- By CNI
- Category: နိုင်ငံရေး
- Hits: 555
CNI News
၂၀၂၂ ခုနှစ်၊ စက်တင်ဘာ ၂၈
လွှတ်တော်လမ်းကြောင်းမှသာ အခြေခံဥပဒေ(၂၀၀၈ ဖွဲ့စည်းပုံ)ပြင်ဆင်ရေး လုပ်ငန်းများကို ဆောင်ရွက်နိုင်မည် ဖြစ်ပြီး တခြားလမ်းကြောင်းများမှ ဆောင်ရွက်၍မရကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။
စက်တင်ဘာ ၂၇ ရက်နေ့က ကျင်းပခဲ့သည့် နစက အဖွဲ့ဝင်များ အစည်းအဝေးတွင် ၎င်းက အထက်ပါအတိုင်း ပြောသွားခဲ့ခြင်း ဖြစ်သည်။
၂၀၀၈ ဖွဲ့စည်းပုံအခြေခံဥပဒေနှင့် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA)ကို မျက်ကွယ် ပြု၍ မရကြောင်း၊ ပြည်ပ ပရောဂများကြောင့် တိုင်းရင်းသား လက်နက်ကိုင် အဖွဲ့အစည်းများ အနေဖြင့် ဝိဝါဒကွဲပြားမှုများရှိကြောင်း၊ လက်နက်ကိုင် တိုင်းရင်းသားများ အဖွဲ့များ၏ တောင်းဆိုချက်များတွင် ဖွဲ့စည်းပုံအခြေခံဥပဒေ ပြင်ဆင်ရေးဆိုင်ရာကိစ္စရပ်များ ပါဝင်ကြောင်း နစကဥက္ကဋ္ဌက ပြောသည်။
အဆိုပါကိစ္စရပ်နှင့်ပတ်သက်၍ ဆောင်ရွက်၍ရသည်များရှိကြောင်း၊ နှစ်ဖက်ဖြစ်ချင်သည်နှင့် ဖြစ်သင့်သည်များ ကို ညှိနှိုင်း၍ သဘောတူညီချက် ရရှိမည်ဆိုပါက ပြင်ဆင်ရေးလုပ်ငန်းများနှင့်ပတ်သက်၍ ဥပဒေနှင့်အညီ ဆောင်ရွက်၍ ရကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။
ဒီမိုကရေစီအရေးတောင်းဆိုကြသူများ (ဖရွန်းတီးယားမြန်မာ)
၎င်းက “ ဖွဲ့စည်းပုံအခြေခံဥပဒေနှင့်ပတ်သက်၍ ပြင်ဆင်လိုသည်များကို လွှတ်တော်၌ မဲခွဲဆုံးဖြတ်၍ ဆောင်ရွက်ခြင်းသည် ဒီမိုကရေစီနိုင်ငံတစ်ခုအနေဖြင့် ဖွဲ့စည်းပုံအခြေခံဥပဒေအပေါ်တွင် လေးစားစွာဖြင့် ဆောင်ရွက်သည့် သိက္ခာကိုဖော်ဆောင်နိုင်မည်ဖြစ်ကြောင်း၊ လွှတ်တော်လမ်းကြောင်းမှသာ အခြေခံဥပဒေ ပြင်ဆင်ရေး လုပ်ငန်းများကို ဆောင်ရွက်နိုင်မည်ဖြစ်ပြီး အခြားလမ်းကြောင်းများမှ ဆောင်ရွက်၍မရကြောင်း၊ အားလုံးမှ တိုင်းရင်းသား စည်းလုံးညီညွတ်မှုကို အားလုံးတညီတညွတ်တည်းရှိခဲ့သည်ကို ပြသခဲ့သည့် ပင်လုံ စိတ်ဓာတ်ကို အခြေခံဆောင်ရွက်ရမည်”ဟု ပြောသည်။
လက်ရှိ မြန်မာနိုင်ငံတွင် တပ်မတော်က အမျိုးသားဒီမိုကရေစီအဖွဲ့ချုပ်(NLD)အစိုးရကို ၂၀၂၀ အထွေထွေရွေး ကောက်ပွဲ မဲစာရင်း အငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချ၍ အရေးပေါ် အခြေအနေ ကြေညာထားသည်။
ထို့ကြောင့် လွှတ်တော် ကျင်းပနိုင်ခြင်းမရှိသလို ၂၀၀၈ ဖွဲ့စည်းပုံအခြေခံဥပဒေလည်း ပျက်သွားပြီးဟု ဒီမိုကရေစီ အင်အားစုများ ရပ်တည်လျက်ရှိသလို တပ်မတော်ဘက်ကတော့ ၂၀၀၈ ဖွဲ့စည်းပုံအခြေခံဥပဒေကို ဆက်လက် ဆုပ်ကိုင်ထားဆဲဖြစ်သည့်အတွက် အားပြိုင်မှုများ ကြုံနေရသည်။
အလားတူ နိုင်ငံရေး တည်ငြိမ်ရေးကနေ ၂၀၂၃ ခုနှစ်၊ သြဂုတ်လတွင် ရွေးကောက်ပွဲ ကျင်းပနိုင်ရေးအတွက်လည်း နစကဘက်က ကြိုးပမ်းလျက်ရှိနေသည်။
ထို့နောက် မြန်မာနိုင်ငံအတွင်း နွေဦးတော်လှန်ရေး လက်နက်ကိုင်တပ်ဖွဲ့များနှင့် တပ်မတော်ကြား တိုက်ပွဲများ ဖြစ်ပွားနေသည်။
ဗိုလ်ချုပ်မှူးကြီးမင်းအောင်လှိုင်နဲ့ UWSA-NDAA- SSPP ခေါင်းဆောင်များကိုတွေ့ရစဉ်
မိမိတို့ အနေဖြင့် လွတ်လပ်ပြီး တရားမျှတသည့် ရွေးကောက်ပွဲတစ်ခု ကျင်းပနိုင်ရေး ဆောင်ရွက်လျက်ရှိ ကြောင်း၊ တိုင်းရင်းသား လက်နက်ကိုင် အဖွဲ့များနှင့် ကြိုတင် သဘောတူညီချက်များ ရရှိရေး ဆောင်ရွက်လျက် ရှိပြီး ဖြစ်နိုင်သည်များကို ဆွေးနွေးဆောင်ရွက်လျက်ရှိသည်ဟု နစကဥက္ကဋ္ဌက ပြောသည်။
ထို့နောက် ၂၀၀၈ ဖွဲ့စည်းပုံအခြေခံဥပဒေနှင့် NCA ကို အခြေခံ၍ ပြည်ထောင်စုနိုင်ငံတော်ကို တည်ဆောက်သွား ရမည် ဖြစ်ကြောင်း၊ ရွေးကောက်ပွဲ ဥပဒေနှင့် နိုင်ငံရေးပါတီများ မှတ်ပုံတင်ခွင့်ဥပဒေကို ပြင်ဆင်နိုင်ရေး ဆောင်ရွက်သွား ကြရမည်ဖြစ်ကြောင်း ၎င်းက ပြောသည်။
လက်ရှိတွင် နစကသည် တိုင်းရင်းသား လက်နက်ကိုင် ၁၀ ဖွဲ့ဖြင့် ငြိမ်းချမ်းရေး လုပ်ငန်းစဉ်များ ဆွေးနွေးလျက်ရှိ ပြီး ၂၀၀၈ ဖွဲ့စည်းပုံအခြေခံဥပဒေ ပြင်ဆင်ရေးနှင့် ဖက်ဒရယ်ဒီမိုကရေစီပြည်ထောင်စုတည်ဆောက်ရေး ကြိုးပမ်း နေကြသည်။
၂၀၂၂ ခုနှစ်၊ စက်တင်ဘာ ၂၆ ရက်နေ့က ဗိုလ်ချုပ်မှူးကြီးမင်းအောင်လှိုင်နှင့် UWSA၊ NDAA၊ SSPP ခေါင်းဆောင် များ တွေ့ဆုံ၍ ငြိမ်းချမ်းရေး လုပ်ငန်းစဉ်များ ဆွေးနွေးခဲ့စဉ် SSPP ဘက်က အမျိုးသားတန်းတူရေးကို ဖော်ဆောင်နိုင်ဖို့အတွက် ဗမာပြည်နယ်ကို ဖွဲ့စည်းရမည် ဖြစ်သလို ပင်လုံစာချုပ်၊ ပင်လုံမူ၊ ပင်လုံကတိကဝတ် တို့ကို အကောင်အထည်ဖော် ဆောင်ရွက်ရမည်ဆိုသည့် အချက် အပါအဝင် ၄ ချက်ကို ချပြဆွေးနွေးခဲ့သည်။
