- By CNI
- Category: Travel
- Hits: 872
CNI News
၂၀၂၃ ခုနှစ်၊ မတ်လ ၈
မြန်မာနိုင်ငံတွင် ၂၀၁၂ ခုနှစ်မှ စတင်ကာ ၂၀၁၉ ခုနှစ်အထိ ပြည်ပခရီးသွား ဝင်ရောက်မှု များပြားခဲ့ပြီး ရွှေခေတ်သို့ ရောက်ခဲ့သည့် အနေအထားအား လက်ရှိ ကိုဗစ်ကာလအလွန်တွင် မမှီနိုင်သေးကြောင်း ခရီးသွားလုပ်ငန်းရှင်များ နှင့် ဟိုတယ်လုပ်ငန်းရှင်များက CNI သတင်းဌာနသို့ ပြောသည်။
မြန်မာနိုင်ငံ၏ ခရီးသွားကဏ္ဍတွင် ပြည်ပခရီးသွား ဝင်ရောက်မှုသည် ၂၀၀၃ ခုနှစ်မှစတင်ကာ ၂၀၀၆ ခုနှစ်အထိ အားကောင်းခဲ့ပြီး ၂၀၀၇ မှ ၂၀၁၁ ခုနှစ်တွင် ပြန်ကျသွားခဲ့ကြောင်း၊ သို့သော် ၂၀၁၂ ခုနှစ်မှ စတင်ကာ ၂၀၁၉ ခုနှစ် အထိ ပြန်၍ အားအလွန်ကောင်းခဲ့ကြောင်း၊ ၂၀၁၉ ခုနှစ် တစ်နှစ်တည်းတွင် ပြည်ပခရီးသွားဝင်ရောက်မှုမှာ ၄ ဒဿမ ၄ သန်းခန့် အထိ ရှိခဲ့သည်။
သို့သော် ကိုဗစ်နှင့် နိုင်ငံရေး မတည်ငြိမ်မှုများကြောင့် လက်ရှိအချိန်အထိ မြန်မာနိုင်ငံ၏ ခရီးသွားကဏ္ဍတွင် ပြည်ပ ခရီးသွားဝင်ရောက်မှုမှာ ဆက်လက် ကျဆင်းနေကြောင်း ခရီးသွားလုပ်ငန်းရှင်များနှင့် ဟိုတယ် လုပ်ငန်းရှင် များက ထောက်ပြ ပြောဆိုကြခြင်း ဖြစ်သည်။
ခရီးသွားလုပ်ငန်းရှင် ဦးသက်လွင်တိုးက “အဲဒီအခြေအနေကတော့ အခု 1 million တောင် မပြည့်တော့ပါဘူး။ သိန်းဂဏန်းလောက်တောင် အနိုင်နိုင် ဖြစ်သွားတယ်။ ကောင်းခဲ့တယ်ဆိုတာက image ပေါ့။ ကျနော်တို့ တိုင်းပြည်က ရင်းနှီးမြှုပ်နှံလို့လည်း ကောင်းတယ်၊ နောက်တစ်ခါ လည်စရာပတ်စရာတွေက ဒီထက် လုံခြုံ စိတ်ချ ရတယ်။ နောက် ၂၀၀၃၊ ၄၊ ၅၊ ၆၊ ၇ တုန်းကလည်း ဘာဖြစ်လဲဆိုတော့ visa on arrival တွေ ဖွင့်ပေးခဲ့တယ်။ သံရုံး ချည်းပဲ မဟုတ်တော့ဘဲ ဘယ်လူမျိုးမဆိုပေါ့ visa ယူဖို့ အခက်အခဲရှိသူတွေကို on arrival ပေးတယ်၊ အဲဒီအခါမှာ လည်း agent တွေရဲ့ အကူအညီနဲ့ လုပ်ရတဲ့အတွက်ကြောင့် agent တွေက အလုပ်ရတယ်။ agent တွေ အလုပ်ရ တဲ့ အတွက်ကြောင့် ဂိုက်(ဧည့်လမ်းညွန်)တွေလည်း အလုပ်ရတယ်။ ဒီဘက်ခေတ်ကျတော့ ခေတ်က ပြောင်းသွား ပြီ။ online နဲ့ e-visa တွေ လုပ်ခဲ့တယ်။ e-visa လုပ်ရင်းနဲ့မှ visa free တွေပေးလာတဲ့ အခါကျတော့ FIT Tour တွေလည်း မြင့်လာတယ်။ ဘယ်လိုပဲပြောပြော အလုံးနဲ့အရင်းနဲ့ လာပြီဆိုကတည်းက လူ ၁၀ ယောက် လာလို့ ၃ ယောက်လောက်က package tour ယူမယ်၊ ၇ ယောက်လောက်က free visa ပဲ ဖြစ်ဖြစ် independent traveler အနေနဲ့ လာရင်ဖြစ်ဖြစ် ကိုယ့်တိုင်းပြည်ကို သပိတ်ဝင် အိတ်ဝင် ဝင်တာပဲလေ။ Barrier Field ဆိုတာ ဘာတွေလဲ။ ဘာ barrier တွေလဲဆိုတာကို သူတို့ အောက်ခြေ level ကို သိဖို့လိုတယ်။ စကားလုံး လှလှပပကြီး သုံးပြီးတော့ ပြောနေတာထက်စာရင် လက်တွေ့ ဘာတွေလဲဆိုတာကို သူတို့ နားထောင်ဖို့ လိုတယ်” ဟု CNI သတင်းဌာနသို့ ပြောသည်။
ကမ်းခြေမှာ တွေ့ရသည့် ခရီးသွားများ
နိုင်ငံတစ်နိုင်ငံ၏ ခရီးသွားလုပ်ငန်းတွင် ပြည်တွင်းခရီးသွားထက် ပြည်ပခရီးသွား ဝင်ရောက်မှုများပါက နိုင်ငံ၏ GDP (gross domestic product) လည်း တက်သည့်အတွက် ပြည်ပခရီးသွား ဝင်ရောက်မှုသည် နိုင်ငံတစ်နိုင်ငံ အတွက် အလွန်အရေးပါကြောင်း ရှမ်းပြည်နယ်မြောက်ပိုင်း ဟိုတယ်လုပ်ငန်းရှင်များအသင်းမှ ဥက္ကဋ္ဌ ဦးဇော်ဇော် က CNI သတင်းဌာနသို့ ပြောသည်။
ပြည်ပခရီးသွား ဝင်ရောက်မှုနှင့် ပတ်သက်၍ ယခင်အချိန်ကာလနှင့် လက်ရှိ အနေအထားကို နှိုင်းယှဉ်ကြည့်မည် ဆိုလျှင် လက်ရှိသည် မြန်မာနိုင်ငံအတွင်းမှာ မတည်ငြိမ်သေးဟု ပြည်ပနိုင်ငံများမှ ထင်မြင်ယူဆသည့် အတွက် ကြောင့် ယခုလက်ရှိ ဝင်ရောက်မှု နည်းနေခြင်းဖြစ်ကြောင်း ၎င်းက ပြောသည်။
ဦးဇော်ဇော်က “နီးနီးနားနား ထိုင်းဆိုရင် ဒါပြည်ပ ခရီးသွား ဝင်ရောက်မှုနဲ့ပဲ ရပ်တည်တာ များပါတယ်။ အရင်တုန်း က ဦးသိန်းစိန် အစိုးရလက်ထက်မှာ တရုတ်နိုင်ငံသားတွေကို ရွှေလီ-မူဆယ် ဝင်ပေါက်ကနေ border pass ကနေ ဝင်ခွင့်ပေးတယ်။ ဝင်ခွင့်ပေးပြီး သွားတဲ့အခါမှာ အဲဒီအချိန်မှာ ခရီးသွားလုပ်ငန်းက တအားကို ဆက်စပ်တာပေါ့ နော်။ တရုတ်နိုင်ငံသားတွေ လာလိုက်ရင် ကားအစင်းလိုက် ရာချီလာတယ်။ သူတို့အတွက် နေစရာတွေ၊ စား သောက် စရာတွေ စီစဉ်ပေးရတယ်။ ကားတွေ အဆင်ပြေတယ်၊ souvenir shop တွေ အဆင်ပြေတယ်။ တရုတ် နိုင်ငံသားတွေ ဒီမှာ ပိုက်ဆံလာသုံးတာ ဖြစ်တဲ့အတွက် ပြည်သူပြည်သားတွေလည်း သူ့ ဆက်စပ်တဲ့ လုပ်ငန်းတွေ အားလုံးပေါ့ အကုန်လုံးက ဝင်ငွေရကြတယ်။ ဒါလေးက သာဓကတစ်ခုပါပဲ”ဟု CNI သတင်းဌာနသို့ ပြောသည်။
ထို့ကြောင့် မြန်မာနိုင်ငံသို့ ပြည်ပခရီးသွားများ ဝင်ရောက်လာရန် နည်းလမ်းမျိုးစုံဖြင့် ဆွဲဆောင်နိုင်ရန် လိုအပ်ပြီး ဝန်ကြီးဌာန အနေဖြင့်လည်း အသင်းအဖွဲ့များ၊ သက်ဆိုင်ရာနယ်ပယ်မှ ကျွမ်းကျင်သူများ၏ အကြံပြုမှု များအား နားထောင်ရန် လိုအပ်ကြောင်း ခရီးသွားလုပ်ငန်းရှင်များနှင့် ဟိုတယ်လုပ်ငန်းရှင်များက ပြောသည်။
