- By CNI
- Category: စီးပွားရေး
- Hits: 119
CNI News
၂၀၂၄ ခုနှစ်၊ မတ်လ ၁၄
မြန်မာနယ်စပ်မှ ထိုင်းနိုင်ငံထဲသို့ တရားမဝင် နယ်စပ်ဖြတ်ကျော်မှုများ မရှိစေရေးအတွက် တင်းကျပ်တားဆီးရန် ထိုင်းနယ်ခြားစောင့်တပ်များမှ လုပ်ဆောင်နေသဖြင့် တရားမဝင်ခိုးဝင်မှု ယခင်ထက် ပိုမိုခက်ခဲသွားနိုင်ကြောင်း ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူများက CNI သတင်းဌာနသို့ ပြောသည်။
ထိုင်းနယ်ခြားစောင့်တပ် ရဲချုပ်က "ရာဇဝတ်မှုမျိုးစုံကို တားဆီးထိန်းချုပ်ရန်" ဆိုသည့် အကြောင်းပြချက်ဖြင့် နယ်စပ်ဒေသတစ်လျှောက် လုံခြုံရေးများ ယခင်ထက် ပိုမိုတင်းကျပ်စေရေး ချက်ချင်းအကောင်အထည်ဖော် ဆောင်ရွက်ရန် မတ်လ ၁၂ ရက်နေ့ ရက်စွဲဖြင့် ညွှန်ကြားချက် ထုတ်ပြန်ခဲ့သည်။
ထို့ကြောင့် မြန်မာနိုင်ငံမှ ခိုးဝင်လာမည့် သူများအတွက် ထိုင်းနယ်စပ်ဘက်မှ တရားမဝင် ခိုးဝင်နိုင်သည့် လမ်းကြောင်းများမှာ ပိုမိုတင်းကျပ် သွားမည်ဖြစ်ကြောင်း မဲဆောက်အခြေစိုက် ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။
တရားမဝင် ခိုးဝင်လာသူများကို ထိုင်းက ဖမ်းဆီးထားစဉ်
၎င်းက “အထူးသဖြင့်တော့ မြန်မာနိုင်ငံသားတွေ အလွယ်တကူ ခိုးဝင်လာလို့ရတဲ့ လှေဂိတ်တွေ၊ နယ်စပ်ဂိတ်တွေ၊ ဂိတ်မရှိတဲ့ နေရာတွေကို ကယ်ရီပွဲစားတွေနဲ့လာတာရှိတော့ အဲဒီလိုနေရာတွေမှာ လုံခြုံရေးတွေ ပိုပြီးတင်းကျပ် သွားတယ်။ အဖမ်းခံရတဲ့ မြဝတီ-မဲဆောက် နယ်စပ်တစ်လျှောက်ဆိုရင် တော်တော်များများက တောလမ်းကနေ လာတယ်ဆိုတာကို စစ်ဆေးတဲ့အခါ တွေ့ရှိရတယ်။ အဲဒီတော့ လာတဲ့လမ်းတွေကို ဟိုးအရင်တုန်းက ဘယ်တုန်း ကမှ သူတို့သွားပြီးတော့ ဘယ်ကနေလာတယ်၊ ဘယ်လမ်းကနေလာတယ်ဆိုတာကို သွားပြီး ပြန်ပြခိုင်းတာ မရှိ ဘူး။ အခုနောက်ပိုင်း အဖမ်းခံရတဲ့ အုပ်စုတွေထဲမှာ အနည်းဆုံး ယောကျ်ားလေး ၂ ယောက်၊ ၃ ယောက် လောက် ကို ပြန်ခေါ်သွားပြီးတော့ ဘယ်လမ်းကနေလာလဲ၊ ဘယ်လိုပုံစံ လာလဲဆိုတာတွေ လေ့လာတာတွေ တွေ့ရတယ်။ နောက် မြန်မာတွေ သတိမထားမိတာက ကြိုးလွတ် ကင်မရာတွေကို (sensor ဖြင့်) ခိုးဝင်လို့ရတဲ့ လမ်းတွေမှာ အချက်ပြစနစ်တွေနဲ့ ထားရှိတာတွေကို တွေ့ရတယ်” ဟု ပြောသည်။
ထိုင်းနယ်ခြားစောင့်တပ် ရဲချုပ်၏ ညွှန်ကြားချက်တွင် မြန်မာပြည်ထဲ၌ မတည်ငြိမ်သဖြင့် ထိုင်းနိုင်ငံထဲ ထွက်ပြေး လာသူ များလာကြောင်းနှင့် ကန်ချနဘူရီခရိုင်အတွင်း တရားမဝင် ကုန်ပစ္စည်း ခိုးသွင်းမှုများရှိသည့်အတွက် အထူး သဖြင့် မူးယစ်ဆေးဝါးနှင့် တရားမဝင် ဝင်ရောက်လာမှုကို တားဆီးရန်ပါရှိသည်။
ထို့အပြင် တောလမ်းများမှ မြို့ထဲသို့ ဝင်မလာနိုင်စေရန်အတွက် ရှိပြီးသား သာမန်စစ်ဆေးရေးဂိတ်များနှင့် အခြား သဘာဝလမ်းကြောင်း မှန်သမျှကို တင်းကျပ်စွာ စောင့်ကြည့်စစ်ဆေးရန်၊ သဘာဝလမ်းနှင့် တောလမ်းများ အပါအဝင် အဝင်/အထွက် လမ်းတလျှောက် ကင်းလှည့်ရန်နှင့် စစ်ဆေးမှုများကို တိုးမြှင့်ပြီး တင်းကျပ် ဆောင်ရွက် ရန် ညွှန်ကြားထားခြင်း ဖြစ်သည်။
ထိုင်းလုံခြုံရေးတပ်ဖွဲ့၀င် တစ်ဦးကိုတွေ့ရစဉ်
ယခုကဲ့သို့ ထိုင်းဘက်မှ လုံခြုံရေး ပိုမိုတင်းကျပ်လိုက်ခြင်းသည် ပွဲစားများအတွက် ပို၍ ကောင်းမွန်သွားခြင်း ဖြစ်ကြောင်း FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။
၎င်းက “ပုံမှန် အနေအထားထက်စာရင် ပိုပြီးတော့ တင်းကျပ်မှာ ဒါကတော့ ကျိန်းသေပါတယ်။ သို့သော်လည်း သူ့ဟာသူ ပွဲစားတွေကတော့ အခုလိုမျိုးသူတို့ဘက်က တင်းကျပ်တယ်ဆိုရင် ထိုင်းအစိုးရဘက်က တင်းကျပ်တယ် ဆိုရင် ပွဲစားတွေအနေနဲ့ ပိုပြီးတော့တောင် အဆင်ပြေတယ်။ ဘာဖြစ်လို့ဆို သူတို့က အာဏာပိုင်တွေနဲ့ ပေါင်းပြီး တော့မှ လမ်းကြောင်းကို ရွေးတဲ့အခါကြတော့ ပွဲစားခပိုယူပြီးတော့ သွင်းပေးနေမှာပဲ။ ရှင်းရှင်းပြောရရင် အခက်အခဲက များများဖြစ်လေ ပွဲစားတွေအတွက်က အဆင်ပြေလေပဲလို့ ပြောလို့ရတယ်” ဟု ပြောသည်။
နယ်စပ်တောလမ်းများမှ ထိုင်းနိုင်ငံထဲ တရားမဝင် ဝင်ရောက်ခြင်းများ မရှိစေရန် စစ်ဆေးရေးဂိတ်များအား တင်းတင်းကျပ်ကျပ် စစ်ဆေးရန်နှင့် လိုက်နာမှုမရှိ စည်းကမ်းဖောက်ဖျက်သည့် တပ်ဖွဲ့ဝင်များနှင့် အရာရှိများအား ပြင်းပြင်းထန်ထန် အရေးယူမည်ဖြစ်ကြောင်း ထိုင်းနယ်ခြားစောင့်တပ် ရဲချုပ်၏ ညွှန်ကြားချက်တွင် ပါရှိသည်။
လက်ရှိ အနေအထားတွင် ထိုင်းနိုင်ငံရှိ နယ်စပ်ဒေသများ၌ လုံခြုံရေးတင်းကျပ်သကဲ့သို့ မြို့များတွင်လည်း လုံခြုံရေး တင်းကျပ်နေသဖြင့် တရားမဝင် အထောက်အထားမဲ့ဖြင့် အလုပ်လုပ်ကိုင်နေသည့် မြန်မာများ အထူး သတိထားကြရန် လိုအပ်ကြောင်း ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူများက အကြံပြု သည်။
- By CNI
- Category: စီးပွားရေး
- Hits: 150
CNI News
၂၀၂၄ ခုနှစ်၊ မတ်လ ၁၃
မလေးရှားနိုင်ငံရှိ အထောက်အထားမဲ့ Overstay မြန်မာနိုင်ငံသားများထဲတွင် CI လုပ်ငန်း စဉ်ဖြင့် တရားဝင် နေရပ် ပြန်ခြင်းထက် အောက်လမ်းမှ တရားမဝင် နေရပ်ခိုးပြန်မှု ပိုများနေကြောင်း မလေးရှားရှိ မြန်မာနိုင်ငံသားများ အရေး ကူညီဆောင်ရွက်ပေးနေသူများက CNI သတင်းဌာနသို့ ပြောသည်။
CI လုပ်ငန်းစဉ်ဖြင့် တရားဝင် နေရပ်မပြန်လိုကြခြင်းမှာ မြန်မာနိုင်ငံ၌ ပြည်သူ့စစ်မှုထမ်းဥပဒေအား သတ်မှတ် အတည်ပြုထားသည့်အတွက် ကြောက်ရွံကာ အောက်လမ်းဖြင့် တရားမဝင် ခိုးပြန်မှုများနေခြင်းဖြစ်ကြောင်း မလေးရှားတွင် မြန်မာနိုင်ငံသားများအရေး ကူညီဆောင်ရွက်ပေးနေသူ ဦးဘာဘူကြီးက CNI သတင်းဌာနသို့ ပြောသည်။
၎င်းက “အခုဖွင့်ထားတဲ့ပုံစံကလည်း အခုဒဏ်ကြေးဆောင်၊ အခုပြန်လို့ရတာမျိုးလည်း မဟုတ်ပါဘူး။ ၂ ပတ် အတွင်း၊ တစ်လအတွင်းဖြစ်နေတော့ တချို့တွေ အရေးကြီးလို့ မစောင့်နိုင်လို့၊ ရက်ချိန်းယူတာမရလို့ အဲဒီလို အနေအထား မျိုးမှာ ဒီအပေါ်လမ်းကနေ မပြန်ကြဘဲနဲ့ အောက်လမ်းကို ရွေးချယ်ပြီးတော့ ပြန်တဲ့လူတွေက အများ ကြီး ရှိပါတယ်။ နောက်တစ်ခုကလည်း အပေါ်လမ်းကနေ မပြန်ချင်ကြတဲ့လူတွေက ကြားတာကို ပွင့်ပွင့်လင်းလင်း ပြောပြခြင်း ဖြစ်ပါတယ်။ အခုလက်ရှိမှာ မြန်မာပြည်မှာ စစ်မှုထမ်းရမယ် ဘာညာဆိုတော့ တချို့ကလေးတွေ ကတော့ အပေါ်လမ်းကပြန်ရမှာကို ကြောက်ရွံ့နေတဲ့ကလေးတွေ အများကြီးရှိပါတယ်။ အဲဒီတော့ လေဆိပ်မှာ အဖမ်းခံရမလား ဘာညာတွေးတောကြောက်ပြီးတော့ ပြောသံတွေလည်း ကြားရပါတယ်။ အဲဒီတော့ အောက်လမ်း ကနေ ပြန်မယ်ဆိုရင်တော့ လိုရာခရီးကို ပြန်ရောက်နိုင်မယ်လို့ထင်ကြလို့ အောက်လမ်းကို ရွေးတဲ့လူတွေကလည်း အများကြီးရှိပါတယ်။ အဓိကအောက်လမ်းကို ရွေးတယ်ဆိုတာကလည်း အခုအစိုးရက ထုတ်ပြန်ထားတဲ့ အမိန့်ကို ကြောက်ကြလို့ ဒီလမ်းကို ရွေးချယ်ကြခြင်းဖြစ်တာလည်း အများကြီးပါပါတယ်” ဟု ပြောသည်။
မလေးရှားက တရားမ၀င် အလုပ်သမားများကို တွေ့ရစဉ်
မြန်မာသံရုံး၌ CI လက်မှတ် ပြုလုပ်ရန်အတွက် လူကိုယ်တိုင် တန်းစီ၍ သွားရောက် လျှောက်ထားရခြင်းဖြစ်ပြီး နိုင်ငံကူးလက်မှတ် ပြုလုပ်မည့်သူများဖြင့် ရောနှောတန်းစီရသောကြောင့် ကြန့်ကြာမှုများ ဖြစ်စေခဲ့သည်။
ထို့အပြင် မလေးရှားနိုင်ငံရှိ ဒေသအသီးသီးမှ အထောက်အထားမဲ့ Overstay သမားများအားလုံးသည် ကွာလာလမ်ပူမြို့ရှိ မြန်မာသံရုံးသို့ လူကိုယ်တိုင် လာရောက်ရခြင်း ဖြစ်သောကြောင့် လမ်းခရီး၌ အခက်အခဲ များလည်း ဖြစ်ပေါ်စေခဲ့သည်။
ထိုအခြေအနေများကြောင့် အခြားနိုင်ငံမှ သံရုံးများကဲ့သို့ မြန်မာသံရုံး အနေဖြင့် အွန်လိုင်းမှတဆင့် ရက်ချိန်း ထုတ်ပေးပါက ကောင်းမွန်မည်ဖြစ်ကြောင်း မလေးရှားရှိ မြန်မာအဖွဲ့အစည်းများက အကြံပြုခဲ့ကြသည်။
