- By CNI
- Category: စီးပွားရေး
- Hits: 747
CNI News
၂၀၂၂ ခုနှစ်၊ ဇွန်လ ၃၀
ရခိုင်ပြည်နယ်တွင် လယ်ယာမြေလုပ်ကိုင်ကြသည့် ရခိုင်လူမျိုးများသည် လယ်ယာမြေများကို စွန့်ခွာမှုများ တဖြည်းဖြည်း များပြားလာသည့်အတွက် ထိုလယ်ယာမြေများကို ရခိုင်မဟုတ်သည့် တခြားသော လူမျိုးများက ပိုင်ဆိုင်လာကြကြောင်း ရခိုင်တောင်သူလယ်သမားများထံမှ သိရသည်။
ရခိုင်လူမျိုး အများအပြားသည် လယ်ယာမြေ စွန့်ခွာလာကြသည့်အတွက် လက်ရှိ ရခိုင်ပြည်နယ်တွင် ရခိုင်မဟုတ်သည့် လူမျိုး များ၏ လယ်ယာပိုင်ဆိုင်မှုမှာ ၁၅ ရာခိုင်နှုန်းခန့် ရှိလာပြီဖြစ်ကြောင်း ရခိုင်ပြည်နယ်လုံးဆိုင်ရာ တောင်သူလယ်သမား သမဂ္ဂ ဥက္ကဋ္ဌ ဦးကျော်ဇံက CNI သတင်းဌာနသို့ ပြောသည်။
ဦးကျော်ဇံက “လယ်ယာမြေကို ရောင်းပြီးတော့ စွန့်ခွာကြတယ်။ ဒီအတိုင်းထားပြီးတော့ မရောင်းတဲ့သူလည်း ရှိကြတယ်။ မလုပ်နိုင်ကြတော့ဘူး။ လယ်ယာမြေတွေကို စွန့်ခွာနေကြတယ်ပေါ့။ ကျနော်တို့ဒေသက လယ်ယာမြေတွေကို စွန့်ခွာ နေကြ တဲ့ သူတွေက များသွားပြီပေါ့နော်။ ကျနော်တို့မှာတော့ မူဆလင်ပေါ့။ မူဆလင်တွေ ကျနော်တို့နေတဲ့ နေရာဒေသ တော်တော် များများမှာတော့ သူတို့ ပိုင်သွားကြပြီ။ သူက ရှင်းရှင်းပြောရရင်တော့ အဲဒီလယ်ယာမြေက ရသည်ဖြစ်စေ မရသည်ဖြစ်စေ ရအောင်လည်း သူတို့လုပ်နိုင်တယ်။ ရအောင်လည်း ကြိုးစားကြတယ်။ မရရင်လည်း သူတို့က အဲဒါကို ဖက်တွယ်ပြီးတော့ သူတို့က လုပ်ကြတယ်။ အကြောင်းက ဘာလဲဆိုတော့ သူတို့ကိုယ်၌က ကျနော်တို့ ရခိုင်ဒေသမှာ ပြည်မကို သွားနိုင်တဲ့ အခွင့် အလမ်း မရှိဘူး။ ဘယ်ကိုမှ သွားနိုင်တဲ့ အခွင့်အလမ်း မရှိတဲ့အခါကျတော့ အဲဒီရှိတဲ့ မြေကိုပဲ သူတို့က ဖက်တွယ်ပြီးတော့ ရုန်း ကြတယ်ဗျာ။ သူတို့လက်ထဲကို ရောက်သွားတဲ့ အနေအထားကတော့ ရှိကြတယ်။ အထူးသဖြင့်ကတော့ ဘူးသီးတောင်၊ မောင်တော ဒေသဆိုရင်တော့ တစ်အုပ်လုံးလို့ ပြောလို့ရတယ်။ ဒီဖက်မှာလည်း မူဆလင်ရှိတဲ့ ဒေသတွေ တော်တော်များများ မှာလည်း သူတို့လက်ထဲကို ရောက်သွားတာ ရှိတယ်။ အရောင်းအဝယ် လုပ်ကြတဲ့သဘောပေါ့။ အရောင်းအဝယ်လုပ်ပြီးတော့ ရောက်သွားတဲ့ သဘောတော့ ရှိတယ်။ ရာနှုန်းအားဖြင့် တိတိကျကျ ကျနော်တို့ ခန့်မှန်းဖို့တော့ ခက်တယ်။ ဒါပေမယ့် ၁၅ ရာခိုင်နှုန်း အထက်မှာတော့ ရှိလိမ့်မယ်ဗျ” ဟု ပြောသည်။
မောင်တောမြို့အ၀င်ကိုတွေ့ရစဉ်
ရခိုင်လူမျိုးများ လယ်ယာမြေများကို စွန့်ခွာရာမှာ ပုံစံအမျိုးမျိုးကြောင်း၊ ထိုအထဲတွင် လယ်ယာမြေများကို ရောင်းချခြင်းနှင့် စိုက်ပျိုးရေး လုပ်ကိုင်မှုကို ရပ်တန့်၍ စွန့်ခွာမှုများလည်း ပါဝင်ကြောင်း သိရသည်။
ဦးကျော်ဇံက “မြေကတော့ တဖြည်းဖြည်းနဲ့ ကျနော်တို့ တရဆက်လို့ ပြောလို့ရတယ်။ မြေကို စွန့်ခွာနေကြတာတော့ တရဆက်လို့ ပြောလို့ရတယ်။ မလုပ်ဘဲနဲ့လည်း စွန့်ခွာကြတယ်။ ရောင်းချပြီးတော့လည်း စွန့်ခွာကြတယ်။ ဒီအခြေအနေ ကိုတော့ ထိန်းဖို့ နည်းနည်းခက်တယ်။ ဘာလို့ဆို ကျနော်တို့က ဒီမြေက ကျနော်တို့ကို အထောက်အပံ့ မပြုဘူးဆိုရင် အသက် မွေးဝမ်းကြောင်းအတွက် စိတ်မဝင်စားတာကတော့ ဓမ္မတာ ဖြစ်လိမ့်မယ်ပေါ့နော်။ အဲဒီအပေါ်မှာ ထိန်းသိမ်းဖို့အတွက်ကတော့ အစိုးရ တစ်ရပ်ကပေါ့နော်၊ ကျနော်တို့ ကမကထ ပြုပြီးတော့ အထောက်အပံ့တွေကို ပေးဖို့ လိုအပ်တယ်။ ဈေးကွက် စီးပွား ရေးတို့ ဘာတို့၊ လမ်းဖွင့်ပေးဖို့ လိုအပ်တယ်ပေါ့နော်။ အဲလိုပုံစံမျိုး မဖြစ်နိုင်ဘူးဆိုရင်တော့ ဒီအခြေအနေကတော့ တဖြည်းဖြည်းနဲ့ အဲလိုပုံစံမျိုး ကျနော်တို့ စွန့်ခွာ နေကြလိမ့်မယ်ပေါ့နော်။ ဆုံးရှုံးနေကြလိမ့်မယ်ပေါ့”ဟု CNI သတင်းဌာနသို့ ပြော သည်။
လက်ရှိတွင် ရခိုင်လူမျိုးများ၏ လယ်ယာမြေ စွန့်ခွာမှုကို ရခိုင်ပြည်နယ် တောင်ပိုင်းထက် ရခိုင်ပြည်နယ်မြောက်ပိုင်းတွင် ပိုမို ဖြစ်ပွားကြောင်း တောင်သူ လယ်သမားများထံမှ သိရသည်။
ရခိုင်တိုင်းရင်းသား တစ်ဦး စပါးများ သန့်စင်နေစဉ်(Myint Lwin)
ရခိုင်ပြည်နယ်တောင်ပိုင်းတွင် လယ်ယာမြေများကို ငွေကြေး ချမ်းသာသူများက လွှဲပြောင်း ဝယ်ယူမှုများသာရှိကြောင်း ရခိုင် တောင်သူတစ်ဦးဖြစ်သူ ဦးအောင်ကျော်မြက CNI သတင်းဌာနသို့ ပြောသည်။
ဦးအောင်ကျော်မြက “တောင်ပိုင်းမှာက ရခိုင်တွေ လယ်ယာမြေ စွန့်ခွာသွားတယ်ဆိုတာ မရှိဘူးလေ။ လယ်မြေတွေ တော်တော် တန်ဖိုးရှိတဲ့နေရာတွေကို ပိုက်ဆံရှိတဲ့သူတွေက ဝယ်ပြီးတော့ ယူသွားတာလောက်ပဲ ရှိချင်ရှိမှာပေါ့” ဟု ပြောသည်။
လက်ရှိတွင် ရခိုင်ပြည်နယ်ရှိ လယ်ယာမြေများသည် တစ်နှစ်ထက်တစ်နှစ် စိုက်ပျိုးသည့် ဧကများ လျော့နည်းလာကြောင်း၊ လယ်ယာမြေမှ စီးပွားရေးဇုန်နှင့် ဟိုတယ်ဇုန် မြေနေရာများ ဖြစ်ပေါ်နေမှုများလည်း ရှိလာကြောင်း သိရသည်။
ထို့နောက် ၂၀၁၅ ခုနှစ် နောက်ပိုင်းတွင် ရခိုင်ပြည်နယ်၏ လယ်ယာ စိုက်ပျိုးဧကသည် ၁၄ သိန်းကျော် ရှိသော်လည်း လက်ရှိ တွင် ၈ သိန်းမှ ၁၀ သိန်းခွဲသာ စိုက်ပျိုးဧကရှိတော့ကြောင်း သိရသည်။
ယခု အခြေအနေအတိုင်း ဆက်ဖြစ်နေပါက ရခိုင်ပြည်နယ်ရှိ ဒေသခံများ၏ လယ်ယာမြေ စွန့်ခွာမှုများသည် ဆက်လက် ဖြစ်ပေါ်နေနိုင်ဖြစ်ကြောင်း ရခိုင်တောင်သူလယ်သမားများက ပြောသည်။
- By CNI
- Category: စီးပွားရေး
- Hits: 939
CNI News
၂၀၂၂ ခုနှစ်၊ ဇွန်လ ၂၈
ပြည်တွင်းသကြားလက်ကျန် နည်းပါးနေခြင်းနှင့် သကြားထုတ်လုပ်မှု လျော့ကျခဲ့ခြင်းကြောင့် လက်ရှိတွင် သကြားဈေးနှုန်း သည် တစ်ပိဿာလျှင် ငွေကျပ် ၂၀၀၀ ကျော်အထိ ဈေးနှုန်းရရှိနေကြောင်း သကြားနှင့် ကြံထွက်ပစ္စည်း လုပ်ငန်းရှင်များထံမှ သိရသည်။
ပြည်တွင်းတွင် သကြားလိုအပ်ချက် မြင့်မားနေမှုကြောင့် ၂၀၂၂ ခုနှစ် နှစ်ဆန်းပိုင်းမှစတင်၍ သကြားဈေးနှုန်း မြင့်တက် နေခဲ့ ခြင်းဖြစ်ပြီး ပြီးခဲ့သည့်နှစ်တွင် သကြားတစ်ပိဿာလျှင် ၉၀၀ ကျော်သာရှိခဲ့ပြီး ယခုနှစ်တွင် ၂၀၀၀ ကျော် ရရှိနေသည်ဟု သကြားနှင့်ကြံထွက်ပစ္စည်းလုပ်ငန်းရှင်များအသင်း ဒုတိယဥက္ကဋ္ဌ ဦးဝင်းဋ္ဌေး CNI သတင်းဌာနသို့ ပြောသည်။
ဦးဝင်းဋ္ဌေးက “အပြင်မှာ ၂၀၀၀ ကျော်နေတာလေ။ ဘယ်လိုဖြစ်လို့ အဲလောက်ထိ ပေါက်သွားတာလဲဆိုတော့ သကြား ပြည် တွင်း လက်ကျန် နည်းသွားတာက တစ်ပိုင်း၊ နောက်ပြီးကျတော့ ကုန်သည်တွေကလည်း ကုန်ဈေးနှုန်းတွေ ကြီးမြင့်တာပေါ့ နော်၊ သယ်ယူ ပို့ ဆောင်ရေး၊ လောင်စာဈေးတွေ တက်တော့ အဲဒါကလည်း တစ်ပိုင်း၊ နောက်ပြီးတော့ ကြံဈေး မြှင့်ပေးလိုက် တာလည်း တစ်ပိုင်း၊ ကြံစိုက်ပျိုးမှု နည်းသွားတာ ထုတ်လုပ်မှု နည်းနည်း လျော့ကျသွားတာပေါ့နော်။ လျော့ကျသွားတော့ ပစ္စည်းက နည်းတာကိုး” ဟု ပြောသည်။
ကြံစိုက်တောင်သူတစ်ဦး
ထို့နောက် ကြံစိုက်ပျိုးမှု လျော့ကျနေခြင်း၊ သကြားထုတ်လုပ်မှု နည်းပါးခြင်း၊ ပြည်တွင်း သကြားလိုအပ်ချက် မြင့်တက်နေ ခြင်း စသည့် အခြေအနေများကြောင့် ပြည်ပသို့ သကြားတင်ပို့မှုသည် ယခုနှစ်တွင် လျော့နည်းခဲ့ကြောင်း သိရသည်။
