- By CNI
- Category: နိုင်ငံရေး
- Hits: 384
CNI International News
ဘန်ဂါလူရူ၊ ဖေဖော်ဝါရီ ၂၄
G-20 ဘဏ္ဍာရေးအကြီးအကဲများကို လက်ခံတွေ့ဆုံမည့် အိန္ဒိယအစိုးရသည် ၎င်းတို့နှင့်ပူးတွဲထုတ်ပြန်မည့် ကြေညာချက်များ၌ ရုရှား၏ ယူကရိန်းအပေါ် တိုက်ခိုက်မှုအား ရည်ညွှန်းရာတွင် “စစ်ပွဲ” ဆိုသည့်စကားလုံး အသုံးအနှုန်းကို အသုံးပြုခြင်းမှ ရှောင်ကြဉ်ရန် ကြိုးပမ်းနေသည်ဟု ထိုကိစ္စနှင့်နီးစပ်သူတစ်ဦးက ပြောကြောင်း ဘန်ကောက်ပို့စ် သတင်းတွင် ဖော်ပြထားသည်။
ယင်းက ပြီးခဲ့သည့် နိုဝင်ဘာလတွင် အင်ဒိုနီးရှားမှ ဥက္ကဋ္ဌအဖြစ် ဆောင်ရွက်စဉ် ဘာလီတွင် လုပ်ဆောင်ခဲ့သော အစည်းအဝေးအတွင်း ခေါင်းဆောင်များ ရရှိခဲ့သော ဘုံသဘောတူညီချက်များနှင့် ကွဲလွဲနေသည်။
အိန္ဒိယမှ တာဝန်ရှိသူများသည် “စစ်ပွဲ”အစား ပဋိပက္ခဟူသော စကားလုံး အသုံးအနှုန်းကို ပို၍ သုံးစွဲလိုနေသည် ဟုလည်း ပြောသည်။
နိုင်ငံတစ်ချို့၏ ရုရှားကို နောက်ထပ် အရေးယူပိတ်ဆို့မှုများ ချမှတ်ရေး အစီအစဉ်များက အစည်းအဝေး၏ အဓိက အကြောင်းအရာများအပေါ် ဖုံးလွှမ်းသွားမည်ကို အိန္ဒိယအရာရှိများက စိုးရိမ်နေကြောင်း ထိုကိစ္စနှင့် နီးစပ်သူက ပြောသည်။
ယခုကိစ္စသည် တရားဝင် ထုတ်ပြန်ချက် မဟုတ်ခြင်းကြောင့် ၎င်းကို မည်သူမည်ဝါဖြစ်ကြောင်း မဖော်ပြရန်လည်း ယင်းက တောင်းဆိုသည်။
G-20 ဘဏ္ဍာရေးအကြီးအကဲများကိုတွေ့ရစဉ်
ယခုကိစ္စနှင့်ပတ်သက်၍ အိန္ဒိယဘဏ္ဍာရေးဌာနမှ ပြောခွင့်ရပုဂ္ဂိုလ် တစ်ဦးကို ဆက်သွယ်ခဲ့သော်လည်း မှတ်ချက် ပေးရန် ငြင်းဆန်သည်။
အိန္ဒိယ G-20 အစည်းအဝေး၏ ကန့်သတ်ချက်သည် နိုဝင်ဘာလ G-20 အစည်းအဝေးတွင် အသုံးပြုခဲ့သော စကားလုံး အသုံးအနှုန်းများနှင့် ယှဉ်လျှင် နောက်ပြန်ဆွဲခြင်း ဖြစ်သည်။
ဘာလီ အစည်းအဝေးကို အမေရိကန်နှင့် တရုတ်သမ္မတတို့ တက်ရောက်ခဲ့ပြီး ထုတ်ပြန်သော ကြေညာချက်တွင် G-20 ခေါင်းဆောင်များက ယူကရိန်းအရေးနှင့် ပိတ်ဆို့အရေးယူမှုများ ချမှတ်ခြင်းတွင် ကွဲပြားသော သဘောထား၊ အမြင်များရှိသော်လည်း အဖွဲ့ဝင်အများစုက ယူကရိန်းစစ်ပွဲကို ပြင်းပြင်းထန်ထန် ကန့်ကွက်ရှုတ်ချသည်ဟု ရေးသားခဲ့သည်။
ဘန်ကောက်မြို့တွင် ကျင်းပခဲ့သော အာရှ-ပစိဖိတ် စီးပွားရေး ပူးပေါင်းဆောင်ရွက်မှု (Apec) ဖိုရမ်မှ ထုတ်ပြန်ချက် တွင်လည်း စစ်ပွဲဆိုသော စကားလုံးကို ကျယ်ကျယ်ပြန့်ပြန့် သုံးနှုန်းခဲ့သည်။
ရုရှား၏ ယူကရိန်း စစ်ပွဲအပေါ် စကားလုံး အသုံးအနှုန်းနှင့် ပတ်သက်သည့် အငြင်းပွားမှုများ ပြန်လည် ပေါ်ပေါက် လာခြင်းက အစည်းအဝေးနှင့် ပတ်သက်သည့် အိန္ဒိယ၏တခြားသော ရည်ရွယ်ချက်များကိုလည်း မှေးမှိန်စေသည့် အလားအလာ ရှိသည်။
ပူတင်နဲ့ မိုဒီကိုတွေ့ရစဉ်
အိန္ဒိယ၏ G-20 ဥက္ကဋ္ဌ သက်တမ်းတစ်လျှောက် ပုံရိပ်အမြင့်ဆုံး အခမ်းအနားကို သောကြာနှင့် စနေနေ့တို့တွင် နှစ်ရက်ကြာ ကျင်းပသွားမည်ဖြစ်ပြီး ယင်းတို့တွင် ဆင်းရဲသော နိုင်ငံများအပေါ် အကြွေးများ လျော်ပစ်ရေး၊ ကမ္ဘာလုံးဆိုင်ရာ စီးပွားရေးနှင့် မူဝဒါရေးရာ ရှုမြင်သုံးသပ်မှုတို့အပြင် နိုင်ငံတကာ အခွန်ရေးရာ အစီအစဉ်များကို ဆွေးနွေးသွားမည်ဖြစ်သည်။
တရုတ်၏ အင်အားကြီးမားလာမှုကို စောင့်ကြည့်ရန်အတွက် အိန္ဒိယသည် အမေရိကန်နှင့် ယင်း၏ မဟာမိတ်များ အတွက် ပထဝီနိုင်ငံရေးအရ အရေးပါမှု မြင့်တက်လာကာ ဂျပန်၊ သြစတြေးလျတို့ ပါဝင်သော Quad တွင်လည်း အိန္ဒိယအပေါ် အာရုံစိုက်မှု မြင့်မားလာသည်။
