- By CNI
- Category: နိုင်ငံရေး
- Hits: 674
CNI News
၂၀၂၂ ခုနှစ်၊ အောက်တိုဘာ ၇
အမေရိကန်နိုင်ငံခြားရေးဝန်ကြီးဌာနအနေဖြင့် ယခင် ရဲချုပ်နှင့် ဒုတိယပြည်ထဲရေးဝန်ကြီးအဖြစ် တာဝန်ထမ်း ဆောင်ခဲ့သူ ဒုဗိုလ်ချုပ်ကြီးသန်းလှိုင်(ငြိမ်း)ကို ကြီးမားသော လူ့အခွင့်အရေးချိုးဖောက်မှုများတွင် ပါဝင်ခဲ့သည့် အတွက် ဥပဒေအရ အရေးယူသတ်မှတ်သွားမည်ဟု အမေရိကန်နိုင်ငံခြားရေးဝန်ကြီး မစ္စတာ အန်တိုနီ ဘလင်ကင်က ၂၀၂၂ ခုနှစ်၊ အောက်တိုဘာ ၆ ရက်တွင် ထုတ်ပြန်ခဲ့သည်။
အမေရိကန်နိုင်ငံခြားရေးဝန်ကြီး ဘလင်ကင်က “ အမေရိကန်နိုင်ငံခြားရေးဝန်ကြီးဌာနသည် ယခင်ရဲချုပ်နှင့် ဒုတိယပြည်ထဲရေးဝန်ကြီးဟောင်း ဦးသန်းလှိုင်အား ၂၀၂၁ ခုနှစ်၊ ဖေဖော်ဝါရီ စစ်အာဏာသိမ်းမှုနောက်ပိုင်း ငြိမ်းချမ်းစွာ ဆန္ဒပြသူများကို ဥပဒေမဲ့ သတ်ဖြတ်ခြင်းကဲ့သို့ ကြီးမားသော လူ့အခွင့်အရေးချိုးဖောက်မှုများတွင် ပါဝင်ခဲ့သည့်အတွက် အမေရိကန်နိုင်ငံခြားရေးဝန်ကြီးဌာန၏ ၂၀၂၂ နိုင်ငံရပ်ခြားလုပ်ငန်းဆောင်ရွက်ရေးနှင့် ဆက်စပ်အစီအစဉ်များ လျာထားချက်အက်ဥပဒေအရ အရေးယူသတ်မှတ်သွားမည် ဖြစ်သည်”ဟု ထုတ်ပြန် ချက်တွင် ပြောထားသည်။
အမေရိကန်နိုင်ငံခြားရေးဝန်ကြီး ဘလင်ကင်ကိုတွေ့ရစဉ်
ထို့နောက် ဦးအောင်မိုးမြင့်၊ ဦးလှိုင်မိုးမြင့်၊ ဦးမျိုးသစ္စာနှင့်အတူ Dynasty International Company Limited တို့ကို မြန်မာ့တပ်မတော်အတွက် ရုရှားထုတ် စစ်လက်နက်များကို ဘယ်လာရုစ်မှတဆင့် ဝယ်ယူပေးရာတွင် ပါဝင်ခြင်းကြောင့် အမေရိကန်ဘဏ္ဍာရေးဝန်ကြီးဌာန အောက်ရှိ နိုင်ငံရပ်ခြားပိုင်ဆိုင်မှုထိန်းချုပ်ရေးရုံးသည် သမ္မတ၏ အမိန့်အမှတ် ၁၄၀၁၄ အရ ပိတ်ဆို့အရေးယူလိုက်ကြောင်း အမေရိကန်နိုင်ငံခြားရေးဝန်ကြီးဌာနက ထုတ်ပြန်ခဲ့သည်။
အမေရိကန်နိုင်ငံခြားရေးဝန်ကြီး ဘလင်ကင်က “ ယခု အရေးယူသတ်မှတ်မှုများသည် အာဏာရှင်အဖွဲ့အစည်း က ဒီမိုကရေစီလိုလားသည့် တက်ကြွလှုပ်ရှားသူများနှင့် ရွေးကောက်ခံ ခေါင်းဆောင်များဖြစ်သော ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်နှင့် ကိုအောင်သူရဇော်တို့ကို ကွပ်မျက်မှုနှင့် စက်တင်ဘာ ၁၆ ရက်တွင် အနည်းဆုံး ကလေးငယ် ၁၁ ဦးသေဆုံးခဲ့ရသည့် ရဟတ်ယာဉ်နှင့်စာသင်ကျောင်းကို တိုက်ခိုက်ခြင်း အပါအဝင် လူ့အခွင့်အရေးချိုးဖောက်မှုများကို ကျူးလွန်ဆောင်ရွက်နိုင်ရန် စစ်တပ်ကို အားပေးအားမြှောက်ပြုနေသူများကို ပစ်မှတ်ထားရန် ရည်ရွယ်ပါသည်”ဟု ပြောသည်။
မြန်မာနိုင်ငံတွင် အားလုံးပါဝင်နိုင်သည့် ပါတီစုံဒီမိုကရေစီစနစ်သို့ ပြန်လည် ရောက်ရှိရန် မိမိတို့ တောင်းဆိုပါ သည်ဟု အမေရိကန်နိုင်ငံခြားရေးဝန်ကြီးဌာနက ထုတ်ပြန်ခဲ့သည်။
- By CNI
- Category: နိုင်ငံရေး
- Hits: 916
CNI News
၂၀၂၂ ခုနှစ်၊ အောက်တိုဘာ ၆
ရခိုင်ပြည်နယ်၊ ကျောက်တော်မြို့နယ်ရှိ တိုက်ပွဲရှောင်များကို နေရပ်ပြန်ကြရန်နှင့် နေရပ်ပြန်မည့်သူများကို လမ်းစရိတ် အပြင် စားနပ်ရိက္ခာများကို ထောက်ပံ့ပေးမည်ဟု ရခိုင်ပြည်နယ် စီမံအုပ်ချုပ်ရေးကောင်စီက ပြော လာကြောင်း ကျောက်တော်မြို့နယ်မှ တိုက်ပွဲရှောင်များက ပြောသည်။
ပြီးခဲ့သည့် အောက်တိုဘာ ၄ ရက်က ကျောက်တော်မြို့နယ်ရှိ တိုက်ပွဲရှောင်စခန်းတာဝန်ခံများကို မြို့နယ်အုပ်ချုပ် ရေးအဖွဲ့မှ ခေါ်ယူတွေ့ဆုံ၍ နေရပ်ပြန်ကြရန်နှင့် နေရပ်ပြန်သူများကို လမ်းခရီးစရိတ် တစ်သိန်းနှင့် စားနပ်ရိက္ခာ တစ်လစာ ထောက်ပံ့ပေးမည်ဟု ပြောကြောင်း ကျောက်တော်မြို့နယ်၊ ရထားဘူတာ တိုက်ပွဲရှောင်စခန်းမှ တာဝန် ရှိသူတစ်ဦးက CNI သတင်းဌာနသို့ ပြောသည်။