- By CNI
- Category: နိုင်ငံရေး
- Hits: 1131
CNI News
၂၀၂၂ ခုနှစ်၊ စက်တင်ဘာ ၂၈
အမျိုးသားညီညွတ်ရေးအစိုးရ (NUG) အနေဖြင့် ဒေသကာကွယ်ရေးတပ် (PDF) များကို ဗဟိုမှ အုပ်စီးထားရန် လိုအပ်ကြောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။
ထို့အတူ PDF များအားလုံးကို NUG အနေဖြင့် ဖိဖိစီးစီး မကိုင်တွယ်နိုင်သေးကြောင်း၊ နိုင်ငံရေး မျှော်မှန်းချက်များ ကို NUG က ချမှတ်ပေးရမှာဖြစ်ကြောင်း ၎င်းက ပြောသည်။
KNU တပ်မဟာ (၁)၏ ထုတ်ပြန်ချက်ကိုတွေ့ရစဉ်
ဦးဖေသန်းက “KNU ကတော့ တပ်မဟာ (၁) နယ်မြေပေါ့၊ တပ်မဟာ တစ်ခုချင်း ထုတ်ပြန်တာလား KNU အဖွဲ့ အစည်း တစ်ခုလုံးက အဲဒီလို သဘောထားလား ဆိုတာတော့ ကျနော်လည်း မသိဘူးပေါ့နော်၊ ဒါက ဆက်ဆံရေး ပြေလည်တဲ့ တပ်ဖွဲ့တွေလည်း ရှိမယ်၊ တပ်မဟာတွေလည်း ရှိမယ်၊ မပြေလည်တဲ့ ဟာမှာလည်း ခုနလို စည်းကမ်း ချက်တွေ ထုတ်လာနိုင်တာပေါ့။ NUG ကတော့ အမှန်က ဒါကပြောနေစရာလိုတဲ့ ကိစ္စတောင် မဟုတ်ပါဘူး။ PDF တွေနဲ့ ပတ်သက်ပြီး NUG မှာ လုံးဝ တာဝန်ရှိတယ်ပေါ့နော်၊ ကျနော်က အဲဒီလို မြင်တယ်၊ PDF တွေက ဒီလို ဟို တစ်စု၊ ဒီတစ်စု၊ တစ်ဗိုလ်တစ်မင်းလို လုပ်နေတာတွေလည်း NUG က ဒါက ဖိဖိစီးစီး မကိုင်တွယ်နိုင်တာလည်း ပါတယ်ပေါ့၊ ဒီတော့ နိုင်ငံရေးအားဖြင့်ဆိုရင်တော့ PDF အားလုံးမှာ NUG က အပေါ်ကနေပြီးတော့ စည်းနှောင် ထားရမယ့် ကိစ္စဖြစ်တယ်။ PDF တွေက တိုက်ပွဲဝင်တာပဲရှိတယ်၊ သူတို့အနေနဲ့ နိုင်ငံရေး မျှော်မှန်းချက်က NUG က ချပေးရမှာဖြစ်တယ်၊ ဒီတော့ ဘယ်ကိစ္စမဆို အချင်းချင်းဆက်ဆံရေး မပြေလည်တဲ့ ကိစ္စပဲဖြစ်ဖြစ်၊ ရှေ့လျှောက် ပြီးတော့ ဘယ်လို တိုက်ပွဲဝင်သွားမယ်၊ ဘယ်လို အခြေအနေထိရောက်အောင်လုပ်သွားမယ်ဆိုတာကအစ PDF တွေ အချင်းချင်း ဆက်သွယ်ပြီးတော့ ညှိနှိုင်းပြီးတော့ လုပ်နိုင်မှုအဆုံးပေါ့ဗျာ၊ အကုန်လုံးဟာ နိုင်ငံရေးအဖွဲ့အစည်း ဖြစ်တဲ့ ဒီနေ့ NUG က ကြိုးကြိုးစားစား လုပ်ဆောင်ရမယ့် ကိစ္စတွေ ဖြစ်တယ်လို့ ကျနော်မြင်ပါတယ်” ဟု CNI သတင်းဌာနသို့ ပြောသည်။
ကရင်အမျိုးသားအစည်းအရုံး (KNU)၏ တပ်မဟာ (၁) နယ်မြေအတွင်း အခြေစိုက်သည့် တော်လှန်ရေး အဖွဲ့အစည်းများနှင့် အဖွဲ့အစည်းဝင်များ အလေးထား လိုက်နာဆောင်ရွက်ရန်ဟုဆိုကာ စည်းကမ်းချက် (၂၅) ချက်ကို KNU တပ်မဟာ (၁)မှ ပြီးခဲ့သည့် ရက်ပိုင်းက ထုတ်ပြန်ခဲ့သည်။
တပ်မဟာ၊ ခရိုင်ခေါင်းဆောင်များမှ အခါအားလျှော်စွာ ချမှတ်သော လမ်းညွှန်ချက်နှင့် စည်းမျဉ်းစည်းကမ်းများ အား လေးစားလိုက်နာရန်၊ တာဝန်ခံယူ ဆောင်ရွက်ရန်နှင့် သက်ဆိုင်ရာ တပ်ရင်း/ တပ်ဖွဲ့အလိုက်၊ တပ်မဟာမှ ထုတ်ပြန်သည့် စည်းကမ်းများအပြင် ဒေသန္တရ စည်းမျဉ်းစည်းကမ်းများ ထုတ်ပြန်၍ တပ်ဖွဲ့ဝင်များ စည်းကမ်း စနစ်တကျ ရှိစေရေး ဆောင်ရွက်ရန် စသဖြင့် ပါရှိသည်။
NUG ၏ ၀န်ကြီးချုပ် မန်း၀င်းခိုင်သန်းနဲ့ PDF များကိုတွေ့ရစဉ်
KNU တပ်မဟာ ၁ ၏ ထုတ်ပြန်ချက်မှာ စစ်ရေးစည်းကမ်းများနှင့် ပတ်သက်၍ တစ်ညီတစ်ညာတည်းဖြစ်အောင် သတိပေးခြင်းဖြစ်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။
၎င်းက “ဒါကတော့ဗျာ၊ ကျနော်တို့ အခုကတော့ KNU နဲ့ ပူးပေါင်းဆောင်ရွက်နေတဲ့ ကိစ္စတွေကလည်း အနှံ့အပြား ပါပဲ၊ KNU တပ်မဟာ ၇ ခုလုံးမှာ ဒေသဆိုင်ရာ PDF အဖွဲ့အစည်းတွေ ရှိတာပေါ့ဗျာ၊ အဲဒီအဖွဲ့အစည်းတွေနဲ့ ပူးပေါင်း ဆောင်ရွက်တယ်၊ အဲဒီအထဲမှာ NUG ရဲ့ တိုက်ရိုက် ခေါင်းဆောင်မှု အောက်မှာရှိတဲ့ အင်အားလည်း ရှိ တယ်၊ ဒါပေမဲ့ သီးခြား ကျနော်တို့ ရပ်တည်ပြီး KNU နဲ့ ပူးပေါင်း တိုက်ပွဲဝင်နေတဲ့ အင်အားစုတွေ ရှိတယ်၊ အဲဒီ တော့ ဒီအင်အားစုတွေရဲ့ အတွင်းမှာ စစ်ရေးလုပ်ငန်းစဉ်နဲ့ စစ်ရေး စည်းကမ်းတွေနဲ့ ပတ်သက်လို့ တစ်ညီတစ်ညာ တည်းဖြစ်အောင် ဒီလို ကြေညာချက် ထုတ်ပြန်သတိပေးတာ ဖြစ်ပါတယ်ခင်ဗျ” ဟု ပြောသည်။
၂၀၂၁ ခုနှစ်၊ ဖေဖော်ဝါရီ ၁ ရက် တပ်မတော်က အရပ်သားအစိုးရကို ဖြုတ်ချခဲ့ပြီးနောက်ပိုင်း ဆန့်ကျင်ဆန္ဒပြမှုများ နှင့်အတူ ပြည်မက လူငယ်များ၊ တော်လှန်ရေး အင်အားစုများက တိုင်းရင်းသား လက်နက်ကိုင် အဖွဲ့အစည်းများထံ ခိုလှုံ၍ လက်နက်ကိုင် တော်လှန်ရေး အပြင် ပုံစံမျိုးစုံဖြင့် ဆင်နွှဲလျက်ရှိသည်။