ခရီးသွားလုပ်ငန်းရှင် ဦးသက်လွင်တိုးက “ဘယ်သူက research လုပ်သလဲ။ အဲဒါမျိုးတွေလုပ်မှ အဖြေမှန်သိမှ barrier field tourism ဟာ ဘာ barrier တွေဖြစ်သလဲ။ နံပါတ်တစ်က visa ကလည်း barrier ဖြစ်တယ်။ visa on arrival တောင် ပြန်မပေးတော့ဘူး။ သံရုံးတွေနဲ့ အွန်လိုင်းကပဲ ပေးတော့တယ်။ နံပါတ်နှစ် insurance တွေ ကျနော်တို့ မြန်မာနိုင်ငံမှာက အခုထိ နောက်ပြန်ဆွဲတုန်း။ ဒေါ်လာ ၅၀ က စပေးရတယ်။ ၇၀၊ ၈၀ အထိလည်း ပေး ရတယ် အသက်အရွယ်ကြီးရင် ကြီးသလို။ ဒါတွေကို ဘာမှ ဆေးကုသမှု cover တွေ တိတိကျကျ မပြောဘဲနဲ့ မဖြစ် မနေ ဒေါ်လာ ၅၀ ယူရမယ်၊ ပေးမှပဲ visa လျှောက်ခွင့်ရမယ်။ အဲဒါကလည်း နှစ်ပတ်လား သုံးပတ်လား ပြီးသွားရင် အကျုံးမဝင်တော့ဘူး။ ဒါတွေဟာ ဘာတွေလဲဆိုတော့ ငမ်းငမ်းတက် ဒေါ်လာကို ယူတဲ့ သဘောမျိုး ဖြစ်တဲ့အတွက် ကြောင့် တချို့ Tourist တွေက လုံးဝ မကြိုက်တော့ဘူး” ဟု CNI သတင်းဌာနသို့ ပြောသည်။
ပြည်ပခရီးသွားများကို ပုဂံဒေသမှာ တွေ့ရစဉ်
သို့သော် နိုင်ငံတစ်နိုင်ငံ၏ ခရီးသွားလုပ်ငန်း ပြန်လည် တိုးတက်ကောင်မွန်ရေးတွင် ၎င်းနိုင်ငံ၏ ပုံရိပ်မှာ ကောင်း၊ မကောင်း ဆိုသည့်အပေါ်တွင် အဓိကကျကြောင်း ခရီးသွားလုပ်ငန်းရှင်များနှင့် ဟိုတယ်လုပ်ငန်းရှင်များက သုံးသပ် သည်။
ထို့အပြင် ဒေသတွင်း တည်ငြိမ်မှုမရှိခြင်း၊ လမ်းခရီး စစ်ဆေးရေးဂိတ်များ ပေါများခြင်း၊ လမ်းပန်း ဆက်သွယ်ရေး ကြန့်ကြာခြင်း အစရှိသည်တို့မှာလည်း ခရီးသွား ဧည့်သည်များအတွက် အတားအဆီးများ ဖြစ်နေကြောင်းနှင့် လမ်းပန်း ဆက်သွယ်ရေး အခြေအနေကြောင့် လမ်းကြောင်းပြောင်းလဲ၍ သွားရသည့် အခါတွင်လည်း ကုန်ကျ စရိတ်မှာ ပိုများသွားကြောင်း ၎င်းတို့က သုံးသပ်သည်။
သက်ဆိုင်ရာ ဌာနဆိုင်ရာများ အနေဖြင့် ခရီးသွားလုပ်ငန်းဖွံ့ဖြိုးရေးအတွက် နှုတ်ဖြင့် ပူးပေါင်းဆောင်ရွက်၍ မရ ကြောင်း၊ လက်တွေ့ မြေပြင် အခြေအနေအား သေချာကွင်းဆင်းလေ့လာပြီး မည်ကဲ့သို့ လုပ်ဆောင် သင့်သည်ကို အဖြေရှာသင့်ကြောင်း ၎င်းတို့က အကြံပြုသည်။
- By CNI
- Category: Travel
- Hits: 821
CNI News
၂၀၂၃ ခုနှစ်၊ မတ်လ ၇
မြန်မာ့ယဉ်ကျေးမှု အမွေအနှစ် ပုဂံဒေသသို့ လက်ရှိတွင် ပြည်တွင်းခရီးသွား ဝင်ရောက်မှု ယခင်ကထက် ပိုမိုဝင် ရောက်လျက် ရှိနေသည့်အပြင် သင်္ကြန်ရုံးပိတ်ရက် ကာလအတွက်လည်း ဟိုတယ်ကြိုတင်ဘိုကင် လုပ်ဆောင်မှုများ ရှိနေပြီဖြစ်ကြောင်း ပုဂံ - ညောင်ဦး ခရီးသွားဝန်ဆောင်မှု လုပ်ငန်းဆောင်ရွက်သူများထံမှ သိရသည်။
ပုဂံဒေသသည် တခြားသော မြို့များနှင့် နှိုင်းယှဉ်ပါက နယ်မြေတည်ငြိမ်သည့် အခြေအနေ ရှိနေသည့်အတွက် သင်္ကြန်ကာလတွင် ခရီးသွားများ ဦးစားပေး လာရောက်ကြမည် ဖြစ်ကြောင်း၊ သို့သော်လည်း ကိုဗစ်မတိုင်ခင်ကာလ အရေအတွက်ကို မရောက်ရှိနိုင်ကြောင်း ပုဂံခရီးသွား ဝန်ဆောင်မှုလုပ်ငန်းမှ ကိုကျော်စွာလင်းက CNI သတင်းဌာနသို့ ပြောသည်။
ကိုကျော်စွာလင်းက “သင်္ကြန်ကတော့ ပုံမှန်နှစ်တွေ အတိုင်းပါပဲ ကျနော်တို့ ကြိုတင်ဘိုကင်တွေ အခုကတည်းက နေပြီးတော့မှ ကြိုလုပ်ကြနေတာပေါ့နော်။ ဘာလို့ဆို နီးမှ သင်္ကြန်နီးမှ လာမယ်ဆိုလို့ရှိရင် ရက်ကြီး အခါကြီး ရက်တွေမှာ ပုဂံက ဟိုတယ်တွေ ပြည့်တာများတယ်။ အဲဒါကြောင့်မို့လို့ သင်္ကြန်က ၄ လပိုင်းဆိုပေမယ့် အခုကတည်း က ကြိုပြီးတော့ အခုကတည်းက ဘိုကင် ယူနေတဲ့သူတွေ ရှိကြပါတယ်။ အရင်တုန်းကပေါ့ဗျာ ကိုဗစ်မတိုင်ခင်က ကာလမျိုးနဲ့တော့ မျှော်လင့်လို့ မရဘူးပေါ့။ သို့သော် လက်ရှိကလည်း ပုဂံက တည်ငြိမ်နေတဲ့ အခြေအနေတစ်ခု ဖြစ်တယ်။ ပတ်ဝန်းကျင် မြို့တွေထက် စာရင်တော့ ပုဂံက ခရီးသွားဧည့်သည်တွေ လာတဲ့နေရာမှာ အဓိက စဉ်းစားတဲ့ မြို့တစ်မြို့ဖြစ်တော့ အရင်တုန်းက ကိုဗစ်မတိုင်ခင် ကာလမျိုးလောက်တော့ မျှော်လင့်လို့ မရဘူးဆိုပေမယ့် ကျနော်တို့ အဲဒီ နီးပါးလောက်တော့ လာမယ့်သင်္ကြန်မှာ ဘုရားဖူးဧည့်သည်တွေ ဖြစ်လာမှာပါ” ဟု ပြော သည်။
ပုဂံဒေသကိုတွေ့ရစဉ်
လက်ရှိတွင် ပုဂံဒေသသို့ ခရီးသွားလာမှု မြင့်တက်လျက်ရှိနေပြီး တစ်ရက်လျှင် ခရီးသွားဦးရေ ၁ သောင်းခန့်ရှိ ကြောင်း ဟိုတယ်နှင့် ခရီးသွားဝန်ကြီးဌာန၊ ပုဂံဌာနထံမှ သိရသည်။
သင်္ကြန်ကာလအတွင်း ပုဂံဒေသသို့ ဘုရားဖူးရန်အတွက် ကြိုတင်ပြင်ဆင်မှုများ ရှိနေပြီး ခရီးသွားလုပ်ငန်းများမှ စီစဉ်သည့် ခရီးစဉ်ထက် မိသားစုအလိုက် သွားရောက်သည့် ခရီးစဉ်များက ပို၍ များကြောင်း၊ ယခင်နှစ်များထက် ပုဂံဒေသသို့ ခရီးသွားဝင်ရောက်မှု နည်းနိုင်သော်လည်း တခြားသော ဒေသများထက် သင်္ကြန်ကာလတွင် ပုဂံသို့ ခရီးသွားလာရောက်မှု ပိုများလာမည် ဖြစ်ကြောင်း မြန်မာနိုင်ငံ ခရီးသွားလုပ်ငန်းရှင်များအသင်း ဥက္ကဋ္ဌ ဦးနောင်း နောင်းဟန်က CNI သတင်းဌာနသို့ ပြောသည်။