၎င်းက “ကျောက်တော်က မြို့နယ် စကစကတော့ ကျနော်တို့ နေရပ်ပြန်ဖို့တော့ ပြောပါတယ်။ ပြောတော့ သူတို့ က ဘာပြောလဲဆိုတော့ နေရပ်ပြန်ဖို့အတွက် လမ်းစရိတ်ကိုတော့ ငွေကျပ် တစ်သိန်းပေါ့။ ပြီးတော့ ပစ္စည်းက ၁၇ မျိုး ပေးမယ်။ ပြီးတော့ စားနပ်ရိက္ခာ တစ်လစာပေးမယ်တဲ့။ ဒါကို အဲလိုပေးမယ်ပြောတယ်။ မပြန်လို့ရှိရင် NGO, INGO အဲလို အဖွဲ့အစည်းတွေက ထောက်ပံ့တာတွေကို အကုန်လုံး ရပ်တန့်လိုက်မယ်ဆိုပြီး ပြောပါတယ်” ဟု ပြော သည်။
ရခိုင်တိုက်ပွဲရှောင်ကိုတွေ့ရစဉ်
လက်ရှိ ကျောက်တော်မြို့နယ်အတွင်းမှာ တိုက်ပွဲရှောင် စခန်းပေါင်း ၁၁ ခုရှိပြီး လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနနှင့် နိုင်ငံတကာ အဖွဲ့အစည်းများက ထောက်ပံ့ပေးကြောင်း သိရသည်။
သို့သော် ဝန်ကြီးဌာနက ရိက္ခာမပေးတော့သည်မှာ ၆ လခန့် ရှိပြီဖြစ်ကြောင်း၊ နိုင်ငံတကာ အဖွဲ့အစည်းများထံ က နေ ထောက်ပံ့မှု မရသည်မှာလည်း ၁ လခန့် ရှိပြီ ဖြစ်ကြောင်း၊ လက်ရှိမှာတော့ လွန်ခဲ့သည့် ၃ လက နိပွန်ဖောင် ဒေးရှင်းမှ လှူဒါန်းထားသော ဆန်များဖြင့် စားသောက်နေရကြောင်း တိုက်ပွဲရှောင်များက ပြောသည်။
ထို့နောက် ကျောက်တော်မြို့နယ်အတွင်းရှိ တိုက်ပွဲရှောင်များသည် စားသောက်ရေးအတွက် မျှစ်ချိုးခြင်း၊ ပန်းရံ လုပ်ကိုင်ခြင်းနှင့် ကြုံရာကျပန်း အလုပ်များ လုပ်ကိုင်ခြင်းဖြင့် ဖြေရှင်းလျက်ရှိကြောင်း သိရသည်။
မိမိတို့ တိုက်ပွဲရှောင်လာရသည်မှာ ၃ နှစ် နီးပါးရှိပြီဖြစ်ကြောင်း၊ နေအိမ်များ မီးလောင်သွားပြီ ဖြစ်၍ နေရပ်ပြန်ပို့ သည့်အခါ နေအိမ်များ ပြန်လည် ဆောက်လုပ်ပေးရန် လိုအပ်ကြောင်း၊ တိုက်ပွဲအတွင်း ကျန်ရှိနေသည့် မိုင်းများ ရှင်းလင်းပေးရန်လိုအပ်ကြောင်း ကျောက်တော်မြို့နယ်အတွင်းက တိုက်ပွဲရှောင် အမျိုးသမီး မဦးမိုးနွယ်က ပြော သည်။
AA ထုတ်ပြန်ခဲ့သည့် ရခိုင် တိုက်ပွဲရှောင်စာရင်းကိုတွေ့ရစဉ်
၎င်းက “တိုက်ပွဲ မငြိမ်သက်သေးတဲ့အတွက် ပြန်လို့မရသေးဘူး။ ရွာမှာ မပြောနဲ့ တောလမ်းမှာတောင် အခုချိန် တိုက်ပွဲတွေ ပြင်းထန်နေတာ။ တောလမ်းကရွာတွေတောင်မှ လက်နက်ကြီးတွေ မကြာခဏ ကျတယ်။ အရင်ဆုံး အဲဒီလမ်းကြောင်းထဲမှ တိုက်ပွဲတွေ မဖြစ်ဘဲနဲ့ မိုင်းရှင်းပေးဖို့ လိုအပ်တယ် အဲဒါက အဓိကပါ။ ဒုတိယ ပြောရမယ် ဆိုရင် လူတွေက အခုချိန် အိမ်တောင်မရှိတော့ဘူး။ မိုင်းရှင်းပြီးတော့ နေအိမ်တွေရော ရွာပုံစံ တည်ထားပေးသင့် တယ်။ ဘာလို့လဲဆိုတော့ ရွာက အကုန်ပျက်သွားပြီ။ ရွာတည်ထားပြီးတော့ စာသင်ကျောင်းတွေရော၊ စီးပွားရေး တက်လမ်းတက်စတွေရော အဲဒါလေးတွေ လုပ်ဖို့လိုတယ်” ဟု CNI သတင်းဌာနသို့ ပြောသည်။
လက်ရှိတွင် ရခိုင်ပြည်နယ်၌ ရက္ခိုင့်တပ်တော် (AA)နှင့် မြန်မာ့တပ်မတော်တို့ကြား ရခိုင်ပြည်နယ်မြောက်ပိုင်း မြို့နယ်များနှင့် ချင်းပြည်နယ်၊ ပလက်ဝမြို့နယ်အတွင်းမှာ တိုက်ပွဲများ ဖြစ်ပွားနေပြီး သြဂုတ်လနှင့် စက်တင်ဘာ လအတွင်းမှာ တိုက်ပွဲရှောင် လူဦးရေ ၆၁၆၇ ဦး တိုးလာကြောင်း AA က ထုတ်ပြန်ထားသည်။
ရခိုင်ပြည်နယ်နှင့် ချင်းပြည်နယ်၊ ပလက်ဝမြို့နယ်အတွင်းမှာ မြန်မာ့တပ်မတော်နှင့် AA ကြား ၂၀၁၈ ခုနှစ်၊ နိုဝင်ဘာလမှ ၂၀၂၀ ခုနှစ်၊ နိုဝင်ဘာလအထိလည်းကောင်း၊ ယခု တကျော့ပြန် ဖြစ်ပွားသည့် ၂၀၂၂ ခုနှစ်၊ ဇူလိုင်လမှ အောက်တိုဘာလအထိ စုစုပေါင်း တိုက်ပွဲရှောင် ၈၂၄၁၉ ဦးရှိပြီး တိုက်ပွဲရှောင် စခန်းပေါင်း ၁၅၀ ရှိကြောင်း AA က ထုတ်ပြန်ထားသည်။
- By CNI
- Category: နိုင်ငံရေး
- Hits: 851
CNI News
၂၀၂၂ ခုနှစ်၊ အောက်တိုဘာ ၆
လက်ရှိ အမျိုးသားညီညွတ်ရေးအစိုးရ (NUG) ဦးဆောင်နေသည့် နွေဦးတော်လှန်ရေး အောင်မြင်ရန် တိုင်းရင်းသား များ၏ အခန်းကဏ္ဍမှာ အရေးကြီးကြောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။
နိုင်ငံရေးဖြစ်စဉ် တောက်လျှောက်တွင် တိုင်းရင်းသား လက်နက်ကိုင် အဖွဲ့အစည်းများမှာ အရေးပါခဲ့ကြောင်း၊ ဗမာ ပြည်ကွန်မြူနစ်ပါတီ၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) တို့မှာလည်း တိုင်းရင်းသား ဒေသများတွင် အခြေစိုက်ခဲ့ရကြောင်း ၎င်းက ပြောသည်။
