CNI Sport News
၂၀၂၆ ခုနှစ်၊ ဇူလိုင် ၃
ဥရောပဘောလုံးအဖွဲ့ချုပ်(UEFA)က သူတို့ကျင်းပတဲ့ပြိုင်ပွဲတွေမှာ ပြိုင်ဘက်ကစားသမားတွေနဲ့ ထိပ်တိုက် တွေ့ဆုံချိန် ပါးစပ်ကို တစ်ခုခုနဲ့ဖုံးအုပ်ပြီး စကားပြောတဲ့ ကစားသမားတွေကို ထုတ်ပယ်မှာမဟုတ်ဘူးလို့ အတည်ပြုခဲ့ပါတယ်။
UEFA ဟာ လာမယ့်ရာသီ ချန်ပီယံလိဂ်၊ယူရိုပါလိဂ်နဲ့ ကွန်းဖရန့်လိဂ်ပြိုင်ပွဲတွေမှာ ဒီ ဥပဒေကို အသုံးပြုဖို့ ရွေးချယ် မှုကို ငြင်းဆန်ခဲ့တာပါ။
ဒါပေမယ့် ဒိုင်လူကြီးတွေဟာ ဒီလိုမျိုးပြုလုပ်ပြီး ပြောဆိုတဲ့အပေါ် အားကစားသမား မဆန်တဲ့ အပြုအမူအဖြစ် မြင်တွေ့နိုင်ပြီး အဝါကတ်ပြသကာ အပြစ်ပေးနိုင်တယ်လို့ UEFA က ထုတ်ပြန်ခဲ့တဲ့ ကြေညာချက်ထဲမှာ ဖော်ပြထားပါတယ်။
ဖီဖာအကြီးအကဲအင်ဖန်တီနိုဟာ ကစားသမားတစ်ဦးက ပြိုင်ဘက်ကစားသမားတစ်ဦးနဲ့ ထိပ်တိုက်တွေ့ဆုံချိန်မှာ ပါးစပ်ကို တစ်ခုခုနဲ့ဖုံးအုပ်ပြီး စကားပြောရင် အနီကတ်ပြသနိုင်တဲ့ စည်းမျဉ်းအသစ်ကို ကမ္ဘာ့ဖလားပြိုင်ပွဲမှာ ထည့်သွင်းခဲ့တာပါ။
ဒီစည်းမျဉ်းအသစ်မှာ ပါရာဂွေးတောင်ပံကစားသမားအယ်လ်မီရွန်နဲ့ အီကွေဒေါ နောက်ခံလူ ဟင်ကာပီတို့ဟာ တိုက်ရိုက်အနီကတ်နဲ့ ထုတ်ပယ်ခံခဲ့ရပါတယ်။
ပြီးခဲ့တဲ့ရာသီက ဘင်ဖီကာနဲ့ ရီးရယ်လ်အသင်းရဲ့ချန်ပီယံလိဂ်ပွဲစဉ်မှာ ဘင်ဖီကာအသင်းက ပရက်စ်တီယန်နီဟာ ရီးရယ်လ်အသင်းက ဗီနီစီးယက်စ်ကို သူ့ရဲ့အင်္ကျီကိုမြှောက်ပြီး စကားပြောခဲ့တဲ့ဖြစ်ရပ်အပြီးမှာ ဒီစည်းမျဉ်း အသစ်ကို ဖီဖာက ထည့်သွင်းခဲ့တာပါ။
ဒီဖြစ်ရပ်ဟာ UEFA ရဲ့ထိပ်တန်းပြိုင်ပွဲမှာဖြစ်ခဲ့ပေမယ့် သူတို့ကတော့ ဒီ စည်းမျဉ်းအသစ်ကို အသုံးမပြုဖို့ ဆုံးဖြတ်ခဲ့ပါတယ်။
ဒါ့အပြင် UEFA ဟာ ဒိုင်လူကြီးရဲ့ဆုံးဖြတ်ချက်ကို ဆန့်ကျင်တဲ့အနေနဲ့ ကွင်းထဲကနေ ထွက်ခွာတဲ့ ကစားသမားကို အနီကတ်ပြသပြီး ထုတ်ပယ်မှာမဟုတ်ဘူးလို့ သိရပါတယ်။
ဒါပေမယ့် UEFA ဟာ ကမ္ဘာ့ဖလားပြိုင်ပွဲမှာ အသုံးပြု နေတဲ့ မှားယွင်းစွာပေးမိတဲ့ ထောင့်ကန်ဘောတွေကို VAR နဲ့ ပြန်စစ်ဆေးမယ့် စည်းမျဉ်းအသစ်ကို အသုံးပြုသွားမှာ ဖြစ်ပါတယ်။
Source: ESPN