- By CNI
- Category: နိုင်ငံရေး
- Hits: 1632
CNI News
၂၀၂၂ ခုနှစ်၊ စက်တင်ဘာ ၂၈
မလေးရှားနိုင်ငံတွင် UNHCR ၌ ဒုက္ခသည်ကတ် လျှောက်ထားသည့် ရခိုင်လူမျိုး ၅၀၀၀ ကျော်ရှိသည့်အနက် ၂၀ ဝန်းကျင်သာ ဒုက္ခသည်ကတ် ရရှိသေးကြောင်း ရခိုင်ဒုက္ခသည်များဗဟို (CAR)မှ နာယကချုပ် ဆရာတော် ဦးဥတ္တရက CNI သတင်းဌာနသို့ မိန့်သည်။
အဆိုပါ ရခိုင်လူမျိုး ၅၀၀၀ ကျော်အား ရခိုင်ဒုက္ခသည်များဗဟို(CAR) မှ UNHCR ဒုက္ခသည်ကတ် လျှောက်ထား ပေးခြင်းဖြစ်ပြီး အချိန်ကာလအားဖြင့် ၂ လကျော် ကြာမြင့်နေပြီဖြစ်ကြောင်း ၎င်းက ဆက်လက် မိန့်သည်။
ဆရာတော် ဦးဥတ္တရက “UNHCR ဆီမှာ တကယ် ဒုက္ခဖြစ်တဲ့လူတွေ အများကြီးပါ။ ဦးဇင်းတို့ Center For Arakan Refugees မှာတောင် တကယ့်ကို ဒုက္ခ အခက်အခဲ အများကြီး။ တချို့လူတွေဟာ စားစရာမဲ့ သောက်စရာမရှိ၊ နေစရာမရှိတဲ့လူတွေ တစ်ပုံကြီး ရှိပါတယ်။ ဦးဇင်းတို့ စင်တာမှာတောင် လူပေါင်းက အခု စာရင်း ကောက်ထား တာမှာ ၅၀၀၀ ကျော် ၆၀၀၀ နီးပါးရှိသွားပြီ။ UNHCR ဆီမှာ အင်တာနက် ကနေပြီးတော့ လျှောက်ပေးတယ်။ ဦးဇင်းတို့ကနေပြီးတော့ ရခိုင်တိုင်းရင်းသား ဒုက္ခသည်ကတ် ထုတ်ပေးတယ်။ ဦးဇင်းတို့ community ကတ် ထုတ် ပေးလိုက်တယ်၊ ဟိုဘက်ကနေ UN လျှောက်ပေးလိုက်တယ်။ အဲဒီအထဲမှာ တကယ့်တကယ် အခက်အခဲ အမှန်ကျ နေတဲ့လူတွေ အများကြီးပါတယ်။ ဦးဇင်းတို့ အခုတင်ထားတာ ၂ လကျော်ပြီ။ ဦးဇင်းတို့ တင်ထားတာထဲမှာ ကြိုကြားကြိုကြားဆို အကုန်လုံး လူပေါင်း ၂၀ လောက်တော့ ရတယ်။ အရမ်းနည်းတယ်။ အခုက တွေ့ရသ လောက် ကတော့ UNHCR ဆီမှာ အခွင့်အရေး ရတာကတော့ အကူအညီရတယ်လို့ ပြောရမလားပေါ့။ မွတ်ဆလင် အုပ်စု၊ တခြားတခြားသော တိုင်းရင်းသား အဖွဲ့အစည်းတွေ တိုင်းရင်းသားတွေပဲ ရတာတွေ့တယ်။ များသောအား ဖြင့်ကတော့ ဦးဇင်းတို့ဆီမှာ အကူအညီ မရတာတွေ များနေတယ်။ တွေ့တာကတော့ UN ရုံးကို ရောက်သွားလို့ရှိ ရင် မွတ်ဆလင် အဖွဲ့အစည်းတွေ၊ နောက်ပြီးတော့ ချင်းတိုင်းရင်းသားတွေ ရတာတော့တွေ့တယ်။ နောက် တိုင်းရင်းသားတွေကတော့ မြန်မာဒုက္ခသည်ကတ် ကြိုကြားကြိုကြားတော့ ရကြတာတွေ့တယ်” ဟု မိန့်သည်။
UNHCR ဒုက္ခသည်ကတ်များကိုတွေ့ရစဉ်
ဒုက္ခသည်အဖြစ် ခံယူရန် စောင့်ဆိုင်းနေသည့် ရခိုင်တိုင်းရင်းသားများ အလုပ်အဆင်မပြေခြင်း၊ အလုပ် မရရှိခြင်းများ ရှိပါက ရခိုင်ဒုက္ခသည်များဗဟို (CAR) မှ အလုပ်ရှာပေးခြင်းအပြင် ဆေးရုံ၊ ဆေးခန်းများသို့ လိုက်၍ အကူ အညီ ပေးမှုများအား ဆောင်ရွက်ပေးကြောင်း သိရသည်။
ထိုသို့ ဒုက္ခသည်အဖြစ် ခံယူရန် စောင့်ဆိုင်းနေသည့် အခြား တိုင်းရင်းသား လူမျိုးများသည်လည်း ၎င်းတို့နှင့် သက်ဆိုင်သည့် တိုင်းရင်းသား၊ လူမျိုးစု အဖွဲ့အစည်းများမှနေ၍ ကူညီဆောင်ရွက်မှုများ ရှိကြောင်း သိရသည်။
လက်ရှိတွင် မလေးရှားနိုင်ငံသို့ ရောက်ရှိနေသည့် မြန်မာများထဲ၌ လူမျိုးပေါင်းစုံရှိပြီး ထိုသူအားလုံး ဒုက္ခရောက်နေ ကြခြင်းဖြစ်သည့်အတွက် UNHCR အနေဖြင့် ဒုက္ခသည်ကတ် ထုတ်ပေးခြင်း အပါအဝင် အကူအညီ ပေးခြင်းများ အား မျှမျှတတ ဆောင်ရွက်ပေးသင့်ကြောင်း ဆရာတော် ဦးဥတ္တရက ဆက်လက် မိန့်ကြားသည်။
၎င်းက “UNHCR အနေနဲ့ မျှမျှတတပေါ့နော်။ မွတ်ဆလင် ဒုက္ခသည်တွေပဲ ဒုက္ခဖြစ်တာလားဆိုတော့ မဟုတ်ဘူး။ ချင်းတွေသာ ဒုက္ခဖြစ်တာလား ဆိုတော့လည်း မဟုတ်ဘူး။ တိုင်းရင်းသားပေါင်းစုံ ဒုက္ခဖြစ်နေတဲ့ အချိန်မှာ အကုန် လုံး တိုင်းရင်းသားရေးရာ Community အဖွဲ့အစည်း အကုန်လုံးတွေကို မျှမျှတတနဲ့ ဒုက္ခသည်ကတ်ကို ထုတ်ပေး ထားဖို့လိုတယ်။ ကူညီပေးဖို့လိုတယ်။ မလေးရှား UN ရဲ့ ဒုက္ခသည်များဆိုင်ရာ ကမ္ဘာ့ကုလသမဂ္ဂ UNHCR ဆီ အနေနဲ့ အကုန်လုံးကို မျှမျှတတနဲ့ ကိုင်တွယ်ပြီးတော့ အကုန်လုံးကို စီစဉ် ဆောင်ရွက် ပေးစေလိုတယ်၊ အကူအညီ ပေးစေလိုတယ်”ဟု မိန့်သည်။
မလေးရှားအစိုးရနှင့် UNHCR တို့သည် လက်ရှိတွင် ဒုက္ခသည်အရေးနှင့်ပတ်သက်၍ ဆွေးနွေးမှုများ ပြုလုပ်နေကြ ကာ ဒုက္ခသည်အဖြစ် ခံယူမည့် လူဦးရေမှာ များပြားသဖြင့် မလေးရှား အစိုးရဘက်မှ စဉ်းစားစရာဖြစ်နေကြောင်း၊ UN ဘက်မှ ကြည့်ပါကလည်း ဒုက္ခသည်များအား ပစ်ပယ်ထားရန်မှာ မဖြစ်နိုင်သည့်အတွက် ညှိနှိုင်းဆွေးနွေးနေကြကြောင်း သိရသည်။
UNHCR ဒုက္ခသည်ကတ် လျှောက်ထားရန် ကူညီပေးနေခြင်း