ထို့ကြောင့် CI များအား နေ့ချင်းပြီး ထုတ်ပေးနိုင်ရေးအတွက် မတ်လ ၁၈ ရက်နေ့မှ စတင်ကာ QR code ဖြင့် ရက်ချိန်းယူရသည့် စနစ်ကို ပြောင်းလဲဆောင်ရွက် ပေးသွားမည်ဖြစ်ကြောင်း မြန်မာသံရုံးက မတ်လ ၁၂ ရက်နေ့ တွင် ထုတ်ပြန်ကြေညာခဲ့သည်။
ဒဏ်ကြေးပေးရန် စောင့်နေကြသူများကို တွေ့ရစဉ်
သို့သော် သံရုံး၌ ယခင်က CI လျှောက်ရာတွင် သက်တမ်းအား နှစ်လခန့် ပေးသော်လည်း ယခုအခါတွင် သက်တမ်း တစ်လသာပေးသောကြောင့် နေရပ်ပြန်ရေး ဆောင်ရွက်လိုသူများ အတွက် အချိန်မလောက်ငှ ကြောင်း ရတနာစက္က နာရေးကူညီမှုအသင်းမှဥက္ကဋ္ဌ ဦးအောင်က CNI သတင်းဌာနသို့ ပြောသည်။
၎င်းက “ဒီဘက်မှာ တန်းစီရမှာလည်း တစ်ပတ်၊ နှစ်ပတ်၊ သုံးပတ် ဒီတန်းစီရတာကလည်း အဲဒီလောက်ကြာမှာ ဆိုတော့ သူတို့ပေးတဲ့အချိန်က အချိန်ကိုက်ဖြစ်နေတယ်။ ကျနော်တို့က တော်တော်ဒုက္ခရောက်တယ်။ ဆိုတော့ အေးဂျင့်ကို မရှာလို့မရတော့ဘဲ ရှာကိုရှာနေရတာ။ CI လည်း တစ်ရက်တည်းရအောင် ရှာရတယ်။ ဒီဘက်လည်း CI လျှောက်ပြီး လက်ဗွေနှိပ်ပြီး နှစ်ပတ်အတောအတွင်း ပြန်ရမှာဆိုတော့ ကွက်တိကြီးလည်း ပြန်လို့မရဘူး။ ၁၄ ရက် ဆိုရင် ၁၂ ရက်လောက်နေပြီးမှ နောက် ၂ ရက်လောက်ချန်ပြီး ပြန်ရတယ်။ ဒီဘက်က CI လက်ဗွေနှိပ်ပြီးတဲ့ အချိန် ရယ်၊ မြန်မာပြည်ဘက်က သံရုံးကပေးတဲ့တစ်လက ပြည့်သွားပြီဆိုရင် ဒုက္ခတွေ ရောက်ရော။ immigration က ထပ်ပြီး ဒဏ်ငွေရိုက်ရော၊ ရစ်ရော။ CI လျှောက်မယ်ဆိုရင်လည်း original ထုတ်မပေးဘူး။ မိတ္တူပဲထုတ်ပေးတယ်။ MAI က သံရုံးထဲမှာ ဖွင့်ထားတယ်။ သူတို့ဆီက လေယာဉ်လက်မှတ်ဝယ်မှ ချက်ချင်းထုတ်ပေးတာ” ဟု ပြော သည်။
မလေးရှားအာဏာပိုင်များက နိုင်ငံအတွင်းရှိ တရားမဝင် အထောက်အထားမဲ့များ၊ Overstay သမားများအတွက် ပြစ်ဒဏ်ကျခံခြင်းမရှိဘဲ နေရပ်ပြန်နိုင်ရေး အစီအစဉ်ကို မတ်လ ၁ ရက်နေ့မှ စတင်ကာ ဒီဇင်ဘာလကုန်အထိ ဖွင့်ပေးထားခြင်းဖြစ်သည်။
သို့သော် လက်ရှိတွင် မြန်မာနိုင်ငံသားများထဲမှ CI ဖြင့် နေရပ်ပြန်သူဦးရေမှာ နည်းပါးနေသေးပြီး ကျန်းမာရေး ချို့တဲ့သူများသာ အဓိက ပြန်နေကြခြင်းဖြစ်ကြောင်းလည်း သိရသည်။
- By CNI
- Category: စီးပွားရေး
- Hits: 171
CNI News
၂၀၂၄ ခုနှစ်၊ မတ် ၁၂
မွန်ပြည်နယ်နှင့် ကရင်ပြည်နယ်မှ ထွက်ရှိသည့် ရော်ဘာများကို ယခင်က နယ်စပ်ကုန်သွယ်ရေးနှင့် ပင်လယ်ရေ ကြောင်း ကုန်သွယ်ရေးမှတဆင့် တင်ပို့လျက်ရှိသော်လည်း လက်ရှိတွင် နယ်စပ်ကုန်သွယ်ရေးလမ်းကြောင်း တစ်လျှောက် တိုက်ပွဲများ ဖြစ်ပွားနေမှုကြောင့် နယ်စပ်မှတင်ပို့မှုကို ရပ်နားထားရသည်ဟု ရော်ဘာလုပ်ငန်း ရှင်များအသင်းထံမှ သိရသည်။
မွန်ပြည်နယ်၊ ကရင်ပြည်နယ်နှင့် တနင်္သာရီတိုင်းဒေသကြီးမှ ထွက်ရှိသည့် ရော်ဘာကို တရုတ်နိုင်ငံသို့ လည်းကောင်း၊ ထိုင်းနိုင်ငံမှတဆင့် တခြားသော နိုင်ငံများကို တင်ပို့လျက်ရှိသည်။
ထို့နောက် တရုတ်နယ်စပ်နှင့် ထိုင်းနယ်စပ်လမ်းကြောင်းတွင် တင်ပို့၍ အဆင်မပြေတော့သည့်အတွက်ကြောင့် ပင်လယ်ရေကြောင်း တစ်ခုတည်းဖြင့်သာ တင်ပို့နေရကြောင်း၊ သိရသည်။
လက်ရှိတွင် ကမ္ဘာ့ရော်ဘာဈေးနှုန်းသည် မြင့်တက်လျက်ရှိနေသော်လည်း တင်ပို့မှု အခက်အခဲများကြောင့် မြန်မာ့ ရော်ဘာဈေးနှုန်းသည် အကျဘက်သို့ ဖြစ်ပေါ်နေသည်ဟု မွန်ပြည်နယ်မှ ရော်ဘာလုပ်ငန်းရှင် ဦးထွန်းမင်းနိုင်က CNI သတင်းဌာနသို့ ပြောသည်။
၎င်းက “ပြည်ပတင်ပို့တဲ့အပိုင်းမှာ အရင်တုန်းက ကျနော်တို့က နယ်စပ်က သွားနေတာ ရှိတာပေါ့နော်။ ပြီးလို့ရှိရင် ကျနော်တို့ ရေလမ်းကနေ ထွက်တာရှိတယ်။ အခု ကျနော်တို့ border ကို လုံးဝ ရပ်သွားသလို ဖြစ်နေတာဗျ။ border က လုံးဝကို သွားလို့မရတဲ့ အနေအထားတစ်ခု ဖြစ်နေတော့ border Trade က ရပ်သွားတဲ့ အနေအထား တစ်ခု ရှိနေတယ်။ ပြီးသွားလို့ရှိရင် ရေလမ်းမှာလည်း ဗဟိုဘဏ်ရဲ့ ၆၅ - ၃၅ မူဝါဒက အမျိုးမျိုး ပြောင်းနေတဲ့ အခါကျတော့ Exporter တွေက သူတို့ အများကြီး မဝယ်တော့ဘူးဗျ။ Exporter တွေက သူတို့လုပ်တာ ရှုံးတယ်ဆို တော့ အဲဒီမှာ ကျနော်တို့က နိုင်ငံတကာမှာ တက်နေပေမယ့် မြန်မာပြည်မှာ ကျနေတဲ့ အနေအထားကို ရောက်တဲ့ အခါကျတော့ တော်တော်လေးကို အခြေအနေက ဆိုးဆိုးရွားရွား ဖြစ်နေပါတယ်” ဟု ပြောသည်။
ရော်ဘာ အခြောက်လှန်းထားစဉ်
ယခင်က ရော်ဘာကို လွတ်လပ်စွာ သယ်ဆောင်၍ ရသော်လည်း လက်ရှိတွင် ရော်ဘာများကို သယ်ဆောင်ရာ၌ စစ်ဆေးရေးဂိတ်များက ရော်ဘာနှင့် ပတ်သက်သည့် အထောက်အထားများကို တောင်းခံခြင်းများ လုပ်ဆောင်နေ ကြောင်း၊ အထောက်အထား မရှိပါက သိမ်းဆည်းခြင်းနှင့် ငွေကြေးတောင်းခံခြင်းများကို လုပ်ဆောင်နေခြင်း ကြောင့် ရော်ဘာအဝယ်ဒိုင်များနှင့် တောင်သူများမှာ အခက်တွေ့နေသည်။
ထိုသို့ ရော်ဘာသယ်ဆောင်ရာတွင် စစ်ဆေးရေးဂိတ်များမှ တောင်းခံသည့် ငွေကြေးကို တောင်သူများမှ ကျခံသည့် အတွက် ရသင့်ရထိုက်သော ဈေးနှုန်းထက် ပို၍ နိမ့်ကျသည့် ဈေးနှုန်းဖြင့် ရင်ဆိုင်နေရသည်ဟု ဦးထွန်းမင်းနိုင်က ဆက်ပြောသည်။
၎င်းက “အရင်တုန်းက ကျနော်တို့ ရော်ဘာဆိုတဲ့ ဥစ္စာကတော့ လွတ်လပ်စွာ သယ်ယူရောင်းချပိုင်ခွင့် ရှိပါတယ်ဆို ပြီးတော့ ဥပဒေအရ ပြဋ္ဌားန်ထားပါတယ်။ သို့ပေမယ့်လည်း လက်ရှိအချိန်မှာတော့ လုပ်စဉ်တွေက အမျိုးမျိုး ပြောင်းတဲ့ အခါကျတော့ ရော်ဘာတွေကို သယ်ယူတဲ့အချိန်မှာ အထောက်အထားတွေကို စုံလင်အောင် မပြနိုင်ဘူး ဆိုရင် ဖမ်းလို့ဆီးလို့ ရတယ်ဆိုတဲ့ ပုံစံမျိုး ဖြစ်နေတဲ့ အခါကျတော့ တောင်သူတွေအနေနဲ့ ရောင်းတော့ရောင်းချင် ပေမယ့် ရှိနေတဲ့ အဝယ်ဒိုင်တွေကို ရောင်းရတာ တချို့အဝယ်ဒိုင်တွေကျတော့ အဲဒီလိုမျိုး ပါရတဲ့အခါကျတော့ စရိတ်စကတွေ နည်းနည်း များလာတယ်။ စရိတ်စကတွေ များလာတာကို ဘယ်သူက ကျခံရလဲဆိုတော့ တောင်သူ ပဲ ကျခံပေးရတဲ့သဘောမျိုး ဖြစ်နေတော့ ကျနော်တို့က ဈေးနှုန်းမှာ ရသင့်ရထိုက်တဲ့ ဈေးနှုန်းထက် ထပ်ပြီးတော့ နိမ့်ကျပြီး ရတဲ့သဘောမျိုး ပြန်ရောက်သွားတာပေါ့” ဟု ပြောသည်။
ထို့အပြင် လက်ရှိ ဘဏ္ဍာနှစ်တွင် ပို့ကုန်ရငွေ မူဝါဒနှင့် ပတ်သက်၍ မကြာခဏ အပြောင်းအလဲများ လုပ်ဆောင်နေ ခြင်းကြောင့် ပို့ကုန်လုပ်ငန်းရှင်များ ဆုံးရှုံးမှုဖြစ်ပေါ်ခဲ့ပြီး ရော်ဘာတင်ပို့မှုများလည်း ကျဆင်းခဲ့သည်ဟု သိရသည်။
ရော်ဘာခြစ်နေစဉ်
ထို့ကြောင့် ယခု ဘဏ္ဍာနှစ်တွင် ရော်ဘာတင်ပို့မှုအနေဖြင့် လျာထားချက်ကို တန်ချိန်ပြည့်မှီအောင် တင်ပို့နိုင်သည့် အနေအထားတွင် မရှိကြောင်း ရော်ဘာစိုက်ပျိုး ထုတ်လုပ်သူများအသင်း အတွင်းရေးမှူး ဦးခိုင်မြင့်က CNI သတင်းဌာနသို့ ပြောသည်။
၎င်းက “လက်ရှိ ဒီနှစ် လျာထားတဲ့ တန်ချိန်နဲ့ဆိုရင်တော့ တန်ချိန်ပြည့်အောင်တော့ ပို့နိုင်တဲ့ အနေအထားမှာ မရှိဘူး လျော့ကျမှာပေါ့။ ချမှတ်ခဲ့တဲ့ ၆၅ - ၃၅၊ ၅၀ - ၅၀ မူဝါဒတွေနဲ့ ငွေကြေးနဲ့ တွက်ခြေကိုက်ခြင်း ရှိ/မရှိ၊ အဲဒီ တော့ အဲဒါကို တွက်ခြေမကိုက်လို့ပဲ နိုဝင်ဘာလအထိမှာ တန်ချိန် ၈ သောင်းပဲ ပို့နိုင်တယ်။ အဲဒီတော့ ရော်ဘာ တစ်တန်ပို့ရင် အဲဒီတုန်းက ရှုံးတယ်လေ။ တော်တော်များများက အရှုံးနဲ့ရင်ဆိုင်ရတယ်။ အဲဒါကြောင့်မို့လို့ အခု ဒီဇင်ဘာလ ၁ ရက်နေ့ကနေ မတ် ၃၁ ရက်နေ့အထိကို ပိုင်းလော့ ပရောဂျက်အနေနဲ့ ၄ လတာကာလကို ဓာတ်မြေ ဩဇာ ၇၀ ရာခိုင်နှုန်း တင်သွင်းတဲ့ မူဝါဒ လုပ်ပေးလိုက်တဲ့ အခါကျတော့ အမြတ်အစွန်းအနေနဲ့ လုပ်သာကိုင်သာ ရှိတဲ့ အမြတ်အစွန်းတစ်ခု ရလာတဲ့အတွက်ကြောင့်မို့ တင်ပို့မှုတွေ ပြန်တက်သွားတာလေ”ဟု ပြောသည်။