ဦးနောင်းနောင်းဟန်က “သင်္ကြန်ကာလ အတွင်းမှာတော့ ပုဂံဒေသ ခရီးသွားမှုတွေက မြင့်တက်လာလိမ့်မယ်လို့ ကျနော်ထင်တယ်။ ဘာလို့လဲဆိုတော့ ပြည်တွင်းမှာက တချို့တွေက ပြည်တွင်းခရီးသွားဖို့ ပုဂံဒေသကို ဘုရားဖူး သွားဖို့အတွက်ကို ပြင်ဆင်နေကြတာ ရှိတယ်။ ဘိုကင်တွေကတော့ ဘယ်လောက်ထိ ရနေတာရှိတယ်ဆိုတာ မသိပေမယ့်လည်း ဒီသင်္ကြန်ကာလ အတွင်းမှာတော့ ပုဂံက ခရီးသွားတွေ အများကြီး လာရောက်လိမ့်မယ်လို့ ကျနော်တို့ မျှော်လင့်ထားပါတယ်။ အဓိကက တချို့တွေက ကမ်းခြေဒေသကို သွားပြီးတဲ့သူတွေ ရှိတယ်ပေါ့နော်။ သွားပြီးတဲ့ ကမ်းခြေဒေသကို ထပ်မသွားတော့ဘူး။ ဘုရားဖူးဖို့အတွက် ပုဂံဒေသကို သွားဖို့အတွက် ပြင်ဆင်နေ ကြတာ ရှိပါတယ်။ ခရီးစဉ်အနေနဲ့ ပက်ကေ့စ်အနေနဲ့ ရောင်းတာမျိုးတွေတော့ မရှိပါဘူး။ ချောင်းသာ၊ ငွေဆောင် ကတော့ ကားရော၊ ဟိုတယ်ရောက ပက်ကေ့စ်လုပ်ပြီးတော့ ရောင်းနေတာမျိုးတော့ ရှိတယ်။ ပုဂံကျတော့ အဲဒီ လိုမျိုး ရောင်းတာမျိုးတွေ ကျနော်တို့ သိပ်မတွေ့ရဘူး။ မတွေ့ရဘဲနဲ့ တစ်မိသားစုကနေ ဒီကနေ တိုက်ရိုက် ဘိုကင် ပေါ့နော်၊ မိသားစုအလိုက် သွားတဲ့ဟာတွေကတော့ အများကြီး မြင့်တက်နေတယ်လို့ ကျနော်တို့ သိထားပါတယ်။ ပုဂံမှာ ခါတိုင်းနှစ်ထက် များလာနိုင်လားဆိုတော့ ခါတိုင်းနှစ်ထက် များတယ်လို့ ပြောလို့မရပေမယ့် ကျန်တဲ့ဒေသ တွေနဲ့ ယှဉ်ရင်တော့ ပုဂံက အများကြီး ပိုများလာပါလိမ့်မယ်” ဟု ပြောသည်။
ပုဂံဒေသကိုတွေ့ရစဉ်
ပုံမှန်ကာလများတွင် ပုဂံသို့ ခရီးသွားဝင်ရောက်မှုသည် တစ်ရက်လျှင် လူဦးရေ ၁ သောင်းခန့် ဝင်ရောက်မှုရှိ ခဲ့သည့်အတွက် သင်္ကြန် ပိတ်ရက် ခရီးသွားဝင်ရောက်မှုမှာ မြင့်တက်လာနိုင်ကြောင်း၊ ပြီးခဲ့သည့် ၂၀၂၂ ခုနှစ် သင်္ကြန်ကာလတွင် ပုဂံဒေသသို့ သင်္ကြန်ရုံးပိတ်ရက်ကာလ ၉ ရက်အတွင်း ခရီးသွားဝင်ရောက်မှု ၂ သိန်းနီးပါး ရှိခဲ့ကြောင်း ဟိုတယ်နှင့်ခရီးသွားလာရေးဝန်ကြီးဌာန(ပုဂံဌာနခွဲ)မှ သိရသည်။
ပုဂံတွင် ဟိုတယ် ၁၅၄ လုံးရှိသော်လည်း လက်ရှိတွင် ကိုဗစ်စည်းကမ်း လမ်းညွှန်ချက်များနှင့်အညီ ပြန်လည် ဖွင့်လှစ်ထားသည့် ဟိုတယ် ၇၄ လုံးသာ ရှိသေးကြောင်း၊ ကျန်ရှိသည့် ဟိုတယ်များသည် ဆက်လက် ပိတ်ထားဆဲ ဖြစ်သည်ဟု ဟိုတယ်နှင့် ခရီးသွားဝန်ကြီးဌာနထံမှ သိရသည်။
- By CNI
- Category: Travel
- Hits: 896
CNI News
၂၀၂၃ ခုနှစ်၊ မတ် ၄
ရခိုင်ပြည်နယ်အတွင်းရှိ ငပလီကမ်းခြေနှင့် ဧရာဝတီတိုင်းဒေသကြီးအတွင်းရှိ ချောင်းသာကမ်းခြေတို့ရှိ ဟိုတယ် များတွင် သင်္ကြန်ကာလအတွက် ဟိုတယ်အားလုံးနီးပါးရှိ အခန်းများ ကြိုတင်ဘိုကင် ပြည့်နေပြီဖြစ်ကြောင်း ဟိုတယ်နှင့် ခရီးသွားဝန်ကြီးဌာနထံမှ သိရသည်။
ငပလီကမ်းခြေရှိ ဟိုတယ်များတွင် ဧပြီလ ၁၃ ရက်နေ့ (သင်္ကြန်အကြိုနေ့) မှစတင်၍ ဧပြီလ ၁၆ ရက်နေ့ (သင်္ကြန် အတက်နေ့)အထိ ၄ ရက်အတွင်း ဟိုတယ်ဘိုကင်များ ပြည့်နေကြောင်း၊ ငပလီကမ်းခြေသို့ သင်္ကြန်ကာလအတွင်း ခရီးသွား ၂၀၀၀(နှစ်ထောင်)ခန့် ဝင်ရောက်လာနိုင်ခြေရှိသည်ဟု ခန့်မှန်းထားကြောင်း ဟိုတယ်နှင့် ခရီးသွားဝန်ကြီး ဌာန (ငပလီရုံးခွဲ)မှ ဒုတိယညွှန်ကြားရေးမှူး ဦးကျော်ဇေယျက CNI သတင်းဌာနသို့ ပြောသည်။
ဦးကျော်ဇေယျက “သင်္ကြန်အကြိုနေ့က စပြီးတော့ ၄ ရက်က ဟိုတယ် တော်တော်များများက ဘိုကင်တွေ ပြည့် နေပါပြီ ခင်ဗျာ။ မနှစ်က ငပလီမှာ ဟိုတယ်မှာ ညအိပ်တဲ့ ဧည့်သည်တွေက ပြည်တွင်း ပြည်ပက ၁၅၀၀ ကျော် လောက်ရှိတယ်။ ဒီနှစ်ဆိုရင် အစ်ကိုတို့က ၂၀၀၀ လောက် မှန်းထားပါတယ်။ ပိတ်ထားတဲ့ ဟိုတယ်တွေကတော့ နည်းနည်းတော့ ရှိပါသေးတယ်။ ပြန်လည်ပြီးတော့မှ အခုမှ ပြန်ပြီးတော့ အားယူပြီး ပြင်ဆင်နေတဲ့ ဟာတော့ ရှိပါ တယ်။ အဲဒါက ဟိုတယ်ကြီး ၃ လုံးနဲ့ တည်းခိုရပ်သာ ၇ လုံး ကျန်ပါသေးတယ်။ အခုက ၆၅ လုံးမှာ ၅၅ လုံး ဖွင့် ထားပါပြီ”ဟု ပြောသည်။
ငပလီ ကမ်းခြေတွင် တွေ့ရသော ခရီးသွားများ
ငပလီကမ်းခြေဒေသသို့ ပြည်တွင်းခရီးသွား ဝင်ရောက်မှုသည် မတ်လမှ စတင်၍ မြင့်တက်လျက်ရှိနေကြောင်း သိရသည်။
ထိုသို့ ခရီးသွား ဝင်ရောက်မှု မြင့်တက်နေခြင်းကတော့ အထူးသဖြင့် နွေရာသီ ကျောင်းပိတ်ရက် ကာလဖြစ်သည့် အတွက် မိသားစု ခရီးသွားများ ရှိနေကြောင်း၊ ကုမ္ပဏီ များမှ စေလွှတ်သည့် ခရီးစဉ်များနှင့်အတူ အစုအဖွဲ့အလိုက် လာရောက်မှုများ ရှိနေကြောင်းသည်ဟု သိရသည်။
ပြည်တွင်း ခရီးသွားများ အနေဖြင့် ငပလီကမ်းခြေသို့ တစ်နေ့လျှင် ၁၀၀၀ ခန့် ဝင်ရောက်လျက်ရှိနေပြီး လက်ရှိတွင် ပိုမို ဝင်ရောက်လျက်ရှိကြောင်း၊ နိုင်ငံခြားသား ခရီးသွားဝင်ရောက်မှုအနေဖြင့် တစ်နေ့လျင် ၅၅ ဦးခန့် ရှိသည်ဟု သိရသည်။