တစ်ဖက်တွင်လည်း အိန္ဒိယအစိုးရသည် ဈေးပေါသော စွမ်းအင်နှင့်လက်နက်များ ရရှိရန် ရုရှားအစိုးရနှင့် အနီးကပ် ဆက်ဆံရေးကို ထိန်းသိမ်းရေး ဆက်လက် ဆောင်ရွက်လျက်ရှိသည်။
Source: ဘန်ကောက်ပို့စ်
- By CNI
- Category: နိုင်ငံရေး
- Hits: 346
CNI International News
မော်စကို၊ ဖေဖော်ဝါရီ ၂၄
ကြန့်ကြာနေသော Sarmat တိုက်ချင်းပစ် ပဲ့ထိန်းဒုံးကျည်များ တပ်ဆင်နေရာ ချထားရေးကို ယခုနှစ်အတွင်း လုပ်ဆောင်သွားမည်ဟု ရုရှားသမ္မတ ဗလာဒီမာပူတင်က ပြောကြောင်း အယ်ဂျာဇီးယား သတင်းတွင် ဖော်ပြထား သည်။
အိမ်နီးချင်း ယူကရိန်းကို ကျူးကျော်စစ် ဆင်နွှဲပြီး တစ်နှင့်ပြည့်ချိန်တွင် ထိုသို့ ပြောခဲ့ခြင်း ဖြစ်သည်။
အရည်လောင်စာသုံး RC-28 Sarmat ဒုံးကျည်များကို အနောက်အုပ်စု လေ့လာသူများက Satan 2 ဟု ခေါ်ပြီး ယင်းကို ပူတင်က ၂၀၁၈ ခုနှစ်တွင် ပထမဆုံး ထုတ်ဖော်ကြေညာခဲ့သည်။
ပြီးခဲ့သည့်နှစ်တွင် တပ်ဆင် တပ်ဖြန့်ရန် ရည်ရွယ်ထားခြင်း ဖြစ်သည်။ ယခုသီတင်းပတ် အစောပိုင်း ဘိုင်ဒန်၏ ယူကရိန်း ခရီးစဉ်မတိုင်ခင် ရုရှားဘက်က Sarmat ဒုံးကျည်စမ်းသပ်မှုတစ်ခု လုပ်ဆောင်ခဲ့သော်လည်း မအောင် မြင်ခဲ့ဟု အမေရိကန်ဘက်က ယူဆထားကြောင်း CNN သတင်းတွင် ဖော်ပြသည်။
Sarmat ဒုံးကျည်ကိုတွေ့ရစဉ် (GETTY IMAGES)
သို့သော် ရုရှားကာကွယ်ရေးဌာနက ထိုသတင်းအပေါ် တစ်စုံတစ်ရာ မှတ်ချက်ပေးခဲ့ခြင်း မရှိပေ။ ၃၅ မီတာ ရှည်လျားသော Sarmat ဒုံးကျည်များကြောင့် ရုရှား၏ ရန်ဘက်များ နှစ်ခါပြန် စဉ်းစားရမည်ဟု ပူတင်က ပြောခဲ့ဖူး သည်။
ထိုဒုံးကျည်များသည် ၁၈၀၀၀ ကီလိုမီတာအထိ သွားနိုင်ပြီး ယင်းထက် ပိုသွားနိုင်သည်ဟုလည်း တစ်ချို့က ခန့်မှန်း သည်။ ထိုဒုံးကျည်တွင် ကွဲပြားသော ပစ်မှတ်များကို ချိန်ရွယ်နိုင်သည့် နျူကလီးယား ထိပ်ဖူးတပ် MIRV အနည်းဆုံး ၁၀ ခုပါဝင်သည်။
ထို့အပြင် ယင်းသည် ဒုံးကျည်ကာကွယ်ရေး စနစ်များကို ရှောင်လွှဲရန် ပျံသန်းရာလမ်းကြောင်း ခန့်မှန်းမရသည့် Avangard စက်မဲ့ယာဉ်များကိုလည်း ပို့ဆောင်နိုင်သည်။
ယခင်အတိုင်းပင် သုံးမျိုးပေါင်း နျူကလီးယား လက်နက်ကို အဆင့်မြှင့်တင်ရေးအတွက် အထူးအာရုံစိုက် ဆောင်ရွက်ခဲ့ကြောင်း၊ ယခုနှစ်အတွင်း ပထမဆုံးသော Sarmat ဒုံးကျည်စနစ် လောင်ချာများကို တိုက်ခိုက်ရေး တာဝန်များ၌ စတင်အသုံးပြုသွားမည်ဖြစ်ကြောင်း အဖမြေအား ကာကွယ်သူ (Defender of Fatherland Day) နေ့ အခမ်းအနားဖြစ်သော ကြာသပတေးနေ့၌ ရုရှားမှ ထုတ်ပြန်သော ဗွီဒီယိုဖိုင်တစ်ခုတွင် ပူတင်က ပြောသည်။
ဘိုင်ဒန်နဲ့ဇာလန်းစကီး ကိယက်ဗ်မြို့မှာ တွေ့ဆုံစဉ်(AP)
ထိုဒုံးကျည်များကို ၂၀၂၂ နှစ်ကုန်ပိုင်းတွင် စတင်ဖြန့်ကျက်သွားမည်ဟု ပူတင်က ပြီးခဲ့သည့် ဇွန်လတွင် ပြောခဲ့ သည်။
ယူကရိန်းအား ကျူးကျော်ခဲ့ပြီး တစ်နှစ်ပြည့်နေ့တွင် နျူကလီးယား လက်နက် ထိန်းချုပ်ရေးဆိုင်ရာ အဆုံးသတ် လိုက်ပြီဟု အချက်ပြမှုလည်း ဖြစ်သည်။
အင်္ဂါနေ့ နိုင်ငံတော် မိန့်ခွန်းတွင် အမေရိကန်နှင့် နျူကလီးယား လက်နက် ထိန်းချုပ်ရေး သဘောတူညီချက် New START ကို ရပ်ဆိုင်းကြောင်း ပူတင်က ကြေညာခဲ့သည်။ သို့သော် စာချုပ်သက်တမ်း ကုန်ဆုံးမည့် ၂၀၂၆ ခုနှစ်အထိ စာချုပ်ပါ အချက်အလက်များကို လိုက်နာကျင့်သုံးသွားမည်ဖြစ်ကြောင်း နောက်ပိုင်းတွင် ရုရှားအစိုးရဘက်မှ ထုတ်ပြန်ခဲ့သည်။