ဦးဖေသန်းက “တစ်ခုခုဖြစ်လာပြီဆိုရင်လည်း တိုင်းရင်းသားဒေသတွေကိုပဲ သွားပြီးတော့ အခြေစိုက်ရတာပဲလေ၊ အရင်တုန်းကလည်း ဒီလိုပဲပေါ့။ ၈၈ အရေးအခင်းမှာလည်းပဲ တိုင်းရင်းသားဒေသတွေမှာ ခိုလှုံပြီးတော့ ABSDF တို့ လက်နက်ကိုင် တိုက်ပွဲဝင်ခဲ့ရတာပေါ့၊ အခုလည်း PDF အများစုကလည်း တိုင်းရင်းသားဒေသတွေမှာ အခြေစိုက် တယ်၊ တိုင်းရင်းသားတွေနဲ့ တွဲပြီးတော့ လုပ်နေတာရှိတယ်၊ တခြား တိုင်းရင်းသားမရှိတဲ့ ဒေသတွေမှာတော့ သူ့နည်းသူ့ဟန်နဲ့ လုပ်နေတာပေါ့၊ ဒီတော့ ရှေ့ဆက်ပြီးတော့ PDF တွေရဲ့ နွေဦးတော်လှန်ရေး အောင်မြင်ဖို့ဆိုရင် တိုင်းရင်းသားတွေရဲ့ အခန်းကဏ္ဍက တော်တော်ကို အရေးကြီးတယ်၊ အောင်မြင်ရင်တောင်မှ ဒီတိုင်းရင်းသား ပြဿနာကို ဖြေရှင်းဖို့ကလည်း တော်တော်အရေးကြီးတယ်၊ ဒါကြောင့် ဒီနေ့အချိန်မှာတော့ တိုင်းရင်းသားတွေ ကလည်း ဒီအပေါ်မှာပေါ့နော်၊ NUG တို့ NUCC တို့ ဘာပြောလာမလဲပေါ့၊ ဘယ်လောက်အထိ တိတိကျကျ တာဝန် ခံ မလဲပေါ့၊ ပါးစပ်နဲ့ပဲ ဒီနေ့အချိန်မှာတော့ လေနဲ့ပဲ တာဝန်ယူနေတာပေါ့ဗျာ၊ ဒါပေမဲ့ နောင်တစ်ချိန်မှာ သူတို့ရော ဘယ်လို တိုင်းရင်းသားပေါ် ဘယ်လို သဘောထား လာမလဲဆိုတာလည်း အရေးကြီးတယ်” ဟု CNI သတင်းဌာန သို့ ပြောသည်။
အမျိုးသားညီညွတ်ရေးအတိုင်ပင်ခံကောင်စီ(NUCC)အဖွဲ့ဝင်များကိုတွေ့ရစဉ်
ယခင် အမျိုးသားဒီမိုကရေစီအဖွဲ့ချုပ် (NLD) ကိုလည်း တိုင်းရင်းသား အခွင့်အရေးအတွက် မိမိတို့ မျှော်မှန်းခဲ့ ကြောင်း၊ သို့သော်လည်း NLD အစိုးရဖြစ်ပြီးနောက် မျှော်မှန်းသလို ဖြစ်မလာခဲ့ကြောင်း၊ ထို့ကြောင့် တိုင်းရင်း သား အရေးကိစ္စ မဖြေရှင်းပါက ပြည်တွင်းစစ်မှာ ဆက်ဖြစ်နေနိုင်ကြောင်း ၎င်းက ပြောသည်။
လက်ရှိတွင် တိုင်းရင်းသား လက်နက်ကိုင် အဖွဲ့အစည်းများ အုပ်စု ၃ စု ကွဲနေကြောင်း၊ နိုင်ငံရေးပြဿနာကို နိုင်ငံ ရေးနည်းနှင့် ဖြေရှင်းမည့် အုပ်စု၊ ကြားနေအုပ်စု၊ လက်နက်ကိုင် တော်လှန်သည့် အုပ်စုဆိုပြီး ကွဲနေကြောင်း တိုင်းရင်းသား လက်နက်ကိုင် ခေါင်းဆောင်တစ်ဦးဖြစ်သူ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြော သည်။
ဗိုလ်မှူးကြီး ခွန်ဥက္ကာက “စာချုပ်ထဲလည်း မပါဘူး။ ပဋိပက္ခမှာလည်း မပါဘဲနဲ့ ကိုယ့်ရဲ့ အဖွဲ့တစ်ခုချင်း နယ်မြေ တစ်ခုချင်းအလိုက် အခွင့်အရေးကိုပဲ ဆုပ်ကိုင်နေတဲ့ မြောက်ပိုင်းအဖွဲ့တွေ ရှိတယ်၊ ထို့အတူပဲ တောင်ပိုင်းအဖွဲ့ တချို့ကတော့ လက်ရှိ အတိုက်အခံဖြစ်နေတဲ့ အင်အားစုတွေနဲ့ ပေါင်းပြီးတော့ တဖက်က လက်နက်ကိုင်တဲ့ နည်း နဲ့ ပြဿနာကို ဖြေရှင်းကြတဲ့ တိုင်းရင်းသားတွေလည်း ရှိတယ်၊ ဒါကြောင့် ကြားနေတဲ့ တိုင်းရင်းသားရယ်၊ နိုင်ငံ ရေး ပြဿနာကို နိုင်ငံရေးနည်းနဲ့ ရှင်းတဲ့ တိုင်းရင်းသားရယ်၊ လက်နက်ကိုင်ပြီးမှ ရမယ်ဆိုတဲ့ တိုင်းရင်းသားရယ်၊ တိုင်းရင်းသားက ၃ အုပ်စုဖြစ်နေတော့ ညီညီညွတ်ညွတ်တော့ မရှိဘူးပေါ့၊ ညီညီညွတ်ညွတ် ရှိရင်တော့ တိုင်းရင်းသား ရဲ့ အသံဩဇာက နှစ်ဖက်စလုံးက နားထောင်မှာပေါ့၊ အဲဒီလို ညီညီညွတ်ညွတ်မရှိတဲ့ အခါကြတော့ တိုင်းရင်း သားရဲ့ ဩဇာနဲ့ တိုင်းရင်းသားရဲ့ Role (အခန်းကဏ္ဍ) ကလည်း ပျောက်နေသလို ဖြစ်တာပေါ့ဗျာ၊ အဲဒါကတော့ ကျနော်တို့ တိုင်းရင်းသားဖက်က အားနည်းချက်လို့တော့ ကျနော် ဝန်ခံချင်ပါတယ်ဗျ” ဟု ပြောသည်။
ဗိုလ်ချုပ်မှူးကြီးမင်းအောင်လှိုင်နဲ့ UWSA၊ NDAA၊ SSPP ခေါင်းဆောင်များ တွေ့ဆုံစဉ်
တစ်နိုင်ငံလုံး အပစ်အခတ်ရပ်စဲရေး သဘောတူစာချုပ် (NCA) လက်မှတ်ရေးထိုးထားသော တိုင်းရင်းသား လက်နက်ကိုင် အဖွဲ့များမှ NCA အရ ပြည်သူလူထုကို အကာအကွယ်ပေးနိုင်သည့် ကိစ္စများကို လုပ်ဆောင်နေ ကြောင်း ၎င်းက ပြောသည်။
