ နန်းတော်ဂိတ်၊ ဂျယ်ဂေါင်ဂိတ်၊ ဆင်ဖြူဂိတ်နှင့် မန့်ဝိန်းဂိတ်တို့ကို တရုတ်နိုင်ငံဘက်မှ ပိတ်ထားခဲ့ပြီး ကျင်စန်းကျော့ဂိတ်တစ်ခုတည်းကိုသာ ပြန်လည်ဖွင့်လှစ်ထားသည်။
- By CNI
- Category: စီးပွားရေး
- Hits: 571
CNI News
၂၀၂၂ ခုနှစ်၊ ဇွန်လ ၄
တရုတ်နိုင်ငံ၊ ကျယ်ဂေါင်ဘက်တွင် ပိတ်မိနေသည့် မြန်မာဘက်မှ ကုန်တင်ယာဉ်များနှင့် ကုန်ပစ္စည်းများအား မကြာခင်တွင် ပြန်ထုတ်ခွင့်ရတော့မည်ဖြစ်ကြောင်း မူဆယ်နယ်စပ်ကုန်သည်များထံက သိရသည်။
တွဲကားအစီးရေ ၆၀၀ နီးပါးခန့်သည် ကျယ်ဂေါင်ဘက်တွင် ကိုဗစ်ကြောင့် တစ်နှစ်ကျော်ကြာပိတ်မိနေပြီး ပြန်ထုတ်မရသည့်အတွက် အချို့ ကုန်ပစ္စည်းများမှာ ပျက်စီးသွားပြီဖြစ်ကြောင်း မူဆယ် ဆန်စပါးကုန်စည်ဒိုင် ဒုတိယဥက္ကဋ္ဌ ဦးမင်းသိန်းက CNI သတင်းဌာနသို့ ပြောသည်။
ဦးမင်းသိန်းက “ဒါတွေက ကြာလည်းကြာသွားပြီဆိုတော့ တချို့တွေဆို ပျက်စီးကုန်ပြီ။ အဲဒီတော့ နှစ်နိုင်ငံ တာဝန် ရှိပုဂ္ဂိုလ်တွေ တိုင်ပင်ဆွေးနွေးပြီးတော့ ဒီကုန်ပစ္စည်းတွေကို ကျယ်ဂေါင်ကနေပြီးတော့ ရွှေလီ၊ ကျယ်ဂေါင်နဲ့ မူဆယ်ဆိုတာ ခြံစည်းရိုးပဲခြားတယ်။ ဒါပေသိ ကျယ်ဂေါင်-မူဆယ် ဂိတ်ကို ပိတ်ထားတဲ့အတွက် ကျယ်ဂေါင်မှာ ပိတ်မိနေတဲ့ ကုန်ပစ္စည်းတွေကို ကျယ်ဂေါင်ကနေပြီးတော့ ရွှေလီသွားမယ်၊ ရွှေလီကနေပြီး ဝမ်တိန်ကို လာမယ်။ ဝမ်တိန်ကမှတဆင့် ကျင်စန်းကျော့ဂိတ်ကိုဖြတ်ပြီးတော့ ဗမာပြည်ထဲကို ပြန်ဝင်တဲ့အစီအစဉ် ဆောင်ရွက်နေပါ တယ်။ အခုတော့ စီစဉ်နေတာတော်တော်လေး အဆင်ပြေနေပါပြီ။ လိုအပ်တဲ့ကိစ္စတွေ အနည်းအကျဉ်းပြီးရင်တော့ ဒီပစ္စည်းတွေ ထုတ်လို့ရပါပြီ။ လောလောဆယ်မပြီးပြတ်သေးဘူးဆိုတာက ဂျူတီကိစ္စတွေ မပြီးပြတ်သေးလို့။ ဂျူတီကိစ္စတွေ ပြီးပြတ်ပြီးရင်တော့ ဒီပစ္စည်းတွေ ထုတ်လို့ရပါပြီ” ဟုပြောသည်။
ထိုပစ္စည်းများမှာ ဆောက်လုပ်ရေး၊ ဆေးဝါး၊ စားကုန်သောက်ကုန်၊ လျှပ်စစ်၊ စက်ပစ္စည်းတို့ဖြစ်ပြီး ယခုကဲ့သို့ လမ်းကြောင်း ၃ ခုမှ ပြန်ထုတ်ရမည်ဖြစ်သည့်အတွက် ကုန်သည်များ ကုန်ကျစရိတ်ပိုများမည်ဖြစ်ကြောင်း သိရ သည်။
မြန်မာ-တရုတ်နိုင်ငံနယ်စပ်ဖြစ်သည့် ကျယ်ဂေါင်ဂိတ်အား တွေ့ရစဉ်
ကျယ်ဂေါင်တွင်ပိတ်မိနေသည့် ကုန်ပစ္စည်းများအား ပြန်ထုတ်ခွင့်ပြုရန် မြန်မာဘက်မှ ကုန်သည်များက တောင်းဆိုသည့်အတွက် ယခုကဲ့သို့ လုပ်ဆောင်ပေးခြင်းဖြစ်ကြောင်း၊ ယခုလအတွင်း ထိုကုန်ပစ္စည်းများအား ပြန်ထုတ်၍ရမည်ဖြစ်ကြောင်း ဦးမင်းသိန်းက ပြောသည်။
ထို့အပြင် မြန်မာ-တရုတ် နှစ်နိုင်ငံ နယ်စပ်ကုန်သွယ်ရေးလမ်းကြောင်းများအား ပြန်လည်ဖွင့်လှစ်ရန်အတွက်လည်း နှစ်နိုင်ငံတာဝန်ရှိသူများ ဆွေးနွေးနေကြကြောင်းသိရသည်။
ဦးမင်းသိန်းက “အများကြီးကောင်းသွားတာပေါ့။ အခုက ဂိတ်တစ်ဂိတ်ပဲဖွင့်တယ်။ ရှိတာက ဂိတ် ၅ ဂိတ်လောက် ရှိတယ်။ ၅ ဂိတ်လုံးဖွင့်နိုင်မယ်ဆိုရင် ကုန်စည်စီးဆင်းမှု မြန်ဆန်သွက်လက်သွားမယ်။ ခေါက်တိုခတွေလည်း သယ်ယူပို့ဆောင်ရေးစရိတ်တွေ အများကြီး ကျဉ်းသွားမယ်။ ဒါကြောင့် ဖြစ်နိုင်မယ်ဆိုရင်တော့ ဂိတ်အားလုံး ဖွင့်မယ်ဆိုရင်တော့ ဒါအများကြီးကောင်းပါတယ်။ အများကြီး နယ်စပ်ကုန်သွယ်ရေးဟာ ဖွံ့ဖြိုးတိုးတက်လာမယ် လို့ ပြောချင်ပါတယ်” ဟု ပြောသည်။