Source: အယ်ဂျာဇီးယား
- By CNI
- Category: နိုင်ငံရေး
- Hits: 464
CNI International News
အစ္စလာမ္မာဘတ်၊ ဖေဖော်ဝါရီ ၂၄
လေးရက်ကြာပိတ်ထားခဲ့သည့် ပါကစ္စတန်နှင့် အရေးပါသောနယ်စပ်ဖြတ်ကျော်ရေးလမ်းကြောင်းကို အာဖဂန်ရှိ တာလီဘန်အစိုးရက ပြန်ဖွင့်ပေးခဲ့သည်ဟု အယ်လ်ဂျာဇီးယားသတင်းတွင် ဖော်ပြသည်။
လေးရက်ကြာ ပိတ်ထားမှုကြောင့် အစားအစာနှင့် တခြားသောအရာများကို သယ်ဆောင်လာသည့် ထရပ်ကား ထောင်ပေါင်းများစွာမှာ နယ်စပ်တွင် ပိတ်မိခဲ့ရသည်။
ပါကစ္စတန်ဘက်ကလည်း စီမံခန့်ခွဲရေးဆိုင်ရာ လိုအပ်ချက်များကို ပြည့်မှီအောင် ဆောင်ရွက်ပြီးချိန်တွင် တော့ခ်ဟမ်း (Torkham) နယ်စပ်ဂိတ်ကို ပြန်ဖွင့်ပေးမည်ဟု ကြာသပတေးနေ့တွင် ပြောသည်။ လိုအပ်သော စာရွက်စာတမ်းများနှင့် စီမံခန့်ခွဲရေးလုပ်ငန်းများပြီးလျှင် ဂိတ်ကိုပြန်ဖွင့်ပေးမည်ဖြစ်ကြောင်း၊ ယင်းသည်နာရီ ပိုင်းသာ ကြာမြင့်နိုင်ကြောင်း ပါကစ္စတန်လုံခြုံရေးအရာရှိတစ်ဦးက ပြောသည်။
ပါကစ္စတန်ကာကွယ်ရေးဝန်ကြီး ခါဝါဂျာ အာဆစ် (Khawaja Asif) ဦးဆောင်သည့် အဆင့်မြင့်ကိုယ်စားလှယ် အဖွဲ့တစ်ခုက ကဘူးလ်သို့သွားကာ လုံခြုံရေးနှင့်တခြားသောအကြောင်းအရာများကို ဆွေးနွေးခဲ့ပြီးနောက် နယ်စပ်ဖြတ်ကျော်ရေးဂိတ်ကို ပြန်ဖွင့်ပေးရန် ဆုံးဖြတ်ခဲ့ခြင်းဖြစ်သည်။
ပါကစ္စတန်ကိုယ်စားလှယ်အဖွဲ့တွင် ထောက်လှမ်းရေးအေဂျင်စီအကြီးအကဲ ပါဝင်ခဲ့ပြီး ၎င်းတို့သည် အာဖဂန်၏ စီးပွားရေးဆိုင်ရာ ယာယီလက်ထောက်ဝန်ကြီးချုပ် မူလာအဗ္ဗဒူ ဂါနီ ဘာရာဒါ (Mullah Abdul Ghani Baradar) အပြင် တခြားသော တာလီဘန်အရာရှိများနှင့် တွေ့ဆုံခဲ့သည်။ အဆိုပါ တွေ့ဆုံမှုအပြီး နာရီပိုင်းအကြာတွင် အစ္စလာမ္မာဘတ်ရှိ အာဖဂန်သံရုံးမှ ပါကစ္စတန်တို့၏ ကတိဖျက်မှုတစ်ချို့ကြောင့် တနင်္ဂနွေနေ့မှ စတင်ပိတ်ထား ခဲ့ရသည့် တော့ခ်ဟမ်း ကုန်သွယ်ရေးလမ်းကြောင်းကို ကြာသပတေးနေ့တွင် ပြန်ဖွင့်ပေးမည်ဟု တွစ်တာတွင် ရေးသားခဲ့သည်။
အာဖဂန်နှင့် ပါကစ္စတန်ကြား နယ်စပ်ကုန်သွယ်ရေးလမ်းကြောင်းတစ်ခုတွင် ကုန်ကားများ တန်းစီစောင့်ဆိုင်းနေစဉ်(ဓါတ်ပုံ- Dawn)
ဂိတ်ပိတ်ထားမှုကြောင့် တနင်္ဂနွေနေ့ညမှ စတင်ကာ ထရပ်ကားထောင်ပေါင်းများစွာ ပါကစ္စတန်ဘက်အခြမ်းတွင် ပိတ်မိခဲ့သည်ဟု ပါကစ္စတန် အကောက်အခွန်ကိုယ်စားလှယ်များအဖွဲ့ခေါင်းဆောင် ကာရီနာဇင်ဂဲလ် (Qari Nazim Gul) က ပြောသည်။
ကားတန်းသည် ၃၀ ကီလိုမီတာခန့်ရှည်ကြောင်း၊ အာဖဂန်ဘက်က ဂိတ်ကို မနက်ပိုင်းတွင်ပြန်ဖွင့်ပေးခဲ့သော်လည်း ပါကစ္စတန်ဘက်က ဂိတ်ပြန်အဖွင့်ကိုစောင့်နေကြောင်း ၎င်းက ပြောသည်။ နယ်စပ်ဂိတ်ကို ပိတ်ထားသည့်အတွက် ဖြစ်ပေါ်လာသည့် ကားများသောင်တင်နေခြင်းကြောင့် နှစ်ဖက်စလုံးတွင် ရူပီး ဘီလီယံနှင့်ချီ ဆုံးရှုံးရနိုင်သည်ဟု ပါကစ္စတန်၊ အာဖဂန်ပူးတွဲကုန်သည်ကြီးများအသင်းနှင့် စက်မှုလုပ်ငန်း ဒါရိုက်တာက ခန့်မှန်းပြောဆိုသည်။
ပါကစ္စတန်နှင့်အာဖဂန်တို့သည် နယ်စပ်ဧရိယာပေါင်း ၂၆၀၀ ကီလီုမီတာ ထိစပ်လျက်ရှိပြီး ပါကစ္စတန် အစိုးရဘက် မှ အာဖဂန်ရွှေ့ပြောင်းနေထိုင်သူများကို ဆေးကုသရေးနယ်စပ်ဖြတ်ကျော်ခွင့်ပေးရန် ငြင်းဆန်မှုကြောင့် တော့ခ်ဟမ်းဂိတ်ကို ပိတ်ခဲ့ရခြင်းဖြစ်သည်ဟု တာလီဘန်များက ပြောသည်။