အလားတူ ကြံစိုက်ရာသီ ပြန်လည် စတင်တော့မည် ဖြစ်ခြင်းကြောင့် သကြားဈေးနှုန်းသည် လက်ရှိဈေးနှုန်းထက် ဆက်လက် မြင့်တက်နိုင်ခြေ မရှိကြောင်း ဦးဝင်းဋ္ဌေးက ပြောသည်။
၎င်းက “ဒီနှစ် အနေနဲ့ လောက်ကတော့ မတက်လောက်တော့ပါဘူး။ ဘာဖြစ်လို့လဲဆိုတော့ အခုလက်ရှိ နောက်ထပ် ၆ လ ဆိုရင် ၁၂ လပိုင်းဆို စက်တွေ ပြန်လည်မှာလေ။ ကြံရာသီအသစ် ပြန်စမှာ။ ၂၀၂၂ - ၂၀၂၃ ကြံရာသီ စတော့မှာ။ အဲကျတော့ ၆ လစာလောက်က ဒီထဲမှာ လုံလုံလောက်လောက် ရှိနေပြီလို့ တွက်လို့ရတယ်။ အဲတော့ ဒီထက်တော့ အများကြီး မတက်နိုင် တော့ဘူး။ ဒီအတိုင်းတော့ တည်ငြိမ်နေမှာပေါ့” ဟု ပြောသည်။
လက်ရှိတွင် သကြားဈေးနှုန်း အမြင့်ပိုင်း၌ တည်ရှိနေသော်လည်း ဓာတ်မြေဩဇာ ဈေးနှုန်းနှင့် သွင်းအားစု စရိတ်များမှာ အဆမတန် မြင့်မားနေသေးကြောင်း၊ ထို့ကြောင့် လာမည့် ကြံစိုက်ရာသီတွင် ကြံစိုက်ဧက လျော့နည်းသွားနိုင်သလို အထွက် နှုန်းလည်း လျော့ကျသွားနိုင်ကြောင်း ကြံစိုက်တောင်သူများနှင့် လုပ်ငန်းရှင်များထံမှ သိရသည်။
မြန်မာနိုင်ငံတွင် ကြံစိုက်ပျိုးမှု ဧကသည် ၄ သိန်းခန့်ရှိကြောင်း၊ ကြံကို စစ်ကိုင်းတိုင်းဒေသကြီး အထက်ပိုင်း၊ ရှမ်းပြည်နယ် မြောက်ပိုင်းနှင့် တောင်ပိုင်း၊ ပဲခူးတိုင်းဒေသကြီး အရှေ့ပိုင်းတို့တွင် အများဆုံး စိုက်ပျိုးကြကြောင်း သိရသည်။
- By CNI
- Category: စီးပွားရေး
- Hits: 642
CNI News
၂၀၂၂ ခုနှစ်၊ ဇွန်လ ၂၇
ရခိုင်ပြည်နယ်တွင် လက်ရှိ နယ်မြေ မငြိမ်မသက်မှုများကြောင့် ဒေသခံ ကုန်သည်များ၏ ကုန်သွယ်မှုမှာ ကျဆင်းနေကြောင်း သိရသည်။
မောင်တော နယ်စပ်ကုန်သွယ်ရေးတွင် ကုန်သွယ်မှုသည် ယခုရက်ပိုင်းအတွင်း ပုံမှန်ထက် တစ်ဝက်ခန့် ကျဆင်းသွားကြောင်း၊ စစ်တွေ နယ်စပ်ကုန်သွယ်ရေး၌ ကုန်တင်ကုန်ချ မရှိသလောက် ဖြစ်သွားကြောင်း ဒေသခံကုန်သည်များထံက သိရသည်။
မောင်တော ကုန်သည် ကိုသန်းနိုင်က “အရင်ထက်စာရင်တော့ နည်းပါတယ်။ တစ်ဝက်လောက် ကျသွားတာပေါ့။ ကုန်သည် တွေက အလုပ်မဖြစ်ဘူးပေါ့။
လာတာက ငါးမြစ်ချင်း တစ်ခုလောက်ပဲ ရှိတယ်။ ပြည်ပက ဝယ်လိုအား နည်းတယ်။ အဲဒီဘက် နိုင်ငံမှာ ပွဲတော်လာပြီဆိုတော့ နည်းနည်း ဝယ်လိုအား နည်းသွားတဲ့သဘော။ ပြီးရင် အဲဒီဘက်နိုင်ငံမှာ အခွန်ခတွေ ဈေးတင် လိုက်တာကို။ ဈေးတင်လိုက်တော့ ဟိုဘက်ကို ပို့ရတဲ့ဟာနဲ့ မကိုက်တော့ဘူး”ဟု CNI သတင်းဌာနသို့ ပြောသည်။
လက်ရှိတွင် ဒေသခံ ကုန်သည်များသည် ကုန်သွယ်ရေး အခြေအနေကို စောင့်ကြည့်နေကြောင်း၊ ယခင်က ပစ္စည်း ၁၀ မျိုး ဝယ်သည့် ကုန်သည်သည် လက်ရှိမှာတော့ ၃ မျိုးခန့်သာ ဝယ်တော့ကြောင်း၊ ပြည်ပနိုင်ငံနှင့် ဒေသခံပြည်သူများမှ ဝယ်လိုအား များ ကျဆင်းနေကြောင်း ရခိုင်ပြည်နယ် ကုန်သည်နှင့်စက်မှုအသင်းချုပ် ဥက္ကဋ္ဌ ဦးတင်အောင်ဦးက CNI သတင်းဌာနသို့ ပြော သည်။
ရခိုင်ပြည်နယ် ဒေသခံများကိုတွေ့ရစဉ်
ဥက္ကဋ္ဌ ဦးတင်အောင်ဦးက “သူ့လက်ထဲမှာတော့ ပြောရမယ်ဆိုရင် ကုန်သည် လက်ထဲမှာတော့ အရမ်း သိပ်မထားတော့ဘူး။ ရောင်းအား၊ ဝယ်အားလည်း အဲဒီလိုမျိုးပဲ ကျဆင်းသွားတယ်ဆိုတဲ့ အနေအထားကတော့ အဲဒီအပေါ်မှာလည်း သက်ရောက်မှု တွေ ရှိပါတယ်။ ကုန်သွယ်မှု ပမာဏ လျော့နည်းလာတယ် ဆိုတာလည်း ခုနကပြောသလို ဒေသ မတည်ငြိမ်မှု ဆိုရင်တော့ ဒါ ကုန်သွယ်မှု ပမာဏကတော့ ကျဆင်းလာမှာပါပဲ။ ဘာလို့ဆို ကုန်သည်တွေမှာလည်း ပြောရမယ်ဆိုရင် ရန်ကုန် ကနေပြီးတော့ ဝယ်ရတဲ့ ပမာဏကို လျှော့ပြီး ဝယ်ရတယ်။ ဘာလို့ဆို ဒီဘက်မှာ တဆင့် ပြန်ရောင်းတဲ့ အချိန်မှာလည်း ကျန်တဲ့ come user ဆီ ရောက်ဖို့ဟာလည်း ခါတိုင်းဝယ်နေကျထက် လျှော့ပေါ့ပြီး ဝယ်လာကြတယ်။ ဆိုတော့ ရောင်းရေး ဝယ်ရေး တွေကတော့ နည်းနည်းလေး အေးပြီးတော့ ခက်ခဲလာနေတယ်ဆိုတဲ့ အနေအထားတော့ ရှိပါတယ်” ဟု ပြောသည်။
လက်ရှိတွင် တပ်မတော်နှင့် ရက္ခိုင့်တပ်တော် ULA/AA တို့အကြား နှစ်ဖက် အပြန်အလှန် ဖမ်းဆီးမှုများ ရှိနေသဖြင့် ကုန်သည် အပါအဝင် ဒေသခံပြည်သူများသည် သွားရေးလာရေး စိုးရိမ်မှုများ ရှိနေကြကြောင်း၊ ထိုသို့ စိုးရိမ်မှုများကြောင့် အပြင်မထွက် ရဲကြတော့ပဲ ဖြစ်ကာ ကုန်သွယ်မှု ကျဆင်းလာနေကြောင်း ရခိုင်ပြည်နယ် ကုန်သည်နှင့်စက်မှုအသင်းချုပ်မှ အတွင်းရေးမှူး ဦးအောင်အောင်က CNI သတင်းဌာနသို့ ပြောသည်။
ဦးအောင်အောင်က “ဒီရက်ပိုင်း အတွင်းမှာတော့ သွားရေးလာရေးက ကြပ်တည်းတဲ့ အခါကျတော့ ကုန်စည်စီးဆင်းမှုတွေ နှောင့်နှေးတာတွေ ဖြစ်ကုန်တာပေါ့။ ပြီးတော့ ဈေးလည်း သိပ်မကိုက်ဘူး။ ရောင်းကုန်တွေက ဈေးတော့ ရှိတယ်။ ဒါပေမယ့် ကုန်ကျစရိတ်တွေက များလာတာပေါ့။ သွားရေးလာရေးတွေက ရေကြောင်းပိုင်း ကနေပြီးတော့ သွားလာလို့ မရဘူး။ Passenger တွေကို ကန့်သတ်ထားတာပေါ့။ ကုန်းလမ်းကတော့ သွားလို့ရပါတယ်။ ဒါပေမယ့် စိုးရိမ်ကြောက်လန့်မှုတွေနဲ့ နေပြီးတော့။ ရေရှည်ဆိုရင်တော့ ကျနော်တို့ ရခိုင်ဘက်က မှီခိုနေရတာပေါ့။ မြန်မာဘက်က ပစ္စည်းတွေမလာရင် ကုန်ဈေး နှုန်း တက်တာတွေ ဖြစ်လာမှာပေါ့။ အဓိကက ဒီဘက်က ကုန်စည်ထဲမှာဖြစ်တာက ဆန်စပါးက သားငါးပဲ ဖြစ်တာလေ။ ကျန် တဲ့ မီးဖိုချောင်သုံး ပစ္စည်းတွေကအစ နိုင်ငံခြားက တင်ပို့တဲ့ import ပစ္စည်းတွေလည်း အပါပေါ့။ အဲဒီလိုမျိုး ကုန်းလမ်းခရီးမှာ စစ်ဆေးမှုတွေ များမယ်ဆိုရင်တော့ မကောင်းဘူးပေါ့နော်။ ဒီဘက်မှာ ကုန်ဈေးနှုန်း တက်တာတို့ ဘာတို့ဖြစ်လာနိုင်တယ်” ဟု ပြောသည်။
ပြီးခဲ့သည့် မေလတွင် ရခိုင်နယ်စပ်ကုန်သွယ်ရေးတွင် ကုန်သွယ်မှု ပမာဏသည် ဧပြီလကထက် တိုးတက်လာသော်လည်း ယခု ဇွန်လမှာတော့ ကုန်သွယ်မှုပမာဏ နည်းနိုင်ကြောင်း ကုန်သည်များက ပြောသည်။
- By CNI
- Category: စီးပွားရေး
- Hits: 730
CNI News
၂၀၂၂ ခုနှစ်၊ ဇူလိုင် ၂၇
တရုတ်နိုင်ငံနှင့် ကုန်သွယ်မှုပြုလုပ်နေသည့် ကချင်ပြည်နယ်ရှိ နယ်စပ်ကုန်သွယ်ရေးစခန်းများသို့ ကုန်စည် ပို့ဆောင်ပေးနေသည့် ကုန်ကားများမှာ ယခင်ကထက် သွားလာမှု နည်းပါးသွားကာ ၎င်းမှာ အဓိက ငှက်ပျော တင်ပို့မှုရာသီ ကုန်ဆုံးခါနီးကြောင့်ဟု ကုန်ကားသမားများထံမှ သိရသည်။
ဒါ့အပြင် ကုန်ကားအများစုမှာ မိုးများခြင်း၊ တောင်ပြိုခြင်းစသည့်အခြေအနေများကြောင့် ရပ်နားလာကြခြင်း ဖြစ်သည်ဟု ကန်ပိုက်တည်မှ ကုန်ကားသမားတစ်ဦးဖြစ်သူ ကိုရှမ်းကြီးက CNI သတင်းဌာနသို့ ပြောသည်။
“ဘယ်နှစ်စီးလောက် ရှိမလဲဆိုတော့ အခုတော့ ၃၀ ကျော် ၄၀ အဲပတ်လည်လောက်ပဲ ပြေးနေတာ။ အရင်တုန်းက အစီး ၅၀၀၊ ၆၀၀၊ ၁၀၀၀ ကျော်ပေါ့ ပထမတုန်းက ငှက်ပျောပေါတုန်းကတော့။ အခုငှက်ပျောကလည်း ကုန်တော့ မှာ ရပ်ခါနီးပြီ။ မိုးလည်း တအားများတယ်လေ။ အခုတောင်ပြို ဘာပြို အဲလိုတွေ ဖြစ်နေပြီ။