မြန်မာ့ရော်ဘာကဏ္ဍကို ကမ္ဘာ့ရောင်းတန်း အဆင့်ဝင်နိုင်ရန်အတွက် ရော်ဘာလုပ်ငန်းရှင်များက ကြိုးပမ်းလျက်ရှိ နေသော်လည်း လက်ရှိ မြန်မာနိုင်ငံတွင် ဖြစ်ပေါ်နေသည့် နိုင်ငံရေး အခြေအနေများကြောင့် တင်ပို့နိုင်မှု ကျဆင်း ခြင်း၊ ထိုသို့ တင်ပို့နိုင်မှု ကျဆင်းခြင်းနှင့်အတူ ရော်ဘာဈေးနှုန်းများသည်လည်း လိုက်ပါကျဆင်းလျက် ရှိနေသည်။
ရော်ဘာဈေးနှုန်း ကျဆင်းမှုကြောင့် ရော်ဘာလုပ်ငန်းရှင်များက ရော်ဘာလုပ်သားများကို လုပ်အားခ တိုးမြှင့်၍ ပေးဆောင်ရန် အခက်အခဲရှိနေပြီး လုပ်သားများမှာလည်း ဈေးကောင်းရရှိသည့် ထိုင်းနိုင်ငံတွင် သွားရောက် အလုပ်လုပ်ကိုင်လျက် ရှိနေသည်။
ထို့ကြောင့် မြန်မာ့ရော်ဘာ ထုတ်လုပ်မှုသည် လာမည့်ရာသီတွင် လုပ်သားရှားပါးမှု ပြဿနာကို ယခုထက်ပို၍ ရင်ဆိုင်လာရမည်ဖြစ်ပြီး ထုတ်လုပ်နိုင်မှုသည်လည်း လျော့ကျလာမည် ဖြစ်သည်ဟု ရော်ဘာလုပ်ငန်းရှင်များက ပြောသည်။
- By CNI
- Category: စီးပွားရေး
- Hits: 218
CNI News
၂၀၂၄ ခုနှစ်၊ မတ် ၁၂
တရုတ်နိုင်ငံဘက်အခြမ်းတွင် အလုပ်အကိုင်ရှားပါးလွန်းနေကာ ဒုက္ခရောက်နေသူများရှိသဖြင့် မြန်မာ-တရုတ် နှစ်နိုင်ငံနယ်စပ် ဂိတ်ပေါက်မှတဆင့် တရုတ်နိုင်ငံထဲသို့ မလာကြသေးရန် သတိပေးလိုကြောင်း မူဆယ်မြို့ရှိ ပရဟိတအသင်းများက CNI သတင်းဌာနသို့ ပြောသည်။
ထို့အပြင် တရုတ်နိုင်ငံ၌ အလုပ်အကိုင် ရရှိမည်ဟုဆိုကာ လူကုန်ကူးခြင်းများအားလည်း ပိုမိုတွေ့လာရကြောင်း မူဆယ်မြို့ရှိ နှလုံးလှပရဟိတအသင်းမှ တာဝန်ရှိသူတစ်ဦးက CNI သတင်းဌာနသို့ ပြောသည်။
၎င်းက “မြန်မာနိုင်ငံကနေ တရုတ်ပြည်ထဲဝင်သွားရင် အလုပ်က ချက်ချင်းရတာ မဟုတ်ဘူးလေ။ ဒီဘက်မှာ အလုပ်ရမယ်၊ အလုပ်က ပိုက်ဆံဝင်ငွေ ကောင်းမယ်ဆိုပြီးတော့ လိမ်ခေါ်လာတာ လမ်းစရိတ်ကအစ စိုက်ပေးတာ အဲဒီပွဲစားတွေက။ ဒီဘက်မှာ အဲဒီလိုမျိုး ရောင်းစားခံရတဲ့ ဟာတွေက အခုကာလမှာ နည်းနည်းများလာပြီ တဖြေးဖြေးနဲ့လေ။ နောက်ထပ်လည်းဖြစ်ဖို့က အလားအလာ အများကြီးပဲ။ မသိတဲ့ရိုးသားတဲ့ မိန်းကလေးတွေ၊ တောသူတောင်သားလေးတွေ မြို့နဲ့ဝေးတဲ့ မိန်းကလေးမျိုးတွေ ခရီးမထွက်ဖူးတဲ့ မိန်းကလေးမျိုးတွေ ရောင်းစား ခံရဖို့က တော်တော်များတယ်။ အဲဒီလိုပဲ အလုပ်လိုချင်တာ တစ်ခုတည်းနဲ့လိုက်လာရင် ရောင်းစားခံရဖို့ များတယ်။ ရှင်းရှင်းပြောရရင် ဒီဘက်မှာ အဆက်အသွယ် မချိတ်ဆက်မိဘဲနဲ့ ယုံကြည်စိတ်ချရတဲ့ အပေါင်းအသင်း မိတ်ဆွေ၊ လုပ်ငန်းရှင် ဒါတွေမချိတ်ဆက်မိဘဲနဲ့ ဒီဘက်ကို မလာဖို့ အဲဒါမျိုးတော့ ပြောချင်တယ်။ မိန်းကလေးတင် မဟုတ်ဘူး ယောကျာ်းလေးတွေပါ ဒုက္ခရောက်တာ။ တချို့ဆို ပြန်လာလိုက်ရင် ရောဂါသည်တွေ၊ နာတာရှည် ရောဂါသည်တွေ၊ ပြင်းပြင်းထန်ထန် ခံစားရတဲ့ ရောဂါသည်တွေ အဲဒီလိုမျိုးပေါ့။ ပိုက်ဆံမရှိတော့ ဆေးဝါးကုသဖို့ မရှိတာကအစ အခက်အခဲတွေ ကြုံတွေ့ရတယ်” ဟု ပြောသည်။
မြန်မာနိုင်ငံသားတွေ တရုတ်နိုင်ငံ၊ ပလက်ဖောင်းပေါ်မှာ အိပ်နေကြရစဉ်
တရုတ်နိုင်ငံဘက် အခြမ်းဖြစ်သည့် ရွှေလီမြို့တွင် အလုပ်အကိုင်ရရှိရေးအတွက် မြန်မာနိုင်ငံသားအချို့ လမ်းဘေး ပလက်ဖောင်းများပေါ်တွင် အိပ်စက်၍ အလုပ်ရှာဖွေကာ စောင့်ဆိုင်းနေကြရကြောင်းနှင့် အဖမ်းအဆီးမှာလည်း များပြားနေကြောင်း သိရသည်။
ထို့အပြင် မြန်မာဘက် မူဆယ်မှ တရုတ်ဘက်သို့ တစ်ခါသုံးကဒ်ဖြင့် ဝင်လာသူများအား မတ်လ ၅ ရက်နေ့မှ စတင်ကာ အလုပ်သမားရုံး တစ်ခုခု၏ ထောက်ခံစာရှိမှသာ ရွှေလီမြို့ထဲသို့ ဝင်နိုင်မည်ဖြစ်ကြောင်းလည်း သိရသည်။
လက်ရှိ တရုတ်ဘက်တွင် အလုပ်အကိုင်ပိုင်းနှင့်ပတ်သက်၍ ခက်ခဲနေခြင်းသည် ရောက်လာသည့် လူဦးရေနှင့် ရှိနေသည့် အလုပ်အကိုင်နှုန်းထား မမျှတသည့်အတွက်ဖြစ်ကြောင်း မူဆယ်မြို့ရှိ ကမ်းလက်ကူညီ ပရဟိတ အသင်းမှ တာဝန်ရှိသူတစ်ဦးက CNI သတင်းဌာနသို့ ပြောသည်။
မြန်မာနိုင်ငံသားတွေကို တွေ့ရစဉ်
၎င်းက “Vacancy ၁ သိန်းရှိမယ် ဥပမာပေါ့။ အလုပ်အကိုင်အခွင့်အလမ်း လူ ၁ သိန်းစာရှိမယ်။ ဒါပေမယ့် အခု လာနေတာ က လူ ၂ သိန်း၊ ၃ သိန်းလောက်ဖြစ်နေတယ်။ အဲဒီကြတော့ ရှိတဲ့အလုပ်ထက်စာရင် ရောက်နေတဲ့ လူဦးရေက အရမ်းများတာကို။ အနည်းဆုံး ၂ ဆ လောက်ဖြစ်နေတာပေါ့။ အလုပ်ရှာရတာ မခက်ဘူး။ အလုပ်မှာ တည်မြဲဖို့ ခက်တာ။ အခု အစ်ကိုက အလုပ်ရှာပေးမယ်ဆိုပြီး ရှာပေးလိုက်တယ် အလုပ်ရသွားပြီ။ တစ်လမခံဘူး အကြောင်းအမျိုးမျိုးပြပြီး အလုပ်ထုတ်ခံရရော။ ညီမက site မှာ supervisor ပေါ့။ supervisor ကနေ အကြောင်း အမျိုးမျိုးပြပြီး ထုတ်တယ်။ အဲဒီ supervisor ကပဲ သူ့မြို့၊ သူ့ရွာက၊ သူ့စက်ရုံက ပိုက်ဆံပေးတဲ့လူတွေကိုပဲ သူက ခန့်ချင်တာပေါ့။ အဲဒီအတွက် အလုပ်ကရပေမယ့် အလုပ်ကမတည်မြဲဘူး” ဟု ပြောသည်။
တရုတ်နိုင်ငံဘက်အခြမ်းသို့ မြန်မာနိုင်ငံသားများ ဝင်ရောက်ရာ၌ တစ်နှစ်သက်တမ်းရှိသည့် စာအုပ်အနီဖြင့်လည်း ကောင်း၊ တစ်ခါသုံးကဒ် TBP ဖြင့်လည်းကောင်း ဝင်ရောက်လျက်ရှိကြပြီး သက်တမ်းကျော်လွန်နေထိုင်သူ အများ အပြားကို တရုတ်အာဏာပိုင်များမှ ဖမ်းဆီးနေကြောင်းလည်း သိရသည်။
မြန်မာ-တရုတ် နှစ်နိုင်ငံနယ်စပ် တရုတ်နိုင်ငံဘက်အခြမ်းတွင် အလုပ်အကိုင်ရှားပါးရုံသာမက ဝင်ရောက်လာသည့် မြန်မာနိုင်ငံသားဦးရေး များပြားလွန်းနေသဖြင့် လုပ်ခလစာ ဈေးနှိမ်ခံနေရခြင်းများ ဖြစ်ပေါ်နေကြောင်းလည်း သိရသည်။
- By CNI
- Category: စီးပွားရေး
- Hits: 154
CNI News
၂၀၂၄ ခုနှစ်၊ မတ်လ ၁၁
မလေးရှားရှိ အထောက်အထားမဲ့ Overstay မြန်မာများ နေရပ်ပြန်နိုင်ရေးအတွက် သံရုံးသို့ မည်သူမည်ဝါ ဖြစ်ကြောင်း သက်သေခံလက်မှတ် CI သွားလုပ်ရာတွင် လမ်းခရီးရှိ စစ်ဆေးရေးဂိတ်များ၌ မလေးရှား အာဏာပိုင်တို့၏ ငွေညစ်မှုကိုခံနေရကြောင်း မြန်မာအဖွဲ့အစည်းများက CNI သတင်းဌာနသို့ ပြောသည်။
CI ပြုလုပ်ရန် သံရုံးသို့ လာရာလမ်းကြောင်းတွင် မလေးရှားအာဏာပိုင်များ၏ စစ်ဆေးရေးဂိတ်များဖြင့် ကြုံပါက အထောက်အထားမဲ့ Overstay သမားများ ဖြစ်သောကြောင့် ငွေကြေးတစ်စုံတစ်ရာ ရရှိရေးအတွက် ဖမ်းဆီးမည် ဟုဆိုကာ ခြိမ်းခြောက်မှုများရှိသည်ဟု မလေးရှားအခြေစိုက် ရတနာစက္က နာရေးကူညီမှုအသင်းမှဥက္ကဋ္ဌ ဦးအောင် က CNI သတင်းဌာနသို့ ပြောသည်။
“အကျိုးအကြောင်းပြောပြရင် ပြန်လွှတ်တယ်။ သို့သော် အလကားတော့ ပြန်လွှတ်တာမဟုတ်ဘူး။ အနည်းဆုံး တစ်ယောက်ကို ၂၀၀ လောက်တော့ ပေးရတယ်။ ဖမ်းတော့ ဖမ်းမသွားဘူး။ သို့သော် သူတို့ကတော့ ခြိမ်းခြောက် တာပေါ့လေ။ ငါတို့ဖမ်းမယ်ဆိုရင် လောလောဆယ် မင်းတို့မှာ CI စာရွက်မရှိသေးဘူး။ မရှိတဲ့အတွက် မင်းတို့ဟာ without သမားတွေပဲဖြစ်နေတယ်။ မင်းတို့ဟာတရားဝင်မဟုတ်တဲ့အတွက် ငါတို့ဖမ်းလို့ရတယ်။ ဒီဘက် ကလေး တွေကလည်း ကြောက်ပြီးတော့ မလိုက်ရဲကြတော့ဘူး။ ပိုက်ဆံပေး ကုန်ရင်ကုန်ပါစေ ကျမတို့ မလိုက်တော့ဘူး ပိုက်ဆံ ၂၀၀ ဆိုလည်း ၂၀၀ အဲဒီလိုပေးကြတယ်။ ရဲတွေကလည်း သိနေပြီ။ တချို့ဆို သံရုံးကို အစောကြီး မဝင်ရဲ ဘူး။ ဟိုဘက်ကပိတ်ပြီးစောင့် ဒီဘက်ကပိတ်ပြီးစောင့် ပိုက်ဆံတွေ တောင်းနေတယ်။ သံရုံးနဲ့ ဓါတ်တိုင် ၅ တိုင်ပေါ့ ၅ မီတာလောက်အထိပဲကွာတယ်။ အဲဒီလောက်အထိကို သူတို့ ဆင်းပြီးဖမ်းတယ်။ ကျနော်တို့လည်း သံရုံးကို အရင်က ဒါတွေ complain တက်တယ်။ သံရုံးကလည်း ဝန်းထဲမှာ လာဖမ်းရင် တာဝန်ယူတယ်။ ဝန်းပြင်မှာဆို တာဝန်မယူဘူးဆိုတော့” ဟု ၎င်းက ပြောသည်။
မြန်မာအလုပ်သမားများကို တွေ့ရစဉ်