အလားတူ ချောင်းသာကမ်းခြေသို့ ခရီးသွား ဝင်ရောက်မှုသည်လည်း များပြားလျက်ရှိနေပြီး သင်္ကြန်ကာလအတွက် ဟိုတယ်ကြိုတင် ဘိုကင်များ ရှိနေကြောင်း၊ ကမ်းခြေမြင်ကွင်းကို ကြည့်ရှု၍ရသည့် ဟိုတယ်များသည် ဘိုကင်များ ပြည့်နေပြီဖြစ်ကြောင်း ဟိုတယ်နှင့် ခရီးသွားဝန်ကြီးဌာန (ချောင်းသာရုံးခွဲ) မှ တာဝန်ရှိသူတစ်ဦးက CNI သတင်း ဌာနသို့ ပြောသည်။
ငပလီရှိ ဟိုတယ်တစ်လုံးကိုတွေ့ရစဉ်
၎င်းက “ချောင်းသာလည်း ကျနော်တို့ ဘိုကင်တွေ ပြည့်ပါတယ်ခင်ဗျ။ လာတဲ့ တချို့ဧည့်သည်တွေကျတော့ အခန်း တွေက back side ရှိတယ်။ sea view တွေ ရှိတယ်ပေါ့။ ဟိုတယ် ၃၃ လုံးမှာ ၂၉ လုံးက ဖွင့်တယ်ဆိုတော့ ကမ်း ခြေဘက်နဲ့ back side ရှိတယ်။ ဒါပေမယ့် ဧည့်သည်တွေကလည်း ဘိုကင်တွေက sea view က အခန်းတွေက ဘိုကင်တွေက အကုန်ပြည့်တယ်လေ။ back side လည်း သူ့ဟာသူ ပြည့်မှာပါ။ ခါတိုင်းနှစ်ထက်တော့ ပိုများလာ လိမ့်မယ်ထင်တယ်။ ဘာလို့လဲဆိုတော့ ဒီနှစ်က ၁၀ တန်း စာမေးပွဲပြီးလို့ရှိရင်လည်း သူ့ဟာသူ ဧည့်သည်လေးတွေ၊ အခုတောင်မှ အတန်းငယ်လေးတွေ ပြီးတာတောင်မှ ဆင်းလာကြတာလေ။ ၁၀ တန်း စာမေးပွဲပြီးရင်တော့ ဧပြီလ အထိကိုတော့ ဧည့်သည်တွေက လာတဲ့ ဝင်ရောက်တဲ့ဟာက များမှာပါခင်ဗျ။ အဲလိုတော့ ကျနော် သုံးသပ်ထား တယ်။ ၄၊ ၅၊ ၆ ထောင်၊ ၇ ထောင်၊ ၈ ထောင်လောက်အထိ ဖြစ်နိုင်တယ်” ဟု ပြောသည်။
ယခင်နှစ်များတွင် သင်္ကြန်ကာလအတွက် ဟိုတယ်ကြိုတင် ဘိုကင်များကို မတ်လ နောက်ဆုံးပတ်မှသာ လုပ် ဆောင်လေ့ရှိကြသော်လည်း ယခုနှစ်တွင် မတ်လဆန်းပိုင်းမှ စတင်၍ လုပ်ဆောင်လျက်ရှိနေကြာင်း ဟိုတယ်နှင့် ခရီးသွားလုပ်ငန်းထံမှ သိရသည်။
သင်္ကြန်ကာလ ရုံးပိတ်ရက်များတွင် ပြည်တွင်း ခရီးသွားအနေဖြင့် ချောင်းသာ၊ ငွေဆောင်၊ ငပလီ ကမ်းခြေဒေသ သို့သာ အများဆုံး သွားရောက်လျက်ရှိကြောင်း၊ လက်ရှိတွင် တနင်္သာရီတိုင်းဒေသကြီး မြိတ်ကျွန်းစုဒေသသို့ သွားရောက်လိုကြောင်း ဆက်သွယ်လာမှုများလည်း ရှိသည်ဟု ဟိုတယ်နှင့် ခရီးသွားလုပ်ငန်းရှင်များအသင်းထံမှ သိရသည်။
- By CNI
- Category: Travel
- Hits: 787
CNI News
၂၀၂၃ ခုနှစ်၊ ဖေဖော်ဝါရီ ၂၇
မြန်မာနိုင်ငံ၏ လက်ရှိခရီးသွားကဏ္ဍတွင် ပြည်ပခရီးသွားဝင်ရောက်မှုမှာ မရှိသလောက် နည်းပါးသောကြောင့် ပြည်တွင်းခရီးသွားများကိုသာ အဓိကအားပြုနေရကြောင်း ခရီးသွားလုပ်ငန်းရှင်များနှင့် ဟိုတယ်လုပ်ငန်းရှင်များ က CNI သတင်းဌာနသို့ ပြောသည်။
လက်ရှိ မြန်မာနိုင်ငံ၏ ခရီးသွားလုပ်ငန်းအခြေအနေမှာ အခြားနိုင်ငံများကဲ့သို့ တစ်ရှိန်ထိုး ပြန်တိုးတက်ပြီး ကိုဗစ် မတိုင်ခင်ကာလများကဲ့သို့ ဖြစ်ရန်မှာ မလွယ်ကူသေးကြောင်း၊ လက်ရှိတွင် ခရီးသွားလုပ်ငန်းများမှာ လည်ပတ်သည့် အနေအထားဖြင့် ကြိုးစားရုန်းကန်သွားနေရမည့်အချိန်မှာသာ ရှိသေးကြောင်း မြန်မာနိုင်ငံ ခရီးသွား လုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။
၎င်းက “အခုဟာက ခရီးသွားလုပ်ငန်းမှာ အဓိကမောင်းနှင်အားက ပြည်တွင်းခရီးသွားလုပ်ငန်း ဖြစ်နေတယ်ပေါ့။ ဒီ ပြည်တွင်းခရီးသွားလုပ်ငန်းကနေပဲ ဟိုတယ်တွေ၊ ဒေသတွင်း စီးပွားရေးတွေကို အားပေးသလို ဖြစ်နေတာပေါ့။ ဒါကြောင့်မို့လို့ ကျနော်တို့အနေနဲ့ကတော့ အလေးထားသင့်တယ် ပြည်တွင်းခရီးသွားကိုပေါ့ ဒီအချိန်မှာ။ အဲဒီဟာလည်း ဆက်ပြီးတိုးတက်နေဦးမှာပါပဲ။ ပြည်ပခရီးသွားဝင်ရောက်မှုမှာတော့ နိုင်ငံတကာလေကြောင်းလိုင်းတွေ ပျံတဲ့အတွက် ဧည့်သည်တွေကတော့ ကြိုကြား ကြိုကြား ဝင်နေတာတွေရှိတယ်။ အများကြီးမဟုတ်ပေမယ့်လည်း ဝင်ရောက်မှုတော့ ရှိနေတယ်လို့ ပြောလို့ရပါတယ်။ ပြည်တွင်းခရီးသွားကဏ္ဍက ဒီအချိန်မှာ ခဏလေးအေးသွားပြီးတော့ ဒီနှစ်လပိုင်းအကုန် သုံးလပိုင်းဆိုရင် ကျောင်းတွေပိတ်ပြီဖြစ်တဲ့အတွက် အကုန်လုံး ပြည်တွင်းခရီးသွားက ပြန်ပြီးတော့ အမြင့်ဆုံးအချိန်ကို ပြန်တက်လာပြီပေါ့နော်။ တော်တော်များများက ကမ်းခြေဒေသတွေနဲ့ အောက်မြန်မာပြည်ဒေသ ဧရာဝတီတိုင်းဘက်ကို သွားကြတာများတယ်။ ပြည်တွင်းခရီးသွားကတော့ New Year အချိန်မှာ တက်ခဲ့တယ်။ ပြီးတော့ ဇန်နဝါရီနဲ့ ဖေဖော်ဝါရီမှာ အနည်းငယ် နည်းနည်းလေး ပြန်ကျဆင်းလာပေမယ့် အခု ဒီအချိန်မှာတော့ တစ်ရှိန်ထိုး အမြင့်ဆုံးအထိအောင် တက်ဖို့အတွက် လာပါတော့မယ်” ဟု ပြောသည်။
ရွှေတိဂုံဘုရားသို့ ဘုရားဖူး လာရောက်ကြသူများ
ပြည်တွင်း၊ ပြည်ပခရီးသွားဝင်ရောက်မှုသည် ၂၀၂၁ ခုနှစ်ဖြင့် နှိုင်းယှဉ်ပါက ပြီးခဲ့သည့် ၂၀၂၂ ခုနှစ်အတွင်း၌ တိုးတက်လာသဖြင့် ယခု ၂၀၂၃ ခုနှစ်တွင် ပိုမိုတိုးတက်အောင်လုပ်ဆောင်ရန် ဟိုတယ်နှင့် ခရီးသွားလာရေးဝန်ကြီးဌာန ပြည်ထောင်စုဝန်ကြီးမှ တိုက်တွန်းထားသည်။
