CNI International News
ဂျေရုဆလင်၊ ဇူလိုင် ၇
မြောက်ပိုင်း အိမ်နီးချင်းနိုင်ငံဖြစ်သည့် လက်ဘနွန်ဘက်က ပစ်လိုက်သော မော်တာကျည်သည် ရန်သူ နှစ်နိုင်ငံကြားက နယ်စပ်ဧရိယာထဲသို့ ကျရောက် ပေါက်ကွဲခဲ့ပြီးနောက် လက်ဘနွန်တောင်ပိုင်းကို အစ္စရေးစစ်တပ် တိုက်ခိုက်မှုများ လုပ်နေသည်။
နှစ်ပေါင်းများစွာအတွင်း အဆိုးရွားဆုံး နယ်စပ်ဖြတ်ကျော် ပစ်ခတ်မှုများကို တွေ့ခဲ့ကြရပြီးနောက် သုံးလအကြာမှာ ယခု စစ်ရေးတိုက်ခိုက်မှု ဖြစ်ပွားလာခဲ့ခြင်း ဖြစ်သည်။
အစ္စရေးက သိမ်းပိုက်ထားသည့် အနောက်ဘက် ကမ်းမြှောင်ဒေသထဲက ပါလက်စတိုင်း စစ်သွေးကြွ အမာခံ စခန်းတစ်ခုဖြစ်သော ဂျနင်း(Jenin)ဒုက္ခသည်စခန်းကို ပစ်မှတ်ထား၍ အကြီးမားဆုံး စစ်ဆင်ရေးများ အစ္စရေးစစ်တပ်က လုပ်ဆောင်လာခဲ့သည်။
ထို့နောက် အာရပ်နိုင်ငံများနှင့် ဆက်ဆံရေး တင်းမာလာသည့် အနေအထားမှာ ယခုတိုက်ခိုက်မှု ပေါ်ထွက်လာခဲ့ခြင်း ဖြစ်သည်။
အစ္စရေးစစ်တပ်၏ သတင်းထုတ်ပြန်ချက်တွင် လက်ဘနွန်ပိုင်နက်ထဲက ပစ်ခတ်ခဲ့သည့် မော်တာကျည် သည် အစ္စရေးပိုင်နက်ထဲမှ နယ်စပ်အနီးမှာ ကျရောက်ပေါက်ကွဲခဲ့သည်။
လက်ဘနွန်စစ်သား ၂ ဦးကိုတွေ့ရစဉ်
အစ္စရေးစစ်တပ် ပြောခွင့်ရပုဂ္ဂိုလ်ကတော့ ပစ်လိုက်သည့်အရာသည် မော်တာကျည်ဖြစ်ပြီး နယ်စပ်မြို့ ဂါဂျာအနီးမှာ ကျရောက်ပေါက်ကွဲ သွားသည်ဟု ပြောသည်။
“တိုက်ခိုက်မှုကို လက်တုံ့ပြန်တဲ့အနေနဲ့ လက်ဘနွန် ပိုင်နက်ထဲက မော်တာကျည် ပစ်ခတ်ခဲ့ရာ နယ်မြေ ကို တိုက်ခိုက်နေတယ်”ဟု ၎င်းက ပြောသည်။
အစ္စရေးက အမြောက်နှင့် ၁၅ ကြိမ် ကျော် ပစ်ခတ်ခဲ့ရာမှာ ခဖာချူဘာနှင့် ဟော်တာက ရပ်ကွက်များ အနားကို ထိမှန်ခဲ့ကြောင်း လက်ဘနွန် နိုင်ငံပိုင်သတင်းဌာန National News Agency မှ ဖော်ပြခဲ့သည်။
နှစ်နိုင်ငံဟာ ငြိမ်းချမ်းရေး စာချုပ်နှင့် စစ်ပွဲကို ရပ်ထားခြင်းမဟုတ်ကြောင်း၊ သဘောတရားအရ စစ်ဖြစ် နေသည့် အနေအထားမှာပဲ ရှိနေသေးကြောင်း၊ နှစ်နိုင်ငံခြားနယ်စပ်ကို ကုလငြိမ်းချမ်းရေး ထိန်းသိမ်းရေး တပ်ဖွဲ့များက စောင့်ကြပ်ကင်းလှည့် နေရသည်။
ဟစ်ဘိုလာအဖွဲ့ကိုတွေ့ရစဉ်
ဇူလိုင် ၆ ရက်နေ့ အစောပိုင်းကလည်း လက်ဘနွန်၏ ဟစ်ဘိုလာ(Hezbollah) ပြောက်ကျားတပ်များက နှစ်နိုင်ငံ နယ်စပ်ကို ခွထားသည့် ဂါဂျာမြို့တစ်ဝိုက်မှာ အုတ်တံတိုင်းကာနေသော အစ္စရေးကို ပြစ်တင် ရှုတ်ချ ခဲ့ပါသည်။
လူ ၃၀၀၀ နီးပါး၏ ဌာနေဖြစ်သည့် ဂါဂျာ(Ghajar)မြို့ကို အစ္စရေးက သူ့ကျူးကျော် သိမ်းပိုက်မှု ခိုင်မာအောင် လုပ်နေခြင်းအား အရေးယူတားဆီးဖို့ အီရန်က ကျောထောက် နောက်ခံပေးနေသော ဟစ်ဘိုလာက လက်ဘနွန်အစိုးရကို တိုက်တွန်းနေသည်။
Source: ဘန်ကောက်ပို့စ်