Source:Aljazeera
- By CNI
- Category: နိုင်ငံရေး
- Hits: 1259
CNI International News
နာဘလက်စ်၊ ဖေဖော်ဝါရီ ၂၃
သိမ်းပိုက်ထားသော အနောက်ဘက်ကမ်းခြေ နာဘလက်စ်မြို့တွင် အစ္စရေးစစ်တပ်က ဝင်ရောက်စီးနင်းမှု တစ်ခု လုပ်ဆောင်ခဲ့ရာ ပါလက်စတိုင်း အနည်းဆုံး ၁၀ ဦး သေဆုံးခဲ့ပြီးများစွာဒဏ်ရာရရှိခဲ့သည်ဟု အယ်ဂျာဇီးယား သတင်းတွင် ဖော်ပြထားသည်။
ဗုဒ္ဓဟူးနေ့ ဖြစ်စဉ်တွင် ဒဏ်ရာရရှိသူ အရေအတွက်မှာ ၁၀၂ ဦးရှိပြီး ထိုအထဲမှ ၈၂ ဦးမှာ ကျည်ထိမှန်ခဲ့ခြင်း ဖြစ်ကာ ခြောက်ဦးမှာ စိုးရိမ်ရသည်ဟု ပါလက်စတိုင်း ကျန်းမာရေးဌာနက ပြောသည်။
အစ္စရေး အထူးတပ်ဖွဲ့ဝင်များသည် မနက် ၁၀ နာရီခန့်တွင် မြို့တွင်းသို့ ဝင်ရောက် စီးနင်းခဲ့ခြင်းဖြစ်ပြီး ၎င်းတို့ ဝင်လာချိန် ကတည်းက ထိပ်တိုက်တွေ့ဆုံမှုများ ဖြစ်ပွားခဲ့ရသည်။
အစ္စရေးတပ်ဖွဲ့များသည် မြို့တွင်းသို့ ဝင်ပေါက်အားလုံးကို ပိတ်ဆို့ထားခဲ့ပြီး အလိုရှိနေသော ပါလက်စတိုင်း တိုက်ခိုက်ရေး သမားနှစ်ဦးရှိကာ အိမ်ကို ပိတ်ဆို့ ဖမ်းဆီးခဲ့သည်။
တိုက်ခိုက်ရေးသမား နှစ်ဦးစလုံး သေဆုံးခဲ့သည်။ စီးနင်းမှုအတွင်း ပါလက်စတိုင်း တပ်ဖွဲ့များကို Balata Brigades အဖွဲ့နှင့်အတူ တိုက်ခိုက်ခဲ့သည်ဟု Lions’ Den ဟုခေါ်သော ပါလက်စတိုင်း လက်နက်ကိုင်အဖွဲ့က ထုတ်ပြန် သည်။
အစ္စရေးတပ်ဖွဲ့နဲ့ ပါလက်စတိုင်းများ ထိပ်တိုက်တွေ့စဉ်
မြို့တွင်း ဝင်ရောက်လာချိန်တွင် အစ္စရေးတပ်ဖွဲ့များကို ကလေးငယ်များကလည်း ကျောက်ခဲများဖြင့် ပစ်ပေါက်ခဲ့ ကြသည်။ ထိုဖြစ်စဉ်နှင့်ပတ်သက်၍ ပါလက်စတိုင်းဘက်မှ လုံခြုံရေးတပ်ဖွဲ့များသည် နာဘလက်စ်မြို့တွင် စစ်ဆင်ရေး လုပ်ဆောင်နေသည်ဟု ပြောသော်လည်း အတိအကျကို ထုတ်ပြန်ခဲ့ခြင်း မရှိပေ။
နာဘလက်စ်မြို့နှင့် အနီးအနားရှိ ဂျီနင် (Jenin) မြို့တို့သည် မကြာသေးခင်ကမှ အရှိန်မြင့်တက်လာသည့် အစ္စရေး တပ်ဖွဲ့ဝင်များ၏ အကြမ်းဖက် ဝင်ရောက်တိုက်ခိုက်ခြင်းများအတွက် ပစ်မှတ်ထားရာ မြို့များ ဖြစ်သည်။
ထိုမြို့များတွင် လက်နက်ကိုင် ခုခံမှု ပြင်းထန်လာလျက် ရှိသည်ဟုလည်း ပါလက်စတိုင်း သတင်းသမားတစ်ဦးက ပြောသည်။
အစ္စရေးဘက်က အနောက်ဘက်ကမ်းခြေ ဧရိယာများကို တိုးချဲ့လာခဲ့သော်လည်း Lions’ Den နှင့် Balata Brigades တို့သည် ပါလက်စတိုင်းတို့၏ လက်နက်ကိုင် ခုခံရေးတွင် ဗဟိုချက်အဖြစ် ရှိနေခြင်း၊ လူငယ် အုပ်စု များက တိုက်ခိုက်လာခြင်းတို့ကြောင့် ထိုမြို့များသည် အစ္စရေးတို့၏ ပစ်မှတ်ထားရာ ဖြစ်လာသည်ဟု သတင်း သမား ဘာဂိုတီက ပြောသည်။
Source: အယ်ဂျာဇီးယား
- By CNI
- Category: နိုင်ငံရေး
- Hits: 1138
CNI International News
ဝါဆော၊ ဖေဖော်ဝါရီ ၂၃
ရုရှားသမ္မတ ပူတင်၏ နျူကလီးယား သတိပေးချက်အပြီး အမေရိကန်သမ္မတ ဂျိုးဘိုင်ဒန်က နေတိုး၏ အရှေ့ပိုင်း မဟာမိတ်များနှင့် တွေ့ဆုံကာ လုံခြုံရေးအာမခံအပေါ် ဆွေးနွေးခဲ့သည်။
ဥရောပအရှေ့ခြမ်းရှိ မဟာမိတ်များကို ထပ်ဆင့် အာမခံချက်အဖြစ် နေတိုး၏ ဧရိယာ တစ်လက်မတိုင်းကို ကာကွယ်သွားမည်ဖြစ်ကြောင်း အမေရိကန်သမ္မတ ဂျိုးဘိုင်ဒန်က ဗုဒ္ဓဟူးနေ့တွင် ပြောခဲ့သည်ဟု ရိုက်တာ သတင်း တွင် ဖော်ပြထားသည်။
ရုရှား၏ အထင်ကရ နျူကလီးယား လက်နက်ထိန်းချုပ်ရေး စာချုပ်ကို ရပ်ဆိုင်းခြင်း လုပ်ရပ်က အမှားကြီး ဖြစ်သည်ဟု ဘိုင်ဒန်က ပြောသည်။