လက်ရှိတွင် ကျင်စန်းကျော့ဂိတ်မှ ဆန်၊ ဆန်ကွဲ၊ ပဲ၊ ရော်ဘာ စသည့် စားကုန်သောက်ကုန်ပစ္စည်းများသည် တရုတ်ဘက်သို့ တစ်ရက်လျှင် ကုန်အကားအစီးရေ ၅၀ ခန့် ဝင်ရောက်ကြောင်းနှင့် တရုတ်ဘက်မှလည်း မြန်မာ ဘက်သို့ ကုန်ကား ၅၀ ခန့်ဝင်ရောက်ကြောင်းသိရသည်။
တရုတ်ဘက်မှ နှစ်နိုင်ငံနယ်စပ်ကုန်သွယ်မှုပြုရာတွင် ကိုဗစ်နှင့်ပတ်သက်၍ ယခင်ကထက် တင်းကြပ်မှုမရှိသော် လည်း တင်ပို့မည့် ကုန်ပစ္စည်းများတွင်မူ ကိုဗစ် ရှိ၊ မရှိ စစ်ဆေးနေဆဲဖြစ်ကြောင်းသိရသည်။
- By CNI
- Category: စီးပွားရေး
- Hits: 966
CNI News
၂၀၂၂ ခုနှစ်၊ ဇွန်လ ၄
ယခု ဇွန်လမှစတင်ကာ တရုတ်နိုင်ငံနှင့် မြန်မာနိုင်ငံကုန်သွယ်ရေးတွင် တရုတ်နိုင်ငံဘက်က ကိုဗစ်စည်းကမ်းချက် များကို တဖြည်းဖြည်း ဖြေလျှော့လာသည်ဟု မူဆယ်ကုန်သည်များထံမှ သိရသည်။
မူဆယ်ဆန်စပါးကုန်စည်ဒိုင် ဒုတိယဥက္ကဋ္ဌ ဦးမင်းသိန်းက “၆ လပိုင်း လဆန်းကစပြီးတော့ ဘာဖြစ်လာလဲ ဆိုတော့ ကိုဗစ်စည်းကမ်းချက်တွေကို တရုတ်နိုင်ငံဘက်ကနေပြီးတော့ လျှော့ချလာတယ်။ အသီးကားတွေကို အရင်တုန်းက ဆေးဖျန်းတဲ့နေရာ ၄ နေရာလောက် ဖျန်းတယ်။ အခု ၁ နေရာလောက်ပဲ ဖျန်းတော့တယ်။ ဒီလို ၁ နေရာပဲ ဖျန်းတော့တဲ့အတွက် အသီးတွေက ဆေးဖျန်းတာ နည်းသွားတော့ အသီးတွေ မနာတော့ဘူးပေါ့။ ဒီအတွက် အသီးကားသမားတွေအတွက် သိသိသာသာကြီး အကျိုးရှိတာပေါ့။ မြန်မြန်ဆန်ဆန် သွက်သွက် လက်လက် ဝင်နိုင်တယ်။ နံပါတ် ၂ က ကိုဗစ် ကန့်သတ်ချက်စာရွက်စာတမ်းတွေကို အများကြီး လျှော့ထားတယ်။ အရင်တုန်းက ၃/၄ ခု ပေးရတဲ့နေရာက အခု ၁ ခုလောက်ပဲ ပေးရတော့တယ်။ ဒါကြောင့် တဖြည်းဖြည်းတော့ ကိုဗစ်စည်းကမ်းချက်တွေကို လျှော့ချနေတာ တွေ့ရှိရပါတယ်” ဟု CNI သတင်းဌာနသို့ ပြောသည်။
တရုတ်နိုင်ငံသို့ သစ်သီးများ တင်ပို့ရာတွင် ကိုဗစ်ကန့်သတ်ချက်ပေါ် မူတည်နေခြင်းကြောင့် ကိုဗစ်စည်းကမ်း များကို ထပ်မံဖြေလျှော့ပေးလာပါက ကုန်သွယ်ရေး ပုံမှန်ပြန်ရောက်လာနိုင်သည့် အခြေအနေရှိကြောင်း သိရသည်။
လက်ရှိတွင် ကိုဗစ်စည်းကမ်းချက် အနည်းငယ် ဖြေလျှော့လာသည့်အတွက် သစ်သီးတင်ပို့မှုကြာချိန်သည် ယခင်ကထက် လျော့ကျလာသည်ဟု မူဆယ်သစ်သီးဝလံကုန်စည်ဒိုင် ဒုတိယဥက္ကဋ္ဌ ဦးစိုင်းခင်မောင်က CNI သို့ ပြောသည်။
“သစ်သီးတင်ပို့မှု အပိုင်းကတော့ ရှေ့လျှောက် လာမယ့်ဟာကတော့ ကိုဗစ်ထိန်းချုပ်မှုပေါ် မူတည်တာပေါ့။ ဒါကလည်း တရုတ်ဘက်က တဖြည်းဖြည်း ဖြေလျှော့နေတာတော့ ရှိတာပေါ့။ တရုတ်ဘက်ကတော့ အရင်တုန်းက ၁ လလောက် ရက် ၂၀ လောက် ကြာတဲ့ဟာက အခုက ၄/၅ ရက် ၁ ပတ်နဲ့တော့ ဝင်သွားပြီ။ နောက်အလားအလာ ကတော့ ပုံမှန်ဖြစ်ဖို့ လမ်းကြောင်းပေါ်တော့ ပြန်ရောက်လာမှာပဲ” ဟု ပြောသည်။
သစ်သီးတင်ပို့မှုသည် ကိုဗစ်ကန့်သတ်ချက်များကြောင့် ယခုနှစ်တင်ပို့မှုသည် ယခင်နှစ်ထက်တင်ပို့မှု ပမာဏ ထက် နည်းပါးသည်ဟု ကုန်သည်များထံမှ သိရသည်။
တရုတ်နိုင်ငံ၏ ကိုဗစ်ကန့်သတ်ချက် တင်းကြပ်မှုများသည် မြန်မာနိုင်ငံမှ တရုတ်နိုင်ငံသို့ တင်ပို့နေသည့် သစ်သီး ဝလံနှင့် ကုန်စည်များ၏ အရည်အသွေး ကျဆင်းမှု ဖြစ်ပေါ်စေသည့်အပြင် တင်ပို့ရာတွင် အချိန်နှောင့်နှေး ကြန့်ကြာစေကြောင်း သိရသည်။