အကုန်လုံး ရပ်ထား ရမှာပဲ။ ကြားထဲ ငှက်ပျောကလည်း နည်းနည်းပါးလာပြီလေ။ အခုက ခြံသိမ်းပုံစံမျိုးဖြစ်နေပြီ။ ခြံသိမ်းပုံစံမျိုး ဖြစ်နေတော့ နားဖို့ကများတယ်။ ၇ လပိုင်းထဲမှာဆိုရင်တော့ ၇ လပိုင်းမကုန်ခင်ဆို ငှက်ပျောကကုန်လောက်ပြီ။ အကုန်နားပြီ ၇ လပိုင်းထဲမှာဆိုရင်” ဟု ပြောသည်။
ယခုအချိန်သည် ငှက်ပျောကုန်စည်တစ်မျိုးတည်းသာ တင်ပို့နေရကြောင်း၊ ငှက်ပျောသည်လည်း ကုန်တော့မည် ဖြစ်ခြင်းကြောင့် ဇူလိုင်လတွင် ကုန်တင်ကားများ ရပ်နားတော့မည်ဖြစ်ကာ တခြားသော လမ်းကြောင်းများကိုသာ ပြေးဆွဲရတော့မည်ဖြစ်ကြောင်း ကိုရှမ်းကြီးက ဆက်ပြောသည်။
“အခု ၄ လပိုင်းနားရင်လည်း ဒီလိုပဲ ကားပြင် ဘာပြင် ဒီလိုပဲ နားရတာပဲ။ ထွက်တာ ဘယ်လိုမှ အဆင်မပြေတော့ လေ။ အဆင်မပြေတော့ အဲလိုပဲ နားရတာ။ နားပြီးတော့မှ လုပ်ငန်းစမှ ပြန်လုပ်ပေါ့။ အဲလိုပဲ လုပ်နေကြရတာ။ အခက်အခဲကတော့ ရှိတာပေါ့။ ဝင်ငွေမရှိတော့ဘူးလေ အဲအချိန်ကျတော့ ၃ လ၊ ၄ လက။ မူဆယ်ဘက်လည်း သွားလို့ရ၊ မြဝတီဘက်လည်း သွားလို့ရသူက ပါးပါးပေါ့။ ပုံမှန်အခြေအနေလောက်ပဲ ရှိမှာပဲ။ နည်းနည်းတော့ ကြန့်ကြာတာပေါ့။ တစ်လမှာ နှစ်ခေါက်လိုလို ဘာလိုလို တစ်ခေါက်ခွဲလိုလို အဲလိုပဲ ဖြစ်သွားတာပေါ့” ဟု ၎င်းက CNI သို့ ပြောသည်။
ကန်ပိုက်တည်ကုန်သွယ်ရေးစခန်တစ်ခုကိုတွေ့ရစဉ်(ဓါတ်ပုံ-credit)
ဒါ့ထက် မိုးအဆက်မပြတ် ရွာသွန်းမှုကြောင့် ဗန်းမော် - လွယ်ဂျယ်သွားရာ လမ်းပိုင်းပျက်စီးမှုများ ရှိနေသည့် အတွက် မိုးရာသီတွင် ကုန်ကားပြေးဆွဲမှုကို ရပ်နားထားခြင်းဖြစ်သည်ဟုလည်း လွယ်ဂျယ်မှ ကုန်ကားသမား တစ်ဦးဖြစ်သူ ကိုထွဋ်ဇော်က ပြောသည်။
“ကျနော် လွယ်ဂျယ်ဘက် မသွားတော့ဘူး။ မိုးတွင်းမို့ လမ်းတွေက ဆိုးသွားတော့။ မိုးတွင်းကျတော့ ကျနော်တို့ ကားလေးတွေကျတော့ နားလိုက်တာပေါ့။ ပွင်းလင်းရာသီ ပြန်လုပ်မှာ။ ဗန်းမော်ကားတွေတော့ တက်ကြတယ်။ ဗန်းမော်သွားတဲ့ကားက သွားကြ။ နားနေတဲ့ကားက နားနေကြတာပေါ့” ဟု ၎င်းက CNI သို့ ပြောသည်။
ကန်ပိုက်တည် ကုန်သွယ်ရေးစခန်းနှင့် ဗန်းမော် - လွယ်ဂျယ် ကုန်သွယ်ရေးစခန်းတို့သည် ကချင်ပြည်နယ်အတွင်း မှ ထွက်ရှိသည့် ငှက်ပျော၊ ကြံ၊ ပဲ၊ ပြောင်း၊ ဖရဲ၊ ဆန် စသည့် သီးနှံများကို တရုတ်နိုင်ငံသို့ တင်ပို့နေခြင်းဖြစ်သည်။
ဗန်းမော် - လွယ်ဂျယ် နယ်စပ်ကုန်သွယ်ရေးစခန်းတွင် ကုန်ကားအစီးရေ ၁၀၀ ကျော်သွားလာနေသော်လည်း ယခုအချိန်တွင် တစ်ရက်လျှင် အစီးရေ ၂၀ ခန့်သာ ပြေးဆွဲကြောင်း သိရသည်။
ထို့နောက် ကန်ပိုက်တည် နယ်စပ်ကုန်သွယ်ရေးတွင်လည်း ယခင်က အစီးရေ ၁၀၀၀ နီးပါးပြေးဆွဲသော်လည်း လက်ရှိတွင် အစီးရေ ၃၀ ကျော်သာ ကျန်ရှိတော့ကြောင်းနှင့် ဇူလိုင်လကုန်တွင် ကုန်တင်ကားအားလုံးနီးပါး ရပ်နား တော့မည်ဖြစ်ကြောင်း သိရသည်။
- By CNI
- Category: စီးပွားရေး
- Hits: 968
CNI News
၂၀၂၂ ခုနှစ်၊ ဇွန်လ ၂၅
ထိုင်းအစိုးရမှ နယ်စပ်ဒေသတွင် Border Pass(နယ်စပ်ဖြတ်သန်းခွင့် လက်မှတ်)ဖြင့် မြန်မာအလုပ်သမားများ ခေါ်ယူရန် ခွင့်ပြုသော်လည်း နှစ်နိုင်ငံနယ်စပ်ဂိတ်များ မဖွင့်သေးသရွေ့ မြန်မာအလုပ်သမားများ လာရောက် အလုပ်လုပ်ကိုင်၍ မရ ကြောင်း မြန်မာအလုပ်သမားအရေး ဆောင်ရွက်နေသူများထံက သိရသည်။
ထို့ကြောင့် နှစ်နိုင်ငံ နယ်စပ်ဂိတ်များ ပြန်လည် ဖွင့်လှစ်ပေးသင့်ကြောင်းနှင့် နယ်စပ်ဂိတ်များ ပြန်ဖွင့်ပါက နယ်စပ်များတွင် Border Pass ဖြင့် သွားရောက်လုပ်ကိုင်မည့် အလုပ်သမားများအတွက် အဆင်ပြေမည်ဖြစ်ကြောင်း မြန်မာ အလုပ်သမား အရေး ဆောင်ရွက်နေသည့် ကိုသားကြီးက CNI သတင်းဌာနသို့ ပြောသည်။
ကိုသားကြီးက “ဒီလက်မှတ်ကို ဖွင့်မယ်လို့သာ ထိုင်းက ကြေညာပေမယ့် နယ်စပ်ဂိတ်တွေကို ဖွင့်နိုင်အောင်လည်း သူက လုပ် ရမယ်။ ဘာကြောင့်လဲဆိုတော့ တံတားကြီး ပိတ်ထားပြီးတော့မှ လူအသွားအလာ မရှိဘဲနဲ့ Border Pass က ဒီနယ်စပ်ကနေ ထုတ်ပေးလို့ မရဘူးလေ။ လူအသွားအလာ ရှိမှ Border Pass ရဲ့ ဥပဒေအရ ထုတ်ပေးလို့ရမှာ ဖြစ်တယ် လူအသစ်တွေကို။ ကျနော် ထင်ပါတယ်။ ထိုင်းက ဘယ်လောက်ပဲ အဆင်သင့်ဖြစ်ဖြစ် မြန်မာဘက်က တံတားတွေဖွင့်ဖို့၊ နယ်စပ်တွေဖွင့်ဖို့၊ လူကူးသန်း သွားလာဖို့အတွက် ခွင့်ပြုချက် မရမချင်းကတော့ ဒီ Border Pass ကလည်း အကျုံးဝင်မယ်လို့ ကျနော် မထင်ပါဘူး။ ဒါပေမယ့် နှစ်နိုင်ငံလူကြီးတွေ၊ သက်ဆိုင်ရာတွေက စကားပြောလို့ အဆင်ပြေတယ် ဆိုလို့ရှိရင်တော့ နယ်စပ်ဂိတ်တွေ ဖွင့် လိုက်ပြီး လူကူးသန်း သွားလာလို့ ရပြီဆိုရင်တော့ Border Pass ကလည်း အကျုံးဝင်မယ်။ နောက် ဒီနယ်စပ်မှာ အလုပ်လုပ် မယ့် မြန်မာပြည်သူတွေအတွက် မြန်မာရွှေ့ပြောင်း အလုပ်သမားတွေအတွက် ပိုမိုပြီးတော့မှ အဆင်ပြေမယ်။ ဒါဟာ လွယ် လွယ် ကူကူ ဒီ worker တုံးလေး ထုပြီးတော့ Border Pass စာအုပ်ထဲမှာ သွေးစစ် ဒီဘက်မှာ Work permit လေးလုပ်ပြီး တော့မှ အလုပ်လုပ်ခွင့် ရမှာပေါ့” ဟု ပြောသည်။
နှစ်နိုင်ငံ နယ်စပ်ဂိတ်များအား ထိုင်းအစိုးရမှ ပြန်လည် ဖွင့်လှစ်ချင်သော်လည်း မြန်မာဘက်မှ တာဝန်ရှိသူများနှင့် ညှိနှိုင်း ဆွေးနွေးကြရာတွင် အဆင်မပြေဖြစ်ကာ နယ်စပ်ဂိတ် အချို့အား ယနေ့အထိ မဖွင့်လှစ်နိုင်သေးကြောင်း သိရသည်။
တာချီလိတ်-မယ်ဆိုင် နယ်စပ်ဂိတ် ဖြတ်သန်းခွင့်ထုတ်ပေးသော နေရာ
ထိုင်းနိုင်ငံသို့ Border Pass ဖြင့် သွားရောက် လုပ်ကိုင်လိုသည့် မြန်မာ အလုပ်သမားအသစ်မှာ ၅၀၀၀၀(ငါးသောင်း)နီးပါးခန့် ရှိကြောင်း၊ ကိုဗစ်ကြောင့် ထိုင်းနိုင်ငံ နယ်စပ်တွင် ပိတ်မိနေခဲ့သည့် Border Pass မြန်မာအလုပ်သမားများမှာ ၁၀၀၀၀၀ (တစ်သိန်း) ကျော်ရှိကြောင်း သိရသည်။
Border Pass ဖြင့် လာရောက် လုပ်ကိုင်မည့် သူများသည် တစ်ဦးလျှင် Work permit သုံးလ (ရက် ၉၀) ရရှိပြီး တစ်လ တစ်ကြိမ် ဆေးစစ်ရကြောင်း၊ သုံးလ ပြည့်သွားပါက မိမိနေရပ်သို့ တစ်ပတ်ခန့် အပြန် ပြရကြောင်း၊ ထိုသို့ အပြန်ပြပြီးနောက် ထပ်မံပြန်ဝင်၍ရကြောင်း သိရသည်။
Border Pass ဖြင့် အလုပ်လုပ်ကိုင်ရာတွင် အလုပ်သမား အခွင့်အရေး အပြည့်အဝ မရှိခြင်း၊ ချိုးဖောက်ခံရခြင်း၊ ခေါင်းပုံဖြတ် ခြင်း စသည်တို့ ကြုံတွေ့ရနိုင်ကြောင်း ထိုင်းတွင် အလုပ်သမားအရေး ဆောင်ရွက်နေသည့် Arakan Workers Organization မှ ဒါရိုက်တာ ကိုနိုင်အောင်အောင်က CNI သတင်းဌာနသို့ ပြောသည်။
ကိုနိုင်အောင်အောင်က “အလုပ်သမား အခွင့်အရေးကတော့ ထိုင်းနိုင်ငံ ဥပဒေမှာကျတော့ ပြောပြီးသားပဲလေ။ ထိုင်းနိုင်ငံမြေ ကို လာနင်းလိုက်တာနဲ့ ဘယ်လုပ်ငန်းရှင်မဆို အလုပ်သမားတစ်ယောက်ကို အလုပ်ခိုင်းတဲ့ အခါကျတော့ ထိုင်းနိုင်ငံ အခြေခံ ဥပဒေ လုပ်ခလစာကို ပေးကိုပေးရမယ်။ သို့သော်လည်း တချို့သော လုပ်ငန်းရှင်တွေက အထောက်အထားတွေကို ကြည့်ပြီးမှ လုပ်ခလစာတွေ အပြည့်အဝ မပေးတာတို့၊ အထောက်အထားတွေ ကြည့်ပြီးတော့မှ အလုပ်သမားအခွင့်အရေး ချိုးဖောက်တာ တို့ ဒါတွေလည်း တွေ့ရတာပေါ့။ ဒါတွေက ဥပဒေအတိုင်း ပေးစရာမလိုဘူး ဘာညာလုပ်ပြီးတော့ လာဘ်စားတာတို့၊ ချိုး ဖောက်တာတို့ ရှိတယ်” ဟု ပြောသည်။