မလေးရှားအာဏာပိုင်များက နိုင်ငံအတွင်းရှိ တရားမဝင် အထောက်အထားမဲ့များ၊ Overstay သမားများအတွက် ပြစ်ဒဏ်ကျခံခြင်းမရှိဘဲ နေရပ်ပြန်နိုင်ရေး အစီအစဉ်ကို မတ်လ ၁ ရက်နေ့မှ စတင်ကာ ဖွင့်ပေးထားခြင်း ဖြစ်သည်။
ထိုသို့ နေရပ်ပြန်ရေးအတွက် သက်ဆိုင်ရာ နိုင်ငံအသီးသီး၏ သံရုံးများတွင် မည်သူမည်ဝါ ဖြစ်ကြောင်း သက်သေခံ လက်မှတ် CI များအား ပြုလုပ်ကြပြီးမှသာ ဒဏ်ကြေးငွေအဖြစ် ရင်းဂစ် ၅၀၀ ပေးဆောင်၍ လေယာဉ်လက်မှတ် ဝယ်ယူပြီးပါက နေရပ်သို့ပြန်နိုင်သည်။
သို့သော် ယခုကဲ့သို့ မြန်မာနိုင်ငံသားများ ငွေကြေးတောင်းခံခြင်းနှင့် ကြုံတွေ့ကြရခြင်းသည် ကွာလာလမ်ပူမြို့ရှိ မြန်မာသံရုံးအနေဖြင့် နေရပ်ပြန်ရေးအတွက် CI လျှောက်ထားရာတွင် လူကိုယ်တိုင်လာရောက် လျှောက်ထား ရသည့် လုပ်ငန်းစဉ်ကို သတ်မှတ်ထားခြင်းကြောင့်ဟု ရခိုင်ဒုက္ခသည်များဗဟို CAR မှ ညွှန်ကြားရေးမှူးချုပ် ဦးညီညီလွင်က CNI သတင်းဌာနသို့ ပြောသည်။
မြန်မာအလုပ်သမားများကို တွေ့ရစဉ်
“တခြား ဘင်္ဂလားဒေ့ရှ်တို့ မှာလည်း ပြန်တဲ့သူများတယ်။ မြန်မာထက်တောင် ပိုများတယ်။ သူတို့ကြတော့ CI ကို အွန်လိုင်းက လျှောက်လို့ရတယ်။ ကိုယ်တိုင်လာစရာမလိုဘူးပေါ့။ ကိုယ်ရောက်တဲ့နေရာကနေ လျှောက်လို့ရ တယ်။ ဆိုတော့ အဲဒီ အွန်လိုင်းစနစ်နဲ့ လုပ်ထားတဲ့အခါကြတော့ နယ်ဝေးတွေကနေပြီးတော့ ဝေးလံတဲ့ ခရီးကနေ သံရုံးကို လာစရာ မလိုဘူးပေါ့။ သူ့အချက်အလက်ပြည့်စုံရင် ထုတ်ပေးလိုက်တာပါပဲ။ အဲဒီစာရွက် ကိုင်ထားရင် တော့ ဒီက အဖမ်းအဆီးတော့ မရှိတော့ဘူးပေါ့။ ဘာအထောက်အထားမှ လက်ဝယ်ကိုင်ထားတာ မရှိဘဲနဲ့ ဘတ်စ် ကား စီးတာတို့၊ ကားစီးတာတို့ဆို လမ်းမှာ ဘလောက်ချက်နဲ့ ရဲနဲ့တွေ့ရင် ဒါက အခက်အခဲ ဖြစ်တတ်တယ်လေ။ တစ်ခုခုပေါ့ သံရုံးကနေ ထုတ်ပေးထားရင်တော့ ကောင်းတာပေါ့။ သူတို့က CI လျှောက်ဖို့ လာတယ်။ ဘယ်နှစ်ယောက် ထောက်ခံစာလေး ပေးထားရင်တော့ မဖမ်းပါဘူး။ ဒါပေမယ့် အဲဒီလိုလုပ်တာ မတွေ့ရတော့ အခက်အခဲ က အများကြီး ဖြစ်ပါတယ်” ဟု ၎င်းက ပြောသည်။
မလေးရှားအာဏာပိုင်များက နေရပ်ပြန်ရေး အစီအစဉ်ကို မတ်လ ၁ ရက်နေ့မှ စတင်ကာ ဒီဇင်ဘာလကုန်အထိ ခွင့်ပြုထားသော်လည်း လက်ရှိမှာတော့ နေရပ်ပြန်သည့် မြန်မာလူဦးရေမှာ နည်းပါးလျက်ရှိသေးကြောင်း၊ ကျန်းမာရေး မကောင်းသူများသာ အဓိက အများဆုံး နေရပ်ပြန်ရန် လုပ်ဆောင်နေကြခြင်းဖြစ်ကြောင်း သိရသည်။
- By CNI
- Category: စီးပွားရေး
- Hits: 136
CNI News
၂၀၂၄ ခုနှစ်၊ မတ်လ ၁၁
ပြည်တွင်းရွှေဈေးနှုန်းသည် လက်ရှိတွင် အကယ်ဒမီ မီးလင်းရွှေ တစ်ကျပ်သားလျှင် ငွေကျပ် ၃၉ သိန်းနှင့် သိန်း ၄၀ ကြားတွင် ရောက်ရှိနေပြီး ရွှေဈေးနှုန်း အဆမတန် မြင့်တက်ခြင်းက လူတန်းစား အားလုံးအပေါ်တွင် သက်ရောက်မှုရှိနေသည်ဟု ဈေးကွက် လေ့လာသူများက ပြောသည်။
ရွှေဈေးနှုန်း မြင့်တက်မှုကြောင့် နိုင်ငံခြားငွေ လဲလှယ်သည့် နှုန်းထားများသည်လည်း လိုက်ပါမြင့်တက်လျက်ရှိနေ ကြောင်း၊ ထိုသို့ နိုင်ငံခြားငွေ လဲလှယ်နှုန်း မြင့်တက်မှုကြောင့် ပြည်ပမှ တင်သွင်းရသည့် ကုန်စည်များလည်း မြင့်တက်လာမည် ဖြစ်သည်။
ရွှေဈေးနှုန်း မြင့်တက်မှုကြောင့် ပြည်သူလူထုအပေါ် တိုက်ရိုက် သက်ရောက်မှုမရှိသော်လည်း သွယ်ဝိုက်၍ အနည်းနှင့်အများ သက်ရောက်လျက်ရှိသည်ဟု ရွှေဈေးကွက် လေ့လာသုံးသပ်သူ ကိုနေလင်းက CNI သတင်းဌာန သို့ ပြောသည်။
အခြေခံ လူတန်းစားများ၏ အိမ်ပြန်ချိန်ကိုတွေ့ရစဉ်
၎င်းက “ရွှေဆိုတာက တစ်နိုင်ငံလုံး အတိုင်းအတာမှာ ပိုက်ဆံရှိတယ်ဆိုရင် ဘယ်သူမဆို ဝယ်လို့ရတယ်။ မဝယ်နိုင် တဲ့ သူအတွက် မဆိုင်ဘူးလို့ ပြောပေမယ့် ရွှေဈေး အတက်အကျ ဖြစ်တဲ့အခါကျတော့ သက်ရောက်မှုဒဏ်တွေက တခြား နေရာတွေမှာလည်း သွားသက်ရောက်တာပဲ။ အဲဒါကြောင့် မဆိုင်ဘူးလို့ ပြောလို့မရဘူး။ သက်ရောက်မှု များတာနဲ့ သက်ရောက်မှု နည်းတာပဲ ရှိမှာ။ သူနဲ့ တိုက်ရိုက် ဆက်စပ်နေတာတော့ ဒေါ်လာပေါ့။ ဒေါ်လာနဲ့ ဆက်စပ်နေတာက Export, Import တွေ။ Export, Import က ဆက်စပ်ပြီဆိုတော့ ကျနော်တို့ လူသုံးကုန်ပေါ့။ အခု သွင်းရတဲ့ဟာတောင်မှ ကန့်သတ်ချက်နဲ့။ Exporter လား Importer လား သေချာ မဖတ်လိုက်ရဘူး တစ်ယောက်ကို ဒေါ်လာ ၃ သိန်းပဲ ခွင့်ပြုပေးမယ်ပေါ့။ အရမ်းကြီး သက်ရောက်မှု ခံရတာနဲ့ သက်ရောက်မှု နည်းနည်းခံရတာတော့ ကွာတာပေါ့။ ဒီနိုင်ငံမှာ နေသမျှလူတိုင်းအပေါ်မှာ သက်ရောက်တာပဲ။ ဘယ်ဟာရယ်လို့ သီးခြား ခွဲခြားထားတာ မရှိဘူးပေါ့” ဟု ပြောသည်။
ရွှေဈေးနှုန်း ကျဆင်းရေးအတွက် ရွှေလုပ်ငန်းရှင်များကို ခေါ်ယူစစ်ဆေးမှုများကို ပြီးခဲ့သည့် နှစ်တွင်လည်းကောင်း၊ ယခုနှစ်တွင်လည်းကောင်း သက်ဆိုင်ရာ အဖွဲ့အစည်းများက လုပ်ဆောင်နေသော်လည်း သက်ရောက်မှု မရှိသည့် အပြင် ရွှေဈေးနှုန်းသည် တစ်နှစ်ထက်တစ်နှစ် မြင့်တက်လျက် ရှိနေသည်။
ပြီးခဲ့သည့် ၂၀၂၀ ခုနှစ်တွင် အကယ်ဒမီ မီးလင်းရွှေ တစ်ကျပ်သားလျှင် ၁၃ သိန်းကျပ်ခန့်သာ ရှိခဲ့သည့် ရွှေဈေးနှုန်း သည် လက်ရှိ၌ ငွေကျပ် သိန်း ၄၀ သို့ ရောက်ရှိလျက် ရှိနေသည်။
ရွှေဈေးနှုန်း မြင့်တက်လာရခြင်းသည် ငွေကြေးဖောင်းပွမှုကြောင့် ဖြစ်သည့်အတွက် ထိန်းချုပ်ရန် မလွယ်ကူ ကြောင်း၊ ငွေကြေးဖောင်းပွမှု ဆက်လက်ရှိနေမည်ဆိုပါက အခြေခံလူတန်းစားများအပေါ် သက်ရောက်နေသည့် ကုန်ဈေးနှုန်း မြင့်တက်မှုသည်လည်း ဆက်လက်ရှိနေမည်ဟု ဘဏ်ရေးရာကျွမ်းကျင်သူ ဦးဋ္ဌေးအောင်ကြည်က CNI သတင်းဌာနသို့ ပြောသည်။
စားသောက်ကုန်များရောင်းချနေစဉ်
၎င်းက “ရွှေဈေးတက်တာက ပြဿနာ မဟုတ်ဘူး။ ဘာလို့ဆို ရွှေဈေးတက်တဲ့ အကွက်တစ်ကွက်တည်းကိုပဲ သွားကြည့်လို့ မရဘူး။ အဓိက သူ့ရဲ့ အခြေခံအကြောင်းတရားသည် ငွေကြေးဖောင်းပွတာ။ အခြေခံ လူတန်းစား အတွက်က ထိခိုက်မှာပဲပေါ့။ ငွေဖောင်းပွမှုနဲ့ ဆက်နွယ်လိုက်တော့ ပတ်ချာလည် ဆက်စပ်သွားတာပေါ့။ အဓိက ငွေဖောင်းပွတယ်။ ငွေဖြစ်လွယ်တဲ့ ရွှေနဲ့ လက်ထဲမှာ ရှိတဲ့ ပိုက်ဆံ၊ ကျပ် သို့မဟုတ် ဒေါ်လာပေါ့။ ကျပ်က တခါ ဖောင်းပွတယ်။ ဖောင်းပွတော့ လူလတ်တန်းစားနဲ့ အထက်လူတန်းစားက ရွှေ သို့မဟုတ် ဒေါ်လာကိုင်ကြတာပေါ့။ ပြီးခဲ့တဲ့ ၂ နှစ်၊ ၃ နှစ်က တွေ့လိုက်တာပေါ့ ကမ္ဘာပေါ်မှာ ငွေဖောင်းပွတဲ့နှုန်းက ဒေါ်လာနဲ့ ရွှေနဲ့တောင်မှ မတူဘူး။ ရွှေဖောင်းပွမှုနှုန်းက ပိုမြန်တယ်။ ဒါသည် အားလုံးကို ခြုံပြီး ဆက်စပ်လိုက်လို့ရှိရင် အဓိက တရားခံသည် ဘာလဲ ဆိုတော့ ငွေဖောင်းပွတာပဲပေါ့။ ငွေဖောင်းပွတာဖြစ်တဲ့အတွက် အခြေခံလူတန်းစားလည်း ထိမှာပဲပေါ့။ ဆက်ထိမှာ ပဲပေါ့” ဟု ပြောသည်။
ပြည်တွင်းတွင် ဖြစ်ပေါ်နေသည့် ငွေကြေးဖောင်းပွမှုကြောင့် ရွှေဈေးနှုန်း၊ နိုင်ငံခြားငွေဈေးနှုန်းနှင့် ကုန်ဈေးနှုန်းများ မြင့်တက်နေမှုများကို လျော့ကျလာစေရန်အတွက် နိုင်ငံ၏ စီးပွားရေး ကောင်းမွန်ရန် လိုအပ်ကြောင်း၊ ထိုသို့ စီးပွားရေး ကောင်းမွန်ရန်အတွက် နိုင်ငံရေးအခြေအနေ ကောင်းမွန်မှသာဖြစ်မည်ဟု စီးပွားရေး လုပ်ငန်းရှင်များနှင့် လေ့လာသုံးသပ်သူများက ထောက်ပြကြသည်။
နိုင်ငံရေးနှင့် စီးပွားရေး ပတ်ဝန်းကျင်သည် ယခုကဲ့သို့ ဆက်လက် ဖြစ်ပေါ်နေမည်ဆိုပါက ပြည်တွင်း၏ ကုန်ဈေးနှုန်းကဏ္ဍသည် ဆက်လက် မြင့်တက်နေမည် ဖြစ်သည်။
- By CNI
- Category: စီးပွားရေး
- Hits: 189
CNI News
၂၀၂၄ ခုနှစ်၊ မတ်လ ၈
ကချင်ပြည်နယ်အတွင်း မြစ်ကြီးနား၊ ဝိုင်းမော်၊ ဗန်းမော်နှင့် မိုးမောက်မြို့နယ်တို့တွင် မတ်လ ၇ ရက်နေ့က မြန်မာ့တပ်မတော်၊ ပြည့်သူ့စစ်ပူးပေါင်းတပ်နှင့် ကချင်လွတ်မြောက်ရေး တပ်မတော် KIA၊ ပြည်သူ့ကာကွယ်ရေး တပ် PDF ပူးပေါင်းတပ်တို့ တိုက်ပွဲဖြစ်ပွားမှုကြောင့် ကုန်သွယ်ရေးလမ်းကြောင်းတချို့ ပိတ်ထားရကြောင်း သိရသည်။