လတ်တလော သစ်သီးများ တင်ပို့ရာတွင် တရုတ်နိုင်ငံဘက်ခြမ်းတွင် ကားခဈေးနှုန်းများ ကျဆင်းနေပြီဖြစ်သော် လည်း မြန်မာနိုင်ငံဘက်ခြမ်းရှိ ကုန်ကားကွင်းကြေးနှင့် အစားထိုးယာဉ်မောင်းခဈေးနှုန်းများမှာ ကျဆင်းနေခြင်း မရှိသေးကြောင်း ဦးစိုင်းခင်မောင်က ဆက်ပြောသည်။
“ကုန်ကျမှု တရုတ်ဘက်ကတော့ ကားခတွေ တဖြည်းဖြည်းတော့ ကျလာတယ်။ မြန်မာဘက်ကတော့ မကျသေးဘူးပေါ့။ မြန်မာဘက်က ကွင်းကြေးတို့၊ ရှန်တိန်တို့ ဆေးစစ်တာတို့ ဖြေလျှော့တာ မတွေ့ရသေးဘူး။ တရုတ်ဘက်ကတော့ အဆင့်လိုက် ဖြေလျှော့နေတာပေါ့နော်” ဟု ပြောသည်။
တရုတ်နိုင်ငံဘက်မှ ကိုဗစ်ရောဂါဆိုင်ရာ ထိန်းချုပ်ကန့်သတ်ချက်များကို တဖြည်းဖြည်း ဖြေလျှော့လာနေပြီ ဖြစ်သည့်အတွက် ပိတ်ထားသည့် တရုတ် - မြန်မာ နယ်စပ်ကုန်သွယ်ရေးဂိတ်များကို ယခုနှစ်အတွင်း ပြန်လည် ဖွင့်လှစ်လာနိုင်ခြေရှိသည်ဟု ကုန်သည်များက သုံးသပ်နေကြသည်။
- By CNI
- Category: စီးပွားရေး
- Hits: 734
CNI News
၂၀၂၂ ခုနှစ်၊ ဇွန်လ ၄
ပြည်တွင်း လေကြောင်းလိုင်းများတွင် လိုက်ပါမည့် ခရီးသည်များထဲတွင် ကိုဗစ် ကာကွယ်ဆေး အကြိမ်ပြည့် ထိုးနှံပြီးသူများအား လေဆိပ်တွင် ကိုဗစ် ရှိ၊ မရှိ စစ်ဆေးမှုအား ပယ်ဖျက်လိုက်သဖြင့် လေကြောင်း ခရီးသွားလာမှု ပိုများလာနိုင်ကြောင်း မြန်မာနိုင်ငံ ခရီးသွားလုပ်ငန်းရှင်များအသင်းဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။
ကျန်းမာရေးဝန်ကြီးဌာန အနေဖြင့် လေကြောင်း ပို့ဆောင်ရေးကဏ္ဍ အားကောင်းလာပြီး မြန်မာ့စီးပွားရေးလုပ်ငန်း ပြန်လည် ဦးမော့လာစေရေး လုပ်ငန်းစဉ်ကို အထောက်အကူပြုစေရန် ယခုကဲ့သို့ ဖြေလျှော့ပေးလိုက်ခြင်းဖြစ်သည်။
ဦးနောင်းနောင်းဟန်က “လေကြောင်းခရီးသွားက အရင်က တိုးတက်သင့်သလောက် မတိုးတက်ဘူး ဖြစ်နေတာ ပြည်တွင်းမှာ လေ။ လေယာဉ်ခရီးစဉ်တွေ ပြေးဆွဲပေမယ့်လည်း နှာခေါင်းထိုးခံရပြီး စစ်ဆေးခံရမှာ ကြောက်လို့ပေါ့။ လူတွေက လေ ကြောင်းနဲ့ မသွားကြတာ၊ လေကြောင်းလိုင်းကို မရွေးချယ်ဘဲ ဖြစ်နေကြတာပေါ့။ ဒါပေမယ့် အခု ဒီဖြေလျှော့မှု လုပ်ပေးလိုက် တဲ့ အတွက်ကြောင့် ပြည်တွင်းမှာရှိတဲ့ လေကြောင်း ခရီးသွားမှုတွေ အများကြီး ပိုများလာပါလိမ့်မယ်။ အထူးသဖြင့် ဝေးလံ ခေါင်ပါးတဲ့ နေရာတွေဆိုရင် လေယာဉ်နဲ့ပဲ သွားရတာကိုး။ အခုအဲဒါတွေကို ကြောက်လို့ မသွားကြတဲ့သူတွေက ပြည်တွင်းမှာ ခရီးသွား လာတာတွေ အများကြီး မြင့်တက်လာပါလိမ့်မယ်။ ပြည်တွင်း လေကြောင်း လုပ်ငန်းအတွက်တော့ ဒါအများကြီး တိုးတက်မှု ရှိလာတယ်။ တိုးတက်မယ့် အလားအလာတွေ အများကြီး ဖြစ်လာပါလိမ့်မယ်။ လေကြောင်းခရီးစဉ်တွေ ပြန်ပြီး အများကြီး ပြန်ပြေးဆွဲလာလိမ့်မယ်ပေါ့ ပြည်တွင်းက လေဆိပ်တွေကိုလေ။ အဲဒါကြောင့် ခရီးသွား လုပ်ငန်းအတွက်တော့ အင်မတန်မှ အကျိုးရှိပါတယ် ဒါကလေ” ဟု ပြောသည်။
ကိုဗစ်ကာကွယ်ဆေး အကြိမ်ပြည့် ထိုးနှံပြီးသူများအတွက် ယခုကဲ့သို့ ပြည်တွင်းလေကြောင်း ခရီးစဉ်နှင့်ပတ်သက်၍ ဖြေ လျှော့ပေးလိုက်ခြင်းသည် အဆင်ပြေကြောင်း ကိုဗစ် အစစ်ခံရမည်ကို ကြောက်သဖြင့် လေယာဉ်နှင့် ခရီးမသွားသည့် မမီးမီးက CNI သတင်းဌာနသို့ ပြောသည်။