Border Pass ဖြင့် သွားရောက် အလုပ်လုပ်ကိုင် မည်ဆိုပါက အဆိုပါ နိုင်ငံက သတ်မှတ်ထားသည့် နယ်မြေများမှလွဲ၍ အခြား နယ်မြေများသို့ ကျော်လွန်ပြီး အလုပ်လုပ်ခွင့် မရှိကြောင်း သိရသည်။
ကိုသားကြီးက“နှစ်နိုင်ငံ နယ်စည်းခြားထားတဲ့ နေရာကနေ ကီလို ဘယ်လောက်ပေါ့။ ဥပမာ မိုင် ဘယ်လောက်ဆိုပြီး သတ် မှတ် ထားတယ်။ ဘယ်ခရိုင် ဘယ်မြို့နယ်အထိပဲ ဆိုတာကို သတ်မှတ်ထားတယ်။ အဲဒါကို ကျော်လွန်ပြီးတော့ သွားမယ် ဆိုရင်တော့ လုပ်လို့မရဘူး။ ပြောချင်တာက မြဝတီ-မဲဆောက် နယ်စပ်မှာ အလုပ်လုပ်မယ့် မြန်မာပြည်သူတွေဟာ မဲဆောက် တံတား မဖွင့်သေးဘူး။ လူကူးသန်း သွားလာလို့ မရသေးဘူးဆိုရင်လည်း ဒီမှာ အလုပ်လုပ်ဖို့အတွက် အခြားနယ်စပ်ကနေ Border Pass နဲ့ဝင်လို့ မရဘူးဆိုတဲ့ အကြောင်းကိုလည်း ပြောချင်တယ်”ဟု ပြောသည်။
လက်ရှိတွင် နှစ်နိုင်ငံ နယ်စပ်ဂိတ်များထဲကမှ ကော့သောင်း-ရနောင်း ဂိတ်ကိုသာ လူအဝင်/အထွက် ပြုလုပ်ခွင့် ပြုထားပြီး ကျန်ဂိတ်များမှာ ပိတ်ထားခြင်းနှင့် ကုန်သွယ်ခြင်းတို့သာ ပြုလုပ်လျက်ရှိကြောင်း သိရသည်။
- By CNI
- Category: စီးပွားရေး
- Hits: 754
CNI News
၂၀၂၂ ခုနှစ်၊ ဇွန်လ ၂၄
မြန်မာ့ရေပိုင်နက်အတွင်း ငါးဖမ်းဆီးရရှိမှုသည် မိုင်းခွဲပြီး ဖမ်းဆီးမှုနှင့် တရားမဝင်ဖမ်းဆီးမှုများကြောင့် နှစ်စဉ် လျော့ကျနေ သည်ဟု မြန်မာနိုင်ငံ ငါးလုပ်ငန်းဦးစီးဌာနမှ သိရသည်။
မိုင်းခွဲ၍ ငါးဖမ်းဆီးမှုများကြောင့်နှင့် ငါးဖမ်းပိုက်စိပ်စိပ်များဖြင့် ဖမ်းဆီးမှုများကြောင့် မြန်မာ့ရေပိုင်နက်အတွင်း ငါးသယံဇာတ ဆုံးရှုံးမှုနှင့် ဂေဟစနစ် ပျက်စီးမှုများ ဖြစ်ပေါ်နေသည်ဟု မြန်မာနိုင်ငံ ငါးလုပ်ငန်းအဖွဲ့ချုပ် ဒုတိယဥက္ကဋ္ဌ ဒေါ်တိုးနန္ဒာတင်က CNI သတင်းဌာနသို့ ပြောသည်။
ဒေါ်တိုးနန္ဒာတင်က “တရားမဝင် ဖမ်းဆီးတဲ့ ဟာတွေကတော့ ပိုက်ကွက် သေးပြီးတော့မှ ခြင်တောင်မှ ဝင်လို့မရတဲ့ ပိုက်ကွက် မျိုးပေါ့နော်။ အဲလိုမျိုး တရားမဝင် ဖမ်းတဲ့ ဟာမျိုးလေးတွေကြောင့်လည်း ဒါတွေကို တားဆီးရမှာကတော့ အမှန်ပဲပေါ့။ ဟိုး အရင်တုန်းက မိုင်းခွဲတယ်ဆိုတာလည်း ထိုင်းဘက်က လာတဲ့ နည်းပညာတွေပေါ့။ မြန်မာက ဆိုလို့ရှိရင် ငါးဖမ်းနည်း အကုန် လုံးကို ထိုင်းကနေပဲ သင်တဲ့သဘောမျိုး ရှိတာပေါ့။ ထိုင်းဘက်က မိုင်းခွဲတဲ့ဟာလည်း ပါလာတဲ့ အခါကျတော့ အရင်တုန်းက တော့ ရှိတယ်ပေါ့နော်။ အခုနောက်ပိုင်းတော့ သိပ်တော့ မကြားဘူးပေါ့လေ။ မိုင်းခွဲရင်တော့ အကုန်လုံး ဂေဟစနစ် ပျက်သွား တာပေါ့။ ဂေဟစနစ် ပျက်တဲ့အတွက်ကြောင့် ဒါတွေက တားဖို့ လိုတာပေါ့။ ခွဲတဲ့နေရာမှ ဥပမာ သန္တာကျောက်တန်း ရှိရင် လည်း သန္တာကျောက်တန်း ပျက်မှာပဲလေ” ဟု ပြောသည်။
မြန်မာ့ ရေပိုက်နက်အတွင်း ငါးသယံဇာတတည်ရှိမှု အခြေအနေနှင့်စပ်လျဉ်း၍ နော်ဝေသုတေသန ရလဒ်များအရ မြန်မာ့ ပင်လယ် ပြင်တွင် ပင်လယ် ငါးထုတ်လုပ်မှု အပါအဝင် ရေချိုငါး ထုတ်လုပ်မှုများနှင့် ငါးဖမ်းဆီးရရှိမှုများ တစ်နှစ်ထက် တစ်နှစ် သိသိသာသာ လျော့နည်းလာကြောင်း ဖော်ပြထားသည်။
ငါးဖမ်း သမားတစ်ဦး (ဖရွန်းတီးယားမြန်မာ)
၂၀၁၈ ခုနှစ်တွင် ငါးပမာဏသည် လွန်ခဲ့သည့် ၁၉၈၀ ပြည့်နှစ်များနှင့် နှိုင်းယှဉ်ပါက ၈၀ ရာခိုင်နှုန်းအထိ လျော့နည်းသွား ကြောင်း မြန်မာနိုင်ငံ ငါးလုပ်ငန်းဦးစီးဌာနမှ သိရသည်။
ထို့ကြောင့် ငါးလျော့ကျနေမှုကို ကာကွယ်ရန်အတွက် ငါးမဖမ်းရ ရာသီကို (၃)လ သတ်မှတ်ပြီး တားမြစ်ထားသည်ဟု မြန်မာနိုင်ငံ ငါးလုပ်ငန်းအဖွဲ့ချုပ် ဒုတိယဥက္ကဋ္ဌ ဒေါ်တိုးနန္ဒာတင်က ပြောသည်။
၎င်းက “ငါးမဖမ်းရ ရာသီလို့ လုပ်ထားတာလေ။ လျော့ကျတဲ့ အတွက်ကြောင့် ငါးမဖမ်းရ ရာသီဆိုတဲ့ ဟာမျိုးကို ကျမတို့ ငါးလုပ်ငန်း ဦးစီးဌာနကနေပြီးတော့ တရားဝင် ထုတ်ပြန်ပြီးတော့ လုပ်ရတာပေါ့။ အဲဒါ ၃၀ ရာခိုင်နှုန်းလောက်ကို သူတို့ ဖွင့်ပေးလိုက်ပါတယ်။ အဲဒါ သူတို့ရဲ့ အခက်အခဲ အမျိုးမျိုး ကြုံတွေ့နေရတယ်ဆိုပြီးတော့ သူတို့ ဝန်ကြီးဌာနကိုလည်း တင်ပြတယ်ပေါ့နော်။ အကုန်လုံးကို တင်ပြတဲ့အခါမှာ တစ်လကို လျှော့ပေးလိုက်တယ်။ လျှော့ပေးလိုက်တာကလည်း အကုန်လုံး လျှော့ပေးလိုက်တာ မဟုတ်ဘူးပေါ့။ ၃၀ ရာခိုင်နှုန်းပဲ ဖွင့်ပေးလိုက်တဲ့ သဘောပါပဲ။ မေလ၊ ဇွန်လ၊ ဇူလိုင် ကျမတို့ ပိတ်တယ်မလား ဇူလိုင်မှာ ၃၀ ရာခိုင်နှုန်း ထွက်နိုင်တယ်ဆိုတဲ့ သဘောမျိုး ရှိပါတယ်” ဟု CNI သတင်းဌာနသို့ ပြောသည်။
မိုင်းခွဲပြီး တရားမဝင် ငါးဖမ်းဆီးမှုကို တနင်္သာရီကမ်းရိုးတမ်းတွင်သာ အများဆုံး တွေ့ရှိရပြီး တခြားသော တိုင်းဒေသကြီးနှင့် ပြည်နယ်များရှိ ကမ်းရိုးတမ်းများတွင် အသုံးပြုမှု မရှိကြောင်း ငါးလုပ်ငန်း လုပ်ကိုင်သူများက ပြောသည်။
ထို့အပြင် ငါးဖမ်းရရှိမှု လျော့နည်းနေခြင်း၊ ကုန်ကျစရိတ်များ မြင့်တက်နေခြင်း၊ စက်သုံးဆီဈေးနှုန်း မြင့်မားနေမှုခြင်း တို့ကြောင့် လက်ရှိတွင် ငါးဖမ်းလုပ်ငန်း လုပ်ကိုင်သူ လျော့ကျလာလျက် ရှိကြောင်း သိရသည်။
- By CNI
- Category: စီးပွားရေး
- Hits: 917
CNI News
၂၀၂၂ ခုနှစ်၊ ဇွန်လ ၂၃
နိုင်ငံရေးအပြောင်းအလဲ ဖြစ်ပွားပြီးနောက်ပိုင်း စီးပွားရေး ကြပ်တည်းလာကာ စားဝတ်နေရေး ဖြေရှင်းနိုင်ရန်အတွက် ဆံပင် ဖြတ်၍ ရောင်းချသူများသည် ပုံမှန် အခြေအနေများထက် ထက်ဝက်ခန့် များပြားလာကြောင်း ဆံပင်ရောင်းဝယ်သူများနှင့် အဝယ်ဒိုင်များထံမှ သိရသည်။
ထို့နောက် ဆံပင်ရောင်းဝယ်ရေး လုပ်ငန်းကို ရန်ကုန်မြို့နှင့် တခြားသော တိုင်းဒေသကြီးများပင် ယခင်ကထက် လုပ်ကိုင်လာ သူ များပြားကြောင်း ရန်ကုန်မြို့ရှိ ပြည့်စုံဆံပင်ရောင်းဝယ်ရေးမှ ဆိုင်ပိုင်ရှင်က CNI သတင်းဌာနသို့ ပြောသည်။
၎င်းက “အခုက လုပ်လာတာ ၃ ချိုး ၁ ချိုးလောက် များလာတယ်။ နောက် အခုနောက်ပိုင်းက နည်းနည်း ဆံပင် အဝယ်ဒိုင် ဆို ပြီးတော့ ဆိုင်းဘုတ် ရေးတာကျတော့ အမှန်ကတော့ ဝယ်ရောင်းပစ္စည်းပါပဲ။ အဝယ်ဒိုင်လို့ ရေးထားတာကလည်း လူရှိန်တာ ပေါ့နော်။ အဝယ်ဒိုင်ဆိုတာက ဘယ်က ဆံပင်ပဲလာလာ၊ ပမာဏ ဘယ်လောက်ပဲ များများ၊ ကုန်အောင် သုံးနိုင်တာမျိုးမှ အဝယ်ဒိုင်လို့ခေါ်တာ အခုနောက်ပိုင်း ရောင်းတဲ့သူတွေကလည်း ဒိုင်ဆိုတော့ နည်းနည်း အထင်ကြီးကြတာပေါ့။ ဈေးကတော့ တူတူပါပဲ” ဟု ပြောသည်။
ဆံပင်ရောင်းဝယ်ရေး လုပ်ငန်းသည် ယခင်ကတည်းက ရှိခဲ့သော်လည်း လက်ရှိတွင် စီးပွားရေး ကျပ်တည်းမှုနှင့် အလုပ်အကိုင် အခွင့်အလမ်း ရှားပါးမှုများကြောင့် ပိုမို လုပ်ကိုင်လာကြောင်း၊ အဝယ်ဒိုင်များဖွင့်လှစ်၍ ရောင်းဝယ်မှု ပြုလုပ်လာကြကြောင်း၊ ထိုဆံပင်များကို တရုတ်နိုင်ငံသို့ တင်ပို့ကြကြောင်း ပုသိမ်မြို့မှ စီးပွားရေးလုပ်ငန်းရှင် ဦးနေဝင်းစိုးက ပြောသည်။
ဆံပင် အဝယ်ဒိုင် တစ်ခု (Reuters)