၂၀၂၁ ခုနှစ်၊ ဖေဖော်ဝါရီ ၁ ရက်တွင် တပ်မတော်က အာဏာရယူပြီးနောက်ပိုင်း ပြည်မရှိ လူငယ်များ၊ ကျောင်း သားများ၊ NLD ပါတီဝင်များ၊ တက်ကြွလှုပ်ရှားသူများသည် တိုင်းရင်းသား လက်နက်ကိုင် အဖွဲ့အစည်းများထံ ခိုလှုံကာ ပြည်သူ့ဒေသကာကွယ်ရေးတပ် (PDF) ကို ဖွဲ့စည်းပြီး မြန်မာ့တပ်မတော်ကို ခုခံတိုက်ခိုက်လျက် ရှိသည်။
- By CNI
- Category: နိုင်ငံရေး
- Hits: 714
CNI News
၂၀၂၂ ခုနှစ်၊ အောက်တိုဘာ ၅
လက်ရှိ ရခိုင်ပြည်နယ်အတွင်းရှိ တိုက်ပွဲရှောင် အရေးကိစ္စများ ဆွေးနွေးရန် ရခိုင်အမျိုးသားပါတီ (ANP) ကို ပြည်ထောင်စုရွေးကောက်ပွဲကော်မရှင် (UEC) က စာပို့ထားကြောင်း ANP ဥက္ကဋ္ဌ ဦးသာထွန်းလှက CNI သတင်းဌာနသို့ ပြောသည်။
ရခိုင်ပြည်နယ်တွင် မြန်မာ့တပ်မတော်နှင့် ရက္ခိုင့်တပ်တော် (ULA/AA) တို့ တကျော့ပြန် တိုက်ပွဲကြောင့် ဒေသခံ လူထုများ၏ ထိခိုက်နစ်နာမှုနှင့် ပတ်သက်၍ စက်တင်ဘာ ၂၉ ရက်က ANP မှ ထုတ်ပြန်ချက် တစ်စောင် ထုတ်ပြန် ခဲ့သည်။
ဦးသာထွန်းလှက “ကျနော်တို့ ပါတီကနေ စက်တင်ဘာ ၂၉ ရက်နေ့က အခု ရခိုင်ပြည်နယ်မှာ တကျော့ပြန် တိုက်ပွဲ တွေ ပြင်းထန်လာတာ ဖြစ်နေတယ်၊ မြန်မာ့တပ်မတော်နဲ့ ရက္ခိုင့်တပ်တော် AA ကြားမှာ တိုက်ပွဲပြင်းထန်မှုတွေ ဖြစ်လာတဲ့အတွက်ကြောင့် ပြည်သူတွေ အသက်ထိခိုက် ဆုံးရှုံးမှုတွေ၊ ထိခိုက်ဒဏ်ရာ ရမှုတွေ၊ နေအိမ်ပျက်စီးမှု တွေ စစ်ဘေးရှောင်ပြည်သူတွေ ဦးရေ အသစ်ထပ်တိုးလာတာနဲ့ ပတ်သက်ပြီး ကျနော်တို့ ပါတီက သဘောထား ကြေညာချက် တစ်ခုထုတ်ခဲ့တယ်၊ အဲဒါနဲ့ ပတ်သက်ပြီး ဆွေးနွေးဖို့ဆိုပြီး UEC က ခေါ်တဲ့ တွေ့ဆုံဆွေးနွေးဖို့တော့ ခေါ်တာရှိတယ်၊ အဲဒီစာက မနေ့က ကျနော်တို့ လက်ခံရရှိခဲ့တယ်၊ အဲဒါကြောင့် အောက်တိုဘာ ၁၂ ရက်နေ့မှာ ဆွေးနွေးဖို့ဆိုပြီး ကျနော်တို့ ပါတီကို စာပို့ထားတာ ရှိတယ်၊ လောလောဆယ် အဲဒီလောက်ပါပဲ” ဟု CNI သတင်း ဌာနသို့ ပြောသည်။
ရခိုင်အမျိုးသားပါတီ၏ ထုတ်ပြန်ချက်ကိုတွေ့ရစဉ်
ရခိုင်ပြည်နယ်အတွင်းရှိ ကျေးရွားများကို အကာအကွယ်ယူပြီး တိုက်ပွဲ မဖော်ဆောင်ကြရန်၊ မြန်မာ့တပ်မတော်မှ လက်နက်ကြီး ပစ်ခတ်မှုကြောင့် အရပ်သား ထိခိုက်သေဆုံးမှု၊ ဒဏ်ရာရရှိမှုတို့နှင့် လူနေအိမ်များ ပျက်စီးဆုံးရှုံးမှုတို့ အပေါ် ပြင်းပြင်းထန်ထန် ရှုတ်ချ ကန့်ကွက်ကြောင်း စက်တင်ဘာ ၂၉ ရက်က ANP ၏ ထုတ်ပြန်ချက်တွင် ဖော်ပြ ထားသည်။
ထို့အတူ လူသားချင်း စာနာထောက်ထားမှု အကူအညီ ပေးနေကြသည့် INGOs၊ NGOs နှင့် CSOs များအား ပိတ်ပင် ထားမှုကို ပြန်လည်ဖွင့်ပေးရန်၊ စစ်ပွဲဧရိယာ၊ စစ်ပွဲနှင့် မပတ်သက်သည့် နေရာများ အပါအဝင် မြို့နယ်တချို့အား ကုန်းလမ်း၊ ရေးလမ်း များကို အကန့်အသတ်မရှိ ပိတ်ဆို့ထားမှုသည် ၎င်းဒေသရှိ ဒေသခံပြည်သူ လူမျိုးပေါင်းစုံ၏ အသက်ရှင် နေထိုင်ရေးကို ခြိမ်းခြောက်ခြင်း ဖြစ်သည်ဟု ရှုမြင်ကြောင်း ANP ၏ ထုတ်ပြန်ချက်က ပြောထားသည်။
လက်ရှိတွင် မြန်မာ့တပ်မတော်နှင့် AA သည် ရခိုင်ပြည်နယ် မြောက်ပိုင်းဒေသများနှင့် ချင်းပြည်နယ်၊ ပလက်ဝမြို့ နယ် အတွင်းမှာ တိုက်ပွဲများ ပြင်းထန်စွာ ဖြစ်ပွားနေပြီး နှစ်ဖက်ထိခိုက် ကျဆုံးမှုများရှိသလို အဆိုပါ တိုက်ပွဲများ ကြောင့် တိုက်ပွဲရှောင် ၁ သောင်းခွဲကျော် ရှိလာကြောင်း သိရသည်။
- By CNI
- Category: နိုင်ငံရေး
- Hits: 769
CNI News
၂၀၂၂ ခုနှစ်၊ အောက်တိုဘာ ၅
နောင်ကျင်းပမည့် ရွေးကောက်ပွဲတွင် လွတ်လပ်၍ တရားမျှတသည့် ရွေးကောက်ပွဲ ဖြစ်စေရန် ကြိုတင်ပြင်ဆင် ဆောင်ရွက်ရမည်ဟု နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။