မမီးမီးက “အဲဒီလိုမျိုး ကိုဗစ်ကာကွယ်ဆေး နှစ်ကြိမ် ထိုးထားပေမယ့်လည်း ထပ်စစ်ရမယ်ဆိုတော့ တကယ်လို့ ကိုဗစ်စစ်လို့ ထပ်တွေ့ သွားတယ်ဆိုရင် ရန်ကုန် မသွားရဘဲနဲ့ ကွာရန်တင်းစင်တာ ဝင်ရမယ်လေ။ အဲဒါကြောင့် ကွာရန်တင်းစင်တာ မဝင်ချင်တဲ့ အတွက်ကြောင့်မို့လို့ လေယာဉ်နဲ့ မသွားတော့ဘူး။ ကားနဲ့ပဲ ခရီးသွားကြတယ်ပေါ့။ လေယာဉ်နဲ့ဆိုရင် တစ်နာရီခွဲ ကြာ မယ့် ခရီးကို ကားနဲ့ခရီးသွားတော့ တစ်ညအိပ် ခရီးသွားရတယ်ဆိုတော့ အချိန်ကြန့်ကြာသွားတာပေါ့။ အခုလိုမျိုး ကိုဗစ်ဆေး နှစ်ခါ ထိုးထားပြီးပြီ။ လေယာဉ်စီးရင် ကိုဗစ်ဆေး နှစ်ခါထိုးထားတာကို ပြနိုင်တယ်ဆိုရင် သွားလို့လာလို့ အဆင်ပြေသွားပြီ ဆိုတော့ အကုန်လုံး အဆင်ပြေတယ်လို့ ပြောရမှာပေါ့နော်”ဟု ပြောသည်။
လေကြောင်း ခရီးသွားများကိုတွေ့ရစဉ်
လေယာဉ်စီးနင်းပါက ကိုဗစ် ရှိ၊ မရှိ စစ်ဆေးသည့်အတွက် ခရီးသွားအများစုသည် ကားလမ်းကြောင်း အသုံးပြု၍ ခရီးသွား ခြင်းမှာ များပြားခဲ့ပြီး လေကြောင်းခရီးစဉ်အား ကိုဗစ်ကန့်သတ်ချက် ဖြေလျှော့လိုက်သော်လည်း ကာလမ်းဖြင့် ခရီးသွားလာမှု သည် ပုံမှန်ရှိနေဦးမည်ဖြစ်ကြောင်း မြန်မာနိုင်ငံ ခရီးသွားလုပ်ငန်းရှင်များအသင်း ဥက္ကဋ္ဌ ဦးနောင်းနောင်းဟန်က ပြောသည်။
၎င်းက “လေကြောင်းဘက်မှာပဲ တိုးသွားမှာ။ ကားနဲ့သွားတဲ့ ခရီးစဉ်ကတော့ သိသိသာသာကြီး လျော့သွားမှာတော့ မဟုတ်ဘူး။ နဂိုကတည်းကိုက ကားတွေက အများကြီး ထွက်ပြီးတော့ တစ်နေ့တစ်နေ့ကို ထောင်နဲ့ချီတဲ့ ခရီးသည်တွေက သွားနေ တာဆိုတော့လေ။ တကယ်တော့ လေကြောင်းလိုင်း ဘက်မှာကျတော့ ရာနဲ့ချီတဲ့ ခရီးသည်တွေကို သွားဖို့အတွက် ကျနော်တို့ မှာ လိုနေတာပေါ့။ အဲဒီအတွက်ကြောင့်မို့လို့ လေကြောင်းတွေ ဆွဲဖို့လိုမယ်။ အခုတော့ ဆယ်ကဏန်း လောက်ပဲ ရှိတယ်။ ရာ ကဏန်းဆိုလည်း တစ်ရာ နှစ်ရာလောက်ပဲ ရှိတဲ့အတွက် လေကြောင်းခရီးမှာ နည်းနေတာ။ အမှန်တကယ် လေကြောင်းခရီးနဲ့ သွားတာက လေး၊ ငါးရာကနေ တစ်ထောင်လောက်အထိ ရှိတော့မှသာ ပြည်တွင်း လေယာဉ်တွေလည်း များများ ပြေးဆွဲပြီး တော့ အလုပ်ဖြစ်နိုင်မှာပေါ့။ လေကြောင်းမှာ တိုးတက်သွားတဲ့ ပမာဏလေး လေး၊ ငါးရာ၊ တစ်ထောင်လောက်လေးဟာ ကားလမ်းနဲ့သွားနေတဲ့ ခရီးသည်တွေနဲ့ ယှဉ်လိုက်ရင် အများကြီး ပြောပြလောက်အောင် မလျော့သွားပါဘူး” ဟု ပြောသည်။
ပြည်တွင်းတွင် လေယာဉ်ဖြင့် ခရီးသွားမည့်သူများ အနေဖြင့် လွန်ခဲ့သော ၁၄ ရက်ကျော်က ကျန်းမာရေးဝန်ကြီးဌာနမှ အသိ အမှတ်ပြု ကိုဗစ်ကာကွယ်ဆေး အကြိမ်ပြည့် ထိုးနှံထားသူများ ဖြစ်ရမည်ဖြစ်ကြောင်း၊ အသက် ၁၂ နှစ်အောက် ကလေးများ အား ကိုဗစ် ကာကွယ်ဆေးထိုး လက်မှတ်တင်ပြခြင်းမှ ကင်းလွတ်ခွင့်ပြုကြောင်း ထုတ်ပြန်ထားသည်။
ထို့နောက် ကာကွယ်ဆေး အကြိမ်ပြည့် မထိုးနှံရသေးသည့် သူများမှာ ခရီးစဉ်မတိုင်မီ ၄၈ နာရီအတွင်း RDT ဖြင့် ကိုဗစ် မရှိ ကြောင်း စမ်းသပ်ထားသည့် အဖြေကို လေဆိပ်၌ check in ဝင်သည့် အချိန်တွင် ပြသရန် မဖြစ်မနေ ဆောင်ရွက်ရမည်ဖြစ် ကြောင်း၊ Check in ဝင်သည့် အချိန်တွင် ဆိုက်ရောက်သည့်မြို့၌ တည်းခိုးမည့် နေရာအား တိကျမှန်ကန်စွာ ဖြည့်စွက်ရမည် ဖြစ်ကြောင်း ပါရှိသည်။