မလေးရှားနိုင်ငံတွင် အထောက်အထား မရှိသူဖြစ်ပါက အလုပ်အကိုင် အခွင့်အလမ်း၊ ကျန်းမာရေး၊ ပညာရေးသင် ကြားရေးတို့တွင် နစ်နာမှုများရှိကြောင်း ARRC မှ ဒုတိယဥက္ကဋ္ဌ ကိုအောင်မင်းသူက CNI သတင်းဌာနသို့ ပြော သည်။
၎င်းက “UN နဲ့ မလေးရှားအစိုးရနဲ့ ညှိနှိုင်းမှု အပိုင်းတွေကို မြန်မြန်ဆန်ဆန်လေး အဆင်ပြေစေချင်တယ်ပေါ့။ ဘာလို့ဆို မြန်မာပြည်ရဲ့ အခြေအနေက တစ်နေ့ထက် တစ်နေ့ ပိုပိုပြီး ဆိုးလာတယ်။ မလေးရှားမှာ ကျနော်တို့ ခိုကိုးရာက UN ပဲ ရှိတယ်လေ။ UNHCR ရဲ့ မလေးရှားအစိုးရအပေါ် ချဉ်းကပ်မှုအပိုင်းကို မြန်မြန်ဆန်ဆန်နဲ့ အဆင်ပြေ စေချင်တယ်ပေါ့။ UN ကကျတော့ သနားမှုအပိုင်းနဲ့ လူ့အခွင့်အရေးအပိုင်းနဲ့ဆို သူက လက်ခံပြီးသား။ ဒါပေမယ့် ဒီနိုင်ငံကြီးကို သူပိုင်တာမဟုတ်ဘူးလေ။ ဒီနိုင်ငံကြီးကို ဒီနိုင်ငံသားတွေပဲ ဒီနိုင်ငံရဲ့ အစိုးရပဲ ပိုင်တယ်ဆို တော့ ဒီနိုင်ငံအစိုးရရဲ့ ခွင့်ပြုချက်မရှိဘဲ သူက တချို့ဟာတွေက များစွာသော အကြောင်းအရာတွေက လုပ်လို့ မရ ဘူး။ လုပ်လို့မရဘူးဆိုတော့ သူက အစိုးရကို အများကြီး ချဉ်းကပ်ပြီးတော့ ညှိနှိုင်းရတယ်။ သူတို့ရဲ့ ညှိနှိုင်းမှု ရလဒ် အပေါ်မှာပဲ ကျနော်တို့က အကျိုးခံစားခွင့် ရှိမှာလေ။ ကျနော်တို့အတွက် လုံခြုံမှုတွေရှိမယ်။ အဲဒီတော့ ညှိနှိုင်းမှု မြန်မြန်ဆန်ဆန်လေး အဆင်ပြေစေချင်တယ်” ဟု ပြောသည်။
လက်ရှိတွင် မလေးရှားနိုင်ငံမှ UNHCR ရုံးသည် ဒုက္ခသည်ကတ် လျှောက်ထားခြင်းအား အွန်လိုင်း website မှ တဆင့် လက်ခံနေကြောင်း၊ သို့သော်လည်း မလုပ်ဆောင်တတ်သည့်သူ အများအပြား ရှိနေကြောင်း၊ ဒုက္ခသည် ကတ် လျှောက်ချင်ပါက လူကိုယ်တိုင် သွားရောက် လျှောက်ထား၍မရဘဲ UNHCR Malaysia ဆိုသည့် website တွင် ဝင်ရောက် လျှောက်ထားနိုင်ပြီး ၎င်းတို့ဖြည့်ခိုင်းသည့် အချက်အလက်များအား ပြည့်စုံစွာ ဖြည့်သွင်းပြီး လျှောက်ထားနိုင်ကြောင်း သိရသည်။
- By CNI
- Category: နိုင်ငံရေး
- Hits: 937
CNI News
၂၀၂၂ ခုနှစ်၊ စက်တင်ဘာ ၂၇
နစကက ကျင်းပရန် ကြံစည်နေသော ရွေးကောက်ပွဲ အပါအဝင် လုပ်ငန်းစဉ်အားလုံးကို မည်သည့်နည်းနှင့်မျှ (အသိအမှတ်မပြု) လက်ခံနိုင်မည် မဟုတ်ကြောင်း အမျိုးသားဒီမိုကရေစီအဖွဲ့ချုပ်(NLD)ပါတီက ယနေ့ (စက်တင်ဘာ ၂၇ ရက်)တွင် ထုတ်ပြန် ပြောကြားခဲ့သည်။
အမျိုးသားဒီမိုကရေစီအဖွဲ့ချုပ်(NLD)ကို ၁၉၈၈ ခုနှစ်၊ စက်တင်ဘာ ၂၇ ရက်တွင် စတင် တည်ထောင်ခဲ့ရာ ယနေ့တွင် ၃၄ နှစ်ပြည့် အထိမ်းအမှတ်အနေဖြင့် ထုတ်ပြန်ခဲ့သော ကြေညာချက်တွင် အထက်ပါအတိုင်း ပြော ထားခြင်း ဖြစ်သည်။
NLD ပါတီသည် ၁၉၉၀ အထွေထွေရွေးကောက်ပွဲ၊ ၂၀၁၂ ကြားဖြတ်ရွေးကောက်ပွဲ၊ ၂၀၁၅ အထွေထွေရွေး ကောက်ပွဲ၊ ၂၀၁၇ နှင့် ၂၀၁၈ ကြားဖြတ်ရွေးကောက်ပွဲ၊ ၂၀၂၀ အထွေထွေရွေးကောက်ပွဲတို့တွင် အနိုင်ရရှိခဲ့ သည်။
သို့သော် ၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် မြန်မာ့တပ်မတော်က NLD အစိုးရကို ၂၀၂၀ အထွေထွေရွေး ကောက်ပွဲ မဲစာရင်းအငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချခဲ့သည့်အ တွက် မြန်မာ့နိုင်ငံ အကျပ်အတည်းဖြင့် ရင်ဆိုင်နေရသည်။
NLD ပါတီ၏ ၃၄ နှစ်ပြည့် ထုတ်ပြန်ချက်
ထို့နောက် ဗိုလ်ချုပ်မှူးကြီးမင်းအောင်လှိုင်က ၂၀၂၃ ခုနှစ်၊ သြဂုတ်လတွင် ရွေးကောက်ပွဲ ပြန်လည် ကျင်းပပေး မည်ဖြစ် ကြောင်း၊ အနိုင်ရရှိသည့် ပါတီကို နိုင်ငံတော်အာဏာလွှဲပြောင်းပေးမည်ဖြစ်ကြောင်း ပြောကြားခဲ့သည်။
NLD ပါတီက “အမျိုးသားဒီမိုကရေစီအဖွဲ့ချုပ် အနေဖြင့် မြန်မာနိုင်ငံတွင် ပြည်သူ့ဆန္ဒနှင့်အညီ စစ်မှန်သော ဒီမိုကရေစီ စနစ်အောက်မှ ကျင်းပမည့် လွတ်လပ်၍ တရားမျှတသည့် နောက်ထပ် ရွေးကောက်ပွဲရလဒ်တစ်ခု ပေါ်ထွက်မလာမီ အချိန်ထိ လက်ရှိ ၂၀၂၀ ရွေးကောက်ပွဲရလဒ် ပြည်သူ့ဆင့်လွှဲအာဏာကို နိုင်ငံလွှဲအပ် ကိုယ် စားပြု အာဏာအဖြစ် ကျင့်သုံးမည်ဖြစ်သည်။ ထို့ကြောင့် ဥပဒေကို ကိုယ်တိုင်ချိုးဖောက်ထားသော တရားမဝင် အာဏာသိမ်း စစ်ကောင်စီနှင့် ယင်းက ဖွဲ့စည်းထားသော အဖွဲ့အစည်းများ၊ ကျင်းပရန် ကြံစည်နေသော ရွေး ကောက်ပွဲ အပါအဝင် လုပ်ငန်းစဉ် အားလုံးကို မည်သည့် နည်းနှင့်မျှ(အသိအမှတ်မပြု) လက်ခံနိုင်မည် မဟုတ် ပါ”ဟု ထုတ်ပြန်ချက်မှာ ပြောထားသည်။
NLD ပါတီ၏ ၃၄ နှစ်ပြည့် ပါတီတည်ထောင်ခြင်း နှစ်ပတ်လည် အထိမ်းအမှတ် ထုတ်ပြန်ချက်၏ နံပါတ် ၉ တွင် ဖော်ပြထားချက်သည် ၂၀၂၀ အထွေထွေရွေးကောက်ပွဲရလဒ်အပေါ်ကို မျှော်လင့်နေသေးသည့် အသွင်ဆောင် နေကြောင်း နိုင်ငံရေးလေ့လာသုံးသပ်သူ တစ်ဦးက ပြောသည်။