၂၀၂၀ ရွေးကောက်ပွဲ မဲမသမာမှု ဖြစ်ပေါ်ခဲ့သည့်အတွက် နိုင်ငံတော်တာဝန်ကို ထမ်းဆောင်ခဲ့ရကြောင်း၊ ကိုဗစ် ရောဂါ ဖြစ်ပေါ်နေသည့်အတွက် ရွေးကောက်ပွဲ ရွှေ့ဆိုင်းရန် အစိုးရခေါင်းဆောင်များကို တောင်းဆိုခဲ့သော်လည်း ရွှေ့ဆိုင်းပေးခြင်း မရှိကြောင်း ပြည်မြို့ အသေးစား၊ အငယ်စားနှင့် အလတ်စား စီးပွားရေးလုပ်ငန်းရှင်များနှင့် တွေ့ဆုံစဉ် အောက်တိုဘာ ၄ ရက်နေ့က ပြောကြားခဲ့ခြင်း ဖြစ်သည်။
၂၀၂၀ အထွေထွေရွေးကောက်ပွဲတုန်းက အမျိုးသမီးတစ်ဦး မဲထည့်နေစဉ် (GETTY IMAGES)
ဗိုလ်ချုပ်မှူးကြီး မင်းအောင်လှိုင်က “ရွေးကောက်ပွဲ မဲမသမာမှုရဲ့ နောက်ဆက်တွဲ နိုင်ငံရေးပြဿနာများကြောင့် ပြည်တွင်း စီးပွားရေး ကျဆင်းမှုနဲ့ အကြမ်းဖက်မှုတွေကို နိုင်ငံတော်အစိုးရ၊ ပြည်သူနဲ့ တပ်မတော်တို့ တက်ညီလက် ညီ ပူးပေါင်း ဆောင်ရွက်ခဲ့မှုနဲ့ ကျော်လွှားနိုင်ခဲ့ကြောင်း၊ ရွေးကောက်ပွဲမှာ မဲမသမာမှုများ ဖြစ်ပေါ်ခဲ့ခြင်းကြောင့် အခု အခြေအနေကို ရောက်ရှိခဲ့ခြင်း ဖြစ်တဲ့အတွက် နောင်ကျင်းပမယ့် ရွေးကောက်ပွဲတွေမှာ လွတ်လပ်ပြီး တရား မျှတတဲ့ ရွေးကောက်ပွဲ ဖြစ်စေရေးအတွက် လိုအပ်တာတွေ ကြိုတင်ပြင်ဆင်ဆောင်ရွက်ရမယ်”ဟု ပြောသည်။
နစက ကျင်းပမည့် ရွေးကောက်ပွဲမှာ တရားမျှတသည့် ရွေးကောက်ပွဲဖြစ်မှာ မဟုတ်ကြောင်း တရားလွှတ်တော် ရှေ့နေ ဦးကြီးမြင့်က CNI သတင်းဌာနသို့ ပြောသည်။
၎င်းက “လက်ရှိ NUG က ခေါင်းဆောင်နဲ့ နွေဦးတော်လှန်ရေးတပ်တွေနဲ့ EAO တွေက ထိထိရောက်ရောက် ဖိအား မပေးနိုင်ဘူးဆိုရင် ဒီရွေးကောက်ပွဲကို မဖြစ်ဖြစ်အောင် လုပ်သွားလိမ့်မယ်၊ သူတို့အတွက် အသက်ပဲ၊ အဲဒါ သူတို့အတွက် ထွက်ပေါက်ပဲ၊ ပြည်တွင်း ထွက်ပေါက်၊ နိုင်ငံတကာထွက်ပေါက် လိမ်လည်ဖို့ အကောင်းဆုံး၊ လိမ်ဖို့ အကောင်းဆုံး သူတို့အသက်ကို အာမအခံဆုံး၊ သူတို့ ထာဝရ အုပ်ချုပ်သွားဖို့ အာမခံချက် အကောင်းဆုံးလို့ သူတို့ ကိုယ်တိုင်က အဲဒီအတိုင်း ယုံကြည်နေတယ်၊ အဲဒါကြောင့်မို့လို့ ဘယ်သူ ဘာဖြစ်ဖြစ်၊ ယုံယုံ၊ မယုံယုံ အတင်းလုပ်လိမ့်မယ်၊ အဲဒါ ကတော့ အသေအချာပဲနော်” ဟု ပြောသည်။
မဲစာရွက်များကိုတွေ့ရစဉ် (AFP)
ရွေးကောက်ပွဲ တစ်ခုလုပ်မည်ဆိုပါက မဲဆန္ဒရှင်များ လုံခြုံရေးနှင့် လွတ်လွတ်လပ်လပ် မဲပေးနိုင်သည့် အခင်း အကျင်း ဖြစ်ရန် လုပ်ဆောင်သင့်ကြောင်း ရခိုင်အမျိုးသားပါတီ (ANP) ဥက္ကဋ္ဌ ဦးသာထွန်းလှက CNI သတင်ဌာနသို့ ပြောသည်။
၎င်းက “ဒီရွေးကောက်ပွဲ တစ်ခု ကျင်းပလို့ မဲဆန္ဒရှင်က၊ မဲဆန္ဒရှင်ပြည်သူတွေ လုံလုံခြုံခြုံနဲ့ လွတ်လွတ်လပ်လပ် မဲပေးခွင့်ရဖို့က အရေးကြီးတယ်၊ ရွေးကောက်ပွဲ တစ်ခုဆိုတာ အဲဒါကြောင့် ဒီမဲဆန္ဒရှင်တွေ လုံလုံခြုံခြုံနဲ့ လွတ် လွတ် လပ်လပ် မဲပေးနိုင်တဲ့ အခင်းအကျင်း ရှိအောင် ကြိုးစားဆောင်ရွက်ဖို့ အဓိက အရေးကြီးတယ်လို့ မြင်တယ်၊ အဲဒီလို အခင်းအကျင်းမျိုး မဖြစ်နိုင်ရင်တော့က အဲဒီရွေးကောက်ပွဲနဲ့ပတ်သက်တဲ့ အကျိုးသက်ရောက်မှုတွေက ဘယ်လို ရှိမလဲဆိုတာတော့က မေးခွန်းထုတ်စရာ ဖြစ်နေတယ်” ဟု ပြောသည်။
နစက ကျင်းပမည့် ရွေးကောက်ပွဲနှင့် ပတ်သက်၍ မိမိတို့ ပါတီအနေဖြင့် ပြင်ဆင်ထားခြင်း မရှိသေးကြောင်း ၎င်းက ပြောသည်။
လာမည့် ၂၀၂၃ ခုနှစ်တွင် ရွေးကောက်ပွဲ ပြန်လည် ကျင်းပပေးမည်ဖြစ်ပြီး အနိုင်ရရှိသည့် ပါတီကို တိုင်းပြည် အာဏာ လွှဲပေးမည်ဟု နစကဥက္ကဋ္ဌက ပြောကြားထားသည်။
- By CNI
- Category: နိုင်ငံရေး
- Hits: 992
CNI News
၂၀၂၂ ခုနှစ်၊ အောက်တိုဘာ ၄
ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP)ဥက္ကဋ္ဌအဖြစ် ဦးခင်ရီ၊ ဒုဥက္ကဋ္ဌအဖြစ် မကြာခင်ကမှ အရပ်ဖက် ကို ပြောင်းရွှေ့ပြီး ရောက်လာသည့် စစ်ရေးချုပ် ဒုဗိုလ်ချုပ်ကြီး(ငြိမ်း) မျိုးဇော်သိန်းက ဒုဥက္ကဋ္ဌ(၁) ဖြစ်လာ ကြောင်း သိရသည်။