- By CNI
- Category: စီးပွားရေး
- Hits: 776
CNI News
၂၀၂၂ ခုနှစ်၊ ဇွန်လ ၃
ထိုင်း-မြန်မာ နှစ်နိုင်ငံ လူအဝင်အထွက် ပိတ်ထားသည့် ကော့သောင်း - ရနောင်း နယ်စပ်ဖြတ်သန်းရေးဂိတ်ကို ယနေ့ (ဇွန်လ ၃ ရက်)တွင် ပြန်လည် ဖွင့်လှစ်လိုက်ပြီဖြစ်ကြောင်း ကော့သောင်း ရောက်ရှိနေကြသည်သူများထံမှ သိရသည်။
အဆိုပါ နယ်စပ်ဂိတ် ဖြတ်သန်းခွင့်ကို ကော့သောင်းနှင့် ရနောင်း နယ်မြေဒေသခံများကိုသာ လတ်တလောတွင် သွားလာခွင့် ပြုထားသည်ဟု ပြည်ပအလုပ်အကိုင် အကျိုးဆောင် ပွင့်ဖူးအောင် အေဂျင်စီမှ ဒါရိုက်တာ ဒေါ်မြတ်ဟေမာန်လင်းက CNI သတင်းဌာနသို့ ပြောသည်။
ဒေါ်မြတ်ဟေမာန်လင်းက “အခု အန်တီတို့က ကော့သောင်းမှာလေ။ သူတို့က နယ်မြေခံ စာအုပ်တွေပဲ ဖွင့်ပေးတယ်လို့ ပြော တယ်။ ခရီးသွားကဒ်တို့၊ Border Pass ကို ဖွင့်ပေးတာ မဟုတ်ဘူး။ သူတို့ နယ်မြေခံ ဟိုဘက်ကလည်း ရနောင်းနယ်မြေခံက လူပဲ ကော့သောင်းကို ကူးလို့ရမယ်။ ကော့သောင်းကလည်း ကော့သောင်းနယ်မြေခံပဲ ဟိုဘက်ကို ကူးလို့ရတယ်။ နယ်မြေခံ ကလည်း ရနောင်းကိုပဲ သွားလို့ရတာ။ ရနောင်းနယ်မြေပဲ သွားလို့ရတာသူတို့။ ရနောင်းကလူလည်း ကော့သောင်းအထိပဲ သွားလို့ရတယ် အဲလိုပြောတယ်” ဟု ပြောသည်။
ကိုဗစ်ကပ်ရောဂါ အခြေအနေများကြောင့် ပြီးခဲ့သည့် ၂ နှစ်ကျော်တွင် နှစ်နိုင်ငံ အပြန်အလှန် လူအဝင်/အထွက် သွားလာခွင့် ကို ပိတ်ထားခဲ့ကြောင်း၊ ယခုအခါတွင် ပထမဆုံးအကြိမ် ပြန်လည် ဖွင့်လှစ်ပေးခြင်းဖြစ်ကြောင်း သိရသည်။
ကော့သောင်း-ရနောင်း နယ်စပ်ဂိတ် ကိုဗစ်စစ်ဆေး
လက်ရှိ ဖွင့်လှစ်လိုက်သည့်အပေါ် လူဝင်မှုကြီးကြပ်ရေးဦးစီးဌာနသို့ ဆက်သွယ် မေးမြန်းသော်လည်း ညွှန်ကြားရေးမှူးမှာ အစည်းအဝေး တက်ရောက်နေခြင်းကြောင့် ပြန်လည်ဖြေကြားခြင်း မရှိသေးပေ။
သို့သော် မေလ ၂၄ ရက်နေ့မှ စတင်၍ ကော့သောင်း - ရနောင်း နယ်စပ်ဂိတ်က တဆင့် နှစ်နိုင်ငံ သဘောတူညီမှုစာချုပ် MOU ဖြင့် အလုပ်သမားများကို စေလွှတ်နေကြောင်း အလုပ်သမားညွှန်ကြားရေးဦးစီးဌာနမှ တာဝန်ရှိသူတစ်ဦးက CNI သတင်းဌာန သို့ ပြောသည်။
၎င်းက “MOU နဲ့ ပတ်သက်ပြီး ကော့သောင်းတို့၊ ရနောင်းတို့၊ မြဝတီ - မဲဆောက်၊ မြဝတီကနေ မဲဆောက်၊ ကော့သောင်းကနေ ရနောင်းကို ကျတော့ MOU နဲ့ စေလွှတ်တဲ့ အလုပ်သမားတွေကို တောက်လျှောက်ကို လွှတ်ပေးနေတယ်ပေါ့နော်။ အဲတော့ MOU က တောက်လျှောက် ကျနော်တို့ ၂၄ ရက်နေ့က စပြီးတော့မှ လုပ်ပေးနေတာပေါ့နော်။ MOU ကတော့ ကျနော်တို့ အသုတ်လိုက် အသုတ်လိုက် အားလုံးကို စေလွှတ်ပေးနေတာပေါ့။ ဟိုနေ့က ၂၂၂ ဦး၊ မနေ့က ၈၀ ဦးပေါ့နော်။ အားလုံးပေါင်း ၃၀၂ ဦး အဲဘက်ကနေပဲ လွှတ်ပေးပါတယ်” ဟု ပြောသည်။
တနင်္သာရီတိုင်းဒေသကြီးတွင် နယ်စပ်ကုန်သွယ်ရေးဂိတ် ၃ ခုရှိကြောင်း၊ ထိုဂိတ်များမှာ ထားဝယ် - ထီးခီး၊ ဆင်ခွန် - မောတောင်နှင့် ကော့သောင်း - ရနောင်း စသည့် နယ်စပ်ဂိတ်များ ဖြစ်သည်။