သို့သော် ယခုနှစ်ခရီးသွားရာသီကာလဖြစ်သည့် အောက်တိုဘာလမှ စတင်ကာ ပြည်ပခရီးသွားများ ဝင်ရောက် လာသည်ဆိုပါက ကိုဗစ်မတိုင်ခင်ကာလများနှင့်နှိုင်းယှဉ်ကြည့်လျှင် ၁၀ ရာခိုင်နှုန်းခန့် မပြည့်သည့် အခြေအနေ သို့သာ ပြန်ရောက်မှာဖြစ်ကြောင်း၊ များပြားလှသည့် ပမာဏအရေအတွက်သို့ ရောက်ရှိဦးမည်မဟုတ်ကြောင်း မြန်မာနိုင်ငံ ခရီးသွားလုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က သုံးသပ်သည်။
ထို့ကြောင့် လက်ရှိ အဓိကအားထားနေရသည့် ပြည်တွင်းခရီးသွားများ သွားရောက်ကြသော ခရီးစဉ်များအပေါ် မူတည်ကာ ဝန်ဆောင်မှုနှင့်လုံခြုံမှု ယခုထက်ပိုမိုပေးနိုင်ပါက ပြည်တွင်းခရီးသွားလာမှု လျော့ကျမသွားစေရန် အတွက် ကောင်းမွန်ကြောင်း ရှမ်းပြည်နယ်မြောက်ပိုင်း ဟိုတယ်လုပ်ငန်းရှင်များအသင်းမှ ဥက္ကဋ္ဌ ဦးဇော်ဇော်က CNI သတင်းဌာနသို့ ပြောသည်။
သို့သော် နိုင်ငံတစ်နိုင်ငံ၏ ခရီးသွားလုပ်ငန်းသည် ပြည်တွင်းခရီးသွားတစ်ခုတည်းဖြင့် အဆင်မပြေသည့်အတွက် ပြည်ပခရီးသွားများ မြန်မာနိုင်ငံသို့ လာရောက်လည်ပတ်ကြစေရန်အတွက်လည်း လုပ်ဆောင်သင့်ကြောင်း ၎င်းက ပြောသည်။
ပုဂံဘုရားဖူးများကို တွေ့ရစဉ်
“ဟိုတယ်တွေဆိုရင် နိုင်ငံခြားသားဆိုရင် ဒေါ်လာ ၂၅ ပဲ တွက်၊ အခုလက်ရှိ ဒေါ်လာပေါက်ဈေးနဲ့ဆိုရင် ကျပ်ငွေနဲ့ ပြောင်းလိုက်ရင်တော့ ပိုရတာတော့ ရှိပါတယ်။ စားသောက်ဆိုင်တွေမှာလည်း ဒီလိုပါပဲ။ နိုင်ငံခြားသားဆိုရင် နိုင်ငံခြားသားဈေးနဲ့ ယူတာလေးတွေ တချို့ဆိုင်တွေမှာ ရှိတယ်။ အဲဒါမျိုးလေးတွေကျတော့ မြန်မာကျပ်ငွေထက် စာရင် ဒေါ်လာရတဲ့ ဟိုတယ်တို့ သူတို့သုံးတာဖြုန်းတာက ကျနော်တို့နိုင်ငံအတွက်တော့ အကျိုးရှိပါတယ်။ နိုင်ငံတော်ကတော့ သူတို့ဝင်လာပြီဆိုကတည်းက သူတို့ဆီကနေ အခွန်ရရှိမှုက ရှိသွားပြီဖြစ်ပါတယ်။ ပြည်ပက ကျနော်တို့ သိထားသလောက် ကျနော်တို့နိုင်ငံကို မငြိမ်းချမ်းဘူးထင်နေတာပေါ့လေ။ အဓိကကတော့ ကျနော်တို့ ဆီမှာ ငြိမ်းချမ်းပါတယ်ဆိုတာလေး၊ လာရင်လည်း safety ဖြစ်ပါတယ်၊ ဘေးအန္တရာယ်ကင်းရှင်းစွာလာလို့ရပါတယ်ဆိုတာတော့ အဓိကကတော့ awareness ပေးဖို့လိုတယ်ပေါ့။ သူတို့ကို လာလို့ရပြီ။ လိုအပ်တဲ့ဖြေလျှော့မှု တွေလည်း ပေးထားပြီဆိုတဲ့ သူတို့သိရှိလောက်တဲ့အချိန်ကျရင်တော့ အရင်လို ပြန်ဝင်လာမယ်လို့ ထင်ပါတယ်။ အခုတချို့က သိရသလောက်ဆိုရင် လာလည်တဲ့လူထက်စာရင် business ကိစ္စနဲ့ လာတဲ့နိုင်ငံခြားသားတွေ များတယ်ပေါ့” ဟု ၎င်းက ပြောသည်။
လက်ရှိတွင် ပြည်ပခရီးသွားများအား ဆွဲဆောင်နိုင်ရန်အတွက် နိုင်ငံတကာတွင် ပြုလုပ်မည့် ခရီးသွားပြပွဲများတွင် မြန်မာနိုင်ငံမှ ခရီးသွားလုပ်ငန်းကုမ္ပဏီအချို့မှ သွားရောက်ပြသရန် လုပ်ဆောင်လျက်ရှိသည်။
လက်ရှိတွင် မြန်မာနိုင်ငံသို့ လာရောက်လည်ပတ်သည့် ပြည်ပခရီးသွားများတွင် ထိုင်းနိုင်ငံသားခရီးသွားများမှာ အဓိကအများဆုံးဖြစ်ကြောင်းနှင့် လာမည့် သင်္ကြန်ပိတ်ရက်တွင် ပြည်တွင်းခရီးသွားများ ယခင်နှစ်ထက်ပို၍ တိုးတက်များပြားလာမည်ဖြစ်ကြောင်းလည်း ခရီးသွားလုပ်ငန်းရှင်များထံမှ သိရသည်။
- By CNI
- Category: Travel
- Hits: 1061
CNI News
၂၀၂၃ ခုနှစ်၊ ဖေဖော်ဝါရီ ၁၄
ဗုဒ္ဓဂါယာဘုရားဖူးရာသီသည် အောက်တိုဘာလမှ စတင်ကာ မတ်လကုန် ဧပြီလအထိသာ ဖြစ်သည့်အတွက် ဗုဒ္ဓဂါယာဘုရားဖူးများအား နိုင်ငံကူးလက်မှတ် ထုတ်ပေးခြင်းကို မတ်လကုန်တွင် ပြန်ရပ်မည်ဖြစ်ကြောင်း မြန်မာနိုင်ငံ ခရီးသွားလုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။
မြန်မာနိုင်ငံတွင် ကိုဗစ်အလွန်ကာလ ဗုဒ္ဓဂါယာဘုရားဖူး ခရီးစဉ်အား ၂၀၂၂ ခုနှစ်၊ နိုဝင်ဘာလမှ ပြန်လည် စတင် ခဲ့ကာ ဗုဒ္ဓဂါယာဘုရားဖူးများအတွက် နိုင်ငံကူးလက်မှတ် ထုတ်ပေးခြင်းကို ပြည်ထဲရေးသို့ သာသနာရေး ဝန်ကြီး ဌာနမှ တင်ပြထောက်ခံမှုဖြင့် လုပ်ပေးနေခြင်းဖြစ်ကြောင်း ၎င်းက ပြောသည်။
၎င်းက “ဒီဗုဒ္ဓဂါယာဘုရားဖူးရာသီ မတိုင်ခင်ကတည်းကပေါ့။ ဘုရားဖူးရာသီ မတိုင်ခင် ရှစ်လပိုင်း ကိုးလပိုင်း လောက် ကတည်းက သာသနာရေးဝန်ကြီးဌာနနဲ့ ဗုဒ္ဓဂါယာဘုရားဖူး စေလွှတ်ရေး ကော်မတီ ရှိပါတယ်။ သာသနာ ရေးဝန်ကြီးဌာန ကနေပြီးတော့ ဖွဲ့စည်းထားတဲ့ ဘုရားဖူးစေလွှတ်ရေးကော်မတီပေါ့နော်။ အဲဒီ ကော်မတီ ကနေ တဆင့်ပေါ့၊ ဒါတွေအကုန်လုံးကို စီစဉ်ထားတယ်။ စီစဉ်ထားပြီးတော့ အဲဒီကနေ ကုမ္ပဏီတွေကို စာရင်း သွင်းထား တယ်။ ဒီကုမ္ပဏီတွေကနေ တဆင့်ပေါ့နော်။ ဒီပတ်စပို့ လျှောက်ထားရင် သာသနာရေးဝန်ကြီးဌာန ကနေပြီးတော့ ထောက်ခံချက် ပေးနေတယ်။ ဒီဘုရားဖူးသွားတဲ့ သူတွေကြတော့ သူ့ရာသီလေးတစ်ခုပဲ သွားတာ ဖြစ်တဲ့အတွက် ပုံမှန်အတိုင်းဆိုရင် နောက်တစ်လလောက်ဆိုရင် ပတ်စပို့ ဘုရားဖူးအတွက် ပတ်စပို့လုပ်တာတွေက ပြန်ရပ် သွား ပြီပေါ့နော်။ သုံးလပိုင်း လေးလပိုင်းဆို ပြန်ပြီးသွားပြီ။ ရာသီလေးအတွင်းမှာပဲ ဘုရားဖူးဖို့အတွက် လာလျှောက် ထားကြတာဖြစ်တဲ့အတွက် နိုင်ငံတော်ကလည်း လုပ်ပေးနေတာလို့ ကျနော်တို့အနေနဲ့ ယူဆပါတယ်” ဟု ပြော သည်။