ဗန်းမော် - လွယ်ဂျယ် လမ်းပိုင်းနှင့် မြစ်ကြီးနား - ဗန်းမော် လမ်းပိုင်းတို့ကို တိုက်ပွဲဖြစ်ပွားသည့် မတ်လ ၇ ရက်နေ့ တွင် ခေတ္တပိတ်ထားခဲ့ပြီး မတ်လ ၈ ရက်နေ့ မနက်ပိုင်းတွင် ပြန်လည်ဖွင့်လှစ်လိုက်ပြီ ဖြစ်ကြောင်း သိရသည်။
ဗန်းမော်မြို့နယ်နှင့် မိုးမောက်မြို့နယ်တို့တွင် တိုက်ပွဲ ဖြစ်ပွားနေမှုကြောင့် ဗန်းမော်မြို့နယ်အတွင်းရှိ ငှက်ပျောနှင့် ကြံများကို ထုတ်ယူရန်အဆင်မပြေသည့်အတွက် လွယ်ဂျယ်မှတဆင့် တရုတ်နိုင်ငံသို့ တင်ပို့နိုင်ရန် အခက်အခဲ ရှိနေကြောင်း၊ လက်ရှိတွင် ဗန်းမော်မြို့ မြောက်ဘက်ခြမ်းတွင် သွားလာ၍ အဆင်မပြေကြောင်း၊ တောင်ဘက်ခြမ်း တွင်သာ သွားလာ၍ ရသည်ဟု လွယ်ဂျယ် ကုန်ကားမောင်းနှင်သူ ကိုဟိန်းဇင်ထွန်းက CNI သတင်းဌာနသို့ ပြော သည်။
“အဲဒီလိုတော့ ကျနော်တို့လည်း တိတိကျကျတော့ မသိဘူး။ ပိတ်တယ်လို့တော့ အသံကြားတယ်။ ဒါပေမယ့် ဒီမနက် ဖွင့်တယ်လို့ ပြောတယ်။ ကျနော်ကတော့ မသွားရသေးဘူး။ မိုးမောက်ကတော့ ဖြစ်သံမကြားဘူး။ ဆိုင်တော့ဆိုင်ပါတယ် အဲဒီဘက်က ပစ္စည်းတွေတော့ ထုတ်မရတာပေါ့။ ငှက်ပျောတွေ၊ အဲဒီဘက်က ကြံတွေ၊ လွယ်ဂျယ်ပို့တဲ့ဟာတွေ ထုတ်မရတာပေါ့။ သံတောင်တို့၊ မြို့သစ်တို့ အဲဒီဘက်တွေကတော့ မရဘူးပေါ့။ အခုသွားနေတာကတော့ ရွှေလီ၊ လွယ်ဂျယ်ပေါ့ အဲဒီလိုတော့ သွားနေကြတယ်။ အတိအကျ ပြောရရင်တော့ ဗန်းမော်ရဲ့ မြောက်ဘက်ထဲ ကျမှာပေါ့။ အဲဒီဘက်တော့ သွားမရဘူး။ တောင်ဘက်ထဲတော့ သွားလို့ရတယ်” ဟု ပြောသည်။
တိုက်ပွဲကြောင့် ဗန်းမော် - မြစ်ကြီးနား လမ်းပိုင်း ပိတ်ထားကြောင်း၊ ဗန်းမော် လမ်းကြောင်း ပိတ်ထားခြင်းကြောင့် လွယ်ဂျယ်နယ်စပ်ကုန်သွယ်ရေးသို့ သွားရန်အခက်အခဲ ရှိနေကြောင်း၊ ဝိုင်းမော်မြို့နယ်အတွင်းရှိ ခါယန်ကျေးရွာမှ ထွက်ရှိသည့် ငှက်ပျောခြံများဘက်တွင်လည်း သွားလာ၍ မရကြောင်း ကုန်ကားသမားတစ်ဦးဖြစ်သည့် ကိုရှမ်းကြီးက CNI သတင်းဌာနသို့ ပြောသည်။
KIA တပ်သားများ
“မနေ့ကဖြစ်တဲ့ဟာတော့ သက်ရောက်မှုတော့ အဲဒီလောက် မရှိဘူး။ ဒါပေမယ့် ငှက်ပျောခြံ နည်းနည်းပါးပါးတော့ အဝင်အထွက်လေးလောက်ပဲ တန့်တာပါ။ ခဏလောက်ပဲ တန့်ပြီး ပြန်ဖွင့်ပေးတယ် သွားလာလို့ရတယ်။ ခါယန်ပဲ သွားလို့လာလို့ မလွယ်တာ။ ခါယန်တစ်ခုပါပဲ သွားလာလို့ မရတာ၊ ကျန်တဲ့နေရာတော့ သွားလာလို့ အကုန်ရတယ် ဒီဘက်က။ အခုလောလောဆယ်တော့ မပိတ်သေးဘူးပဲ။ အကြီးအကျယ် ဖြစ်လာရင်တော့ မသိဘူး အနေအထား ကလေ။ အကြီးအကျယ် ဖြစ်လာရင်တော့ အပြောင်းအလဲ ဖြစ်ရင်လည်း ဖြစ်မှာပေါ့။ အခုလောလောဆယ်တော့ လမ်းကြောင်းပိတ်တာတို့တော့ မလုပ်ကြဘူးပဲ။ လောလောဆယ် ဗန်းမော်နဲ့ မြစ်ကြီးနားလမ်းကြောင်းက ပိတ်ထားတော့ အဲဒီဘက် သွားလာတာ သိပ်မရှိဘူး။ ဗန်းမော်ဖြစ်ရင်တော့ လွယ်ဂျယ်ဘက် သွားလို့ အခက် အခဲဖြစ်မှာပေါ့။ ကန်ပိုက်တီကတော့ ဒီဘက်အပိုင်းဆိုတော့ သွားလာလို့ရတယ်” ဟု ပြောသည်။
ပြီးခဲ့သည့် ဖေဖော်ဝါရီလတွင်လည်း ကချင်ပြည်နယ်နှင့် စစ်ကိုင်းတိုင်းဒေသကြီး ထိစပ်နေသည့် လမ်းကြောင်း များတွင် ထိတွေ့တိုက်ပွဲများ ဖြစ်ပွားခဲ့ခြင်းကြောင့် မြစ်ကြီးနား - ဗန်းမော်လမ်းပိုင်းနှင့် မန္တလေး - ဗန်းမော် အဓိက လမ်းပိုင်းများကို ပိတ်ထားသည်ဟု သိရသည်။
မတ်လ ၇ ရက်နေ့က ဖြစ်ပွားသည့် တိုက်ပွဲကြောင့် ဒေသခံများ ပြောင်းရွှေ့နေကြရပြီး ဗန်းမော်မြို့အတွင်းတွင် လည်း လုံခြုံသည့် အနေအထားတွင် မရှိကြောင်း ဗန်းမော်ဒေသခံတစ်ဦးက CNI သတင်းဌာနသို့ ပြောသည်။
“အခု ကျနော်တို့ ဗန်းမော်ကနေတော့ လောလောဆယ် ပိတ်တာ မရှိဘူးဗျ။ မိန်းလမ်းတွေကတော့ ဗန်းမော် - မြစ်ကြီးနား မိန်းလမ်းလည်း ပိတ်တယ်ပေါ့။ ဗန်းမော် - မန္တလေးလည်း ပိတ်တာပဲလေ။ တိုက်ပွဲကြောင့်တော့ တိုက်ပွဲဖြစ်တဲ့နေရာ ကျေးရွာတွေကတော့ ဒီဘက်ကို ရွှေ့ထားတယ်ပေါ့နော်။ ကျနော်တို့ ခရီးသွားနဲ့ ပတ်သက် ရင်တော့ မထိခိုက်ဘူးပေါ့ လောလောဆယ်။ ဘာဖြစ်လို့လဲဆိုတော့ ပထမပိတ်ထားတဲ့လမ်းမှာ ဖြစ်တာကိုး။ စိုးရိမ်ရတာတော့ စိုးရိမ်ရပါတယ်။ ကျနော်တို့ မြို့ထဲတောင်မှ ပွင့်ပွင်လင်းလင်းပြောရရင် သိပ်မလုံဘူးပေါ့နော်။ မြို့ထဲနေရတာတောင်မှ သိပ်မလုံပါဘူး” ဟု ပြောသည်။
ကချင်ပြည်နယ်အတွင်း တိုက်ပွဲဖြစ်ပွားနေမှုကြောင့် ကုန်သွယ်ရေးလမ်းကြောင်းများ မကြာခဏ ပိတ်ခံရသည့် ဖြစ်စဉ်များ ဖြစ်ပေါ်နေပြီး ကုန်တင်ယာဉ်များ မကြာခဏ ပိတ်မိနေမှုများလည်း ဖြစ်ပွားလျက် ရှိနေသည်။
- By CNI
- Category: စီးပွားရေး
- Hits: 133
CNI News
၂၀၂၄ ခုနှစ်၊ မတ်လ ၈
ထိုင်းနိုင်ငံသားများ၏ တိုင်ကြားမှုကြောင့် မြန်မာရွှေ့ပြောင်းလုပ်သားများ စစ်ဆေးဖမ်းဆီးခံရသည့် ကိစ္စရပ် များပြားလာကြောင်း ထိုင်းနိုင်ငံအခြေစိုက် ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူများက CNI သတင်းဌာနသို့ ပြောသည်။
ထိုထဲတွင် မသင်္ကာစရာကိစ္စတစ်ခုခုကြောင့် သတင်းပေးပို့သဖြင့် ထိုင်းအာဏာပိုင်များမှ လာရောက်စစ်ဆေးပြီး ဖမ်းဆီးခံရမှုမှာ ပို၍များကြောင်း FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။
“ထိုင်းနိုင်ငံသားတွေကတော့ ထုံးစံအတိုင်း သူတို့အချင်းချင်း မကျေမနပ်ဖြစ်လို့ အလုပ်ရှင်ချင်းပေါ့ အပြိုင် အဆိုင်ဖြစ်လို့ တိုင်တာတောတာလည်း ရှိမယ်။ နောက်တစ်ခုက နယ်မြေမှာ သူတို့မှာ ရပ်ကွက်တွေ၊ မြို့နယ် တွေမှာ အရံပေါ့ ရပ်မိရပ်ဖတွေ ပြည်သူ့စစ်လိုဟာမျိုးတွေ ဒါတွေအကုန်လုံးက ရှိထားပြီးသား။ အဲဒီတော့ အဲဒီမှာကို သူတို့က ရွှေ့ပြောင်းအလုပ်သမားတွေ တရားမဝင် ဝင်ရောက်တာတို့၊ မသင်္ကာတာတို့၊ မသင်္ကာစရာ ရှိတာတို့ အကြောင်းကြားပေးဖို့ စနစ်က ရှိထားပြီးသားလေ။ အဲဒီအခါကြတော့ တွေ့တဲ့အခါကြရင် တိုင်တဲ့ တောတဲ့ အခါကြရင် လာပြီးတော့ အဖမ်းခံရတာပေါ့။ များသောအားဖြင့်ကတော့ မသင်္ကာစရာတွေ့တဲ့ အခါကြတော့ သတင်းပို့လို့အဖမ်းခံရတာတွေကလည်း တော်တော်များပါတယ်” ဟု ၎င်းက ပြောသည်။
ထိုင်းနိုင်ငံတွင် ဆိုက်တွဲဖြင့် ဒန်ပေါက်လှည့်လည်ရောင်းချနေသည့် ရွှေ့ပြောင်းမြန်မာတစ်ဦး
ပြီးခဲ့သည့်ရက်ပိုင်းက Sa Kaeo ပြည်နယ်တွင် အထည်အလိပ် စက်ရုံနှင့် ဟိုတယ် စားသောက်ဆိုင် လုပ်ငန်းခွင် များ၌ နိုင်ငံခြားသား ရွှေ့ပြောင်းအလုပ်သမားများစွာ အလုပ်လုပ်နေသည်ဟု ဒေသခံများ၏ တိုင်တန်းမှုအရ ခရိုင် လူဝင်မှုကြီးကြပ်ရေး ရဲတပ်ဖွဲ့နှင့် ဌာနပေါင်းစုံမှ တာဝန်ရှိသူများ သွားရောက်စစ်ဆေးပြီး တရားမ၀င် ရွှေ့ပြောင်း အလုပ်သမား ၂၅ ဦး အားဖမ်းဆီးခဲ့သည်။
ယခင်ကလည်း တွန်းလှည်းဖြင့်ဈေးရောင်းချနေသည့် မြန်မာများ၊ ကိုယ်ပိုင်ဆိုင်ဖွင့်ထားသည့် မြန်မာများအပေါ် ထိုင်းနိုင်ငံသားများ၏ တိုင်ကြားမှုများမှာ ရှိခဲ့သည်။
သို့သော် ယခုနောက်ပိုင်းတွင် ထိုင်းနိုင်ငံ၌ မြန်မာနိုင်ငံသား ပိုမိုများပြားလာပြီး စက်ရုံ၊ အလုပ်ရုံများတွင်သာမက ထိုင်းနိုင်ငံ၏ အခြားသော ဝန်ဆောင်မှုအလုပ်အကိုင်များတွင်လည်း မြန်မာနိုင်ငံသားများ နေရာယူလာကြ ကြောင်း သိရသည်။
ထို့ကြောင့် ၎င်းအလုပ်အကိုင်များထဲမှ ဝန်ဆောင်မှုပေးသည့်လုပ်ငန်းတွင် မြန်မာနိုင်ငံသားများမှ ကိုယ်ပိုင်ယာဉ် များဖြင့် ဝင်ရောက်လုပ်ကိုင်နေသည့်အတွက် ထိုင်းနိုင်ငံသား ယာဉ်မောင်းများ၏ တိုင်ကြားမှုများရှိနေကြောင်း ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူများထံက သိရသည်။