လက်ရှိတွင် ကော့သောင်း - ရနောင်း နယ်စပ်ဂိတ် တစ်ခုသာ ဖွင့်လှစ်ထား၍ ကုန်သွယ်မှုနှင့် သွားလာခွင့် ရရှိထားကြောင်း၊ ကျန်နယ်စပ်ဂိတ်နှစ်ခုမှ လမ်းပိုင်း နယ်မြေလုံခြုံရေးအရ ကုန်သွယ်မှုနှင့် ဖြတ်သန်းသွားနိုင်ခြင်း မရှိသေးကြောင်း သိရသည်။
- By CNI
- Category: စီးပွားရေး
- Hits: 845
CNI News
၂၀၂၂ ခုနှစ်၊ ဇွန်လ ၂
မြန်မာ-ထိုင်း ကုန်သွယ်ရေး လမ်းကြောင်းဖြစ်သည့် တနင်္သာရီတိုင်းဒေသကြီးအတွင်းရှိ ထားဝယ် - ထီးခီး ကုန်သွယ်ရေး စခန်း နှင့် စင်ခွန် - မောတောင် နယ်စပ်ကုန်သွယ်ရေး စခန်းများတွင် ကုန်သွယ်မှု လုပ်ဆောင်နိုင်ခြင်း မရှိသည်မှာ တစ်လနီးပါး ကြာမြင့် လာပြီဖြစ်ကြောင်း တနင်္သာရီတိုင်းဒေသကြီး ကုန်သည်နှင့် စက်မှုအသင်းချုပ်ထံမှ သိရသည်။
ထားဝယ် - ထီးခီး လမ်းပိုင်းပေါ်တွင် တပ်မတော်နှင့် ကရင်အမျိုးသား လွတ်မြောက်ရေး တပ်မတော် (KNLA)၊ PDF ပူးပေါင်း တပ်ဖွဲ့တို့ကြား မကြာခဏ တိုက်ပွဲ ဖြစ်ပွားခြင်းကြောင့် လုံခြုံရေးအရ ကုန်စည်စီးဆင်းမှု လုပ်ဆောင်နိုင်ခြင်း မရှိကြောင်း ထားဝယ်မြို့နယ်မှ ကုန်သည် ဦးထွန်းထွန်းမြင့်က CNI သတင်းဌာနသို့ ပြောသည်။
ဦးထွန်းထွန်းမြင့်က “ထိုင်းဘက်ကတော့ သူတို့ သွားလာခွင့် ကြေညာထားပြီးတာပဲ ရှိသေးတာ။ ဒါပေမယ့် ဒီနေ့အထိ ဟိုဘက် ကတော့ မသိဘူးပေါ့နော်။ ကျနော်တို့ ထီးခီးဘက်ကတော့ အသွားအလာတွေ မရှိကြဘူးလို့ ပြောတယ်။ အဓိကက ဘယ်လို ပြောရမလဲဆိုရင် လုံခြုံရေး မကောင်းလို့ပေါ့နော် အဲလိုပေါ့။ အခုဆိုရင် တစ်လနီးပါးလောက် ရှိပြီ” ဟု ပြောသည်။
ထားဝယ် - ထီးခီး ကုန်သွယ်ရေး စခန်း
လက်ရှိတွင် ထားဝယ် - ထီးခီး သွားရာလမ်းကြောင်း၌ ဇွန်လ ၁ ရက်က ခရီးသည်တင် ယာဉ်တစ်စီး ပစ်ခတ်ခံရပြီး ယာဉ်မောင်းသူ ထိခိုက်ဒဏ်ရာ ရရှိခဲ့ကြောင်း ထားဝယ်ဒေသခံများမှ ပြောသည်။
ထို့နောက် ထားဝယ် - ထီးခီးနှင့် စင်ခွန် - မောတောင် နယ်စပ်ကုန်သွယ်ရေးတွင် ကုန်သွယ်မှုများ မရှိသော်လည်း ရေထွက် ကုန်များကို ကော့သောင်း - ရနောင်း နယ်စပ်မှတဆင့် တင်ပို့ခွင့် ရရှိထားကြောင်း သိရသည်။
ရေထွက်ကုန် တစ်မျိုးတည်းကိုသာ တင်ပို့ခွင့် ပြုသည့်အတွက် တခြားသော ကုန်စည်များမှာ ပျက်စီးဆုံးရှုံးမှုနှင့် ကြုံတွေ့ နေရကြောင်း ဦးထွန်းထွန်းမြင့်က ပြောသည်။
ဦးထွန်းထွန်းမြင့်က “ကြက်သွန်နီ အပိုင်းမှာတော့ ဆုံးရှုံးမှုတွေ ရှိတယ်လို့ ပြောသံ ကြားပါတယ်။ သူက ကားပေါ်မှာ တင်ထား ရတာကို ကြာပြီလေ။ အဲတော့ ကားပေါ်မှာ တင်ထားတာ လေးတော့ အပေါ်က ဖိ ဖိ ဖိ အောက်ဆုံးက အလိုလို နေရင်းနဲ့ကိုက အနာတွေဖြစ်ပြီး ပုပ်ပွ ကုန်တာပေါ့နော်၊ အဲလိုဟာတွေ ရှိတယ်” ဟု CNI သတင်းဌာနသို့ ပြောသည်။
ကော့သောင်း - ရနောင်း နယ်စပ်ကုန်သွယ်ရေးတွင် ရေထွက်ကုန် တစ်မျိုးတည်းသာ ကုန်သွယ်မှုရှိနေကြောင်း၊ နှစ်ဖက်နိုင်ငံ လူ အဝင်/အထွက် သွားလာမှုကို တရားဝင် ခွင့်ပြုထားခြင်း မရှိကြောင်း သိရသည်။
မြန်မာ/ထိုင်း နယ်စပ်ကုန်သွယ်ရေး (ထက်အောင်ကျော်)
ကော့သောင်း - ရနောင်း နယ်စပ်ဂိတ်ကို ဇွန်လ ၃ ရက်နေ့တွင် ပြန်လည် ဖွင့်လှစ်မည်ဟု သတင်းများ ထွက်ပေါ်နေသော် လည်း ထိုင်းနိုင်ငံဘက်မှ တရားဝင် အကြောင်းကြားလာခြင်း မရှိသလို မြန်မာနိုင်ငံ ဘက်ခြမ်းတွင်လည်း ထူးခြားမှု မရှိသေး ကြောင်း တနင်္သာရီတိုင်းဒေသကြီး ကုန်သည်နှင့် စက်မှုအသင်းချုပ်မှ တာဝန်ရှိသူတစ်ဦးက CNI သတင်းဌာနသို့ ပြောသည်။