USDP ပါတီသည် တတိယအကြိမ် ပါတီညီလာခံကို နေပြည်တော်မှာ အောက်တိုဘာ ၄ ရက်မှ ၅ ရက်အထိ ကျင်းပလျက်ရှိရာ ဥက္ကဋ္ဌ၊ ဒုဥက္ကဋ္ဌနှင့် ဗဟိုအလုပ်အမှုဆောင်ကော်မတီဝင်များကို ပြန်လည် ရွေးချယ်ခဲ့သည်။
ထို့နောက် ဦးခင်ရီက ဥက္ကဋ္ဌအဖြစ်လည်းကောင်း၊ ဒုဗိုလ်ချုပ်ကြီး(ငြိမ်း)မျိုးဇော်သိန်းက ဒုဥက္ကဋ္ဌ(၁)အဖြစ် လည်း ကောင်း၊ ဒုဗိုလ်ချုပ်ကြီး(ငြိမ်း)အောင်စိုးက အထွေထွေအတွင်းရေးမှူးအဖြစ်လည်းကောင်း အသီးသီး ရွေးချယ်ခံ ခဲ့ရကြောင်း နီးစပ်သူများထံမှ သိရသည်။
- By CNI
- Category: နိုင်ငံရေး
- Hits: 522
CNI News
၂၀၂၂ ခုနှစ်၊ အောက်တိုဘာ ၄
၂၀၂၀ အထွေထွေရွေးကောက်ပွဲတွင် မိမိအနေဖြင့် နိုင်အောင်မတိုက်နိုင်ခဲ့ဘူးဟု ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ဥက္ကဋ္ဌ (ဟောင်း)ဦးသန်းဌေးက ပြောသည်။
၂၀၂၂ ခုနှစ်၊ အောက်တိုဘာ ၄ ရက်မှ ၅ ရက်အထိ နေပြည်တော်မှာ ကျင်းပနေသည့် USDP ၏ တတိယ အကြိမ် ညီလာခံ မိန့်ခွန်းပြောစဉ် ၎င်းက အထက်ပါ အတိုင်း ပြောကြားသွားခဲ့ခြင်း ဖြစ်သည်။
ဦးသန်းဌေးက “စောစောကပြောတဲ့ တရားမဝင် ပြင်ပမီဒီယာတွေပေါ်က ထိုးနှက်တိုက်ခိုက်ဝေဖန်နေတဲ့ မဆိုင်တဲ့ အချက်တွေတော့ နံပါတ်တစ် ဒါအရှိတရားတွေပါ။ ကျနော်ဟာ ပါတီခေါင်းဆောင်အဖြစ်နဲ့ တိုက်ပွဲကို နိုင်အောင်မတိုက် နိုင်ဘူးဖြစ်တယ်။ ဒါ အမှန်တရားပါ။ ၂၀၂၀ အထွေထွေရွေးကောက်ပွဲကို ရည်ညွန်းပါတယ်။ နောက်ထက် အသစ်အသစ်သော ပါတီအတွင်းမှာ ရှိနေတဲ့ အရည်အချင်းနဲ့ပြည်စုံတယ်လို့ ပါတီဝင်များက ယူဆတဲ့ ပုဂ္ဂိုလ်များကို အလှည့်ပေးရဦးမယ်”ဟု ပြောသည်။
ထို့နောက် မိမိအနေဖြင့် USDP ပါတီဥက္ကဋ္ဌ တာဝန်ကနေ နုတ်ထွက်ကြောင်း၊ ထပ်မံ ဆန္ဒမပြုတော့ကြောင်း၊ ထိုသို့ ဆန္ဒမပြုခြင်းနှင့် ဝင်ရောက် အရွေးချယ် မခံခြင်းတို့က ပြင်ပမှာ ဝေဖန်တိုက်ခိုက်နေသည့် အခြေအနေများ အတိုင်း ကြောင့် မဟုတ်ဘူးဟု ၎င်းက ပြောသည်။
USDP ပါတီ၏ တတိယအကြိမ် ညီလာခံကျင်းပနေစဉ် (New Vision)
ဦးသန်းဌေးက “ ကျနော့်အနေနဲ့ကတော့ အဆိုမပြု ဆန္ဒမပြုပါကြောင်း လွန်ခဲ့တဲ့ ၁၀ ရက်လောက်က ကိုယ်တိုင်ပဲ အတည်ပြု ပေးခဲ့ပါကြောင်း။ ညီလာခံအစီအစဉ်အရ တင်ပြအပ်ပါတယ်။ ဒီလိုဆုံးဖြတ်ရခြင်းမှာ ဒီနေ့ ဆိုရှယ်မီဒီယာတွေ အပေါ်မှာ ဝေဖန် ထိုးနှက်နေတဲ့ကိစ္စများနဲ့မသက်ဆိုင်ကြောင်း တစ်ခါတည်း စပ်လျဉ်းပြီး တင်ပြချင်ပါတယ်။ ဥပဒေနဲ့အညီ ခိုင်မာစွာ ရပ်တည်နေတဲ့ပါတီကို ကျဆုံးသွားအောင် ဘက် ပေါင်းစုံက နည်းပေါင်းစုံနဲ့ ထိုးနှက် တိုက်ခိုက်နေတဲ့ ဒီလိုအချိန်မျိုးမှာ ကြီးလေးတဲ့ ပါတီတာဝန်တွေ ထမ်း ဆောင်ဖို့ ဆန္ဒမပြုခြင်းအတွက် ကျနော့်မှာ လုံလောက်တဲ့အကြောင်းအရင်းရှိပါတယ်”ဟု ပြောသည်။
ယခု ကျင်းပနေသည့် USDP ပါတီ၏ တတိယအကြိမ် ညီလာခံတွင် ပါတီဥက္ကဋ္ဌ အပါအဝင် ဗဟိုအလုပ်အမှု ဆောင် ကော်မတီများ ပြန်လည် ရွေးချယ် တင်မြောက်ရန် ရှိကြောင်း သိရသည်။
ထို့နောက် USDP ပါတီဥက္ကဋ္ဌ အသစ်အဖြစ် လက်ရှိ ဒုဥက္ကဋ္ဌ(၂)ဖြစ်သူ ဦးခင်ရီ ဖြစ်လာနိုင်ကြောင်း သုံးသပ် လျက်ရှိကြသည်။
ဦးသန်းဌေးသည် USDP ဥက္ကဋ္ဌအဖြစ် ၂၀၁၆ ခုနှစ်ကနေ ၂၀၂၂ ခုနှစ်၊ စက်တင်ဘာလ အထိ တာဝန်ယူခဲ့သည်။
အဆိုပါ ဥက္ကဋ္ဌတာဝန်ယူစဉ် ကာလအတွင်း ၂၀၂၀ အထွေထွေရွေးကောက်ပွဲတွင် တစ်နိုင်ငံလုံး အတိုင်းအတာဖြင့် အစိုးရဖွဲ့စည်းနိုင်သည့် အရေအတွက်ကို USDP ပါတီက မနိုင်ခဲ့ပေ။ ဦးသိန်းစိန် ဥက္ကဋ္ဌအဖြစ် တာဝန်ယူခဲ့စဉ် ၂၀၁၀ အထွေထွေရွေးကောက်ပွဲတုန်းကသာ ရွေးကောက်ပွဲအနိုင်ရပြီး အစိုးရဖွဲ့နိုင်ခဲ့သည်။
- By CNI
- Category: နိုင်ငံရေး
- Hits: 984
CNI News
၂၀၂၂ ခုနှစ်၊ အောက်တိုဘာ ၄
စစ်ပွဲ ကြာရှည်လာလေလေ အောက်ခြေပြည်သူလူထုက ပိုပြီး အထိနာလေလေဖြစ်တတ်သည်ဟု အမျိုးသားညီ ညွတ်ရေးအစိုးရ(NUG)၏ ယာယီသမ္မတ ဒူဝါလရှီးလက ပြောသည်။