ကိယက်ဗ်(ယူကရိန်း)သို့ မထင်မှတ်ဘဲ သွားရောက် လည်ပတ်ခဲ့ပြီး နှစ်ရက်အကြာ ဥရောပအရှေ့ခြမ်းနေတိုး မဟာမိတ်များနှင့် ပိုလန်မြို့တော် ဝါဆော (Warsaw)တွင် တွေ့ဆုံချိန်တွင် ဘိုင်ဒန်က ထိုသို့ ပြောခဲ့ခြင်း ဖြစ်သည်။
စစ်အေးကာလအပြီး ရုရှားနှင့်အနောက်အုပ်စုတို့ကြား တင်းမာမှု အမြင့်ဆုံး အခြေအနေတွင် ဘိုင်ဒန်သည် ဝါဆောမြို့လယ်၌ လူထောင်ပေါင်းများစွာကို မိန့်ခွန်းပြောခဲ့ပြီး ရုရှားသမ္မတ ပူတင်ကဲ့သို့ သက်ဦးဆံပိုင်ခေါင်းဆောင်မျိုးကို ဆန့်ကျင်ရမည်ဟု ပြောသည်။
ဘိုင်ဒန်ကိုတွေ့ရစဉ် (AP)
ဘိုင်ဒန် မတိုင်ခင် နာရီပိုင်းအကြာတွင် ပူတင်သည် အနောက်အုပ်စုအား ရည်ရွယ်သည့် ပြင်းပြင်းထန်ထန် ဝေဖန်မှုကို ပြုလုပ်ခဲ့ကာ ယူကရိန်းစစ်ပွဲအတွက်လည်း အပြစ်တင်ခဲ့သည်။
သို့သော် အနောက်အုပ်စု အနေဖြင့် ရုရှားကို တိုက်ခိုက်ရန် မကြံစည်ခဲ့ဖူးကြောင်း၊ ကျူးကျော်စစ်သည် ပူတင်၏ ရွေးချယ်မှုသာဖြစ်ကြောင်း ဘိုင်ဒန်က တုန့်ပြန်သည်။
ပူတင်သည် အမေရိကန်၊ ရုရှား နှစ်နိုင်ငံနျူကလီးယား လက်နက် အရေအတွက်ကို ကန့်သတ်ပေးသည့် ၂၀၁၀ ခုနှစ် New Start လက်နက်ထိန်းချုပ်ရေး သဘောတူညီချက်ကို ရပ်ဆိုင်းကြောင်း ကြေညာခဲ့ပြီး နျူကလီးယား စမ်းသပ်မှုများကို ပြန်လည်လုပ်ဆောင်သွားနိုင်သည်ဟု သတိပေးခဲ့သည်။
ယင်းသည် ကြီးမားသည့် အမှားဖြစ်သည်ဟု ဘိုင်ဒန်က ပြောသည်။ Bucharest Nine ဟုခေါ်သော ဥရောပ အရှေ့ပိုင်း မဟာမိတ်များနှင့် မတွေ့ဆုံမီ ထိုသို့ ပြောခဲ့ခြင်း ဖြစ်သည်။
ပူတင်ကိုတွေ့ရစဉ်(AP)
အမေရိကန်၏ နေတိုးအဖွဲ့အပေါ် ခံယူချက်သည် ရှင်းလင်းကြောင်း၊ အပိုဒ်ခွဲ ၅ သည် အမေရိကန်တို့၏ အလေး ထားရာ ဖြစ်ကြောင်းနှင့် နေတိုး၏ တစ်လက်မချင်းတိုင်းကို ကာကွယ်သွားမည်ဖြစ်ကြောင်း ဘိုင်ဒန်က ပြောသည်။
အပိုဒ်ခွဲ ၅ တွင် နေတိုးအဖွဲ့၏ မည်သည့် အဖွဲ့ဝင်နိုင်ငံကိုမဆို ကျူးကျော်တိုက်ခိုက်ခြင်းသည် အားလုံးအပေါ် တိုက်ခိုက်ခြင်းဖြစ်ပြီး ယင်းကို စုပေါင်းတုန့်ပြန်ရန် လိုအပ်သည်ဟု ဖော်ပြထားသည်။
ဘိုင်ဒန်နှင့် တွေ့ဆုံခဲ့သော နိုင်ငံ့ခေါင်းဆောင် အများစုသည် ယူကရိန်းအား စစ်ဘက်ဆိုင်ရာ အကူအညီများစွာ ပေးနေကြသူများ ဖြစ်သည်။
နေတိုးအဖွဲ့တွင် ဆွီဒင်၊ ဖင်လန်တို့ကဲ့သို့ နိုင်ငံများ မကြာခင် ပါဝင်လာတော့မည်ဖြစ်ပြီး ယင်းကို ရုရှားနိုင်ငံ အတွက် အရေးကြီးသော ခြိမ်းခြောက်မှုတစ်ခုအဖြစ် ရှုမြင်ထားသည်ဟု ရုရှားဘက်က ပြောသည်။
Source: Reuters
- By CNI
- Category: နိုင်ငံရေး
- Hits: 723
CNI International News
မော်စကို၊ဖေဖော်ဝါရီ ၂၃
ဗုဒ္ဓဟူးနေ့က ပြုလုပ်ခဲ့တဲ့ အစည်းအဝေးများမှာ ရုရှားနှင့်တရုတ်တို့က ၎င်းတို့ကြား ဆက်ဆံရေးခိုင်မာမှုကို ထုတ်ဖော်ပြသခဲ့ပြီး တရုတ်က ယူကရိန်းစစ်ပွဲအတွက် ရုရှားအားထောက်ပံ့မှုများ လုပ်ဆောင်မည့် အလားအလာ တစ်ခုအဖြစ် အခြားနိုင်ငံများက ၎င်းတို့အား စောင့်ကြည့်နေသည်ဟု AP သတင်းတွင် ဖော်ပြသည်။
တရုတ်ကွန်မြူနစ်ပါတီ၏ နိုင်ငံခြားရေးမူဝါဒဆိုင်ရာ ရာထူးအကြီးဆုံးပုဂ္ဂိုလ်ဖြစ်သည့် ဝမ်ယိ (Wang Yi) သည် မော်စကိုသို့ ရောက်ရှိနေသည်။ ရုရှားနှင့်အနောက်အုပ်စုကြားဆက်ဆံရေး အဆိုးရွားဆုံးဖြစ်နေချိန်၊ တရုတ် နှင့်အမေရိကန်တို့ ဆက်ဆံရေး ယိုယွင်းနေချိန်၊ ရုရှားဘက်က အမေရိကန်နှင့်နျူကလီးယားလက်နက်ထိန်းချုပ်ရေး သဘောတူညီချက်မှ နုတ်ထွက်သွားချိန်တွင် ဝမ်၏ခရီးစဉ်က တရုတ်အနေဖြင့် ရုရှားအား လက်နက် ထောက်ပံ့သွားနိုင်ဖွယ်ရှိနေသည်ဆိုသည့် စိုးရိမ်မှုများကို ဖြစ်စေသည်။