၎င်းက “ထိုင်းဘက်ကတော့ သူတို့ စာအရဆိုရင် တကယ်တမ်း ၁ ရက်နေ့ ဖွင့်တယ်နဲ့ တူတယ်ဗျ။ သူတို့ဘက်က ဖွင့်တယ် တော့ သိတယ်။ ဒါပေမယ့် ဒီဘက်ကတော့ ဘာမှ မထူးခြားသေးပါဘူး။ သူတို့ ဖွင့်မယ်ဆိုရင် သူတို့ကတော့ တရားဝင် ဒီဘက် အကြောင်းကြားတာတွေ ဘာတွေညာတွေ ရှိမှာပေါ့နော် အဲဒီလို။ ဒါပေမယ့် ခုချိန်ကတော့ မသိရသေးပါဘူး။ လက်ရှိကတော့ ဖွင့်တာတော့ မကြားသေးဘူး။ ဒါပေမယ့် ကော့သောင်း - ရနောင်း ကတော့ ငါးတို့၊ ပုဇွန်တို့၊ ပြီးရင် မြစ်ခရုတို့ကတော့ သွားနေ ကြတာပဲ” ဟု ပြောသည်။
- By CNI
- Category: စီးပွားရေး
- Hits: 597
CNI News
၂၀၂၂ ခုနှစ်၊ ဇွန်လ ၂
မြန်မာနိုင်ငံတွင် စက်သုံးဆီ ဈေးနှုန်းများ မြင့်တက်နေမှုကြောင့် လူမှုကူညီရေးနှင့် ကယ်ဆယ်ရေး လုပ်ငန်းများ ဆောင်ရွက်နေသည့် ပရဟိတအသင်းများသည် လူနာတင်ယာဉ်များအား လျှော့ပေါ့ပြေးဆွဲလာကြကြောင်း ပရဟိတအသင်းများ ထံက သိရသည်။
ထိုသို့ လူနာတင်ယာဉ်များအား အရေအတွက် လျှော့ပေါ့ပြေးဆွဲခြင်းကြောင့် ဆေးရုံ၊ ဆေးခန်း ပို့ရမည့် လူနာများ အပေါ်သို့ တိုက်ရိုက်ထိခိုက်လာကြောင်း စေတနာရှင် ပရဟိတအသင်း(ရန်ကုန်)မှ ကိုဝေဖြိုးက CNI သတင်းဌာနသို့ ပြောသည်။
ဦးဝေဖြိုးက “လောလောဆယ်တော့ စက်သုံးဆီဈေးတွေက တက်တာထက်ကို တစ်ခါတစ်ခါကျရင် 92 တောင် ဆိုင်တွေမှာ ကုန်နေလို့ တိုင်တွေပတ်လို့။ အခု ကားတစ်ခါ တစ်ခါ လိုက်ထည့်လို့ရှိရင် ဆီဆိုင် သုံး၊ လေး ဆိုင်လောက် သွားနေရတယ်။ မနေ့က 92 တောင် ဝယ်လို့မရဘူး ဖြစ်နေတယ်။ ဆီက ဈေးလည်း တက်တာထက် ဆီဝယ်ရတာပါ လိုက်ပြီးတော့ ရှာဝယ် နေရ တယ်ဆိုတဲ့ ပုံစံဖြစ်နေတယ်။ ဒါက ပြည်သူအတွက်ကို တိုက်ရိုက် ထိခိုက်တယ်ပေါ့။ ဘယ်လိုပြောမလဲဆိုရင် ဒီလူနာတွေ က အချိန်မီ ဆေးရုံရောက်ရမယ့် အချိန်မှာ လူနာတင် အသင်းတွေမှာရှိတဲ့ ကားတွေက အခက်အခဲရှိတဲ့ လူတွေအတွက် ချက် ချင်း မသွားနိုင်ဘူးဆိုရင် လူနာတွေအတွက် အသက်အန္တရာယ်ပါ ထိခိုက်နိုင်တာပေါ့။ တစ်ကြောင်းထွက်သွားတဲ့ အဲဒီအချိန် တွင်းမှာတော့ နောက်နှစ်စီးက ကားရှိပေသော်ငြားလည်း ဆီက အခက်အခဲရှိတဲ့ အခါကျတော့ မထွက်နိုင်ဘူးလေ။ အဲဒီတော့ ကားတစ်စီး ပြန်လာမှပဲ နောက်လူနာကို သွားပို့ပေးရတယ်။ ဒါမှမဟုတ်ရင် တခြားအသင်းနဲ့ ချိန်းပေးတာပေါ့နော်” ဟု ပြော သည်။
စက်သုံးဆီ ထည့်ရန်စောင့်ဆိုင်းနေကြ
လက်ရှိတွင် ပရဟိတ အသင်းများသည် လူနာတင်ယာဉ် ၅ စီးရှိပါက ၂ စီး၊ ၃ စီးရှိပါက ၁ စီးသာ ဆွဲကြတော့ကြောင်း၊ တချို့ နယ်မြို့များတွင် စက်သုံးဆီမှာ ဝယ်ယူရန် အခက်အခဲရှိကြောင်း သိရသည်။
စက်သုံးဆီ ဈေးနှုန်းများသည် မြို့ကြီးများတွင် ငွေကျပ် ၂၂၀၀ ကျော်ရှိသော်လည်း အခြား တိုင်းဒေသကြီးနှင့် ပြည်နယ်များရှိ ဝေးလံသည့် မြို့နယ်များတွင် စက်သုံးဆီ ဈေးနှုန်းမှာ ထိုပမာဏထက် ပိုများသည်။