ပတ်စပို့ရုံးကိုတွေ့ရစဉ်
လက်ရှိတွင် မြန်မာတစ်နိုင်ငံလုံး၌ နိုင်ငံကူးလက်မှတ် ထုတ်ပေးခြင်းအား ၂၀၂၂ ခုနှစ်၊ ဒီဇင်ဘာလမှ စတင်ကာ ရက် အကန့်အသတ်မရှိ ရပ်ဆိုင်းထားသည့်အတွက် နိုင်ငံကူးလက်မှတ် လုပ်ချင်သူများ အနေဖြင့် ဗုဒ္ဓဂါယာ ဘုရားဖူး ရက်တိုခရီးစဉ်ဖြစ်သည့် ၂ ညအိပ် ၃ ရက်ခရီးကို ဝယ်ယူလာကြကြောင်းလည်း သိရသည်။
သို့သော် ဗုဒ္ဓဂါယာခရီးစဉ် ဝယ်ထားသည့်အတွက် နိုင်ငံကူးလက်မှတ် ရရှိခဲ့ပါက ထိုခရီးစဉ်အား မလိုက်ပါဘဲ ကျန်ခဲ့၍ မရကြောင်း၊ ထိုခရီးစဉ်အား မဖြစ်မနေ လိုက်ပါရမည်ဖြစ်ကြောင်း ဗုဒ္ဓဂါယာခရီးသွား လုပ်ငန်းတစ်ခုမှ တာဝန်ရှိသူတစ်ဦးက ပြောသည်။
၎င်းက “ပတ်စပို့လိုချင်တဲ့ လူကကြတော့ ရက်ရှည် မလိုက်နိုင်ဘူးလေ။ ရက်ရှည်က ဈေးများတယ်။ သာသနာရေး က ညီမတို့ကို ပြောပြီးသား။ ပြီးတော့ ညီမတို့က ထွက်သွားတဲ့လူရဲ့ စာရင်းတွေကို လေဆိပ်ကျရင် လ.ဝ.က ကို ချက်ချင်း စာရင်းပို့ပေးရတယ်။ လေဆိပ်ကို လ.ဝ.က ကို စာရင်းပို့ပြီးတဲ့ အပြင်ကို ဂါယာရောက်သွားရင် ဂါယာ အဝင် တုံးတွေကို ထုပြီးတော့ ခရီးစဉ်က ပြန်မလာသေးဘူးဆိုရင် viber နဲ့ ပြန်ပို့ပြီးတော့ Print ထုတ်ပြီး သာသာနာရေး ဦးစီးဌာနကို ပတ်စပို့ လူရုပ်ပါတဲ့ စာမျက်နှာကနေ နံပါတ်ပါတဲ့ဟာနဲ့ တွဲပြီးပို့ပေးရတယ်။ ပတ်စပို့ လုပ်စားလို့မရအောင် ကုမ္ပဏီတွေလည်း အကုန်ချုပ်ထားတယ်ရှင့်။ ညီမတို့လည်း အကုန် အာမခံတွေ ထုပေး ထားရတာ။ ဒါမျိုးတွေပဲ လုပ်စားမယ်ဆိုရင်လည်း Black list တခါတည်းပေးလိုက်မယ် ဆိုပြီးတော့လေ။ ညီမတို့ ကလည်း တကယ်ထွက်မယ့် သူကိုပဲ လုပ်ပေးတာ” ဟု ပြောသည်။
ရန်ကုန်လေဆိပ်ကိုတွေ့ရစဉ်
ဗုဒ္ဓဂါယာဘုရားဖူး ခရီးစဉ်အား တစ်ပတ်တာ ရက်ရှည်ခရီးစဉ်အဖြစ် သွားမည်ဆိုပါက ကုန်ကျစရိတ်မှာ ပျမ်းမျှ အမေရိကန်ဒေါ်လာ ၈၀၀ မှ ၁၀၀၀ ခန့်(မြန်မာငွေ သိန်းသုံးဆယ်ဝန်းကျင်) ရှိကြောင်း၊ ၂ ညအိပ် ၃ ရက် ခရီးစဉ် အဖြစ် သွားမည်ဆိုပါက အမေရိကန်ဒေါ်လာ ၄၀၀ မှ ၅၀၀ ဝန်းကျင်(မြန်မာငွေ ၁၅ သိန်းခန့်) ရှိကြောင်း မြန်မာ နိုင်ငံ ခရီးသွား လုပ်ငန်းရှင်များအသင်းမှ သိရသည်။
လက်ရှိတွင် ဗုဒ္ဓဂါယာခရီးစဉ်အား လေကြောင်းလိုင်း နှစ်ခုမှ တစ်ပတ်လျှင် ငါး ကြိမ်ပြေးဆွဲနေပြီး တစ်ကြိမ်လျှင် ခရီးသည် ၁၀၀ ကျော် ပါဝင်သည့်အတွက် တစ်ပတ်လျှင် ဗုဒ္ဓဂါယာဘုရားဖူးခရီးသွား ၅၀၀ မှ ၆၀၀ ခန့်အထိ ရှိ ကြောင်းလည်း သိရသည်။
ကိုဗစ်မတိုင်ခင်ကာလက ဗုဒ္ဓဂါယာဘုရားဖူးမှာ တစ်နှစ်လျှင် လူဦးရေ သုံးသောင်းကျော် ရှိကြောင်းနှင့် ယခုနှစ် တွင် တစ်သောင်းခွဲသာ ရှိနိုင်ကြောင်းလည်း မြန်မာနိုင်ငံ ခရီးသွားလုပ်ငန်းရှင်များအသင်းမှ ခန့်မှန်းထားသည်။
- By CNI
- Category: Travel
- Hits: 1010
CNI International News
မဲလ်ဘုန်း၊ ဇန်နဝါရီ ၃
သြစတြေးလျနိုင်ငံ၏ ကမ်းခြေတစ်ခုတွင် ရဟတ်ယာဉ်နှစ်စင်း တနင်္လာနေ့ မွန်းလွဲပိုင်းက ဝင်တိုက်မှု ဖြစ်ပွားခဲ့ပြီး ၄ ဦးသေဆုံးကာ ၃ ဦး ပြင်းပြင်းထန်ထန် ဒဏ်ရာရရှိခဲ့သည်ဟု အေပီသတင်းတွင် ဖော်ပြထားသည်။
တိုက်မိခဲ့သော ရဟတ်ယာဉ်နှစ်စင်းတွင် တစ်စီးသည် ပျံတက်ချိန်နှင့် နောက်တစ်စီးသည် ဆင်းသက်ချိန်တွင် တိုက်မိခဲ့ခြင်း ဖြစ်ကြောင်းသည်။
ထိုဖြစ်စဉ်သည် Gold Coast မြောက်ပိုင်း ကမ်းခြေတစ်ဖြစ်သော မိန်းကမ်းခြေ (Main Beach) တွင် ဖြစ်ပွားခဲ့ ကြောင်း ကွင်းစလန်းပြည်နယ် ရဲအရာရှိ ဂယ်ရီဝေါ်ရီးလ် (Gary Worrell) က သတင်းစာ ရှင်းလင်းပွဲတွင် ပြောခဲ့သည်။
ထို့နောက် အဆိုပါ ဖြစ်စဉ်တွင် ရဟတ်ယာဉ် တစ်စင်းသည် သဲသောင်ပြင်ပေါ်သို့ ဘေးကင်းစွာ ဆင်းနိုင်ခဲ့သော် လည်း နောက်တစ်စီးမှ အပျက်အစီးများသည် ဧရိယာတစ်လုံးပျံ့နှံ့သွားခဲ့ခြင်းကြောင့် အပျက်အစီးများဆီသို့ ရောက်ရှိရန် ခက်ခဲမှု ဖြစ်စေခဲ့သည်။
ထိခိုက်ဒဏ်ရာရရှိသူများကို ကယ်ဆယ်ရေးလုပ်နေစဉ်(AP)
သေဆုံးသူများနှင့် ပြင်းပြင်းထန်ထန် ဒဏ်ရာရရှိခဲ့သူများသည် ပျက်ကျခဲ့သော ရဟတ်ယာဉ်မှ ဖြစ်သည်ဟုလည်း သိရသည်။
ဝင်တိုက်မှု ဖြစ်စဉ် ဖြစ်ပွားပြီးနောက် ကမ်းခြေသို့ လာရောက်ကြသူများက အရေးပေါ် ကယ်ဆယ်ရေးအတွက် တတ်နိုင်သလောက် ကူညီပေးခဲ့ကြပြီး မပျက်ကျခဲ့သော ရဟတ်ယာဉ်သည် လေကာမှန် ကွဲသွားခဲ့သည်ဟု သိရသည်။
ထွက်ပေါ်လာသည့် ရုပ်သံမှတ်တမ်းများတွင်လည်း ပျံတက်သွားသော ရဟတ်ယာဉ် တစ်စင်းနှင့် ရေပေါ်တွင် ပျံသန်းနေသော ရဟတ်ယာဉ် တစ်စင်းတို့ ဝင်တိုက်ခဲ့သည်ကို တွေ့မြင်ခဲ့ရသည်။
ယခုဖြစ်ရပ်တွင် Sea World ကုမ္ပဏီမှ ရဟတ်ယာဉ် ပါဝင်ခဲ့သောကြောင့် ယခုဖြစ်ရပ်အတွက် ဝမ်းနည်းကြောင်း ကုမ္ပဏီဘက်က ထုတ်ပြန်ခဲ့သည်။