ဝမ်နှင့် အစည်းအဝေးအစတွင် ပူတင်က နှစ်နိုင်ငံကြားဆက်ဆံရေးအခြေအနေကို ချီးကျူးခဲ့ပြီး တရုတ်သမ္မတ ကိုလည်း ရုရှားသို့ လာစေချင်သည်ဟု ပြောသည်။ ကမ္ဘာ့စင်မြင့်တွင် တရုတ်နှင့်ရုရှားတို့ ပူးပေါင်းခြင်းက အပြည်ပြည်ဆိုင်ရာအခြေအနေများကို တည်ငြိမ်မှုရှိစေရေးအတွက် အရေးပါသည်ဟု ပူတင်က ပြောသည်။
ရုရှား-တရုတ် ဆက်ဆံရေးတွင် မည်သည့်တတိယနိုင်ငံမှ ဝင်ရောက်စွက်ဖက်၍ မရကြောင်းနှင့် စစ်၏ ခြောက်လှန့်မှုများ၊ စစ်ပွဲကြောင့်ဖြစ်သည့် အနောက်အုပ်စု၏ ထိတ်လန့်မှုများကိုလည်း ဝမ်ယိက ပြောသည်။ ရုရှားနှင့်တရုတ်တို့သည် နိုင်ငံတကာဆက်ဆံရေးများတွင် အာဏာဝေမျှမှုနှင့် ဒီမိုကရေစီကျင့်သုံးမှုတို့ကို ထောက်ခံကြောင်း ဝမ်က ပြောသည်။ ကမ္ဘာလုံးဆိုင်ရာ အရေးကိစ္စများတွင် အမေရိကန်၏ ကြီးစိုးထားမှုကို တန်ပြန်ရေးအတွက် နှစ်နိုင်ငံကြား တူညီသော ရည်ရွယ်ချက်ရှိမှုကို ရည်ညွှန်းခြင်းဖြစ်သည်။
ရုရှားနိုင်ငံခြားရေးဝန်ကြီး ဆာဂျီလာဗရော့ဗ်နှင့် တရုတ်ကွန်မြူနစ်ပါတီ၏ နိုင်ငံခြားရေးမူဝါဒရေးရာ အကြီး အကဲ ဝမ်ယိ(ဓါတ်ပုံ-အေပီ)
တရုတ်သည် ယူကရိန်းစစ်ပွဲနှင့်ပတ်သက်၍ ရုရှားကိုအပြစ်တင်ရန် ငြင်းဆိုထားကာ အမေရိကန်နှင့် နေတိုးတို့မှ ရန်စခြင်းကြောင့်ဟုသာ ရုရှား၏လေသံအတိုင်း ကာကွယ်ပေးထားသည်။ယူကရိန်းအရေးအတွက် ရုရှားအပေါ် အရေးယူပိတ်ဆို့မှုများ ချမှတ်ထားခြင်းကိုလည်း တရုတ်အစိုးရကဘက်က ဝေဖန်ထားသည်။တဖက်တွင်လည်း ထိုင်ဝမ်အရေး အမေရိကန်နှင့် ထိပ်တိုက်တွေ့ဆုံနေသော တရုတ်အစိုးရကို ရုရှားဘက်က ထောက်ခံပေးသည်။
နှစ်နိုင်ငံကြားကာကွယ်ရေးဆိုင်ရာ ဆက်ဆံရေးကောင်းမွန်မှုကိုလည်း ပူးတွဲစစ်ရေးလေ့ကျင့်မှုများ လုပ်ဆောင် ပြသထားပြီး ၎င်းတို့သည် တောင်အာဖရိကနှင့်အတူ ယခုသီတင်းပတ်အတွင်း အိန္ဒိယသမုဒ္ဒရာအတွင်း၌ ရေတပ် စစ်ရေးလေ့ကျင့်မှုပြုလုပ်ရန် စီစဉ်ထားသည်။
ထိုသို့သောအခြေအနေများက အနောက်အုပ်စုကို စိုးရိမ်မှုများဖြစ်စေပြီး ရုရှား၏ စစ်ရေးလှုပ်ရှားမှုများတွင် တရုတ် နိုင်ငံပါဝင်နေခြင်းက ပြင်းထန်သော ပြဿနာတစ်ခုဖြစ်စေသည်ဟု အမေရိကန်နိုင်ငံခြားရေးဝန်ကြီးက ပြောသည်။
Source:AP
- By CNI
- Category: နိုင်ငံရေး
- Hits: 383
CNI International News
တိုင်ပေ၊ ဖေဖော်ဝါရီ ၂၃
သေသေချာချာ ပြင်ဆင်မှု ပြုလုပ်ထားမည်ဆိုလျှင် ထိုင်ဝမ်တပ်ဖွဲ့များသည် တရုတ်၏ ကနဦး တိုက်ခိုက်မှုများကို တွန်းလှန်နိုင်သည်ဟု ထိုင်ဝမ်ကာကွယ်ရေးဝန်ကြီး ချူကူချန်းက ပြောကြောင်း ဘန်ကောက်ပို့စ် သတင်းတွင် ဖော်ပြထား သည်။
တရုတ်သည် စစ်ပွဲတစ်ပွဲစတင်ရန် အင်အားကောင်းသော်လည်း ထိုင်ဝမ်ကို တစ်ပတ်၊ နှစ်ပတ်အတွင်း အောင်မြင်စွာ သိမ်းပိုက်နိုင်ရန် အင်အားကောင်းခြင်းမရှိဟု ချူကူချန်း (Chiu Kuo-cheng)က ပြောသည်။
ယခုသီတင်းပတ် အင်္ဂလိပ်ဘာသာဖြင့် ထုတ်ဝေသော ဓနသဟာရ မဂ္ဂဇင်းနှင့် အင်တာဗျူးတွင် ထိုသို့ ပြောခဲ့ခြင်း ဖြစ်သည်။
လိုအပ်သော ထောက်ပံ့မှုများ ရရှိနေမည်ဆိုလျှင် ထိုင်ဝမ်စစ်တပ်သည် တရုတ်ပြည်သူ့လွတ်မြောက်ရေး တပ်မတော် (PLA) ၏ ပိတ်ဆို့မှုများကို ဖောက်ထွက်နိုင်ကြောင်း၊ အင်တာနက်နှင့် တခြားသော ဆက်သွယ်ရေး နည်းလမ်းများအပြင် ပိတ်ဆို့မှုကို ဖောက်ထွက်ရန် နည်းလမ်းများစွာရှိကြောင်း ချူကပြောသည်။