NLD ပါတီရုံးကို လုံခြုံရေးယူပေးထားသော ရဲတပ်ဖွဲ့(GETTY IMAGES)
၎င်းက “အာဏာသိမ်းထားလို့ ၂၀၀၈ ဖွဲ့စည်းပုံအခြေခံဥပဒေကို NUG က ဖျက်သိမ်း လိုက်ပြီးလို့ ကြေညာထား သည့်တိုင်အောင် အခု NLD ရဲ့ ထုတ်ပြန်ချက် နံပါတ် ၉ က ၂၀၂၀ ရွေးကောက်ပွဲရလဒ်ကိုပဲ သူက ဆုပ်ကိုင် ထားဆဲဖြစ်တော့ NUG နဲ့ NLD လမ်းကြောင်းက မရှင်းမရှင်းဖြစ်နေတယ်။ စကစ ဘက်က ရွေးကောက်ပွဲ လုပ် မယ် ဒါကို အသိအမှတ်မပြုဘူးဆိုတာကလည်း ရွေးကောက်ပွဲဖြစ်သွားရင် သူဘာမှမတက်နိုင်ဘူးလေ။ ဒါပေ မယ့် ရွေးကောက်ပွဲကို မဖြစ်အောင်လည်း တခြား အင်အားစုတွေက ဟန့်တားမှုတွေ လုပ်လာမှာတော့ သေချာ တယ်။ အဲတော့ ရွေးကောက်ပွဲ ဖြစ်မဖြစ်က ပြည်တွင်း တည်ငြိမ် အေးချမ်းရေးနဲ့ နိုင်ငံတကာက အသိအမှတ်ပြု ခြင်း မပြုခြင်းအပေါ်မှာ မူတည်တယ်။ အသေအချာတော့ ဒီအချိန်မှာ မပြောနိုင်သေးဘူး”ဟု ပြောသည်။
နစကသည် ပါတီ ထိပ်ပိုင်း ခေါင်းဆောင်များကို ဖမ်းဆီးထားခြင်း၊ ပါတီဝင်များနှင့် လွှတ်တော် ကိုယ်စားလှယ် များကို ဥပဒေမဲ့လိုက်လံဖမ်းဆီးခြင်း၊ ယင်းတို့၏ နေအိမ်များနှင့် ပိုင်ဆိုင်မှုများအား ချိတ်ပိတ်သိမ်းဆည်းခြင်း၊ ဖမ်းမိသူ တချို့ကို စစ်ကြောရေးစခန်းများတွင် ညှင်းပင်းနှိပ်စက်ကာ သတ်ဖြတ်ခြင်း၊ ပါတီရုံးများကို ဝင်ရောက် ၍ ပါတီပိုင် ပစ္စည်းများကိုသိမ်းဆည်းခြင်း၊ မီးရှို့ဖျက်ဆီးခြင်းတို့ကို ဆက်တိုက်လုပ်ဆောင်ကာ အမျိုးသား ဒီမိုကရေစီအဖွဲ့ချုပ်ပါတီအား အလုံးစုံဖျက်ဆီးရန် အားထုတ်နေသည်ဟု NLD က ထုတ်ပြန်ခဲ့သည်။
- By CNI
- Category: နိုင်ငံရေး
- Hits: 1059
CNI News
၂၀၂၂ ခုနှစ်၊ စက်တင်ဘာ ၂၇
မြန်မာ့တပ်မတော်ကို ဖြုတ်ချပြီးမှ ဗမာပြည်နယ် ဖွဲ့စည်းရေးကိစ္စများအရေး ဆွေးနွေးလုပ်ဆောင်သင့်ဟု မြန်မာ့ အရေး လေ့လာသုံးသပ်သူလည်းဖြစ် တရုတ်နိုင်ငံအရေးကျွမ်းကျင်သူလည်း ဖြစ်သူ ဒေါက်တာလှကျော်ဇောက CNI သတင်းဌာနသို့ ပြောသည်။
လက်ရှိတွင် အားလုံး၏ ဘုံရည်မှန်းချက်ဖြစ်သည့် စစ်အာဏာရှင်စနစ် ဖြုတ်ချရေးကို လုပ်ဆောင်သင့်ကြောင်း၊ ထို့နောက် ပြည်နယ်သစ် ပေါ်ထွန်းရေး ကိစ္စများကို ဆွေးနွေးတိုင်ပင်သင့်ကြောင်း ၎င်းက ပြောသည်။
ဒေါက်တာလှကျော်ဇောက “အဲဒီကိစ္စတွေက ကျမသိပ်တော့ နားမလည်ဘူးဗျ၊ ဘာဖြစ်လို့လဲဆိုရင် ကျမတို့ရဲ့ ရည်မှန်းချက်က တစ်ခုတည်းပဲရှိတယ်၊ ဒီစစ်ကောင်စီကို ဖယ်ရှားဖို့ပဲ၊ အဲဒါပြီးမှဘဲ ဒီဟာတွေကို စနစ်တကျ ဆွေးနွေးတိုင်ပင်ကြတာ ပိုကောင်းမယ်ထင်တယ်၊ အခုလောလောဆယ် လုပ်ငန်းအရကတော့ ကျမတို့အားလုံး စစ်အာဏာရှင်စနစ်ကို မကြိုက်တဲ့သူတွေ အားလုံး တစ်စုတစ်စည်းတည်း စုပြီးတော့ ကျမတို့ ဒီစစ်တပ်ကို နိုင်အောင်တိုက်ဖို့ပဲဗျ၊ ကျန်တာတွေကတော့ ကျမတို့ ဖြည်းဖြည်းလုပ်လို့ ရပါတယ် ထင်ပါတယ်။ ဒီဟာတွေက လောလောဆယ်လည်း သိပ်မလိုအပ်သေးပါဘူး။ အခုကျမတို့ ဗမာပြည်မှာ တကယ့်ကို အလောတကြီး လိုအပ်နေ တာက ဒီစစ်ကောင်စီကို ဖယ်ပြီး တိုင်းပြည် တည်ငြိမ်အေးချမ်းအောင် လုပ်ဖို့က ပိုအရေးကြီးတယ် ထင်ပါတယ်၊ စစ်ကောင်စီ ရှိနေသ၍ ဗမာပြည်နယ်ပေးပေး၊ ဘာပေးပေး ဘယ်သူမှ ဘာမှ မရနိုင်ပါဘူး။ ဒီစစ်ကောင်စီ မရှိမှ ရနိုင်မှာ ဖြစ်တဲ့အတွက် ဒီစစ်ကောင်စီတွေကို အမြစ်ပြတ်ဆိုသလို ပြတ်ပြတ်သားသား အောင်ပွဲရပြီးမှသာလျှင် တခြားဟာတွေကို လုပ်နိုင်မယ်ထင်တယ်” ဟု CNI သတင်းဌာနသို့ ပြောသည်။
၂၀၁၆ ခုနှစ်၊ ဇူလိုင်လက မိုင်ဂျာယန်မြို့မှာ တွေ့ရသော လူမျိုးစုလူငယ်များ
လက်ရှိ မြန်မာနိုင်ငံသည် ၂၀၂၁ ခုနှစ်၊ ဖေဖော်ဝါရီ ၁ ရက်က အမျိုးသားဒီမိုကရေစီအဖွဲ့ချုပ်(NLD) အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှု မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ တပ်မတော်မှ ဖြုတ်ချ၍ နိုင်ငံတော်အား အရေးပေါ် ကြေညာထားသည်။
ထို့နောက် တော်လှန်ရေး အင်အားစုများနှင့် တိုင်းရင်းသားလက်နက်ကိုင် အဖွဲ့အစည်းတချို့ ၏ ပူးပေါင်းအဖွဲ့များ နှင့် တပ်မတော်ကြား တိုက်ပွဲများ ဖြစ်ပွားလျက်ရှိသည်။
ပြည်နယ်ဖွဲ့စည်းရေးကိစ္စနှင့် ပတ်သက်၍ ပြီးခဲ့သည့် ပြည်ထောင်စု သဘောတူစာချုပ်တွင် သဘောတူထားသည့် အချက်အလက်များရှိကြောင်း ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) မှ ပြောခွင့်ရပုဂ္ဂိုလ် ဗိုလ်မှူးကြီး စောကျော်ညွန့်က CNI သတင်းဌာနသို့ ပြောသည်။