ဦးနေဝင်းစိုးက “ကျနော်တို့ ပုသိမ်တစ်မြို့တည်းမှာတင် ဒိုင်ကြီးဖွင့်ပြီးတော့ ဝယ်နေတာ ၃ ခုလောက် ရှိတယ်။ ဆံပင် အရောင်းအဝယ် တော်တော်ဖြစ်ကြတယ်။ ဒါကတော့ အခုမှရယ် မဟုတ်ဘူးဗျ။ အရင်နှစ်တွေ ကတည်းက ရှိတယ်။ ဆံပင် ရောင်းဝယ်ရေး ဒိုင်ဖွင့်ပြီးတော့ ရောင်းနေတာက အဓိကက သူတို့က ဒိုင်ဖွင့်ပြီးတော့ ဝယ်တယ်။ ဝယ်ပြီးတော့ အတိုအရှည်၊ အရှည်ဆိုလည်း အရှည် ပြန်သန့်တယ်။ ရှုပ်ပွနေတဲ့ ဆံပင်ချည် ထွေးတွေကနေ အရှည်ပြန်ရအောင် လုပ်သားအင်အားနဲ့ ပြန် ခွဲတာရှိတယ်။ အတိုဆိုလည်း စုစည်းပြီးတော့ ပြန်ခွဲထုတ်တယ်။ ပြီးတော့ အဲဒါတွေ အားလုံးကို အထုပ်တွေ ထုတ်ပြီးတော့ မူဆယ်ကနေ တရုတ်ကို ပို့တာဗျ” ဟု CNI သတင်းဌာနသို့ ပြောသည်။
မြန်မာနိုင်ငံတွင် ဆံပင်ကို ပြန်လည်အသုံးပြုသူ နည်းပါးသည့်အတွက် ပြည်ပသို့ အဓိက တင်ပို့၍ ဈေးကွက် ရှာဖွေကြ ကြောင်း၊ ထို့နောက် ပြည်ပပို့ကုန်ပစ္စည်း ဖြစ်လာကာ ဈေးကောင်းရကြောင်း သိရသည်။
လက်ရှိတွင် ၃ ပေ အရှည်ရှိသည့် ဆံပင်ကို တစ်ပိဿာလျှင် သိန်း ၂၀ ဈေးနှုန်းရှိသည်ဟု ပြည့်စုံဆံပင်ရောင်းဝယ်ရေး၏ ဆိုင်ပိုင်ရှင်က ပြောသည်။
၎င်းက “အရင်ကထက် စာရင်တော့ အခုတော့ ဈေးက ကောင်းလာတာ များပါတယ်။ ဘာလို့လဲဆိုတော့ ဆံပင်ကကျတော့ မြန်မာနိုင်ငံသုံး နည်းတယ်လေ။ Export ကုန်ဆိုတော့ ဈေးကွက်ကလည်း ကောင်းတယ်။ ဒါပေမယ့် ဆံပင်အပေါ် မူတည် တယ်။ ဆံပင်ကောင်း သလောက်ကို အဲလို ဈေးပေးဝယ်ရတယ်။ ၁ ပိဿာကို သိန်း ၂၀၊ တစ်ကျပ်သားကို နှစ်သောင်း၊ ၁၀ သားကို နှစ်သိန်း အဲဒါကျတော့ ၃ ပေလောက်၊ ၃၆ လက်မလေ အဲဒါမျိုးတွေ ပေါက်တယ်”ဟု CNI သတင်းဌာနသို့ ပြောသည်။
ထို့နောက် မြန်မာနိုင်ငံမှ ဆံပင်များကို တရုတ်နိုင်ငံသို့ အဓိက တင်ပို့ကြောင်း၊ ထိုမှတဆင့် ပြန်လည်ပြုပြင်၍ အလှအပဆိုင်ရာ ဆံပင်ကုန်ချောအနေဖြင့် အာဖရိကနိုင်ငံများသို့ ရောင်းချကြကြောင်း သိရသည်။
မြန်မာနိုင်ငံတွင် ဆံပင်ကို ငွေကြေးရှိသူများက ဆံပင်ဆက်ရာတွင် အသုံးပြုကြကြောင်း၊ ယခုတွင် အမျိုးသား လူငယ်များ လည်း အလှအပ တစ်ခုအနေဖြင့် အသုံးပြုလာကြကြောင်း ဆံပင်ရောင်းဝယ်သူများထံမှ သိရသည်။
- By CNI
- Category: စီးပွားရေး
- Hits: 801
CNI News
၂၀၂၂ ခုနှစ်၊ ဇွန်လ ၂၂
အမျိုးသားညီညွတ်ရေးအစိုးရ(NUG) လက်အောက်ရှိ အလုပ်သမားဝန်ကြီးဌာနမှ ရွှေ့ပြောင်း အလုပ်သမားများအား ပြည်ပ အလုပ်အကိုင် အသိအမှတ်ပြုကတ်(OERC) ထုတ်ပေးရန် လုပ်ဆောင်နေသော်လည်း မထုတ်ခင်မှာ ထိုင်းအစိုးရက တရားဝင် လက်ခံလာအောင် အရင်ကြိုးစားသင့်သည်ဟု မြန်မာရွှေ့ပြောင်း အလုပ်သမားအရေး ဆောင်ရွက် နေသည့် ကိုသားကြီး က CNI သတင်းဌာနသို့ ပြောသည်။
NUG အနေဖြင့် OERC ကတ် ထုတ်ပေးမည်ဆိုပါက ထိုင်းအစိုးရသို့ တင်ပြရမည်ဖြစ်ကြောင်း၊ OERC ကတ်ကို ထိုင်းအစိုးရ လက်ခံပါ့မလား မေးစရာဖြစ်နေကြောင်း၊ ထို့ကြောင့် OERC ကတ် မထုတ် ပေးခင် ထိုင်းအစိုးရ၏ တရားဝင် အသိအမှတ်ပြု လက်ခံရန် ဦးစွာကြိုးစားသင့်ကြောင်း ၎င်းက ပြောသည်။
ကိုသားကြီးက “လက်ရှိ NUG အစိုးရအနေနဲ့ ထိုင်းမှာရှိတဲ့ ပြည်သူတွေအတွက် OERC ကတ် ထုတ်ပေးမယ်ဆိုတဲ့ သတင်း အချက်အလက်တွေက အလုပ်သမားအရေးလုပ်တဲ့ ကျနော်တို့အတွက်က လှိုက်လှိုက်လှဲလှဲ ကြိုဆိုပေမယ့် ထိုင်းအစိုးရက လက်ခံပါ့မလားပေါ့။ ထိုင်းအစိုးရ လက်ခံအောင်ရော NUG က ဘာတွေ ပြင်ဆင်ထားပြီးပြီလဲပေ့ါ။ နောက် အလုပ်သမား ဝန်ကြီးဌာန အနေနဲ့ ထိုင်းအစိုးရ လက်ခံအောင် လုပ်ပြီးမှသာလျှင် ဒီ OERC ကတ်ကို မြန်မာပြည်သူတွေ လက်ထဲ ထည့်ပေး မယ်ဆိုရင် ပိုပြီးတော့မှ ကောင်းလိမ့်မှာပေါ့။ ထိုင်းအစိုးရက ကျနော်တို့ အလုပ်သမားဝန်ကြီးဌာနကို တရားဝင် ဝန်ကြီးဌာန အဖြစ်၊ NUG ကို တရားဝင် အစိုးရအဖြစ် အသိအမှတ်ပြု လက်ခံပေးအောင် အရင် ကြိုးစားရမယ်။ ပြီးမှသာလျှင် မြန်မာ ပြည်သူတွေအတွက် မိမိတို့ဝန်ကြီးဌာနက ထုတ်ပေးတဲ့ OERC ကတ်ကို ထုတ်ပေးရင် ပိုပြီးတော့မှ ကောင်းလိမ့်မယ်ပေါ့။ မိမိ တို့ ဌာနက လုပ်တဲ့လုပ်ရပ်ဟာ အချည်းအနှီး မဖြစ်ဘဲနဲ့ အသက်ဝင်မှာပေါ့။ အများပြည်သူအတွက်လည်း အကျိုးရှိတဲ့ လုပ်ရပ် တစ်ခု ဖြစ်တယ်လို့ ပြောလိုတယ်”ဟု CNI သတင်းဌာနက ပြောသည်။
NUG စုဖွဲ့မှုကိုတွေ့ရစဉ်
ထိုင်းနိုင်ငံတွင် တရားမဝင်နှင့် တရားဝင် ရွှေ့ပြောင်းအလုပ်သမား စုစုပေါင်း (၇)သန်းခန့် ရှိသည့်အတွက် NUG အား အစိုးရ တစ်ရပ်အဖြစ် ထိုင်းအစိုးရထံမှ တရားဝင် အသိအမှတ်ပြု မခံရပါက OERC ကတ်သည် အရာမရောက်ဘဲ အချည်းအနှီး ဖြစ် သွားနိုင်ကြောင်း ၎င်းက ပြောသည်။
NUG အနေဖြင့် OERC ကတ် ထုတ်ပေးခြင်းအား ဇွန်လကုန်တွင် စတင် အကောင်အထည်ဖော်မည်ဟု သိရကြောင်း၊ ထိုသို့ လုပ်ဆောင်ပါက ကတ်လုပ်ရန် လျှောက်ထားသည့် ရွှေ့ပြောင်း အလုပ်သမားများ၏ စာရင်းအား အပြင်သို့ မပေါက်ကြားစေ ရန် အထူးသတိပြုရမည်ဟု ရွှေ့ပြောင်းအလုပ်သမားနှင့် အလုပ်သမားအရေး ဆောင်ရွက်နေသူများက CNI သတင်းဌာနသို့ ပြောသည်။
ရွှေ့ပြောင်း အလုပ်သမားတစ်ဦးက “NUG ကတော့ သေသေချာချာလေး စည်းကမ်းရှိရှိ လုံလုံခြုံခြုံလေးလုပ်ဖို့ ဖြစ်သင့်တယ်။ ထိုင်းမှာလည်း စစ်ကောင်စီက လွှတ်ထားတဲ့ ထောက်လှမ်းရေးတွေလည်း ရှိတယ်။ ဒီစာရင်း ဇယားနဲ့ ပတ်သက်တာကို NUG အစိုးရအနေနဲ့ ပွင့်ပွင့်လင်းလင်း ပြောရရင် လုံခြုံရေးကိစ္စကို တော်တော်လေး လုပ်ရမှာ။ ထိုင်းဥပဒေနဲ့တော့ ဘာမှ ကြောက် စရာ မလိုဘူး။ ကြောက်စရာ ကောင်းတာက ဒီဟာတွေ ပေါက်ကြားသွားမယ်ဆိုရင် မြန်မာဘက်အခြမ်းမှာ ရန်ရှာမှာပဲ ကြောက်တာ။ မြန်မာဘက်မှာ အိမ်တွေကို လိုက်တာတို့က တကယ်လည်းရှိနေတာ၊ တကယ်လည်း တွေ့နေတာ” ဟု ပြော သည်။
မြန်မာရွှေ့ပြောင်း အလုပ်သမား အများဆုံးရှိသော နိုင်ငံတစ်ခုဖြစ်သည့် မလေးရှားတွင် မလေးရှားအစိုးရမှ NUG အား အသိ အမှတ် ပြုသည့်အတွက် ထိုနိုင်ငံတွင် OERC ကတ် ထုတ်ပေးသည်မှာ ကောင်းမွန်ကြောင်း အလုပ်သမားအရေး လုပ်ဆောင် နေသူများက ပြောသည်။
ထိုင်းသို့ သွားရောက်မည့် မြန်မာအလုပ်သမားများကို နယ်စပ်မှာ စစ်ဆေးနေစဉ်
ထို့နောက် ယခုကဲ့သို့ ရွှေ့ပြောင်း အလုပ်သမားများအတွက် သက်သေခံ ကတ်ပြားမျိုး ထုတ်ပေးခြင်းသည် တစ်စုံတစ်ရာ အကျိုးရှိကြောင်း ပညာရေးနှင့်ဖွံ့ဖြိုးတိုးတက်ရေးဖောင်ဒေးရှင်း FED မှ အမှုဆောင်ဒါရိုက်တာ ဦးထူးချစ်က CNI သတင်းဌာန သို့ ပြောသည်။
ဦးထူးချစ်က “ဒါပေမယ့် တစ်ချိန်တည်းမှာပဲ သတိထားရမှာက တစ်ဖက်ကလည်း အန္တရာယ်ရှိနိုင်တဲ့ အနေအထားမျိုးတွေ ဖြစ်နေတော့ ကျနော်တို့ အနေနဲ့ကတော့ အလုပ်သမားတွေ ကိုယ်တိုင်ကပဲ အချက်အလက်ကို ပြည့်ပြည့်စုံစုံနဲ့ စုဆောင်း ပြီးတော့ သူတို့ကိုယ်တိုင်ပဲ ဆုံးဖြတ်စေချင်ပါတယ်။ သူတို့ဆုံးဖြတ်ပါ။ အကျိုးအမြတ်ကတော့ လုပ်ပေးတဲ့ ရည်ရွယ်ချက်တွေ ကတော့ အလုပ်သမားတွေကို အကာအကွယ် ပေးဖို့ဆိုတဲ့ ရည်ရွယ်ချက်တွေ ရှိတော့လေ၊ လုပ်မယ်ဆိုပြီး ကိုယ့်ဘာသာကိုယ် ဆုံးဖြတ်ချက်ရှိရင်တော့ လုပ်ပေါ့” ဟု ပြောသည်။