ထိုင်ဝမ်ကို ရောက်လာတဲ့ အမေရိကန်လွှတ်တော်ဥက္ကဋ္ဌ နန်စီပလိုစီကိုတွေ့ရစဉ်
အမေရိကန်နှင့် တခြားသော မဟာမိတ်များ၏ အကူအညီများ ရောက်ရှိလာရေး အချိန်ဆွဲထားရန်အတွက် တရုတ်၏ တိုက်ခိုက်မှုကို နှစ်ပတ်ကြာတောင့်ခံနိုင်မှုက ထိုင်ဝမ်စစ်တပ်၏ ရည်မှန်းချက် ဖြစ်သည်ဟုလည်း ချူက ပြော သည်။
ထိုင်ဝမ်ကို အမေရိကန် လွှတ်တော်ဥက္ကဋ္ဌဟောင်း ရောက်ရှိလာပြီးနောက် တရုတ်ဘက်က အကြီးမားဆုံးသော စစ်ရေး လေ့ကျင့်မှုတစ်ခု လုပ်ဆောင်ခဲ့သည်။
ထိုစစ်ရေး လေ့ကျင့်မှုတွင် ထိုင်ဝမ်ကျွန်း အရှေ့၊ အနောက်နှင့် အရေးပါသော မြို့များကို ပိတ်ဆို့ရေး စနစ်တကျ ပြင်ဆင်မှုများလည်း ပါဝင်သည်။ ထို လေ့ကျင့်မှုသည် ထိုင်ဝမ်သို့ ပြင်ပအကူအညီများ မရောက်ရှိလာစေရေး ကျွန်းကို ပတ်လည် ဝိုင်းထားရန် ကြိုတင်လေ့ကျင့်မှုဟု ရှုမြင်ကြသည်။
တစ်နေ့နေ့ တစ်ချိန်ချိန်တွင် ထိုင်ဝမ်အား ၎င်းတို့ထိန်းချုပ်မှု အောက်သို့ ရောက်ရှိစေရမည်ဟု တရုတ်က ပြောထားသည့် အခြေအနေတွင် ယူကရိန်းအပေါ် ရုရှား၏ ကျူးကျော်မှုက တရုတ်အနေဖြင့် ထိုင်ဝမ်အား ကျူးကျော် သိမ်းပိုက်နိုင်သည်ဆိုသည့် စိုးရိမ်မှုများကို ဖြစ်စေသည်။
တရုတ်နဲ့ ထိုင်ဝမ်ကြား ဆက်စပ်မြေပုံကိုတွေ့ရစဉ်
သို့သော် တရုတ်နိုင်ငံခြားရေးဝန်ကြီး ချင်ကန်း(Qin Gang) က ထိုသို့သော စပ်ဆက်မှုများကို ရပ်ရန် တိုက်တွန်း ထားသည်။
မည်သို့ပင်ဆိုစေကာမူ ယူကရိန်းအရေးမှ သင်ခန်းစာများ ရရှိခဲ့သည်ဟု ချူက ပြောသည်။
ယူကရိန်းပဋိပက္ခက ကြိုတင်ပြင်ဆင်မှု လုပ်ဆောင်ထားရန် အရေးကြီးကြောင်းကို သင်ကြားပေးခဲ့ကြောင်း၊ ယူကရိန်းတွင် အရှေ့၊ အနောက် စစ်မျက်နှာပြင် ကွဲပြားခဲ့သော်လည်း ထိုင်ဝမ်တွင်မူ စစ်ဖြစ်သည်နှင့် မည်သို့မှ ကွဲပြားခြင်း မရှိဘဲ စစ်မျက်နှာပြင် တစ်ခုတည်းသာ ရှိမည်ဖြစ်ကြောင်း ချူက ပြောသည်။
Source: ဘန်ကောက်ပို့စ်
- By CNI
- Category: နိုင်ငံရေး
- Hits: 423
CNI International News
ဘန်ကောက်၊ဖေဖော်ဝါရီ ၂၂
အောက်လွှတ်တော် ဖျက်သိမ်းခြင်းကို မတ်လ အစောပိုင်းတွင် လုပ်ဆောင်ပြီး ရွေးကောက်ပွဲကော်မရှင်(EC)မှ သတ်မှတ်ထားသည့်အတိုင်း ရွေးကောက်ပွဲအား မေလ ၇ ရက်နေ့၌ လုပ်ဆောင်သွားမည်ဟု ထိုင်းဝန်ကြီးချုပ် ပရာယွတ်ချန်အိုချာ (Prayut Chan-o-chha)က အင်္ဂါနေ့ လွှတ်တော်အစည်းအဝေးမှာ ပြောခဲ့ကြောင်း ဘန်ကောက်ပို့စ် သတင်းတွင် ဖော်ပြထားသည်။
ထိုအစည်းအဝေးတွင် ဒုတိယဝန်ကြီးချုပ် ဝပ်စနူကီရာ-နမ်း (Wissanu Krea-Ngam)က ရွေးကောက်ပွဲ အချိန် အပြင် လွှတ်တော်ဖျက်သိမ်းအပြီး ကြားဖြတ်အစိုးရအဖြစ် လုပ်ဆောင်ရမည်နှင့် မလုပ်ရမည်တို့ကို လွှတ်တော် အမတ်များအား ပြောခဲ့သည်။
ထို့နောက်တွင် ဝန်ကြီးချုပ်က လွှတ်တော်ကို မတ်လတွင် ဖျက်သိမ်းမည်ဟု ပြောသည်။ လွှတ်တော်၏ လေးနှစ် သက်တမ်းသည် မတ်လ ၂၄ ရက်နေ့မှ ကုန်ဆုံးမည်ဖြစ်သည်။ ရွေးကောက်ပွဲ အချိန်နှင့်ပတ်သက်၍ သတင်း ထောက်များက မေးမြန်းခဲ့ရာတွင် ပရာယွတ်က ကျင်းပမည့် နေ့ရက်သည် ရွေးကောက်ပွဲဆိုင်ရာ ကြိုတင်ပြင်ဆင် မှုများ လုပ်ဆောင်နေသည့် EC နှင့်သာဆိုင်ကြောင်း ပြန်လည်ဖြေကြားခဲ့သည်။