၎င်းက “အဲဒီ ပြည်ထောင်စုသဘောတူစာချုပ် အစိတ်အပိုင်း (၁) မှာဆိုရင် ဒီမိုကရေစီနဲ့ဖက်ဒရယ်စနစ်ကို အခြေ ခံတဲ့ ပြည်ထောင်စုကို တိုင်းဒေသကြီး မျဉ်းစောင်း ပြည်နယ်အဖြစ် ဖွဲ့စည်းရမည်။ အဲဒီလိုမျိုး ကျနော်တို့ သဘော တူ ထားတာရှိတယ်၊ တိုင်းဒေသကြီး မျဉ်းစောင်း ပြည်နယ်ဆိုတဲ့ အဓိပ္ပာယ်ကတော့ တိုင်းဒေသကြီး ခေါ်မလား ပြည်နယ်ခေါ်မလား ဆိုတာကလေးလည်း ကျနော်တို့ ဆက်လက်ပြီးတော့ ညှိနှိုင်းဆွေးနွေးရမယ့် အခင်းအကျင်း လို့ နားလည်တယ်၊ အဲဒီအောက်မှာလည်းပဲ မှတ်ချက် တစ်ဆက်ထဲပေါ့လေ၊ တိုင်းဒေသကြီး မျဉ်းစောင်း ပြည်နယ် များက တန်းတူရည်တူရှိတယ်၊ အမည်နာမ သတ်မှတ်ချက်နဲ့ ပတ်သက်ပြီးတော့ နောင်ဆိုရင် ဆက်လက် ဆွေးနွေး ဖို့ သဘောတူတယ်ဆိုတဲ့ အချက်အလက်တွေ အပေါ်မှာကိုလည်းပဲ ဆရာတို့ ပြန်ပြီးတော့ အဲဒါကို သုံးသပ်ကြည့် မယ်ဆိုရင်တော့ ခုနက ပြောတဲ့ ကိစ္စရပ်တွေကတော့ ကျနော်တို့ ဆက်လက် ညှိနှိုင်းဆောင်ရွက်ဖို့ အချိန်လို အပ် တယ်၊ ကြိုးပမ်းဖို့ လိုအပ်ဦးမယ်ဆိုတာကိုတော့ ကျနော့်အနေနဲ့ အဲဒီလို နားလည်းထားပါတယ်” ဟု ပြောသည်။
ပြည်ထောင်စု ငြိမ်းချမ်းရေး ညီလာခံကျင်းပနေသည်ကိုတွေ့ရစဉ်
(၈) ပြည်နယ်မူသည် တန်းတူ အခွင့်အရေးကို တောင်းဆိုခြင်းဖြစ်ကြောင်း၊ ကျန်သည့် လူမျိုးစုတွင် ပြည်နယ်ရှိပြီး ဖြစ်သည့်အတွက် ဗမာလူမျိုးစုတွင်လည်း အမျိုးသားပြည်နယ် တစ်ရပ်လိုသည်ဟုဆိုကာ တင်ပြတောင်းဆိုခြင်း ဖြစ်ကြောင်း သိရ သည်။
လက်ရှိ မြန်မာနိုင်ငံတွင် ၂၀၀၈ ဖွဲ့စည်းပုံအခြေခံဉပဒေအရ တိုင်းဒေသကြီး ၇ ခု၊ ပြည်နယ် ၇ ခု၊ ကိုယ်ပိုင်အုပ်ချုပ် ခွင့်ရတိုင်း ၁ ခု၊ ကိုယ်ပိုင်အုပ်ချုပ်ခွင့်ရဒေသ ၅ ခု၊ နေပြည်တော်ကောင်စီနယ်မြေ ၁ ခု စသဖြင့် စုစည်း သတ်မှတ် ပြဋ္ဌာန်းထားသည်။
ထို့နောက် ရှမ်းနီ၊ တအာင်း(ပလောင်)၊ “ဝ”၊ ပအိုဝ်း တို့က ပြည်နယ် သတ်မှတ်ပေးရန် တောင်းဆိုလျက်ရှိသလို မိုင်းလား (အထူးဒေသ ၄)ကလည်း ကိုယ်ပိုင်အုပ်ချုပ်ခွင့်ရဒေသ သတ်မှတ်ပေးရန် တောင်းဆိုလျက်ရှိသည်။
- By CNI
- Category: နိုင်ငံရေး
- Hits: 723
CNI News
၂၀၂၂ ခုနှစ် ၊ စက်တင်ဘာ ၂၆
"ဝ"ပြည်သွေးစည်းညီညွတ်ရေးတပ်မတော်(UWSA)၊ အမျိုးသားဒီမိုကရေစီမဟာမိတ်တပ်မတော် (NDAA)၊ ရှမ်းပြည်တိုးတက်ရေးပါတီ(SSPP)မှ ခေါင်းဆောင်များနှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်တို့ စက်တင်ဘာ ၂၆ ရက်နေ့က တွေ့ဆုံ၍ ငြိမ်းချမ်းရေး လုပ်ငန်းစဉ်များကို ဆွေးနွေးခဲ့ကြသည်။
အဆိုပါ တွေ့ဆုံ ဆွေးနွေးပွဲသို့ UWSA ဘက်က ဒုဥက္ကဋ္ဌ ဦးလော့ယာကု၊ NDAA က ဒုဥက္ကဋ္ဌ ဦးစန်ပေ့၊ SSPP မှ ဒုဥက္ကဋ္ဌ(၂) စဝ်ခွန်ဆိုင်တို့ တက်ရောက်ရှိသည်။
ထို့နောက် နစက၏ ငြိမ်းချမ်းရေးဆွေးနွေးရေးအဖွဲ့နှင့် UWSA၊ NDAA၊ SSPP ကိုယ်စားလှယ်များ ဆက်လက် ဆွေးနွေးကြမည်ဖြစ်သည်။ ယနေ့တွေ့ဆုံမှုတွင် မည်သည့် အကြောင်းအရာများကို ဆွေးနွေးကြကြောင်းကိုတော့ နှစ်ဖက်စလုံးက သတင်းထုတ်ပြန်ခြင်းမရှိ သေးပေ။
UWSA၊ NDAA၊ SSPP ခေါင်းဆောင်များနှင့် ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်
UWSA ၊ NDAA ၊ SSPP တို့သည် နစကနှင့် ငြိမ်းချမ်းရေး ဆွေးနွေးမှုကို ယခုအခါသည် ဒုတိယအကြိမ် တွေ့ဆုံ ခြင်း ဖြစ်သည်။
ပထမ အချိန်ကတော့ UWSA နှင့် နစကသည် ၂၀၂၂ ခုနှစ်၊ မေလ ၂၉ ရက်နေ့ တွေ့ဆုံ ဆွေးနွေးထားသလို NDAA နှင့် နစကလည်း ၂၀၂၂ ခုနှစ်၊ ဇွန်လ ၄ ရက်က တွေ့ဆုံ ဆွေးနွေးထားသည်။ ထို့နောက် SSPP နှင့် နစကသည် ၂၀၂၂ ခုနှစ်၊ သြဂုတ် ၄ ရက်က တွေ့ဆုံ ဆွေးနွေးထားသည်။
အဆိုပါ တိုင်းရင်းသား လက်နက်ကိုင် ၃ ဖွဲ့သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) လက်မှတ်မထိုးရသေးသော အဖွဲ့များသည်။
- By CNI
- Category: နိုင်ငံရေး
- Hits: 843
CNI News
၂၀၂၂ ခုနှစ်၊ စက်တင်ဘာ ၂၆
ရှမ်းပြည်မြောက်ပိုင်းရှိ တိုက်ပွဲရှောင်စခန်းများ ရွှေ့ခိုင်းထားမှုကို ကလေးများ ကျောင်းပြီးမှ ရွေ့ဆိုင်းပေးရန် အသနားခံစာ တင်ထားကြောင်း နမ္မတူမြို့နယ်မှ တိုက်ပွဲရှောင်ပြည်သူများ ကူညီထောက်ပံ့ရေးကော်မတီမှ တာဝန်ရှိသူ တစ်ဦးက CNI သတင်းဌာနသို့ ပြောသည်။
ယခုနှစ် အောက်တိုဘာလကုန် နောက်ဆုံးထား၍ ပိတ်သိမ်းရန် ဌာနဆိုင်ရာများမှ စက်တင်ဘာလ အစောပိုင်းက ညွှန်ကြားထားကြောင်း သိရသည်။