NUG ၏ OERC ကို လျှောက်ထားခြင်း၊ လက်ဝယ်ကိုင်ဆောင် ထားခြင်း စိစစ်တွေ့ရှိပါက Black List စာရင်းသွင်းမည်ဖြစ် ကြောင်း၊ ထို့နောက် ပြည် ဝင်/ထွက်ခွင့် ပိတ်ခြင်း၊ နိုင်ငံကူးလက်မှတ် ပယ်ဖျက်ခြင်းနှင့် နိုင်ငံသားအဖြစ်မှ ရပ်စဲခြင်းတို့ ခံရ မည်ဖြစ်ကြောင်း၊ အကြမ်းဖက်မှု တိုက်ဖျက်ရေးဥပဒေ အပါအဝင် တည်ဆဲ ဥပဒေများအရ အရေးယူ ခံရမည်ဖြစ်ကြောင်း နစက၏ အလုပ်သမားဝန်ကြီးဌာနမှ ထုတ်ပြန်ထားသည်။
ထို့နောက် ပြည်ပနိုင်ငံသို့ သွားရောက် အလုပ် လုပ်ကိုင်မည်ဆိုပါက လေဆိပ်၊ နယ်စပ်ဂိတ်တို့တွင် နစက၏ အလုပ်သမား ဝန်ကြီးဌာနမှ ထုတ်ပေးသည့် OWIC ကတ် ပါရှိမှသာ ပြည်ပသို့ သွားရောက် နိုင်မည်ဟုလည်း ထုတ်ပြန်ထားသည်။
- By CNI
- Category: စီးပွားရေး
- Hits: 939
CNI News
၂၀၂၂ ခုနှစ်၊ ဇွန်လ ၂၀
ရခိုင်ပြည်နယ်နှင့် ဘင်္ဂလားဒေ့ရှ်နိုင်ငံ ကုန်သွယ်ရေးတွင် ကုန်သွယ်မှုပမာဏ ပိုမိုများပြားလာစေရန်နှင့် ကုန်သွယ်မှု မြန်ဆန်စေရေးအတွက် ဘင်္ဂလားဒေ့ရှ်နိုင်ငံ ဆိပ်ကမ်းသို့ တိုက်ရိုက်ရောက်ရှိသည့် ကုန်သွယ်ရေး သင်္ဘောလိုင်း ပြေးဆွဲရန် အစိုးရထံသို့ တင်ပြသွားမည်ဖြစ်ကြောင်း ရခိုင်ပြည်နယ် ကုန်သည်နှင့်စက်မှုအသင်းချုပ်ထံမှ သိရ သည်။
နှစ်နိုင်ငံ ကုန်သွယ်မှု မြှင့်တင်သည့် သဘောအနေဖြင့် ဘင်္ဂလားဒေ့ရှ်နိုင်ငံ သံအမတ်ဦးဆောင်သည့် ကုန်သည် အဖွဲ့နှင့် ရခိုင်ပြည်နယ် ကုန်သည်များနှင့် စက်မှုလက်မှုလုပ်ငန်းရှင်များအသင်း ဦးဆောင်သည့် ကုန်သည်အဖွဲ့များ ဇွန်လ ၁၈ ရက်နေ့က တွေ့ဆုံရာတွင် ကမ်းရိုးတမ်းတိုက်ရိုက် သင်္ဘောလိုင်း ပြေးဆွဲရန် ဆွေးနွေးခဲ့ကြပြီး ယင်း ကိစ္စကို အစိုးရထံတင်ပြပေးသွားမည်ဖြစ်သည်ဟု ရခိုင်ပြည်နယ် ကုန်သည်နှင့်စက်မှုအသင်းချုပ် ဥက္ကဋ္ဌ ဦးတင်အောင်ဦးက CNI သတင်းဌာနသို့ ပြောသည်။
“လက်ရှိ Border Trade ကဏ္ဍမှာတော့ မောင်တော၊ စစ်တွေ ကုန်သွယ်ရေးစခန်းနှစ်ခုကနေပြီးတော့ Border Trade သွားနေတယ်ဆိုတော့ ဒီ Border Trade ကနေပြီးတော့ ထပ်ပြီးတော့ ကျနော်တို့ နောက်ထပ် များများ စားစား ပို့နိုင်တဲ့လမ်းကြောင်းပေါ့လေ ဘာရှိလဲ ကျနော်တို့ဆွေးနွေးကြတဲ့အထဲမှာတော့ Coastal Shipping လိုင်းပေါ့။ Shipping လိုင်းလေး တစ်ခုရှိရင်တော့ ကျနော်တို့ နယ်စပ်မဟုတ်တော့ဘဲနဲ့ တစ်ဖက်နိုင်ငံရဲ့ နယ်စပ် မဟုတ်တော့ဘဲနဲ့ ဥပမာအားဖြင့် စစ်တကောင်းလောက်ထိကို ကျနော်တို့တက်ပြီးတော့ ကုန်သွယ်မှု ပြုနိုင်အောင် လုပ်နိုင်တယ်ဆိုတဲ့အကြောင်းအရာလေးတွေတော့ သိလာရပါတယ်။ ကျနော်တို့ သက်ဆိုင်ရာတွေကိုလည်း အဲဒီ အကြောင်းအရာလေးတွေကို ကျနော်တို့ ဆက်လက်ပြီးတော့ တင်ပြသွားဖို့ အနေအထားတွေလည်း ရှိပါတယ်” ဟု ပြောသည်။
အပျော်စီးခရီးသည်တင်သင်္ဘောတစ်စင်း ကုလားတန်မြစ်ကြောင်းတလျှောက် ဖြတ်သန်းသွားလာ နေစဉ်(ဓါတ်ပုံ- EPA)
လက်ရှိ ရခိုင်ပြည်နယ်နှင့် ဘင်္ဂလားဒေ့ရှ်နိုင်ငံ နှစ်နိုင်ငံကုန်သွယ်ရေးတွင် ဘင်္ဂလားဒေ့ရှ်နိုင်ငံမှ မှာယူသည့် ကုန်စည်များကိုသာ တင်ပို့နေရပြီး ကုန်သည်အချင်းချင်း ထိတွေ့ခွင့်မရဘဲဖြစ်နေကြောင်း သိရသည်။
နှစ်နိုင်ငံကုန်သွယ်ရေးတွင် မောင်တောနယ်စပ်ကုန်သွယ်ရေးစခန်းနှင့် စစ်တွေနယ်စပ်ကုန်သွယ်ရေးစခန်း စသည့် စခန်းနှစ်ခုတွင်သာ ကုန်သွယ်မှု ပြုလုပ်နေရပြီး ကမ်းရိုးတန်းသင်္ဘောလိုင်းဖြင့် ကုန်သွယ်မှု ပြုလုပ်ခွင့်ရမည် ဆိုပါက ရခိုင်ပြည်နယ်အတွင်းရှိ သင်္ဘောဆိပ်ကမ်းများတွင်လည်း ကုန်သွယ်မှု ပြုလုပ်နိုင်မည်ဖြစ်ကြောင်း ဦးတင်အောင်ဦးက ဆက်ပြောသည်။
“လက်ရှိ သူတို့ တစ်ဖက်နိုင်ငံ ဘယ်ဆိပ်ကမ်း ဘယ်ဆိပ်ကမ်းသွားမယ်။ ကျနော်တို့ မြန်မာနိုင်ငံထဲကနေပြီးတော့ ရခိုင်မှာရှိတဲ့ စစ်တွေတို့၊ ကျောက်ဖြူတို့၊ တောင်ကုတ်တို့ ရှိတာပဲလေ သင်္ဘောဆိပ်ကမ်းအကြီးတွေ ရှိတဲ့နေရာ တွေကို သွားမယ်။ အဲလိုမျိုးလေးတွေပေါ့ ကျနော်တို့ Coastal Shipping လိုင်းတစ်ခု ဖြစ်သွားပြီဆိုရင်တော့ ကုန်သွယ်မှုကတော့ ကျနော်တို့ဘက်ကတော့ တစ်နိုင်တပိုင် လုပ်ငန်းရှင်တွေကလည်း သွားနိုင်တယ်ပေါ့လေ။ ကျနော်မှန်းထားတာက လုပ်ငန်းရှင်တွေကလည်း သူ့ပစ္စည်းတွေကို ဘယ်နေ့ ဘယ်ရက်မှာ သင်္ဘောထွက်နေတယ် သင်္ဘောလိုင်းက အမြဲတမ်း ရှိတယ်ဆိုလို့ရှိရင် ပစ္စည်းလေးတစ်ခု ပို့ချင်ရင်တောင်မှ ဒီဟာက အဲသင်္ဘောနဲ့ တင်လို့ရတယ်။ အခုလက်ရှိအချိန်မှာ ကျနော်တို့က တစ်ဖက်နိုင်ငံမှာရှိတဲ့ Border Trade လုပ်ငန်းရှင်တွေနဲ့ ကျနော်တို့ဆီမှာရှိတဲ့ နယ်စပ်ကုန်သွယ်ရေးလုပ်တဲ့ ကုမ္ပဏီတွေနဲ့ပဲ တိုက်ရိုက် သွားကြတာများတယ်။ ကျနော်တို့ဆီမှာ သူတို့လိုအပ်ချက်ကို မှာတယ်။ ကျနော်တို့က ပို့ပေးတယ်။ ရောင်းတယ်ပေါ့လေ အဲဒီ အခြေအနေနဲ့ပဲ သွားတဲ့အခြေအနေကနေပြီးတော့ လူတိုင်း လွယ်လွယ်ကူကူ လုပ်နိုင်တဲ့အဆင့်ကိုရောက်အောင် ကျနော်တို့က ကြိုးပမ်းနေရခြင်း ဖြစ်ပါတယ်” ဟု ပြောသည်။
ဘင်္ဂလားဒေ့ရှ်နိုင်ငံ ကုန်သည်များနှင့် ရခိုင်ပြည်နယ်ရှိ ကုန်သည်များ ယခုတွေ့ဆုံမှုသည် ပထမဆုံးအကြိမ် တွေ့ဆုံခြင်းဖြစ်သည့်အတွက် ဆွေးနွေးခဲ့ကြသည့် ကိစ္စရပ်များ၏ အကျိုးသက်ရောက်မှုများကို လုပ်ငန်းအကောင် အထည်ပေါ်လာမည့်အချိန်မှသာ သိရှိရမည်ဖြစ်သောကြောင့် စောင့်ကြည့်ရမည်ဖြစ်သည်ဟု ကုန်သည်များက ပြောသည်။
ရခိုင်ကုန်သည်များနှင့် ဘင်္ဂလားဒေ့ရှ်ကုန်သည်များသည် ယခုတွေ့ဆုံမှုတွင် တိုက်ရိုက်တွေ့ဆုံခွင့်ရရှိသွားခြင်း ကြောင့် နှစ်ဖက်ကုန်သည်များအနေဖြင့် အဆက်အသွယ်များ ပိုမိုရရှိလာကြောင်းလည်း သိရသည်။
- By CNI
- Category: စီးပွားရေး
- Hits: 746
CNI News
၂၀၂၂ ခုနှစ်၊ ဇွန်လ ၂၀
ရခိုင်ပြည်နယ်ရှိ တောင်သူများသည် ၂၀၁၈ ခုနှစ်မှ ၂၀၂၁ ခုနှစ်အထိ တိုက်ပွဲအခြေအနေနှင့်ကိုဗစ်ကပ်ရောဂါ တို့ကြောင့် စိုက်ပျိုးစရိတ် ချေးငွေမဆပ်နိုင်သည့်အတွက် ယခုနှစ် မိုးစပါး စိုက်ပျိုးရန် မြန်မာ့လယ်ယာ ဖွံ့ဖြိုးရေး ဘဏ်မှ ချေးငွေမရရှိကြောင်း ရခိုင်တောင်သူလယ်သမားများက CNI သတင်းဌာနသို့ ပြောသည်။
ချေးငွေမဆပ်နိုင်သည့် တောင်သူလယ်သမားမှာ ၈၅ ရာခိုင်နှုန်းခန့်ဖြစ်သည့်အတွက် ယခုနှစ် မိုးစပါးစိုက်ပျိုးမှုမှာ ပြီးခဲ့သည့်နှစ်များထက် နည်းပါးနိုင်ကြောင်း ရခိုင်တောင်သူတစ်ဦးဖြစ်သည့် ဦးအောင်ကျော်မြက CNI သတင်း ဌာနသို့ ပြောသည်။