ထိုင်းအောက်လွှတ်တော်ကိုတွေ့ရစဉ် (Thai PBS)
လွှတ်တော်ဖျက်သိမ်းရန် စီစဉ်နေစဉ်တွင် ပြောင်းလဲရန် ပြင်ဆင်နေသည့် အရေးကြီးသော ဥပဒေမူကြမ်းများနှင့် ပြုပြင်ပြောင်းလဲမှုများကို အရှိန်မြှင့်တင် ဆောင်ရွက်သွားရန် ဝန်ကြီးချုပ်က ဝန်ကြီးများနှင့် လွှတ်တော် အမတ် များကို ပြောခဲ့သည်။
သို့သော် ဝန်ကြီးချုပ်သည် လွှတ်တော်ဖျက်သိမ်းရေးကို အချိန်ဆွဲ ဆောင်ရွက်နေသည်ဆိုသော ဝေဖန်မှုများကို ပရာယွတ်က ငြင်းသည်။
သူ၏ United Thai Nation ပါတီသည် ရွေးကောက်ပွဲ ဝင်ပြိုင်ရေး အဆင်သင့် ဖြစ်စေရန် အချိန်များစွာ လိုအပ်နေ သည်ဟု နိုင်ငံရေး လေ့လာသုံးသပ်သူများက ထောက်ပြထားသည်။
လွှတ်တော် ဖျက်သိမ်းသည်ဖြစ်စေ ဆက်ရှိနေသည်ဖြစ်စေ အစိုးရသည် နောက်ထပ် အစိုးရသစ် မဖွဲ့စည်းရမချင်း ကြားဖြတ်အစိုးရအဖြစ် လုပ်ငန်းများကို ဆက်လက် ဆောင်ရွက်သွားမည်ဟု ပရာယွတ်က ပြောသည်။
ရွေးကောက်ပွဲဆိုင်ရာ နောက်ထပ် တိုးတက်ပြောင်းလဲမှု တစ်ခုအဖြစ် ဖွဲ့စည်းပုံ တရားရုံးသည် ပြည်နယ်တစ်ခုချင်း စီ၌ လွှတ်တော်အမတ် မည်မျှပါဝင်ရမည်ဆိုခြင်းအား သတ်မှတ်နိုင်ရေး တွက်ချက်ရာတွင် ထိုင်းမဟုတ်သူများပါ ပါဝင်နိုင်မလား ဆုံးဖြတ်ပေးရေ EC ၏ တောင်းဆိုမှုကို အင်္ဂါနေ့တွင် လက်ခံလိုက်ပြီ ဖြစ်သည်။
ထိုကိစ္စနှင့်ပတ်သက်၍ ဖွဲ့စည်းပုံအခြေခံဥပဒေဆိုင်ရာ တရားရုံးသည် မတ်လ ၃ ရက်တွင် အမိန့်ချမှတ်ရန် စီစဉ် ထားသည်ဟု တရားရုံး သတင်းအရင်းအမြစ်များက ပြောသည်။
Source: ဘန်ကောက်ပို့စ်
- By CNI
- Category: နိုင်ငံရေး
- Hits: 530
CNI International News
နယူးယောက်၊ ဖေဖော်ဝါရီ ၂၂
အမေရိကန်သမ္မတ ဂျိုးဘိုင်ဒန်၏ ယူကရိန်းအရေး မူဝါဒသည် တတိယကမ္ဘာစစ်ကို ဖြစ်စေနိုင်သည်ဟု သမ္မတဟောင်း ဒေါ်နယ်ထရမ့်က အင်္ဂါနေ့တွင် ပြောကြားခဲ့သည်ဟု တာ့စ်သတင်းတွင် ဖော်ပြထားသည်။
ယူကရိန်းအရေးနှင့် ပတ်သက်သည့် ဘိုင်ဒန်၏ လုပ်ဆောင်ချက်များကို စောင့်ကြည့်၊ နားလည်မည်ဆိုလျှင် သူသည် စနစ်တကျ လုပ်ဆောင်နေသည့်တိုင် ဘာကို လုပ်နေသလဲကို မသိကြောင်း၊ ထိုလုပ်ရပ်က တတိယ ကမ္ဘာစစ်ကြီးအထိ ဖြစ်စေနိုင်ကြောင်း၊ ရူးနှမ်းမှုဖြစ်ကြောင်း ဒေါ်နယ်ထရမ့်က ၎င်း၏ Truth ဆိုရှယ်မီဒီယာတွင် ရေးသားခဲ့သည်။
တနင်္လာနေ့က ဖလော်ရီဒါရှိ ၎င်းအား ထောက်ခံသူများနှင့် တွေ့ဆုံရာတွင် ထရမ့်က “၎င်းအနေဖြင့် သမ္မတရာထူး အား ပြန်လည် ရွေးချယ်ခံရပါက ယူကရိန်းနိုင်ငံမှ အခြေအနေများအတွက် အမြန်ဆုံး အဖြေရှာရေး ရုရှားနှင့် ယူကရိန်းမှ သမ္မတများကို ဆက်သွယ် ပြောဆိုသွားမည်”ဟု ပြောခဲ့သည်။
ဘိုင်ဒန်နဲ့ ဇာလန်းစကီးကိုတွေ့ရစဉ် (GETTY IMAGES)
ရုရှားသည် ယူကရိန်းကို ၂၀၂၂ ခုနှစ်၊ ဖေဖော်ဝါရီလက စတင်၍ ကျူးကျော်တိုက်ခိုက်ခဲ့ရာ ယခုဆိုလျှင် တစ်နှစ် ပြည့်တော့မည်ဖြစ်သည်။
အဆိုပါ ယူကရိန်းစစ်ပွဲတွင် အမေရိကန်သည် ယူကရိန်းအား လက်နက် ခဲယမ်းများနှင့် နည်းပညာပိုင်းဆိုင်ရာ အကူအညီများ ပေးအပ်လျက်ရှိသလို ရုရှားအား သံတမန်နည်းလမ်းအရလည်း ဖိအားပေးလျက်ရှိနေသည်။
ထို့နောက် ရုရှားနှင့် အမေရိကန်ကြားမှာလည်း ဆက်ဆံရေး တင်းမာလျက်ရှိနေပြီး ရုရှားက နျူကလီးယား ခြိမ်းခြောက်မှုများပင် လုပ်လာလျက်ရှိသည်။
ထိုအခြေအနေများကြောင့် တတိယကမ္ဘာစစ် ဖြစ်လာနိုင်သည်ဟု နိုင်ငံတကာရှိ ကျွမ်းကျင်သူများက သုံးသပ် နေကြသည်။
Source: တာ့စ်