နမ္မတူမြို့နယ်မှ တိုက်ပွဲရှောင်ပြည်သူများ ကူညီထောက်ပံ့ရေးကော်မတီမှ တာဝန်ရှိသူက “ကျနော်တို့ကတော့ လောလောဆယ်ကတော့ သူတို့ရဲ့ သားသမီးတွေ ကျောင်းတက်နေတဲ့ အတွက်ကြောင့် နောက်နှစ် ဧပြီလမှာ ရွှေ့ခိုင်းဖို့ အသနားခံစာ ကျနော်တို့ တင်ထားတယ်၊ အဲဒါ အကြောင်းတော့ ပြန်မလာသေးဘူးဗျ။ အဲဒါလေး အောင်မြင်လို့ ရှိရင်တော့ ၄ လပိုင်းအထိတော့ သူတို့ ကလေးတွေ ကျောင်းတက်ဖို့ အဆင်ပြေသွားမှာပေါ့” ဟု ပြောသည်။
နမ္မတူမြို့နယ်တွင် ရှမ်း၊ လီဆူ၊ ကချင် တိုက်ပွဲရှောင်စခန်းများရှိပြီး အိမ်ထောင်စု ၁၀၀ ကျော်ရှိကာ တိုက်ပွဲရှောင် ဦးရေ ၅၀၀ ကျော်ရှိကြောင်း ၎င်းက ပြောသည်။
နမ္မတူမြို့နယ်အတွင်း တစ်နေရာကိုတွေ့ရစဉ် (GETTY IMAGES)
လက်ရှိတွင် ကျောက်မဲမြို့နယ်အတွင်း တိုက်ပွဲမရှိသေးသည့်အတွက် တိုက်ပွဲရှောင်များကို နေရပ်ပြန်ခိုင်းသည့် သဘောဟု ကျောက်မဲမြို့နယ်မှ ဇီဝိတဒါန လူမှုကူညီရေးအသင်းဥက္ကဋ္ဌ ဦးတင်မောင်သိန်းက CNI သတင်းဌာနသို့ ပြောသည်။
၎င်းက “ဒီမှာ အရင်တုန်းက ဖြစ်ခဲ့ကြတာ ကျနော်တို့ ဖက်ဆိုရင် RC ရှိတယ်၊ RC နဲ ထိပ်တိုက် တွေ့ခဲ့ကြတယ် ပေါ့နော်၊ SSA နဲ့ RC နဲ့ ထိပ်တိုက်တွေ့ကြတယ်၊ နောက်တစ်ခါ TNLA ပါကြတယ်၊ သူတို့ မဟာမိတ်အဖွဲ့တွေပေါ့၊ အဲဒီလိုနဲ့ စစ်ဖြစ်ခဲ့တယ်၊ အခုက မရှိတော့တဲ့အတွက် စစ်ပွဲမရှိတော့လို့ ပြန်ခိုင်းတဲ့ သဘောပေါ့” ဟု ပြောသည်။
ရှမ်းပြည်နယ်မြောက်ပိုင်းတွင် ရှမ်းပြည်ပြန်လည် ထူထောင်ရေးကောင်စီ (RCSS)၊ ရှမ်းပြည်တိုးတက်ရေးပါတီ (SSPP)၊ တအောင်း အမျိုးသား လွတ်မြောက်ရေး တပ်မတော် (TNLA)၊ ကချင်လွတ်လပ်ရေး တပ်မတော်(KIA)၊ မြန်မာနိုင်ငံအမျိုးသားဒီမိုကရေစီ မဟာမိတ်တပ်မတော် (MNDAA)နှင့် တပ်မတော်အကြားလည်းကောင်း၊ တိုင်းရင်းသား လက်နက်ကိုင်တပ် အချင်းချင်း အကြားလည်းကောင်း တိုက်ပွဲများ ဖြစ်ပွားခဲ့သည်။
နမ္မတူတိုက်ပွဲရှောင်များကိုတွေ့ရစဉ်(AFP
နမ္မတူမြို့နယ်မှ တိုက်ပွဲရှောင်ပြည်သူများ ကူညီထောက်ပံ့ရေးကော်မတီမှ တာဝန်ရှိသူတစ်ဦးက “တိုက်ပွဲတွေ ကတော့ မရှိတော့ဘူးပေါ့။ ဒါပေမယ့် ဝင်ထွက်သွားလာမှုတော့ ရှိကောင်းရှိမှာပေါ့။ သူတို့ တချို့တွေပေါ့၊ တချို့ တွေကတော့ ဒီမှာပဲ မြေကွက်ဝယ်ပြီးမှ မြေကွက်ကို ပေါင်းဝယ်ပြီးမှ အိမ်ဆောက်နေမယ်ပေါ့၊ တချို့က ကြတော့ လည်း ရွာမှာ ပြန်တော့မယ်ပေါ့၊ တချို့ကကြတော့လည်း အခန်းတွေ ငှားပြီးမှ နေမယ်ပေါ့၊ အဲဒီလိုမျိုးတော့ အစီအစဉ် ဆွဲထားတယ်” ဟု CNI သတင်းဌာနသို့ ပြောသည်။
ရှမ်းပြည်နယ်မြောက်ပိုင်း ကွတ်ခိုင်၊ နမ့်ခမ်း၊ နမ္မတူ၊ မန်တုံ၊ လားရှိုးနှင့် သိန္နီ စသည့်မြို့နယ်များအတွင်း တိုက်ပွဲ ရှောင်စခန်း (၂၆)ခုရှိပြီး တိုက်ပွဲရှောင် လူဦးရေ တစ်သောင်းခွဲ(၁၅၀၀၀)ဝန်းကျင် ရှိနေကြောင်း ရွှေဖီမြေ သတင်းဌာန၏ ဖော်ပြချက်အရ သိရသည်။
- By CNI News
- Category: နိုင်ငံရေး
- Hits: 877
CNI News
၂၀၂၂ ခုနှစ်၊ စက်တင်ဘာ ၂၅
“ဝ”ပြည်သွေးစည်းညီညွတ်ရေးတပ်မတော်(UWSA)၊ အမျိုးသားဒီမိုကရေစီမဟာမိတ်တပ်မတော်(NDAA)၊ ရှမ်းပြည်တိုးတက်ရေးပါတီ(SSPP)မှ ခေါင်းဆောင်များသည် နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံ၍ ငြိမ်းချမ်းရေး လုပ်ငန်းစဉ်များ တွေ့ဆုံ ဆွေးနွေးရန် ယနေ့ (စက်တင်ဘာ ၂၅ ရက်)တွင် နေပြည်တော် သို့ ရောက်ရှိလာခဲ့သည်။
UWSA ကိုယ်စားလှယ်အဖွဲ့ကို ဒုဥက္ကဋ္ဌ ဦးလော့ယာကုက လည်းကောင်း၊ NDAA ကိုယ်စားလှယ်အဖွဲ့အား ဒုဥက္ကဋ္ဌ ဦးစန်ပေ့က လည်းကောင်း၊ SSPP ကိုယ်စားလှယ်အဖွဲ့ကို ဒုဥက္ကဋ္ဌ(၂) စဝ်ခွန်ဆိုင်က လည်းကောင်း အသီးသီး ဦးဆောင်လာခဲ့ကြောင်း သိရသည်။
UWSA ဒုဥက္ကဋ္ဌ ဦးလော့ယာကု ဦးဆောင်သော ကိုယ်စားလှယ်အဖွဲ့ ၂၀၂၂ ခုနှစ်၊ စက်တင်ဘာ ၂၅ ရက် နေပြည်တော်ရောက်လာစဉ်
ထို့နောက် စက်တင်ဘာ ၂၆ ရက်နေ့တွင် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် အဆိုပါ ပူးတွဲ သုံးဖွဲ့မှ ကိုယ်စားလှယ်များ တွေ့ဆုံ ဆွေးနွေးကြမည်ဖြစ်သည်။ ဆက်လက်၍ နစက၏ ငြိမ်းချမ်းရေးဆွေးနွေးရေးအဖွဲ့နှင့် UWSA၊ NDAA၊ SSPP ပူးတွဲကိုယ်စားလှယ်များ အသေးစိတ်ကို ဆွေးနွေးကြမည်ဖြစ်သည်။
UWSA ၊ NDAA ၊ SSPP တို့သည် နစကနှင့် ငြိမ်းချမ်းရေး ဆွေးနွေးမှုကို ယခုအခါသည် ဒုတိယအကြိမ် တွေ့ဆုံ ခြင်း ဖြစ်သည်။
SSPP ဒုဥက္ကဋ္ဌ(၂) စဝ်ခွန်ဆိုင် ဉီးဆောင်သော ကိုယ်စားလှယ်အဖွဲ့ ၂၀၂၂ ခုနှစ်၊ စက်တင်ဘာ ၂၅ ရက်က နေပြည်တော်ရောက်လာစဉ်