ထို့်နောက် တိုက်ခိုက်မှုအတွက် စုံစမ်းစစ်ဆေးမှုများတွင် ပူးပေါင်းပါဝင်မှု ပြုလုပ်သွားမည်ဟု ပြောသည်။ တိုက်မိခဲ့ သော ရဟတ်ယာဉ် နှစ်စင်းစလုံး ကုမ္ပဏီဘက်မှဖြစ်သလား၊ တစ်စီးထဲ ပါဝင်သလားဆိုသည်ကိုတော့ အတိအကျ ပြောဆိုခဲ့ခြင်း မရှိပေ။
Source:AP
- By CNI
- Category: Travel
- Hits: 934
CNI International News
ဘေဂျင်း၊ ဒီဇင်ဘာ ၂၉
တရုတ်အစိုးရသည်ခရီးသွားပတ်စ်ပို့များကိုပြန်လည်ထုတ်ပေးတော့မည်ဟု AP သတင်းတွင် ဖော်ပြသည်။ ယင်းက ကိုဗစ်တားဆီးရေးထိန်းချုပ်မှုများကို ဖြေလျော့မှုဆိုင်ရာ ကြီးမားသည့် ခြေလှမ်းအသစ်တစ်ခုဖြစ်ပြီး လာမည့်လ နှစ်ကူးအချိန်တွင် နိုင်ငံခြားထွက်မည့် တရုတ်ခရီးသွားအရေအတွက်လည်း မြင့်တက်လာဖွယ်ရှိနေသည်။
အင်္ဂါနေ့ကြေညာချက်က ကျဆင်းနေသော စီးပွားရေးအခြေအနေကို ပြန်လည်ဦးမော့လာစေရန် ကြိုးပမ်းမှုလည်း ဖြစ်သည်။ တရုတ်အစိုးသည် နိုင်ငံတွင်း ကိုဗစ်ရောဂါပျံ့နှံ့နေခြင်းကို တာဆီးရန် ကမ္ဘာပေါ်တွင် အတင်းကြပ်ဆုံး ထိန်းချုပ်ရေး စည်းမျဉ်းများကို ချမှတ်ခဲ့သည်။
ထိုထိန်းချုပ်မှုများကြောင့် ကိုဗစ်ကူးစက်နှုန်းမှာ လျော့ကျခဲ့သော်ငြားလည်း ပြည်သူများမှ ၎င်းတို့နေအိမ်များ တွင်သာ ကာလရှည်ပိတ်လှောင်ခံထားရခြင်းကြောင့် အမျက်ဒေါသထွက်ခဲ့ကြပြီး နိုင်ငံ၏စီးပွားရေးဖွံ့ဖြိုး တိုးတက်မှုကိုလည်း ထိခိုက်ခဲ့သည်။ ယခုကဲ့သို့ ပတ်စ်ပို့ဆိုင်ရာ ဖြေလျော့မှုကြောင့် ဇန်နဝါရီ ၂၂ ရက်တွင် စတင်မည့် နှစ်ကူးကာလတွင် တရုတ်ခရီးသွားများ၊ အာရှနှင့် ဥရောပဒေသများသို့ ခရီးသွားများ မြင့်တက်လာဖို့ ရှိနေသည်။ သို့သော် လက်ရှိတရုတ်နိုင်ငံအတွင်း ကိုဗစ်ကူးစက်မှုများ မြင့်တက်နေခြင်းကြောင့် ခရီးသွားများသည် ရောဂါပျံ့နှံ့စေမည်ကိုလည်း စိုးရိမ်မှုများရှိနေသည်။
တရုတ်နိုင်ငံအလယ်ပိုင်း ဂျန်ဇီ ပြည်နယ်ရှိ လေဆိပ်တွင် နိုဝင်ဘာ ၁ ရက်နေ့က ခရီးသည်များကို တွေ့ရစဉ် (ဓါတ်ပုံ-အေပီ)
အင်္ဂါနေ့ကြေညာချက်ကြောင့် နိုင်ငံတကာလက်မှတ်များကို ဘွတ်ကင်လုပ်ခြင်းနှင့် ဗီဇာဆိုင်ရာ အချက်အလက် များကို ရှာဖွေခြင်းတို့မှာ ငါးဆမှ ရှစ်ဆအထိမြင့်တက်လာသည်ဟု ခရီးသွားဝန်ဆောင်မှုကုမ္ပဏီနှစ်ခုက ပြောသည်။
တရုတ်ခရီးသွားများ အများဆုံးသဘောကျကြသည်မှာ ဂျပန်၊ ထိုင်း၊ တောင်ကိုရီးယား၊ အမေရိကန်၊ ဗြိတိန်နှင့် သြစတြေးလျတို့ဖြစ်သည်။ သို့သော် ဂျပန်၊ အိန္ဒိယ၊ တောင်ကိုရီးယားနှင့်ထိုင်ဝမ်တို့သည် တရုတ်တွင် ဗိုင်းရပ်စ် ကူးစက်မှုနှုန်းပြန်လည်မြင့်တက်နေခြင်းကို တုန့်ပြန်ရန် တရုတ်နိုင်ငံမှလာသော ဧည့်သည်များကို ရောဂါ စမ်းသပ်မှုများ လုပ်ဆောင်သွားမည်ဟု ဆိုသည်။ တရုတ်အစိုးရသည် ကိုဗစ်ရောဂါ စတင်ပြန့်ပွားလာသည့် ၂၀၂၀ ခုနှစ် အစပိုင်းကတည်းက နိုင်ငံခြားသားများအတွက် ဗီဇာထုတ်ပေးခြင်းနှင့် နိုင်ငံသားများအတွက် ပတ်စ်ပို့ ထုတ်ပေးခြင်းတို့ကို ရပ်တန့်လိုက်သည်။
နိုင်ငံခြားသွားမည့် ခရီးသွားများအတွက် လျှောက်လွှာများကို ဇန်နဝါရီ ၈ ရက်တွင် စတင်လက်ခံသွားမည်ဟု တရုတ်အမျိုးသားလူဝင်မှုကြီးကြပ်ရေးအေဂျင်စီက ပြောသည်။ ဗီဇာသက်တမ်းတိုးခြင်း၊ အသစ်ပြန်လုပ်ခြင်း သို့မဟုတ် ပြန်ထုတ်ခြင်းများကိုလည်းဆောင်ရွက်သွားမည်ဟု အေဂျင်စီကပြောသော်လည်း မည်သည့်အချိန်တွင် စတင်မည်ကိုတော့ မပြောထားပေ။ ဒါ့အပြင် နိုင်ငံခြားသားဧည့်သည်များကိုလည်း ပြန်လည်လက်ခံသွားမည်ဟု သိရသော်လည်း မည်သည့်အချိန်တွင် စတင်မည်ကို မသိရသေးပေ။
ယခုကဲ့သို့ပြောင်းလဲမှုများက နယ်စပ်ဖြတ် ကျော်ခရီးသွားလာမှုများအတွက် ပိုကောင်းသောအခြေအနေကို ဖန်တီးပေးကာ ကမ္ဘာလုံးဆိုင်ရာ စီးပွားရေးတိုးတက်မှုအတွက် ပိုမိုအကျိုးအမြတ်ဖြစ်ထွန်းစေလိမ့်မည်ဟုလည်း တရုတ်နိုင်ငံခြားရေးဌာန ပြောခွင့်ရပုဂ္ဂိုလ် ဝမ်ဝန်ဘင်း (Wang Wenbin) က ပြောသည်။
Source:AP
- By CNI
- Category: Travel
- Hits: 1647
CNI News
၂၀၂၂ ခုနှစ်၊ ဒီဇင်ဘာ ၂၇
မြန်မာနိုင်ငံသို့ ယခုနှစ်အတွင်း ပြည်ပခရီးသွားဝင်ရောက်မှုတွင် တရုတ်နိုင်ငံထက် ထိုင်းနိုင်ငံမှ လာရောက်သည့် ခရီးသွား အများဆုံးဖြစ်ကြောင်း မြန်မာနိုင်ငံ ခရီးသွားလုပ်ငန်းရှင်များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။
ထိုင်းနိုင်ငံသားများသည် ပြီးခဲ့သည့် အောက်တိုဘာလမှစတင်ကာ အများအပြား ဝင်ရောက်ခဲ့ခြင်းဖြစ်ပြီး ယခုနှစ် အတွက် ထိုင်းနိုင်ငံသား ခရီးသွားများ သောင်းကဏန်းခန့် ဝင်ရောက်ခဲ့ကြောင်း မြန်မာနိုင်ငံ ခရီးသွားလုပ်ငန်းရှင် များအသင်းမှ ဥက္ကဋ္ဌ ဦးနောင်းနောင်းဟန်က CNI သတင်းဌာနသို့ ပြောသည်။
ပြည်ပ ခရီးသွားများကိုတွေ့ရစဉ်