ဦးအောင်ကျော်မြက “တော်တော်အခက်အခဲရှိပါတယ်။ ဒီနှစ်တော့ ကျနော်တို့ ရခိုင်ဒေသအတွက် တော်တော် စိန်ခေါ်မှုကြီးကြီးပဲ။ အခက်အခဲတွေ အများကြီး ရှိနိုင်တယ်။ ဘာကြောင့်လဲဆိုတော့ စိုက်ပျိုးစရိတ် ချေးငွေက မရတာတစ်ပိုင်း၊ နောက်ပြီးတော့ ဓာတ်မြေဩဇာက တော်တော် ဈေးကြီးတယ်။နောက်ပြီးတော့ ယူရီးယားဆိုရင် လည်းပဲ သုံးသောင်းလောက်ပဲရှိတဲ့ ဓာတ်မြေဩဇာတစ်အိတ်ကို အခုဆိုရင် တစ်သိန်းနဲ့တစ်သောင်းလောက် ရှိတယ်။ နောက်ပြီးတော့ ဓာတ်မြေဩဇာကို ရခိုင်ပြည်ဘက်ကို ကားနဲ့သယ်လို့ မရဘူးလေ။ ကားနဲ့ သယ်ခွင့် မရှိဘူး။ ကျနော်တို့လည်း ဘယ်လိုမှ နားမလည်ဘူး။ ဒီ အမ်းဂိတ်ကို ဖြတ်လာလို့ ဓာတ်မြေဩဇာက မရဘူး။ အဲဒီတော့ ကျနော်တို့ ရခိုင်တောင်သူလယ်သမားတွေဟာ ဘဏ်ရှိပေမယ့်လည်း စိုက်ပျိုးရေးစရိတ် ချေးငွေ မရဘူး။ ဒီဇယ်ဆီဆိုရင်လည်း အရင်က နှစ်သိန်းကျော် သုံးသိန်းလောက်ပဲရှိတာ၊ အခု ခြောက်သိန်းနဲ့ ငါးသောင်း လောက် ရှိတယ်။ လယ်သမားသွင်းအားစုကတော့ သုံးဆလောက် ပိုလို့တက်နေတယ်။ အဲဒီအထဲမှာ စိုက်ပျိုးရေး စရိတ်ချေးငွေကလည်း မရဘူး” ဟု ပြောသည်။
စိုက်ပျိုးစရိတ်ချေးငွေအဖြစ် တောင်သူလယ်သမားတစ်ဦးလျှင် တစ်ဧကကို ကျပ်ငွေတစ်သိန်းခွဲပေးပြီး ၁၀ ဧက နှင့် ၁၀ ဧကအောက် လျော့နည်းသည့် တောင်သူများကိုသာ စိုက်ပျိုးစရိတ်ချေးငွေပေးကြောင်းနှင့် ၁၀ ဧက ကျော် ရှိသည့် တောင်သူများအား စိုက်ပျိုးစရိတ်ချေးငွေမပေးကြောင်းလည်း သိရသည်။
ရခိုင်ပြည်နယ်တွင် လယ်ဧက ၁၀ ဧက ထက်ပိုသည့် တောင်သူများမှာ ၅၀ ရာခိုင်နှုန်းခန့်ရှိကြောင်း၊ စိုက်ပျိုးစရိတ် ချေးငွေအား အကျေမဆပ်နိုင်ပါက ထပ်မံ၍ ချေးငွေမပေးဟုဆိုကာ ဖိအားပေးမှုများရှိကြောင်း ရခိုင်ပြည်နယ်လုံး ဆိုင်ရာ တောင်သူလယ်သမားသမဂ္ဂမှ ဥက္ကဋ္ဌ ဦးကျော်ဇံက CNI သတင်းဌာနသို့ ပြောသည်။
ရခိုင်တောင်သူများသည် စိုက်ပျိုးစရိတ်ချေးငွေမရရှိသည့်အပြင် သွင်းအားစုစရိတ်နှင့်စက်သုံးဆီဈေးတို့ အဆမတန် မြင့်တက်နေမှုများနှင့်ရင်ဆိုင်နေရသော်လည်း မိုးစပါးစိုက်ပျိုးမှုကို အရှုံးခံပြီး စိုက်ပျိုးကြမည် ဖြစ်ကြောင်း ၎င်းက ပြောသည်။
ဥက္ကဋ္ဌ ဦးကျော်ဇံက “သူတို့က အကျိုးအမြတ်ဆိုတဲ့ အနေအထားထက် သူတို့ရဲ့ သမားရိုးကျလုပ်ငန်းတစ်ခုကို လုပ်နေတဲ့ အနေအထားပေါ့။ လုပ်ရရင်ပြီးပြီဆိုတဲ့ အနေအထားပေါ့။ တောင်သူတွေက ၉၀ ရာခိုင်နှုန်းလောက် အဲဒီအကျိုးအမြတ်ပေါ်မှာ ကြည့်တတ်တဲ့ အနေအထားမရှိဘူး။ သူတို့က ပုံမှန်လုပ်နေကျ အလုပ်တစ်ခုကို မလုပ်မဖြစ်လုပ်ရမယ်ဆိုတဲ့ အနေအထားမျိုး တွေ့ရတယ်။ တောင်သူတွေကတော့ စိုက်ပျိုးစရိတ်ချေးငွေတို့၊ ဌာနပိုင်းဆိုင်ရာတွေရဲ့ အထောက်အပံ့တို့ သူတို့သိပ်ပြီးတော့ တကူးတကကြီး တောင်းဆိုမယ့်အနေအထားမျိုး မတွေ့ရသေးဘူး။ အဲဒီလို အလေ့အထလည်းမရှိကြဘူး။ သူတို့ပေးရင်ယူတယ်၊ မပေးရင် မယူဘူး။ အခု စိုက်ပျိုး စရိတ် ချေးငွေကလည်း သူတို့မဆပ်နိုင်တဲ့အနေအထားမို့ မဆပ်ကြတာ” ဟု ပြောသည်။
ရခိုင်ပြည်နယ်တွင် ယခုနှစ် မိုးစပါးအထွက်နှုန်းနည်းပါက အခြေခံစားသုံးကြသည့် လက်လုပ်၊ လက်စားသမား များနှင့် ကုန်စည်ပွဲစားတို့အတွက် အခက်အခဲရှိလာနိုင်သည့်အပြင် ပြည်တွင်းရိက္ခာကိုပါ ထိခိုက်လာနိုင်ကြောင်း ရခိုင်တောင်သူများက သုံးသပ်သည်။
ရခိုင်ပြည်နယ်တွင် စပါးစိုက်ဧကပေါင်း ၁၂ သိန်းခန့်ရှိပြီး စိုက်ပျိုးရေမရရှိသဖြင့် မိုးစပါးတစ်ခုတည်းသာ အဓိက အားထား စိုက်ပျိုးနေရခြင်းဖြစ်ကာ ယခုနှစ်တွင် ၇၀ ရာခိုင်နှုန်းခန့်သာ စိုက်ပျိုးကြမည်ဟု ခန့်မှန်းထားသော် လည်း ဓာတ်မြေဩဇာ အပြည့်အဝ အသုံးမပြုနိုင်သဖြင့် အထွက်နှုန်းမှာ ၅၀ ရာခိုင်နှုန်းခန့်ပဲ ရှိနိုင်ကြောင်း ခန့်မှန်း ထားကြသည်။
ထို့အပြင် စက်သုံးဆီဈေးမြင့်တက်နေမှုများကြောင့် ထွန်စက်များဖြင့် ကျွဲ၊ နွားတို့အသုံးပြုကာ ထွန်ယက် စိုက်ပျိုး ခြင်းများလည်း အနည်းငယ်တွေ့လာရကြောင်း သိရသည်။
- By CNI
- Category: စီးပွားရေး
- Hits: 926
CNI News
၂၀၂၂ ခုနှစ်၊ ဇွန်လ ၁၈
လက်ရှိတွင် ပြည်တွင်းဈေးကွက်၌ ကြက်သွန်တစ်ပိဿာအား ကျပ်ငွေ ၂၀၀၀(နှစ်ထောင်) ဝန်းကျင်မှ ၂၀၀၀ ကျော်(နှစ်ထောင်ကျော်)အထိ ဈေးနှုန်းများမြင့်တက်နေသော်လည်း တောင်သူများအတွက် ရရှိသည့် အမြတ်မှာ နည်းကြောင်း ကြက်သွန်စိုက်တောင်သူများထံက သိရသည်။
လက်ရှိတွင် တောင်သူများထံမှ ရောင်းဈေးမှာ ကြက်သွန်တစ်ပိဿာကို ၁၅၀၀ ကျပ်ရှိသော်လည်း အမြတ် ရရှိသည့်ငွေမှာ အလွန်နည်းကြောင်း ကြက်သွန်စိုက်တောင်သူ ဦးကိုကိုလေးက CNI သတင်းဌာနသို့ပြောသည်။
“ကြက်သွန်တစ်ပိဿာရဲ့ အခြေခံကုန်ကျစရိတ်ကိုက ၇၀၀ လောက်ကျတယ်။ ပြီးခဲ့တဲ့ ဧပြီလလောက်က စပေါ်တာဆိုတော့ ကြက်သွန် ၃၅ ပိဿာမှာ ၆ လပိုင်းထဲမှာချိန်တယ်ဆိုရင် ၂၉ ပိဿာပဲကျန်တော့တယ်။ ၆ ပိဿာက အရည်ဖြစ်ပြီး ခြောက်သွားတဲ့အတွက် လျော့သွားပြီဆိုတော့ သူတို့အတွက် တစ်ပိဿာကို ဟိုတုန်းကရောင်းတဲ့ဈေးနဲ့ အခုလက်ရှိ ၁၅၀၀ ဈေးနဲ့ဆို တစ်ပိဿာကို ၂၀၀ လောက်ပဲပိုရနေသေးတယ်။ ကျနော်တို့က တောင်သူဆိုတော့ ရွာကနေပြီးတော့ မြို့ပေါ်သယ်ရတဲ့ ကားခရှိမယ်။ ရွာအဝယ်တော်ဆိုပြီး တောင်သူတွေထဲကနေမှ ကြက်သွန်ကောင်းမကောင်း ကြည့်တတ်တဲ့ အဝယ်တော်ကိုလည်း ပွဲခပေးရတယ်။ ပြီးရင် ဒီကြက်သွန် အိတ်ခွံဈေးကလည်း ဟိုဘက်နှစ်တွေတုန်းက တစ်လုံးကို ၂၅၀ ပဲပေးရတာ။ အခု ကြက်သွန်အိတ်ဆို တစ်လုံး ၄၀၀ လောက်ပေးရတယ်။ ပြီးတော့ ဒီကြက်သွန်အိတ်ခွံကလည်း တစ်ခါပဲ သုံးလို့ရတာ။ နောက်တစ်ခါ ထပ်သုံးမယ်ဆိုရင် နှစ်လုံးထပ်ပြီးမှပဲ သုံးလို့ရတာ။ နှစ်ကြိမ်လောက်ပဲ သုံးရပြီးရင် သူက သုံးမရတော့ဘူး။ အဲဒီအပေါ်မှာလည်း ကြက်သွန်တစ်အိတ်မှ ၃၅ ပိဿာပဲ ဆန့်တာကိုး။ ရွာကနေပြီးတော့ မြို့ပေါ်ကို သယ်လို့ရှိရင် ထော်လာဂျီခက တစ်ပိဿာကို ၁၅ ကျပ်ပဲပေးရတာ။ အခုကျတော့ တစ်ပိဿာကို ၄၀ ပေးနေရတယ်” ဟု ပြောသည်။
ကြက်သွန်စိုက်တောင်သူများသည် ယခုနှစ် နွေကြက်သွန်အား ဧက လျှော့စိုက်ခဲ့ကြသည့်အပြင် ဧပြီလက မိုးရွာ သွန်းမှုတို့ကြောင့် ပျက်စီးသွားသည့် ကြက်သွန်များရှိသဖြင့် အထွက်နှုန်းနည်းပါးခြင်းဖြစ်ကြောင်း သိရသည်။
ကြက်သွန်စိုက် တောင်သူများနှင့် ကုန်သည်များသည် ပြီးခဲ့သည့်နှစ်က သွင်းအားစုနှင့် စက်သုံးဆီဈေးတို့ အဆ မတန် မြင့်တက်မှုတို့အပါအဝင် ပြည်ပမှ ဝယ်လိုအားနည်းသဖြင့် အရှုံးပေါ်ခဲ့ကြသည့်အတွက် ယခုနှစ်တွင် နွေ ကြက်သွန်အား ဧကလျော့ပေါ့ကာ စိုက်ပျိုးခဲ့ကြခြင်းဖြစ်သည်။
ပြည်တွင်း ကြက်သွန်ဈေးကွက်သည် နယ်မြေဒေသပေါ်မူတည်ကာ တစ်ပိဿာလျှင် ၁၆၀၀ မှ ၂၀၀၀ ကျပ် ဝန်းကျင်သို့ ရောက်ရှိနေကာ ပွဲရုံနှင့်ကုန်သည်တို့သည် ကြက်သွန်စိုက်တောင်သူများထံမှ ဝယ်လိုအားများနေ ကြောင်း သိရသည်။
ထိုသို့ ဝယ်လိုအားများနေသော်လည်း တောင်သူများက မိမိတို့ထွက်ရှိထားသည့် ကြက်သွန်အကုန်လုံးကို ရောင်းချ ခြင်းမပြုသဖြင့် ပွဲရုံနှင့် ကုန်သည်များမှ လိုချင်သလောက်ဝယ်၍မရသောကြောင့် ပြည်တွင်းဈေးကွက်တွင် ဈေးတက်လာခြင်းဖြစ်ကြောင်း သိရသည်။
ကြက်သွန်ကုန်သည်တစ်ဦးက “တောင်သူကလည်း အရင်က ၁၀၀၀ ရတဲ့သူက ၅၀၀ ရောင်းပြီးသွားပြီဆိုတော့ လိုတဲ့အချိန်လေးမှာပဲပေါ့ ကြက်သွန် ၁၀၀ သွားရောင်းလိုက်၊ ဆန်လိုရင် ဆန်၊ ဆီ၊ ဆား ဝယ်လိုက်ပေါ့နော်။ အဲဒီလိုဝယ်လာရတာဆိုတော့ သူတို့ရဲ့လိုအပ်ချက်သလောက်လေးပဲရောင်းတာ။