ရှမ်းပြည်နယ်မြောက်ပိုင်း သီပေါမြို့မှ နယ်စည်းမခြား ပရဟိတအသင်းမှ တာဝန်ရှိသူက အသင်းထံသို့ အကူအညီ တောင်းခံ လာသော လူနာများမှာ အဆင်မပြေသည့် မိသားစုများဖြစ်သည့်အတွက် စက်သုံးဆီဈေး မြင့်တက်သည့်ကြားက ရုန်းကန်၍ လူနာလမ်းကြောင်း ပို့ပေးနေရကြောင်း CNI သတင်းဌာနသို့ ပြောသည်။
၎င်းက “ကျနော်တို့က ပိုပြီးတော့တောင် ပို့ပေးနေရတယ်။ တော်တော်များများက အဆင်မပြေတဲ့ မိသားစုတွေများတော့ ကျနော်တို့ကို တော်တော်များများ အကူအညီ တောင်းလာတော့ ကျနော်တို့ကတော့ ဒိုင်ခံ လုပ်ပေးနေရတာပေါ့။ လူနာတွေ အနေနဲ့ တချို့ အဆင်ပြေတဲ့ လူနာတွေ ကျတော့လည်း ဆီတော့ ဖြည့်ခိုင်းရတာပေါ့။ လုံးဝ မရှိတဲ့ လူနာကတော့ များတာပေါ့။ အဲ့ဒါကြောင့် ကျနော်တို့က အတတ်နိုင်ဆုံး ကြိုးစားပြီးတော့ လုပ်ပေးနေရတာပေါ့။ ဆီဈေးနှုန်းတက်တဲ့ အတွက်ကြောင့် ကျနော်တို့မှာလည်း လူနာတွေကို ပို့ရတဲ့နေရာမှာ တော်တော်လေးကို အင့်(အခက်အခဲရှိ)တာပေါ့နော်။ ကျနော်တို့ကလည်း အလှူငွေနဲ့ ရပ်တည်ပြီး သွားနေရတာဆိုတော့လေ”ဟု ပြောသည်။
လက်ရှိတွင် စက်သုံးဆီ ဈေးနှုန်း မြင့်တက်လာသော်လည်း အလှူရှင်များမှာ နည်းသဖြင့် တချို့ ပရဟိတအသင်းများ၌ စရိတ် မျှပေးပုံစံဖြင့် လူနာတင်ယာဉ် လမ်းကြောင်းများ ပြေးဆွဲနေကြကြောင်း သိရသည်။
ထို့ကြောင့် ပရဟိတအသင်းများရှိ လူနာတင်ယာဉ်များအတွက် စက်သုံးဆီများအား အလွယ်တကူ ဝယ်ယူ၍ ရနိုင်ရန် လုပ် ဆောင်ပေးသင့်ကြောင်း ပရဟိတအသင်းများက ပြောသည်။
လူနာလိုက်ပို့ရန် ဆောင်ရွက်နေ
ရွှေရောင်သမိုင်းပရဟိတအသင်း ဥက္ကဋ္ဌ ကိုဇွဲရန်နိုင်က “စက်သုံးဆီဈေး ရုတ်တရက် ပြန်ကျဖို့ဆိုတာလည်း မလွယ်ဘူးဆိုတာ သိပါတယ်။ နိုင်ငံတကာ စက်သုံးဆီ အခြေအနေ၊ နိုင်ငံတကာ ဒေါ်လာဈေး အခြေအနေ ဒါတွေနဲ့လည်း ဆက်စပ် နေတယ်ဆို တာ နားလည်တယ်။ သို့သော် လူနာတင်ယာဉ်တွေ အတွက်ကိုတော့ တခါတလေကျ တချို့ဆိုင်တွေ နှစ်သောင်းဖိုးပဲ ရောင်း တယ်။ လူနာတင် ယာဉ်တွေဆိုရင်တော့ အထူးအခွင့်ရေး တစ်ရပ်အနေနဲ့ အများပြည်သူကို ကူညီတာဖြစ်တဲ့အတွက် လူနာ တင်ယာဉ်ဆိုရင် သုံးသောင်းဖိုးလောက် ပေးလိုက်မယ်ဆိုတာမျိုး အဲဒီလိုမျိုးလေးတွေတော့ တစ်ဖက်တစ်လမ်းကနေ ဝိုင်းဝန်း ပြီး ကူညီစေချင်တယ်ပေါ့။ ဒါကလည်း ကျနော်တို့ ကိုယ်ကျိုးကိစ္စမပါဘူး။ အများအတွက် ကူညီပေးနေတာ ဖြစ်တဲ့အတွက် စက်သုံးဆီဈေး လျော့ကျဖို့အတွက် မူဝါဒကလည်း ဌာနဆိုင်ရာတွေမှာ ရှိပြီးဖြစ်မှာပါ။ လျှင်လျှင်မြန်မြန် အကောင်အထည် ဖော်ဖို့ပဲ လိုတာပေါ့”ဟု ပြောသည်။
ဇွန်လ ၁ ရက်နေ့က နေပြည်တော်မှာ ကျင်းပခဲ့သည့် နစက သတင်းထုတ်ပြန်ရေးအဖွဲ့၏ ၁၅ ကြိမ်မြောက် သတင်းစာ ရှင်းလင်းပွဲတွင် ဆီသိုလှောင်ကန်များ၌ ဇွန်လ ၁၆ ရက်အထိ စက်သုံးဆီ အလုံအလောက်ရှိကြောင်း ဗိုလ်ချုပ်ဇော်မင်းထွန်း က ပြောကြားခဲ့သည်။
ထို့အပြင် ဆီကုန်သည်များနှင့် ညှိနှိုင်း ဆွေးနွေးနေကြောင်း၊ ကမ္ဘာ့ ဆီစျေးနှုန်း မြင့်တက်မှုများကြောင့် လက်ရှိ ပြည်တွင်း စက်သုံးဆီ စျေးနှုန်းများ မြင့်တက်နေရခြင်းဖြစ်ကြောင်း၊ အိမ်နီးချင်း နိုင်ငံတချို့နှင့် နှိုင်းယှဉ်ပါက စျေးနှုန်း နည်းပါးသေး ကြောင်း၊ အစိုးရအနေဖြင့် အခွန်လျော့ ကောက်ပေးခြင်းများကို လုပ်ဆောင်နေကြောင်း ဗိုလ်ချုပ်ဇော်မင်းထွန်းက ပြောကြားခဲ့ သည်။