၂၀၂၂ ခုနှစ်၊ အောက်တိုဘာ ၄ ရက်နေ့က ကျင်းပသည့် NUG ၏ ၇၀ ကြိမ်မြောက် အစည်းအဝေးမှာ ၎င်းက အထက်ပါ အတိုင်းပြောခဲ့ခြင်း ဖြစ်သည်။
ဒူဝါလရှီးလက “စစ်ပွဲ ကြာရှည်လာလေလေ အောက်ခြေပြည်သူလူထုက ပိုပြီး အထိနာလေလေ ဖြစ်တတ်ပါ သည်။ ထို့ကြောင့် ခုခံတော်လှန်စစ်၏ ပွဲသိမ်းအောင်ပွဲကို အလျင်အမြန် ဆင်နွှဲကြရန် တုံ့ဆိုင်းနေလို့ မရပါ။ ဒါကို နိုင်ငံတကာအသိုင်းအဝိုင်းတွင်လည်း သိစေအပ်ပါသည်။ သက်ဆိုင်ရာ လူမျိုးစုမဟာမိတ်အဖွဲ့အစည်း များအားလုံးလည်း သိမှတ်စေရန် လိုပါသည်။ လက်နက်ကိုင် တော်လှန်ရေးသည် အကဲဆတ်သောကြောင့် အချိန်ကာလတိုအတွင်းမှာ တဆစ်ချိုး အပြောင်းအလဲများ ရုတ်တရက် ချိုးကွေ့ပြောင်းလဲတတ်သည်ကိုလည်း သတိချပ်ရန် လိုပါသည်။ စစ်ကောင်စီအား တော်လှန်ဖယ်ရှားနိုင်ရန် အချိန်ကာလသည် အထူးအရေးကြီးပြီး တော်လှန်ရေးအင်အားစုများနှင့် လက်တွဲချိတ်ဆက်မှုများ တိုးမြှင့်နိုင်ရန် နှစ်ပေါင်းများစွာ အာဏာရှင်များ၏ သွေးထိုး အုပ်ချုပ်မှုများ၊ လူမျိုးကြီးဝါဒ လွှမ်းမိုးမှုများကြောင့် ပျက်သုန်းခဲ့ရသည့် ယုံကြည်မှုများ ဆက်လက် တည်ဆောက်ပြီး ပိုမိုလက်တွဲခိုင်မာလာနိုင်ရန် အားလုံးဝန်းဝိုင်း ကြိုးစားကြ”ဟု ပြောသည်။
NUG ၏ PDF စုဖွဲ့မှု ထုတ်ပြန်ချက်ကိုတွေ့ရစဉ်
NUG သည် ၂၀၂၁ ခုနှစ်၊ စက်တင်ဘာ ၇ ရက်နေ့က တစ်နိုင်ငံလုံးအတိုင်းအတာဖြင့် လက်နက်ကိုင် ခုခံ တော်လှန်စစ် (D Day)စတင်ကြောင်း ကြေညာခဲ့သည်မှာ ယခု တစ်နှစ်ကျော်ကြာရှိလာပြီ ဖြစ်သည်။
အဆိုပါ တစ်နှစ်ကျော်အတွင်းမှာ NUG သည် ပြည်သူ့ကာကွယ်ရေးတပ်ဖွဲ့(PD) တပ်ရင်းပေါင်း ၃၀၀ ကျော် ဖွဲ့စည်းနိုင်ခဲ့ကြောင်း၊ မြို့နယ်ပေါင်း ၃၃၀ အနက် မြို့နယ်ပေါင်း ၂၅၀ ကျော်မှာ PDF များကို ဖွဲ့စည်းလည်ပတ် နေကြောင်း ထုတ်ပြန်ထားသည်။
ထို့နောက် NUG ၏ ယာယီသမ္မတ ဒူဝါလရှီးလက မြန်မာ့နွေဦးတော်လှန်ရေး ၂ နှစ် မပြည့်သေးခင် ကာလ အတွင်းမှာ NUG အနေဖြင့် စစ်ရေးမဟာမိတ် စုဖွဲ့မှု အားကောင်းလာကြောင်း ပြောသည်။
NUG ၏ ၇၀ ကြိမ်မြောက် အစည်းအဝေးကို တွေ့ရစဉ်
၎င်းက “တော်လှန်သော လူမျိုးစုလက်နက်ကိုင်အ ဖွဲ့အစည်းအားလုံးမှာ မဟာမိတ်စုဖွဲ့မှုအတွင်း၊ စစ်အာဏာ ရှင် ဆန့်ကျင်မှုအတွက် ထက်ထက်သန်သန် ပါဝင်လာခြင်းအား အမျိုးသားညီညွတ်ရေးအစိုးရကိုယ်စား လှိုက်လှဲစွာ ကျေးဇူးတင်ကြောင်း ပြောကြားလိုပါသည်။ နွေဦးတော်လှန်ရေး လှုပ်ရှားမှုအတွင်းတွင် နိုင်ငံရေး ပဋိညာဉ်တစ်ခု ကျစ်ကျစ်လစ်လစ် ပေါ်ထွက်လာရေးကိုလည်း အာရုံစိုက်ကြဖို့လိုပါသည်။ အုပ်စုအကျိုးစီးပွား ထက် လူထုအကျိုးစီးပွားအပေါ် အခြေခံသည့် နိုင်ငံရေးပဋိညာဉ်နှင့် နိုင်ငံရေး မူဝါဒများ ဖြစ်ဖို့လည်း လိုပါသည် “ဟု ပြောသည်။
လက်ရှိတွင် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ကရင်ပြည်နယ်၊ ကယားပြည်နယ်၊ ချင်းပြည်နယ် တို့တွင် မြန်မာ့တပ်မတော်နှင့် PDF၊ ဒေသကာကွယ်ရေးတပ်(LDF)၊ တိုင်းရင်းသား လက်နက်ကိုင်များကြား တိုက်ပွဲများ ဖြစ်ပွားနေပြီး နေရပ်စွန့်ခွာ ထွက်ပြေး တိမ်းရှောင်နေရသူ သိန်းနှင့်ချီရှိသလို နေအိမ်ပေါင်း သောင်း နှင့်ချီ မီးလောင် ပျက်စီးလျက်ရှိသည်။
- By CNI
- Category: နိုင်ငံရေး
- Hits: 1833
CNI News
၂၀၂၂ ခုနှစ်၊ အောက်တိုဘာ ၄
ကချင်ပြည်နယ်၊ တနိုင်းခရိုင်၊ ရှင်ဗွေယန်မြို့နယ် တရုံကျေးရွာရှိ နာဂလူငယ် နှစ်ဦးကို ကချင်လွတ်လပ်ရေး တပ်မတော် (KIA) မှ တပ်သားသစ် စုဆောင်းသွားကြောင်း ရှင်ဗွေယန်ဒေသခံများနှင့် နာဂအဖွဲ့အစည်းများက CNI သတင်းဌာနသို့ ပြောသည်။
KIA အနေဖြင့် နာဂလူငယ်များကို ယခင်ကတည်းက စုဆောင်းမှုရှိကြောင်း၊ ယခု လူငယ်နှစ်ဦးကို နေအိမ်သို့ တက်ရောက် ခေါ်ဆောင်သွားခြင်း ဖြစ်ကြောင်း လုံခြုံရေးအရ အမည်မလိုသူ ရှင်ဗွေယန်ဒေသခံ တစ်ဦးက ပြောသည်။