တာ့ခ်လူဝင်မှုကြီးကြပ်ရေးဌာနတွင် ဖမ်းဆီးထိန်းသိမ်းခံထားရသည့် ရွှေ့ပြောင်းမြန်မာများ
ရှေ့လျှောက်တွင် မြန်မာနိုင်ငံသားများမှာ ထိုင်းနိုင်ငံအတွင်း ပိုမိုဝင်ရောက်လာကြဦးမည်ဖြစ်သည့်အတွက် ထိုသို့ အတိုင်ခံရမှု ပိုမိုများပြားလာနိုင်ဖွယ်ရှိကြောင်း ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။
“အပြင်မှာ မြန်မာတွေ တချို့တွေ တွန်းလှည်းတွေနဲ့ နောက် ကိုယ်ပိုင်ဆိုင်တွေ၊ နောက် အခုဘန်ကောက်မှာဆို လည်း တော်တော်ပဲ မှိုလိုပေါနေတာ။ ကိုယ်ပိုင်ကားတွေဝယ်ပြီးတော့မှ ကိုယ့်နိုင်ငံသားကိုယ် ကားအကြို/အပို့ လုပ်တာတွေ၊ အိမ်ပြောင်းတာတွေ၊ လေယာဉ်လက်မှတ်ဝယ်ပေးတာတွေ အစရှိသဖြင့် ကျနော်တို့မြန်မာတွေ ကလည်း ပွင့်ပွင့်လင်းလင်းပြောရင် ကိုယ့်အလုပ်ကို လေလှိုင်းပေါ်မှာတင်ပြီး ကြေညာတာပေါ့။ အဲဒီတော့ ဒီဟာ တွေဟာ ပတ်သက်ပြီးတော့မှ ထိုင်းအစိုးရဆီကို ထိုင်းနိုင်ငံသားတွေ တိုင်တာတွေ အများကြီးရှိတယ်။ တချို့ ဒေသခံကားသမားတွေဆိုရင်လည်း မြန်မာတွေကို တိုင်တယ်။ နောက် တက္ကစီသမားတွေပေါ့။ မြန်မာတွေဟာ သူတို့ကိုယ်ပိုင်ကားတွေနဲ့ မြန်မာအချင်းချင်း contact လုပ်ပြီးတော့မှ ကားအကြို/အပို့တွေလုပ်ကြတယ်။ ဒီမှာ တက္ကစီသမားတွေ ရပ်နေရတယ်ပေါ့။ ယာဉ်မောင်းနဲ့ပတ်သက်တာတွေတော့ အတိုင်ခံရတာတွေ အများကြီး ရှိတယ်” ဟု ၎င်းက ပြောသည်။
လက်ရှိတွင် ထိုင်းအာဏာပိုင်များမှ မြန်မာနိုင်ငံသားများနှင့်ပတ်သက်၍ လုံခြုံရေးစစ်ဆေးမှုများ ပိုမိုတင်းကြပ် လာနေသကဲ့သို့ ဝင်ရောက်လာသည့် မြန်မာပိုမိုများပြားလာသည့်အတွက် နယ်စပ်ဒေသများတွင် အဆောင်၊ တန်းလျားတို့၏ အခန်းခများကို ယခင်ကထက် ပို၍ ဈေးတင်ခြင်းဖြင့် ထိုင်းနိုင်ငံသားများမှ ခေါင်းပုံဖြတ်နေကြ ကြောင်းလည်း သိရသည်။
- By CNI
- Category: စီးပွားရေး
- Hits: 212
CNI News
၂၀၂၄ ခုနှစ်၊ မတ်လ ၇
ယခုနှစ် ငှက်ပျောရာသီစတင်ချိန်မှစ၍ ယနေ့အချိန်ထိ ကချင်ပြည်နယ် ကန်ပိုက်တီ နယ်စပ်ကုန်သွယ်ရေးမှတဆင့် တရုတ်နိုင်ငံသို့ ငှက်ပျောတင်ပို့ရာတွင် တရုတ်နိုင်ငံမှ လိုင်စင်မဲ့ ကုန်ကားများ ဝင်ရောက်နေ၍ မြန်မာကုန်ကားများ အခက်တွေ့နေကြောင်း ကုန်ကားမောင်းနှင်သူများက ပြောသည်။
ငှက်ပျောခြံပိုင်ရှင်များက ငှက်ပျောတင်ပို့ရန်အတွက် တရုတ်နိုင်ငံမှ လိုင်စင်မဲ့ကားများကို အသုံးပြုနေခြင်းကြောင့် မြန်မာကုန်ကားများအနေဖြင့် ငှက်ပျောတင်ဆောင်ရသည့် အခေါက်ရေများ လျော့ကျလျက် ရှိနေခြင်း ဖြစ်သည်။
ပြီးခဲ့သည့်နှစ် ကာလတူနှင့် နှိုင်းယှဉ်ပါက ငှက်ပျောရာသီ စတင်သည့် နိုဝင်ဘာလမှ လက်ရှိ မတ်လအထိ မြန်မာကုန်တင်ကားများအနေဖြင့် အခေါက်ရေ ၂၀ ခန့် ရရှိပြီးနေပြီဖြစ်သော်လည်း လက်ရှိတွင် လိုင်စင်မဲ့ တရုတ်ကုန်ကားများကြောင့် အခေါက်ရေ ၈ ခေါက်ခန့်သာ ရရှိသေးသည်ဟု ကန်ပိုက်တီမှ ကုန်ကားမောင်းနှင်သူ ကိုထွဋ်က CNI သတင်းဌာနသို့ ပြောသည်။
သစ်သျှူးငှက်ပျောများကို တွေ့ရစဉ်
“ငှက်ပျော ဒီနှစ်ဆွဲလို့လည်း သိပ်မကောင်းဘူး။ နောက်ပြီးတော့ တချို့ လိုင်စင်ကားတွေဆို မဆွဲရဘူး။ without တွေက များနေတော့။ ကားအလွတ်တွေက များနေတော့၊ ခြံက ဝယ်ထားတဲ့ကားတွေ၊ တရုတ်တွေ ဝယ်ထားတဲ့ကားတွေက များတယ်။ without ကားတွေ များတဲ့အချိန်ကျတော့ ကျနော်တို့မှာ ဒီလိုင်စင်ကားတွေက ဆွဲရတာ အခက်အခဲ ရှိတယ်။ နောက်ဆုံး မန္တလေးဆင်းပြီးတော့မှ ဖရုံတွေ၊ ဖရဲတွေ သွားတင်ရတော့တာ။ ငှက်ပျောကို မဆွဲနိုင်ဘူးဖြစ်နေတယ် without များတော့။ တကယ့် အခွန်ဆောင်ထားတဲ့ လိုင်စင်ကားတွေကျတော့ ဒုက္ခရောက်တာပေါ့။ သူတို့ကားတွေက ပုံမှန်ပဲလေ ဆွဲနေတာ အလွတ်တွေပေါ့ လိုင်စင်မရှိတဲ့ ကားတွေပေါ့နော်။ စဆွဲကတည်းကိုက စလာတာပဲ အဲဒါတွေက။ ငှက်ပျောချိန်ပြီးရင် တချို့ကျတော့လည်း ခြံထဲမှာ သိမ်းထားတာရှိတယ်။ တချို့ကျတော့လည်း တရုတ်ပြည်ထဲမှာ ထားထားတာ ရှိတယ်လေ ကူရုံးမှာ။ ငှက်ပျောခြံထဲမှာ ဖွက်ထားတော့တာပေါ့။ အခေါက်ရေ မရတော့ဘူးပေါ့ ဒီနှစ်ဆိုရင်။ အရင်နှစ်တွေဆိုရင် ဒီအချိန်ဆိုရင် ကျနော်တို့ ဘယ်လောက်ထိ ရပြီလဲဆိုရင် အခေါက် ၂၀ ကျော်ပြီလေ။ ဒီနှစ်က ၈ ခေါက်၊ ၉ ခေါက် အဲဒီထက် မပိုဘူး၊ အဲဒီလောက်ပဲ ရကြတာ” ဟု ပြောသည်။
တရုတ်မှ ဝင်ရောက်ထားသည့် လိုင်စင်မဲ့ကားအစီးရေသည် မြန်မာကုန်ကားအစီးရေး၏ ထက်ဝက်ခန့်ရှိကာ တရုတ်ကားများသာ အလုပ်ဖြစ်နေပြီး မြန်မာကုန်ကားတချို့မှာ ရပ်နားထားရကြောင်း သိရသည်။
တချို့သော မြန်မာကုန်ကားများသည် ငှက်ပျောအစား မန္တလေးမှတဆင့် ဖရဲ၊ ကြက်သွန်များကိုသာ သွားရောက် တင်ဆောင်နေကြရကြောင်း၊ ထိုသို့ မန္တလေးသို့ ကုန်တင်ဆောင်ရာတွင် ရရှိသည့်နှုန်းထားသည် များပြားသော် လည်း လမ်းကြောင်းတလျှောက် ဂိတ်ကြေးပေးဆောင်ရမှုသည်လည်း များပြားသည်ဟု ကုန်ကားသမားများက ပြောသည်။
ကန်ပိုက်တီ မြို့အဝင်ဆိုင်းဘုတ်
လက်ရှိတွင် မြန်မာကုန်ကားများသည် တရုတ်ကုန်ကားများနှင့် နှိုင်းယှဉ်ပါက ငှက်ပျောတင်ဆောင်ရသည့် အခေါက်ရေသည် ထက်ဝက်ခန့် လျော့ကျနေခြင်းကြောင့် လိုင်စင်မဲ့ တရုတ်ကုန်ကားများ ဝင်ရောက်နေမှုကို ထိန်းချုပ်ပေးစေလိုကြောင်း ကန်ပိုက်တီ ကုန်ကားသမား ကိုရှိုင်းဝေက CNI သတင်းဌာနသို့ ပြောသည်။
“အစီး ၃၀/၄၀ လောက်တော့ ရှိလောက်မယ်။ မြန်မာကားနဲ့ဆိုရင် အခုလက်ရှိ ငှက်ပျောဆွဲနေတာကတော့ သူတို့တစ်ဝက်၊ ကျနော်တို့တစ်ဝက်လောက် ရှိအုံးမယ်။ တစ်ဝက်စီလောက်ကျမှ ငှက်ပျောခြံထဲကကားနဲ့ တရုတ်ထဲကကားနဲ့ တချို့ တရုတ်ကုန်သည်တွေ၊ ငှက်ပျောခြံကုန်သည်တွေလည်း ရှိတယ်လေ အတွင်းထဲမှာ ထားထားတာ အလွတ်တွေက။ မန္တလေးဆင်းပြီးမှ ဆွဲတာတော့ ဖရုံသီးတို့၊ ဖရဲသီးတို့၊ ကြက်သွန်နီတို့ပေါ့နော်။ အောက်ကုန် သွားဆင်းဆွဲတာ။ ကုန်တွေက အလျင်မမှီတော့ဘူး ဖြစ်နေတာ သူတို့ကားတွေများတော့။ ပုံမှန်တော့ ငှက်ပျောတင်တာပေါ့။ ငှက်ပျောဆွဲစရာမရှိတော့။ အခုနောက်ပိုင်းက နည်းနည်းပါ ထပ်ပါးသွားတယ် ငှက်ပျောက။ ဒီလထဲမှာတော့ တော်တော်ပါးသွားတယ်။ အောက်ပြည်သွားတာတော့ အခက်အခဲတော့ မရှိဘူး။ ဒါပေမယ့် လမ်းတွေကလည်း ဂိတ်တွေက များတယ် တအားကုန်တယ်လေ ပိုက်ဆံ။ ကျန်မယ့်ဟာက အကျန်နည်းတာပေါ့။ ဂိတ်တွေများတော့ တအားပေးရတယ်လေ။ အောက်ပြန်ဆင်းတာလည်း အခုဆိုရင် ၃ ပုံ ၂ ပုံလောက် အောက် ပြန်ဆင်းတာ များတယ်။ လိုင်စင်နဲ့ကားတွေကတော့ အောက်ဆင်းပြီးတော့မှ တင်တာများတယ်။ ဒီမှာရှိတဲ့ ဟာတွေက အလွတ်တွေများတယ်။ လိုင်စင်မဲ့ကားတွေကို ထိန်းပေးနိုင်ရင်တော့ ကျနော်တို့လည်း အလုပ် ဖြစ်တာပေါ့ အခွန်ဆောင်ထားတဲ့ လိုင်စင်ကားတွေ အလုပ်ဖြစ်တာပေါ့နော်။ အဲဒါတွေ မထိန်းနိုင်တဲ့ ကာလ ပတ်လုံးတော့ မတိုးနိုင်ဘူးလေ သူတို့ ၆ ခေါက်ရမှ ဒီက ၂ ခေါက် ၃ ခေါက်လောက်ပဲ ရမှာ။ သူတို့ကို သွားယှဉ်လို့ မရဘူး အဲဒီလို ဖြစ်နေတယ်” ဟု ပြောသည်။
ကန်ပိုက်တီ နယ်စပ်ကုန်သွယ်ရေးတွင် ကချင်ပြည်နယ်၊ မြစ်ကြီးနား၊ ဝိုင်းမော်မြို့နယ်များ၌ စိုက်ပျိုးထားသော သစ်သျှူးငှက်ပျောများကို တရုတ်နိုင်ငံသို့ အဓိက တင်ပို့နေခြင်းဖြစ်ပြီး ငှက်ပျောရာသီအနေဖြင့် နိုဝင်ဘာလမှ ဇွန်လအထိ ဖြစ်သည်ဟု သိရသည်။
- By CNI
- Category: စီးပွားရေး
- Hits: 156
CNI News
၂၀၂၄ ခုနှစ်၊ မတ် ၇
မလေးရှားတွင် တရားမဝင် အထောက်အထားမဲ့များ၊ Overstay သမားများအား မတ်လ ၁ ရက်နေ့မှ စတင်ကာ CI ဖြင့် နေရပ်ပြန်ခွင့်ပြုထားသော်လည်း လက်ရှိမှာတော့ နေရပ်ပြန်သည့် မြန်မာလူဦးရေမှာ နည်းပါးလျက်ရှိသေး ကြောင်း မလေးရှားရှိ မြန်မာပရဟိတအသင်းအဖွဲ့များက CNI သတင်းဌာနသို့ ပြောသည်။