ပထမ အချိန်ကတော့ UWSA နှင့် နစကသည် ၂၀၂၂ ခုနှစ်၊ မေလ ၂၉ ရက်နေ့ တွေ့ဆုံ ဆွေးနွေးထားသလို NDAA နှင့် နစကလည်း ၂၀၂၂ ခုနှစ်၊ ဇွန်လ ၄ ရက်က တွေ့ဆုံ ဆွေးနွေးထားသည်။ ထို့နောက် SSPP နှင့် နစကသည် ၂၀၂၂ ခုနှစ်၊ သြဂုတ် ၄ ရက်က တွေ့ဆုံ ဆွေးနွေးထားသည်။
အဆိုပါ တိုင်းရင်းသား လက်နက်ကိုင် ၃ ဖွဲ့သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) လက်မှတ်မထိုးရသေးသော အဖွဲ့များသည်။
- By CNI
- Category: နိုင်ငံရေး
- Hits: 861
CNI News
၂၀၂၂ ခုနှစ်၊ စက်တင်ဘာ ၂၄
နွေဦးတော်လှန်ရေး ပေါ်ပေါက်လာရခြင်းမှာ မိမိတို့ မျိုးဆက်များ၏ အနာဂတ်အတွက်ကြောင့်ဟု အမျိုးသား ညီညွတ်ရေးအစိုးရ (NUG) ၏ ပညာရေးဝန်ကြီး ဒေါက်တာဇော်ဝေစိုးက ပြောသည်။
ယနေ့ (စက်တင်ဘာ ၂၄ ရက်) တွင် ဖွင့်လှစ်သည့် ပအိုဝ်းအမျိုးသားဖက်ဒရယ်ကောင်စီ (PNFC) ၏ ကြားကာလ အခြေခံပညာ အခမဲ့ အွန်လိုင်း စာသင်ကျောင်းဖွင့်ပွဲ အခမ်းအနားတွင် ပြောကြားခဲ့ခြင်း ဖြစ်သည်။
ဒေါက်တာဇော်ဝေစိုးက “ပညာရေးဟာ တကယ်ကို လိုအပ်တယ်၊ ပညာရေးမရှိလို့ မဖြစ်ဘူးဆိုတဲ့စိတ်နဲ့ ခေါင်း ဆောင်တွေရော၊ ပါဝင်နေတဲ့ သူတွေ အားလုံးရော စောစောက မိဘတွေ၊ ကျောင်းသားတွေ အားလုံး အခုလို မျိုး ပါဝင်နေကြတာဟာ တကယ် တော့ အနာဂတ်အတွက် ဖြစ်ပါတယ်၊ ကျနော်တို့ တိုင်းပြည်ရဲ့ အနာဂတ်၊ ပအိုဝ်း အမျိုးသားတွေရဲ့ အနာဂတ် အတွက် ဖြစ်တယ်လို့ ကျနော်တော့ ယုံကြည်ပါတယ်၊ ဒီနေ့ တော်လှန်ရေး လုပ်နေ ရခြင်းက ဒါပါပဲ၊ ကျနော်တို့ ဒီနေ့ နွေဦးတော်လှန်ရေး ပေါ်ပေါက်လာရခြင်းဟာ နွေဦးတော်လှန်ရေးမှာ ကျနော်တို့ တတွေ ပါဝင်နေကြခြင်း ဟာ၊ နွေဦးတော်လှန်ရေးမှာ CDM ဆရာတွေ၊ ဆရာမတွေ CDM ကျောင်းသားတွေ ပါဝင် နေကြခြင်းဟာ နိုင်ငံ့ရဲ့ အနာဂတ်အတွက် ကျနော်တို့ မျိုးဆက်တွေရဲ့ အနာဂတ်အတွက် ဖြစ်ပါတယ်၊ ဒီအနာဂတ် ဘယ်လိုနည်းနဲ့မှ စစ်အာဏာရှင်နဲ့ မကောင်းနိုင်ဘူးဆိုတာ ကျနော်တို့တတွေ သိကြပြီးသား၊ ကြုံခဲ့ကြ ပြီးသား ဖြစ် ပါတယ်၊ နှစ်ပေါင်း များစွာလည်း ကြုံခဲ့ပြီးသား ဖြစ်ပါတယ်” ဟု ပြောသည်။
ဒီမိုကရေစီအရေးတောင်းဆိုကြသူများနဲ့လုံခြုံရေးတပ်ဖွဲ့ ထိပ်တိုက်တွေ့ကြစဉ် (ဖရွန်းတီးယားမြန်မာ)
အဆိုပါ PNFC ၏ ကြားကာလအခြေခံပညာ အခမဲ့ အွန်လိုင်း စာသင်ကျောင်းဖွင့်ပွဲကို PNFC ဥက္ကဋ္ဌ ခွန်မြင့်ထွန်း၊ NUG ၏ ပညာရေးဝန်ကြီး ဒေါက်တာဇော်ဝေစိုး၊ NUG ၏ ပညာရေးဝန်ကြီးဌာန ဒုဝန်ကြီး ဒေါက်တာစိုင်းခိုင်မျိုး ထွန်း၊ NUG ၏ ပညာရေးဝန်ကြီးဌာနမှ ဆရာမ Ja Htoi Pan တို့ တက်ရောက်ခဲ့သည်။
လက်ရှိ မြန်မာနိုင်ငံသားများအားလုံး အစဉ်အဆက် ခေါင်းမမော်နိုင်သည့် ပညာမတတ်သည့် သူများဖြစ်မှာ စိုးရိမ်သည့်အတွက် ယနေ့ တော်လှန်ရေးကို လုပ်ဆောင်နေခြင်းဖြစ်ကြောင်း ဒေါက်တာ ဇော်ဝေစိုးက ပြောသည်။
PNFC ၏ ကြားကာလ အွန်လိုင်း ပညာသင်ကြားရေးမိတ်ဆက်
၎င်းက “အားလုံးသိတဲ့ အတိုင်းပဲ ကျနော်တို့ နိုင်ငံ၊ ကျနော်တို့ နိုင်ငံအတွင်းမှာ မှီတင်းနေထိုင်ကြတဲ့ ပအိုဝ်း အမျိုးသားတွေ အပါအဝင် ကျနော်တို့တတွေ ကမ္ဘာနဲ့ ယှဉ်ရင် သိပ်ကို နောက်ကျနေခဲ့ကြရတယ်၊ အောက်ကျ နောက်ကျဖြစ်ခဲ့ရတယ်။ အဲဒါဟာ ဒီစစ်အာဏာရှင် အဆက်ဆက်ကြောင့်ပဲ ဖြစ်တယ်။ အခုထပ်ပြီး ဒီလိုမျိုး အောက်ကျ နောက်ကျ အဖြစ်မခံနိုင်တော့ဘူး။ ကျနော်တို့တတွေက ဒီဟာကို ဒီအချိန်မှာ မတော်လှန်ခဲ့ရင် ကျနော်တို့တတွေရဲ့ သားစဉ်မြေးဆက်၊ ကျနော်တို့ ပအိုဝ်းအမျိုးသားတွေ အပါအဝင် ဒီမှာမှီတင်းနေထိုင်ကြတဲ့ မြန်မာနိုင်ငံသားတွေ အားလုံး အစဉ်အဆက် ခေါင်းမမော်နိုင်တဲ့ ပညာမတတ်တဲ့ လူတွေ ဖြစ်ကုန်မှာကို စိုးရိမ်တဲ့ အတွက် အဖြစ်မခံနိုင်လို့ ဒီနေ့ တော်လှန်ရေး ကျနော်တို့ လုပ်နေတာ ဖြစ်ပါတယ်။ အားလုံးသိတဲ့ အတိုင်းပဲ ကျနော်တို့ဟာ ကမ္ဘာမှာ အဆင့်အနိမ့်ဆုံးနိုင်ငံ ၁၀ နိုင်ငံထဲကို ရောက်ရခြင်းဟာ ဒါကြောင့်ပဲ ဖြစ်ပါတယ်” ဟု ပြောသည်။
၂၀၂၁ ခုနှစ်၊ ဖေဖော်ဝါရီ ၁ ရက် တပ်မတော်က အာဏာယူပြီးနောက် ဆန့်ကျင်ဆန္ဒပြမှုနှင့်အတူ လက်နက်ကိုင် တော်လှန်ရေးကို ဆင်နွှဲခဲ့ကြသည်။
ပအိုဝ်းအမျိုးသား ဖက်ဒရယ်ကောင်စီ(PNFC) သည် ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) တွင် ဥက္ကဋ္ဌနှင့် ဒုဥက္ကဋ္ဌများအဖြစ် တာဝန် ထမ်းဆောင်ခဲ့သော ခွန်မြင့်ထွန်းက ဥက္ကဋ္ဌအဖြစ် တာဝန်ယူ ဖွဲ့စည်းထားသည့် အရပ်ဖက်အင်အားစု တစ်ရပ် ဖြစ်သည်။