၎င်းက “လွန်ခဲ့တဲ့ စနေညကြတော့ တစ်ယောက်ပေါ့၊ မနေ့က ညကြတော့ နောက်တစ်ယောက်ကို ဆွဲတာပေါ့လေ၊ ဆွဲတဲ့အခါကြတော့ အဲဒီတစ်ယောက်က ထွက်ပြေးတော့ သူ့အစ်ကိုကို ပြန်ခေါ်သွားတယ်၊ ဘယ်လိုပြောမလဲ စစ်သား စုဆောင်းတာပါပဲ၊ ဘယ်လိုကြောင့်လို့တော့ မဟုတ်ဘူး။ ကျနော်တို့ ဟူးကောင်းဒေသမှာကြတော့ အဓိက လှုပ်ရှားတာက KIA ပေါ့လေ၊ KIA က လှုပ်ရှားတဲ့ အခါကြတော့ သူတို့တွေ လူအင်အား ဖြည့်တာပါပဲ၊ ဘာရယ်လို့ တော့ မဟုတ်ပါဘူး။ တပ်သားသစ် စုဆောင်းတာပါပဲ” ဟု CNI သတင်းဌာနသို့ ပြောသည်။
ရှင်ဗွေယန်မြို့၊ တရုံကျေးရွာတွင် အိမ်ခြေ ၆၀၀ ဝန်းကျင်ရှိပြီး ကချင်၊ နာဂနှင့် အခြားလူမျိုးစုများ စုပေါင်း နေထိုင် ကြကြောင်း၊ နာဂနည်းတူ အခြားလူမျိုးစုများလည်း တပ်သားသစ် စုဆောင်းခံရကြောင်း အထက်ပါ ရှင်ဗွေယန် ဒေသခံက ပြောသည်။
ရှင်ဗွေယန်မြို့နယ် အုပ်ချုပ်ရေးမှူးရုံးကိုတွေ့ရစဉ်
အဆိုပါ နာဂလူငယ်နှစ်ဦးကို တပ်သားသစ် စုဆောင်းသည့် ကိစ္စနှင့် ပတ်သက်၍ KIA မှ ပြန်ကြားရေးတာဝန်ခံ ဗိုလ်မှူးကြီး နော်ဘူထံ CNI သတင်းဌာနမှ ဖုန်းဆက်သွယ်ခဲ့သော်လည်း ဖုန်းလက်ခံ ဖြေကြားခြင်း မရှိပေ။
မိမိ၏ သဘောဆန္ဒအရ ဝင်ရောက်ပါက မတားဆီးနိုင်ကြောင်း၊ သို့သော်လည်း အိမ်ပေါ်တက်ကာ တပ်သားသစ် စုဆောင်းခြင်းမှာ အဆင်မပြေကြောင်း ရှင်ဗွေယန် ဒေသခံတစ်ဦးဖြစ်သူ ကိုကျော်လင်း(အမည်လွှဲ)က CNI သတင်းဌာနသို့ ပြောသည်။
၎င်းက “ကျနော်တို့ရဲ့ နာဂလူငယ်မောင်မယ်တွေကတော့ တပ်သားစုဆောင်းရေးဆိုတဲ့ ဟာကတော့ အစောက ကျနော်ပြောသလို ဒါကတော့ ကျနော်တို့ အနေနဲ့ကြတော့ မစုဆောင်းပေးရင် ကောင်းတယ်၊ မစုဆောင်းရင် ကောင်းတယ်ဆိုတဲ့ဟာက ခုနပြောသလို ဝင်ချင်လို့ ဝင်သွားတယ်ဆိုရင်ကတော့ ကျနော်တို့ကတော့ ဘယ်လိုမှ တားဆီးလို့ မရဘူး။ သို့သော်ငြားလည်းပဲ ဒီအိမ်တိုင်ရာရောက်ကြီး လာခေါ်တဲ့ အပိုင်းဆိုရင် ဒါကတော့ ကျနော် တစ်ဦး တစ်ယောက်အနေနဲ့တော့ သိပ်တော့ အဆင်မပြေနိုင်တဲ့ အခြေအနေရှိတာပေါ့နော်၊ တချို့တွေဆိုတာတော့ မိဘရဲ့ အခြေအနေကြောင့်လည်း အများကြီးရှိတယ်ပေါ့၊ ဒီဟာလေးကိုတော့ ကျနော်ပြောချင်တယ်၊ ဒါကတော့ ကျနော်ရဲ့ တစ်ဦးတစ်ယောက်အနေနဲ့ပေါ့ ပြောတာပေါ့” ဟု ပြောသည်။
နာဂလူမျိုးများကိုတွေ့ရစဉ်
KIA အနေဖြင့် တပ်သားသစ်စုဆောင်းသွားသည့် လူမျိုးခြားများကို ကချင်နာမည် ပြောင်းပေးလေ့ရှိကြောင်း လုံခြုံရေးအရ အမည်မဖော်လိုသူ အထက်ပါ ရှင်ဗွေယန် ဒေသခံတစ်ဦးက ပြောသည်။
၎င်းက “လက်နက်ကိုင် လုပ်တယ်ဆိုရင်တောင်မှ ကျနော်အနေနဲ့ ဖြစ်စေချင်တာက ကိုယ့်အမျိုးထဲမှာ လုပ်တာ တော့ ပိုပြီးတော့ တိကျတယ်ပေါ့၊ ဘာဖြစ်လို့လဲဆိုတော့ ညီအစ်ကို ကချင်တွေက သူတို့ထဲရောက်သွားရင် နာမည် တွေ ပြောင်းပေးလိုက်တာတို့၊ အဲဒီလိုမျိုးတွေ လုပ်တာရော တကယ်လို့ နောက်နောင် သမိုင်းဘာညာ လိုက်လာရင် တောင်မှ မိဘက ပေးလိုက်တဲ့ နာမည်က ပျောက်သွားတယ်၊ ရှာမတွေ့တော့ဘူးပေါ့၊ လူပျောက်တာဆိုတာထက် နာမည်တွေ ပြောင်းပေးလိုက်တာတွေ ရှိတယ်ပေါ့လေ၊ အဲဒီခါကြတော့ ရှင်းရှင်းပြောရရင် သူတို့ နိုင်ငံရေးလုပ်တာ မဟုတ်ဘဲနဲ့ လူမျိုးရေးလုပ်တယ်လို့တောင် ပြောလို့ ရတာပေါ့လေ၊ အဲဒီလိုမျိုး ကချင်နာမည်တွေ ပြောင်းပေးလိုက် တာတွေ ရှိတယ်ပေါ့။ အဲဒါကြောင့်မို့ သူတို့နဲ့ ပူးပေါင်းသွားခြင်းဟာ ကျနော်တို့ အတွက်တော့ ဘာမှ ထူးထူးထွေ ထွေ အကျိုးရခြင်း မရှိဘူးပေါ့” ဟု ပြောသည်။
ကချင်ပြည်နယ်၊ တနိုင်းမြို့နယ် ဟူးကောင်းချိုင့်ဝှမ်းတွင် ကချင်လွတ်လပ်ရေး တပ်မတော် (KIA) တပ်မဟာ (၂) လှုပ်ရှားလျက်ရှိကြောင်း သိရသည်။
နာဂလူမျိုးများတွင် နာဂအမျိုးသားဆိုရှယ်လစ်ကောင်စီ(NSCN)ဆိုသော လက်နက်ကိုင် အဖွဲ့အစည်းရှိသလို လက်ရှိ နွေဦးတော်လှန်ရေးအရ ပေါ်ပေါက်လာသော နာဂ PDF လည်းရှိကြောင်း သိရသည်။