မလေးရှားပြည်ထဲရေးဝန်ကြီးက မလေးရှားတွင် တရားမဝင် အထောက်အထားမဲ့နှုန်းထား ၆ သိန်းခန့်ရှိသည့်အထဲ မတ်လ ၁ ရက်နေ့၌ နေရပ်ပြန်သည့်နှုန်းထားမှာ ၈၀၀ ကျော်သာရှိခဲ့ကြောင်း သတင်းစာရှင်းလင်းပွဲ တစ်ခုတွင် ပြောကြား သွားခဲ့သည်။
ထိုအစီအစဉ်သည် ဒီဇင်ဘာလကုန်အထိ ဖွင့်ပေးထားသဖြင့် လက်ရှိနေရပ်ပြန်သူဦးရေ နည်းပါးနေခြင်း ဖြစ်နိုင် ကြောင်း၊ အလုပ်အကိုင် အခွင့်အလမ်းရရှိရန် ဆက်လက်စောင့်ဆိုင်းပြီး နေရပ်မပြန်ကြသေးခြင်း ဖြစ်နိုင်ကြောင်း၊ လက်ရှိတွင် ကျန်းမာရေးမကောင်းသူများသာ အဓိက နေရပ်ပြန်ရန် လုပ်ဆောင်နေကြကြောင်း မလေးရှား အခြေစိုက် ရတနာစက္က နာရေးကူညီမှုအသင်းမှ ဥက္ကဋ္ဌ ဦးအောင်က CNI သတင်းဌာနသို့ ပြောသည်။
၎င်းက “လောလောဆယ်တော့ နည်းနေသေးတယ်။ အရင်တုန်းကဆိုရင် ဂျိုဟိုးမြို့ဆို immigration တစ်ခုပဲထား တယ်။ KL မှာဆိုလည်း ၂ ခုလောက်ပဲထားတယ်။ အခု ဂျိုဟိုးမှာဆိုရင် ၃ ခု၊ ၄ ခုလောက်ဖြစ်သွားပြီ။ မြို့နယ်တိုင်း မြို့နယ်တိုင်း immigration မှာ သွားပြီး လက်ဗွေနှိပ်ခွင့်ပေးတယ်။ ဆိုတော့ ဒီဘက်မှာတော့ jams မရှိသေးဘူး။ မနေ့က ကျနော်သွားပြီးလေ့လာတယ်။ ဒီမှာရှိတာတော့ နီပေါလူမျိုး၊ မြန်မာလူမျိုးတော့ မရှိသေးဘူး။ နီပေါရယ် ဘင်္ဂလားရယ်၊ အင်ဒိုနီးရှားရယ်ပဲများတယ်။ သူတို့တွေလည်း သနားဖို့ကောင်းတယ်။ မနက်ကတည်းကနေ တန်းစီ ရတာ ညနေအထိပေါ့ တစ်နေ့မှ အယောက် ၃၀၀ လောက်ပဲပေးတယ်။ စီ(တန်းစီ)တာက တစ်ထောင်လောက်ရှိ တယ်။ သွားပြီးလေ့လာလိုက်တော့ မြန်မာ တစ်ယောက်မှတော့ မတွေ့သေးဘူး။ အခုလောလောဆယ် လျှောက်ပြီး ပြန်မယ့်လူတွေအထဲမှာတော့ မြန်မာထဲက မြန်မာပြည်ရဲ့ နိုင်ငံရေး အခြေအနေအရ အရင်က ပြန်မယ်လုပ်ထားတဲ့ လူတွေက ဒီမှာပဲ ပေကပ်ပြီးနေကြတော့တယ်။ အခုလောလောဆယ် မဖြစ်မနေ ပြန်မယ့် လူတွေကတော့ နေမကောင်းတဲ့သူ၊ ကျန်းမာရေး မကောင်းတဲ့သူ၊ လေဖြတ်တဲ့သူနဲ့ ကိုယ်ဝန်ဆောင် မိခင်တွေပဲ ရှိတယ်” ဟု ပြောသည်။
မလေးရှားမှာ ဒဏ်ကြေးဆောင်ဖို့ စောင့်နေကြစဉ်
မလေးရှားအာဏာပိုင်များက ၎င်းနေရပ်ပြန်ရေး အစီအစဉ်အား မတ်လ ၁ ရက်မှစတင်ကာ ဒီဇင်ဘာလကုန်အထိ ဖွင့်လှစ်ပေးထားခြင်းဖြစ်ပြီး နေရပ်ပြန်ချင်သူများထဲတွင် နိုင်ငံကူးလက်မှတ်မရှိပါက မည်သူမည်ဝါဖြစ်ကြောင်း သက်သေခံလက်မှတ်အား မြန်မာသံရုံး၌ လူကိုယ်တိုင် သွားရောက်လျှောက်ထားရမည်ဖြစ်သည်။
ထိုသို့ ကွာလာလမ်ပူမြို့ရှိ မြန်မာသံရုံးသို့ လူကိုယ်တိုင်သွားရောက်ကာ CI လျှောက်ထားရခြင်းသည် ဝေးလံသော ဒေသများမှ မြန်မာနိုင်ငံသားများအတွက် လမ်းခရီး အခက်အခဲဖြစ်စေကြောင်း မလေးရှားရှိ မြန်မာပရဟိတ အသင်းအဖွဲ့များထံမှ သိရသည်။
ထို့ကြောင့် သံရုံးအနေဖြင့် စခန်းခွဲများဖွင့်လှစ်၍ ဆောင်ရွက်ပေးနိုင်မည်ဆိုပါက ပို၍ ကောင်းမွန်မည် ဖြစ်ကြောင်း မလေးရှားအခြေစိုက် နှလုံးလှပရဟိတလူငယ်များ သွေးအလှူရှင်အဖွဲ့မှ ဥက္ကဋ္ဌ ကိုသက်က CNI သတင်းဌာနသို့ ပြောသည်။
CI စာအုပ်လုပ်မည့်သူများကို တွေ့ရစဉ်
၎င်းက “အခြားနေရာတွေ မြို့တွေမှာ ဖွင့်နိုင်ရင် ကောင်းတာပေါ့။ တချို့ဆို ဝေးတဲ့နေရာပေါ့။ ဒီကိုလာရမှာ ၅ နာရီ၊ ၄ နာရီ၊ ၃ နာရီ ကြိုတင်လာရတာတွေ ရှိတယ်။ အဲဒီလိုလူတွေကြတော့ ဒုက္ခရောက်တယ်လေ။ မလေးရှားမှာ ကတော့ အမြဲတမ်းမှာ မြန်မာသံရုံးက ပေးတာပဲ တွေ့ဖူးတယ်။ ကျန်တဲ့စခန်းတွေ ဖွင့်တာလည်း မတွေ့ဖူးသေး ဘူး။ အဲဒီလိုဖွင့်နိုင်ရင်တော့ ကောင်းမယ်ထင်တယ်။ ပွဲစားကတော့ ရှိမှာပဲ။ ကိုယ့်လူမျိုးတွေက မလုပ်တတ်တဲ့ လူတွေ များတယ်လေ။ immigration ကိုသွားတာကအစ ကားငှားသွားရတာ။ ဟိုကြရင် တန်းစီတာကအစ မလုပ် တတ်တဲ့လူတွေများတယ်။ လေယာဉ်လက်မှတ် ကြိုတင်ဝယ်တာကအစ မသိတဲ့လူတွေ များတယ်။ အဲဒီတော့ ဘယ်မှာနေလဲ လာခေါ်ပေးမယ်၊ လိုအပ်သမျှ အကျိုးတော်ဆောင်ပေးမယ်၊ ပြန်တဲ့အထိ။ ဝန်ဆောင်ခ ယူမယ်။ အနည်းလေး ၄၊ ၅ ရာလောက်ကတော့ ယူကြမှာပဲ” ဟု ပြောသည်။
နေရပ်ပြန်မည့် တရားမဝင် အထောက်အထားမဲ့များ၊ Overstay သမားများ အနေဖြင့် ဒဏ်ကြေးအဖြစ် ရင်းဂစ်ငွေ ၅၀၀ နှင့်အတူ လေယာဉ်လက်မှတ် နှုန်းထားကိုပါ ကျခံရမည်ဖြစ်ပြီး ၁၄ ရက်အတွင်း မလေးရှားနိုင်ငံမှ ပြန်လည် ထွက်ခွာနိုင်ကြောင်း မလေးရှားနိုင်ငံ ကွာလာလမ်ပူမြို့ရှိ မြန်မာသံရုံးက ထုတ်ပြန်ထားသည်။
ထိုအစီအစဉ်သည် မလေးရှားနိုင်ငံအတွင်းရှိ မြန်မာ အပါအဝင် နိုင်ငံခြားသား အထောက်အထားမဲ့များ၊ Overstay သမားများ မည်သူမဆို အရေးယူခြင်းမခံရဘဲ နေရပ်ပြန်ခွင့်ပေးထားခြင်းဖြစ်ပြီး ထိုသို့ ခွင့်ပြုပေးထားသဖြင့် လက်ရှိ မလေးရှားတွင် အော်ပရာစီ အဖမ်းအဆီးများသည် ယခင်ကထက် လျော့နည်းလာကြောင်းလည်း သိရသည်။
- By CNI
- Category: စီးပွားရေး
- Hits: 298
CNI News
၂၀၂၄ ခုနှစ်၊ မတ် ၆
ပို့ကုန်၊ သွင်းကုန်နှင့် ပတ်သက်၍ ကုန်သွယ်မှု ပြုလုပ်နေသည့် နယ်စပ်ကုန်သွယ်ရေးလမ်းကြောင်း တစ်လျှောက်၌ လက်နက်ကိုင်ထားသူများရှိပါက ကုန်သွယ်ရေးလမ်းတွင် အဟန့်အတားများ ကြုံတွေ့ရသလို ငွေကြေးကုန်ကျမှု စရိတ်များလည်း မြင့်တက်မှုများ ကြုံတွေ့ရကြောင်း သိရသည်။
နစကနှင့် တရုတ်ကြား တရုတ်-မြန်မာ နယ်စပ်ကုန်သွယ်ရေး ပြန်လည်ဖွင့်လှစ်နိုင်ရေး ဆွေးနွေးလျက်ရှိနေပြီး ကုန်သွယ်ရေးလမ်းကြောင်း တစ်လျှောက် မည်သည့်လက်နက်ကိုင် အဖွဲ့များကိုမှ မရှိစေရန် နစကဘက်က ရပ် တည် ဆွေးနွေးလျက်ရှိနေသည်။
သွင်းကုန်လုပ်ငန်းရှင် ဦးနေမျိုးဝင်းက “လက်နက်ကိုင် အဖွဲ့ပေါင်းက လက်ရှိရှိနေတဲ့ဟာက တရားဝင်၊ တရားမဝင် မျက်စိတစ်ဖက်မှိတ်အတွင်းကို အနည်းဆုံး ၇ ဖွဲ့၊ ၈ ဖွဲ့ ရှိတယ်။ ၇ ဖွဲ့၊ ၈ ဖွဲ့ ရှိတဲ့နေရာမှာ တပ်မတော်ဂိတ်တွေ လည်း ရှိတယ်။ ပြီးရင် KIA ရှိတယ်။ ရှမ်းရှိတယ်၊ တအာင်းရှိတယ်။ ပြီးရင် တခြားသော နောက်ပေါက်ဂိတ်တွေက ရှိသေးတယ်။ စစ်တပ်ဂိတ်မှာ ပေးရတာက ၁ သောင်းမပိုဘူး။ တောထဲမှာ ရှိနေသော တော်လှန်ရေးအဖွဲ့အစည်းလို့ ပြောနေတဲ့ ဂိတ်တွေက ပေးရတာ အနိမ့်ဆုံးက ၂ သိန်းပေးရတယ်။ စိတ်ထဲရှိသလို တောင်းတယ်၊ ပြီးရင် ဒီတစ်ဖွဲ့ ပြီးလို့လည်း မပြီးသေးဘူး၊ နောက်တစ်ဖွဲ့ ကျန်သေးတယ်။ ပြီးရင် ကားကသွားနေတယ်၊ ကားပေါ်မှာ ရှိနေတဲ့ အခွန်၊ ကားပေါ်မှာ ပါလာတဲ့ အခွန် ၂ ခု ဆောင်ရတယ်။ ဆောင်ရတဲ့နေရာမှာ ရှောင်လို့မရဘူးနော်။ ရှောင်လိုက် တာနဲ့ အဲဒီကားသည် ပစ်သတ်ခံရမယ်၊ မီးရှို့ခံရမယ်။ အဲဒီတော့ သက်ရောက်မှုဆိုတဲ့ကဏ္ဍမှာ ဒီအဖွဲ့အစည်းတွေ ရှိနေတဲ့အတွက် ကုန်ဈေးနှုန်း ကျဆင်းရေးဆိုတာ ဖြစ်ကိုမဖြစ်နိုင်ဘူး။ ဘာဖြစ်လို့လဲဆိုတော့ မလိုလားအပ်တဲ့ အဆီပိုတွေ ဖြစ်နေတယ်”ဟု CNI သတင်းဌာနသို့ ပြောသည်။
ကုန်ကားများကို စစ်ဆေးနေတဲ့ ရဲတပ်ဖွဲ့ကို တွေ့ရစဉ်
အဆိုပါ လက်နက်ကိုင်အဖွဲ့အစည်းများကို ပေးရသော ငွေကြေးများကြောင့် ကုန်သည်များသည် စားသုံးသူများထံ သို့ ဈေးနှုန်းများ ပြန်လည်မြှင့်တင်၍ ရောင်းချရကြောင်း၊ ထို့နောက် စားသုံးသူများသာ အဓိက အကျိုးသက်ရောက် မှု ခံကြရကြောင်း ကုန်သည်များက ပြောသည်။
လက်ရှိတွင် မြန်မာနိုင်ငံ၏ အဓိက နယ်စပ်ကုန်သွယ်မှု လမ်းကြောင်းများဖြစ်သည့် မြဝတီ - ထိုင်းလမ်းကြောင်း၊ မူဆယ် - တရုတ်လမ်းကြောင်း၊ တမူး- အိန္ဒိယလမ်းကြောင်းနှင့် ရခိုင် - ဘင်္ဂလားဒေ့ရှ်လမ်းကြောင်း စသည့် နယ်စပ်ကုန်သွယ်ရေးလမ်းကြောင်းများသည် တိုက်ပွဲများကြောင့် ရပ်တန့်လျက်ရှိသည်။