၎င်းက “လက်ရှိ အများဆုံးကတော့ ထိုင်းနိုင်ငံကနေလာတဲ့ ခရီးသွားတွေက အများဆုံးပါပဲ။ ဒီခရီးသွား လုပ်ငန်း တွေ ပြန်စတဲ့အခါကြတော့ တရုတ်နိုင်ငံနဲ့ လေကြောင်းပျံသန်းမှုက တိုက်ရိုက်ပျံသန်းမှုတွေက နည်းသွားတယ်။ ယခင်လို မရှိတော့ဘူး။ အခုလည်း တစ်ခုလောက်ပဲ ရှိတော့တယ်။ ကွမ်ကျိုးတို့ ဘာတို့လောက်ပဲ ရှိတော့တယ် ဆိုတော့လေ။ အဲဒါကြောင့်မို့လို့။ ဒါပေမယ့် ထိုင်းနိုင်ငံနဲ့ကြတော့ တစ်နေ့ကို လေကြောင်းပျံသန်းမှုက ၈ ကြိမ်၊ ၉ ကြိမ်လောက် အနည်းဆုံး ရှိနေတာကို။ ထိုင်းနိုင်ငံသားတွေက မြန်မာနိုင်ငံမှာ ရက်တို ခရီးစဉ်တွေပဲ များပါတယ်။ ရန်ကုန်ကို ဝင်လာတယ်။ ရန်ကုန်ကနေ ပဲခူး၊ ကျိုက်ထီးရိုး အဲဒီလောက်အထိပဲ သွားကြတာများပါတယ်။ ၂ ညအိပ် ၃ ရက်၊ ၃ ညအိပ် ၄ ရက် ခရီးစဉ်တွေပဲ များပါတယ်။ ထိုင်းနိုင်ငံတွေကတော့ ဘာသာရေးရော၊ လူနေမှု ပုံစံကအစ တူတဲ့အတွက် ရန်ကုန်မြို့မှာရှိတဲ့ ရွှေတိဂုံဘုရားတို့၊ နောက်တစ်ခါ ဗိုလ်တစ်ထောင် အဲဒီဘုရားတွေကို အဓိကထား ပြီးတော့ လည်ပတ်ကြတာ၊ ဘုရားဖူးကြတာများတယ်။ နောက်တစ်ခါ ပဲခူးမှာရှိတဲ့ ဘုရားတွေရော၊ ကျိုက်ထီးရိုး ဘုရားရောပေါ့။ အဲဒါတွေကို လည်ပတ်ကြတာများပါတယ်။ ထိုင်းနိုင်ငံသားတွေ အနေနဲ့ကတော့ ဒီနေရာတွေကိုက လည်ပတ်သင့်တဲ့ နေရာပေါ့နော်။ သူတို့နိုင်ငံသားတွေအနေနဲ့ တစ်သက်တာမှာ တစ်ခါ ရောက်ဖူးသင့်တဲ့ နေရာထဲ မှာ သတ်မှတ်ထားကြတယ်ပေါ့လေ” ဟု ပြောသည်။
ကိုဗစ်မတိုင်ခင် ကာလတွင် တရုတ်နိုင်ငံမှ ခရီးသွားသည် အများဆုံးဖြစ်ခဲ့သော်လည်း ယခုနှစ်တွင် မြန်မာနိုင်ငံသို့ အပန်းဖြေ လာရောက်သည့် တရုတ်ခရီးသွားများမှာ နည်းပါးသွားပြီး စီးပွားရေးအရ လာရောက်ကြသူတို့သာ များပြားခဲ့ကြောင်း သိရသည်။
ယခု ၂၀၂၂ ခုနှစ်သည် ပြီးခဲ့သည့် ၂၀၂၁ ခုနှစ်နှင့် နှိုင်းယှဉ်ပါက ပြည်တွင်းခရီးသွား လာမှုသည် အနည်းဆုံး နှစ်ဆခန့် သိသိသာသာ တိုးတက်များပြား လာသကဲ့သို့ ပြည်ပခရီးသွား ဝင်ရောက်မှုသည်လည်း ကိုဗစ်ကာလ အလွန်အတွက် တိုးတက်ကောင်းမွန်သည့် အနေအထားတစ်ခု ဖြစ်ကြောင်းလည်း ခရီးသွားလုပ်ငန်းရှင်များနှင့် ဟိုတယ်လုပ်ငန်းရှင်များက သုံးသပ်ကြသည်။
လာမည့် ၂၀၂၃ ခုနှစ်တွင် ပြည်ပခရီးသွားများသည် ယခုထက် ပိုမိုဝင်ရောက်လာမည်ဟု မျှော်လင့်ထားကြသည့် အတွက် ပြည်တွင်းတွင် လုံခြုံရေး၊ လျှပ်စစ်မီး ရရှိမှုတို့အပြင် အထင်ကရ နေရာများတွင် ခရီးသွားများအား ဈေး အတင်းအကြပ် လုရောင်းခြင်းများအား ကြပ်မတ်သင့်ကြောင်း ခရီးသွားလုပ်ငန်းရှင်များနှင့် ဟိုတယ် လုပ်ငန်းရှင် များက အကြံပြုသည်။
ကျိုက်ထီးရိုးဘုရားကိုတွေ့ရစဉ်
မြန်မာနိုင်ငံ ဟိုတယ်ဆိုင်ရာ လုပ်ငန်းရှင်များအသင်း (ပုဂံဟိုတယ်ဇုန်) ဥက္ကဋ္ဌ ဦးဇော်ဝိတ် က “23(၂၀၂၃)အတွက် ကျတော့ အန်ကယ်တို့လည်း မျှော်လင့်နေတာပေါ့။ လာမလာတော့ မပြောတတ်ဘူး။ လာမယ်လို့လည်း မျှော်လင့် ထားပါတယ်။ တရုတ်တို့ ရုရှားတို့။ ဒါပေမယ့် နိုင်ငံရေးတို့၊ လျှပ်စစ်မီး အနေအထားတို့က အန်ကယ်တို့လည်း ဘာမှ ပြောလို့မရဘူး ဖြစ်နေတယ်။ အဆိုးဆုံးကတော့ လျှပ်စစ်မီးကလည်း ဆိုးတယ်ပေါ့။ လုံခြုံရေးရယ်၊ လျှပ်စစ် မီးရယ်။ West Market ထက် East Market ကိုတော့ လာမယ့်နှစ်မှာ ပိုများလာမယ်လို့တော့ မျှော်လင့်ပါတယ်။ တကယ့် အခြေအနေ အန်ကယ်တို့နိုင်ငံရဲ့ infrastructure တွေ အဲဒါ အဆင်ပြေဖို့ပဲ လိုပါတယ်။ မဟုတ်ရင်တော့ ဧည့်သည်က ဝင်ရောက်ပါ့မလား။ လျှပ်စစ်မီးမရဘဲနဲ့ ဘာဧည့်သည်မှ ပရိုမိုးရှင်းလုပ်လို့ မရဘူး။ လျှပ်စစ်မီး မရရင် ဒီဇယ်ဆီတွေ သုံးရတော့မယ်။ ဒီဇယ်ဆီက မကျဘူးဆိုရင် ဘယ်လိုလုပ် ပရိုမိုးရှင်းသွား လုပ်လို့ရမှာလဲ။ မဖြစ်နိုင် တဲ့ ကိစ္စတွေ။ နံပါတ်တစ်က လုံခြုံရေး ကောင်းဖို့ပဲ လိုတာပါ။ နံပါတ်နှစ် လျှပ်စစ်မီး ရရမယ်။ လုံခြုံရေးလည်း မကောင်းဘူး။ လျှပ်စစ်မီးကလည်း မရဘူး။ ဆီဈေးကလည်း ဒီအတိုင်းပဲ တက်နေတယ်ဆိုရင် ဘယ်လိုလုပ် ဖြစ် တော့မလဲ” ဟု CNI သတင်းဌာနသို့ ပြောသည်။
လာမည့် ၂၀၂၃ ခုနှစ်တွင် ပြည်ပခရီးသွားများ ယခုနှစ်ထက် ပိုမိုဝင်ရောက်လာစေရန် နိုင်ငံတကာတွင် ပြုလုပ် သည့် ခရီးသွားပြပွဲအချို့သို့ မြန်မာနိုင်ငံမှ ခရီးသွားကုမ္ပဏီများက သွားရောက်ပြသရန် ပြင်ဆင်နေသည်။
ထို့ကြောင့် လာမည့် ဇန်နဝါရီ၊ ဖေဖော်ဝါရီ၊ မတ်လ စသည့် သုံးလအတွင်း ပြည်ပခရီးသွား ဈေးကွက်အဖြစ် တရုတ်၊ ရုရှားနှင့်၊ အနောက်နိုင်ငံများမှ လူငယ်လူရွယ်များ ဝင်ရောက်လာမည်ဟု မြန်မာနိုင်ငံ ခရီးသွား လုပ်ငန်းရှင်များ အသင်းက ခန့်မှန်းထားသည်။
တရုတ်နှင့် ရုရှား ခရီးသွားများ လာမည့် ၂၀၂၃ ခုနှစ်တွင် မြန်မာနိုင်ငံသို့ ဝင်ရောက်လာမည်ဟု ခန့်မှန်းထားကြခြင်း မှာ မကြာခင်တွင် လေကြောင်းလိုင်း တိုက်ရိုက် ပျံသန်းပြေးဆွဲမှုများ ပြုလုပ်ကြတော့မည့် အတွက်ကြောင့် ဖြစ် သည်ဟု သိရသည်။