ဘယ်ဈေးပဲဖြစ်ဖြစ် တောင်သူ များများက ကိုယ့်အိမ်ရဲ့မိသားစု လိုအပ်ချက်လောက်ကလေးပဲရောင်းတာ။ ၂၀၀၀ ဈေးဖြစ်လည်း အကုန်လုံး မရောင်းဘူး။ ၃၀၀၀ ဈေးဖြစ်သွားလည်း အကုန်လုံးမရောင်းဘူး။ စားသုံးသူတွေအနေနဲ့ကျတော့လည်း တက်လာ တာကို မကြိုက်ဘူးပေါ့” ဟု ပြောသည်။
ကြက်သွန်စိုက်တောင်သူများသည် နွေကြက်သွန်ရောင်းချခြင်းအား နိုဝင်ဘာလအထိ ရောင်းချကြခြင်းဖြစ်သည့် အတွက် ယခုနှစ်တွင် အထွက်နှုန်းနည်းသောကြောင့် ကုန်သည်နှင့်ပွဲရုံများအား လိုသလောက် မရောင်းချပေးနိုင် ခြင်းဖြစ်ကြောင်း သိရသည်။
လက်ရှိတွင် မိုးကြက်သွန်စိုက်ပျိုးရန်အတွက် တောင်သူများ ပြင်ဆင်ဆောင်ရွက်နေမှုများရှိကာ ယခုနှစ် မိုး ကြက်သွန်စိုက်ပျိုးမှုတွင် ဧကအများအပြား စိုက်ပျိုးလာနိုင်ကြောင်းနှင့် အထွက်နှုန်းများနိုင်ကြောင်း တောင်သူနှင့် ကုန်သည်တို့က သုံးသပ်ကြသည်။
ကြက်သွန်များအား ဘင်္ဂလားဒေ့ရှ်၊ တရုတ်၊ အိန္ဒိယ၊ ထိုင်းနှင့် မလေးရှားနိုင်ငံများသို့ တင်ပို့ရောင်းချနေခြင်းဖြစ်ပြီး ယခုနှစ်တွင် ဘင်္ဂလားဒေ့ရှ်မှ ဝယ်ယူမှုနည်းကြောင်း သိရသည်။
- By CNI
- Category: စီးပွားရေး
- Hits: 632
CNI News
၂၀၂၂ ခုနှစ်၊ ဇွန်လ ၁၈
ရခိုင်ပြည်နယ်အတွင်း အလုပ်အကိုင် အခွင့်အလှမ်းများ ရှားပါးနေခြင်းကြောင့် ပြည်ပသို့ ထွက်ခွာ၍ အလုပ် သွားရောက်လုပ်ကိုင်သူများမှာ ယခုနှစ် သင်္ကြန်ကာလနောက်ပိုင်း ပိုမိုများပြား လာနေကြောင်း သိရသည်။
ပြည်ပသို့ ထွက်ခွာမည့် သူများတွင် လူငယ်များ အများဆုံး ပါဝင်နေကြောင်း၊ အသက်မပြည့်သေးသည့် သူများလည်း သွား ရောက်ရန် ကြိုးပမ်းနေမှုများရှိကြောင်း ရခိုင်ပြည်နယ်မှ လူဝင်မှုကြီးကြပ်ရေးဝန်ကြီးဌာနမှ တာဝန်ရှိသူတစ်ဦးက CNI သတင်း ဌာနသို့ ပြောသည်။
၎င်းက “သင်္ကြန်ပြီးတာနဲ့ သူတို့က တော်တော်များများ (မှတ်ပုံတင်) လာလုပ်ကြတယ်။ နောက်ပြီး ကျနော်တို့ ဝန်ကြီးဌာနရဲ့ ပန်းခင်းစီမံချက်အရ သူတို့မှတ်ပုံတင်တွေ အကုန်လုံး လုပ်ပေးတာလေ တစ်ရွာပြီးတစ်ရွာ။ အဲဆို သူတို့က မှတ်ပုံတင် ရတာနဲ့ တစ်ခါတည်း ထွက်ကြတာပေါ့နော်။ နောက်ပြီး သူတို့က ဘယ်လိုပြဿနာ တက်လဲဆိုရင် ၁၈ နှစ်ပြည့်မှ အလုပ်ရမှာကို နိုင်ငံ ခြားမှာ၊ ပတ်စ်ပို့ လျှောက်ရင်လည်း လွယ်လွယ်ကူကူ ရမှာလေ။ ဒါပေမယ့် အသက်မပြည့်တဲ့ သူတို့က လာပြီး လုပ်ကြတာ တွေ ရှိတယ်။ ၁၈ နှစ်ပြည့် လုပ်ပေးပါ။ ဒါပေမယ့် ကျနော်တို့က အဲလို ထုတ်ပေးလို့မှ မရတာကိုး။ အသက်မပြည့်ဘဲ အလုပ် လုပ်ရင် အရေးယူ ခံရမယ်လေ။ အဲဒါမျိုးတွေ ကြုံရတယ်” ဟု ပြောသည်။
ရခိုင်ပြည်နယ်မှ ပြည်ပသို့ ထွက်ခွာပြီး သွားရောက် အလုပ်လုပ်ကိုင်ကြသူ အများစုသည် လူလတ်ပိုင်း လူငယ်များဖြစ် ကြောင်း၊ ထိုအထဲမှာ အမျိုးသမီးများ ပိုများကြောင်း သိရသည်။
ထို့နောက် အသက်အရွယ်အားဖြင့်ဆိုပါက အသက် ပြည့်သူများနှင့် ၃၅ နှစ်အတွင်းရှိသူများ ဖြစ်ကြောင်း၊ ခေတ်ပညာတတ် လူငယ်များစွာ ပါဝင်နေကြောင်း သိရသည်။
ရခိုင်အမျိုးသားကွန်ရက်မှဥက္ကဋ္ဌ ဦးတင်ထူးအောင်က “ရခိုင်က ဘယ်လိုဖြစ်နေလဲဆိုတော့ လူသားအရင်းအမြစ် ဆုံးရှုံးတယ်။ လူတွေရဲ့ လုပ်အားတွေ၊ လူတွေရဲ့ အတွေးအခေါ်တွေ၊ စွန့်ဦးတီထွင်နိုင်တဲ့ စီးပွားရေး လုပ်ငန်းရှင်တွေ၊ လူငယ်တွေ အဲဒါတွေ ဆုံးရှုံးတာပေါ့နော်။ လူသားအရင်းအမြစ် ဆုံးရှုံးနေတာကို အအဖတ်ဆယ်ဖို့ဆိုရင် ရခိုင်မှာရှိတဲ့ စွမ်းဆောင်နိုင်တဲ့ သူတွေ၊ စီးပွားရေး လုပ်ငန်းရှင်တွေ အနေနဲ့ ရခိုင်မှာ ရင်းနှီးမြှုပ်နှံဖို့ နိုင်လောက်တဲ့ စီးပွားရေး ရင်းနှီးမြှုပ်နှံမှုတွေ လုပ်ဆောင်ဖို့ လိုအပ် တာပေါ့။ ဒီလို စတင် ဆောင်ရွက်တဲ့အခါ အခက်အခဲက ကြုံလာရမှာကတော့ စီးပွားရေး လုပ်ငန်းလုပ်ဖို့အတွက် အခက်အခဲ ရှိ တာတွေ၊ ဆောက်လုပ်ရေးအတွက် ဆောက်လုပ်ရေး အခွင့်အလမ်းတွေကို တင်ဒါ ခေါ်ယူဖို့အတွက် နီးစပ်ရာတွေကို လာဘ် ထိုး ရမယ့် ကိစ္စတွေ၊ တရားမျှတမှု မရှိတဲ့ ကိစ္စတွေ ပပျောက်ဖို့အတွက် အများကြီး ဆောင်ရွက်ဖို့ လိုပါတယ်။ ဒါတွေ ပပျောက်ဖို့အတွက် အဓိက လုပ်ပေးနိုင်တာကတော့ လက်ရှိ ရခိုင်ပြည်နယ် အစိုးရမှာ အများကြီး တာဝန်ရှိတာပေါ့။ အဲတော့ ကျနော်တို့အနေနဲ့ ဒီဟာတွေကို လူသားအရင်းအမြစ်တွေ ဆုံးရှုံးတယ်။ ဆုံးရှုံးနေတာကို ပြန်လာဖို့အတွက် စီးပွားရေးသမား တွေ ရင်းနှီးမြှုပ်နှံဖို့အတွက် အခွင့်အလမ်းတွေကို အများကြီး အားပေး ဆောင်ရွက်သင့်တယ်လို့ ကျနော့်အနေနဲ့ မြင်တာပေါ့ နော်” ဟု CNI သတင်းဌာနသို့ ပြောသည်။
ယခင်က ရခိုင်ပြည်နယ်မှ လူငယ်များသည် ရန်ကုန်မြို့ရှိ စက်ရုံ၊ အလုပ်ရုံများတွင် အလုပ်လုပ်ကိုင်ကြသော်လည်း လက်ရှိတွင် စက်ရုံများ၌ လုပ်သားအင်အား လျှော့ချမှု၊ စက်ရုံများ ပိတ်သိမ်းသွားမှုများကြောင့် အလုပ်အကိုင် အခွင့်အလမ်းများ ရှားပါးလာ ၍ ပြည်ပသို့ သွားရောက် အလုပ်လုပ်ကိုင် ကြခြင်းဖြစ်ကြောင်း သိရသည်။
လက်ရှိတွင် ရခိုင်ပြည်နယ်မှ ဒေသခံများသည် ထိုင်း၊ တရုတ်၊ မလေးရှား၊ စင်္ကာပူ၊ ဂျပန်၊ ကိုရီးယားနိုင်ငံသို့ သွားရောက် အလုပ်လုပ်ကိုင်ကြကြောင်း၊ ယခုနှစ်တွင် ဒူဘိုင်း(ယူအေအီးနိုင်ငံ)သို့ သွားရောက် အလုပ်လုပ်ကိုင်သူ များလာကြောင်း သိရ သည်။
ဦးတင်ထူးအောင်က “ရွှေ့ပြောင်း လုပ်သားတွေကို အလုပ်အကိုင် အခွင့်အလမ်းနဲ့ အခွင့်အရေးတွေ မဖန်တီး ပေးနိုင်ရင် တောင် ရွှေ့ပြောင်းလုပ်သားတွေ ကျွမ်းကျင်လုပ်သား ဖြစ်ဖို့အတွက်ကိုပေါ့နော်၊ ရခိုင်ပြည်နယ်မှာ ပြည်နယ်အစိုးရ အနေနဲ့ လည်းကောင်း၊ နောက်ပြီးတော့ စွမ်းဆောင်နိုင်တဲ့ လူပုဂ္ဂိုလ်တွေ အနေနဲ့သော်လည်းကောင်း၊ ကျွမ်းကျင်လုပ်သား ဖြစ်ဖို့ အတွက်ကိုပေါ့နော်၊ သင်တန်းတွေ ဘာတွေ ပေးသင့်တယ်ပေါ့နော်။ အသက်မွေးဝမ်းကြောင်း ပညာရပ်တွေကို သူတို့ ပြည်ပ ထွက်ခွာသွားတဲ့အခါမှာ သက်ဆိုင်ရာ နိုင်ငံတွေကို ရောက်တဲ့အခါမှာ အလုပ်အကိုင် အခွင့်အလမ်း ကောင်းကောင်းရမယ်၊ လစာ ကောင်းကောင်းရမယ်။ အဲတော့ မိသားစုတွေကို ပြန်ပြီး ထောက်ပံ့နိုင်မယ်။ မိသားစုကို ပြန်ပြီးထောက်ပံ့နိုင်တော့ ငွေလည်ပတ် စီးဆင်းမှု တစ်ခု ဖြစ်မယ်။ ငွေလည်ပတ်မှု တစ်ခုဖြစ်ရင် ရခိုင်ရဲ့ စီးပွားရေးဘဝတွေက အတိုင်းအတာတစ်ခု အထိ မြင့်လာနိုင်တယ်။ ဒါက လက်ရှိ အခြေအနေမှာ ဖန်တီးနိုင်တဲ့ အကြောင်းတရားတွေပေါ့နော်” ဟု CNI သတင်းဌာနသို့ ပြောသည်။
ရခိုင်ပြည်နယ်မှ လူငယ်များသည် ပြည်ပသို့ ထွက်ခွာရာတွင် တရားဝင် လမ်းကြောင်းမှ သွားရောက်သူများ ရှိသကဲ့သို့ တရား မဝင် လမ်းကြောင်းမှ အလုပ်လုပ်ကိုင်ရန် သွားရောက်နေကြသူများရှိကြောင်း၊ တရားဝင်လမ်းကြောင်းထက် တရားမဝင် လမ်း ကြောင်းကနေ သွားရောက်သူ ပိုမိုများပြားကြောင်း၊ လူဦးရေအားဖြင့် ထောင်ကဏန်းအထိ ရှိကြောင်း သိရသည်။