ကုန်သွယ်မှု ပြုလုပ်လျက်ရှိနေသည့် ရှမ်းပြည်နယ်အရှေ့ပိုင်း၊ မိုင်းလားနယ်စပ်နှင့် တာချီလိတ် နယ်စပ်ကုန်သွယ် ရေးလမ်းကြောင်း၊ ကချင်ပြည်နယ် ကန်ပိုင်တည်နှင့် လွယ်ဂျယ် နယ်စပ်ကုန်သွယ်ရေးလမ်းကြောင်းသည်လည်း လက်နက်ကိုင်တပ်ဖွဲ့များမှ ငွေကြေးတောင်းခံနေမှုများကြောင့် ကုန်သွယ်ရေးစရိတ်များ အဆမတန် မြင့်တက် လျက် ရှိနေသည်။
နယ်စပ်ကုန်သွယ်ရေး လမ်းကြောင်းတစ်လျှောက် လုံခြုံမှုမရှိပါက ကုန်သွယ်ရေးလုပ်ငန်းများတွင် နှောင့်နှေး ကြန့်ကြာမှုများ ဖြစ်ပေါ်လာမည်ဖြစ်ပြီး တိုင်းပြည်၏ ဝင်ငွေလည်း ကျဆင်းသွားမည်ဖြစ်သလို ပြည်သူလူထုမှာ လည်း ကုန်ဈေးနှုန်း ကြီးမြင့်မှုဒဏ်ကို ကြုံတွေ့ရနိုင်သည်ဟု ကုန်သည်များက ပြောသည်။
ဖရဲကုန်သည် ဦးဆန်းနိုင်က “အခု border trade တွေမှာ ရှိနေတဲ့ ကုန်သွယ်ရေးလမ်းကြောင်းတွေမှာ မူဆယ် တစ်ခုတည်း မဟုတ်ပါဘူး။ မြဝတီလမ်းလည်းရှိတယ်၊ တရုတ်ပြည်လမ်းလည်း ရှိတယ်၊ အိန္ဒိယလမ်းလည်း ရှိ တယ်။ အဓိက border trade လမ်းကြောင်းတွေမှာ မြန်မာနိုင်ငံသည် အဓိက အားကိုးနေတာ border trade ကို အားကိုးနေတာ။ border trade တွေ လမ်းကြောင်းတွေ လုံလုံခြုံခြုံ၊ ချောချောမွေ့မွေ့နဲ့ လုပ်မပေးနိုင်သရွေ့က တော့ တိုင်းပြည် ဖွံ့ဖြိုးတိုးတက်ဖို့ဆိုတာ နောင် ၁၀ နှစ် မသေချာဘူး။ စကားလုံးအရ စင်ပေါ်မှာ တက်ပြောရင် ရေလည်နားထောင်လို့ကောင်းတယ်။ မြေပြင်မှာတော့ ၁၀ နှစ် မသေချာဘူး။ ဘာလို့ဆို မြန်မာနိုင်ငံသည် ဥရောပနဲ့လည်း တိုက်ရိုက် ကုန်သွယ်မှု လုပ်ထားတာ မရှိဘူး။ အမေရိကားတို့ ဘာတို့နဲ့လည်း မရှိဘူး။ မြန်မာနိုင်ငံ သည် border trade ကိုပဲ အားကိုးနေရတဲ့ တိုင်းပြည်ဖြစ်တဲ့အတွက် border trade လုံခြုံချောမွေ့ရင် မြန်မာနိုင်ငံ အတွင်းမှာ ရှိနေတဲ့ စားသုံးသူတွေ ဈေးသက်သက်သာသာနဲ့ စားရမယ်။ export သမားတွေလည်း အမြတ်အစွန်း သင့်တင့်လျောက်ပတ်ရမယ်၊ နိုင်ငံတော်လည်း ကုန်သွယ်ရမယ်၊ GDP တက်လာမယ်။ အခု အဲဒီလို မဟုတ်ဘဲနဲ့ ဒီအတိုင်း သွားနေမယ်ဆိုရင် တစ်ဦးချင်းတစ်ယောက်ချင်းရဲ့ ဝင်ငွေတွေ ကျမယ်။ စားသုံးသူတွေလည်း ကုန်ဈေး နှုန်း ကြီးမြင့်သွားမယ်။ ဒါမျိုးတွေ ဖြစ်လာမှာ အမှန်ပဲလေ”ဟု CNI သတင်းဌာနသို့ ပြောသည်။
ကုန်ကားများကို တွေ့ရစဉ်
ကုန်သွယ်ရေး လမ်းကြောင်းတစ်လျှောက် လက်နက်ကိုင်ထားသူများက ငွေကြေးတောင်းခံမှုများ လုပ်နေသည့် တိုင် ကုန်သည်နှင့် ကုန်ကားသများအတွက် လုံခြုံမှုကိုတော့ မည်သည့် လက်နက်ကိုင်ထားသူများကမှ အာမခံ ချက် မပေးနိုင်ကြကြောင်း ကုန်ကားသမားများက ပြောသည်။
ကုန်ကားမောင်းနှင်သူ ကိုထက်နိုင်က “လုံခြုံမှုဆိုတာက ဘယ်လက်နက်ကိုင်တွေမဆို ကိုင်ထားတဲ့ဟာတွေက လူကို သေစေနိုင်သော အရာတွေ ဖြစ်တယ်။ သူတို့လက်ထဲမှာ ပန်းတွေကိုင်ထားရင်တော့ ပျော်ပျော်ကြီးပေါ့။ ဒါပေမယ့် သူတို့ကိုင်ထားတာ အားလုံးသည် လူကိုသေစေတဲ့ လက်နက်တွေလေ။ ပေးဆို ပေးထားခဲ့ရတာပဲ။ လုံခြုံမှုဆိုတာတော့ မမေးနဲ့။ ဒီကနေ ၁ မိုင်မှာ ဘာဖြစ်မလဲဆိုတာ မောင်းနေတဲ့ ကားသမားတွေရော ဘာတွေရော ဘယ်သူမှ အာမခံချက် မရှိဘူး။ စုံစမ်းပြီးတော့ သွားနေကြတာပဲလေ။ ဘာဖြစ်လို့ သွားနေကြလဲဆိုတော့ စားဝတ် နေရေးအတွက် သွားနေကြတာလေ” ဟု CNI သတင်းဌာနသို့ ပြောသည်။
လက်ရှိ မြန်မာနိုင်ငံရှိ နယ်စပ် ကုန်သည်ရေး လမ်းကြောင်းများတွင် မြန်မာ့တပ်မတော်၊ ပြည်သူ့စစ်၊ နယ်ခြားစောင့်တပ်၊ PDF ၊ TNLA၊ MNDAA၊ KIA၊ KNU၊ KNLA၊ NMSP၊ AA စသည့် လက်နက်ကိုင်ထားသော အဖွဲ့အစည်းများ ရှိကြသည်။
- By CNI
- Category: စီးပွားရေး
- Hits: 137
CNI News
၂၀၂၄ ခုနှစ်၊ မတ် ၆
ထိုင်း-မြန်မာနယ်စပ် မဲဆောက်မြို့ရှိ အချို့စက်ရုံ၊ အလုပ်ရုံများတွင် တရားဝင် လုပ်သားများအား အကြောင်းမဲ့ အလုပ်ဖြုတ်ပြီး တရားမဝင် လုပ်သားများကို အလုပ်ခန့်အပ်နေကြောင်း ရွှေ့ပြောင်းအလုပ်သမားအရေး ကူညီ ဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။
ယခုကဲ့သို့ လုပ်ဆောင်လာခြင်းသည် စက်ရုံ၊ အလုပ်ရုံမှ တာဝန်ရှိသူများ၏ အကျိုးစီးပွားအရဖြစ်ပြီး တရားမဝင် လုပ်သားများကို အလုပ်သမားလက်မှတ် လုပ်ပေးမည်ဟုဆိုကာ အလုပ်စဝင်သည့်အချိန်မှ လစဉ်ကြေးအဖြစ် ဖြတ်တောက်ကြောင်း ၎င်းက ပြောသည်။
ကိုသားကြီးက “တရားမဝင် မြန်မာရွှေ့ပြောင်းတွေ အလွှာပေါင်းစုံက ဝင်လာတာတွေရှိတော့ တချို့ အလုပ်ရှင် သူဋ္ဌေးတွေက မိမိတို့ ခန့်အပ်တာဝန်ပေးထားတဲ့ အလုပ်သမားအဟောင်းတွေကို အကြောင်းမဲ့ အလုပ်ဖြုတ် လိုက်တယ်။ မနေ့ တစ်နေ့ကဆိုရင်လည်း စက်ရုံတစ်ရုံ မှန်ဘောင်တွေလုပ်တာ အဲဒီစက်ရုံက လူပေါင်း ၇၀ ကျော် တစ်ချိန်တည်း အလုပ်ဖြုတ်ပစ်လိုက်တယ်။ လာတိုင်တဲ့လူတွေကလည်း တရားဝင် အထောက်အထားရှိတဲ့ လူတွေ ပဲ။ အဲဒီမှာ ဘာတွေ့ရလဲဆိုတော့ အလုံးအရင်းအလိုက် တရားမဝင် ဝင်လာတဲ့ အလုပ်သမားတွေကို စမတ်ကြေးလို့ ခေါ်တာပေါ့ အလုပ်လျှောက်ခ ဘတ် ၂၀၀၀၊ ၃၀၀၀ တောင်းပြီးတော့ အလုပ်ခန့်လိုက်တာတွေရှိတယ်။ ဒီလို ပြဿနာတွေက မဲဆောက်ထဲမှာ တော်တော်များများ ဖြစ်နေတာတွေကို တွေ့ရတယ်” ဟု ပြောသည်။
မြန်မာအလုပ်သမားများကို ထိုင်းက စစ်ဆေးနေစဉ်
ထိုသို့ အခြေအနေများ ဖြစ်ပေါ်လာခြင်းသည် မဲဆောက်တွင် မြန်မာအများဆုံး နေထိုင်ခြင်း၊ လာရောက် တိမ်းရှောင်သူ ပိုများလာခြင်းတို့ကြောင့်ဖြစ်ပြီး မဲဆောက်ရှိ ထိုင်းနိုင်ငံသားများက မြန်မာနိုင်ငံ၏ အုပ်ချုပ်ရေး အပေါ် ကောင်းစွာသိရှိထားကြသဖြင့် အသုံးချခြင်းဖြစ်ကြောင်းလည်း ရွှေ့ပြောင်း အလုပ်သမားအရေး ကူညီ ဆောင်ရွက်သူများက သုံးသပ်ကြသည်။
ထို့အပြင် လက်ရှိတွင် မြဝတီ-မဲဆောက် အမှတ် (၁) ချစ်ကြည်ရေးတံတားမှ နယ်စပ်ဖြတ်သန်းခွင့် လက်မှတ်ဖြင့် ဝင်ရောက်လာသည့် မြန်မာများအပေါ် ထိုင်းအာဏာပိုင်များမှ ဒဏ်ငွေဆိုသည့် ခေါင်းစဉ်အောက်၌ ဘတ်ငွေ ၁၅၀၀ မှ ၃၀၀၀ ခန့်အထိ လုပ်စားနေကြောင်းလည်း သိရသည်။
ထိုင်းရှိ နယ်စပ်ဒေသများတွင် အလုပ်အကိုင် ရှားပါးခြင်းမရှိသော်လည်း သတ်မှတ်ထားသည့် အခွင့်အရေးနှင့် လုပ်ခလစာနှုန်းထားများ မရရှိဘဲ အလုပ်လုပ်နေကြရသည်မှာ များပြားနေကြောင်း FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။
အလုပ်ရုံတစ်ခုကို တွေ့ရစဉ်
၎င်းက “အလုပ်အကိုင်ကတော့ ရတဲ့အလုပ်ကို သတ်မှတ်ထားတဲ့ အခွင့်အရေး၊ သတ်မှတ်ထားတဲ့ နှုန်းထားတွေ အတိုင်း မရဘဲနဲ့ လုပ်ကိုင်နေကြရတာပေါ့။ တချို့ ဒါကလည်း ဒေသအပေါ် မူတည်တာပေါ့။ ဒေသမှာဆိုတာက အခုလိုရာသီ အလုပ်အကိုင်ပေါတဲ့ ထိုင်းခရီးသွားလုပ်ငန်းနဲ့ ဆက်စပ်တဲ့ ဒေသတွေမှာဆိုရင် သူတို့ကတော့ အလုပ် အကိုင်ပေါတာပေါ့။ ဒါပေမယ့် တခြားသော အလုပ်ရုံတွေ၊ ခြံတွေ ဒါမျိုးတွေမှာလည်း လုပ်နေကြတာတော့ သူ့ဟာ နဲ့သူ ဆက်စပ်ပြီး ရှိကြတာပဲ။ လုံးလုံးကြီး အလုပ်အကိုင်မရှိဘဲ နေတာထက်စာရင် အလုပ်ရှိတယ်။ သတ်မှတ်ထား တဲ့အလုပ် အခွင့်အရေးနဲ့ နှုန်းထားတွေ မရဘဲ လုပ်ကြရတဲ့ဟာတွေ အဲဒါတွေတော့ ပိုပြီးများတယ်” ဟု ပြောသည်။
ပြီးခဲ့သည့် တစ်ပတ်က ထိုင်းကာကွယ်ရေးနှင့် ပြည်ထဲရေးဝန်ကြီးဌာနတို့မှ နိုင်ငံ၏ လုံခြုံရေးနှင့်ပတ်သက်၍ ရပ်ကွက်၊ မြို့နယ်များ၌ စောင့်ကြည့်စစ်ဆေးခြင်းများအား နယ်စပ်ဒေသများတွင် ပိုမိုတင်းကြပ်လုပ်ဆောင်လာ ကြောင်း ဦးမင်းဦးက ဆက်ပြောသည်။
ယခင်က ဘုရားသုံးဆူနှင့် မြဝတီ-မဲဆောက်ဘက်တို့မှ အဓိက အများဆုံး တရားမဝင် ခိုးဝင်ကြခြင်း ဖြစ်သော် လည်း ယခုအခါ ကော့သောင်း-ရနောင်း နယ်စပ်ပေါက်များမှလည်း အများအပြား ခိုးဝင်လာကြကာ လက်ရှိတွင် မြန်မာနိုင်ငံသား အလုံးအရင်းဖြင့် တရားမဝင် ဝင်ရောက်လာကြသဖြင့် ဖမ်းဆီးခံနေရကြောင်းလည်း သိရသည်။